Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 14-й де́нь.
Слу́жба пренесе́нію честны́хъ моще́й преподо́бнаго отца́ на́шего Ѳеодо́сія, игу́мена Кіевопече́рскаго.

НА ВЕЧЕРНИ,
Пое́мъ Блаже́нъ му́жъ, 1-я антифо́нъ. На Го́споди воззва́хъ: стихи́ры на 6. Предпра́зднства 3, [гла́съ 4. Подо́бенъ: Яко до́бля.

Апо́стольскій ли́че,* пресла́вно собери́ся отъ коне́цъ дне́сь,* и́бо Одушевле́ный Гра́дъ* всѣ́ми Влады́чествующаго,* отъ земли́ отхо́дитъ къ лу́чшимъ сла́вно,* ликовствова́ти съ Царе́мъ, Сы́номъ Ея́;* Ея́же боже́ственному погребе́нію единому́дренно,* съ вы́шними во́инствы,* пѣ́ніе исхо́дное воспо́йте.

Свяще́нныхъ сосло́віе,* ца́ріе же и кня́зи,* съ дѣви́ческими чи́нми,* ны́нѣ предвари́те,* вси́ лю́діе же, стецы́теся,* пѣ́снь надгро́бную возсыла́юще ку́пно,* и́бо всѣ́ми Влады́чествующая* хо́щетъ нау́тріе ду́шу преда́ти въ ру́цѣ Сы́ну,* преставля́ема къ вѣ́чнѣй оби́тели].

И преподо́бнаго 3, гла́съ то́йже. Подо́бенъ: Зва́нный свы́ше.

Егда́ о спасе́ніи твое́мъ* по́двигъ воспрія́лъ еси́,* и свѣ́томъ осія́лся еси́* отъ небе́съ неви́димо, преподо́бне,* тогда́ лука́вымъ духо́мъ прогони́тель яви́ся,* Бо́гомъ по́сланное же тебѣ́ зла́то пріе́мь,* ми́лостыни ще́дрый бы́лъ еси́ пода́тель тре́бующимъ,* пра́здныя сосу́ды жи́тницы напо́лнилъ еси́,* оби́димымъ изба́витель гото́вѣйшій* и проповѣ́дникъ вѣ́ры Христа́ Бо́га на́шего,* Его́же моли́* спасти́ и просвѣти́ти ду́ши на́ша.

Зарю́ вели́кую я́ко ви́дѣ,* я́вѣ а́нгельскую свѣ́тлость* уразумѣ́въ бы́ти,* явле́ніе честны́хъ твои́хъ моще́й,* въ стра́сѣ и ра́дости притече́ ско́ро* досточу́дный Стефа́нъ,* пребыва́я издале́ча зря́,* и ви́дѣ твоя́ соста́вы цѣ́лы* и нетлѣ́нны пребы́вшія,* прославля́ющу тя́ Христу́ Бо́гу на́шему,* Его́же моли́* спасти́ и просвѣти́ти ду́ши на́ша.

Егда́ пріидо́ша въ пеще́ру твою́, преподо́бне,* хотя́щіи пренести́ тѣ́ло твое́,* тогда́, гро́бъ откры́вше, ра́дующеся,* ви́дѣша лежа́щія твоя́ мо́щи святолѣ́пно,* соста́вы вся́ цѣ́лы* и тлѣ́нію неприча́стны,* и главны́я власы́ присо́хша къ главѣ́,* лице́ же свѣ́тлостно,* о́чи и устнѣ́ богосло́вныя соедине́ны,* прославля́ющу тя́ Христу́ Бо́гу на́шему,* Его́же моли́* спасти́ и просвѣти́ти ду́ши на́ша.

Сла́ва, гла́съ 6:

Приспѣ́ дне́сь пра́здникъ пренесе́нія честны́хъ твои́хъ моще́й, преподо́бне о́тче на́шъ Ѳеодо́сіе, созыва́ющи всѣ́хъ вѣ́рно торжествова́ти, въ па́мять твою́ глаго́люще: ра́дуйся, Боже́ственнаго Ду́ха жили́ще всеосвяще́нное и сто́лпе благоче́стія; ра́дуйся, и́же Бо́гомъ да́нный тебѣ́ тала́нтъ умно́живый, преподо́бнымъ похвало́; ра́дуйся, мíру свѣти́льниче всесвѣ́тлый и на́ше утѣше́ніе. И ны́нѣ, предстоя́ Христо́ву престо́лу, моли́ изба́витися на́мъ отъ вся́каго гнѣ́ва и ско́рби, и бу́дущую сла́ву получи́ти, вѣ́рно пра́зднующимъ святу́ю твою́ па́мять.

