Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 12-й де́нь.
Святы́хъ му́ченикъ Фо́тія и Аники́ты.
Пое́тся же съ ни́ми слу́жба и преподо́бнаго отца́ на́шего Макси́ма Исповѣ́дника.

[НА ВЕЧЕРНИ,]
На Го́споди, воззва́хъ: стихи́ры му́чениковъ, гла́съ 4. Подо́бенъ: Да́лъ еси́ зна́меніе.

Огня́ не убоя́стеся,* ни сѣку́щаго орга́на,* ни я́рости свирѣ́паго, безъ ума́ претя́щаго,* ни стремле́нія льво́въ,* ни вре́нія коно́бнаго,* ни удо́въ отсѣче́нія,* ни сме́рти го́рькія отвѣ́та,* ва́съ безсме́ртствующаго,* къ Бо́гу безсме́ртному сла́вно отсыла́юща,* страда́льцы до́бліи.

Блаже́нную и всечестну́ю,* и досто́йно жела́емую* кончи́ну воспрія́сте,* и вѣ́чныя, до́бліи, наде́жды,* излива́ете на́мъ то́ки чуде́съ,* опале́ніе отъе́млюще* страсте́й ду́шъ и тѣле́съ,* благоче́стно моле́бный пра́здникъ ва́шъ* всегда́ соверша́ющихъ, прехва́льніи.

Фо́тій сла́вный* и богому́дрый Аники́тъ,* дво́ица вседо́бляя,* Тро́ичною свѣ́тлостію украша́ема* и преиспещре́нна ра́нъ добро́тами,* со а́нгелы при́сно ра́дуется,* и и́же вѣ́рою сла́вное и свяще́нное и́хъ страда́ніе* пра́зднующимъ подаю́тъ* просвѣще́ніе и ми́лость.

Ины стихи́ры преподо́бнаго, гла́съ то́йже. Подо́бенъ: Яко до́бля.

За милосе́рдіе бы́вша Человѣ́ка,* я́коже благоизво́ли,* во дву́ хотѣ́нію,* дѣ́йствахъ же разумѣва́ема, преподо́бне,* проповѣ́далъ еси́, Макси́ме,* загражда́я скве́рныхъ* незатворе́нная уста́,* единово́льна, единодѣ́йственна Сего́ сла́вящихъ,* искуше́ніемъ діа́вольскимъ,* зло́бу просте́ршаго.

Жи́лами уче́ній твои́хъ* Пи́рра, о́тче, удави́лъ еси́ лжу́ща,* Макси́ме, безу́мнаго,* и гоне́нія претерпѣ́лъ еси́* и ско́рби, приснопа́мятне,* ураня́емь зѣло́,* и язы́къ урѣ́заемь,* и ю́же всегда́ къ Бо́гу простира́емую боже́ственную ру́ку,* е́юже пиша́, соверши́лъ еси́ высо́кая словеса́.

Скоропи́сца я́коже тро́сть,* омоче́на Ду́хомъ,* святы́й бы́сть, блаже́нне, язы́къ тво́й,* добропи́шущь благода́тію,* на скрижа́лехъ серде́цъ на́шихъ,* зако́нъ Боже́ственныхъ добродѣ́телей,* и уче́ніемъ извѣ́стіе,* и воплоще́ніе во двою́ Существу́ человѣ́комъ,* и во еди́ной Ѵпоста́си яви́тися восхотѣ́вша.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Макси́ме: твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, гла́съ то́йже:

Мра́къ зако́нный, свѣ́тлый преображе́нія прія́тъ о́блакъ, въ не́мже Моисе́й и Илія́ бы́вше, и пресвѣ́тлыя сла́вы сподо́бльшеся, Бо́гови глаго́лаху: Ты́ еси́ Бо́гъ на́шъ, Ца́рь вѣко́въ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Къ горѣ́ Ѳаво́рстѣй* присту́пимъ усе́рдно,* ви́дѣти сла́ву* всѣ́хъ Царя́ Христа́,* Изба́вителя на́шего.

Сти́хъ: Твоя́ су́ть небеса́,* и Твоя́ е́сть земля́.

Яви́лся еси́ съ Моисе́омъ* и Иліе́ю, Спа́се мо́й,* и ученико́въ лу́чшіи,* на горѣ́ Ѳаво́рстѣй,* облиста́въ па́че со́лнца.

Сти́хъ: Ѳаво́ръ и Ермо́нъ* о и́мени Твое́мъ возра́дуетася.

Слы́шаху Оте́ческій гла́съ,* произвѣству́ющь сла́ву Твою́,* Спа́се мо́й,* и ученико́въ лу́чшіи* ни́цы на зе́млю па́даху.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́, и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, гла́съ 5:

Божества́ Твоего́, Спа́се, ма́лу зарю́ обнажи́въ, совозше́дшимъ съ Тобо́ю на го́ру, премíрныя Твоея́ сла́вы сотвори́лъ еси́ рачи́тели. Тѣ́мже ужа́сно зовя́ху: добро́ е́сть на́мъ здѣ́ бы́ти. Съ ни́миже и мы́ Тебе́ преобра́жшагося, Спа́са Христа́ пое́мъ во вѣ́ки.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости; тѣ́хъ моли́твами спаси́ ду́ши на́ша.

