Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 11-й де́нь.
Свята́го му́ченика и архидіа́кона Евпла.

[ВЕЧЕРЪ,]
На Го́споди воззва́хъ: стихи́ры пра́здника, гла́съ 1. Подо́бенъ: Небе́сныхъ чино́въ.

Пои́мь осо́бь Твоя́, Христе́, ученики́,* Петра́, Іа́кова и Іоа́нна,* во́лею на го́ру си́хъ возве́лъ еси́,* чу́до стра́шное показа́въ* и нестерпи́мое Боже́ственнаго прише́ствія Твоего́ издале́ча* присносу́щное благолѣ́піе.

Твоего́, Христе́, прише́ствія непостижи́маго* тре́петни бы́вше апо́столи дре́вле,* ни́цъ на зе́млю па́дше,* Боже́ственнѣй Твое́й дивля́хуся си́лѣ:* со́лнца просія́въ свѣ́тлѣе, Бла́же,* неизрече́нною си́лою Твое́ю.

Ины стихи́ры свята́го, гла́съ 4. Подо́бенъ: Да́лъ еси́ зна́меніе.

До́брѣ преше́лъ еси́* страда́нія пучи́ну,* благопла́вавъ, пребога́те, дыха́ніи Ду́ха,* и въ ти́хое приста́нище устреми́лся еси́ Ца́рствія Бо́жія,* въ не́мже болѣ́зней твои́хъ возме́здіе* бога́тно воспрія́лъ еси́* и со а́нгелы предстои́ши Влады́цѣ тва́ри,* вѣнцено́сче блаже́нне.

Въ порфи́ру, отъ кро́ве обагре́ну твоея́,* одѣ́янъ, сла́вне,* и побѣ́ды вѣнце́мъ* живонача́льною руко́ю увязе́нъ,* на небесѣ́хъ живе́ши,* сца́рствуя Всеще́дрому.* Тѣ́мже тя́ ублажа́емъ,* я́ко и́стинна му́ченика,* и Сло́ва служи́теля,* и вѣ́ры утвержде́ніе.

Евплъ чу́дный,* та́инъ служи́тель Влады́чнихъ бы́въ,* я́ко овча́ незло́биво, себе́ сама́го приведе́,* посѣ́ченъ бы́въ мече́мъ,* благово́нно приноше́ніе* и а́гня боже́ственное бы́въ.* Того́ у́бо ублажа́емъ,* свяще́нное его́ страда́ніе свяще́нно пра́зднующе,* мучениколю́бцы, дне́сь.

Сла́ва, и ны́нѣ, гла́съ то́йже:

Гора́, я́же, иногда́ мра́чна и ды́мна, ны́нѣ же честна́ и свята́ е́сть, на не́йже но́зѣ Твои́ стоя́стѣ, Го́споди, превѣ́чное бо сокрове́нное та́инство напослѣ́докъ явле́но сотвори́, стра́шное Твое́ преображе́ніе, Петру́, и Іоа́нну, и Іа́кову. Иже, такова́ сія́нія лица́ Твоего́ не терпя́ще и свѣ́тлости ри́зъ Твои́хъ, ни́цъ на лицѣ́ земли́ покрыва́хуся, и́же и у́жасомъ одержи́ми, дивля́хуся, ви́дяще Моисе́я и Илію́, глаго́люща съ Тобо́ю, хотя́щая приключи́тися Тебѣ́; и гла́съ отъ Отца́ свидѣ́тельствоваше, глаго́ля: Се́й е́сть Сы́нъ Мо́й возлю́бленный, о Не́мже благоизво́лихъ, Того́ послу́шайте, Иже и да́руетъ мíрови ве́лію ми́лость.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Естество́, е́же во Ада́мѣ,* Христо́съ обнови́ти хотя́,* на го́ру ны́нѣ* восхо́дитъ Ѳаво́рскую,* обнажа́я ученико́мъ Божество́.