И ны́нѣ, предпра́зднства, [гла́съ 4]:

Всечестно́е Твое́ успе́ніе, [Пресвята́я Дѣ́во Чи́стая, а́нгелъ мно́жество на небеси́, и человѣ́ческій ро́дъ на земли́, ублажа́емъ, я́ко Ма́ти была́ еси́ Творца́ всѣ́хъ Христа́ Бо́га, Того́ моля́щи о на́съ не преста́й, мо́лимся, и́же на Тя́ съ Бо́гомъ упова́ніе поло́жшихъ, Богоро́дице Всепѣ́тая и Неискусобра́чная].

Вхо́дъ. Проки́менъ дне́. Чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры предпра́зднства, [гла́съ 2. Подо́бенъ: До́ме Евфра́ѳовъ.

О, чудесе́ но́ваго!* О, зна́менія стра́ннаго!* Ка́ко ме́ртвость подъя́тъ* живоно́сная Отрокови́ца,* и гро́бомъ ны́нѣ покрыва́ется!

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Вся́ко земноро́дныхъ* естество́ да лику́етъ:* се́ бо Дѣ́ва,* Ада́мова дщи́,* къ небеси́ преставля́ется.

Сти́хъ: Кля́тся Госпо́дь Дави́ду и́стиною,* и не отве́ржется ея́.

Пріими́ ми во умѣ́,* о́дръ Дѣ́вы,* лико́мъ апо́стольскимъ благолѣ́пно окружа́ющимъ,* и пою́щимъ исхо́дное].

Сла́ва, преподо́бнаго, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Ѳеодо́сіе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ и вра́жію обличи́вый си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́ми же моли́ся Го́сподеви, поми́ловатися душа́мъ на́шимъ.

И ны́нѣ предпра́зднства, гла́съ 2. [Анато́ліево]:

Яже небе́съ вы́шшая су́щи, [и херуви́мъ сла́внѣйшая, и всея́ тва́ри честнѣ́йшая, Яже премно́гія ра́ди чистоты́, Присносу́щнаго Существа́ прія́телище бы́вши, въ Сыно́внѣ ру́цѣ дне́сь всесвяту́ю предае́тъ ду́шу, и съ Не́ю исполня́ются вся́ческая ра́дости, и на́мъ да́руетъ ве́лію ми́лость].

Тропа́рь преподо́бнаго, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, архіере́евъ богодухнове́нное удобре́ніе, Ѳеодо́сіе прему́дре, уче́ньми твои́ми вся́ просвѣти́лъ еси́, цѣвни́це духо́вная, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, предпра́зднства, гла́съ 4:

Лю́діе, предыгра́йте, рука́ми [пле́щуще вѣ́рно, и любо́вію собери́теся, дне́сь ра́дующеся и свѣ́тло восклица́юще вси́ весе́ліемъ: Бо́жія бо Ма́ти и́мать отъ земны́хъ къ вы́шнимъ прейти́ сла́вно, Юже пѣ́сньми при́сно я́ко Богоро́дицу сла́вимъ].


НА УТРЕНИ,
[На Бо́гъ Госпо́дь:] тропа́рь предпра́зднства, [два́жды. Сла́ва,] свята́го. [И ны́нѣ, предпра́зднства.]

По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й, Спа́се.

Гро́бъ, идѣ́же положе́нъ бы́лъ еси́ въ це́ркви твое́й, преподо́бне, благоуха́ніе испуща́етъ приходя́щимъ вѣ́рою, и па́мять твоя́ весели́тъ сердца́ вѣ́рныхъ. Тѣ́мъ, Влады́цѣ предстоя́, о́тче, помина́й на́съ, вѣ́рою творя́щихъ па́мять твою́, свѣтоно́сную и всеосвяще́нную. [Два́жды.]

Сла́ва, и ны́нѣ, богоро́диченъ:

Всѣ́хъ Творца́, Бо́га же и Содѣ́теля, Всенепоро́чная Чи́стая, Ду́хомъ Боже́ственнымъ въ ложесна́хъ зачала́ еси́, Его́же сла́вяще, Тя́ воспѣва́емъ, Дѣ́во, я́ко Пала́ту Царя́ всѣ́хъ, и мíра заступле́ніе.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

Ра́дуется Це́рковь Христо́ва, я́ко на свѣ́щникъ свяще́нный взира́ющи, и свѣти́льника свѣтоно́сна, и боже́ственное сокро́вище, ра́ку моще́й твои́хъ, иму́щи, вся́ созыва́етъ въ па́мять твою́ сла́вити Го́спода, Его́же моли́ спасти́ся душа́мъ на́шимъ. [Два́жды.]

Сла́ва, и ны́нѣ, предпра́зднства, гла́съ 4. Подо́бенъ: Удиви́ся Іо́сифъ.

Ши́ршая небе́съ я́вльшися [на земли́, Ро́ждшая пло́тію всѣ́хъ Содѣ́теля, ны́нѣ въ са́мая небеса́ отъ земли́ преставля́ется, пра́ведныхъ у́бо ду́ши, смотря́юще Тя́, а́нгельстіи же ли́цы, зря́ще, я́ко Цари́цѣ, хвалу́ досто́йно всегда́ Тебѣ́ прино́сятъ. Тѣ́мже моля́щи не преста́й о воспѣва́ющихъ Тя́].

