Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 21 сентября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 14-й де́нь.
Предпра́зднство Успе́нія Пресвяты́я Богоро́дицы.
И свята́го проро́ка Михе́я.

[НА ВЕЧЕРНИ,]
На Го́споди воззва́хъ: стихи́ры предпра́зднства, гла́съ 4. Подо́бенъ: Яко до́бля.

Въ кимва́лѣхъ возгласи́мъ,* въ пѣ́снехъ воскли́кнемъ,* пра́здникъ исхо́дный предпра́зднующе,* и надгро́бное пѣ́ніе свѣ́тло возопіе́мъ:* Ма́ти бо Бо́жія,* киво́тъ же всезлаты́й, гото́вится ны́нѣ* отъ земли́ къ Вы́шнимъ прейти́,* къ па́ки живѣ́й боже́ственнѣй* преставля́ема свѣ́тлости.

Апо́стольскій ли́че,* пресла́вно собери́ся отъ коне́цъ дне́сь,* и́бо Одушевле́ный Гра́дъ* всѣ́ми Влады́чествующаго,* отъ земли́ отхо́дитъ къ лу́чшимъ сла́вно,* ликовствова́ти съ Царе́мъ, Сы́номъ Ея́;* Ея́же боже́ственному погребе́нію единому́дренно,* съ вы́шними во́инствы,* пѣ́ніе исхо́дное воспо́йте.

Свяще́нныхъ сосло́віе,* ца́ріе же и кня́зи,* съ дѣви́ческими чи́нми,* ны́нѣ предвари́те,* вси́ лю́діе же, стецы́теся,* пѣ́снь надгро́бную возсыла́юще ку́пно,* и́бо всѣ́ми Влады́чествующая* хо́щетъ нау́тріе ду́шу преда́ти въ ру́цѣ Сы́ну,* преставля́ема къ вѣ́чнѣй оби́тели.

Ины стихи́ры свята́го проро́ка, гла́съ то́йже. Подо́бенъ: Да́лъ еси́ зна́меніе.

Го́ру провозгласи́лъ еси́,* явле́нну и высоку́,* Спа́сово проповѣ́даніе,* на ве́рхъ яви́тися го́ръ, блаже́нне,* превысо́кое богоразу́міе проявля́я,* на ню́же язы́цы вѣ́рою стека́ющеся,* усе́рдно прибѣга́ютъ,* и пути́ науча́ются Госпо́дню,* и спаса́ются спасе́ніемъ вѣ́чнымъ.

Кня́зь изы́детъ,* и упасе́тъ лю́ди Своя́,* отъ Виѳлее́ма изше́дъ, — проре́клъ еси́,* чу́дный во проро́цѣхъ Михе́е,* язы́комъ богодохнове́ннымъ,* — Его́же вои́стинну отъ дне́й вѣ́ка су́ть исхо́ди;* и ны́нѣ твое́ прорече́ніе сбы́вшееся ви́дяще,* тобо́ю Глаго́лавшаго* богому́дренно сла́вимъ.

Престо́лу предстоя́ Бо́жію,* проро́че всече́стне,* и ра́дости сподобля́яся,* и сла́ву зря́,* и пи́щи боже́ственныя наслажда́яся,* и весе́лія духо́внаго и ра́дости испо́лненъ,* вѣ́рою ны́нѣ па́мять твою́ соверша́ющихъ назира́й,* напа́стей избавля́я* непреста́нными моли́твами твои́ми.

Сла́ва, и ны́нѣ, гла́съ то́йже:

Всечестно́е Твое́ успе́ніе, Пресвята́я Дѣ́во Чи́стая, а́нгелъ мно́жество на небеси́, и человѣ́ческій ро́дъ на земли́, ублажа́емъ, я́ко Ма́ти была́ еси́ Творца́ всѣ́хъ Христа́ Бо́га, Того́ моля́щи о на́съ не преста́й, мо́лимся, и́же на Тя́ съ Бо́гомъ упова́ніе поло́жшихъ, Богоро́дице Всепѣ́тая и Неискусобра́чная.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

О, чудесе́ но́ваго!* О, зна́менія стра́ннаго!* Ка́ко ме́ртвость подъя́тъ* живоно́сная Отрокови́ца,* и гро́бомъ ны́нѣ покрыва́ется!