Сти́хъ: Твоя́ су́ть небеса́,* и Твоя́ е́сть земля́.

Свѣ́тъ трисія́нный,* облиста́ неизрече́нно,* Боже́ственныя Твоея́ сла́вы,* на горѣ́ Ѳаво́рстѣй, Спа́се,* вся́ческая уясни́.

Сти́хъ: Ѳаво́ръ и Ермо́нъ* о и́мени Твое́мъ возра́дуетася.

Внеза́пу ученицы́,* премѣне́ніе ви́дѣвше оде́жды* и всего́ тѣлесе́ Твоего́, Сло́ве,* ни́цы па́дше,* поя́ху.

Сла́ва, и ны́нѣ, гла́съ 4:

На горѣ́ высо́цѣ преобра́жся, Спа́съ, верхо́вныя имѣ́я ученики́, пресла́вно облиста́лъ е́сть, показу́я, я́ко высото́ю добродѣ́телей облиста́вше и Боже́ственнѣй сла́вѣ сподо́бятся. Глаго́лющіи со Христо́мъ Моисе́й и Илія́ пока́зоваху, я́ко живы́ми и ме́ртвыми облада́етъ и и́же дре́вле зако́номъ и проро́ки глаго́лавый е́сть Бо́гъ, Ему́же и гла́съ Оте́чь изъ о́блака свѣ́тла послу́шествоваше, глаго́лющій: Того́ послу́шайте, Иже Кресто́мъ а́да плѣни́вша и ме́ртвымъ да́рующа живо́тъ вѣ́чный.

Тропа́рь, гла́съ 4:

Му́ченикъ Тво́й, Го́споди, Евплъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Сла́ва, и ны́нѣ, пра́здника, гла́съ 7:

Преобрази́лся еси́ на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.


НА УТРЕНИ,
По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

На горѣ́ Ѳаво́рстѣй преобрази́лся еси́, Бо́же, посреди́ Иліи́ и Моисе́я прему́дрыхъ, со Іа́ковомъ, и Си́мономъ, и Іоа́нномъ. Пе́тръ же, сы́й ту́, сія́ Тебѣ́ глаго́лаше: добро́ е́сть здѣ́ сотвори́ти три́ сѣ́ни: еди́ну Моисе́ю, и еди́ну Иліи́, и еди́ну Тебѣ́, Влады́цѣ Христу́. Иже тогда́ си́мъ свѣ́тъ Тво́й возсія́вый, просвѣти́ ду́ши на́ша.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ то́йже. Подо́бенъ: Яви́лся еси́.

Пра́здникъ пресвѣ́телъ Влады́чень пріи́де, пріиди́те вси́, на го́ру, у́мно предочи́стившеся, взы́демъ Ѳаво́рскую, Христа́ ви́дѣти.

Сла́ва, и ны́нѣ, то́йже.

Кано́нъ пра́здника со ирмосо́мъ на 8. Творе́ніе ки́ръ Космы́, гла́съ 4.
Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Глаго́лы живо́тныя друго́мъ Христо́съ и о Боже́ственнѣмъ наказу́я Ца́рствіи, рече́: во Мнѣ́ Отца́ позна́йте; свѣ́томъ я́ко облиста́я непристу́пнымъ, въ ра́дости пою́ще: пои́мъ Бо́гу на́шему, я́ко просла́вися.

Си́лою язы́къ облече́теся, дру́зи ученицы́, чу́дни же бу́дете въ бога́тствѣ и́хъ, я́ко сла́вы напо́лнитеся, я́ко явлю́ся свѣтлѣ́е со́лнца, облиста́я въ ра́дости пою́щихъ: пои́мъ Бо́гу на́шему, я́ко просла́вися.

Дне́сь Христо́съ, на горѣ́ Ѳаво́рстѣй просія́въ я́сно Боже́ственною заре́ю, я́коже обѣща́ся, ученико́мъ обнажи́ зра́къ, свѣтоно́сныя же напо́лнишеся Боже́ственныя зари́, въ ра́дости поя́ху: пои́мъ Бо́гу на́шему, я́ко просла́вися.