По поліеле́и сѣда́ленъ, гла́съ 8. Подо́бенъ: Прему́дрости.

Дне́сь а́нгельская явле́нія ви́дѣна бы́ша, преподо́бне, во обрѣ́теніи моще́й твои́хъ, явля́хубося всѣ́мъ, я́ко столпи́ о́гненніи, и я́ко дуги́ свѣтоза́рны, стоя́ще надъ пеще́рою. И отту́ду пріидо́ша на ве́рхъ святы́я це́ркве, на мѣ́сто гро́ба твоего́, угото́ваннаго на положе́ніе тѣ́ла свята́го твоего́, преблаже́нне Ѳеодо́сіе, Го́споду вельми́ тя́ прославля́ющу. Сего́ ра́ди вопіе́мъ ти́: моли́ Христа́ Бо́га, грѣхо́въ оставле́ніе дарова́ти, пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, предпра́зднства, гла́съ 5. Подо́бенъ: Собезнача́льное Сло́во.

Ангелъ мно́жества славосло́вятъ [Тя́, и человѣ́ческій ро́дъ предпра́зднственная воспѣва́етъ Ти́, я́ко преста́вилася еси́ отъ земли́ къ Ро́ждшемуся изъ Тебе́, Богоро́дице Чи́стая, и мо́лишися прилѣ́жно изба́витися отъ бѣ́дъ вѣ́рою соверша́ющимъ Твое́, Дѣ́во, преставле́ніе].

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, [я́же воздаде́ ми́?] Вся́кое дыха́ніе... Ева́нгеліе преподо́бнаго, [отъ Матѳе́я, зача́ло 43].

По 50-мъ псалмѣ́ стихи́ра, гла́съ 6:

Преподо́бне о́тче Ѳеодо́сіе, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ. Де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ предпра́зднства, со ирмосо́мъ на 6 и преподо́бнаго Ѳеодо́сія на 8.

[Кано́нъ предпра́зднства, гла́съ 5.
Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Гро́бу, Дѣ́ву пріе́мшу, присту́пимъ, вѣ́рніи, благово́нія боже́ственна прія́ти тща́щеся: въ се́мъ бо излія́ся Мѵрополо́жницы дыха́ющее благово́ніе, ду́ши благоуха́ющее.

Взя́тся Сіо́нъ изъ горы́, Сіо́нъ одушевле́нный, и почи́ во гра́дѣ Геѳсима́ніи, я́ко одушевле́нъ, Бо́га Безсме́ртнаго пріе́мши, въ нѣ́дрѣхъ нетлѣ́нныхъ почи́ти.

Трубы́ возшумѣ́вше богоно́сныхъ муже́й, воззови́те вельми́ апо́стольская уста́: си́лы, возми́те врата́, пріими́те Цари́цу въ лу́чшая.

Сме́рть ка́ко подъя́тъ, Живота́ присносу́щнаго я́вѣ ро́ждшую па́че естества́, Всенепоро́чную? Но, сію́ отри́нувъ Влады́ка, преста́ви Тя́ къ прія́тію небе́сному.

Инъ кано́нъ преподо́бнаго,] гла́съ 4.
Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Пренесе́нія твоего́ честну́ю восхваля́ющу ми́, о́тче преблаже́нне, па́мять, съ небесе́ просвѣще́ніе пода́ти мнѣ́ моли́, Ѳеодо́сіе, и душетлѣ́нныхъ прегрѣше́ній проще́ніе.

Послѣ́довати восхотѣ́въ Го́споду, блаже́нне, ко преподо́бному Анто́нію прише́лъ еси́, съ ни́мже въ пеще́рѣ затвори́вся мíра кромѣ́, Бо́гу неотлу́ченъ пребы́лъ еси́.

Поревнова́въ Вели́кому Ѳеодо́сію, о́бщаго житія́ нача́льнику, нра́вомъ и житіе́мъ, преподо́бне, того́ послѣ́дуя по́двигомъ и трудо́мъ, Влады́цѣ Христу́ благоугоди́лъ еси́.

Богоро́диченъ: Освяти́, Влады́чице, оскверне́нное се́рдце мое́, Яже Пресвято́е Сло́во ро́ждшая, су́щи всѣ́хъ святѣ́йшая вы́шнихъ си́лъ, еди́на Всепѣ́тая.

Катава́сія: Преукраше́нная Боже́ственною сла́вою...

Пѣ́снь 3.

[Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Пѣ́сни надгро́бныя ны́нѣ возсле́мъ Чи́стѣй, Зи́ждителя Богороди́тельницѣ, и со безпло́тными во́инствы о́дръ живоно́сный окружи́мъ, ра́дующеся, я́ко престо́лъ Боже́ственный Святы́й.

