Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 10-й де́нь.
Свята́го му́ченика и архидіа́кона Лавре́нтія.

[ВЕЧЕРЪ,]
На Го́споди воззва́хъ: стихи́ры пра́здника, гла́съ 4. Подо́бенъ: Да́лъ еси́ зна́меніе.

Дне́сь ра́дуются небе́сніи а́нгели,* съ человѣ́ки пра́зднующе, Христе́,* Твое́ сла́вное блиста́ніе* и зрѣ́ніе, е́же на Ѳаво́рѣ,* на не́мже предста́вилъ еси́ Моисе́я и Илію́,* Христе́ Человѣколю́бче,* и Петра́, и Іа́кова, и Іоа́нна, пою́щія Тя́:* Іису́се Всеси́льне,* Спа́се ду́шъ на́шихъ.

Ве́сь ны́нѣ мíрный* и премíрный соста́въ* да подви́жется къ похвале́нію Христа́ Бо́га на́шего,* ме́ртвыми и живы́ми облада́ющаго:* боголѣ́пно бо преобразу́ющся,* Себѣ́ предста́ви зако́на и благода́ти* первостоя́тели и проповѣ́дники на Ѳаво́рѣ,* я́коже благоизво́ли,* Спа́съ ду́шъ на́шихъ.

Ины стихи́ры свята́го, гла́съ 1. Подо́бенъ: Небе́сныхъ чино́въ.

Послужи́въ Сло́ву непоро́чно, преподо́бне,* огне́мъ веще́ственнымъ благово́нна же́ртва* Го́сподеви прине́слся еси́* и ра́дости небе́сныя сподо́бился еси́,* о на́съ моля́ всегда́,* чту́щихъ тя́, Лавре́нтіе.

Возложи́въ себе́ Го́сподеви, я́коже сокро́вище,* и повину́яся словесе́мъ Его́, богоблаже́нне,* раздѣли́лъ еси́ бога́тно, му́чениче му́дре,* ни́щимъ бога́тство некра́домое,* муче́нія му́дро и чу́дно* себѣ́ притворя́я.

Добро́та му́чениковъ,* сла́вный и чу́дный ору́жникъ,* чуде́съ исто́чникъ,* наси́луемыхъ помо́щникъ,* звѣзда́ многосвѣ́тлая,* свяще́нный му́ченикъ,* свѣ́тло да восхва́лится ны́нѣ Лавре́нтій.

Сла́ва, и ны́нѣ, гла́съ 4. Самогла́сенъ:

Пре́жде Креста́ Твоего́, Го́споди, гора́ небеси́ подо́бящися, и о́блакъ, я́ко сѣ́нь, протяза́шеся, Тебѣ́ преобразу́ющуся, отъ Отца́ же свидѣ́тельствуему: та́мо бѣ́ Пе́тръ со Іа́ковомъ и Іоа́нномъ, я́ко хотя́ху бы́ти съ Тобо́ю и во вре́мя преда́нія Твоего́, да, ви́дѣвше чудеса́ Твоя́, не устраша́тся страда́ній Твои́хъ, и́мже поклони́тися на́мъ въ ми́рѣ сподо́би, вели́кія ра́ди Твоея́ ми́лости.

На стихо́внѣ стихи́ры, гла́съ 2. Самогла́сенъ. Подо́бенъ: До́ме Евфра́ѳовъ.

Показа́ неизрече́нно Госпо́дь* сла́ву Божества́* на горѣ́ Ѳаво́рстѣй* ны́нѣ ученико́мъ,* и́мже восхотѣ́.

Сти́хъ: Твоя́ су́ть небеса́,* и Твоя́ е́сть земля́.

Пріиди́те,* со ученики́ притеце́мъ вси́* на высоту́ добродѣ́телей,* я́ко да сподо́бимся* съ си́ми и благода́ти.

Сти́хъ: Ѳаво́ръ и Ермо́нъ* о и́мени Твое́мъ возра́дуетася.

