Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 11-й де́нь.
Слу́жба преподо́бнымъ отце́мъ на́шимъ Ѳео́дору и Васи́лію Пече́рскимъ.

ВЕЧЕРЪ,
Блаже́нъ му́жъ, 1-й антифо́нъ. На Го́споди, воззва́хъ: стихи́ры преподо́бному Ѳео́дору, гла́съ 6. Подо́бенъ: Все отло́жше.

Жела́я у́мное воспрія́ти бога́тство, о чу́вственномъ неради́лъ еси́, е́же преда́въ въ ру́цѣ ни́щихъ, са́мъ изво́лилъ еси́ въ нищетѣ́ обнища́вшему на́съ ра́ди Христу́ послѣ́довати, и Того́ кре́стъ на ра́мо воспріе́мь, тѣ́сный пу́ть проше́лъ еси́, и по кончи́нѣ блаже́ннѣй простра́нная мѣста́ наслѣ́довалъ, идѣ́же со а́нгелы водворя́яся, моли́ о восхваля́ющихъ тя́, Ѳео́доре преблаже́нне.

Вся́ оста́вль кра́сная сего́ мíра, и́ноческій о́бразъ воспріе́мь ра́достно и въ не́мъ до́брѣ подвиза́вся, въ те́мную всели́лся еси́ пеще́ру, идѣ́же мно́гимъ воздержа́ніемъ и труды́, пло́ть свою́ ду́хови покори́лъ еси́, и уязви́въ уязвля́ющаго тя́ супоста́та, прогна́лъ еси́ того́ кре́стнымъ ору́жіемъ. И ны́нѣ во свѣ́тѣ живы́й непристу́пномъ, помяни́ и на́съ, пра́зднующихъ честно́е твое́ преставле́ніе.

Ины стихи́ры преподо́бному Васи́лію, гла́съ 4. Подо́бенъ: Да́лъ еси́ зна́меніе.

Зако́нъ, и́же въ писа́ніи, исполня́я, преподо́бне Васи́ліе, стяжа́въ любо́вь къ Бо́гу, возлюби́лъ еси́ и бли́жняго, я́ко са́мъ себе́, и того́ утверди́лъ еси́, блаже́нне, не поколеба́тися отъ неви́димаго врага́, на́ньже дарова́ тебѣ́ крѣ́пость Іису́съ Человѣколю́бецъ и Спа́съ ду́шъ на́шихъ.

Имы́й во устѣ́хъ, преблаже́нне, со́лію благода́ти сло́во растворе́нно, согни́вшееся сребролю́біемъ се́рдце утверди́лъ еси́ въ добростоя́ніе па́ки, кры́ющагося же змíя яви́лъ еси́ ко́зни и прогна́лъ того́ дале́че о и́мени Христо́вѣ, Его́же устраша́ются проти́вныя си́лы.

Тве́рдыя любве́ сою́зомъ связа́вшеся, преблаже́нніи отцы́, обрѣто́стеся еще́ въ жи́зни се́й а́ки гра́дъ тве́рдъ, его́же не возмого́ша ле́стніи подкопа́ти лю́таго веліа́ра служи́теліе, и претво́ршеся въ бѣ́гство, я́звенни падо́ша, вы́ же воспѣ́сте во хвале́ніи: си́ла на́ша и крѣ́пость Іису́съ Человѣколю́бецъ и Спа́съ ду́шъ на́шихъ.

Сла́ва, гла́съ 6:

Треблаже́нніи отцы́, до́бліи ору́жницы Христо́вы, вы́ глаго́ломъ непреста́нныя моли́твы, воспріе́мше щи́тъ несумнѣ́нныя вѣ́ры, упова́ніемъ же на Бо́га препоя́савшеся, побѣди́ли есте́ де́монскія полки́, и въ кро́ви муче́ній свои́хъ ри́зы испра́вше, внидо́сте въ Черто́гъ небе́сный, отню́дуже и на́съ не забу́дите, но уще́дрите ны́, прося́ще на́мъ у Христа́ Бо́га ми́ра и ве́лія ми́лости.

И ны́нѣ, пра́здника.
Вхо́дъ. Проки́менъ дне́. И чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 2. Подо́бенъ: Егда́ отъ Дре́ва Тя́ ме́ртва.

Егда́ благода́ть Ду́ха Пресвята́го огне́мъ те́плыя любве́ къ Бо́гу распали́ твое́ се́рдце, преподо́бне, тогда́, вся́ презрѣ́въ кра́сная мíра сего́, и Влады́чнимъ стопа́мъ послѣ́дуя, тѣ́сный въ жи́зни се́й изво́лилъ еси́ пу́ть ше́ствовати, кре́стъ Христо́въ на ра́му нося́, и долготерпѣ́ніемъ вше́лъ еси́ въ простра́нная мѣста́, отню́дуже и на́съ не забу́ди, вѣ́рою блажа́щихъ твою́ честну́ю па́мять, Васи́ліе.

Сти́хъ: Восхва́лятся преподо́бніи во сла́вѣ и возра́дуются на ло́жахъ свои́хъ.