Сти́хъ: Воскресни́, Го́споди, въ поко́й Тво́й,* Ты́ и Киво́тъ святы́ни Твоея́.

Вся́ко земноро́дныхъ* естество́ да лику́етъ:* се́ бо Дѣ́ва,* Ада́мова дщи́,* къ небеси́ преставля́ется.

Сти́хъ: Кля́тся Госпо́дь Дави́ду и́стиною,* и не отве́ржется ея́.

Пріими́ ми во умѣ́,* о́дръ Дѣ́вы,* лико́мъ апо́стольскимъ благолѣ́пно окружа́ющимъ,* и пою́щимъ исхо́дное.

Сла́ва, и ны́нѣ, гла́съ 2. Анато́ліево:

Яже небе́съ вы́шшая су́щи, и херуви́мъ сла́внѣйшая, и всея́ тва́ри честнѣ́йшая, Яже премно́гія ра́ди чистоты́, Присносу́щнаго Существа́ прія́телище бы́вши, въ Сыно́внѣ ру́цѣ дне́сь всесвяту́ю предае́тъ ду́шу, и съ Не́ю исполня́ются вся́ческая ра́дости, и на́мъ да́руетъ ве́лію ми́лость.

Тропа́рь, гла́съ 4:

Лю́діе, предыгра́йте, рука́ми пле́щуще вѣ́рно, и любо́вію собери́теся, дне́сь ра́дующеся и свѣ́тло восклица́юще вси́ весе́ліемъ: Бо́жія бо Ма́ти и́мать отъ земны́хъ къ вы́шнимъ прейти́ сла́вно, Юже пѣ́сньми при́сно я́ко Богоро́дицу сла́вимъ.


НА УТРЕНИ,
По 1-й каѳи́смѣ сѣда́ленъ, гла́съ 4. Подо́бенъ: Удиви́ся Іо́сифъ.

Ши́ршая небе́съ я́вльшися на земли́, Ро́ждшая пло́тію всѣ́хъ Содѣ́теля, ны́нѣ въ са́мая небеса́ отъ земли́ преставля́ется, пра́ведныхъ у́бо ду́ши, смотря́юще Тя́, а́нгельстіи же ли́цы, зря́ще, я́ко Цари́цѣ, хвалу́ досто́йно всегда́ Тебѣ́ прино́сятъ. Тѣ́мже моля́щи не преста́й о воспѣва́ющихъ Тя́.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ 5. Подо́бенъ: Собезнача́льное Сло́во.

Ангелъ мно́жества славосло́вятъ Тя́, и человѣ́ческій ро́дъ предпра́зднственная воспѣва́етъ Ти́, я́ко преста́вилася еси́ отъ земли́ къ Ро́ждшемуся изъ Тебе́, Богоро́дице Чи́стая, и мо́лишися прилѣ́жно изба́витися отъ бѣ́дъ вѣ́рою соверша́ющимъ Твое́, Дѣ́во, преставле́ніе.

Сла́ва, и ны́нѣ, то́йже.

Кано́нъ предпра́зднства, со ирмосо́мъ на 8 и проро́ка на 4.

Кано́нъ предпра́зднства, гла́съ 5.
Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Гро́бу, Дѣ́ву пріе́мшу, присту́пимъ, вѣ́рніи, благово́нія боже́ственна прія́ти тща́щеся: въ се́мъ бо излія́ся Мѵрополо́жницы дыха́ющее благово́ніе, ду́ши благоуха́ющее.

Взя́тся Сіо́нъ изъ горы́, Сіо́нъ одушевле́нный, и почи́ во гра́дѣ Геѳсима́ніи, я́ко одушевле́нъ, Бо́га Безсме́ртнаго пріе́мши, въ нѣ́дрѣхъ нетлѣ́нныхъ почи́ти.