Инъ кано́нъ свята́го на 4, его́же краегране́сіе: Сла́внаго Евпла благоче́стно восхваля́ю. Творе́ніе Іо́сифово, гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Ору́жіемъ Креста́ до́брѣ преплы́въ, вше́лъ еси́ въ приста́нище жи́зни, въ не́мже ра́достно водворя́яся, сла́вне, уста́ви се́рдца моего́ многомяте́жное волне́ніе, ти́хо сла́вити па́мять твою́.

Всесвѣ́тлая звѣзда́, добродѣ́тельными уче́ніи озаря́я вѣ́рныя, возсія́лъ еси́, му́дре, честнѣ́й тве́рди, Евпле, церко́внѣй и мра́къ отгна́лъ еси́ де́монскій си́лою духо́вною.

Вжиля́емь, му́дре, Боже́ственною си́лою, дерзнове́ннымъ по́мысломъ, Бо́га, отъ Бо́га рожде́ннаго, проповѣ́далъ еси́, распя́тіе во́лею претерпѣ́вшаго и сме́ртію сме́рть разо́ршаго.

Да подви́жатся къ твоему́ хвале́нію вся́ка уста́, я́ко изъ у́стъ вра́жіихъ Боже́ственными уче́ніи, богоно́се, исхи́тилъ еси́, вся́, благопоко́рно пріе́мшія словеса́ твоя́, страстоно́сче Христо́въ до́блественне.

Богоро́диченъ: Уясни́въ Твою́ Христо́съ утро́бу свѣтоно́сную сни́тіемъ стра́шнымъ, я́ко со́лнце, Чи́стая, су́щимъ въ мíрѣ возсія́, рѣша́ многобо́жія мглу́ те́мную и просвѣща́я мíра концы́.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Во всего́ Ада́ма обле́кся, Христе́, очернѣ́вшее, измѣни́въ, просвѣти́лъ еси́ дре́вле естество́ и измѣне́ніемъ зра́ка Твоего́ богосодѣ́лалъ еси́.

Столпо́мъ огнезра́чнымъ и о́блакомъ дре́вле, Иже въ пусты́ни Изра́иля веды́й, дне́сь на горѣ́ Ѳаво́рстѣй, неизрече́нно во свѣ́тѣ Христо́съ просія́.

Инъ.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Себе́ сама́го изда́лъ еси́, я́ко а́гнецъ, во́лею закла́тися хотя́ за Христа́, тебе́ ра́ди во́лею обнища́вшаго и закла́вшася, Евпле всеблаже́нне.

Заколе́ніе непоро́чно, благово́нна же́ртва и приноше́ніе соверше́нно прине́слся еси́ Бо́гу, ра́достно, блаже́нне, вопія́: Свя́тъ еси́, Го́споди.

Зако́ны утвержда́емь ева́нгельскими, богому́дре, посреди́ муже́й беззако́нныхъ предста́лъ еси́, зовы́й я́вѣ: не и́щущимъ обрѣто́хся, обличи́ти си́хъ злоче́стіе.

Богоро́диченъ: Бо́гъ, посреди́ Тебе́ всели́вся, ника́ко дѣ́вства Твоего́ ключа́ поколеба́, Чи́стая, Его́же прилѣ́жно моли́, утверди́ти вся́, пою́щія Тя́.

Конда́къ свята́го, гла́съ 1. Подо́бенъ: Ли́къ а́нгельскій.

Зако́ны Христо́вы въ руку́ обнося́, предста́лъ еси́, вопія́ враго́мъ, въ по́двизѣ: самозва́нъ е́смь страда́льчествовати твердѣ́йши. Тѣ́мже, приклони́въ ра́достно вы́ю твою́, подъя́лъ еси́ усѣче́ніе мече́мъ, сконча́вый тече́ніе твое́.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Ору́жіемъ Креста́ до́брѣ преплы́въ, вше́лъ еси́ въ приста́нище ти́хо небе́сныхъ жили́щъ, въ не́мже водворя́яся, творя́щимъ твою́ па́мять моле́бную твои́хъ по́двигъ дне́сь, моли́ся Зижди́телю, изба́витися отъ вся́кія ну́жды и скорбе́й.