Лежа́щу и просте́рту ви́дяще, о́чи смѣжа́щу, живопода́тельный, боже́ственный и при́сный исто́чникъ, пріиди́те, вѣ́рными сердцы́ сле́зы точа́ще, прико́снемся Сея́ нетлѣ́нному тѣлеси́.

Боже́ственное и благоро́дное Бо́жіе жили́ще, сѣда́лище вои́стинну и гра́дъ одушевле́нъ всѣ́хъ Царя́ вои́стинну, пода́ждь всѣ́хъ согрѣше́ній на́шихъ па́мятію Твое́ю оставле́ніе и отъ бѣ́дъ спаси́.

Инъ.]

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Свѣ́тъ немерца́ющій возсія́ тебѣ́, я́ко пра́веднику, его́же отъ ю́ности пра́вымъ се́рдцемъ взыска́лъ еси́, Ѳеодо́сіе. Сего́ ра́ди во Свѣ́тѣ непристу́пномъ вѣ́чно весели́шися.

Собра́ся тогда́ мно́жество и́ночествующихъ съ наста́вникомъ, е́же пренести́ мо́щи преподо́бнаго Ѳеодо́сія, съ ни́ми и мы́ дне́сь въ па́мять пренесе́нія его́ духо́вно пра́зднуемъ.

Многолѣ́тное поще́ніе, я́ко въ чужде́мъ тѣлеси́, страда́льчески преше́дъ, ко Го́споду взы́де, насыща́тися пи́щи нетлѣ́нныя со всѣ́ми святы́ми.

Богоро́диченъ: Кропле́ніемъ ми́лости Твоея́, Дѣ́во, у́гліе погаси́ мои́хъ страсте́й, Богора́дованная, и уга́сшій возжзи́ свѣти́льникъ се́рдца моего́, златы́й свѣ́щниче, Всенепоро́чная.

[Конда́къ предпра́зднства, гла́съ 4. Подо́бенъ: Яви́лся еси́ дне́сь.

Въ сла́внѣй па́мяти Твое́й вселе́нная, невеще́ственнымъ Ду́хомъ испещре́на, у́мно съ весе́ліемъ зове́тъ Тебѣ́: ра́дуйся, Дѣ́во, христіа́нъ похвало́.

Икосъ:

Иже на о́блацѣхъ свѣ́тло отъ всѣ́хъ коне́цъ собра́вый Своя́ боже́ственныя апо́столы къ тѣ́лу Твоему́, Чи́стая, показа́ Тя всѣ́мъ, Богоро́дицу, и стра́шенъ черто́гъ преукра́шенъ, Бо́гъ и Сы́нъ Тво́й бы́въ, взе́мъ ду́шу Твою́ на ру́ку пречи́стую, положи́лъ е́сть въ раи́: та́мо бо живо́тное е́сть дре́во, отъ него́же я́дше ме́ртвенніи, безсме́ртіе обрѣто́ша Тобо́ю. Тѣ́мже и вопіе́мъ Тебѣ́: ра́дуйся, Дѣ́во, христіа́нъ похвало́].

Сѣда́ленъ преподо́бнаго, гла́съ 4. Подо́бенъ: Яви́лся еси́ дне́сь.

Па́мять боя́щихся Бо́га весели́тъ вѣ́рныхъ: пріиди́те у́бо, и мы́ въ па́мять пренесе́нія преподо́бнаго отца́ на́шего Ѳеодо́сія воспое́мъ Бо́га, сего́ просла́вльшаго. [Два́жды.]

Сла́ва, и ны́нѣ, предпра́зднства, гла́съ 3. Подо́бенъ: Красотѣ́ дѣ́вства.

Предпра́зднственная преставле́нія торжеству́юще Богома́тере, ра́дующеся, свѣ́тло къ Не́й воззове́мъ: ра́дуйся, взе́млющаяся отъ земли́ къ небеси́; ра́дуйся, вся́ концы́ Твои́мъ Успе́ніемъ оживи́вшая. Тѣ́мже ны́нѣ преходя́щи, воспомина́й мíръ, Обра́дованная.

Пѣ́снь 4.

[Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Небе́сніи ли́цы веселя́тся и уготовля́ются Бо́жію Чи́стую Ма́терь прія́ти, Цари́цу всѣ́ми тва́рьми благоче́стно госпо́дствующую.

Да уклоня́тся возду́шніи ду́си, да отсту́питъ же са́мый міроде́ржецъ, да па́даетъ посра́мленъ, ви́дя возноша́ему Бо́жію Ма́терь.

Не ктому́ обра́зно въ гада́ніихъ, свяще́нники ковче́гъ завѣ́та носи́мь е́сть: святы́ми апо́столы вои́стинну Бо́жія Ма́ти носи́ма е́сть.

Усну́вши въ боже́ственное поко́ище, почи́ла еси́ въ жи́зненныхъ сокро́вищахъ немину́ющихъ, Голуби́це Соломо́ня, добра́ же, и красна́, и всечестна́.

Инъ.]

