Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 13-й де́нь.
Слу́жба святи́телю и чудотво́рцу Ти́хону, епи́скопу Воро́нежскому.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1:

Пріиди́те, вѣ́рніи, ра́достно соше́дшеся, ублажи́мъ святи́теля Христо́ва Ти́хона, па́стыря предо́браго, учи́теля златослове́снаго, ско́рбныхъ утѣ́шителя, неду́гующихъ безме́зднаго врача́, но́ваго да́ннаго Россíи чудотво́рца, и́же мо́лится о душа́хъ на́шихъ.

Па́мять твоя́, святи́телю Ти́хоне, я́ко свѣтоза́рное со́лнце, возсія́ на́мъ, озаря́ющи приходя́щія къ тебѣ́ вѣ́рою: свѣ́тлостьми бо добродѣ́телей явля́еши на́мъ свѣ́тъ пра́вды, луча́ми слове́съ просвѣща́еши на́съ и́стинно Христа́ вѣ́дѣти, предста́тельствомъ твои́мъ разгоня́еши о́блакъ находя́щихъ бѣ́дъ, нетлѣ́ніемъ же моще́й всѣ́мъ зарю́ безсме́ртія показу́еши, тѣ́мже хва́лимъ тя́.

Хва́лимъ тя́, блажа́ще, богому́дре о́тче Ти́хоне, зане́, любо́вію притека́юще къ ра́цѣ моще́й твои́хъ, благода́ть пріе́млемъ: прикоснове́ніемъ бо болѣ́зни врачу́еши, те́плымъ же хода́тайствомъ спаса́еши ду́ши на́ша.

Сла́ва, гла́съ то́йже:

О, преблаже́нне о́тче Ти́хоне! Предстоя́ ны́нѣ престо́лу Го́спода и веселя́ся съ небе́сными ли́ки въ вѣ́чнѣмъ Ца́рствіи, не забу́ди на́съ, земны́хъ и ско́рбныхъ, мольбы́ принеси́ о ча́дѣхъ твоея́ па́ствы, и́миже на земли́ болѣ́зновалъ еси́, испроси́ держа́вѣ Импера́тора крѣ́пость, Це́ркви ми́ръ, всѣ́мъ же вѣ́рнымъ въ вѣ́рѣ утвержде́ніе, грѣхо́въ оставле́ніе и отъ бѣ́дъ избавле́ніе.

И ны́нѣ, богоро́диченъ дне́.

На стихо́внѣ стихи́ры, гла́съ 2:

Ума́ чистоту́ стяжа́въ, Ду́ха Свята́го жили́ще бы́въ, благода́ть святи́тельства прія́лъ еси́, лю́ди просвѣща́лъ еси́ вѣ́дѣніемъ Пресвяты́я Тро́ицы, себе́ же сама́го Ей приноси́лъ еси́ во огни́ любве́ боже́ственныя, и ны́нѣ предстоя́ престо́лу Бо́жію, не преста́й приноси́ти моле́нія о на́съ, чту́щихъ па́мять твою́.

Сти́хъ: Честна́ предъ Го́сподемъ сме́рть преподо́бныхъ Его́.

Непоро́чно житіе́ твое́, честна́ сме́рть твоя́ предъ Бо́гомъ, че́стенъ и гро́бъ, и́же облагода́тствованное твое́ содержи́тъ тѣ́ло, я́ко обогаща́етъ чудесы́ притека́ющія къ тебѣ́ вѣ́рою, святи́телю Ти́хоне, те́плый моли́твенниче о душа́хъ на́шихъ.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Апо́столовъ обще́нія, патріа́рховъ сопребыва́нія, и ра́дости пра́ведныхъ, и всѣ́хъ святы́хъ сликова́нія въ небе́снѣмъ Ца́рствіи сподо́бился еси́, святи́телю Ти́хоне, тѣ́хъ бо добродѣ́телемъ и подвиго́мъ подража́я, яви́лся еси́ прича́стникъ небе́сныя сла́вы и́хъ.

Сла́ва, гла́съ то́йже:

Пра́вило вѣ́ры бы́лъ еси́, святи́телю, и сло́вомъ пра́вой вѣ́рѣ и благо́му житію́ учи́лъ еси́, о́бразъ добродѣ́телей яви́лся еси́ па́ствѣ твое́й, творя́ усе́рдно Христо́вы за́повѣди, сего́ ра́ди, я́ко сотвори́вый и научи́вый, ве́лій наре́клся еси́ во Ца́рствіи небе́снѣмъ, святи́телю. Яко имѣ́яй ве́ліе дерзнове́ніе, моли́ Христа́ Бо́га о чту́щихъ съ вѣ́рою честну́ю па́мять твою́.

И ны́нѣ, богоро́диченъ дне́.