Вси́ земноро́дніи,* очи́стимъ сердца́,* я́ко да а́біе* пріи́детъ и къ на́мъ сла́ва* Трисо́лнечныя благода́ти.

Сла́ва, и ны́нѣ, гла́съ 4. Самогла́сенъ:

Пре́жде Креста́ Твоего́, Го́споди, пои́мь ученики́ на го́ру высо́ку, преобрази́лся еси́ предъ ни́ми, луче́ю си́лы озаря́я и́хъ, отсю́ду у́бо человѣколю́біемъ, отону́ду вла́стію, показа́ти хотя́ воскресе́нія свѣ́тлость, его́же и на́съ, Бо́же, въ ми́рѣ сподо́би, я́ко Ми́лостивъ и Человѣколю́бецъ.

Тропа́рь, гла́съ 4:

Му́ченикъ Тво́й, Го́споди, Лавре́нтій во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Сла́ва, и ны́нѣ, пра́здника, гла́съ 7:

Преобрази́лся еси́ на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.


НА УТРЕНИ,
По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

На горѣ́ Ѳаво́рстѣй преобразу́яся, Спа́се, лу́чшимъ ученико́мъ показа́лъ еси́ сла́ву Твою́, Христе́, неизмѣ́нное облиста́лъ еси́ Божества́. Облакъ же свѣ́телъ созва́въ Илію́ и Моисе́я, глаго́люща съ Тобо́ю. Тѣ́мже и Пе́тръ глаго́лаше: Ще́дре, добро́ е́сть здѣ́ бы́ти съ Тобо́ю. Иже тогда́ си́мъ Свѣ́тъ Тво́й возсія́вый, просвѣти́ ду́ши на́ша.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ и подо́бенъ то́йже:

Непристу́пною Твое́ю, Христе́, сла́вою Боже́ственнаго Твоего́ Свѣ́та преобра́жся, Твоя́ облиста́лъ еси́ боже́ственныя ученики́, Іоа́нна, и Петра́, и Іа́кова, ужаси́лъ еси́ тѣ́хъ Боже́ственною благода́тію. Гла́съ же Оте́чь, возлю́бленнаго Сы́на свидѣ́тельствующь, слы́шаша и ви́дѣша лица́ Твоего́ сла́ву, Спа́се. Иже всѣ́хъ, Сло́ве, спасти́ хотя́, просвѣти́ ду́ши на́ша.

Сла́ва, и ны́нѣ, то́йже.

Кано́нъ пра́здника со ирмосо́мъ на 8, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Моисе́й, на мо́рѣ проро́чески ви́дѣвъ о́блакомъ и столпо́мъ дре́вле о́гненнымъ сла́ву Госпо́дню, вопія́ше: Изба́вителю и Бо́гу на́шему пои́мъ.

Яко ка́менемъ, тѣ́ломъ покры́вся, обоже́ніемъ Неви́димаго зря́, Моисе́й богови́децъ взыва́ше: Изба́вителю и Бо́гу на́шему пои́мъ.

Ты́ на горѣ́ зако́ннѣй и на Ѳаво́рстѣй ви́дѣнъ бы́лъ еси́ Моисе́емъ во мра́цѣ дре́вле, во свѣ́тѣ же ны́нѣ непристу́пнѣмъ Божества́.

Инъ кано́нъ свята́го, на 4, его́же краегране́сіе: Лавре́нтія держа́внаго пою́ прему́дрѣ. Гла́съ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Въ цвѣ́тницѣ сла́дости, я́ко Христо́въ во́инъ, досто́йно наслажда́яся и а́нгельскимъ сликовству́яй си́ламъ, сія́ніе ми́ свѣтоно́сное дарова́ти моли́, воспѣва́ющу тя́, блаже́нне Лавре́нтіе.