Сла́ва, преподо́бнаго, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, мона́шествующихъ богодухнове́нное удобре́ніе, Макси́ме прему́дре, уче́ньми твои́ми вся́ просвѣти́лъ еси́, цѣвни́це духо́вная. Моли́ Христа́ Бо́га спасти́ся душа́мъ на́шимъ.

И ны́нѣ, пра́здника, гла́съ 7:

Преобрази́лся еси́ на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.


НА УТРЕНИ,
По 1-й стихоло́гіи сѣда́ленъ, гла́съ 4. Подо́бенъ: Вознесы́йся.

Возше́дъ со ученики́ на го́ру и во сла́вѣ Отчи облиста́въ, съ Моисе́омъ Илія́ Тебѣ́ предстоя́тъ, зако́нъ и проро́цы бо я́ко Бо́гови слу́жатъ. Ему́же и сыновство́ есте́ственное Роди́тель исповѣ́дая, нарица́ше Сы́на. Его́же воспѣва́емъ съ Тобо́ю и Ду́хомъ.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ то́йже. Подо́бенъ: Удиви́ся Іо́сифъ.

На горѣ́ Ѳаво́рстѣй преобрази́лся еси́, Іису́се, и о́блакъ свѣ́телъ, протяза́ющся, я́ко сѣ́нь, апо́столы сла́вою покры́. Тѣ́мже и на зе́млю ни́цъ па́даху, не терпя́ще зрѣ́ти свѣ́тлости непристу́пныя сла́вы лица́ Твоего́, Безнача́льне Спа́се, Христе́ Бо́же. Иже тогда́ си́мъ свѣ́тъ Тво́й возсія́вый, просвѣти́ ду́ши на́ша.

Сла́ва, и ны́нѣ, то́йже.

Кано́нъ пра́здника, со ирмосо́мъ на 6, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Моисе́й, на мо́рѣ проро́чески ви́дѣвъ о́блакомъ и столпо́мъ дре́вле о́гненнымъ сла́ву Госпо́дню, вопія́ше: Изба́вителю и Бо́гу на́шему пои́мъ.

Яко ка́менемъ, тѣ́ломъ покры́вся, обоже́ніемъ Неви́димаго зря́, Моисе́й богови́децъ взыва́ше: Изба́вителю и Бо́гу на́шему пои́мъ.

Ты́ на горѣ́ зако́ннѣй и на Ѳаво́рстѣй ви́дѣнъ бы́лъ еси́ Моисе́емъ во мра́цѣ дре́вле, во свѣ́тѣ же ны́нѣ непристу́пнѣмъ Божества́.

Инъ кано́нъ му́чениковъ на 4, его́же краегране́сіе: Кра́сную похваля́ю му́чениковъ дво́ицу. Іо́сифъ, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Болѣ́зни тѣ́ла, прехва́льніи, претерпѣ́вше, твердѣ́йшимъ по́мысломъ вѣ́ры, къ неболѣ́зненней жи́зни, ра́дующеся, преста́вистеся, о на́съ при́сно моля́щеся.

Боже́ственными огра́ждся, Аники́то, ору́жіи вѣ́ры, къ боре́нію безпло́тныхъ вра́гъ тве́рдо отлучи́лся еси́ и тѣ́хъ во́инства Боже́ственною си́лою потреби́лъ еси́.

Витíйское глумле́ніе, сла́вне, и у́мъ неиску́сенъ е́ллинскій, ра́зумомъ Боже́ственнымъ просвѣща́емь, посрами́лъ еси́, и себе́ сама́го, Аники́то, всего́ къ страда́нію отда́лъ еси́.

Богоро́диченъ: Дѣ́ва и пре́жде рождества́, Чи́стая, и по рождествѣ́ я́ко вои́стинну яви́лася еси́, Бо́га бо па́че сло́ва родила́ еси́, святы́я му́ченики страда́вшія вѣнча́вшаго.

Инъ кано́нъ преподо́бнаго на 4, гла́съ 8.
Пѣ́снь 1.

Ирмо́съ: Изра́иля отъ рабо́ты изба́вилъ еси́, Го́споди, десни́цею Твое́ю держа́вною, я́ко о́наго спа́слъ еси́, ны́нѣ на́съ спаси́.

Вы́шнія прему́дрости сокро́вище стяжа́въ въ се́рдцы, преподо́бне, тоя́ ра́ди обогати́лъ еси́ мíръ уче́ніи.

Ангельское показа́лъ еси́ житіе́, на земли́ живы́й, и бы́лъ еси́ хра́мъ Бо́гу, христопроповѣ́дниче преподо́бне, тѣ́мже и возложи́лся Ему́.

Еди́но мы́сляще дру́гъ ко дру́гу, во еди́ну Твою́ вѣ́ру, Христе́, преподо́бніи проповѣ́даху Тя́ въ безъязы́чныхъ устѣ́хъ, я́ко трубы́ боговѣща́нныя.