Тропа́рь, гла́съ 8:

Отъ ю́ности возлюби́лъ еси́ Христа́, блаже́нне, о́бразъ всѣ́мъ бы́лъ еси́ сло́вомъ, житіе́мъ, любо́вію, ду́хомъ, вѣ́рою, чистото́ю и смире́ніемъ, тѣ́мже и всели́лся еси́ въ небе́сныя оби́тели, идѣ́же предстоя́ Престо́лу Пресвяты́я Тро́ицы, моли́, святи́телю Ти́хоне, спасти́ся душа́мъ на́шимъ.

Инъ тропа́рь, гла́съ 4:

Правосла́вія наста́вниче, благоче́стія учи́телю, покая́нія проповѣ́дниче, Златоу́стаго ревни́телю, па́стырю предо́брый, но́вый Россíи свѣти́льниче и чудотво́рче, па́ству твою́ до́брѣ упа́слъ еси́ и писа́ньми твои́ми вся́ ны́ наста́вилъ еси́, тѣ́мже вѣнце́мъ нетлѣ́нія укра́шенъ отъ Пастыренача́льника, моли́ Его́ спасти́ся душа́мъ на́шимъ.


НА ВЕЛИЦѢЙ ВЕЧЕРНИ,
Блаже́нъ му́жъ, 1-й антифо́нъ. На Го́споди воззва́хъ: стихи́ры на 8, гласъ 8:

Пріиди́те, вси́ Россíйстіи лю́діе, воспои́мъ пѣ́сньми торже́ственными святи́теля и чудотво́рца Ти́хона, богосвѣ́тлаго Це́ркве Христо́вы свѣти́льника, во тьмѣ́ вѣ́ка сего́ возсія́вшаго, правосла́вныхъ догма́товъ наста́вника, суему́дрыхъ уче́ній обличи́теля, покая́нія проповѣ́дника благоглаго́ливаго, за́повѣдей Христо́выхъ учи́теля и́стиннаго, сотвори́вшаго и научи́вшаго, и припа́дающе къ ра́цѣ святы́хъ и многоцѣле́бныхъ моще́й его́, со умиле́ніемъ возопіи́мъ къ нему́: просвѣти́ на́съ, о́тче на́шъ, свѣ́томъ твоего́ богоразу́мія, воздви́гни на́съ отъ сна́ грѣхо́внаго стра́хомъ преще́нія и Суда́ Бо́жія, утверди́ стопы́ на́ша на пути́ за́повѣдей Христо́выхъ, и моли́ спасти́ся душа́мъ на́шимъ.

Богому́дре и богоно́сне Ти́хоне, благода́ти сосу́де избра́нный, Тро́ицы чи́стое жили́ще, добродѣ́телей честны́й до́ме, отъ ю́ности Христу́ послѣ́дуя, до́брѣ тече́ніе сконча́лъ еси́, вѣ́ру до конца́ соблю́лъ еси́, тѣ́мже и прія́лъ еси́ вѣне́цъ пра́вды отъ Христа́ Бо́га, Его́же непреста́нно моли́ спасти́ся душа́мъ на́шимъ.

Па́стырю предо́брый, сто́лпе и красото́ Це́ркве, свѣ́тлая похвало́ Правосла́вія, ты́ Христо́во ста́до, е́же пасти́ поста́ви тя́ Ду́хъ Святы́й, до́брѣ упа́слъ еси́, свяще́нники соверша́я, лю́ди науча́я, заблу́ждшія исправля́я, оби́димыхъ бы́лъ еси́ защи́тникъ, си́рыхъ и вдови́цъ прибѣ́жище, ни́щія пита́лъ еси́, и ны́нѣ, предстоя́ Пастыренача́льнику, моли́ спасти́ся душа́мъ на́шимъ.

Учи́телю златослове́сный, Ду́ха Свята́го боже́ственный орга́не, и́стины Христо́вы провозвѣ́стниче, покая́нія проповѣ́дниче, изводя́ честна́я отъ недосто́йнаго, я́ко уста́ Госпо́дня бы́лъ еси́, источа́я всѣ́мъ словеса́ жи́зни вѣ́чныя, тѣ́мже и ны́нѣ моли́ спасти́ся душа́мъ на́шимъ.

Ра́дуйся, свяще́нная главо́, преподо́бныхъ подража́телю, по́стниковъ сотру́дниче, люби́телю безмо́лвія: ты́ бо, сше́дъ со престо́ла святи́тельскаго, во смире́нную оби́тель всели́лся еси́, и зря́, я́ко наслажде́ніе, ско́рби, ше́ствовалъ еси́ тѣ́снымъ путе́мъ, возлюби́лъ еси́ смире́ніе нелицемѣ́рное, ху́дость ри́зную, труды́ и моли́твы непреста́нныя, рыда́нія неумо́лчная, па́мять сме́ртную, Ти́хоне преподо́бне о́тче на́шъ, моли́ спасти́ся душа́мъ на́шимъ. [Два́жды.]