Трубы́ возшумѣ́вше богоно́сныхъ муже́й, воззови́те вельми́ апо́стольская уста́: си́лы, возми́те врата́, пріими́те Цари́цу въ лу́чшая.

Сме́рть ка́ко подъя́тъ, Живота́ присносу́щнаго я́вѣ ро́ждшую па́че естества́, Всенепоро́чную? Но, сію́ отри́нувъ Влады́ка, преста́ви Тя́ къ прія́тію небе́сному.

Инъ кано́нъ проро́ка, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Яко зерца́ло вои́стинну чи́сто Бо́жіе и боже́ственныхъ сы́й, Зижди́телю предстои́ши, блаже́нне, Его́же моли́ отъ бѣ́дъ спасти́ вѣ́рою пою́щія тя́.

Ра́зума испо́лненъ духо́внаго сы́й, Михе́е, и прему́дрости отъ Бо́га, бу́дущихъ научи́лся еси́, я́ко чи́стъ у́мъ, преизря́дне.

Проро́чество проповѣ́дая благоче́стно, Го́спода ре́клъ еси́ съ небесе́ на земли́ яви́тися, блаже́нне, пиша́ е́же къ на́мъ Того́ явле́ніе.

Богоро́диченъ: Избавля́я яви́ся на земли́ пе́рвѣе плѣне́нный, напослѣ́докъ дне́й пло́ти прія́тіемъ, Богома́ти, пре́жде вѣ́къ познава́емый.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Пѣ́сни надгро́бныя ны́нѣ возсле́мъ Чи́стѣй, Зи́ждителя Богороди́тельницѣ, и со безпло́тными во́инствы о́дръ живоно́сный окружи́мъ, ра́дующеся, я́ко престо́лъ Боже́ственный Святы́й.

Лежа́щу и просте́рту ви́дяще, о́чи смѣжа́щу, живопода́тельный, боже́ственный и при́сный исто́чникъ, пріиди́те, вѣ́рными сердцы́ сле́зы точа́ще, прико́снемся Сея́ нетлѣ́нному тѣлеси́.

Боже́ственное и благоро́дное Бо́жіе жили́ще, сѣда́лище вои́стинну и гра́дъ одушевле́нъ всѣ́хъ Царя́ вои́стинну, пода́ждь всѣ́хъ согрѣше́ній на́шихъ па́мятію Твое́ю оставле́ніе и отъ бѣ́дъ спаси́.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Язы́къ тво́й тро́сть Боже́ственного Ду́ха бы́сть, и́мже на́мъ бу́дущихъ яви́лъ еси́ сбытіе́.

Ты́ Превѣ́чнаго, пло́ть бы́вша, показа́лъ еси́ въ Виѳлее́мѣ, Кня́зя всѣ́хъ, и Спа́са, и Наста́вника.

Таи́нникъ извѣ́стенъ су́щихъ па́че ума́ на́мъ бы́лъ еси́, проро́ческими, сла́вне проро́че, просвѣще́ньми озаря́емь.

Богоро́диченъ: Гора́ явле́ннѣйша Ты́ была́ еси́, Пречи́стая, на ню́же возше́дъ, Госпо́дь яви́ся, къ Не́йже ны́нѣ прибѣга́емъ.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Ду́хомъ, му́дре, просвѣ́щся Святы́мъ, проре́клъ еси́ я́вѣ бу́дущихъ ра́зумъ, уясни́въ неудобопости́жная, о Михе́е пребога́те! Изы́детъ бо отъ Виѳлее́ма Кня́зь и Во́ждь, Иже упасе́тъ лю́ди Своя́, Христо́съ, — ты́ проре́клъ еси́.

Сла́ва, и ны́нѣ, предпра́зднства, гла́съ 4. Подо́бенъ: Ско́ро предвари́.