Сла́ва, и ны́нѣ, пра́здника, гла́съ то́йже. Подо́бенъ: Удиви́ся Іо́сифъ.

Непристу́пною Твое́ю, Христе́, сла́вою Боже́ственнаго Твоего́ Свѣ́та преобра́жся, Твоя́ облиста́лъ еси́ боже́ственныя ученики́, Іоа́нна, и Петра́, и Іа́кова, ужаси́лъ еси́ тѣ́хъ Боже́ственною благода́тію. Гла́съ же Оте́чь, возлю́бленнаго Сы́на свидѣ́тельствующь, слы́шаша и ви́дѣша лица́ Твоего́ сла́ву, Спа́се. Иже всѣ́хъ, Сло́ве, спасти́ хотя́, просвѣти́ ду́ши на́ша.

Пѣ́снь 4.

Ирмо́съ: Услы́шахъ сла́вное смотре́ніе Твое́, Христе́ Бо́же, я́ко роди́лся еси́ отъ Дѣ́вы, да отъ ле́сти изба́виши зову́щія: сла́ва си́лѣ Твое́й, Го́споди.

Зако́нъ въ Сина́и писа́ніемъ вообража́я, Христе́ Бо́же, во о́блацѣ, и огни́, и мра́цѣ, и въ ви́хрѣ яви́лся еси́ носи́мь: сла́ва си́лѣ Твое́й, Го́споди.

Да увѣ́риши сла́вное строе́ніе Твое́, Христе́ Бо́же, я́ко Сы́й пре́жде вѣ́къ и То́йже на о́блацѣ восхожде́ніе положи́вый, на Ѳаво́рѣ неизрече́нно просія́лъ еси́.

Соглаго́люще, предстоя́ху раболѣ́пно Тебѣ́, Влады́цѣ Христу́, къ ни́мже па́рою огня́ и мра́ка, и то́нкимъ хла́домъ бесѣ́довалъ еси́: сла́ва си́лѣ Твое́й, Го́споди.

Возвѣща́ху сла́вное Креста́ ра́ди Твоего́, на Ѳаво́ръ прише́дше, и́же во огни́ Тя́ и купинѣ́ дре́вле предви́дѣвый Моисе́й, и взя́тый на колесни́цѣ о́гненней Илія́, Христе́.

Инъ.

Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Хра́мъ одушевле́нъ Тро́ицы Пресвяты́я я́ко вои́стинну яви́лся еси́ и хра́мы и́дольскія, Евпле, низложи́лъ еси́ ору́жіемъ вѣ́ры.

Наслажда́яся добро́тою Боже́ственною, Евпле, ра́ны, и болѣ́зни, и вся́кія му́ки, блаже́нне, преоби́дѣлъ еси́ и, ра́дуяся, пострада́лъ еси́.

Высокому́дренное се́рдце Паламнíово, смири́вся, богому́дре, смири́лъ еси́, му́чениче, и къ Возне́сшему человѣ́ки возше́лъ еси́.

Распаля́емь ре́вностію Влады́ки, вся́ку ле́сть, му́чениче, запали́лъ еси́ вои́стинну и къ муче́нію усе́рдно отлучи́лся еси́.

Богоро́диченъ: Мо́лятъ бога́тіи лю́діе Твои́ Тя́ ро́ждшую Отрокови́цу, обогати́вшаго всѣ́хъ Боже́ственными разумѣ́ніи, Христа́ Бо́га на́шего.

Пѣ́снь 5.

