Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 11-й де́нь.
Преподо́бнаго Ѳео́дора, кня́зя Остро́жскаго, во и́ноцѣхъ Ѳеодо́сія, Кíево-Пече́рскаго чудотво́рца.

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: поста́вимъ стихо́въ 8 и пое́мъ стихи́ры пра́здника Преображе́нія 3, [гласъ 1. Подо́бенъ: Небе́сныхъ чино́въ.

Иже съ Моисе́омъ глаго́лавый дре́вле* на горѣ́ Сина́йстѣй о́бразы, глаго́ля:* Азъ есмь Бо́гъ Сы́й;* дне́сь же на горѣ́ Ѳаво́рстѣй преобра́жся,* началообра́зное показу́я, луча́ми облиста́яся.* Тѣ́мже, Христе́, велича́ю Твою́ си́лу.

Пои́мь осо́бь Твоя́, Христе́, ученики́,* Петра́, Іа́кова и Іоа́нна,* во́лею на го́ру си́хъ возве́лъ еси́,* чу́до стра́шное показа́въ* и нестерпи́мое Боже́ственнаго прише́ствія Твоего́ издале́ча* присносу́щное благолѣ́піе.

Твоего́, Христе́, прише́ствія непостижи́маго* тре́петни бы́вше апо́столи дре́вле,* ни́цъ на зе́млю па́дше,* Боже́ственнѣй Твое́й дивля́хуся си́лѣ:* со́лнца просія́въ свѣ́тлѣе, Бла́же,* неизрече́нною си́лою Твое́ю.

Ины стихи́ры] преподо́бнаго 5, гла́съ 1:

Красу́йся, чудотво́рная Ла́вро Кíевская,* и о пра́здницѣ преподо́бнаго те́плѣ возвесели́ся,* отве́рзитеся, пеще́рніи вхо́ди,* дне́сь бо духо́вную трапе́зу* христіа́номъ предлага́етъ Ѳео́доръ сла́вный,* пріе́мля тѣ́хъ усе́рдныя моли́твы* и о спасе́ніи свое́мъ ревнова́ти всѣ́хъ науча́я,* Бо́гу вѣнча́вшу того́ по́двиги* и нетлѣ́ніемъ моще́й его́* вѣ́ру на́шу утвержда́ющу. [Два́жды.]

Темна́ пеще́ра и те́сенъ вхо́дъ,* но Боже́ственною любо́вію святы́хъ освѣти́ся темнота́* и умно́жися вхожде́ніе люде́й безчи́сленныхъ,* жела́ніемъ бо влеку́тся,* е́же гро́бы чудотво́рцевъ цѣлова́ти,* въ ни́хже и преподо́бный Ѳео́доръ,* я́ко еди́на отъ звѣ́здъ, сія́етъ* и моли́тву возно́ситъ Христу́ Бо́гу* о спасе́ніи ду́шъ на́шихъ.

Отъ бра́нныхъ по́двигъ* къ подвиго́мъ духо́внымъ* премѣни́ся блаже́нный Ѳео́доръ,* навы́кнувъ бо со веще́ственнымъ мече́мъ* проти́ву враго́въ церко́вныхъ исходи́ти,* ме́чь духо́вный подъе́мъ на враги́ неви́димыя,* си́лою Бо́жіею крѣ́пко сія́ побѣжда́ше,* но и до дне́сь вои́нствующимъ* проти́ву тѣ́хъ по́мощь съ небе́съ посыла́етъ* и мо́лится Христу́ Бо́гу* о спасе́ніи ду́шъ на́шихъ.

Вся́ объе́мь любо́вію, Ѳео́доръ сла́вный* не терпя́ше ви́дѣти му́чимыя отъ иновѣ́рныхъ Россíйскія лю́ди* и, ору́жіе пріе́мь,* я́ко побѣди́тель стра́шенъ, враго́мъ противостоя́ше,* но, дѣ́ло свое́ соверши́въ,* дво́ръ кня́жій оставля́етъ а́біе* и пеще́рное затворе́ніе* въ лу́чшій черто́гъ себѣ́ вмѣня́етъ;* потщи́мся у́бо, о бра́тіе,* того́ подража́ти исправле́нія* и въ моли́тву преподо́бнаго приводи́ти* о спасе́ніи ду́шъ на́шихъ.

Сла́ва, гла́съ 4:

Гора́ Пече́рская, мо́щи святы́хъ покрыва́ющи, вои́стинну честна́ и свята́ е́сть, зане́, тѣлеса́ преподо́бныхъ содержа́щи, а́ки ра́й Бо́жій вѣ́рнымъ явля́ется; сія́ у́бо помышля́яй Ѳео́доръ сла́вный, и земно́е бога́тство, и че́сть княже́нія въ уме́ты вмѣни́въ, посредѣ́ святы́хъ вселя́ется, и ча́сти и́хъ отъ Христа́ сподобля́ется, и мо́лится при́сно о спасе́ніи ду́шъ на́шихъ.

И ны́нѣ, пра́здника, гла́съ то́йже:

Гора́, я́же, иногда́ [мра́чна и ды́мна, ны́нѣ же честна́ и свята́ е́сть, на не́йже но́зѣ Твои́ стоя́стѣ, Го́споди, превѣ́чное бо сокрове́нное та́инство напослѣ́докъ явле́но сотвори́, стра́шное Твое́ преображе́ніе, Петру́, и Іоа́нну, и Іа́кову. Иже, такова́ сія́нія лица́ Твоего́ не терпя́ще и свѣ́тлости ри́зъ Твои́хъ, ни́цъ на лицѣ́ земли́ покрыва́хуся, и́же и у́жасомъ одержи́ми, дивля́хуся, ви́дяще Моисе́я и Илію́, глаго́люща съ Тобо́ю, хотя́щая приключи́тися Тебѣ́; и гла́съ отъ Отца́ свидѣ́тельствоваше, глаго́ля: Се́й е́сть Сы́нъ Мо́й возлю́бленный, о Не́мже благоизво́лихъ, Того́ послу́шайте, Иже и да́руетъ мíрови ве́лію ми́лость].

Вхо́дъ. Проки́менъ дне́. И чте́нія три́ преподо́бническая.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры пра́здника, гла́съ 2. [Самогла́сны:

Иже свѣ́томъ Твои́мъ всю́ вселе́нную освяти́въ, на горѣ́ высо́цѣ преобрази́лся еси́, Бла́же, показа́въ ученико́мъ Твои́мъ си́лу Твою́, я́ко мíръ избавля́еши отъ преступле́нія. Тѣ́мже вопіе́мъ Ти́: Милосе́рде Го́споди, спаси́ ду́ши на́ша.

Иже на горѣ́ Ѳаво́рстѣй преобра́жся во сла́вѣ, Христе́ Бо́же, и показа́въ ученико́мъ Твои́мъ сла́ву Твоего́ Божества́, озари́ и на́съ свѣ́томъ Твоего́ разумѣ́нія, и наста́ви на стезю́ за́повѣдей Твои́хъ, я́ко еди́нъ Бла́гъ и Человѣколю́бецъ.