Дѣ́вы отрокови́цы, предвоспо́йте, ма́тери, похвали́те, и вси́ воспо́йте пѣ́снь происхо́дную, успе́ніе Дѣ́вы и Ма́тере Госпо́дни пѣ́сньми богокра́сными предсоверша́юще боже́ственнѣ: преставля́ется бо сла́вно къ небе́снымъ.

Пѣ́снь 4.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Небе́сніи ли́цы веселя́тся и уготовля́ются Бо́жію Чи́стую Ма́терь прія́ти, Цари́цу всѣ́ми тва́рьми благоче́стно госпо́дствующую.

Да уклоня́тся возду́шніи ду́си, да отсту́питъ же са́мый міроде́ржецъ, да па́даетъ посра́мленъ, ви́дя возноша́ему Бо́жію Ма́терь.

Не ктому́ обра́зно въ гада́ніихъ, свяще́нники ковче́гъ завѣ́та носи́мь е́сть: святы́ми апо́столы вои́стинну Бо́жія Ма́ти носи́ма е́сть.

Усну́вши въ боже́ственное поко́ище, почи́ла еси́ въ жи́зненныхъ сокро́вищахъ немину́ющихъ, Голуби́це Соломо́ня, добра́ же, и красна́, и всечестна́.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Сія́ньми свы́ше Боже́ственнаго дохнове́нія озаря́емь, бу́дущая возвѣсти́лъ еси́, я́ко настоя́щая зря́, достосла́вне.

Отъ Сіо́на изы́де зако́нъ, я́коже проре́клъ еси́, богоблаже́нне, и протече́ концы́, Госпо́дне сло́во проповѣ́дуя.

Госпо́дствовати яви́ся въ дому́ Іа́ковли всѣ́хъ Госпо́дь и въ сла́вѣ и́мене я́ко Па́стырь упаса́етъ, всеблаже́нне, лю́ди Своя́.

Богоро́диченъ: Дави́дово отро́діе, Ма́ти Бо́жія и Зижди́теля вѣ́руема бы́сть: пло́ть у́бо Сего́, бы́вша отъ Нея́, несказа́нно породи́.

Пѣ́снь 5.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Чи́стое Ду́ха Пресвята́го боже́ственное селе́ніе, на Сина́йстѣй горѣ́ бы́въ, дохну́, и всю́ тва́рь па́че естества́ просвѣти́.

Всего́ Божества́ была́ еси́ жили́ще, тѣ́мже Тя́ Божество́ всю́, Ма́ти, до конца́ преста́ви, отъ земли́, Богороди́тельнице, къ небеси́ прехо́дну.

Іису́съ Пребоже́ственный сла́вы Госпо́дь, отъ Твоего́ чре́ва рожде́йся за милосе́рдіе, Са́мъ Тя́ преста́ви отъ земли́, Богома́ти, съ душе́ю и тѣ́ломъ.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ бо Тебе́, ино́го не вѣ́мы.

Возлюби́лъ еси́ въ слѣ́дъ Го́спода ходи́ти, гото́въ бы́въ въ путе́хъ Его́, прему́дре.

Разумѣ́лъ еси́ хотя́щее бы́ти спасе́ніе всѣ́мъ язы́комъ отъ іуде́й, чу́дне.

Благода́ть зря́, проповѣ́далъ еси́, богоявле́нне: къ не́йже прибѣга́ютъ язы́къ стада́, и спаса́ются.

Богоро́диченъ: Мѣ́сто Госпо́дне Ты́ была́ еси́, Богома́ти: отъ Нея́же изы́де, мíръ отъ ле́сти избавля́яй.

Пѣ́снь 6.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Со а́нгелы теце́мъ, со арха́нгелы же, и властьми́, и нача́лы, и престо́лы, и си́лами въ Сіо́нъ, вели́кое чу́до у́зримъ.

Яже Живота́ Роди́тельница, ка́ко подъя́тъ сме́рть тлѣ́нну, убѣжа́вши вся́кія тли́? Но вои́стинну Твоя́ па́че естества́, Чи́стая Дѣ́во, та́инства.