При́сный на́шъ засту́пниче, те́плый о на́съ къ Бо́гу моли́твенниче, благосе́рде о́тче на́шъ Ти́хоне, помози́ моли́твами твои́ми благочести́вѣйшему Импера́тору на́шему, огради́ Це́рковь Правосла́вную отъ навѣ́тъ суевѣ́рія и невѣ́рія, сохрани́ оте́чество на́ше отъ вра́гъ ви́димыхъ и неви́димыхъ, умири́ мíръ ве́сь отъ мяте́жа страсте́й человѣ́ческихъ, отыми́ отъ на́съ вся́кую зло́бу, вражду́ и злосло́віе, вкорени́ въ сердца́хъ на́шихъ ми́ръ, любо́вь и единоду́шіе, во е́же благоугоди́ти на́мъ Го́споду и Влады́цѣ живота́ на́шего и во вѣ́ки спасти́ся душа́мъ на́шимъ. [Два́жды.]

Сла́ва, гла́съ то́йже:

Пріиди́те, вѣ́рніи, просла́вимъ святи́теля блаже́нного Ти́хона, я́ко на небеси́ водворя́яся съ ли́ки а́нгельскими, съ проро́ки и апо́столы ликовству́етъ, со святи́тели и му́ченики, съ преподо́бными и пра́ведными весели́тся, Христа́ Бо́га созерца́я не въ зерца́лѣ и гада́ніи, но лице́мъ къ лицу́, на земли́ же честно́е его́ тѣ́ло нетлѣ́ніемъ украша́ется, источа́я то́ки исцѣле́ній съ вѣ́рою и любо́вію притека́ющимъ, тѣ́мже мо́лимъ тя́, святи́телю, бу́ди о на́съ те́плый предста́тель у Престо́ла Бо́жія, я́ко имѣ́яй ве́ліе дерзнове́ніе.

И ны́нѣ, богоро́диченъ гла́са; а́ще попра́зднство, пра́здника.
[Вхо́дъ.] Проки́менъ дне́. И чте́нія три́ святи́тельская.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2:

Святи́телей удобре́ніе и отце́въ сла́ву, вѣ́рныхъ засту́пника вели́каго, но́ваго чудотво́рца восхва́лимъ, преблаже́ннаго Ти́хона, то́ки чуде́съ незави́стно излива́юща, неду́ги врачу́юща, дарова́нія боже́ственная неоску́дно подаю́ща, и возопіи́мъ: о преблаже́нне Ти́хоне, благода́ти сосу́де преиспо́лненный и ми́лостей исто́чниче, о на́съ моли́ся ко Го́споду, поми́ловатися душа́мъ на́шимъ.

Отче богому́дре Ти́хоне! Ты́ ра́бъ благíй и вѣ́рный у Го́спода бы́лъ еси́, не сокры́въ въ земли́ да́нный тебѣ́ отъ Него́ тала́нтъ, но уча́ и творя́, умно́жилъ еси́ его́, тѣ́мже, въ ма́лѣ вѣ́ренъ бы́въ, надъ мно́гими поста́вленъ еси́ отъ Небе́снаго Домовлады́ки, Его́же моли́ о чту́щихъ съ вѣ́рою па́мять твою́.

Слове́съ ева́нгельскихъ, е́же не стяжа́ти себѣ́ сокро́вища на земли́, вѣ́рный храни́тель бы́лъ еси́, преблаже́нне Ти́хоне, и во́льную нищету́, я́ко сокро́вище, себѣ́ стяжа́лъ еси́, ни́щія же и убо́гія неоску́дно удовля́лъ еси́, тѣ́мже и ны́нѣ испроси́ на́мъ у Го́спода ве́лію и бога́тую ми́лость.

Сла́ва, гла́съ 6:

Дне́сь красу́ется Задо́нская оби́тель, ра́дуется воро́нежская па́ства, торжеству́етъ вся́ Правосла́вная Це́рковь, па́мять твою́ соверша́ющи, святи́телю Ти́хоне: въ нетлѣ́ніи бо моще́й твои́хъ и чудесѣ́хъ и́мамы вси́ ве́ліе зна́меніе благода́ти Свята́го Ду́ха въ Це́ркви Правосла́внѣй, и ересе́й и раско́ловъ обличе́ніе, и невѣ́рія посрамле́ніе.

И ны́нѣ, богоро́диченъ: Творе́цъ и Изба́витель мо́й...