Иже пре́жде со́лнца Свѣ́тъ Христо́съ тѣле́снѣ на земли́ жи́тельствуя, и пре́жде Креста́ вся́, я́же стра́шнаго смотре́нія, соверши́въ боголѣ́пно, дне́сь на Ѳаво́рстѣй горѣ́, та́йно Тро́ицы о́бразъ показу́я, изя́щныя три́ ученики́, Петра́, и Іа́кова, и Іоа́нна, на ню́ возве́лъ еси́ наединѣ́, и ма́ло скры́въ пло́ти воспрія́тіе, преобрази́лся еси́ предъ ни́ми, явля́я началообра́зныя добро́ты благолѣ́піе и то́ не всесоверше́нно: о́во извѣству́я ты́я, вку́пѣ и щадя́, да не ка́ко со зра́комъ и е́же жи́ти погубя́тъ, но я́ко можа́ху вмѣща́ти, тѣле́сныма очи́ма стерпя́ще. И проро́ковъ верхо́вныя, Моисе́я и Илію́, приве́лъ еси́, непрекосло́внѣ свидѣ́тельствующія Его́ Божество́, и я́ко То́й е́сть и́стинное Оте́ческаго существа́ Сія́ніе, госпо́дствуяй живы́ми и ме́ртвыми. Тѣ́мъ и о́блакъ, я́коже сѣ́нь, объя́тъ и́хъ, и гла́съ свы́ше Оте́чь изъ о́блака шу́мно предсвидѣ́тельствующъ и глаго́лющъ: Се́й е́сть, Его́же нетлѣ́нно изъ чре́ва пре́жде денни́цы роди́хъ, Сы́нъ возлю́бленный Мо́й, Его́же посла́хъ спасти́, во Отца́ и Сы́на и Ду́ха Свята́го креща́емыя, и исповѣ́дающія вѣ́рно, я́ко нераздѣ́льна е́сть еди́на держа́ва Божества́, Того́ послу́шайте. Са́мъ у́бо, Человѣколю́бче Христе́ Бо́же, и на́съ озари́ свѣ́томъ непристу́пныя Твоея́ сла́вы, и досто́йны покажи́ наслѣ́дники безконе́чнаго Ца́рствія Твоего́, я́ко Пребла́гъ.]

Сла́ва, гла́съ то́йже:

Кíими похва́льными вѣнцы́ увязе́мъ блаже́ннаго Ѳео́дора? То́й бо вѣне́цъ княже́нія во́лею отлага́етъ, то́й бо имѣ́нію неприча́стенъ явля́ется, зане́, враги́ Це́ркве отмща́я, свои́мъ враго́мъ проще́ніе дарова́ти навы́че и пре́жде власо́въ постриже́нія смиренному́дріемъ удивля́ше лю́ди, пото́мъ же во и́ночестѣмъ о́бразѣ ра́доваше а́нгелы и просла́ви Христа́, того́ моли́твами да́рующаго на́мъ ве́лію ми́лость.

И ны́нѣ, пра́здника, гла́съ 5:

Пріиди́те, взы́демъ на го́ру Госпо́дню [и въ до́мъ Бо́га на́шего и у́зримъ сла́ву преображе́нія Его́, сла́ву я́ко Единоро́днаго отъ Отца́, свѣ́томъ пріи́мемъ Свѣ́тъ и, возвы́шени бы́вше ду́хомъ, Тро́ицу Единосу́щную воспои́мъ во вѣ́ки].

Стихи́ры на стихо́внѣ, гла́съ 5:

Ра́дуйся, благоче́стія пра́вило,* Ѳео́доре, Волы́нская похвало́,* Правосла́вныя вѣ́ры защи́тителю* и злодѣ́емъ побѣдоно́сный отмсти́телю;* ра́дуйся, наро́да че́шскаго засту́пниче* и лати́нскихъ ухищре́ній обличи́телю,* о на́съ моли́ся непреста́нно Христу́ Бо́гу,* дарова́ти земли́ Россíйстѣй ми́ръ* и спасе́ніе душа́мъ на́шимъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ра́дуйся, ева́нгельскаго глаго́ла исполни́телю,* Ѳео́доре, земли́ на́шея предъ Го́сподемъ засту́пниче;* ра́дуйся, пеще́рнаго затворе́нія не убоя́выйся,* но ли́къ святы́хъ Пече́рскихъ собо́ю умно́живый,* отъ дѣя́нія восше́дый къ видѣ́нію* и на небеса́ ду́хомъ пресели́выйся.* Тоя́ ча́сти и на́съ сподо́би, Ѳео́доре,* предъ твои́ми моща́ми моля́щихся* вѣ́рою и любо́вію.

Сти́хъ: Си́льно на земли́ бу́детъ сѣ́мя его́,* ро́дъ пра́выхъ благослови́тся.

Ра́дуйся, преподо́бне Ѳео́доре,* вся́ земна́я Христа́ ра́ди презрѣ́вый,* за озло́бленныя же лю́ди возноси́вый моли́твы,* и на́съ твои́мъ мо́щнымъ предста́тельствомъ просвѣти́,* во е́же за вѣ́ру безстра́шно стоя́ти* и о душа́хъ свои́хъ попече́ніе прилага́ти,* воспѣва́ющимъ твоя́ ди́вныя по́двиги* и вѣнча́вшаго тя́ Христа́ прославля́ющимъ.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Ѳео́доре, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́ми же моли́ся Го́сподеви, поми́ловатися душа́мъ на́шимъ.

И ны́нѣ, пра́здника, гла́съ 4:

На горѣ́ высо́цѣ [преобра́жся, Спа́съ, верхо́вныя имѣ́я ученики́, пресла́вно облиста́лъ е́сть, показу́я, я́ко высото́ю добродѣ́телей облиста́вше и Боже́ственнѣй сла́вѣ сподо́бятся. Глаго́лющіи со Христо́мъ Моисе́й и Илія́ пока́зоваху, я́ко живы́ми и ме́ртвыми облада́етъ и и́же дре́вле зако́номъ и проро́ки глаго́лавый е́сть Бо́гъ, Ему́же и гла́съ Оте́чь изъ о́блака свѣ́тла послу́шествоваше, глаго́лющій: Того́ послу́шайте, Иже Кресто́мъ а́да плѣни́вша и ме́ртвымъ да́рующа живо́тъ вѣ́чный].

На благослове́ніи хлѣ́бовъ: тропа́рь свята́го два́жды и пра́здника еди́ножды.

Тропа́рь свята́го, гла́съ 7. Подо́бенъ: Преобрази́лся еси́.

Преобрази́лъ еси́ земна́го княже́нія сла́ву во и́ночества о́бразъ смире́нный, и вмѣ́сто враго́въ ви́димыхъ на неви́димыя ополчи́лся еси́, и, обою́ побѣди́тель красе́нъ явля́яся, еди́нъ отъ чудотво́рецъ Пече́рскихъ показа́лся еси́; тѣ́мже и на́мъ ре́вности Бо́жія да́ръ испроси́, братолю́біемъ сердца́ на́ша просвѣти́ и ко спасе́нію вѣ́чному стези́ на́ша, Ѳео́доре блаже́нне, напра́ви.