Въ по́двиги вше́дъ честна́го муче́нія, побѣдоно́сный страда́лецъ тве́рдостію души́ показа́лся еси́, Лавре́нтіе, вѣнце́мъ пра́вды благолѣ́пно одѣ́явся и діади́мою побѣ́ды.

Сы́нъ я́ко бы́въ свѣ́та и дне́, пресла́вно отъ за́падъ, я́ко со́лнце на́мъ чу́вственно, возсія́лъ еси́, заре́ю пресвѣ́тлою озаря́я концы́, всесла́вный му́чениче Лавре́нтіе.

Богоро́диченъ: Изба́вльшеся честны́мъ рождество́мъ Твои́мъ, Дѣ́во, а́дскихъ и тлѣ́нныхъ у́зъ и зако́ннаго осужде́нія, Пречи́стая, — ра́дуйся, Обра́дованная, — благода́рно вопіе́мъ Ти́, — спаси́тельная две́ре благода́ти.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Осѣня́ющая сла́ва въ сѣ́ни пе́рвѣе и Моисе́еви бесѣ́дующи, Твоему́ уго́днику, о́бразъ бы́сть облиста́вшаго неизрече́нно на Ѳаво́рѣ, Влады́ко, Твоего́ преображе́нія.

Совзыдо́ша Ти́, Сло́ве Единоро́дный, вы́шніи апо́стольстіи верси́ на го́ру Ѳаво́рскую, и сопредста́ша Ти́ Моисе́й же и Илія́, я́ко Бо́жія слуги́, Еди́не Человѣколю́бче.

Бо́гъ Сло́во сы́й, ве́сь зе́мленъ бы́сть, всему́ Божеству́ смѣси́въ человѣ́чество во ѵпоста́си Свое́й, ю́же во двою́ существу́ Моисе́й и Илія́ же ви́дѣша на горѣ́ Ѳаво́рѣ.

Инъ.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Имѣ́яй Креста́ побѣ́ду, къ сопротивобо́рцемъ до́блественнѣ ополчи́лся еси́ и побѣ́ды вѣнцено́сецъ яви́лся еси́, досточу́дне.

Зако́номъ Христо́вымъ огражде́нъ, законоположе́нію злочести́выхъ, я́ко непобѣди́мь, сопроти́вился еси́ до́блимъ терпѣ́ніемъ, всеблаже́нне.

Си́лою Бо́жіею укрѣпля́емь, многобо́жія не́мощь разори́лъ еси́, Христо́во же превѣ́чное уясни́лъ еси́ Божество́.

Богоро́диченъ: Ра́венъ Отцу́ и Ду́ху естество́мъ, и существо́мъ, и Божество́мъ бы́сть, человѣ́комъ ра́вно Сло́во, вопло́щшееся отъ Тебе́, Всенепоро́чная.

Конда́къ, гла́съ 2. Подо́бенъ: Вы́шнихъ ища́.

Огне́мъ Боже́ственнымъ распали́въ се́рдце твое́, о́гнь страсте́й до конца́ испепели́лъ еси́, страда́льцевъ утвержде́ніе, богоно́се му́чениче Лавре́нтіе, и въ страда́ніихъ вопія́лъ еси́ вѣ́рно: ничто́же мя́ разлучи́тъ любве́ Христо́вы.

Икосъ:

Возсія́вшаго, я́ко свѣти́ло неле́стное, въ мíрѣ, соше́дшеся, вѣ́рніи вси́, пѣ́сньми почти́мъ Лавре́нтія страстоте́рпца, я́ко таи́нника неизрече́нныхъ, того́ [бо] моли́твами избавля́емся лю́тыхъ прегрѣше́ній. Сердца́ очи́стивше, просла́вимъ Христа́, того́ прославля́ющаго, крѣ́пка въ страда́ніи, и глаго́люща: ничто́же мя́ разлучи́тъ отъ любве́ Христо́вы. Сѣда́ленъ, гла́съ 8. Подо́бенъ: Прему́дрости.