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Умертви́въ плотско́е мудрова́ніе, страсте́й мо́ре мяте́жное изсуши́лъ еси́, еди́ною наде́ждою вѣ́чныхъ бла́гъ укрѣпи́вся, я́же ны́нѣ прія́лъ еси́, преподо́бне, извѣ́стно.

Нѣ́сть лѣ́по овца́мъ своего́ лише́ннымъ бы́ти па́стыря, ни па́стырю та́кожде своя́ о́вцы оставля́ти, твои́ ученицы́, собра́вшеся, глаго́лаху, о́тче Ѳеодо́сіе.

Не добро́ е́сть пребыва́ти учи́телю на́шему внѣ́ оби́тели и це́ркве своея́, ю́же са́мъ основа́лъ е́сть, твои́ ученицы́ глаго́лаху, о́тче преподо́бне.

Богоро́диченъ: Смире́нное, еди́на Чи́стая, и прокаже́нное се́рдце мое́ нечи́стыми страсте́й наведе́ніи, я́ко вра́чь, исцѣли́ и руки́ бѣсо́вскія исхити́.

Пѣ́снь 5.

[Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Чи́стое Ду́ха Пресвята́го боже́ственное селе́ніе, на Сина́йстѣй горѣ́ бы́въ, дохну́, и всю́ тва́рь па́че естества́ просвѣти́.

Всего́ Божества́ была́ еси́ жили́ще, тѣ́мже Тя́ Божество́ всю́, Ма́ти, до конца́ преста́ви, отъ земли́, Богороди́тельнице, къ небеси́ прехо́дну.

Іису́съ Пребоже́ственный сла́вы Госпо́дь, отъ Твоего́ чре́ва рожде́йся за милосе́рдіе, Са́мъ Тя́ преста́ви отъ земли́, Богома́ти, съ душе́ю и тѣ́ломъ.

Инъ.]

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Просвѣти́ся дне́сь пресла́вно хра́мъ Богома́тере, пріе́мши своего́ служи́теля преподо́бнаго, сія́юща свѣтови́дно и лучи́ исцѣле́ній испуща́юща всѣ́мъ неоску́дно, съ вѣ́рою къ нему́ приходя́щимъ.

Благо́е совѣща́ніе ва́ше, о богоблаже́нніи отцы́! кра́сное совокупле́ніе, по́стническій собо́ре, я́ко потща́стеся пренести́ ва́шего па́стыря и учи́теля, свѣтоза́рнаго свѣти́льника, бо́драго ума́.

Мѣ́сто, идѣ́же положены́ бы́ша честны́я мо́щи твоя́, преподо́бне, прокопа́вше, егда́ обрѣто́ша, а́біе наслади́шася благоуха́нія Ду́ха Свята́го, оби́льнымъ исцѣле́ніемъ всѣ́хъ сердца́ веселя́щаго.

Богоро́диченъ: Пѣснопою́щи Тя́, Всепѣ́тая, сла́влю вели́чія Твоя́. Тѣ́мже нечи́стыхъ мя́ страсте́й изба́ви и вѣ́чныя сла́вы сподо́би.

Пѣ́снь 6.

[Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Со а́нгелы теце́мъ, со арха́нгелы же, и властьми́, и нача́лы, и престо́лы, и си́лами въ Сіо́нъ, вели́кое чу́до у́зримъ.

Яже Живота́ Роди́тельница, ка́ко подъя́тъ сме́рть тлѣ́нну, убѣжа́вши вся́кія тли́? Но вои́стинну Твоя́ па́че естества́, Чи́стая Дѣ́во, та́инства.

Сіо́няне ели́цы, свѣщи́ возжжи́те, свѣ́томъ Обложе́нную, пріиди́те, усря́щемъ въ Геѳсима́ніи, и Сію́ пѣ́сньми прово́димъ.

Инъ.]

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.

Пріиди́те, вѣ́рніи, пѣ́сни духо́вныя принося́ще, Ѳеодо́сія любо́вію ублажи́мъ и по до́лгу воспое́мъ, па́мять пренесе́нія его́ свѣ́тло пра́зднующе.

Воспое́мъ свѣ́тлаго, изря́днаго въ чудесѣ́хъ, вели́каго въ добродѣ́телехъ, до́бляго житіе́мъ, сла́внаго уго́дника Христо́ва и Пречи́стыя Богоро́дицы, блаже́ннаго Ѳеодо́сія.

На небесѣ́хъ ны́нѣ ликовству́я со а́нгельскими во́инствы ра́достно, о́тче пребога́те Ѳеодо́сіе, благода́ть и спасе́ніе дарова́ти моли́ся, любо́вію пою́щимъ тя́.

Богоро́диченъ: Ума́ моего́ уврачу́й сокруше́ніе, Всенепоро́чная, исцѣли́ стра́сти души́ моея́, и уны́нія тму́ потреби́, я́ко да во хвале́ніи Тя́ пою́, Присноблаже́нную, Богоро́дице Всепѣ́тая.