Инъ тропа́рь, гла́съ 4:

Кня́жескихъ дароноше́ній и всего́ су́етствія мірска́го спѣ́шнѣ отве́ргся, Бо́жіихъ же дарова́ній, прему́дре Ѳео́доре, пріи́скреннѣ сподо́битися жела́я, прія́лъ еси́ и́ноческій о́бразъ и, въ не́мъ смире́ннымъ послуша́ніемъ и безмо́лвнымъ житіе́мъ Царю́ Небе́сному благоугожда́я, получи́лъ еси́ отъ Него́ безсме́ртныя да́ры, и́хже и на́мъ, чту́щимъ тя́, получи́ти моли́ся.

Инъ тропа́рь, гла́съ то́йже:

Яко благочести́ваго ко́рене пречестна́я о́трасль бы́лъ еси́, блаже́нне Ѳео́доре, яви́ бо тя́ Христо́съ, я́ко вои́стинну богодарова́нное сокро́вище Волы́нстѣй земли́, но́ваго побо́рника вѣ́ры Правосла́вныя, и наро́ду россíйскому пресла́вна и благопрія́тна. Тѣ́мже ны́нѣ, плоды́ свѣтоно́сныхъ трудо́въ твои́хъ въ странѣ́ на́шей подъ сѣ́нію Святы́я Це́ркве Правосла́вныя наслажда́ющеся, хва́лимъ Го́спода, дарова́вшаго тебѣ́ си́лу и крѣ́пость на сопроти́вныя. Его́же моли́ спасти́ оте́чество твое́, и держа́вѣ сро́дникъ твои́хъ богоуго́днѣй бы́ти, и сыново́мъ россíйскимъ спасти́ся.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, преподо́бному. И ны́нѣ, пра́здника.

По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Пеще́рное затворе́ніе возлюби́лъ еси́ въ житіи́ твое́мъ, преподо́бне, и во гро́бѣ ма́лѣмъ всели́лся еси́ дне́сь, о́тче Ѳео́доре, но се́рдце твое́ всю́ Россíйскую зе́млю вмѣща́етъ нетѣ́сно и уже́ не земны́мъ ору́жіемъ, но моли́твою вѣ́рныя лю́ди огражда́етъ, честны́я по́двиги твоя́ воспѣва́ющія. [Два́жды.]

Сла́ва, и ны́нѣ, пра́здника:

Человѣ́ческое измѣне́ніе, [е́же со сла́вою Твое́ю, Спа́се, второ́е и стра́шное Твоего́ прише́ствія показу́яй, на горѣ́ Ѳаво́рстѣй преобрази́лся еси́. Илія́ и Моисе́й глаго́лаху съ Тобо́ю, и тріе́хъ отъ учени́къ спризва́въ, и́же, ви́дѣвше, Влады́ко, сла́ву Твою́, блиста́нію Твоему́ удиви́шася. Иже тогда́ си́мъ свѣ́тъ Тво́й возсія́вый, просвѣти́ ду́ши на́ша].

По 2-й стихоло́гіи сѣда́ленъ, гла́съ то́йже. Подо́бенъ: Яви́лся еси́ дне́сь.

Пра́здникъ наста́ преподо́бнаго Ѳео́дора, притецы́те у́бо, лю́діе, къ того́ заступле́нію, ему́же отцы́ на́ша навыко́ша дре́вле, поне́же непрестаю́щая Христо́ва любо́вь и ны́нѣ блаже́ннаго на предста́тельство о на́съ воздвиза́етъ. [Два́жды.]

Сла́ва, и ны́нѣ, пра́здника:

На горѣ́ Ѳаво́рстѣй [преобрази́лся еси́, Іису́се, и о́блакъ свѣ́телъ, протяза́ющся, я́ко сѣ́нь, апо́столы сла́вою покры́, тѣ́мже и на зе́млю ни́цъ па́даху, не терпя́ще зрѣ́ти свѣ́тлости непристу́пныя сла́вы лица́ Твоего́, безнача́льне Спа́се, Христе́ Бо́же. Иже тогда́ си́мъ свѣ́тъ Тво́й возсія́вый, просвѣти́ ду́ши на́ша].

По поліеле́и сѣда́ленъ, гла́съ 8. Подо́бенъ: Повелѣ́нное та́йно.

Полки́ чужди́хъ побѣжда́ше Ѳео́доръ сла́вный, я́ко Россíйскаго во́инства непобѣди́мый во́ждь, но своему́ супоста́ту а́біе проще́ніе дарова́; научи́мся у́бо, о бра́тіе, таково́му о́бразу ева́нгельскаго житія́ послѣ́довати нело́жно и къ тому́ блаже́ннаго въ по́мощь на́мъ призыва́ти усе́рдно. [Два́жды.]

Сла́ва, и ны́нѣ, пра́здника:

Сокрове́нную мо́лнію [подъ пло́тію существа́ Твоего́, Христе́, и Боже́ственнаго благолѣ́пія на святѣ́й показа́лъ еси́ горѣ́, Благодѣ́телю, просія́въ су́щимъ съ Тобо́ю ученико́мъ, и, разумѣ́вше нестерпи́му су́щу сла́ву Твою́, — Свя́тъ еси́, — возопи́ша, я́ко непристу́пенъ сы́й, ви́дѣнъ бы́лъ еси́ пло́тію мíрови, Еди́не Человѣколю́бче].

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́іе исправле́ній твои́хъ, тѣ́мже на небесѣ́хъ обрѣ́лъ еси́ мзду́ трудо́въ твои́хъ. Де́монская разори́лъ еси́ по́лчища и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ пра́здника пе́рвый, гла́съ 4, на 6.
[Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Глаго́лы живо́тныя друго́мъ Христо́съ и о Боже́ственнѣмъ наказу́я Ца́рствіи, рече́: во Мнѣ́ Отца́ позна́йте; свѣ́томъ я́ко облиста́я непристу́пнымъ, въ ра́дости пою́ще: пои́мъ Бо́гу на́шему, я́ко просла́вися.

Си́лою язы́къ облече́теся, дру́зи ученицы́, чу́дни же бу́дете въ бога́тствѣ и́хъ, я́ко сла́вы напо́лнитеся, я́ко явлю́ся свѣтлѣ́е со́лнца, облиста́я въ ра́дости пою́щихъ: пои́мъ Бо́гу на́шему, я́ко просла́вися.

Дне́сь Христо́съ, на горѣ́ Ѳаво́рстѣй просія́въ я́сно Боже́ственною заре́ю, я́коже обѣща́ся, ученико́мъ обнажи́ зра́къ, свѣтоно́сныя же напо́лнишеся Боже́ственныя зари́, въ ра́дости поя́ху: пои́мъ Бо́гу на́шему, я́ко просла́вися.]