Бѣ́гая молвы́ и мяте́жа, плѣня́ющаго у́мъ человѣ́ческій въ напа́сти, вся́ отве́ргъ, преблаже́нне, на безмо́лвное отше́лъ еси́ мѣ́сто, въ те́мную всели́вся пеще́ру, и ту́ сотвори́лъ еси́ а́ки ра́й нѣ́кій прекра́сенъ, мно́гими же труды́ въ не́й пожи́въ, неви́димыя враги́ одолѣ́лъ еси́ и а́нгеломъ собесѣ́дникъ показа́лся еси́. И ны́нѣ съ ни́ми Влады́цѣ Христу́ предстоя́, моли́ и о на́съ, свя́те Ѳео́доре, да изба́вимся отъ вся́кія молвы́ и напа́сти.

Сти́хъ: Честна́ предъ Го́сподемъ сме́рть преподо́бныхъ Его́.

Лѣ́ствицу ви́дяще, отцы́ свяще́ннѣйшіи, отъ горы́ святы́я Пече́рскія къ небеси́ утвержде́нну, на не́йже Бо́жія Ма́ти положи́ Свое́ селе́ніе, и а́нгельскія ли́ки со святы́ми по не́й къ небеси́ восхожда́ху, тѣ́хъ стопа́мъ послѣ́довали есте́, а́ки безпло́тни, и возше́дше вѣ́дѣніемъ и дѣя́ніемъ, ны́нѣ предстоите́ Святѣ́й Тро́ицѣ, идѣ́же помяни́те и на́съ, покланя́ющихся моще́мъ ва́шимъ, преблаже́нніи.

Сла́ва, гла́съ 1:

Мно́гими по́двиги просія́вше въ мíрѣ, святíи му́ченицы, Ѳео́доре чу́дне съ Васи́ліемъ доблему́дрымъ, преиспещре́нною ри́зою одѣ́ястеся и живете́ ны́нѣ во свѣ́тѣ присносу́щномъ, отню́дуже прини́кше на земна́я, свѣ́тлыхъ дарова́ній ва́шихъ луча́ми на́съ, во тмѣ́ житія́ сего́ бѣ́дствующихъ, просвѣти́те и испроси́те отъ Христа́ Бо́га ве́лію ми́лость.

И ны́нѣ, пра́здника.


Тропа́рь, гла́съ 1:

Сою́зомъ любве́ связа́вшеся, преподо́бніи, вся́къ сою́зъ ко́зней вра́жіихъ попра́сте, страда́ніе же и сме́рть непови́ннѣ отъ сребролюби́ваго кня́зя претерпѣ́сте до́блѣ, тѣ́мъ мо́лимъ ва́съ, вку́пѣ пожи́вшихъ и вѣнцы́ муче́нія пріе́мшихъ, моли́теся Го́сподеви о на́съ, я́ко да во мно́зѣй любвѣ́, вѣ́рѣ и наде́ждѣ до́брѣ пожи́вше, всегда́ ублажа́емъ ва́съ, Ѳео́доре и Васи́ліе добропобѣ́дніи.

Сла́ва, и ны́нѣ, пра́здника.



НА УТРЕНИ,
На Бо́гъ Госпо́дь: тропа́рь пра́здника [два́жды]. Сла́ва, преподо́бнымъ. И ны́нѣ, пра́здника.

По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й.

До́брую дво́ицу преблаже́нныхъ оте́цъ, пріиди́те, лю́діе, пѣ́сньми почти́мъ: сíи бо, мно́го искуше́ни бы́вше, чистѣ́е зла́та яви́шася въ мíрѣ, и ны́нѣ престо́лу Влады́чню предстоя́ще, во мно́гихъ напа́стехъ бѣ́дствующимъ посо́бствуютъ, да пріи́мутъ отъ всѣ́хъ искуше́ній свобожде́ніе. [Два́жды.]

Сла́ва, и ны́нѣ, пра́здника или́ богоро́диченъ:

Мíру всему́ ско́рая Помо́щнице, и обурева́емымъ ти́хое Приста́нище, на́съ, вла́ющихся самохо́тныхъ страсте́й волна́ми, приведи́ въ тишину́ ско́рую бла́гости Твоея́ и изба́ви отъ бѣ́дъ пою́щихъ Ти́: ра́дуйся, всѣ́хъ ра́досте и спасе́ніе.

По 2-мъ стихосло́віи сѣда́ленъ, гла́съ 4. Подо́бенъ: Яви́лся еси́.

Мно́гими по́тами потруди́вшеся и муче́ніе непови́ннѣ пріе́мше, отцы́ богому́дріи, преидо́сте на мѣ́сто упокое́нія, идѣ́же со а́нгелы лику́юще, моли́те Всеще́драго Влады́ку, прія́ти и на́мъ отра́ду, отъ враго́въ стра́ждущимъ: мы́ бо есмы́ ча́да ва́ша и о́вцы слове́сныя уче́ній ва́шихъ. [Два́жды.]

Сла́ва, и ны́нѣ, пра́здника или́ богоро́диченъ:

Яви́ся на́мъ въ ча́съ се́й, Пречи́стая Дѣ́во, и приноси́мыя Тебѣ́ мольбы́ пріе́мши, донеси́ Сы́ну Твоему́, Его́же носи́ла еси́ на ру́ку ма́терню, прося́щи на́мъ грѣхо́въ разрѣше́нія; мы́ бо есмы́ раби́ Твои́, иму́щіи Тя́ ско́рую Предста́тельницу и Моли́твенницу о душа́хъ на́шихъ.