Конда́къ, гла́съ 8. Подо́бенъ: Взбра́нной.

Наслѣ́дникъ отце́въ бы́лъ еси́, преподо́бне, тѣ́хъ послѣ́дуя житію́ и уче́нію, обы́чаю и воздержа́нію, моли́твѣ же и предстоя́нію. Съ ни́миже, имѣ́я дерзнове́ніе ко Го́споду, проще́ніе согрѣше́ній и спасе́ніе испроси́ вопію́щимъ ти́: ра́дуйся, о́тче на́шъ Ѳеодо́сіе.

Икосъ:

Ангельски пожи́въ на земли́, преподо́бне, а́нгеловъ похвалы́ на небеси́ сподо́бился еси́. Ка́ко у́бо воспою́ твое́ пресвѣ́тлое житіе́ и премно́гія твоя́ добродѣ́тели, зна́менія же и чудеса́, и́миже вся́ просвѣща́еши, я́ко со́лнце? Тѣ́мже вопію́ тебѣ́ такова́я: ра́дуйся, отъ младе́нства Христу́ послѣ́довавый; ра́дуйся, вся́ земна́я я́ко уме́ты вмѣни́вый; ра́дуйся, прило́ги страсте́й умертви́вый; ра́дуйся, обличи́вый нача́ла тмы́ и вла́сти; ра́дуйся, небе́сныхъ взыска́вый па́че земны́хъ; ра́дуйся, вожделѣ́вый прему́дрости Бо́жія; ра́дуйся, сподо́бивыйся зрѣ́ти Непостижи́маго; ра́дуйся, Тро́ицы Пресвяты́я проповѣ́дниче; ра́дуйся, Богоро́дицы служи́телю; ра́дуйся, и́ноковъ сла́во и похвало́; ра́дуйся, и́мже избавля́емся отъ вре́да вра́жія; ра́дуйся, о не́мже спаса́емся вси́. Ра́дуйся, о́тче на́шъ Ѳеодо́сіе.

Пѣ́снь 7.

[Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Свяще́нничестіи собо́ри, люде́й составле́нія, отрокови́цы вся́, дѣ́вы, лику́юще, воспо́йте Дѣ́вы преставле́ніе боже́ственное.

Зако́на и благода́ти лу́чшіи, Богороди́тельницы успе́ніе хвали́те, пою́ще, согла́сно воспѣва́юще: Бо́же, благослове́нъ еси́.

Въ Сіо́нъ Пречи́стая преставля́ется дне́сь, святы́хъ во свята́я, гора́ свята́я и вели́кая, Ейже вопіе́мъ: ра́дуйся, Пренепоро́чная.

Инъ.]

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Мíра попече́ніе отри́нувъ и сла́ву его́ нивочто́же вмѣни́въ, сла́вы бу́дущія взыска́лъ еси́, молча́ніемъ возлюби́въ Бо́гу угоди́ти на земли́. Тѣ́мъ То́й тя́ просла́ви, преподо́бне, на небесѣ́хъ.

Плотскíя стра́сти отъ ю́ности возненави́дѣвъ, и су́етную красоту́ попра́въ, поще́ніемъ къ Бо́гу превозвы́сился еси́, и ны́нѣ, со а́нгелы предстоя́ Го́сподеви, моли́ о чту́щихъ па́мять твою́.

Являешися, преподо́бне, сокруше́нному хулы́ ра́ди Васи́лію, возвѣща́я ему́, коли́кія сла́вы лиши́ся; его́же на свою́ ра́ку положи́ти повелѣ́въ, сего́ въ то́мъ часѣ́ исцѣли́лъ еси́.

Богоро́диченъ: Предста́тельство ми́ бу́ди, Пречи́стая, къ Ро́ждшемуся изъ Тебе́, оставле́ніе лю́тыхъ долго́въ, и Ца́рствія Бо́жія боже́ственный вхо́дъ, и пи́щи воспрія́тіе, и свѣ́та прича́стіе мнѣ́ подаю́щи.

Пѣ́снь 8.

[Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Цари́це всѣ́хъ же́нъ, Дѣ́во, мольбу́ принеси́ Христу́ о соверша́ющихъ любо́вію па́мять Твою́ сію́, и превознося́щихъ во вся́ вѣ́ки.

Яко свѣтови́дно, освяще́нное добро́тою Божества́, лице́ Твое́, Пренепоро́чная, сла́вою сія́ющее боже́ственнаго дѣ́вства, преукраше́ннаго во вся́ вѣ́ки.

Глаго́лати не могу́, изумѣва́юся, и трепе́щу, и весьма́ соску́товаюся, Твоя́ превели́кая: но, любо́вь, Дѣ́во, зря́щи, боже́ственными возмзди́ дарова́ніи непреста́нно.

Инъ.]