Сіо́няне ели́цы, свѣщи́ возжжи́те, свѣ́томъ Обложе́нную, пріиди́те, усря́щемъ въ Геѳсима́ніи, и Сію́ пѣ́сньми прово́димъ.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Зако́номъ повину́яся Бо́жіимъ, обличи́лъ еси́ вся́ преступа́ющія, храня́ зако́нъ, пресла́вне.

Михе́е боже́ственный и честны́й Ду́ха орга́нъ, мольба́ми твои́ми отъ бѣ́дъ вѣ́рныя сохрани́.

Богоро́диченъ: Іу́довъ Ты́ до́мъ свѣ́телъ, Дѣ́во, сотвори́ла еси́, Возсія́вшаго отъ свята́го Твоего́ чре́ва я́вльши.

Конда́къ, гла́съ 4. Подо́бенъ: Яви́лся еси́ дне́сь.

Въ сла́внѣй па́мяти Твое́й вселе́нная, невеще́ственнымъ Ду́хомъ испещре́на, у́мно съ весе́ліемъ зове́тъ Тебѣ́: ра́дуйся, Дѣ́во, христіа́нъ похвало́.

Икосъ:

Иже на о́блацѣхъ свѣ́тло отъ всѣ́хъ коне́цъ собра́вый Своя́ боже́ственныя апо́столы къ тѣ́лу Твоему́, Чи́стая, показа́ Тя всѣ́мъ, Богоро́дицу, и стра́шенъ черто́гъ преукра́шенъ, Бо́гъ и Сы́нъ Тво́й бы́въ, взе́мъ ду́шу Твою́ на ру́ку пречи́стую, положи́лъ е́сть въ раи́: та́мо бо живо́тное е́сть дре́во, отъ него́же я́дше ме́ртвенніи, безсме́ртіе обрѣто́ша Тобо́ю. Тѣ́мже и вопіе́мъ Тебѣ́: ра́дуйся, Дѣ́во, христіа́нъ похвало́.

Пѣ́снь 7.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Свяще́нничестіи собо́ри, люде́й составле́нія, отрокови́цы вся́, дѣ́вы, лику́юще, воспо́йте Дѣ́вы преставле́ніе боже́ственное.

Зако́на и благода́ти лу́чшіи, Богороди́тельницы успе́ніе хвали́те, пою́ще, согла́сно воспѣва́юще: Бо́же, благослове́нъ еси́.

Въ Сіо́нъ Пречи́стая преставля́ется дне́сь, святы́хъ во свята́я, гора́ свята́я и вели́кая, Ейже вопіе́мъ: ра́дуйся, Пренепоро́чная.

Инъ.

Ирмо́съ: Отъ Іуде́и доше́дше, о́троцы въ Вавило́нѣ иногда́ вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Потре́бенъ яви́лся еси́ Влады́цѣ всѣ́хъ и до́блѣйшій, суровство́ владу́щихъ облича́я и уча́, и вопія́, достосла́вне: оте́цъ на́шихъ Бо́же, благослове́нъ еси́.

Блиста́я луча́ми житія́ боже́ственнаго, и чистѣ́йшій проро́къ показа́лся еси́ боже́ственнаго явле́нія, воспѣва́я, блаже́нне: оте́цъ на́шихъ Бо́же, благослове́нъ еси́.

Богоро́диченъ: Равнодѣ́теленъ Ро́ждшему, равноси́льное Сло́во, Соприсносу́щное, во утро́бѣ Дѣ́вы Отчимъ благоволе́ніемъ зи́ждется я́ко Человѣ́къ, отце́въ Бо́гъ благослове́нный.

Пѣ́снь 8.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Цари́це всѣ́хъ же́нъ, Дѣ́во, мольбу́ принеси́ Христу́ о соверша́ющихъ любо́вію па́мять Твою́ сію́, и превознося́щихъ во вся́ вѣ́ки.