По поліеле́и сѣда́ленъ, гла́съ 8. Подо́бенъ то́йже:

Вертогра́дъ заключе́нный Бо́жія Ма́тере израсти́ на́мъ два́ цвѣтца́ неувяда́емыя, Ѳео́дора и Васи́лія, до́блія му́ченики, и́миже и́ночествующіи ра́дости исполня́ются и чу́дная оби́тель облагоуха́ется; си́хъ лю́діе хвала́ми почита́ютъ, пріе́млюще отъ моще́й и́хъ исцѣле́ніе, и иму́ще и́хъ къ Бо́гу те́плыя моли́твенники. [Два́жды.]

Сла́ва, и ны́нѣ, пра́здника или́ богоро́диченъ:

Те́плая предста́тельнице су́щимъ въ ско́рбехъ и грѣ́шникомъ спору́чнице, Чи́стая Дѣ́во, не пре́зри сле́зъ и воздыха́нія на́шего, но преклони́ся на человѣколю́бную Твою́ бла́гость и спаси́ рабы́ Твоя́ отъ всѣ́хъ прило́говъ бѣсо́вскихъ и обстоя́ній.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе да хва́литъ Го́спода... Ева́нгеліе отъ Матѳе́я, зача́ло 38: Рече́ Госпо́дь Свои́мъ ученико́мъ: вся́къ, и́же исповѣ́сть Мя́ предъ человѣ́ки...

По 50-мъ псалмѣ́ стихи́ра, гла́съ 6:

Треблаже́нніи [отцы́, до́бліи ору́жницы Христо́вы, вы́ глаго́ломъ непреста́нныя моли́твы, воспріе́мше щи́тъ несумнѣ́нныя вѣ́ры, упова́ніемъ же на Бо́га препоя́савшеся, побѣди́ли есте́ де́монскія полки́, и въ кро́ви муче́ній свои́хъ ри́зы испра́вше, внидо́сте въ Черто́гъ небе́сный, отню́дуже и на́съ не забу́дите, но уще́дрите ны́, прося́ще на́мъ у Христа́ Бо́га ми́ра и ве́лія ми́лости].

Кано́нъ преподо́бнымъ, гла́съ 2.

Пѣ́снь 1.

Ирмо́съ: Нетре́ну, необы́чну, немо́кренно морску́ю ше́ствовавъ стезю́, избра́нный вопія́ше Изра́иль: Го́сподеви пои́мъ, я́ко просла́вися.

Нетре́нъ хотя́й по́стничества пу́ть ше́ствовати, Ѳео́доръ сла́вный, ева́нгельски мíра сего́ су́етій отре́кся и бога́тство разда́въ ни́щимъ, еди́нъ би́серъ — Христа́, стяжа́, Ему́же и пое́тъ: я́ко просла́вися.

Ви́дя, блаже́нне, я́ко мíръ во злѣ́ лежи́тъ, не восхотѣ́лъ еси́ на тлѣ́ніе сего́ взира́ти, тѣ́мъ всели́лся еси́ въ пеще́ру, мно́га лѣ́та пребы́въ, воздержа́нію прилѣжа́ и трудо́мъ, на еди́наго взира́я Бо́га.

Зави́дя вра́гъ вселука́вый, раска́яніемъ разда́нныхъ имѣ́ній вве́рже тя́, преподо́бне, во отча́яніе, на мно́ги дни́ помрача́я, но ты́ исповѣ́даніемъ па́ки испра́вился, и посрами́лъ еси́ хотя́щаго тя́ посрами́ти.

Яко соверше́нъ и́нокъ, соверше́нное нестяжа́ніе имы́й, увѣща́лъ еси́ Ѳео́дора, преподо́бне Васи́ліе, не раскаева́тися, я́ко прехо́дитъ мíра сего́ о́бразъ, но на небе́сная взира́ти, я́ко та́ пребыва́ютъ во вѣ́ки.

Богоро́диченъ: Отъ влеку́щаго мя́ къ тлѣ́нію руки́ исхити́, Влады́чице, къ нетлѣ́ннымъ же взира́ти устро́й и напра́ви живо́тъ на́шъ, я́ко ско́рая Помо́щница и исправле́ніе человѣ́комъ.

Пѣ́снь 3.

Ирмо́съ: Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Лу́къ сокруши́ся веліа́ра, напряже́нный на тя́, о́тче, ты́ бо, пріе́мь я́ко ме́чь, глаго́лъ Іису́совы моли́твы, пресѣ́клъ еси́ того́; и и́же пе́рвѣе неду́говалъ, сребролю́біемъ омрача́емь, послѣди́, препоя́сався Боже́ственною си́лою, бы́лъ еси́ врагу́ въ я́зву.

Услы́шалъ еси́, преподо́бне, я́ко погуби́ зла́то и живо́тъ, раска́явыйся иногда́ о разда́ннѣй ми́лостынѣ, пла́калъ еси́ го́рько, и тѣ́мъ отъ сребролю́бнаго неду́га избы́въ, возопи́лъ еси́: прославля́ю, Бла́же, непостижи́мую Твою́ ми́лость.