Та́же преподо́бнаго на 8, гла́съ 8, его́же краегране́сіе безъ богоро́дичновъ: Ѳео́дору Остро́жскому молю́ся.
Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ; лю́таго врага́ вода́ потопи́, и непроходи́мое про́йде Изра́иль; пѣ́снь же воспѣва́шеся: Го́сподеви пои́мъ, сла́вно бо просла́вися.

Ѳео́дора блаже́ннаго просла́вимъ, бра́тіе, кня́зя же и во́ина, не своея́ сла́вы иска́вшаго, но съ еретики́ за Ру́сскую зе́млю пра́вшагося, послѣди́ же во а́нгельстѣмъ о́бразѣ земна́я вся́ оста́вившаго и де́моны попра́вшаго крѣ́пко.

Еди́нъ отъ чудотво́рецъ Пече́рскихъ яви́лся еси́, Ѳео́доре блаже́нне, но и Волы́нская земля́ о па́мяти твое́й весели́тся, отъ всѣ́хъ же конце́въ земли́ вѣ́рніи ко предста́тельству твоему́ притека́ютъ, всѣ́мъ у́бо бу́ди слы́шатель благíй и покая́нію учи́тель.

Онаго блаже́ннаго живота́, его́же сподо́бился еси́, Ѳео́доре преподо́бне, и на́съ наслѣ́дники сотвори́ твои́ми моли́твами, а́ще и погрѣша́ющихъ мно́го, но многостра́стное житіе́ свое́ осужда́ющихъ и твои́мъ моще́мъ вѣ́рою покланя́ющихся.

Богоро́диченъ: На Тя́, Дѣ́во, наде́жду положи́хъ спасе́нія моего́, грѣхо́вныя скве́рны всего́ мя омы́й и чи́ста содѣ́лай Сы́ну Твоему́, изря́дно благоугожда́юща и творя́ща Сего́ всесвяту́ю во́лю.

Катава́сія: Ли́цы изра́ильтестіи...

Пѣ́снь 3.

[Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Во всего́ Ада́ма обле́кся, Христе́, очернѣ́вшее, измѣни́въ, просвѣти́лъ еси́ дре́вле естество́ и измѣне́ніемъ зра́ка Твоего́ богосодѣ́лалъ еси́.

Столпо́мъ огнезра́чнымъ и о́блакомъ дре́вле, Иже въ пусты́ни Изра́иля веды́й, дне́сь на горѣ́ Ѳаво́рстѣй, неизрече́нно во свѣ́тѣ Христо́съ просія́.

Инъ.]

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Да́ждь ми́, преподо́бне о́тче, отъ даро́въ Боже́ственныя благода́ти, и́хже оби́льно причасти́лся еси́, неуста́нную о спасе́ніи ре́вность, отъ Го́спода мнѣ́ сію́ испроси́въ и твои́мъ благослове́ніемъ запечатлѣ́въ неви́димо.

О, ка́ко восхотѣ́лъ бы́хъ а́зъ не то́чію усты́ твое́ житіе́ прославля́ти, блаже́нне, но и подража́тель того́ яви́тися, о се́мъ у́бо сотвори́ моли́тву Христу́ Бо́гу, презира́я моя́ лю́тая прегрѣше́нія и покая́нію моему́ внима́я.

Ра́зумъ всесоверше́нъ показа́лъ еси́, о́тче преподо́бне, егда́ за зло́ добро́мъ супоста́ту твоему́ возда́лъ еси́ и я́ко дру́гъ благíй врагу́ твоему́ яви́лся еси́. Азъ же бѣсо́мъ дру́гъ страстьми́ свои́ми бы́хъ, увы́ мнѣ́; но твои́ми моли́твами па́ки побѣди́теля тѣ́хъ яви́ мене́, блаже́нне Ѳео́доре.

Богоро́диченъ: Ра́дуйся, Яже еди́на ра́дость несказа́нно ро́ждши; ра́дуйся, колесни́це и о́блаче Сло́ва; ра́дуйся, Ма́ти Бо́жія, Дѣ́во Неискусобра́чная; ра́дуйся, преподо́бныхъ сла́во; ра́дуйся, му́чениковъ вѣнча́ніе.

Конда́къ пра́здника, [гла́съ 7. Самогла́сенъ:

На горѣ́ преобрази́лся еси́, и я́коже вмѣща́ху ученицы́ Твои́, сла́ву Твою́, Христе́ Бо́же, ви́дѣша, да егда́ Тя́ у́зрятъ распина́ема, страда́ніе у́бо уразумѣ́ютъ во́льное, мíрови же проповѣ́дятъ, я́ко Ты́ еси́ вои́стинну Отчее сія́ніе.

Икосъ:

Воста́ните, лѣни́віи, и́же всегда́ ни́зу пони́кшіи въ зе́млю, души́ моея́ по́мыслы, возми́теся и возвы́ситеся на высоту́ Боже́ственнаго восхожде́нія. Притеце́мъ къ Петру́ и къ Зеведе́евымъ и вку́пѣ со о́нѣми Ѳаво́рскую го́ру дости́гнемъ, да ви́димъ съ ни́ми сла́ву Бо́га на́шего, гла́съ же услы́шимъ, его́же свы́ше слы́шаша и проповѣ́даша Отчее сія́ніе].

Сѣда́ленъ преподо́бнаго, гла́съ 4. Подо́бенъ: Уди́вися Іо́сифъ.

Непристу́пную сла́ву Пресвяты́я Тро́ицы созерца́етъ дне́сь преподо́бный Ѳео́доръ, мы́ же земны́хъ помышле́ній не оставля́емъ, увы́ на́мъ, но, того́ исправле́нія воспомина́юще, па́ки къ небе́снымъ душе́ю восхища́еми, глаго́лемъ: о́тче преподо́бне, моли́тву сотвори́ Христу́ Бо́гу, е́же спасти́ и просвѣти́ти ду́ши на́ша. [Два́жды.]

[Сла́ва, и ны́нѣ, пра́здника:

На горѣ́ Ѳаво́рстѣй преобрази́лся еси́, Іису́се, посредѣ́ Иліи́ и Моисе́я прему́дрыхъ, со Іа́ковомъ, и Петро́мъ и Іоа́нномъ. Пе́тръ же, сопребыва́я, сія́ Тебѣ́ глаго́лаше: добро́ здѣ́ е́сть сотвори́ти три́ сѣ́ни: еди́ну Моисе́ю, и еди́ну Иліи́, и еди́ну Тебѣ́, Влады́цѣ Христу́. Иже тогда́ свѣ́тъ Тво́й си́мъ возсія́вый, просвѣти́ ду́ши на́ша.]

Пѣ́снь 4.

[Ирмо́съ: Услы́шахъ сла́вное смотре́ніе Твое́, Христе́ Бо́же, я́ко роди́лся еси́ отъ Дѣ́вы, да отъ ле́сти изба́виши зову́щія: сла́ва си́лѣ Твое́й, Го́споди.

Зако́нъ въ Сина́и писа́ніемъ вообража́я, Христе́ Бо́же, во о́блацѣ, и огни́, и мра́цѣ, и въ ви́хрѣ яви́лся еси́ носи́мь: сла́ва си́лѣ Твое́й, Го́споди.