Яко свѣтови́дно, освяще́нное добро́тою Божества́, лице́ Твое́, Пренепоро́чная, сла́вою сія́ющее боже́ственнаго дѣ́вства, преукраше́ннаго во вся́ вѣ́ки.

Глаго́лати не могу́, изумѣва́юся, и трепе́щу, и весьма́ соску́товаюся, Твоя́ превели́кая: но, любо́вь, Дѣ́во, зря́щи, боже́ственными возмзди́ дарова́ніи непреста́нно.

Инъ.

Ирмо́съ: Мусикíйскимъ орга́номъ согласу́ющимъ и лю́демъ безчи́сленнымъ, покланя́ющимся о́бразу въ Деи́рѣ, три́ о́троцы не повину́вшеся, Го́спода воспѣва́ху и славосло́вяху во вся́ вѣ́ки.

Отъ нача́ла сы́й вѣ́ка, Бо́жіе Сло́во яви́ся, избавля́я су́щія отъ Ада́ма, я́коже Михе́й прорече́: Го́спода по́йте и превозноси́те Его́ во вѣ́ки.

Мы́сленно науча́емь, вопія́лъ еси́: Воли́тель ми́лости Влады́ка, я́ко Ми́лостивъ, ка́яся о непра́вдахъ, вѣ́рою пою́щихъ, и превознося́щихъ Его́ во вѣ́ки.

Якоже свѣтла́ мо́лнія, яви́лся еси́, Бо́жію зарю́ пріе́мъ, и я́ко зерца́ло чи́сто бы́въ, Михе́е, Го́спода по́йте, вопія́, и превозноси́те Его́ во вѣ́ки.

Богоро́диченъ: Крѣ́пко утѣше́ніе, Дѣ́во, е́же отъ Тебе́ Рожде́ннаго иму́ще, держи́мъ апо́стольски честно́е исповѣ́даніе, Го́спода пою́ще и превознося́ще Его́ во вѣ́ки.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Бла́гоже, бла́гоже Ты́ укра́шена, Невѣ́сто, Богома́ти Дѣ́во: о Тебѣ́ бо поползнове́ніе испра́вися Ада́мово и Евино побѣжде́ніе всегуби́тельное. Тѣ́мъ Тя́ вси́ пѣ́сньми непреста́нно велича́емъ.

Сла́ву по достоя́нію Тебѣ́ Бо́гъ подава́етъ, я́ко Влады́ка Тво́й, Дѣ́во, мы́ же что́ Тебѣ́ принесе́мъ, худíи? Но пріими́ то́чію усе́рдіе, и Тя́ любо́вію чту́щихъ я́ко Богоро́дицу, сохраня́й.

Якоже Вы́шній, соше́дъ, про́йде изъ боку́ Твое́ю, Дѣ́во, на́съ посѣти́лъ е́сть, изъ Тебе́, Богоневѣ́сто, подо́бящися Ему́, посѣти́ отъ небе́сныхъ черто́гъ пѣвцы́ Твоя́ па́мятію Твое́ю.

Побѣ́ду Импера́тору на́шему пода́ждь, усе́рдно иму́щему честно́е Твое́ погребе́ніе, во утвержде́ніе при́сное, и почита́ющему па́че па́мять Твою́ ца́рски, Богома́ти, враги́ покоря́ющи.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Уму́ нетлѣ́нному и чистѣ́йшему, луча́ми благоче́стія сія́я, о мíрѣ моля́ся, при́сно предстои́ши.

Наста́ свѣтоно́сная па́мять твоя́, проро́че, проро́ческими дарова́ніи испо́лнена и рѣ́ки покая́нія источа́ющи.

Спа́са, мíрови прише́дша по твоему́ прорече́нію, обожа́емь па́че ума́, весе́лія, блаже́нне, наслажда́ешися.

Богоро́диченъ: Яко всѣ́хъ превы́шши и чистѣ́йши, скве́рны души́ моея́ очи́сти, я́ко Бо́га заче́нши Преблага́го.