Аки единоутро́бніи, возлю́бльшеся съ собо́ю, Васи́ліе и Ѳео́доре, ненави́дящаго добра́ преуспѣ́яніемъ въ за́повѣдехъ Госпо́днихъ посрами́ли есте́ веліа́ра. И мене́ ко преуспѣва́нію тѣ́хъ утверди́те, да вку́пѣ прославля́ю съ ва́ми непостижи́мую Бо́жію ми́лость.

Отше́дшу тебѣ́ на послуша́ніе, преподо́бне Васи́ліе, обрѣ́тъ вра́гъ вре́мя, и преобрази́вся въ тво́й о́бразъ, вообрази́ Ѳео́дору па́ки любле́ніе разда́нныхъ имѣ́ній, я́ко не помяну́ Іису́совы моли́твы въ бесѣ́дѣ неполе́зной.

Мня́йся стоя́ти, да не паде́шися, вся́къ блюди́ся, я́коже сбы́стся на Ѳео́дорѣ блаже́нномъ: то́й бо, мня́йся прогна́вый супоста́та, прія́ его́ па́ки, и бы́ли бы ему́ послѣ́дняя го́рша пе́рвыхъ, а́ще не бы́ отъ си́хъ спасла́ его́ непостижи́мая Бо́жія бла́гость.

Богоро́диченъ: Нечу́вственъ сы́й, возмни́хся въ добродѣ́телехъ стоя́ти, невѣ́дый, я́ко падо́хся, но Ты́, ско́рая Помо́щнице, возведи́ мя́, Чи́стая Дѣ́во, и научи́ мя усе́рдно Бо́жія за́повѣди твори́ти, да прославля́ю Твою́, Ма́ти Бо́жія, несказа́нную ми́лость.

Сѣда́ленъ, гла́съ 8:

Отъ зло́бы нача́льника врага́ уязви́лся еси́, о́тче, изли́шнѣе съ тѣ́мъ бесѣ́довавъ о неполе́зныхъ, не помина́я сего́, я́ко тля́тъ бесѣ́ды злы́ обы́чаи благíя. Но сіе́ все́ бы́сть Бо́гомъ попуща́емо, да искуше́ніе твое́ яви́тся чи́стѣе зла́та и бо́лшій вѣне́цъ тебѣ́ исхода́тайствуетъ, его́же и пріе́мь послѣди́, моли́ся Христу́ Бо́гу и на́мъ того́жде не лиши́тися, чту́щимъ любо́вію святу́ю па́мять твою́.

Сла́ва, и ны́нѣ, пра́здника или́ богоро́диченъ:

Стрѣ́лы лука́ваго, плотски́мъ раздеже́ніемъ напое́нны, уязви́ша мое́ се́рдце, и лежу́ ме́ртвъ, живота́ отча́явся, пла́стырь цѣльбы́ Твоея́ приложи́ ми, Чи́стая Дѣ́во, я́ко Цѣле́бница всего́ христіа́нскаго ро́да.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Услы́шавъ всегуби́тель, я́ко въ бесѣ́дѣ не помина́еши и́мене Го́спода Іису́са, Ѳео́доре, прія́тъ де́рзость и совѣ́туетъ проси́ти у Бо́га, е́же пода́тися тебѣ́ мно́жеству зла́та и сребра́, разда́нного ра́ди твоего́ бога́тства, ты́ же не помяну́лъ еси́, я́ко хотя́щіи богати́тися впа́даютъ въ напа́сть и въ зло́ неисцѣли́мо.

Вся́ бѣ́сомъ совѣ́туемая пріе́мь, преподо́бне, ви́дѣлъ еси́ бѣ́са во снѣ́, а́ки а́нгела во свѣ́тлости вели́цѣй, показу́ющаго тебѣ́ въ пеще́рѣ сокро́вище, е́же, прокопа́въ ма́ло, обрѣ́тъ, вма́лѣ не погуби́лъ еси́ многоцѣ́ннаго би́сера, Христа́, Его́же благода́тію, пады́й, па́ки испра́вился еси́.

Ко́рень сребролю́бія въ тебѣ́ хотя́ прорасти́ти въ вѣ́тви, діа́волъ вта́йнѣ наноси́мыми помышле́нми, и я́вѣ явле́ніемъ во о́бразе Васи́лія, совѣ́туетъ со обрѣ́теннымъ зла́томъ въ чу́ждую страну́ бѣжа́ти и притяжа́ти себѣ́ се́ла на потре́бу, да та́ко, удали́вся, преподо́бне, мѣ́ста сего́ свята́го, отпаде́ши и Бо́жія благода́ти.

Живота́ продолже́ніемъ и ста́рости наше́ствіемъ вра́гъ устраша́я, къ любоимѣ́нію привлека́етъ тя́, Ѳео́доре, хотя́ отъя́ти тебѣ́ па́мять, да не помина́еши Ре́кшаго: не пецы́теся о у́тріи, Бо́гъ бо пече́тся о ва́съ.