Богоро́диченъ: Ра́дуйся, Чи́стая Богоро́дице, Яже пре́жде су́щаго Сло́ва Бо́жія ро́ждши въ послѣ́дняя пло́тію; ра́дуйся, стѣно́ всѣ́мъ на́мъ, и покро́ве чту́щимъ Тя́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Осѣня́ющая сла́ва въ сѣ́ни пе́рвѣе и Моисе́еви бесѣ́дующи, Твоему́ уго́днику, о́бразъ бы́сть облиста́вшаго неизрече́нно на Ѳаво́рѣ, Влады́ко, Твоего́ преображе́нія.

Совзыдо́ша Ти́, Сло́ве Единоро́дный, вы́шніи апо́стольстіи верси́ на го́ру Ѳаво́рскую, и сопредста́ша Ти́ Моисе́й же и Илія́, я́ко Бо́жія слуги́, Еди́не Человѣколю́бче.

Бо́гъ Сло́во сы́й, ве́сь зе́мленъ бы́сть, всему́ Божеству́ смѣси́въ человѣ́чество во ѵпоста́си Свое́й, ю́же во двою́ существу́ Моисе́й и Илія́ же ви́дѣша на горѣ́ Ѳаво́рѣ.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Побѣди́въ со Христо́мъ ополче́нія вра́жія, вѣне́цъ побѣ́дный прія́лъ еси́, му́чениче страстоте́рпче Аники́то.

Неради́ша о пло́ти я́ко тлѣ́ющей Христо́вы му́ченицы и лю́тая муче́нія ра́зумомъ тве́рдымъ претерпѣ́ша.

Во́дъ животво́рныхъ испо́лнени, му́тныя то́ки пре́лести, му́дріи му́ченицы, тече́ніи кро́вными уста́висте.

Богоро́диченъ: Всели́ся во утро́бу Твою́ живы́й на небесѣ́хъ Госпо́дь и отъ на́съ вся́ку пре́лесть, Богоро́дице, отгна́лъ е́сть.

Инъ.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ, па́че Тебе́, Го́споди.

Кро́ви ка́плютъ честны́я твоея́ руки́, и уче́нія теку́тъ цѣлому́дреннаго язы́ка твоего́, извѣ́стно вопію́ща по отсѣче́ніи его́, Христа́ во двою́ естеству́.

Рука́ твоя́ писа́ньми не преста́ вопія́, и язы́къ уче́ніи тру́битъ вѣ́ру твою́, богоглаго́ливе треблаже́нне: Бо́гъ бо бѣ́ обоя́ движа́, слага́я глаго́лати.

Треми́ у́бо тѣлесы́, во еди́ной же души́, единому́дренно сопроти́вистеся, отцы́ чу́дніи, злѣ́ отъе́млющимъ Христо́вы стра́сти и сугу́бое дѣ́йство.

Богоро́диченъ: Жены́ у́бо ражда́ютъ, Ма́ти Дѣ́во Чи́стая, но не ктому́ дѣ́вы пребыва́ютъ, я́коже Ты́: ниже́ бо еди́на отъ си́хъ Бо́га породи́, то́кмо Ты́, Богоро́дице Чи́стая.

Конда́къ [преподо́бнаго], гла́съ 6. Подо́бенъ: Еже о на́съ.

Свѣ́тъ трисія́нный, все́льшійся въ ду́шу твою́, сосу́дъ избра́нъ показа́ тя, всеблаже́нне, явля́юща Боже́ственная конце́мъ, неудобопости́жныхъ разумѣ́ній ты́ сказу́яй, блаже́нне, и Тро́ицу всѣ́мъ, Макси́ме, воспроповѣ́дуяй я́сно, Пресу́щную Безнача́льну.

Икосъ:

Подража́тель я́влься Спа́совыхъ страсте́й и Того́ въ души́ твое́й имѣ́я, всеблаже́нне, восхожде́нія въ се́рдцы твое́мъ возложи́лъ еси́, пребога́те, То́й же тебѣ́ подаде́ благода́ть съ небесе́: сопроти́вился бо еси́ мучи́телемъ, му́дре, му́жески, Безнача́льную, и Боже́ственную, и Единосу́щную Тро́ицу проповѣ́дуя, и облича́я злосла́вныя и богобо́рныя, безмѣ́рныя претерпѣ́лъ еси́ напа́сти, всехва́льне, язы́ка отрѣ́заніе богосло́внаго, преподо́бне, и твоея́ руки́ вку́пѣ, не преста́лъ же еси́ ты́ со дерзнове́ніемъ глаго́ля, и утвержда́я вѣ́рныя боже́ственными твои́ми уче́ніи, Тро́ицу всѣ́мъ лю́демъ проповѣ́дуя я́сно, Пресу́щную Безнача́льну.

Сѣда́ленъ му́чениковъ, гла́съ 4. Подо́бенъ: Вознесы́йся.

Низло́жше вра́жія возноше́нія терпѣ́ніемъ лю́тыхъ му́къ, страстоте́рпцы, на небесѣ́хъ живете́ ны́нѣ, ра́дующеся, Фо́тіе сла́вный и Аники́то блаже́нне. Тѣ́мже ублажа́етеся во вѣ́ки вѣко́въ, о на́съ моля́щеся Христу́, творя́щихъ ва́шу па́мять.