На стихо́внѣ стихи́ры, гла́съ 3:

Напита́лъ еси́ бога́тно ду́ши а́лчущихъ пи́щею небе́сною — хлѣ́бъ бо а́нгельскій е́сть сло́во твое́, богому́дре Ти́хоне; испо́лнилъ еси́ боже́ственнаго весе́лія сердца́ жа́ждущихъ — уче́ніе бо твое́ е́сть вино́ боже́ственное и исто́чникъ благода́ти Свята́го Ду́ха, источа́яй жи́знь вѣ́чную.

Сти́хъ: Уста́ моя́ возглаго́лютъ прему́дрость и поуче́ніе се́рдца моего́ ра́зумъ.

Тя́, архіере́я и па́стыря незло́бива и преподо́бна, учи́теля вѣ́рна восхваля́юще любо́вію, усе́рдно мо́лимъ: принеси́ Го́споду моле́нія о спасе́ніи ду́шъ на́шихъ.

Сти́хъ: Услы́шите сія́, вси́ язы́цы, внуши́те вси́ живу́щіи по вселе́ннѣй.

Пле́велы, я́же всѣ́я въ па́ствѣ твое́й лука́вый вра́гъ, му́жественно исто́рглъ еси́; душевре́дныя бо обы́чаи, обличи́въ безсту́дное язы́ческое и́грище, потреби́лъ еси́, вся́ науча́я благоче́стно храни́ти за́повѣди Христо́вы.

Сла́ва, гла́съ 8:

Что́ тя нарече́мъ, святи́телю Ти́хоне? Па́стыря до́браго? Яко ду́шу твою́ за па́ству свою́ положи́ти гото́въ бы́лъ еси́. Апо́столовъ сопресто́льника? Яко писа́ньми твои́ми вся́ ны́ наставля́еши. По́стниковъ похвалу́ и мона́ховъ украше́ніе? Яко труды́, бдѣ́нія и поще́нія и́ноческія подъя́лъ еси́. Земна́го а́нгела и небе́снаго человѣ́ка? Яко въ мíрѣ премíрно пожи́лъ еси́. Сы́на Бо́жія? Яко миротвори́ти па́че всего́ возлюби́лъ еси́. И ны́нѣ моли́ся Христу́ Бо́гу умири́ти мíръ и утверди́ти Святу́ю Це́рковь.

И ны́нѣ, богоро́диченъ: Безневѣ́стная Дѣ́во...



НА УТРЕНИ,
По 1-й стихоло́гіи сѣда́ленъ, гла́съ 8:

Вторы́й Моисе́й яви́лся еси́: возше́дъ бо на го́ру добродѣ́телей, а́ки скрижа́ли, руко́ю Бо́жіею пи́санныя, догма́ты чи́стаго богосло́вія прія́лъ еси́, не зна́меніи стра́шными удивля́я, но Боже́ственныхъ слове́съ уче́ніи наставля́я къ ти́хому приста́нищу но́ваго Изра́иля. [Два́жды.]

Сла́ва, и ны́нѣ, богоро́диченъ:

Да ни́жнія съ вы́шними совокупи́тъ, еди́ный всѣ́хъ Бо́гъ во чре́во Неискусобра́чныя вни́де и въ подо́біи пло́тстѣмъ яви́ся, вражды́ средостѣ́ніе разори́, и жи́знь подаде́ и боже́ственное избавле́ніе.

По 2-й стихоло́гіи сѣда́ленъ, гла́съ 8:

Непостижи́мый Свѣ́тъ отъ Свѣ́та Христо́съ Госпо́дь, почи́въ въ тебѣ́, святи́телю, пресвѣ́тлу свѣщу́ показа́ тя мíру, я́ко блиста́еши свѣ́тлымъ житіе́мъ, озаря́еши луча́ми уче́ній, сія́еши чудесы́: тѣ́мже свѣ́тло пра́зднуемъ па́мять твою́, преблаже́нне Ти́хоне. [Два́жды.]

Сла́ва, и ны́нѣ, богоро́диченъ:

Богора́дованная Влады́чице, святи́телемъ удобре́ніе, пра́веднымъ утвержде́ніе и преподо́бнымъ всѣ́мъ похвало́, спаси́ ны отъ бѣ́дъ, и скорбе́й, и лю́тыхъ прегрѣше́ній, вѣ́рою воспѣва́ющія Тя́.

По поліеле́и сѣда́ленъ, гла́съ 8:

Воздержа́ніемъ тѣ́ло ду́ху порабо́тилъ еси́, у́мъ влады́ку надъ страстьми́ поста́вивъ, болѣ́зньми же по́стническими ду́шу просвѣти́въ, святи́телю, я́ко же́ртву чи́сту предста́вилъ еси́ Христу́, Имже возлю́бленъ бы́въ, я́ко Того́ возлюби́лъ еси́, боже́ственныя бы́лъ еси́ вои́стинну Тро́ицы жили́ще. [Два́жды.]