Небе́сное бога́тство собра́въ и ни́щимъ сіе́ прине́съ, расточи́лъ еси́, да́лъ еси́ а́лчущимъ хлѣ́бъ тво́й и, си́мъ стяжа́въ жи́знь нетлѣ́нную, во Христо́вѣ исповѣ́даніи просія́лъ еси́, сла́вне. Тѣ́мже, му́жествовавъ и зако́нно пострада́въ, вѣне́цъ прія́лъ еси́ отъ Бо́га трудо́въ твои́хъ, страстоно́сче Лавре́нтіе. Моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, гла́съ то́йже. Подо́бенъ: Повелѣ́нное.

Сокрове́нную мо́лнію подъ пло́тію существа́ Твоего́, Христе́, и Боже́ственнаго благолѣ́пія на святѣ́й показа́лъ еси́ горѣ́, Благодѣ́телю, просія́въ су́щимъ съ Тобо́ю ученико́мъ, и, разумѣ́вше нестерпи́му су́щу сла́ву Твою́, — Свя́тъ еси́, — возопи́ша, я́ко непристу́пенъ сы́й, ви́дѣнъ бы́лъ еси́ пло́тію мíрови, Еди́не Человѣколю́бче.

Пѣ́снь 4.

Ирмо́съ: Изъ пло́ти Твоея́ лучи́ Божества́ исхожда́ху проро́комъ и апо́столомъ. Тѣ́мъ нача́льницы, пою́ще, взыва́ху: сла́ва си́лѣ Твое́й, Го́споди.

Иже купину́ сохрани́вый неврежде́ну, прикосну́вшуюся огню́, Моисе́ю богосія́нную пло́ть показа́лъ еси́, Влады́ко, пою́щему: сла́ва си́лѣ Твое́й, Го́споди.

Скры́ся заре́ю Божества́ чу́вственное со́лнце, я́ко на горѣ́ Ѳаво́рѣ ви́дѣвъ Тя́ преобразу́ющася, Іису́се мо́й: сла́ва си́лѣ Твое́й, Го́споди.

Огнь, не опаля́я ве́щи тѣле́сныя, ви́дѣнъ бы́сть невеще́ственъ, я́коже Моисе́ю и апо́столомъ яви́лся еси́, Иліи́ же, Влады́ко, еди́нъ отъ двою́, во дву́ соверше́нну естеству́.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Служи́тель Сло́ва и сло́вомъ укра́шанъ, Сло́ва любо́вію, нра́вомъ душе́внымъ закала́ется и съ Сло́вомъ пра́ведно ца́рствуетъ ны́нѣ, весе́лія и сла́вы Его́ насыща́яся.

Дрема́ніемъ нече́стія благоче́стно не воздрема́ся, бо́дростію боже́ственною, му́ченическимъ твои́мъ стоя́ніемъ отъ о́чію со́нъ и́же въ сме́рть оттря́слъ еси́, му́чениче Христо́въ свяще́нне.

На сопротивобо́рныхъ злочести́ваго противле́нія и́стинными ору́жіи благоче́стія огра́ждся, си́хъ до конца́ низложи́лъ еси́ па́мять вѣ́ры ра́ди и нра́ва любо́вію.

Богоро́диченъ: Скве́рну всю́ пе́рвыя отложи́вше снѣ́ди, живо́тнымъ хлѣ́бомъ съ небесе́ напита́емся, отъ земли́ Дѣ́вы возсія́вшаго, Юже, я́ко Хода́таицу благи́хъ, воспои́мъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Вѣтíйствующій язы́къ Твоего́ вели́чества не мо́жетъ вѣща́ти: я́ко бо, Держа́й живо́тъ и сме́ртію Влады́й, предста́вилъ еси́ на Ѳаво́рстѣй горѣ́ Моисе́я и Илію́, свидѣ́тельствующія Твое́ Божество́.