Сла́ва, преподо́бнаго, гла́съ 3. Подо́бенъ: Боже́ственныя вѣ́ры.

Уче́ніе Боже́ственное держа́, сто́лпъ бы́лъ еси́ Правосла́вія, и держа́ва, богому́дре, вѣ́ры: во двою́ существу́ и дву́ хотѣ́нію, проповѣ́далъ еси́ Христа́ Бо́га на́шего, о́тче Макси́ме, Его́же прилѣ́жно моли́, дарова́ти на́мъ ве́лію ми́лость.

И ны́нѣ, пра́здника, гла́съ то́йже. Подо́бенъ: Красотѣ́ дѣ́вства Твоего́.

Боже́ственныя Твоея́ сла́вы сія́ніе, я́коже можа́ху, показа́лъ еси́, Сло́ве Бо́жій, ученико́мъ Твои́мъ, на Ѳаво́рстѣй горѣ́ преобразу́ющійся. Имиже просвѣти́хомся и мы́, пою́щіи Тя́, еди́не неизмѣ́нне и безсме́ртне Го́споди, Тебѣ́ бо вѣ́рою вопіе́мъ: сла́ва, Христе́, Ца́рствію Твоему́.

Пѣ́снь 4.

Ирмо́съ: Изъ пло́ти Твоея́ лучи́ Божества́ исхожда́ху проро́комъ и апо́столомъ. Тѣ́мъ нача́льницы, пою́ще, взыва́ху: сла́ва си́лѣ Твое́й, Го́споди.

Иже купину́ сохрани́вый неврежде́ну, прикосну́вшуюся огню́, Моисе́ю богосія́нную пло́ть показа́лъ еси́, Влады́ко, пою́щему: сла́ва си́лѣ Твое́й, Го́споди.

Скры́ся заре́ю Божества́ чу́вственное со́лнце, я́ко на горѣ́ Ѳаво́рѣ ви́дѣвъ Тя́ преобразу́ющася, Іису́се мо́й: сла́ва си́лѣ Твое́й, Го́споди.

Огнь, не опаля́я ве́щи тѣле́сныя, ви́дѣнъ бы́сть невеще́ственъ, я́коже Моисе́ю и апо́столомъ яви́лся еси́, Иліи́ же, Влады́ко, еди́нъ отъ двою́, во дву́ соверше́нну естеству́.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Распала́еми любо́вію Бо́жіею, усе́рдно пла́мень огня́ проидо́сте, пребы́вше росо́ю неопа́льна духо́вною, непобѣди́міи му́ченицы, боже́ственніи моли́твенницы о душа́хъ на́шихъ.

Отве́ргшеся тѣ́ла, разли́чными о́бразы страда́льцы стру́жеми, всѣ́мъ бо умо́мъ къ Бо́гу взира́ху, си́мъ подаю́щему терпѣ́ніе вѣ́ры ра́ди.

Крѣ́пцы, я́ко столпи́ благоче́стія, стѣ́ны вра́жія низложи́сте и гра́да Боже́ственнаго, му́ченицы, гра́ждане бы́сте, вопію́ще: сла́ва си́лѣ Твое́й, Го́споди.

Дрема́ніемъ не воздрема́сте злоче́стія, но бо́дростію боже́ственною, му́ченицы, спя́щія всегда́ въ сме́рти къ свѣ́ту наста́висте богоразу́мія благода́тію.

Богоро́диченъ: Яко красна́ породила́ еси́ Кра́снаго, Дѣ́во Ма́ти Чи́стая, красны́ показа́вшаго му́ченика, тве́рдо пострада́вшія и безбо́жіе потре́бльшія.

Инъ.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися, богови́дно усмотри́, и со стра́хомъ славосло́вяше си́лу Твою́.

Ты́ Моисе́ю подо́бяся, богому́дре, скрижа́ли разу́мно прія́тъ уче́ній: во мра́къ бо вше́лъ еси́ видѣ́ній, и обогати́лся еси́ ра́зума свѣ́томъ.

Ты́ Авраа́му поревнова́въ, богому́дре, друга́го Исаа́ка приве́лъ еси́ Го́сподеви, твое́ же́ртвовавъ, о́тче, се́рдце во огни́ со́вѣстнѣ.

Еди́наго Христа́ проповѣ́давше, отцы́, еди́наго Сы́на во двою́ существу́ исповѣ́дасте, хотя́ща по существу́ и дѣ́йствующа обоя́.

Богоро́диченъ: Безлѣ́тна Сы́на родила́ еси́ въ лѣ́то нетлѣ́нно и чиста́ пребыла́ еси́, ро́ждши на́съ ра́ди Воплоще́ннаго во утро́бѣ Твое́й, Богороди́тельнице Приснодѣ́во.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Вѣтíйствующій язы́къ Твоего́ вели́чества не мо́жетъ вѣща́ти: я́ко бо, Держа́й живо́тъ и сме́ртію Влады́й, предста́вилъ еси́ на Ѳаво́рстѣй горѣ́ Моисе́я и Илію́, свидѣ́тельствующія Твое́ Божество́.