Сла́ва, и ны́нѣ, богоро́диченъ:

Отъ любве́ душе́вныя вопію́ Ти́, Влады́чице, пресвѣ́тлаго Со́лнца заре́, спасе́нія две́рь, небе́сная врата́, мы́сленная лѣ́ствице всѣ́хъ христіа́нъ: мольбу́ пріими́ Тя́ блажа́щихъ, наде́жду ду́шъ на́шихъ, и спасе́ніе на́мъ да́руй.

Та́же степе́нна, 1-й антифо́нъ 4-го гла́са: Отъ ю́ности моея́... Проки́менъ, гла́съ 4: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе да хва́литъ Го́спода... Ева́нгеліе отъ Іоа́нна, зача́ло 36.

По 50-мъ псалмѣ́ стихи́ра, гла́съ 2:

Взя́лъ еси́ на рамена́ кре́стъ, сраспя́лся еси́ мíру, и послѣ́довалъ еси́ стопа́мъ Спа́са Христа́, любо́вь же жите́йскую и вся́ко пристра́стіе оттря́съ и благи́мъ житіе́мъ просія́въ, воспрія́лъ еси́ вѣ́чное наслѣ́діе. И ны́нѣ, Влады́цѣ твоему́ предстоя́, помяни́ ста́до твое́, при́сно чту́щее тя́, святи́телю о́тче Ти́хоне.

Кано́нъ на 8, [его́же краегране́сіе сіе́: Сла́влю святи́теля и чудотво́рца Ти́хона.] Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Святи́телю Христо́въ Ти́хоне! Са́мъ да́руй ми́ у́мъ и язы́къ, да воспою́ по достоя́нію сла́ву, е́юже сла́вно просла́ви тя́ Христо́съ Госпо́дь.

Луча́ боже́ственнаго свѣ́та возсія́ на́мъ, пріиди́те, ча́да свѣ́та, да озари́мся е́ю, да возгори́мся ду́хомъ, пѣ́сньми святи́теля велича́юще.

Апостоловъ прее́мника, святи́телей сопресто́льника, преподо́бныхъ сожи́теля, просла́вимъ блаже́ннаго Ти́хона, его́же предста́тельствомъ спасе́ніе улуча́емъ.

Богоро́диченъ: Воплоти́вся неизрече́нно Влады́ка всѣ́хъ изъ Тебе́, Богороди́тельнице Марíе, соверше́нъ бы́сть Человѣ́къ, и роди́вся, я́коже пре́жде рождества́, сохрани́ Тя чи́сту, Его́же моли́ спасти́ отъ бѣ́дъ ду́ши на́ша.

Катава́сія по уста́ву.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Любо́вію Христо́вою уязви́вся, блаже́нне, Тому́ отъ ю́ности невозвра́тнымъ жела́ніемъ послѣ́довалъ еси́, вся́кое плотско́е наслажде́ніе возненави́дѣвъ.

Юношескія стра́сти, пло́ть томя́щія, любому́дрія мече́мъ посѣ́клъ еси́, же́ртву себе́ Влады́цѣ Христу́ принося́.

Стра́хомъ Госпо́днимъ утвержда́емь, нача́ло бо прему́дрости се́й е́сть, любо́вію лу́чшею прилѣпи́лся еси́ прему́дрости, о Ти́хоне.

Богоро́диченъ: Воспои́мъ боже́ственный хра́мъ Бо́жій, ублажи́мъ Святу́ю Дѣ́ву, обоже́ни бы́вше Ею и отъ бѣ́дъ избавля́еми.

Сѣда́ленъ, гла́съ 8:

Хра́мъ Свята́го Ду́ха отъ ю́ности бы́лъ еси́: Утѣ́шителева бо благода́ть, по вѣ́рѣ твое́й очи́стивши ду́шу твою́ отъ страсте́й, я́вѣ въ не́й вселя́ется, сего́ ра́ди и по преставле́ніи соблюде́ся тѣ́ло твое́ нетлѣ́нно. Моли́ Христа́ Бо́га, отъ тлетво́рныхъ страсте́й изба́витися чту́щимъ любо́вію па́мять твою́.

Сла́ва, и ны́нѣ, богоро́диченъ:

Ма́ти сла́дкаго ми́ Іису́са, Чи́стая Богоотрокови́це, прія́телище Ду́ха Свята́го, очи́сти мою́ ду́шу, беззако́ніи оскверне́нную, и свѣ́тлое жили́ще добродѣ́телей содѣ́лай, Свѣтоно́сная Нетлѣ́нная, отжени́ о́блакъ страсте́й, да и мене́ Твои́ми моли́твами осѣни́тъ Утѣ́шителева благода́ть.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Яко овча́, отъ Христа́ упа́слся еси́, я́коже па́стырь, упа́слъ еси́ ста́до, изводя́ на па́жити живоно́сныхъ твои́хъ уче́ній.