Богоро́диченъ: Отъя́тъ лука́вый мнѣ́ па́мять, да не помина́ю Ре́кшаго: не пецы́теся душе́ю ва́шею; и та́ко въ душегу́бную веде́тъ мя́ страну́, да та́мо, Бо́жія благода́ти обнища́въ, сконча́юся. Но, Чи́стая Дѣ́во, не попусти́ ми въ коне́чную сію́ па́сти поги́бель.

Пѣ́снь 5.

Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тмѣ́ заблу́ждшимъ, богоразу́мія просвѣще́ніе да́руя.

Угль еще́ имѣ́яй, блаже́нне, опаля́ющій со́вѣсть твою́ студо́мъ, отвѣща́лъ еси́ бѣ́су: обѣща́хся здѣ́ въ пеще́рѣ живо́тъ мо́й сконча́ти, ка́ко у́бо ны́нѣ бѣгле́цъ бу́ду? Но здѣ́ поживу́, и вся́ сотворю́ повелѣ́нная тобо́ю.

Па́ки супоста́тъ предлага́етъ, я́ко увѣ́дано бу́детъ обрѣ́тенное сокро́вище, и прети́тъ отъя́тіемъ о́наго, съ ни́мже совѣ́туетъ отъ мѣ́ста сего́ бѣжа́ти, его́же послу́шавъ совѣ́та, пріуготовля́лся еси́ къ бѣжа́нію, а́ще не бы́ удержа́ли тя́, Ѳео́доре, преподо́бныхъ оте́цъ моли́твы, па́че же Са́мыя Богома́тере десни́ца.

Истиннаго послу́шателя и имѣ́ній нестяжа́теля, блаже́ннаго Васи́лія, отгна́лъ еси́, Ѳео́доре, я́ко облича́вша тя́, пре́лестію бѣсо́вскою ослѣпле́нна, но о́нъ, отгоня́емь, не прерѣка́ше, па́че же моля́ше Бо́га, да тя́ изба́витъ отъ сатани́нскихъ ловле́ній.

При мно́гихъ свидѣ́телехъ да оправди́шися, Васи́ліе, прише́лъ еси́ съ бра́тіею ко прельще́нному, того́ увѣря́я, я́ко не съ тобо́ю, но съ бѣ́сомъ, во о́бразѣ твое́мъ вчера́ и пре́жде того́ бы́вшимъ, и ко́зни своя́ распростира́ющимъ, о́нъ бесѣ́дова.

Богоро́диченъ: Вра́гъ многоко́зненный, хотя́ мя запя́ти, во многоли́чныя претворя́ется о́бразы, и дѣ́йствуетъ въ мы́сли мое́й, да удалю́ся Твоего́, Ма́ти Пречи́стая, покро́ва; но Ты́, Влады́чице, не попусти́ на мя́ такова́го искуше́нія.

Пѣ́снь 6.

Ирмо́съ: Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: еди́нъ бо еси́ на́шего спасе́нія вино́венъ.

Гла́съ глаго́ловъ Іису́совы моли́твы я́ко услы́ша льсти́вый, не дерзну́ къ тебѣ́, Ѳео́доре, приступи́ти, но, пораже́нъ, бѣ́гаше отъ твоея́ пеще́ры, ты́ же, о си́лѣ тоя́ моли́твы укрѣпи́вся, и вся́кому, къ тебѣ́ приходя́щему, не отверза́лъ еси́ двере́й, до́ндеже исповѣ́сть, я́ко Госпо́дь Іису́съ Христо́съ на́шему спасе́нію вино́венъ.

Отъ толи́каго ро́ва поги́бели изба́вленъ сы́й, Ѳео́доре, ископа́лъ еси́ ро́въ глубо́къ и поги́бельное сокро́вище въ о́нъ вве́рглъ еси́, присыпа́я и любоимѣ́нія па́мять, глаго́ля въ себѣ́: нѣ́сть и́но, что́ та́ко и́нокомъ, я́ко любоимѣ́ніе, душевре́дно.

Мно́гими труды́ томя́ себе́, Ѳео́доре, да не пра́зденъ сы́й, впаде́ши въ безстра́шіе и лѣ́ность, поста́вилъ еси́ же́рновы, и меля́ на бра́тію жи́то, во устѣ́хъ имѣ́лъ еси́ непреста́нно Іису́сову моли́тву, и та́ко на неви́димаго врага́ укрѣпи́лся еси́.

Хотя́ супоста́тъ устраши́ти тя́, блаже́нне, сотвори́ гла́съ, а́ки гро́ма, и ме́ляше въ же́рновы, но ты́, разумѣ́въ того́ дѣ́йство, запрети́лъ еси́ тому́, и бы́сть, а́ки плѣ́нникъ, повину́яся и меля́, до́ндеже пя́ть возо́въ изме́ле жи́та въ но́щь еди́ну.

Богоро́диченъ: Въ лѣ́ности мя́ су́ща всегда́ вра́гъ плѣня́етъ и поуча́етъ мя́ на непотре́бная дѣла́, но Ты́, Марíе, Ма́ти Бо́га моего́, прожени́ того́, мене́ же научи́ порабо́тити пло́ть ду́ху, и послужи́ти Бо́гу моему́ въ преподо́біи и пра́вдѣ.