Иже рука́ми неви́димыми созда́въ по о́бразу Твоему́, Христе́, человѣ́ка, началообра́зную Твою́ въ созда́ніи добро́ту показа́лъ еси́, не я́ко во о́бразѣ, но я́ко Са́мъ Сы́й по существу́, Бо́гъ бы́лъ еси́ и Человѣ́къ.

Сраствори́вся неслія́нно, у́гль горя́щь показа́лъ еси́ на́мъ Божества́, попаля́ющь у́бо грѣхи́, ду́ши же просвѣща́ющь, на Ѳаво́рстѣй горѣ́, Моисе́я со Иліе́ю, ученико́въ же старѣ́йшія удиви́лъ еси́.

Инъ.

Ирмо́съ: Ты́, Го́споди мо́й, Свѣ́тъ въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія, вѣ́рою воспѣва́ющія Тя́.

Премно́гими ра́нами умерщвле́но тѣ́ло твое́, Аники́то, живо́тъ тебѣ́ нестарѣ́емый, преблаже́нне, преподо́бно исхода́таи.

Потребле́ніе огню́ жгу́щему бы́лъ еси́, о Фо́тіе, Боже́ственнаго сія́нія соприча́стниче, и дне́ незаходи́маго ча́до при́сное!

Теку́щихъ тлѣ́ніе до конца́ отри́нуша, возжелѣ́вше пребыва́ющая кра́сная, единоду́шно, му́ченицы сла́вніи.

Богоро́диченъ: Кто́ мо́жетъ сказа́ти Твое́ та́инство, о Влады́чице Богоро́дице? Па́че ума́ бо и сло́ва, Бо́га неизрече́нно родила́ еси́.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Не усѣче́ твоего́, о́тче, ме́чь дерзнове́нія, не угаси́, преподо́бне, заточе́ніе вѣ́ры твоея́.

Проповѣ́дуетъ у́бо Ри́мъ ре́вность твою́, богоно́се, тру́битъ же, преподо́бне, Це́рковь словеса́ твоя́.

Предъ кня́зи проповѣ́давше Спа́са, му́ченицы бы́сте произволе́ніемъ, богому́дріи.

Богоро́диченъ: Исто́чникъ безсме́ртія пое́мъ Тя́, Богоро́дице, Ты́ бо приснотеку́щій Живо́тъ мíру родила́ еси́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Яко ве́ліе и стра́шное узрѣ́ся видѣ́ніе дне́сь: съ небесе́ у́бо чу́вственное, отъ земли́ же несравне́нное, облиста́ Со́лнце пра́вды мы́сленное на горѣ́ Ѳаво́рстѣй.

Пре́йде у́бо сѣ́нь зако́нная, изнемо́гшая, пріи́де же я́вѣ Христо́съ и́стина, — Моисе́й возопи́, на Ѳаво́рѣ ви́дѣвъ Твое́ Божество́.

Сто́лпъ о́гненный — Христа́ преобразу́ющася, о́блакъ же — я́вѣ благода́ть Ду́ха, осѣни́вшую на Ѳаво́рѣ, предсказа́ша явле́ннѣйше.

Инъ.

Ирмо́съ: Пожру́ Ти́ со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися ра́ди ми́лости отъ ре́бръ Твои́хъ исте́кшею Кро́вію.

Возвы́шенъ бы́лъ еси́, не ми́лостивно на дре́вѣ стру́жемъ, умерщвле́нія дебельство́ отмета́я, въ боже́ственную оде́жду съ небесе́ одѣва́емь, му́чениче Аники́то.

Расто́ргше у́зы пре́лести, святíи, внегда́ свя́зани бы́сте крѣ́пко, терпѣ́ніемъ же и пожда́ніемъ, боже́ственными у́жи, предста́теля тмы́ удави́сте.

Яви́стеся я́ко вели́цыи свѣти́льницы, просвѣща́юще луча́ми исцѣле́ній и заря́ми боже́ственныхъ по́двигъ всю́ тва́рь, страда́льцы Христо́вы предо́бліи.

Богоро́диченъ: Зако́нныхъ породила́ еси́ кромѣ́, Всенепоро́чная, и́стиннаго Законополо́жника, Его́же моли́ зако́номъ грѣха́ побѣжда́емую ду́шу мою́ уще́дрити и спасти́ мя.

Инъ.

Ирмо́съ: Изъ чре́ва а́дова во́пля моего́ услы́шалъ еси́ гла́съ мо́й и изба́вилъ еси́ отъ тли́ живо́тъ мо́й, Многоми́лостиве.

Удиви́ твое́, треблаже́нне, исповѣ́даніе, въ тебѣ́ вѣща́вый Іису́съ, со стра́ждущими тебѣ́.

Ни князе́й киче́нія, ни меча́, ни огня́, претя́щаго тебѣ́, убоя́ся, преподо́бне, вѣ́рою бы́лъ еси́ крѣ́покъ.

Не поколеба́ твоего́ столпа́ правосла́вія вселука́вый вра́гъ, но побѣди́ся и поги́бе.

Треплете́нною твое́ю пра́щею преще́ніе Аріево мы́сленно стрѣля́ется, стрѣла́ми та́инъ Христо́выхъ.