Таи́нникъ бы́въ Христо́ва уче́нія, Сего́ вѣ́дѣніемъ просвѣти́лъ еси́ лю́ди, дѣ́лы и словесы́ явля́я и́стину Его́.

Истиненъ и вѣ́ренъ стра́жъ до́му Бо́жія бы́лъ еси́, стрегíй его́ дѣ́ломъ, я́ко о́бразъ явля́я житіе́мъ, сло́вомъ, я́ко уча́ усе́рдно, помышле́ніемъ, я́ко пекíйся о бла́зѣ Его́.

Богоро́диченъ: Тя́ приста́нище, и стѣ́ну, и прибѣ́жище, и наде́жду, и покро́въ, и предста́тельницу те́плую обрѣ́тше, вѣ́рніи, къ Тебѣ́ прибѣга́емъ и вопіе́мъ прилѣ́жно, я́коже научи́ на́съ взыва́ти къ Тебѣ́ блаже́нный Ти́хонъ: Пресвята́я Богоро́дице, спаси́ на́съ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Его́же возлюби́лъ еси́, Его́же возжелѣ́лъ еси́, Его́же ра́ди подвиза́лся еси́, святи́телю, моли́ ны́нѣ Христа́ о рабѣ́хъ, да ми́лостивъ бы́въ, всѣ́мъ на́мъ ми́рное состоя́ніе да́руетъ, почита́ющимъ па́мять твою́.

Любо́вію и вѣ́рою Христо́вою испо́лненъ сы́й, яви́лся еси́ я́ко рѣка́, оби́льно всю́ зе́млю Россíйскую напоя́я сло́вомъ уче́нія, блаже́нне Ти́хоне.

Яко пчела́ сла́дкій ме́дъ отъ цвѣто́въ, ско́ро увяда́ющихъ, собра́лъ еси́, о́тче, отъ тлѣ́ннаго мíра духо́вное сокро́вище, и́мже всѣ́хъ на́съ услажда́еши.

Богоро́диченъ: Испо́лни весе́лія се́рдце на́ше, Пречи́стая Богоотрокови́це, весе́лія ро́ждшая Вино́внаго, грѣхо́вную печа́ль вся́кую потребля́ющи.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Чи́стъ бы́въ се́рдцемъ, чи́стому Христу́ прилѣпи́лся еси́, святы́й Свято́му, люби́тель Люби́тельному, кро́ткій Кро́ткому, взыва́я непреста́нно: мнѣ́ прилѣпля́тися Бо́гови бла́го е́сть.

Утѣ́ху, ро́скошь, че́сть, бога́тство, сла́ву и все́ сокро́вище мíра презрѣ́лъ еси́, воспаря́я къ Го́рнему Іерусали́му, къ до́му Отца́ Небе́снаго, идѣ́же оби́тели мно́ги су́ть.

Доса́ды, ско́рби, оби́ды ра́достно терпѣ́лъ еси́, помышля́я, я́ко вѣне́цъ безъ побѣ́ды, побѣ́да безъ по́двига, по́двигъ безъ бра́ни, бра́нь безъ враго́въ не быва́етъ.

Богоро́диченъ: О, Дѣ́во Госпоже́, Ма́ти Зижди́телева! Небе́сныхъ еси́ чино́въ ра́дованіе и человѣ́ческому ро́ду благослове́нная Помо́щница, моли́ спасти́ся душа́мъ на́шимъ.

Конда́къ, гла́съ 8:

Апо́столовъ прее́мниче, святи́телей украше́ніе, Правосла́вныя Це́ркве учи́телю, Влады́цѣ всѣ́хъ моли́ся, ми́ръ вселе́ннѣй дарова́ти и душа́мъ на́шимъ ве́лію ми́лость.

Икосъ:

Ду́шу твою́ украси́въ добродѣ́телію, у́мъ просвѣти́въ любому́дріемъ, па́стырь до́брый яви́лся еси́ ста́ду Христо́ву, сло́вомъ и писа́ніемъ уча́, наказу́я и вразумля́я, житіе́мъ свои́мъ о́бразъ слове́съ явля́я, тѣ́мже на небеси́ вѣнце́мъ сла́вы украси́лся еси́ отъ Пастыренача́льника Христа́, на земли́ сія́я нетлѣ́ніемъ моще́й и источа́я оби́льныя то́ки чуде́съ вѣ́рою призыва́ющимъ тя́, досточу́дне и богому́дре Ти́хоне. Моли́ся ко Го́споду дарова́ти душа́мъ на́шимъ ве́лію ми́лость.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Терпѣ́ніемъ стяжа́лъ еси́ ду́шу твою́, блаже́нне, путе́мъ тѣ́снымъ, еди́нымъ веду́щимъ въ жи́знь вѣ́чную, ше́лъ еси́, вы́ну взира́я на кре́стный пу́ть Подвигополо́жника Христа́ и Сего́ о́бразъ житію́ твоему́ полага́я.