Ирмо́съ: Отъ свѣ́та пресѣкíй перворо́дный свѣ́тъ, я́ко во свѣ́тѣ дѣла́ пою́тъ Тя́, Христе́, Содѣ́теля, во свѣ́тѣ Твое́мъ пути́ на́ша напра́ви.

Предъ лице́мъ Твои́мъ го́ры уклони́шася, свѣ́тъ бо и предъ нога́ми, неботе́чныя лучи, Христе́, со́лнца пріи́де, зра́къ зе́мленъ я́ко прія́ти благоволи́лъ еси́.

Се́ Спа́съ, — вопія́ху Моисе́й и Илія́, ученико́мъ на горѣ́ святѣ́й Ѳаво́рстѣй оглаша́емымъ, — Христо́съ, Его́же дре́вле провозвѣсти́хомъ Су́щаго Бо́га.

Неизмѣ́нное естество́, человѣ́ческому примѣ́шся, оби́льно невеще́ственнаго Божества́ свѣ́тъ изобнажи́въ апо́столомъ, неизрече́нно возсія́.

Тя́, присносу́щное сія́ніе, во Оте́честѣй сла́вѣ ученицы́ я́ко ви́дѣвше возсія́вша, Христе́, Тебѣ́ вопія́ху: во свѣ́тѣ Твое́мъ пути́ на́ша напра́ви.

Инъ.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Ве́сь манове́ніи Боже́ственными просвѣ́щся и му́жествомъ укрѣ́плься, я́ко ле́въ изря́денъ, ты́ къ суди́щу, надѣ́яся, поте́клъ еси́, злоче́стіе побѣжда́я.

Дае́тъ тебѣ́ безпеча́льную жи́знь Изба́витель, за Него́же сме́рть го́рькую, страстоно́сче сла́вне, претерпѣ́вшему, и съ ли́ки причита́етъ тя́ му́ченикъ до́бльствовавша.

Преклони́лъ еси́ вы́ю твою́ усе́рднымъ по́мысломъ и, во главу́ усѣ́ченъ, Христу́ яснѣ́е и чистѣ́е прибли́жился еси́, преподо́бне, наслажда́яся обоже́нія.

Богоро́диченъ: Вы́шши яви́лася еси́ а́нгелъ вои́стинну, а́нгеловъ Творца́ па́че ума́ ро́ждши, просла́вльшаго святы́я му́ченики, Пресвята́я Ма́ти Дѣ́во.

Пѣ́снь 6.

Ирмо́съ: Внегда́ скорбѣ́ти ми́, возопи́хъ ко Го́споду, и услы́ша мя́ Бо́гъ спасе́нія моего́.

Сія́нія па́че со́лнца Свѣ́тъ яснѣ́йшій, Спа́съ, просія́ на Ѳаво́рѣ, на́съ просвѣти́лъ е́сть.

Возше́дъ на го́ру Ѳаво́рскую, преобрази́лся еси́, Христе́, и ле́сть всю́ омрачи́въ, на́съ просвѣти́лъ еси́.

Тя́ Бо́га позна́вше сла́вніи апо́столи, на Ѳаво́рѣ же, Христе́, уди́вльшеся, колѣ́на преклони́ша.

Инъ.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Точа́ кро́вь, предста́лъ еси́ твоему́ Подвигополо́жнику, до́блій Евпле богому́дре, и отъ Него́ вѣнцы́ прія́лъ еси́ побѣ́ды, ра́дуяся.

Ста́лъ еси́ предъ суди́щемъ му́жески, Влады́чнія зако́ны рука́ми твои́ми, Евпле, держа́ и я́вственно беззако́нныя, преподо́бне, облича́я усе́рдно.

Му́къ мно́жества не убоя́вся, ни ужа́сся меча́, и́стину ты́ на суди́щи мучи́телей благоче́стно проповѣ́далъ еси́ и ле́сть умертви́лъ еси́.