Конда́къ, гла́съ 2:

До́бръ совѣ́тникъ я́влся блаже́нному Ѳео́дору, богому́дре Васи́ліе, изба́вилъ еси́ того́ совѣ́томъ свои́мъ отъ пре́лести діа́воли и ко свѣ́ту богоразу́мія наста́вль. Съ тѣ́мже по́слѣжде блаже́нную прія́лъ еси́ кончи́ну, устрѣле́нъ непра́ведно бы́въ во утро́бу отъ сребролюби́ваго кня́зя. И ны́нѣ, предстоя́ Го́сподеви, моли́ся непреста́нно о всѣ́хъ на́съ.

Икосъ:

Премно́жествомъ добродѣ́телей ва́шихъ, преподо́бніи, я́ко са́дъ кра́сный, испо́лнь су́ще, и я́ко отъ рая́, процвѣли́ есте́ поще́ніемъ и моли́твами, всѣ́хъ благоуха́юще отъ вони́ мно́гихъ ва́шихъ трудо́въ, и по́двиговъ, и по́товъ преподо́бническихъ, въ ни́хже преидо́сте благоиску́сно къ безско́рбному животу́, и вѣнце́мъ побѣ́днымъ увязо́стеся; моли́те непреста́нно о всѣ́хъ на́съ.

Пѣ́снь 7.

Ирмо́съ: Вѣтíи яви́шася о́троцы любому́дрѣйшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Вѣтíйствовати, блаже́нніи отцы́, хотя́ще, о мы́слехъ открыва́ху дру́гъ дру́гу и разсужда́ху о́ба, а́ще богоуго́дны мы́сли и́хъ бы́ша. Си́хъ, бра́тіе, подража́юще, разсужде́ніемъ бра́тнимъ мы́сли своя́ искуша́йте, кíя су́ть отъ Бо́га.

По́двигомъ и трудо́мъ преподо́бнаго Ѳео́дора ревну́юще, не дади́мъ труда́ своего́ ины́мъ, но я́коже то́й са́мъ на ке́ллію свою́ дрова́ ноша́ше, та́ко и мы́ потруди́мся на на́съ, а́ще хо́щемъ, да вра́гъ на́мъ празднолю́біемъ не стужа́етъ.

Ненави́дяще, бѣ́си блаже́нному па́кости творя́ху, ели́ко бо то́й со мно́гимъ трудо́мъ древа́ на гору́ ноша́ше, толи́ко они́ па́ки съ горы́ низверга́ху, но тру́дъ задѣ́юще ста́рцу, са́ми подъя́ша труды́ и томле́ніе.

Ве́рвь треплете́нна е́сть непреста́нная моли́тва отъ чи́ста се́рдца, е́юже Ѳео́доръ блаже́нный связа́ зло́бныя ду́хи, и бы́ша ему́, а́ки плѣ́нницы, повину́ющеся и нося́ще древа́ на созида́ніе ве́тхаго монастыря́, и́же сгорѣ́ пре́жде.

Мно́гими труды́ лука́віи ду́си томи́ми и безче́ствуеми, вопія́ху на блаже́нныхъ, хва́лящеся и глаго́люще: лю́тіи на́мъ супоста́ти, Ѳео́доръ и Васи́лій, съ ни́миже не преста́немъ бра́тися, до́ндеже предади́мъ я́ сме́рти, не вѣ́дуще, я́ко си́мъ честнѣ́йшему вѣнцу́ вино́вни бу́дутъ.

Богоро́диченъ: Тобо́ю, Влады́чице, укрѣпля́ема ви́дяще мя́, бѣ́сове скреже́щутъ зубы́ и хва́лятся непреста́нно бра́тися со мно́ю, до́ндеже одолѣ́ютъ. Но Ты́, Засту́пнице моя́, не преда́ждь мя́ въ и́хъ ру́цѣ, но изми́ мя отъ тѣ́хъ навѣ́товъ.

Пѣ́снь 8.

Ирмо́съ: О подо́біи зла́тѣ небре́гше, треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Подо́біемъ вся́каго злохи́трства своего́ нача́ша бѣ́сове поощря́ти злы́я человѣ́ки, да бы́ погуби́ли тя́, Ѳео́доре, тѣ́мже ная́тіи изво́зницы со мно́гою укори́зною къ судіи́ оклевета́ша тя́, свя́те; но ты́, о се́мъ не радя́, взыва́лъ еси́: да пое́тъ Го́спода вся́ тва́рь и превозно́ситъ Его́ во вѣ́ки.

Въ подо́біи блаже́ннаго Васи́лія пріи́де бѣ́съ па́ки къ нѣ́коему боля́рину безчеловѣ́чну, оклевета́я Ѳео́дора за обрѣ́тенное сокро́вище, съ ни́мже, рече́, хо́щетъ на и́ну страну́ бѣжа́ти; злочести́вый же о́нъ не вѣ́дяше, я́ко святíи еди́но сокро́вище и́мутъ — Христа́, Его́же превозно́сятъ хвала́ми во вѣ́ки.