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Душе́ю живы́й въ вы́шнихъ, въ земли́ и́щущимъ являе́ши честны́я твоя́ мо́щи, я́же ви́дѣвше цѣ́лы и нетлѣ́нны, и благоуха́ніе испуща́ющія, возра́довашася ду́хомъ, глаго́люще: Го́спода по́йте, дѣла́, и превозноси́те Его́ во вѣ́ки.

Подо́бно е́сть на́мъ, всегда́ очи́ма на́шима ви́дѣти честну́ю ра́ку отца́ на́шего Ѳеодо́сія, и досто́йное поклоне́ніе всегда́ тому́ приноси́ти, пренося́щіи честны́я мо́щи, глаго́лаху, пою́ще: Го́спода по́йте, дѣла́, и превозноси́те Его́ во вѣ́ки.

Мѣ́сто, на не́мже са́мъ пре́жде сме́рти своея́ проре́клъ еси́ положе́ну тебѣ́ бы́ти, пріе́мше ны́нѣ честно́е тѣ́ло твое́, исцѣле́ніе подава́етъ приходя́щимъ съ вѣ́рою.

Богоро́диченъ: Яви́лася еси́ а́нгеловъ вы́шши, ро́ждши Го́спода, Сего́ у́бо моли́, Влады́чице Всенепоро́чная, плотски́хъ вы́шшу ми́ бы́ти искуше́ній, и Суда́ изба́витися бу́дущаго и вѣ́чныя му́ки, Дѣ́во.

Пѣ́снь 9.

[Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Бла́гоже, бла́гоже Ты́ укра́шена, Невѣ́сто, Богома́ти Дѣ́во: о Тебѣ́ бо поползнове́ніе испра́вися Ада́мово и Евино побѣжде́ніе всегуби́тельное. Тѣ́мъ Тя́ вси́ пѣ́сньми непреста́нно велича́емъ.

Сла́ву по достоя́нію Тебѣ́ Бо́гъ подава́етъ, я́ко Влады́ка Тво́й, Дѣ́во, мы́ же что́ Тебѣ́ принесе́мъ, худíи? Но пріими́ то́чію усе́рдіе, и Тя́ любо́вію чту́щихъ я́ко Богоро́дицу, сохраня́й.

Якоже Вы́шній, соше́дъ, про́йде изъ боку́ Твое́ю, Дѣ́во, на́съ посѣти́лъ е́сть, изъ Тебе́, Богоневѣ́сто, подо́бящися Ему́, посѣти́ отъ небе́сныхъ черто́гъ пѣвцы́ Твоя́ па́мятію Твое́ю.

Побѣ́ду Импера́тору на́шему пода́ждь, усе́рдно иму́щему честно́е Твое́ погребе́ніе, во утвержде́ніе при́сное, и почита́ющему па́че па́мять Твою́ ца́рски, Богома́ти, враги́ покоря́ющи.

Инъ.]

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Побѣди́тель міроде́ржца, кня́зя тмы́, яви́лся еси́, вражде́бныя его́ стрѣ́лы ору́жіемъ кре́стнымъ и вѣ́рою до конца́ сокруши́въ, взыва́я: Бо́гъ на́мъ прибѣ́жище и си́ла.

Ты́ па́стырь и́стинный Христо́ва ста́да бы́лъ еси́, о не́мже моли́ти не преста́й всегда́, преподо́бне, дарова́ти на́мъ согрѣше́ній оставле́ніе, Боже́ственное заступле́ніе и вѣ́чное ра́дованіе.

Прозря́ исхожде́ніе свое́ отъ тѣ́ла, и бу́дущее тебѣ́ воздая́ніе отъ Бо́га, моли́лся еси́ прилѣ́жно, преподо́бне, о ста́дѣ твое́мъ, и си́хъ ско́рбныхъ утѣ́шилъ еси́, глаго́ля: се́ обѣща́ю ва́мъ, бра́тіе и отцы́, я́ко а́ще и тѣ́ломъ отхожду́ отъ ва́съ, но ду́хомъ при́сно бу́ду съ ва́ми.

Богоро́диченъ: Спаси́ мя, Чи́стая, Спа́са ро́ждшая Всеще́драго, уще́дри раба́ Твоего́, и къ покая́нія пути́ наста́ви, лука́ваго же собла́зны отъ среды́ отжени́, и того́ мя́ изба́ви ловле́нія, и огня́ вѣ́чнаго исхи́ти.

Свѣти́ленъ. Подо́бенъ: Не́бо звѣзда́ми.

Па́мять пренесе́нія честны́хъ твои́хъ моще́й дне́сь пра́зднующе, вопіе́мъ: со а́нгелы предстоя́ въ дерзнове́ніи мно́зѣ, всѣ́хъ на́съ, о́тче, помина́й ко Влады́цѣ Христу́.

Сла́ва, и ны́нѣ, предпра́зднства. [Подо́бенъ: Жены́, услы́шите.]