Богоро́диченъ: Па́че ума́ и сло́ва, Дѣ́во, Пита́теля всѣ́хъ отъ сосцу́ пита́ющи, ма́тернихъ не разумѣ́ла еси́.

Конда́къ, гла́съ 7. Самогла́сенъ:

На горѣ́ преобрази́лся еси́, и я́коже вмѣща́ху ученицы́ Твои́, сла́ву Твою́, Христе́ Бо́же, ви́дѣша, да егда́ Тя́ у́зрятъ распина́ема, страда́ніе у́бо уразумѣ́ютъ во́льное, мíрови же проповѣ́дятъ, я́ко Ты́ еси́ вои́стинну Отчее сія́ніе.

Икосъ:

Воста́ните, лѣни́віи, и́же всегда́ ни́зу пони́кшіи въ зе́млю, души́ моея́ по́мыслы, возми́теся и возвы́ситеся на высоту́ Боже́ственнаго восхожде́нія. Притеце́мъ къ Петру́ и къ Зеведе́евымъ и вку́пѣ со о́нѣми Ѳаво́рскую го́ру дости́гнемъ, да ви́димъ съ ни́ми сла́ву Бо́га на́шего, гла́съ же услы́шимъ, его́же свы́ше слы́шаша и проповѣ́даша Отчее сія́ніе.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Ны́нѣ ви́дѣна бы́ша апо́столомъ неви́димая Божества́ во пло́ти, на горѣ́ Ѳаво́рстѣй облиста́вша, вопію́щимъ: благослове́нъ еси́, Го́споди Бо́же, во вѣ́ки.

Ужасо́шася стра́хомъ, уди́вльшеся благолѣ́пію Боже́ственнаго Ца́рства, на горѣ́ Ѳаво́рстѣй апо́столи, вопію́ще: благослове́нъ еси́, Го́споди Бо́же, во вѣ́ки.

Ны́нѣ неуслы́шанная услы́шана бы́ша: безъ отца́ бо Сы́нъ отъ Дѣ́вы Оте́ческимъ гла́сомъ сла́вно свидѣ́тельствуется, я́ко Бо́гъ и Человѣ́къ, То́йже во вѣ́ки.

Положе́ніемъ не бы́лъ еси́ Вы́шняго, существо́мъ же Сы́нъ возлю́бленъ, пре́жде Сы́й, на́мъ прибли́жился еси́ непрело́жно: благослове́нъ еси́, Го́споди Бо́же, во вѣ́ки.

Инъ.

Ирмо́съ: Въ пещи́ Авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Стра́ненъ по́двигъ проше́дше, стра́нни яви́стеся вои́стинну мудрова́ній, сла́вніи, плотски́хъ, а́нгеломъ согра́ждане, снаслѣ́дницы же Христу́, великоимени́тіи му́ченицы.

Терпѣ́ніемъ же и пожда́ніемъ побѣди́сте всѣ́хъ враго́въ безбо́жныя навѣ́ты и, свѣ́тлы болѣ́зньми бы́вше, къ сія́нію незаходи́мому преста́вистеся, пресла́вніи.

Хра́мъ Тро́ицы Пребоже́ственныя бы́вше, столпы́ и хра́мы низложи́ша му́жески безбо́жныхъ, прехва́льніи, и къ небе́сному хра́му преста́вистеся, ра́дующеся.

Богоро́диченъ: Яко простра́ннѣйши небе́съ, Чи́стая, прія́ла еси́ Сло́ва, ника́коже вмѣ́стна па́че ума́, тѣ́снымъ ходя́щія путе́мъ, Пренепоро́чная, къ простра́нству вводя́ща Боже́ственныя жи́зни.

Инъ.

Ирмо́съ: Въ нача́лѣ зе́млю основа́вый и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Ты́ оде́жду есте́ственнаго досто́инства кро́вію твое́ю украси́лъ еси́, богому́дре, молча́щъ язы́къ, о́тче, и вѣща́ющь, явле́ніе подава́я се́ю слове́съ твои́хъ.

Гро́бъ ва́шихъ не уста́ви язы́ковъ, земля́ же да́льняя не скры́ словеса́, я́коже пи́шетъ Дави́дъ въ пѣ́снехъ, во всю́ вои́стинну зе́млю проповѣ́дашася.

Якоже зла́то, тріе́ искуси́вшеся во огни́ искуше́ній о́нѣхъ, чистѣ́йшу вѣ́ру ва́шу возрасти́сте Христу́, отцы́ честнíи.

Богоро́диченъ: Та́йны о́бразъ Дѣ́вы въ Сина́и Ты́ прообрази́лъ еси́, купино́ю горя́щею и неопаля́емою: благослове́нъ еси́, Го́споди, Бо́же оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Услы́шавше, Влады́ко, отъ Отца́ свидѣ́тельствуема, и я́ко человѣ́ческа твердѣ́йша зра́ка зрѣ́ти лица́ Твоего́ блиста́нія не терпя́ще, Твои́ ученицы́ на зе́млю ни́цъ па́даху, со стра́хомъ пою́ще: свяще́нницы, благослови́те, лю́діе, превозноси́те во вся́ вѣ́ки.