Богоро́диченъ: О, чу́до пресла́вно! Ка́ко ражда́еши, иску́са му́жеска не позна́вши? Ка́ко же пита́еши, Дѣ́во Ма́ти, Пода́теля вои́стинну млека́ и Пита́теля всея́ тва́ри?

Конда́къ пра́здника, гла́съ 7:

На горѣ́ преобрази́лся еси́, и я́коже вмѣща́ху ученицы́ Твои́, сла́ву Твою́, Христе́ Бо́же, ви́дѣша, да егда́ Тя́ у́зрятъ распина́ема, страда́ніе у́бо уразумѣ́ютъ во́льное, мíрови же проповѣ́дятъ, я́ко Ты́ еси́ вои́стинну Отчее сія́ніе.

Икосъ:

Воста́ните, лѣни́віи, и́же всегда́ ни́зу пони́кшіи въ зе́млю, души́ моея́ по́мыслы, возми́теся и возвы́ситеся на высоту́ Боже́ственнаго восхожде́нія. Притеце́мъ къ Петру́ и къ Зеведе́евымъ и вку́пѣ со о́нѣми Ѳаво́рскую го́ру дости́гнемъ, да ви́димъ съ ни́ми сла́ву Бо́га на́шего, гла́съ же услы́шимъ, его́же свы́ше слы́шаша и проповѣ́даша Отчее сія́ніе.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Облиста́вшеся свѣ́томъ непристу́пныя сла́вы, на Ѳаво́рстѣй горѣ́ апо́столи, Христу́ вопія́ху: оте́цъ на́шихъ Бо́же, благослове́нъ еси́.

Сія́ніемъ Боже́ственнаго шу́ма, и росода́тельнымъ о́блакомъ, Христе́, и заре́ю Твое́ю наслажда́еми, апо́столи поя́ху: оте́цъ на́шихъ Бо́же, благослове́нъ еси́.

Въ непристу́пномъ свѣ́тѣ, я́ко ви́дѣ Тя́ Пе́тръ, на Ѳаво́рстѣй горѣ́ облиста́вша, Христе́, возопи́: оте́цъ на́шихъ Бо́же, благослове́нъ еси́.

Съ нача́льникомъ жи́зни Христо́мъ су́ще, дѣ́ти Зеведе́евы, я́ко испусти́ зра́ка свѣ́тъ, возгремѣ́ша: оте́цъ на́шихъ Бо́же, благослове́нъ еси́.

Инъ.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Ка́плющи твоя́ кро́вь на зе́млю, угаси́ о́гнь пре́лести, всеблаже́нне, Христо́ву же Це́рковь бога́тно напои́ла е́сть, благоче́стно воспѣва́ющую тя́.

Имѣ́я му́дрость крѣ́пку и непоколеби́мь по́мыслъ, пре́лесть потря́слъ еси́ и предстоя́щія лжи́ нело́жными обличи́лъ еси́ уче́ніи, Евпле всему́дре.

Две́рь тебѣ́ ра́йская, Евпле, му́чениче Христо́въ, отве́рзеся, блаже́нне, укра́шена ви́дѣвши боже́ственнымъ страда́ніемъ и побѣ́днымъ вѣнце́мъ.

Углемъ Боже́ственнымъ очи́стивъ, му́чениче, ду́шу, у́гліе погаси́лъ еси́ многобо́жія, зовы́й: благослове́нъ еси́, Го́споди, Бо́же оте́цъ на́шихъ.

Богоро́диченъ: Твою́ боже́ственную утро́бу пе́щь пе́рсская вообрази́, Пренепоро́чная, спаса́етъ ю́ноши неопа́льны, взыва́ющи: Го́споди, Бо́же оте́цъ на́шихъ, благослове́нъ еси́.

Пѣ́снь 8.

Ирмо́съ: Въ Вавило́нѣ о́троцы, боже́ственною распала́еми ре́вностію, мучи́теля и пла́мене преще́ніе му́жески попра́ша, и посредѣ́ огня́ вве́ржени, ороша́еми, поя́ху: благослови́те, вся́ дѣла́ Госпо́дня, Го́спода.