Въ подо́біи Васи́лія злочести́вый боля́ринъ приведе́ ко кня́зю бѣ́са, и́же и тому́ солга́ о сокро́вищи на тя́, свя́те, и совѣ́товаше, да и́мутъ и мно́гими му́ками да истя́жутъ отъ тебе́ зла́то; но ты́, блаже́нне, ничто́же боя́щися, крѣ́пко вооружи́лся еси́ на супоста́та, удали́вшегося отъ Го́спода во вѣ́ки.

Во у́тріе кня́зь, а́ки на ло́въ или́ на нѣ́коего во́ина крѣ́пкаго са́мъ иды́й, улови́ тя, блаже́нне, и приве́дъ въ до́мъ, пе́рвѣе ласка́ньми истя́зоваше сокро́вища отъ тебе́, ему́же отвѣща́лъ еси́, свя́те: обрѣто́хъ сокро́вище и ви́дѣхъ мно́жество сосу́довъ златы́хъ, я́же па́ки закопа́хъ, я́ко ми́ неполе́зно, и моли́хъ Го́спода, да забу́ду о́но во вѣ́ки.

Богоро́диченъ: Закопа́хъ ввѣ́ренный мнѣ́ тала́нтъ, я́ко ра́бъ лѣни́вый, и ника́коже па́мятствую, я́ко и́мамъ о пріобрѣ́теніи о́наго отвѣ́тъ да́ти моему́ Влады́цѣ. Тѣ́мъ молю́ Тя́, Всечи́стая Пресвята́я Дѣ́во, помози́ ми тала́нтъ сотвори́ти сугу́бый, я́ко да обря́щу Го́спода моего́ ми́лостива во вѣ́ки.

Пѣ́снь 9.

Ирмо́съ: Ве́сь еси́ жела́ніе, ве́сь сла́дость, Сло́ве Бо́жій, Дѣ́вы Сы́не, Бо́же бого́въ, Го́споди святы́хъ Пресвяты́й, тѣ́мъ Тя́ вси́ съ Ро́ждшею велича́емъ.

Жела́я разрѣши́тся отъ у́зъ плотски́хъ и со Христо́мъ бы́ти, свя́занъ бы́лъ еси́ отъ кня́зя непови́ннѣ; и му́чимь крѣ́пко, му́чащаго врага́ уму́чилъ еси́, Ѳео́доре блаже́ннѣйшій.

Отъ пло́ти твоея́ струя́ми кро́вь теча́ше и обагри́ власяни́цу, въ ню́же, а́ки во многоцѣ́нную порфи́ру, одѣ́янъ, въ небе́сный Черто́гъ вше́лъ еси́, идѣ́же съ Ро́ждшею Бо́га въ Тро́ицѣ велича́еши.

Повѣ́шенъ и ды́момъ удавля́емь, та́же огне́мъ зѣло́ опаля́емь бы́лъ еси́, блаже́нне, но Бо́жія десни́ца сохрани́ тя цѣ́ла, я́ко ниже́ власяни́цѣ твое́й о́гнь прикосну́ся, и а́ки въ прохла́днѣ мѣ́стѣ, во пла́мени стоя́, Христа́ съ Ро́ждшею прославля́лъ еси́.

Пре́лести бѣсо́встѣй вѣ́ровавъ кня́зь, дерзну́ я́ти тя́, ца́рствующаго надъ страстьми́, Васи́ліе, и по́слуха хотя́ имѣ́ти на Ѳео́дора, вопроша́ше о сокрове́нномъ зла́тѣ; ты́ же несумнѣ́нно того́ и предстоя́щихъ обличи́лъ еси́, я́ко бѣ́сомъ прельще́нныхъ.

Шу́менъ сы́й отъ вина́, не стерпѣ́въ обличе́нія твоего́, кня́зь безу́мный стрело́ю уязви́ тя отъ лу́ка; ты́ же, блаже́нне, проро́чествовалъ еси́ ему́, глаго́ля, я́ко и са́мъ то́южде стрѣло́ю я́звенъ бу́детъ, и сбы́стся глаго́лъ тво́й, блаже́нне, вско́рѣ.

Богоро́диченъ: Возшумѣ́ша врази́ на́ши, Госпоже́, и обыдо́ша о́крестъ, пуща́юще грѣхолю́бныя на ны́ стрѣ́лы. Но Ты́, Влады́чице, гра́дъ су́щи тве́рдъ, стѣна́ необори́ма и щи́тъ крѣ́пкій, защити́ и сохрани́ съ Сы́номъ Тя́ велича́ющихъ.

Свѣти́ленъ:

Въ темни́цу вве́ржени, отцы́ блаже́нніи, по мно́гихъ му́кахъ изведе́ ду́ши ва́ша Госпо́дь отъ у́зъ плотски́хъ и введе́ во свѣ́тъ присносу́щный исповѣ́датися и́мени Его́ свято́му, идѣ́же со а́нгельскими ликостоя́ніи веселя́щеся, помяни́те и на́съ, лѣ́тнюю па́мять ва́шу почита́ющихъ.