Свѣти́ленъ предпра́зднства. Подо́бенъ: Не́бо звѣзда́ми.

Ангели и па́стыри поя́ху рождество́ Твое́ пе́рвѣе, и ны́нѣ а́нгельстіи чи́ни, и апо́стольскій ли́къ, и вся́къ язы́къ, Дѣ́во, успе́ніе Твое́ пою́тъ.

Сла́ва, и ны́нѣ. Подо́бенъ: Жены́, услы́шите.

Твоего́ честна́го успе́нія па́мять пресвѣ́тлую торжеству́юще, любо́вію воспѣва́емъ, Богоро́дице: Ты́ же, я́ко Ма́ти Пречи́стая, къ Сы́ну отходя́щи въ сла́вѣ Твое́й и Го́споду, о христіа́нѣхъ моли́, вѣ́рою Тя́ воспѣва́ющихъ.

На стихо́внѣ стихи́ры, гла́съ 6. Подо́бенъ: Тридне́венъ.

Глаго́ломъ боже́ственнаго Гавріи́ла послѣ́дующе, ра́дуйся, Тебѣ́ зове́мъ, Чи́стая: Ты́ у́бо Пресвята́я и Ма́ти Госпо́дня, къ Сему́ преста́вльшися, помина́й о воспѣва́ющихъ Тя́.

Сти́хъ: Воскресни́, Го́споди, въ поко́й Тво́й, Ты́ и Киво́тъ святы́ни Твоея́.

Неизмѣ́рная Прему́дрость Бо́жія хра́мъ Себѣ́ па́че ума́, Богоро́дице, созда́, изъ Тебе́ Ду́хомъ Святы́мъ, и ны́нѣ Тя́ къ невеще́ственнымъ селе́ніемъ преста́ви, Всепѣ́тая.

Сти́хъ: Кля́тся Госпо́дь Дави́ду и́стиною и не отве́ржется ея́.

Ра́бъ, ны́нѣ прихожду́ къ Тебѣ́, Ма́тери всѣ́хъ Бо́га, отъ вся́кихъ изба́витися напа́стей моля́ся. Но, о Богороди́тельнице! Ца́рствующи съ Сы́номъ Твои́мъ, христіа́нскій ро́дъ сохраня́й.

Сла́ва, и ны́нѣ, гла́съ 3. Ге́рманово:

Пріиди́те, вси́ концы́ земнíи, честно́е преставле́ніе Богома́тере восхва́лимъ: въ ру́цѣ бо Сы́на ду́шу непоро́чную положи́. Тѣ́мже святы́мъ успе́ніемъ Ея́ мíръ оживотвори́вся, во псалмѣ́хъ, и пѣ́ніихъ, и пѣ́снехъ духо́вныхъ со безпло́тными и апо́столы пра́зднуетъ свѣ́тло.


НА ЛИТУРГІИ,

Блаже́нна, пѣ́снь 3-я и 6-я. По вхо́дѣ тропа́рь, пре́жде хра́ма Христо́ва, и предпра́зднства, и хра́ма свята́го. Сла́ва, конда́къ хра́ма свята́го. И ны́нѣ, предпра́зднства.


Зри́: Аще случи́тся предпра́зднство Успе́нія Богоро́дицы въ недѣ́лю:

И пое́мъ всю́ слу́жбу предпра́зднства съ воскре́сною и проро́ческою слу́жбою, ве́черъ и у́тро, и на Литургíи, я́коже указа́ся на предпра́зднство Преображе́нія Христо́ва. То́чію на у́трени катава́сія: Преукраше́нная... По вхо́дѣ глаго́лемъ тропа́рь воскре́сенъ и предпра́зднства, и хра́ма свята́го или́ святы́я. Та́же конда́къ воскре́сенъ. Сла́ва, свята́го или́ святы́я. И ны́нѣ, предпра́зднства.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 130 – 135 об.

/ Къ оглавленію раздѣла /


Наверхъ / Къ титульной страницѣ

0