Ца́рствующимъ еси́ Ца́рь прекра́сенъ и и́же всю́ду владя́щимъ Госпо́дь си́ленъ, Блаже́нъ и во свѣ́тѣ живы́й непристу́пнѣмъ, Ему́же ученицы́ уди́вльшеся, Моисе́й же и Илія́ вопія́ху: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Яко не́бомъ владу́щему, и земле́ю госпо́дствующему, и надъ преиспо́дними о́бласть иму́щему, Христе́, предста́ша Ти́: отъ земли́ у́бо — апо́столи, я́ко съ небесе́ же — Ѳесви́тянинъ Илія́, Моисе́й же — отъ ме́ртвыхъ, пою́ще согла́сно: лю́діе, превозноси́те во вся́ вѣ́ки.

Уны́нія ражда́ющія печа́ли на земли́ оста́виша, апо́столовъ избра́нніи, Человѣколю́бче, я́ко Тебѣ́ послѣ́доваша, ко и́же отъ земли́ преложе́нію боже́ственнаго житія́. Тѣ́мже, и по достоя́нію Твоего́ Богоявле́нія улучи́вше, поя́ху: лю́діе, превозноси́те Его́ во вѣ́ки.

Инъ.

Ирмо́съ: Ру́цѣ распросте́ръ, Даніи́лъ льво́въ зія́нія въ ро́вѣ затче́, о́гненную же си́лу угаси́ша, добродѣ́телію препоя́савшеся, благоче́стія рачи́тели о́троцы, взыва́юще: благослови́те, вся́ дѣла́ Госпо́дня, Го́спода.

Тве́рдъ у́мъ, му́дріи, показу́юще, звѣре́й стремле́нія не убоя́стеся, врѣ́нія коно́бъ не ужасо́стеся, ни удо́въ отсѣче́нія, ни мучи́телей преще́нія, вопію́ще: благослови́те, вся́ дѣла́ Госпо́дня, Го́спода.

Исцѣля́ете стра́сти вѣ́рныхъ, изобрази́вше стра́сть блаже́нную ва́шими страстьми́, святíи, и отъе́млете неду́ги, и отгоня́ете лю́тыя ду́хи, вопію́ще: благослови́те, вся́ дѣла́ Госпо́дня, Го́спода.

Дво́ица страда́лецъ предо́брая Тро́ицу Несозда́нную исповѣ́да, и тмосла́вныхъ погуби́ супоста́тъ вои́стинну по́лкъ, и тма́мъ мы́сленныхъ совокупи́ся, пою́ще: благослови́те, вся́ дѣла́ Госпо́дня, Го́спода.

Богоро́диченъ: Свята́я Дѣ́во, Яже Бо́га Пресвята́го поро́ждши, вѣнча́вшаго благода́тію святы́я Своя́ му́ченики, спаси́, освяти́ на́съ, усе́рдно пою́щихъ: благослови́те, вся́ дѣла́ Госпо́дня, Го́спода.

Инъ.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Зарю́ боже́ственнаго уче́нія въ се́рдцы пріе́мъ, богому́дре, просвѣще́ніемъ ра́зума обогати́лся еси́, и прему́дрости сокро́вище вложи́лъ еси́ въ ду́шу твою́, о́тче.

Уче́нія предложи́въ, богоблаже́нне, е́реси отгна́лъ еси́ отъ среды́, и Христо́вымъ поревнова́въ страсте́мъ, бы́лъ еси́ же́ртва чи́ста и прія́тна Бо́гу произволе́ніемъ.

Въ чистотѣ́ соблю́дше житіе́ и вѣ́рою украси́вше дѣла́, небе́сныя сла́вы сподо́бистеся, честнíи отцы́, тѣ́мже воспѣва́ете Христа́ во вѣ́ки.

Богоро́диченъ: Ра́дуйся, две́ре и одушевле́нный о́блаче; ра́дуйся, горо́, и купино́, и свѣ́щниче; ра́дуйся, хра́ме, и престо́ле, и раю́; ра́дуйся, ро́ждшая Содѣ́теля всѣ́хъ, Благослове́нная.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческого чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Да Твое́ пока́жеши я́вѣ неизрече́нное второ́е сни́тіе, я́ко да вы́шній Бо́гъ яви́шися, стоя́ посредѣ́ бого́въ, апо́столъ на Ѳаво́рѣ, Моисе́я же и Илію́, неизрече́нно осія́лъ еси́. Тѣ́мже вси́ Тя́, Христе́, велича́емъ.

Пріиди́те, Мнѣ́ покори́теся, лю́діе, возше́дше на го́ру святу́ю пренебе́сную, невеще́ственно ста́немъ во гра́дѣ Жива́го Бо́га и у́зримъ мы́сленно Божество́ невеще́ственное, Отца́ и Ду́ха, въ Сы́нѣ Единоро́днѣмъ облиста́ющее.