Твоего́ честна́го успе́нія [па́мять пресвѣ́тлую торжеству́юще, любо́вію воспѣва́емъ, Богоро́дице: Ты́ же, я́ко Ма́ти Пречи́стая, къ Сы́ну отходя́щи въ сла́вѣ Твое́й и Го́споду, о христіа́нѣхъ моли́, вѣ́рою Тя́ воспѣва́ющихъ].

На хвали́техъ стихи́ры предпра́зднства стихо́вныя 3, [гла́съ 6. Подо́бенъ: Тридне́венъ].

Глаго́ломъ боже́ственнаго Гавріи́ла послѣ́дующе, ра́дуйся, Тебѣ́ зове́мъ, Чи́стая: Ты́ у́бо Пресвята́я и Ма́ти Госпо́дня, къ Сему́ преста́вльшися, помина́й о воспѣва́ющихъ Тя́.

Неизмѣ́рная Прему́дрость Бо́жія хра́мъ Себѣ́ па́че ума́, Богоро́дице, созда́, изъ Тебе́ Ду́хомъ Святы́мъ, и ны́нѣ Тя́ къ невеще́ственнымъ селе́ніемъ преста́ви, Всепѣ́тая.

Ра́бъ, ны́нѣ прихожду́ къ Тебѣ́, Ма́тери всѣ́хъ Бо́га, отъ вся́кихъ изба́витися напа́стей моля́ся. Но, о Богороди́тельнице! Ца́рствующи съ Сы́номъ Твои́мъ, христіа́нскій ро́дъ сохраня́й.

И преподо́бнаго 3, гла́съ 8. Подо́бенъ: О, пресла́внаго чудесе́!

Преподо́бне о́тче Ѳеодо́сіе,* па́стыря тя́ поста́ви Госпо́дь* Своему́ ста́ду;* ты́ бо, себе́ назда́въ,* на основа́ніи добродѣ́телей,* це́рковь бы́ти Бо́гу, блаже́нне, сподо́бися,* всегда́ разу́мному Свѣ́ту предстоя́,* по достоя́нію отъ Него́ прославля́емь.* Тѣ́мже тя́ чте́мъ и ублажа́емъ.

Преподо́бне о́тче Ѳеодо́сіе,* ты́ усе́рдно Бо́гу послужи́лъ еси́,* и́ночествовавъ молча́ніемъ,* и воздержа́ніемъ ше́ствуя,* смире́ніемъ украша́яся,* и всѣ́ми добродѣ́тельми просвѣще́нъ,* вѣ́чныхъ бла́гъ получи́лъ еси́.* Тѣ́мъ и мы́, честну́ю твою́ обстоя́ще ра́ку,* тя́ прославля́емъ.

Преподо́бне о́тче Ѳеодо́сіе,* а́ще и тѣ́ломъ отлучи́лся еси́ отъ на́съ,* но ду́хомъ съ на́ми всегда́ пребыва́еши;* се́ бо, и по сме́рти явля́яся, на́съ посѣща́еши,* отъ напа́стей избавля́я,* и печа́льныя утѣша́я,* поги́бшая явля́я,* и больны́я исцѣля́я,* предста́тельствомъ твои́мъ.* Тѣ́мже тя́ вси́ вѣ́рою ублажа́емъ.

Сла́ва, гла́съ 6:

Дне́сь архіере́е, съ чи́нми свяще́нныхъ прише́дше, и мно́жество и́ночествующихъ, и благовѣ́рныхъ наро́ди, прія́ша отъ пеще́ры пречестны́я твоя́ мо́щи, о́тче Ѳеодо́сіе, со свѣща́ми и ѳиміа́момъ, че́стно провожда́юще, въ богозда́нную це́рковь прине́сше, положи́ша свяще́нно. Его́же мы́ лѣ́тное воспомина́ніе пра́зднуемъ, и велегла́сно пою́ще, взыва́емъ ти́: я́ко престо́лу Христо́ву предстоя́, преподо́бне, не преста́й моля́ся изба́витися всѣ́мъ отъ вся́каго вре́да вра́жія, и спасти́ся душа́мъ на́шимъ.

И ны́нѣ, предпра́зднства, гла́съ 3. [Ге́рманово:]

Пріиди́те, вси́ концы́ земнíи, [честно́е преставле́ніе Богома́тере восхва́лимъ: въ ру́цѣ бо Сы́на ду́шу непоро́чную положи́. Тѣ́мже святы́мъ успе́ніемъ Ея́ мíръ оживотвори́вся, во псалмѣ́хъ, и пѣ́ніихъ, и пѣ́снехъ духо́вныхъ со безпло́тными и апо́столы пра́зднуетъ свѣ́тло].

Славосло́віе вели́кое, [ектеніи́] и отпу́стъ.



НА ЛИТУРГІИ,
Слу́жба вся́ преподо́бнаго:

[Блаже́нна отъ кано́на предпра́зднства пѣ́снь 3-я, на 4, и преподо́бнаго пѣ́снь 6-я, на 4. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 136 – 141.

/ Къ оглавленію раздѣла /


Наверхъ / Къ титульной страницѣ

0