Манове́ніемъ вся́ нося́й, нога́ми пречи́стыми на го́ру взы́де Ѳаво́рскую Христо́съ, на не́йже па́че со́лнечныя лучи́ облиста́ лице́мъ, и́же зако́ну старѣ́йшія и благода́ти, показа́ пою́щія: благослови́те, вся́ дѣла́ Госпо́дня, Го́спода.

Непристу́пною сла́вою на горѣ́ я́влься неизрече́нно Ѳаво́рстѣй, неодержи́мый и незаходи́мый Свѣ́тъ, Отчее сія́ніе, тва́рь уясни́въ, человѣ́ки обожи́, пою́щія: благослови́те, вся́ дѣла́ Госпо́дня, Го́спода.

Священнолѣ́пно стоя́ще Моисе́й же и Илія́ на горѣ́ Ѳаво́рѣ, Боже́ственныя начерта́ніе я́сно ѵпоста́си ви́дѣвше, Христа́ во Оте́честѣй облиста́вша сла́вѣ, воспѣва́ху: благослови́те, вся́ дѣла́ Госпо́дня, Го́спода.

Иже во зра́цѣ Боже́ственнаго ра́ди явле́нія, лице́ просла́вися иногда́ Моисе́ово, Христо́съ же, я́ко ри́зою, свѣ́томъ и сла́вою одѣва́ется, свѣ́та бо самодѣ́теленъ Сы́й, озаря́етъ пою́щія: благослови́те, вся́ дѣла́ Госпо́дня, Го́спода.

Отъ свѣторо́дна о́блака, Христа́ ученицы́ объя́та зря́ще на Ѳаво́рѣ и ни́цы на зе́млю па́дше, у́мъ просвѣ́щше, со Отце́мъ Сего́ поя́ху и Ду́хомъ: благослови́те, вся́ дѣла́ Госпо́дня, Го́спода.

Инъ.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Неду́говъ вся́ческихъ очище́ніе и духо́въ лю́тыхъ прогоне́ніе твоя́ су́ть мо́щи, я́же обступи́вше, вопіе́мъ: благослови́те, вся́ дѣла́ Госпо́дня, Го́спода.

О тебѣ́ вѣ́рныхъ собо́ръ возра́довася, ко Христу́ тя́ хода́тая стяжа́въ, и моли́твенника те́пла, и предста́теля, всеблаже́нне Евпле діа́коне, святы́хъ а́нгелъ собесѣ́дниче.

Соше́дшеся, почерпи́те, человѣ́цы, неду́говъ разли́чныхъ исцѣле́ніе отъ ра́ки му́ченика и возопíйте вѣ́рою: благослови́те, вся́ дѣла́ Госпо́дня, Го́спода.

Богоро́диченъ: Украси́ся, Чи́стая Всенепоро́чная, па́че вся́каго а́нгельскаго благолѣ́пія, Творца́ ро́ждши человѣ́ковъ и а́нгеловъ. Ему́же пое́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Ужа́сни но́вымъ свѣтоли́тіемъ внеза́пу ученицы́ освѣ́щшеся, дру́гъ дру́га зря́ху, уди́вльшеся же и къ земли́ прекло́ншеся, Тебѣ́, Влады́цѣ всѣ́хъ, поклони́шася.

Шу́мъ изъ о́блака посыла́шеся богогла́сенъ, извѣству́я чу́до: Оте́цъ бо свѣ́товъ, — Се́й е́сть Сы́нъ Мо́й возлю́бленный, — апо́столомъ вопія́ше: Того́ послу́шайте.

Но́вая ви́дѣвше и пресла́вная, гла́съ Оте́ческій внуши́вше, на Ѳаво́рѣ Словесе́ слуги́, изображе́ніе Первообра́знаго, Се́й е́сть, — вопія́ху, — Спа́съ на́шъ.