Да увѣ́риши сла́вное строе́ніе Твое́, Христе́ Бо́же, я́ко Сы́й пре́жде вѣ́къ и То́йже на о́блацѣ восхожде́ніе положи́вый, на Ѳаво́рѣ неизрече́нно просія́лъ еси́.

Соглаго́люще, предстоя́ху раболѣ́пно Тебѣ́, Влады́цѣ Христу́, къ ни́мже па́рою огня́ и мра́ка, и то́нкимъ хла́домъ бесѣ́довалъ еси́: сла́ва си́лѣ Твое́й, Го́споди.

Возвѣща́ху сла́вное Креста́ ра́ди Твоего́, на Ѳаво́ръ прише́дше, и́же во огни́ Тя́ и купинѣ́ дре́вле предви́дѣвый Моисе́й, и взя́тый на колесни́цѣ о́гненней Илія́, Христе́.

Инъ.]

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

Украси́ся княже́ніе твое́, о́тче преподо́бне, не то́чію свои́хъ ти́ по вѣ́рѣ отъ враго́въ защище́ніемъ, но и че́шскаго наро́да проти́ву лати́нъ заступле́ніемъ, вся́ бо въ любо́вь Христо́ву, я́ко Па́велъ о́ный, призва́ти вожделѣ́лъ еси́.

Остро́гъ гра́дъ, ма́лую ча́сть твои́хъ нетлѣ́нныхъ моще́й прія́ти сподо́бивыйся, а́ки наслѣ́діе княже́нія твоего́, о се́мъ свѣ́тло возра́довася и твои́ми добродѣ́тельми хва́лится, та́кожде свята́я Ла́вра Кíевская, твое́ нетлѣ́нное тѣ́ло показу́ющи вѣ́рнымъ, засту́пника тя́ своего́ имену́етъ и на моли́твы твоя́ упова́етъ те́плѣ.

Святы́й Ѳео́доръ ны́нѣ отъ небе́съ на зе́млю Россíйскую призира́етъ и на бра́нь духо́вную на́съ, бра́тіе, воздвиза́етъ: потщи́мся у́бо грѣхо́вную оттрясти́ лѣ́ность, и сердца́ на́ша горѣ́ воздви́гнути, и жела́ніемъ вѣ́чныя жи́зни испо́лнити.

Богоро́диченъ: Въ жена́хъ еди́на Дѣ́ва пребыла́ еси́ и пре́жде рождества́, и по рождествѣ́: Бо́гъ бо бѣ́, обновля́я естества́ па́че сло́ва, изъ Тебе́ неизрече́нно воплоща́емь, И́же горѣ́ пре́жде вѣ́къ и на земли́ въ послѣ́дняя лѣ́та ро́ждься, Пренепоро́чная.

Пѣ́снь 5.

[Ирмо́съ: Отъ свѣ́та пресѣкíй перворо́дный свѣ́тъ, я́ко во свѣ́тѣ дѣла́ пою́тъ Тя́, Христе́, Содѣ́теля, во свѣ́тѣ Твое́мъ пути́ на́ша напра́ви.

Предъ лице́мъ Твои́мъ го́ры уклони́шася, свѣ́тъ бо и предъ нога́ми, неботе́чныя лучи, Христе́, со́лнца пріи́де, зра́къ зе́мленъ я́ко прія́ти благоволи́лъ еси́.

Се́ Спа́съ, — вопія́ху Моисе́й и Илія́, ученико́мъ на горѣ́ святѣ́й Ѳаво́рстѣй оглаша́емымъ, — Христо́съ, Его́же дре́вле провозвѣсти́хомъ Су́щаго Бо́га.

Неизмѣ́нное естество́, человѣ́ческому примѣ́шся, оби́льно невеще́ственнаго Божества́ свѣ́тъ изобнажи́въ апо́столомъ, неизрече́нно возсія́.

Тя́, присносу́щное сія́ніе, во Оте́честѣй сла́вѣ ученицы́ я́ко ви́дѣвше возсія́вша, Христе́, Тебѣ́ вопія́ху: во свѣ́тѣ Твое́мъ пути́ на́ша напра́ви.

Инъ.]

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Тре́бующимъ твоего́ на враги́ заступле́нія, царе́мъ же и лю́демъ, бы́лъ еси́, Ѳео́доре, неуста́нный помо́щникъ, зане́ по глаго́лу Госпо́дню за дру́ги ду́шу свою́ положи́ти гото́въ бы́лъ еси́, тѣ́мже и на́съ не отри́ни, блаже́нне, твоего́ заступле́нія на де́моны прося́щихъ.

Ра́дуйся, Влади́міре равноапо́стольне, твоего́ пра́внука зря́, ра́йскою сла́вою укра́шена на небеси́, и на земли́ отъ христіа́нъ ублажа́ема, и на враги́ си́мъ моли́твою свое́ю спобо́рствующа.

Облакъ искуше́ній, на россíйскія лю́ди отъ безбо́жникъ наше́дшій, твои́ми моли́твами разжени́, Ѳео́доре прему́дре, зане́, умно́жившимся собла́зномъ, крѣ́пость на́ша оскудѣ́. Не оста́ви у́бо зе́млю твою́ отъ враго́въ Христо́выхъ противорастлѣ́тися, но вѣ́ру несомнѣ́нную и упова́ніе отъ Бо́га низпосли́ душа́мъ на́шимъ.

Богоро́диченъ: Дѣ́во Ма́ти Отрокови́це, Непостижи́маго пло́тію ро́ждши, а́нгеловъ сла́во и де́моновъ я́зво, Богоневѣ́сто, мое́ се́рдце, уя́звенное грѣхми́, исцѣле́нія Боже́ственнаго сподо́би.

Пѣ́снь 6.

[Ирмо́съ: Внегда́ скорбѣ́ти ми́, возопи́хъ ко Го́споду, и услы́ша мя́ Бо́гъ спасе́нія моего́.

Сія́нія па́че со́лнца Свѣ́тъ яснѣ́йшій, Спа́съ, просія́ на Ѳаво́рѣ, на́съ просвѣти́лъ е́сть.

Возше́дъ на го́ру Ѳаво́рскую, преобрази́лся еси́, Христе́, и ле́сть всю́ омрачи́въ, на́съ просвѣти́лъ еси́.

Тя́ Бо́га позна́вше сла́вніи апо́столи, на Ѳаво́рѣ же, Христе́, уди́вльшеся, колѣ́на преклони́ша.

Инъ.]

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Житіе́ мое́ страстьми́ умертви́ся, моли́тва лѣ́ностію мно́гою оскудѣ́, братолю́біемъ украси́тися не попеко́хся; и́же мíру умертви́выйся и въ моли́твѣ до сме́рти пребы́вый, братолю́бія рачи́телю, о́тче преподо́бне, помози́ ми во грѣсѣ́хъ погиба́ющему.