Иже рука́ми неви́димыми созда́въ по о́бразу Твоему́, Христе́, человѣ́ка, началообра́зную Твою́ въ созда́ніи добро́ту показа́лъ еси́, не я́ко во о́бразѣ, но я́ко Са́мъ Сы́й по существу́, Бо́гъ бы́лъ еси́ и Человѣ́къ.

Сраствори́вся неслія́нно, у́гль горя́щь показа́лъ еси́ на́мъ Божества́, попаля́ющь у́бо грѣхи́, ду́ши же просвѣща́ющь, на Ѳаво́рстѣй горѣ́, Моисе́я со Иліе́ю, ученико́въ же старѣ́йшія удиви́лъ еси́.

Инъ.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Неукло́ннымъ видѣ́ніемъ Боже́ственныя добро́ты зря́, вся́ кра́сная, я́же на земли́, Лавре́нтіе, ты́ преоби́дѣлъ еси́ и лю́тыя тѣ́ла болѣ́зни, досточу́дне.

Христа́, Служи́теля бы́вша на́мъ, да́ры отъ Отца́ позна́въ, служи́тель Того́ бы́въ, къ Нему́же кро́вію отше́лъ еси́, преблаже́нне.

Свяще́нно возложе́ніе и украше́ніе благолѣ́пно Христу́, блаже́нне, прине́слся еси́, сѣ́нь уясни́лъ еси́ небе́сную, идѣ́же ны́нѣ быва́я, наслажда́ешися сія́нія.

Богоро́диченъ: Соесте́ственъ и сообра́зенъ сы́й Отцу́, Сы́нъ Единоро́дный, человѣ́комъ бы́сть во́лею сро́денъ, вопло́щся Вы́шній изъ чре́ва Твоего́, Ма́ти Дѣ́во.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Яко ве́ліе и стра́шное узрѣ́ся видѣ́ніе дне́сь: съ небесе́ у́бо чу́вственное, отъ земли́ же несравне́нное, облиста́ Со́лнце пра́вды мы́сленное на горѣ́ Ѳаво́рстѣй.

Пре́йде у́бо сѣ́нь зако́нная, изнемо́гшая, пріи́де же я́вѣ Христо́съ и́стина, — Моисе́й возопи́, на Ѳаво́рѣ ви́дѣвъ Твое́ Божество́.

Сто́лпъ о́гненный — Христа́ преобразу́ющася, о́блакъ же — я́вѣ благода́ть Ду́ха, осѣни́вшую на Ѳаво́рѣ, предсказа́ша явле́ннѣйше.

Инъ.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Веще́ственный о́гнь, тя́ испе́къ, Царю́ всѣ́хъ устро́и сла́дко бра́шно, на́ше спасе́ніе лю́бящему и а́лчущу, всесла́вне.

Ве́сь свѣ́ту прибли́жился еси́ Нача́льныя Тро́ицы, я́ко служи́тель Тоя́, сы́й свѣтови́дѣнъ, страстоте́рпче, бы́лъ еси́, озаря́я пою́щія тя́.

Укрѣпля́емь Боже́ственною си́лою, на разжже́ннѣй сковрадѣ́ лежа́, терпѣ́лъ еси́, му́чениче, любо́вію Христо́вою ду́шу огне́мъ разжига́я и росо́ю духо́вною.

Богоро́диченъ: Была́ еси́ Бо́жія Ма́ти, Дѣ́во, вмѣсти́тельно прія́телище, престо́лъ одушевле́нъ, гора́ свята́, и киво́тъ, и сѣ́нь богодѣ́лана, и свѣ́щникъ златоза́ренъ.

Конда́къ, гла́съ 7:

На горѣ́ преобрази́лся еси́, и я́коже вмѣща́ху ученицы́ Твои́, сла́ву Твою́, Христе́ Бо́же, ви́дѣша, да егда́ Тя́ у́зрятъ распина́ема, страда́ніе у́бо уразумѣ́ютъ во́льное, мíрови же проповѣ́дятъ, я́ко Ты́ еси́ вои́стинну Отчее сія́ніе.