Образе непремѣ́нный Су́щаго, недви́жиме, печа́ть неизмѣ́нна, Сы́не, Сло́ве, му́дросте и мы́шце, десни́це Вы́шняго, Си́ло, Тя́ воспѣва́емъ со Отце́мъ же и Ду́хомъ.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Ви́дѣти сподо́бився вои́стинну, пребога́те, да́льняя, тебѣ́ жела́емое стяжа́лъ еси́ жела́ніе, я́ко дости́гъ са́мое жела́нныхъ соверше́ніе, жела́нія твоего́ я́вѣ прехо́дъ, Евпле, діа́коне досточу́дне.

Яко ски́петръ, держа́ Кре́стъ, блаже́нне, руко́ю твое́ю, багряни́цу, ю́же отъ крове́й свяще́нныхъ твои́хъ омочи́лъ еси́, свѣ́тло обложе́нъ, Христу́ Царю́ ны́нѣ предстои́ши, Евпле, діа́коне досточу́дне.

Дне́сь Ката́ніи честна́я митропо́лія, храни́теля тоя́ изря́дна тя́ стяжа́вши, пра́зднуетъ, боже́ственное соверша́ющи твое́ страда́ніе, со всѣ́ми епа́рхіями и гра́ды, ю́же снабди́ши твои́ми мольба́ми.

Со́лнце всесвѣ́тло я́вѣ бы́лъ еси́ и къ сія́нію пресели́лся еси́, му́чениче, Боже́ственному, прича́стіемъ обожа́емь Боже́ственнымъ, блаже́нне, и ны́нѣ просвѣща́еши пою́щія твое́ свѣтоно́сное страда́ніе.

Богоро́диченъ: Свѣ́та луча́ми, е́же въ Тебѣ́, Богоневѣ́сто, ду́шу мою́ просвѣти́, лежа́щую въ ро́вѣ поги́бели возста́ви, враги́ разража́ющи, оскорбля́ющія при́сно се́рдце мое́ и къ страсте́мъ порѣва́ющія мя́.

Свѣти́ленъ пра́здника:

Свѣ́те неизмѣ́нный Сло́ве, Свѣ́та Отца́ нерожде́нна, въ явле́ннѣмъ свѣ́тѣ Твое́мъ, дне́сь на Ѳаво́рѣ свѣ́тъ ви́дѣхомъ Отца́, свѣ́тъ и Ду́ха, свѣ́томъ наставля́ющаго всю́ тва́рь.

Сла́ва, и ны́нѣ, то́йже.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ра́дуется тро́ица* боже́ственныхъ апо́столъ,* я́же Тро́ицы ви́дѣ,* по существу́ Еди́наго,* на горѣ́ Ѳаво́рстѣй.

Сти́хъ: Твоя́ су́ть небеса́,* и Твоя́ е́сть земля́.

Бла́гоже тебѣ́, Ѳаво́ре,* и́же пе́рвѣе мра́чный:* Свѣ́та бо сподо́бился еси́,* не чу́вственнаго со́лнца,* но вы́шнія свѣ́тлости.

Сти́хъ: Ѳаво́ръ и Ермо́нъ* о и́мени Твое́мъ возра́дуетася.

Свѣ́томъ у́бо* Твоего́ лица́ осія́вшеся,* ученицы́ Твои́, Спа́се,* не терпя́ще зари́,* на зе́млю внеза́пу падо́ша.

Сла́ва, и ны́нѣ, гла́съ и подо́бенъ то́йже:

Гла́съ же Оте́чь* съ небесе́ слы́шанъ бы́сть:* Се́й е́сть, — вопію́щій, —* Сы́нъ возлю́бленный Мо́й,* Того́ вси́ послу́шайте.


НА ЛИТУРГІИ,

Блаже́нна пра́здника, пѣ́снь 6-я, обои́хъ кано́новъ, со ирмосо́мъ на 6.

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 113 – 119 об.

/ Къ оглавленію раздѣла /


Наверхъ / Къ титульной страницѣ

0