Привле́клъ еси́ любо́вію мя́, Спа́се, и премѣни́лъ еси́ Боже́ственнымъ Твои́мъ жела́ніемъ, но попали́ огне́мъ невеще́ственнымъ грѣхи́ моя́ и насы́титися Твоея́ пи́щи сподо́би, да, обое́ игра́я, велича́ю, Бла́же, вели́чія Твоя́.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Се́ свѣ́тлый, и свѣтоно́сный, и испо́лненъ благода́ти де́нь возсія́ Фо́тія боже́ственнаго и Аники́ты, вся́ просвѣща́я въ не́мъ пра́зднующія свѣтоза́рная си́хъ страда́нія.

Яви́стеся, я́ко у́гліе, всю́ ве́щь зло́бы попаля́юще, яви́стеся, я́ко честнíи а́гнцы, во́льнѣ закала́еми и Агнцу, взе́млющему грѣхи́, приводи́ми.

Ра́ны ва́ша, страстоно́сцы, страда́нія и болѣ́зни, и па́че ума́ терпѣ́ніе, и по́двиги, и кончи́ну пресла́вно сла́вяще, дне́сь вси́ возра́дуемся.

Процвѣто́ша во удо́ліяхъ преподо́бно му́ченическихъ, я́коже ши́покъ, преудо́бренніи страда́льцы, и сердца́ благоуха́ютъ благочести́выхъ ду́хомъ, смра́дъ пре́лести отгоня́юще.

Богоро́диченъ: Просвѣти́ на́съ, ро́ждшая Свѣ́тъ непристу́пный, Дѣ́во, испо́лни на́съ весе́лія, и ра́дости, и боже́ственнаго ра́зума, чи́стымъ се́рдцемъ Тя́ богому́дренно велича́ющія.

Инъ.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше, вѣ́рныхъ, спасе́ніе, пѣ́сньми немо́лчными велича́емъ.

Ты́ безстра́стіемъ и видѣ́ніемъ, треблаже́нне, научи́лъ еси́ словесы́ на́съ жи́зни вѣ́чныя, сто́лпъ одушевле́нъ Правосла́вія мíрови, исповѣ́даніе твое́ оста́вилъ еси́.

Ты́, Финее́су подо́бяся, богоно́се, я́ко инѣ́мъ копіе́мъ, мече́мъ сло́ва новонасажде́нную посѣка́еши вѣ́ру, отрѣва́я ху́лящія Христа́.

Вои́стинну просла́вистеся, богоно́сніи отцы́, ра́нами и біе́ніи, гоне́ніи и бѣда́ми, во у́захъ же, и темни́цахъ, и желѣ́захъ, и въ заточе́ніихъ пострада́вше.

Богоро́диченъ: Купину́, горя́щу огне́мъ и неопаля́ему, предзря́ше дре́вле Моисе́й, Богома́ти Дѣ́во, богопрія́тну прообразу́я Твою́ утро́бу, пріе́мшую нетлѣ́нный Огнь.

Свѣти́ленъ свята́го. Подо́бенъ: Свѣ́те неизмѣ́нный.

Труба́ яви́лся еси́ прему́дрости, благогла́снымъ язы́комъ твои́мъ сопроти́вныхъ ужаса́я полки́, Макси́ме, свѣ́тъ мона́шествующихъ, тѣ́мже, твои́ми пита́ющеся словесы́, ра́зумъ познава́емъ су́щихъ.

Сла́ва, и ны́нѣ, пра́здника:

Свѣ́те неизмѣ́нный Сло́ве, Свѣ́та Отца́ нерожде́нна, въ явле́ннѣмъ свѣ́тѣ Твое́мъ, дне́сь на Ѳаво́рѣ свѣ́тъ ви́дѣхомъ Отца́, свѣ́тъ и Ду́ха, свѣ́томъ наставля́ющаго всю́ тва́рь.

На стихо́внѣ стихи́ры пра́здника, гла́съ 2. Подо́бенъ: До́ме Евфра́ѳовъ.

Просія́лъ еси́, о Христе́!* бѣло́ па́че снѣ́га,* Твое́ обнажа́я ученико́мъ существо́,* непристу́пныя сла́вы Твоея́.

Стихъ: Твоя́ су́ть небеса́,* и Твоя́ е́сть земля́.

Показа́ти ученико́мъ* сла́ву Твою́ восхотѣ́въ,* съ Моисе́емъ и Иліе́ю* на горѣ́ Ѳаво́рстѣй,* я́ко ви́дѣша Тя́, Спа́се, ужасо́шася.

Сти́хъ: Ѳаво́ръ и Ермо́нъ* о и́мени Твое́мъ возра́дуетася.

Дне́сь Христо́съ на горѣ́ Ѳаво́рстѣй,* Ада́мово обно́вль омрачи́вшееся естество́,* просвѣти́въ, богосодѣ́ла.

Сла́ва, и ны́нѣ, гла́съ и подо́бенъ то́йже:

Гора́ Бо́жія Ѳаво́ръ* о и́мени Твое́мъ,* Спа́се, ра́дуется,* Отцу́ возлю́бленна Тя́ Сы́на проповѣ́дая.


НА ЛИТУРГІИ,

Блаже́нна пра́здника, пѣ́снь 7-я и 8-я отъ обои́хъ кано́новъ, со ирмосо́мъ на 6.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 120 – 128 об.

/ Къ оглавленію раздѣла /


Наверхъ / Къ титульной страницѣ

0