Всего́ себе́ любви́ Бо́жіей пре́далъ еси́, ду́шу и тѣ́ло, се́рдце и ра́зумъ, па́мять и во́лю, намѣ́реніе, начина́ніе, сло́во, дѣ́ло и помышле́ніе Бо́гу въ любо́вь посвяти́лъ еси́.

Оте́цъ сиро́тъ, и вдо́въ защи́тникъ, и бога́тство ни́щихъ, боля́щихъ утѣше́ніе, и су́щихъ въ бога́тствѣ наста́вникъ, ста́рости же́злъ, и наказа́ніе ю́ности, и мона́шествующимъ добродѣ́телей пра́вило яви́лся еси́, блаже́нне Ти́хоне.

Богоро́диченъ: Ра́дуйся, Марíе, ра́дуйся, Спаси́теля мíру ро́ждшая, приста́нище бу́ди на́мъ, жите́йскою бу́рею волну́емымъ, и оти́шіе въ пучи́нѣ скорбе́й, и води́тельство къ небе́снымъ селе́ніемъ.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Ца́рствія небе́снаго еще́ на земли́ сы́нъ бы́въ, вы́ну воздыха́лъ еси́ къ Сы́ну Бо́жію, вопія́ Ему́: бу́ди ми́ пи́ща и питіе́, бу́ди свѣ́тъ души́ моея́, бу́ди отра́да въ ско́рби, бу́ди жи́знь вѣ́чная по воскресе́ніи, да превозношу́ Тя во вѣ́ки.

Ада́ма паде́ніе, Христо́выми страстьми́ искупле́ніе, ча́съ сме́ртный, Стра́шный су́дъ, муче́нія грѣ́шныхъ, блаже́нство пра́ведныхъ всегда́ помышля́я, рыда́лъ еси́, на́мъ умиле́нія о́бразъ показу́я, себе́ же предъочища́я къ бу́дущей сла́вѣ.

Труды́ по вѣ́рѣ и благоче́стію подъе́мъ въ жи́зни се́й, сла́дцѣ по трудѣ́хъ почи́лъ и упоко́ился еси́: соше́лъ бо еси́ во гро́бъ, я́ко пшени́ца, для жи́тницы Бо́жія созрѣ́лая, во вре́мя пожа́тая.

Богоро́диченъ: Иссо́помъ Животворя́щія Кро́ве за спасе́ніе мíра закла́ннаго Агнца, изъ Твои́хъ пречи́стыхъ крове́й пло́ть пріе́мшаго, окропи́ мя, оскверне́ннаго, Влады́чице, и очи́сти мя́, да Твои́мъ ма́тернимъ заступле́ніемъ па́че снѣ́га убѣлю́ся.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Хода́тай яви́лся еси́ и моли́твенникъ те́плый о на́съ къ Бо́гу, святи́телю. Ми́лостива у́бо моли́твами твои́ми содѣ́лай Влады́ку, испроси́, о́тче, прегрѣше́ній оставле́ніе, вѣ́рою свяще́нную па́мять твою́ пра́зднующимъ и серде́чною любо́вію тя́ велича́ющимъ.

Отъ Бо́га Свѣ́та небе́снымъ свѣ́томъ осія́нный, просвѣти́ на́съ, помраче́нныхъ страстьми́ жите́йскими, рѣши́ти же и вяза́ти вла́сть отъ Него́ пріе́мый, разрѣши́ прегрѣше́нія на́ша, и Ца́рствія небе́снаго сподо́би па́мять твою́ пра́зднующихъ и досто́йно тя́ велича́ющихъ.

На́ше хвале́ніе сіе́, отъ недосто́йныя и окая́нныя души́, отъ усе́рдія же бога́таго приноси́мое тебѣ́, пріими́ ми́лостивно, святи́телю, благода́ть проти́ву воздая́ на́мъ щедрооби́льную.

Богоро́диченъ: Ада́ма па́дшаго возста́вила еси́, Богома́ти, ро́ждши Но́ваго Ада́ма, возста́ви и на́съ, па́дшихъ по подо́бію дре́вняго, но благода́ти Но́ваго те́плѣ вѣ́рующихъ.

Свѣти́ленъ. Подо́бенъ: Пло́тію усну́въ.