Икосъ:

Воста́ните, лѣни́віи, и́же всегда́ ни́зу пони́кшіи въ зе́млю, души́ моея́ по́мыслы, возми́теся и возвы́ситеся на высоту́ Боже́ственнаго восхожде́нія. Притеце́мъ къ Петру́ и къ Зеведе́евымъ и вку́пѣ со о́нѣми Ѳаво́рскую го́ру дости́гнемъ, да ви́димъ съ ни́ми сла́ву Бо́га на́шего, гла́съ же услы́шимъ, его́же свы́ше слы́шаша и проповѣ́даша Отчее сія́ніе.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Ны́нѣ ви́дѣна бы́ша апо́столомъ неви́димая Божества́ во пло́ти, на горѣ́ Ѳаво́рстѣй облиста́вша, вопію́щимъ: благослове́нъ еси́, Го́споди Бо́же, во вѣ́ки.

Ужасо́шася стра́хомъ, уди́вльшеся благолѣ́пію Боже́ственнаго Ца́рства, на горѣ́ Ѳаво́рстѣй апо́столи, вопію́ще: благослове́нъ еси́, Го́споди Бо́же, во вѣ́ки.

Ны́нѣ неуслы́шанная услы́шана бы́ша: безъ отца́ бо Сы́нъ отъ Дѣ́вы Оте́ческимъ гла́сомъ сла́вно свидѣ́тельствуется, я́ко Бо́гъ и Человѣ́къ, То́йже во вѣ́ки.

Положе́ніемъ не бы́лъ еси́ Вы́шняго, существо́мъ же Сы́нъ возлю́бленъ, пре́жде Сы́й, на́мъ прибли́жился еси́ непрело́жно: благослове́нъ еси́, Го́споди Бо́же, во вѣ́ки.

Инъ.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Тайноводи́ти предъизбра́нъ и служи́ти Сло́ву, сосу́дъ показа́ся свяще́нъ небе́снаго хра́ма и возложе́ніе, воспѣва́я Сотво́ршему: препѣ́тый Го́споди, Бо́же оте́цъ на́шихъ, благослове́нъ еси́.

Зако́номъ живота́ и́же во Христѣ́ огражда́емь, преблаже́нне, су́щимъ сме́рти и тли́ законоположи́телемъ ума́ не подклони́лъ еси́, воспѣва́я, Лавре́нтіе: препѣ́тый Го́споди, Бо́же оте́цъ на́шихъ, благослове́нъ еси́.

Якоже нѣ́кій, безболѣ́зненъ я́вѣ, тѣ́ломъ обложе́нъ, преблаже́нне, до́блимъ по́мысломъ на всея́дца огня́ дерзну́лъ еси́, взыва́я, пребога́те: препѣ́тый Го́споди, Бо́же оте́цъ на́шихъ, благослове́нъ еси́.

Богоро́диченъ: Две́рь показа́лася еси́ мы́сленная восто́ка Вы́шняго, я́вльшагося на земли́ человѣ́комъ изъ Тебе́, Богоневѣ́сто, па́че сло́ва и ума́, Бо́га отце́въ благослове́ннаго.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Услы́шавше, Влады́ко, отъ Отца́ свидѣ́тельствуема, и я́ко человѣ́ческа твердѣ́йша зра́ка зрѣ́ти лица́ Твоего́ блиста́нія не терпя́ще, Твои́ ученицы́ на зе́млю ни́цъ па́даху, со стра́хомъ пою́ще: свяще́нницы, благослови́те, лю́діе, превозноси́те во вся́ вѣ́ки.