Сама́го себе́ пла́чу, окая́нный, и земли́ на́шея растлѣ́нія, но, твое́ предста́тельство призыва́я, о́тче преподо́бне, па́ки къ духо́вному дѣ́ланію воздвиза́юся и глаго́лю: заступи́ твою́ зе́млю, уго́дниче Бо́жій, и о спасе́ніи мое́мъ сотвори́ моли́тву.

Кто отъ вѣ́рныхъ не удиви́тся преподо́бнаго Ѳео́дора ре́вности духо́внѣй: то́й бо на княже́ніи вѣ́ры бы́сть подви́жникъ и въ по́двизѣ пеще́рнѣмъ кня́зь надъ страстьми́ вско́рѣ показа́ся, по преставле́ніи же свое́мъ а́нгеловъ купножи́тель.

Богоро́диченъ: Ума́ моего́ извраще́нія и души́ двиза́нія страстна́я и лю́тая, Дѣ́во, испра́ви и цѣ́ла мя́ соблюди́ отъ всегда́ неми́лостивно находя́щихъ ми́.

Конда́къ, гла́съ 4:

Красоты́ ри́зныя возгнуша́вшагося и бога́тства тлѣ́ннаго со благодаре́ніемъ отве́ргшагося, въ ри́зу же безстра́стія обле́кшагося и бога́тому въ щедро́тахъ Христу́ возслѣ́довавшаго, пріиди́те, вѣ́рніи, восхва́лимъ Ѳео́дора достосла́вна, я́ко моля́щася непреста́нно о душа́хъ на́шихъ.

Икосъ:

Восхва́лимъ, бра́тіе, Ѳео́дора блаже́ннаго, то́й бо отъ ю́ности себе́ не пощадѣ́, въ похо́дѣхъ проти́ву враго́въ вѣ́ры на́шея пло́ть изнуря́я и живо́тъ сво́й за дру́ги полага́яй, и, я́ко Дави́дъ Соломо́ну, своему́ сы́нови о построе́ніи хра́мовъ Бо́жіихъ завѣ́тъ преда́въ, мона́шеское житіе́ изво́лилъ е́сть, а́ки ра́бъ бра́тіи угожда́яй и себе́ сама́го смиря́яй, того́ у́бо воспои́мъ, бра́тіе, я́ко Бо́гу и бли́жнимъ порабо́тившагося, враги́ же ви́димыя и неви́димыя смири́вшаго и моля́щагося непреста́нно о душа́хъ на́шихъ.

Пѣ́снь 7.

[Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Облиста́вшеся свѣ́томъ непристу́пныя сла́вы, на Ѳаво́рстѣй горѣ́ апо́столи, Христу́ вопія́ху: оте́цъ на́шихъ Бо́же, благослове́нъ еси́.

Сія́ніемъ Боже́ственнаго шу́ма, и росода́тельнымъ о́блакомъ, Христе́, и заре́ю Твое́ю наслажда́еми, апо́столи поя́ху: оте́цъ на́шихъ Бо́же, благослове́нъ еси́.

Въ непристу́пномъ свѣ́тѣ, я́ко ви́дѣ Тя́ Пе́тръ, на Ѳаво́рстѣй горѣ́ облиста́вша, Христе́, возопи́: оте́цъ на́шихъ Бо́же, благослове́нъ еси́.

Съ нача́льникомъ жи́зни Христо́мъ су́ще, дѣ́ти Зеведе́евы, я́ко испусти́ зра́ка свѣ́тъ, возгремѣ́ша: оте́цъ на́шихъ Бо́же, благослове́нъ еси́.

Инъ.]

Ирмо́съ: На по́лѣ Деи́рѣ иногда́ мучи́тель пе́щь поста́ви на муче́ніе богоно́сныхъ, въ не́йже три́ о́троки пѣсносло́вяху Еди́наго Бо́га, тро́ично воспѣва́ху, глаго́люще: отце́въ Бо́же, благослове́нъ еси́.

Остро́гъ гра́дъ твоя́ по́двиги, о́тче преподо́бне, проповѣ́дуетъ, храни́тъ же оби́тель Дерма́нская тѣ́хъ па́мять, воспѣва́етъ и Пече́рская Ла́вра терпѣ́ніе твое́ и вѣ́ру, лю́діе же россíйстіи и наро́дъ че́шскій въ твое́мъ заступле́ніи обще́ніе любве́ своея́ утвержда́ютъ.

Мо́лимся тебѣ́, Ѳео́доре блаже́нне, да, я́коже крѣ́пость стоя́нія твоего́ ча́домъ твои́мъ по пло́ти да́лъ еси́ и си́хъ до четве́ртаго ро́да адама́нты Правосла́вныя вѣ́ры яви́лъ еси́ и проти́ву враго́въ тоя́ борцы́ неодоли́мы, та́кожде и на́съ, твоя́ же по ду́ху ча́да, подража́тели му́жества твоего́ предста́тельствомъ твои́мъ содѣ́лай.

Умъ мо́й изнемога́етъ, отъ страсте́й противобо́рствуемь, и де́рзость враго́въ Христо́выхъ стра́хомъ коле́блетъ мою́ ду́шу, сію́ у́бо укрѣпи́, о́тче преподо́бне, и боже́ственною просвѣти́ ре́вностію и о вре́менныхъ небреже́ніемъ.

Богоро́диченъ: Разумѣ́вше издале́ча честнíи проро́цы та́инства Твоего́ неизрече́нную глубину́, многообра́зно всѣ́мъ уясни́ша Твое́ рождество́, Дѣ́во, взыва́юще: благослове́нъ еси́, Бо́же оте́цъ на́шихъ.

Пѣ́снь 8.

[Ирмо́съ: Въ Вавило́нѣ о́троцы, боже́ственною распала́еми ре́вностію, мучи́теля и пла́мене преще́ніе му́жески попра́ша, и посредѣ́ огня́ вве́ржени, ороша́еми, поя́ху: благослови́те, вся́ дѣла́ Госпо́дня, Го́спода.

Манове́ніемъ вся́ нося́й, нога́ми пречи́стыми на го́ру взы́де Ѳаво́рскую Христо́съ, на не́йже па́че со́лнечныя лучи́ облиста́ лице́мъ, и́же зако́ну старѣ́йшія и благода́ти, показа́ пою́щія: благослови́те, вся́ дѣла́ Госпо́дня, Го́спода.

Непристу́пною сла́вою на горѣ́ я́влься неизрече́нно Ѳаво́рстѣй, неодержи́мый и незаходи́мый Свѣ́тъ, Отчее сія́ніе, тва́рь уясни́въ, человѣ́ки обожи́, пою́щія: благослови́те, вся́ дѣла́ Госпо́дня, Го́спода.

Священнолѣ́пно стоя́ще Моисе́й же и Илія́ на горѣ́ Ѳаво́рѣ, Боже́ственныя начерта́ніе я́сно ѵпоста́си ви́дѣвше, Христа́ во Оте́честѣй облиста́вша сла́вѣ, воспѣва́ху: благослови́те, вся́ дѣла́ Госпо́дня, Го́спода.