Пло́тію а́ще и почи́лъ еси́, святи́телю Ти́хоне, но ду́хомъ жи́въ сы́й, въ Ца́рствіи невече́рнемъ со Христо́мъ ца́рствуеши, и мо́лишися Ему́ о призыва́ющихъ тя́ вѣ́рою и любо́вію.

Инъ свѣти́ленъ. Подо́бенъ: Черто́гъ Тво́й ви́жду, Спа́се.

Въ черто́зѣ Жениха́ Христа́ помышля́я тя́, святи́телю, неизрече́ннымъ свѣ́томъ сія́юща, Ца́рствія небе́снаго пріобщи́тися жела́ю, но отъ сна́ грѣхо́внаго объюродѣ́ мо́й у́мъ, угасе́ свѣти́льникъ, я́ко безъеле́енъ, и души́ моея́ оскверне́на е́сть оде́жда, и ви́жду две́ри Ца́рствія мнѣ́ заключе́нныя, но твои́ми моли́твами возбуди́въ мя́ отъ сна́ грѣхо́внаго, еле́й покая́нія ми́ да́руй, и ри́зою заслу́гъ Христо́выхъ прикры́въ мою́ наготу́, досто́йна мя́ сотвори́ невече́рняго Ца́рствія.

На хвали́техъ стихи́ры, гла́съ 3:

Ско́рбныхъ утѣ́шителю, одѣ́янныхъ въ ру́бище любе́зно пріима́лъ еси́, су́щихъ въ темни́цѣ посѣща́лъ еси́, ни́щихъ, ра́нами смердя́щихъ, упокоева́лъ еси́, печа́льныхъ убо́гаго ро́да утѣша́лъ еси́, дру́гъ бы́въ ме́ньшей бра́тіи Христо́вѣ, сего́ ра́ди и Христо́съ въ ли́цѣ друзе́й вчини́ тя. Его́же моли́ и на́ше жестосе́рдіе умягчи́ти и ско́ры ны́ сотвори́ти на благотворе́ніе по́мощи и утѣше́нія тре́бующимъ.

Ми́ра люби́телю, вся́ оби́ды, я́ко нѣ́мъ и не отверза́яй у́стъ, терпѣ́лъ еси́ ра́достно, вся́ оставля́я, да то́чію ми́ренъ бу́детъ оби́дяй, и вражду́ющихъ миротво́рецъ яви́лся еси́. Умири́ у́бо многомяте́жныя на́ша стра́сти, гнѣ́въ, и за́висть, и рве́ніе потребля́я, братолю́бію же и терпѣ́нію науча́я.

Безмо́лвія рачи́телю, хране́ніе усто́мъ твои́мъ полага́вый и две́рь огражде́нія о устнѣ́хъ твои́хъ, да еди́нъ еди́ному Бо́гу бесѣ́дуеши, удержи́ неудержи́мое зло́ язы́ка на́шего и исцѣли́ на́съ отъ праздносло́вія, суесло́вія и осужде́нія, принося́ вы́ну за ны́ те́плыя твоя́ моли́твы Го́споду Бо́гу.

Сла́ва, [гла́съ 2:]

Подража́телю любве́ Отца́ Небе́снаго, я́ко сы́нъ любве́, въ любви́ при́сно пребыва́яй, любо́вь вы́ше поста́ поста́вилъ еси́. Мо́лимъ тя́: уйми́ и на́мъ отъ ду́ха любве́ твоея́, и научи́ на́съ зрѣ́ти на́ша прегрѣше́нія и не осужда́ти бра́та: мо́жеши бо, я́ко въ Бо́зѣ пребыва́еши и Бо́гъ въ тебѣ́ пребыва́етъ.

И ны́нѣ, богоро́диченъ, гла́съ то́йже:

Ино́го держа́внаго прибѣ́жища, и крѣ́пости столпа́, и стѣны́ необори́мыя вои́стинну не стяжа́хомъ, ра́звѣ Тебе́, Пречи́стая. Къ Тебѣ́ прибѣга́емъ и Тебѣ́ вопіе́мъ: Влады́чице, помози́, да не поги́бнемъ; покажи́ Твою́ благода́ть на ны́, и крѣ́пости сла́ву, и милосе́рдія Твоего́ вели́чество.

Аще же е́сть попра́зднство, богоро́диченъ пра́здника.
Славосло́віе вели́кое и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Апо́столъ ко Евре́емъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ его́ возглаго́летъ су́дъ]. Сти́хъ: Зако́нъ Бо́га его́ въ се́рдцѣ его́, [и не за́пнутся стопы́ eго́]. Ева́нгеліе отъ Матѳе́я, зача́ло 11. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 134-141.

/ Къ оглавленію раздѣла /


Наверхъ / Къ титульной страницѣ

0