Ца́рствующимъ еси́ Ца́рь прекра́сенъ и и́же всю́ду владя́щимъ Госпо́дь си́ленъ, Блаже́нъ и во свѣ́тѣ живы́й непристу́пнѣмъ, Ему́же ученицы́ уди́вльшеся, Моисе́й же и Илія́ вопія́ху: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Яко не́бомъ владу́щему, и земле́ю госпо́дствующему, и надъ преиспо́дними о́бласть иму́щему, Христе́, предста́ша Ти́: отъ земли́ у́бо — апо́столи, я́ко съ небесе́ же — Ѳесви́тянинъ Илія́, Моисе́й же — отъ ме́ртвыхъ, пою́ще согла́сно: лю́діе, превозноси́те во вся́ вѣ́ки.

Уны́нія ражда́ющія печа́ли на земли́ оста́виша, апо́столовъ избра́нніи, Человѣколю́бче, я́ко Тебѣ́ послѣ́доваша, ко и́же отъ земли́ преложе́нію боже́ственнаго житія́. Тѣ́мже, и по достоя́нію Твоего́ Богоявле́нія улучи́вше, поя́ху: лю́діе, превозноси́те Его́ во вѣ́ки.

Инъ.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Тве́рдымъ умо́мъ бы́лъ еси́ нестерпи́маго пла́мене крѣпча́йшій, я́ко въ чужде́мъ тѣлеси́ сожига́емь, блаже́нне, вѣ́рою поя́: благослови́те, вся́ дѣла́ Госпо́дня, Го́спода.

Отроко́мъ тріе́мъ подо́бяся, огня́ погаси́лъ еси́ у́гліе, росо́ю Боже́ственныя благода́ти, взыва́я и поя́: вся́ дѣла́, благослови́те, по́йте Го́спода.

Просвѣще́ніе Христо́съ тебѣ́ бы́въ, Свое́ю крѣ́постію препоя́са тя́ и къ Себѣ́ возведе́, благоче́стно пою́ще: вся́ дѣла́, благослови́те, по́йте Го́спода.

Богоро́диченъ: Ко́рене Іессе́ова же́злъ была́ еси́ и Христа́ Бо́га моего́ и Го́спода па́че естества́ прозябла́ еси́, Божества́ цвѣ́тъ. Вся́ дѣла́ да благословя́тъ, Дѣ́во, Рождество́ Твое́.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческого чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Да Твое́ пока́жеши я́вѣ неизрече́нное второ́е сни́тіе, я́ко да вы́шній Бо́гъ яви́шися, стоя́ посредѣ́ бого́въ, апо́столъ на Ѳаво́рѣ, Моисе́я же и Илію́, неизрече́нно осія́лъ еси́. Тѣ́мже вси́ Тя́, Христе́, велича́емъ.

Пріиди́те, Мнѣ́ покори́теся, лю́діе, возше́дше на го́ру святу́ю пренебе́сную, невеще́ственно ста́немъ во гра́дѣ Жива́го Бо́га и у́зримъ мы́сленно Божество́ невеще́ственное, Отца́ и Ду́ха, въ Сы́нѣ Единоро́днѣмъ облиста́ющее.

Привле́клъ еси́ любо́вію мя́, Спа́се, и премѣни́лъ еси́ Боже́ственнымъ Твои́мъ жела́ніемъ, но попали́ огне́мъ невеще́ственнымъ грѣхи́ моя́ и насы́титися Твоея́ пи́щи сподо́би, да, обое́ игра́я, велича́ю, Бла́же, вели́чія Твоя́.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Соверше́нно заколе́ніе и прія́тно кади́ло Влады́цѣ прине́слся еси́, я́коже зла́то въ горни́лѣ, огне́мъ искуси́вся страда́нія, и украше́ніе Це́ркве бы́въ пе́рвенецъ, досточу́дне.

Зрѣ́ніемъ неукло́ннымъ къ Бо́гу обожа́емь и соедине́ніемъ лу́чшимъ, сло́вомъ и Боже́ственнымъ видѣ́ніемъ, свѣ́томъ кра́йнимъ, Лавре́нтіе, просвѣти́лся еси́ свѣ́тло. Тѣ́мже тя́ вси́ ублажа́емъ.