Иже во зра́цѣ Боже́ственнаго ра́ди явле́нія, лице́ просла́вися иногда́ Моисе́ово, Христо́съ же, я́ко ри́зою, свѣ́томъ и сла́вою одѣва́ется, свѣ́та бо самодѣ́теленъ Сы́й, озаря́етъ пою́щія: благослови́те, вся́ дѣла́ Госпо́дня, Го́спода.

Отъ свѣторо́дна о́блака, Христа́ ученицы́ объя́та зря́ще на Ѳаво́рѣ и ни́цы на зе́млю па́дше, у́мъ просвѣ́щше, со Отце́мъ Сего́ поя́ху и Ду́хомъ: благослови́те, вся́ дѣла́ Госпо́дня, Го́спода.

Инъ.]

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Мое́ неразу́міе твое́ю моли́твою исцѣли́, о́тче преподо́бне, по́мыслы покая́нія просвѣща́я мою́ ду́шу и враги́ проща́ти о́бразомъ житія́ твоего́ науча́я, и къ по́двигу возведи́ воздержа́нія.

Огнь любве́ Бо́жія, преди́вный Ѳео́доре, въ свое́мъ се́рдцѣ возже́гъ, единоплеме́нныя че́шскія лю́ди проти́ву лати́нянъ защити́лъ еси́: тѣ́мъ и ны́нѣ бу́ди проти́ву е́реси защи́титель, о́тче преподо́бне, и́же Правосла́вную вѣ́ру отъ язы́ка и́хъ любо́вію воспрія́ша.

Лю́демъ безчи́сленнымъ отъ мно́гихъ язы́къ, во святу́ю Ла́вру приходя́щимъ, и на вся́комъ мѣ́стѣ по́мощь твою́ призыва́ющимъ ско́рый слы́шатель и до́брый спасе́нія наста́вникъ, преблаже́нне Ѳео́доре, яви́лся еси́, всѣ́хъ ко Христу́ неви́димымъ посѣще́ніемъ твои́мъ призыва́я.

Богоро́диченъ: Умерщвле́нную угрызе́ніемъ зміи́нымъ ду́шу мою́, еди́на Исто́чникъ жи́зни ро́ждшая, Всенепоро́чная, оживи́ и твори́ти сподо́би на́съ ра́ди изъ Тебе́, Дѣ́во, Ро́ждшагося хотѣ́ніе, вопію́щу: свяще́нницы, благослови́те, лю́діе, превозноси́те во вся́ вѣ́ки.

Пѣ́снь 9.

[Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Ужа́сни но́вымъ свѣтоли́тіемъ внеза́пу ученицы́ освѣ́щшеся, дру́гъ дру́га зря́ху, уди́вльшеся же и къ земли́ прекло́ншеся, Тебѣ́, Влады́цѣ всѣ́хъ, поклони́шася.

Шу́мъ изъ о́блака посыла́шеся богогла́сенъ, извѣству́я чу́до: Оте́цъ бо свѣ́товъ, — Се́й е́сть Сы́нъ Мо́й возлю́бленный, — апо́столомъ вопія́ше: Того́ послу́шайте.

Но́вая ви́дѣвше и пресла́вная, гла́съ Оте́ческій внуши́вше, на Ѳаво́рѣ Словесе́ слуги́, изображе́ніе Первообра́знаго, Се́й е́сть, — вопія́ху, — Спа́съ на́шъ.

Образе непремѣ́нный Су́щаго, недви́жиме, печа́ть неизмѣ́нна, Сы́не, Сло́ве, му́дросте и мы́шце, десни́це Вы́шняго, Си́ло, Тя́ воспѣва́емъ со Отце́мъ же и Ду́хомъ.

Инъ.]

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Южскій предѣ́лъ земли́ Россíйскія твои́хъ по́двигъ прославле́нію навы́че, Ѳео́доре блаже́нне, се́й у́бо въ Правосла́віи утверди́, проти́ву нечести́выя е́реси укрѣпи́, но и о все́мъ мíрѣ моли́твенникъ неуста́нный пребу́ди.

Се́ вре́мя твоего́ заступле́нія прíиде, о́тче преподо́бне: ви́диши бо зе́млю на́шу отъ нечести́выхъ уче́ній обурева́ему, зри́ши бо оскудѣ́ніе любве́ на́шея, отъ Христа́ предрече́нное, и ду́шъ человѣ́ческихъ разслабле́ніе, и о пра́вдѣ Бо́жіей нерадѣ́ніе. Поми́луй у́бо, поми́луй на́съ твои́мъ заступле́ніемъ.

Язвы ду́шъ на́шихъ, отъ вра́гъ неви́димыхъ наложе́нныя, исцѣли́, Ѳео́доре блаже́нне, и отъ бѣ́дъ и обстоя́ній моли́твами твои́ми огради́ на́съ, и ра́дости вѣ́чныя на́съ сподо́би, а́ще и недосто́йныхъ, но твоему́ предста́тельству вѣ́рующихъ те́плѣ.

Богоро́диченъ: Гла́съ Ти́ провозглаша́емъ Гавріи́ловъ: ра́дуйся, земле́ избра́нная; ра́дуйся, трапе́зо златови́дная; ра́дуйся, человѣ́ковъ прибѣ́жище; ра́дуйся, му́чениковъ похвало́; ра́дуйся, а́нгеловъ ра́дованіе, Свята́я Богоро́дице, держа́во вѣ́рою чи́стою блажа́щихъ Тя́.

Свѣти́ленъ:

Да восхва́лится преподо́бный Ѳео́доръ отъ всѣ́хъ вѣ́рныхъ язы́ковъ, я́ко вѣ́ры святы́я бы́въ ратобо́рникъ, напа́ствуемыхъ защи́титель, враго́мъ за зло́ до́брымъ воздая́тель, кня́жій вѣне́цъ на и́ноческую власяни́цу премѣни́тель, поста́ и моли́твы благíй о́бразъ яви́вый и о душа́хъ на́шихъ моли́твенникъ теплѣ́йшій. [Два́жды.]

Сла́ва, и ны́нѣ, пра́здника:

Свѣ́те неизмѣ́нный [Сло́ве, Свѣ́та Отца́ нерожде́нна, въ явле́ннѣмъ свѣ́тѣ Твое́мъ, дне́сь на Ѳаво́рѣ свѣ́тъ ви́дѣхомъ Отца́, свѣ́тъ и Ду́ха, свѣ́томъ наставля́ющаго всю́ тва́рь].

На хвали́техъ поста́вимъ стихо́въ 6 и пое́мъ подо́бны пра́здника 3, гла́съ 2. [Подо́бенъ: До́ме Евфра́ѳовъ.

Ра́дуется тро́ица* боже́ственныхъ апо́столъ,* я́же Тро́ицы ви́дѣ,* по существу́ Еди́наго,* на горѣ́ Ѳаво́рстѣй.

Бла́гоже тебѣ́, Ѳаво́ре,* и́же пе́рвѣе мра́чный:* Свѣ́та бо сподо́бился еси́,* не чу́вственнаго со́лнца,* но вы́шнія свѣ́тлости.