Сла́ва, и ны́нѣ, пра́здника или́ богоро́диченъ:

Уловле́нъ сы́й грѣхолю́бными сѣтми́ отъ супоста́та, и въ темни́цу со́вѣстнаго ослѣпле́нія вве́рженъ, не ви́жду со́лнца за́повѣдей Го́спода моего́, но къ Тебѣ́, Чи́стая, вопію́: возсія́й ми покая́нія со́лнце и согрѣ́й луча́ми бла́гости Твоея́ оледенѣ́вшее се́рдце, да сла́влю вы́ну Твою́ ско́рую по́мощь.

На хвали́техъ стихи́ры, самогла́сны, гла́съ 1:

Кто́ по достоя́нію восхвали́ти возмо́жетъ труды́ и по́двиги ва́ша, отцы́ достоблаже́нніи, въ тѣле́сныхъ бо соста́вѣхъ а́ки безпло́тніи пожи́сте, и къ Бо́гу у́мы ва́ша впери́вше, на небеса́ возлетѣ́сте, и ны́нѣ престо́лу Вы́шняго предстоя́ще, прилѣ́жно моли́теся умири́ти мíръ и спасти́ ду́ши на́ша.

Кто́ не удиви́тся терпѣ́нію ва́шему, святíи, я́ко непови́ннѣ враго́мъ оклевета́нни, отъ сребролюби́ваго кня́зя мно́гая томле́нія подъя́сте, и до конца́ претерпѣ́вше, борю́щагося съ ва́ми неви́димо побѣди́ли есте́, и прія́сте вѣне́цъ побѣ́дныя по́чести отъ руки́ Госпо́дни, отъ нея́же и мы́ сію́ да воспріи́мемъ, моли́теся.

Блаже́нна земля́, напи́вшаяся кро́ве ва́шея, до́бліи исповѣ́дницы Христо́вы, блаже́нна пеще́ра, храня́щая мо́щи ва́ша, я́ко многоцѣ́нное сокро́вище, не подъ спу́домъ, но я́вѣ лежа́щія во гро́бѣ, въ не́мже су́ще тѣ́ломъ, душа́ми предстоите́ со а́нгельскими ли́ки, и на земли́ прого́ните ду́хи лука́выя, отъ ни́хже и на́съ сохрани́те, и моли́теся Христу́ Бо́гу спасти́ся душа́мъ на́шимъ.

Сла́ва, гла́съ 3:

Пріиди́те, восхва́лимъ, бра́тіе, достоблаже́нныя отцы́ на́ша, Васи́лія съ Ѳео́доромъ чу́днымъ, сíи бо, пе́рвѣе вся́каго пристра́стія отре́кшеся и въ безстра́стіе тща́щеся дости́гнути, о жи́зни се́й неради́ша, и сме́рть изво́лиша ра́ди Го́спода своего́ подъя́ти отъ сребролюби́ваго кня́зя, и, побѣди́теліе яви́вшеся, ра́тника и супоста́та врага́ побѣди́ша, и ны́нѣ сла́вою и че́стію вѣнча́ются отъ Вы́шняго Влады́ки, Его́же и мо́лятъ непреста́нно дарова́ти ми́ръ мíрови и душа́мъ на́шимъ ве́лію ми́лость.

И ны́нѣ, пра́здника или́ богоро́диченъ:

Наде́ждо мíру, Благослове́нная Дѣ́во, не забу́ди на́съ, пою́щихъ Тя́, но моли́ся вы́ну за непотре́бныя рабы́ Своя́, изба́витися на́мъ отъ вся́кихъ бѣ́дъ и обстоя́ній.

Славосло́віе вели́кое. [Ектеніи́.] И отпу́стъ.



НА ЛИТУРГІИ,
Слу́жба [пра́зднику и] преподобному́ченикомъ.

[Блаже́нна пра́здника, пѣ́снь 6-я, на 4, и преподобному́ченикомъ, пѣ́снь 6-я, на 4. Проки́менъ пра́здника, гла́съ 4: Яко возвели́чишася дѣла́ Твоя́, Го́споди, вся́ прему́дростію сотвори́лъ еси́. Сти́хъ: Благослови́, душе́ моя́, Го́спода, Го́споди Бо́же мо́й, возвели́чился еси́ зѣло́. И преподобному́ченикомъ, гла́съ 7: Восхва́лятся преподо́бніи во сла́вѣ и возра́дуются на ло́жахъ свои́хъ. Апо́столъ преподобному́ченикомъ, къ Ри́мляномъ, зача́ло 99. Аллилу́ія пра́здника, гла́съ 8: Твоя́ су́ть небеса́, и Твоя́ е́сть земля́. Сти́хъ: Блаже́ни лю́діе, вѣ́дущіи воскликнове́ніе, [Го́споди, во свѣ́тѣ лица́ Твоего́ по́йдутъ]. И преподобному́ченикомъ, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе Луки́, зача́ло 64. Прича́стенъ пра́здника: Го́споди, во свѣ́тѣ Лица́ Твоего́ по́йдемъ и о и́мени Твое́мъ возра́дуемся во вѣ́ки. И преподобному́ченикомъ: Ра́дуйтеся пра́ведніи о Го́сподѣ, пра́вымъ подоба́етъ похвала́.]

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 118 об. – 124 об.

/ Къ оглавленію раздѣла /


Наверхъ / Къ титульной страницѣ

0