Яко со́лнце, блаже́нне, отъ за́пада возсія́лъ еси́, чу́до ве́ліе и пресла́вно, всю́ просвѣща́я Це́рковь твои́ми блиста́ньми, досточу́дне, и согрѣва́я вся́ теплото́ю вѣ́ры, тѣ́мже тя́ вси́ ублажа́емъ.

Богоро́диченъ: Образы, Всенепоро́чная, Твоего́ рождества́ проро́цы узрѣ́вше, издале́ча си́мъ научи́вшеся, отъ Боже́ственного вдохнове́нія Ду́ха, мíру велегла́сно проповѣ́даша, и́хже сбытіе́мъ ны́нѣ чуди́мся.

Свѣти́ленъ пра́здника:

Свѣ́те неизмѣ́нный Сло́ве, Свѣ́та Отца́ нерожде́нна, въ явле́ннѣмъ свѣ́тѣ Твое́мъ, дне́сь на Ѳаво́рѣ свѣ́тъ ви́дѣхомъ Отца́, свѣ́тъ и Ду́ха, свѣ́томъ наставля́ющаго всю́ тва́рь.

Сла́ва, и ны́нѣ, то́йже.

На стихо́внѣ стихи́ры, гла́съ 6. Подо́бенъ: Ангельскія.

Возсія́въ па́че ума́* отъ Дѣ́вы Пресвяты́я, Сло́ве Бо́жій,* во Ада́ма ве́сь обле́кся,* и́же пре́жде омрачи́вшееся естество́ все́ просвѣти́лъ еси́* Боже́ственнымъ зра́ка Твоего́ измѣне́ніемъ,* преобра́жся на горѣ́ Ѳаво́рстѣй, Влады́ко,* пре́жде Честна́го Твоего́ Креста́, Христе́ Бо́же на́шъ.

Сти́хъ: Твоя́ су́ть небеса́,* и Твоя́ е́сть земля́.

Гора́, я́же иногда́ бя́ше мра́чна и ды́мна,* се ны́нѣ честна́ и свята́ е́сть:* Иже пе́рвѣе у́бо Изра́иля наста́вивый,* я́коже пи́шетъ, столпо́мъ огнезра́чнымъ и о́блакомъ,* дне́сь просія́ неизрече́нно,* па́че со́лнца, Христо́съ на се́й,* я́ко Бо́гъ просвѣти́въ вся́ческая.

Сти́хъ: Ѳаво́ръ и Ермо́нъ* о и́мени Твое́мъ возра́дуетася.

Ны́нѣ раболѣ́пно бесѣ́дующу Влады́цѣ,* ви́дѣ Ки́фа на Ѳаво́рѣ два́ му́жа, —* добро́ е́сть, — вопія́ше, — здѣ́ бы́ти,* сотвори́мъ три́ сѣ́ни, а́ще хо́щеши кому́ждо,* Тебѣ́, Христе́ мо́й, еди́ну,* съ Моисе́емъ же и Иліи́, Твои́мъ рабо́мъ.* Еже глаго́лаше не вѣ́дый,* у́жасомъ же содержи́мь бя́ше.

Сла́ва, и ны́нѣ, гла́съ то́йже:

Влады́чице Чи́стая, Богоро́дице Пресвята́я, изба́ви на Тя́ надѣ́ющіяся отъ бѣ́дъ и спаси́ отъ вся́каго вре́да, въ нощи́ Тя́ и во дни́, ны́нѣ же и при́сно моля́щія, и бу́дущаго Суда́ изба́вити, моля́щи Твоего́ Сы́на, на Ѳаво́рѣ неизрече́нно облиста́вшаго.


НА ЛИТУРГІИ,

Блаже́нна пра́здника, пѣ́снь 5-я, обои́хъ кано́новъ, со ирмосо́мъ на 6.

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 106 – 112.

/ Къ оглавленію раздѣла /


Наверхъ / Къ титульной страницѣ

0