Свѣ́томъ у́бо* Твоего́ лица́ осія́вшеся,* ученицы́ Твои́, Спа́се,* не терпя́ще зари́,* на зе́млю внеза́пу падо́ша.

Ины стихи́ры] преподо́бному 4, гла́съ 8:

Преподо́бенъ и че́стенъ свѣти́льникъ* богодарова́нный и свѣтоно́сный яви́лся еси́ на земли́,* богоно́сне о́тче Ѳео́доре,* отъ ро́да бо изше́дъ присночестна́го,* я́ко плодови́тая розга́ отъ ко́рене славнодержа́внаго Влади́міра,* вои́стинну плоды́ вѣ́ры боже́ственныя и свѣтоно́сныя прине́слъ еси́* и тѣ́ми Го́сподеви угоди́лъ еси́;* и ны́нѣ, въ небе́сныхъ живы́й,* моли́ся Христу́ дарова́ти ста́ду твоему́* ми́ръ и ве́лію ми́лость.

Богоблаже́нне о́тче Ѳео́доре,* вои́стинну да́ръ Бо́жій и дая́ніе,* е́же отъ Отца́ свѣ́товъ,* во страна́хъ оте́чествія твоего́ яви́лся еси́:* о тебѣ́ бо свы́ше явля́емую Бо́жію си́лу позна́хомъ* и заступле́ніе небе́сное,* и́миже отъ враго́въ единовѣ́рныя лю́ди твоя́ спа́слъ еси́, уразумѣ́хомъ,* и ны́нѣ, въ небе́сныхъ живы́й,* моли́ся Христу́ Бо́гу дарова́ти странѣ́ на́шей* ми́ръ и ве́лію ми́лость.

Богому́дре блаже́нне Ѳео́доре,* ты́, по и́мени твоему́ и житіе́ твое́ хотя́ стяжа́ти,* тлѣ́нныя да́ры мíра сего́ презрѣ́лъ еси́,* и, сла́ву кня́жества твоего́ презрѣ́въ,* сама́го себе́ въ да́ръ Бо́гу прине́слъ еси́,* и во убо́гій и́ноческій о́бразъ обле́клся еси́,* обнища́вшему на́съ ра́ди Христу́ послѣ́дуя;* и ны́нѣ, въ небе́сныхъ живы́й,* моли́ся Пода́телю всѣ́хъ благи́хъ* дарова́ти моли́твенникомъ твои́мъ* ми́ръ и ве́лію ми́лость.

Сла́ва, гла́съ то́йже:

Пріиди́те, Россíйстіи собо́ри, собери́теся, вѣ́рныхъ ли́цы, свѣ́тло соста́вльше псало́мскую пѣ́снь, боже́ственному сему́ и богоно́сному Ѳео́дору глаго́люще: ра́дуйся, Бо́жіихъ дарова́ній сокро́вище пребога́тое; ра́дуйся, христіа́нъ правосла́вныхъ ро́гъ богоно́сный; ра́дуйся, добродѣ́тели и благоче́стія христіа́нскаго всеизря́дная похвало́; ра́дуйся, благíй предста́телю и моли́твенниче о душа́хъ на́шихъ.

И ны́нѣ, пра́здника, [гла́съ то́йже:

Поя́тъ Христо́съ Петра́, Іа́кова и Іоа́нна, на го́ру высоку́ еди́ны, и преобрази́ся предъ ни́ми, и просвѣти́ся лице́ Его́, я́ко со́лнце, ри́зы же Его́ бы́ша бѣлы́, я́ко свѣ́тъ; и яви́шася Моисе́й и Илія́ съ Ни́мъ глаго́люще, и о́блакъ свѣ́телъ осѣни́ и́хъ. И се́ гла́съ изъ о́блака, глаго́лющь: Се́й е́сть Сы́нъ Мо́й возлю́бленный, о Не́мже благоволи́хъ, Того́ послу́шайте].

Славосло́віе вели́кое. [Ектеніи́] и опту́стъ.



НА ЛИТУРГІИ,

Блаже́нна пра́здника, [пѣ́снь 6-я, на 4], и свята́го, [пѣ́снь 6-я, на 4]. И про́чая слу́жба преподо́бническая: [Проки́менъ пра́здника, гла́съ 4: Яко возвели́чишася дѣла́ Твоя́, Го́споди, вся́ прему́дростію сотвори́лъ еси́. Сти́хъ: Благослови́, душе́ моя́, Го́спода, Го́споди Бо́же мо́й, возвели́чился еси́ зѣло́. И преподо́бнаго, гла́съ 7: Честна́ предъ Го́сподемъ сме́рть преподо́бныхъ его́. Апо́столъ, преподо́бнаго, къ Гала́томъ, зача́ло 213. Аллилу́ія пра́здника, гла́съ 8: Твоя́ су́ть небеса́, и Твоя́ е́сть земля́. Сти́хъ: Блаже́ни лю́діе, вѣ́дущіи воскликнове́ніе, [Го́споди, во свѣ́тѣ лица́ Твоего́ по́йдутъ]. И преподо́бнаго, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе отъ Луки́, зача́ло 24. Прича́стенъ пра́здника: Го́споди, во свѣ́тѣ Лица́ Твоего́ по́йдемъ и о и́мени Твое́мъ возра́дуемся во вѣ́ки. И преподо́бнаго: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]


(Зри́:) Аще бу́деши пѣ́ти слу́жбу преподо́бному Ѳео́дору во и́нъ де́нь, егда́ нѣ́сть попра́зднства, ста́вь на Го́споди, воззва́хъ.., стихи́ръ его 8, и по си́хъ на И ны́нѣ, воспѣва́й богоро́диченъ гла́са, и́же глаго́лется Догма́тикъ. Та́кожде и по про́чіихъ стихи́рахъ и сѣда́льнахъ и свѣти́льнѣ на Сла́ва, и ны́нѣ, ста́вь богоро́дичны воскре́сны по гла́су и́хъ изъ окто́иха. На литíи же глаго́ли стихи́ру хра́ма. Въ концѣ́ вече́рни, а́ще е́сть бдѣ́ніе, глаго́ли тропа́рь свято́му два́жды, и Богоро́дице Дѣ́во, ра́дуйся... На у́трени же, по Бо́гъ Госпо́дь: та́кожде тропа́рь свято́му два́жды, Сла́ва, и ны́нѣ, богоро́диченъ: Яко на́шего воскресе́нія сокро́вище... Вмѣ́сто же кано́на Преображе́нію ста́вь кано́нъ Богоро́дицы: Во́ду проше́дъ... На хвали́техъ стихи́ры свято́му воспѣва́й на 4, та́же Сла́ва: свято́му. И ны́нѣ: Влады́чице, пріими́ моли́твы ра́бъ Твои́хъ...

Источникъ: Мине́я Августъ. Ча́сть пе́рвая. — М.: Издательскій совѣтъ Русской Православной Церкви, 2002. — С. 338-350.

/ Къ оглавленію раздѣла /


Наверхъ / Къ титульной страницѣ

0