Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 9-й де́нь.
Свята́го апо́стола Матѳíя.

НА ВЕЧЕРНИ,
Пое́мъ, Блаже́нъ му́жъ, 1-й антифо́нъ. На Го́споди, воззва́хъ: стихи́ры на 8: пра́здника 3, гла́съ 2. Подо́бенъ: Егда́ отъ Дре́ва.

Пріиди́те, пресвѣ́тлое Христо́во Боже́ственное преображе́ніе вѣ́рно спра́зднуемъ, и измѣни́вшеся ны́нѣ измѣне́ніемъ до́брымъ, совзы́демъ ду́хомъ къ высо́кому добродѣ́телей верху́ ученико́въ Христо́выхъ: я́ко да съ ни́ми, научи́вшеся стра́нныхъ та́инъ явле́нію, Спа́са Го́спода сла́вимъ.

Ра́дуйся и весели́ся благоговѣ́йно, вѣ́рныхъ честна́я Це́рковь, ны́нѣ пра́зднующи се́й честны́й и всесвѣ́тлый пра́здникъ: безобра́зіе бо человѣ́ка всѣ́хъ Влады́ка, ны́нѣ преобразу́ющійся, просвѣща́етъ я́сно заре́ю свѣ́тлости неизрече́нныя, па́че зари́ со́лнца сія́ніе испуща́юща свѣ́тло.

Всѣ́хъ Бо́гъ Сы́й и Зижди́тель, бога́тствомъ милосе́рдія неизрече́ннымъ пріе́мь зра́къ ра́бій, се́й омраче́нія спаса́етъ ны́нѣ дре́вняго, облиста́въ лице́мъ и обнажи́въ сія́ніе Божества́ во пло́ти Свое́й, отону́дуже ужа́сни со стра́хомъ и ни́цы па́дше ученицы́, Влады́цѣ всѣ́хъ поклони́шася.

Ины стихи́ры апо́стола 5, гла́съ 1. Подо́бенъ: Всехва́льніи му́ченицы.

Матѳíе апо́столе,* ли́къ боже́ственный напо́лнилъ еси́,* изъ него́же Іу́да испаде́.* И боже́ственными блиста́ніи му́дрыхъ твои́хъ слове́съ* тму́ отгна́лъ еси́ идолонеи́стовства* Бо́жіею благода́тію.* И ны́нѣ моли́ся,* дарова́ти душа́мъ на́шимъ ми́ръ* и ве́лію ми́лость. [Два́жды.]

Матѳíе блаже́нне,* Еде́мъ мы́сленный поте́клъ еси́,* я́ко рѣка́, наводня́ема* боже́ственными вода́ми,* и зе́млю напое́ніи та́йными напои́лъ еси́,* и сію́ плодоно́сну показа́лъ еси́.* Тѣ́мже моли́ся* дарова́ти душа́мъ на́шимъ ми́ръ* и ве́лію ми́лость. [Два́жды.]

Матѳíе богодухнове́нне,* ко́ло мірско́е* освѣти́ша мо́лніи уче́ній твои́хъ,* всѣ́хъ просвѣща́юще,* всѣ́хъ наставля́юще* къ боже́ственному позна́нію,* прія́телища свѣ́та содѣва́юще* пре́жде спя́щія въ нощи́ су́етства* и во тмѣ́ вся́каго безбо́жія.

Сла́ва, гла́съ 6:

Излия́ся благода́ть во устна́хъ твои́хъ, сла́вне апо́столе Матѳíе, и бы́лъ еси́ свѣти́льникъ Це́ркве Христо́вы, уча́ слове́сныя о́вцы, вѣ́ровати въ Тро́ицу Единосу́щную, и во еди́но Божество́.

И ны́нѣ, гла́съ 2:

Иже свѣ́томъ Твои́мъ всю́ вселе́нную освяти́въ, на горѣ́ высо́цѣ преобрази́лся еси́, Бла́же, показа́въ ученико́мъ Твои́мъ си́лу Твою́, я́ко мíръ избавля́еши отъ преступле́нія. Тѣ́мже вопіе́мъ Ти́: Милосе́рде Го́споди, спаси́ ду́ши на́ша.

Вхо́дъ, проки́менъ дне́, чте́нія три́.

Отъ Дѣя́ній святы́хъ апо́столъ чте́ніе.

Во дни́ ты́я, воста́въ Пе́тръ посреди́ учени́къ, рече́: (Бѣ́ же име́нъ наро́да вку́пѣ я́ко сто́ и два́десять:) му́жіе бра́тіе, подоба́ше сконча́тися писа́нію сему́, е́же предрече́ Ду́хъ Святы́й усты́ Дави́довыми о Іу́дѣ, бы́вшемъ вожди́, е́мшимъ Іису́са. Яко причте́нъ бѣ́ съ на́ми, и прія́лъ бя́ше жре́бій слу́жбы сея́. Се́й у́бо стяжа́ село́ отъ мзды́ непра́ведныя, и ни́цъ бы́въ, просѣ́деся посредѣ́, и излія́ся вся́ утро́ба его́. И разу́мно бы́сть всѣ́мъ живу́щимъ во Іерусали́мѣ, я́ко нарещи́ся селу́ тому́ свои́мъ и́хъ язы́комъ, Акелдама́, е́же е́сть село́ кро́ве. Пи́шется бо въ кни́зѣ псало́мстѣй: да бу́детъ дво́ръ его́ пу́стъ, и да не бу́детъ живу́щаго въ не́мъ, и епи́скопство его́ да пріи́метъ и́нъ. Подоба́етъ у́бо, отъ сходи́вшихся съ на́ми муже́й во вся́ко лѣ́то, въ не́же вни́де и изы́де въ на́съ Госпо́дь Іису́съ, наче́нъ отъ креще́нія Іоа́ннова, да́же до дне́, въ о́ньже вознесе́ся (на не́бо) отъ на́съ, свидѣ́телю воскресе́нія Его́ бы́ти съ на́ми еди́ному отъ си́хъ. И поста́виша два́: Іо́сифа, нарица́емаго Варса́ву, и́же нарече́нъ бы́сть Іу́стъ, и Матѳíя. И, помоли́вшеся, рѣ́ша: Ты́, Го́споди, Сердцевѣ́дче всѣ́хъ, покажи́, его́же избра́лъ еси́, отъ сею́ двою́ еди́наго, прія́ти жре́бій служе́нія сего́ и апо́стольства, изъ него́же испаде́ Іу́да, ити́ въ мѣ́сто свое́. И да́ша жре́бія и́ма. И паде́ жре́бій на Матѳíя. И причте́нъ бы́сть ко единона́десяти апо́столомъ.

Собо́рнаго посла́нія Іоа́ннова чте́ніе.

Возлю́бленніи, а́ще се́рдце на́ше не за́зритъ на́мъ, дерзнове́ніе и́мамы къ Бо́гу. И его́же, а́ще про́симъ, пріе́млемъ отъ Него́, я́ко за́повѣди Его́ соблюда́емъ и уго́дная предъ Ни́мъ твори́мъ. И сія́ е́сть за́повѣдь Его́, да вѣ́руемъ во и́мя Сы́на Его́ Іису́са Христа́ и лю́бимъ дру́гъ дру́га, я́коже да́лъ е́сть за́повѣдь на́мъ. И соблюда́яй за́повѣди Его́, въ Не́мъ пребыва́етъ, и То́й въ не́мъ, и о се́мъ разумѣ́емъ, я́ко пребыва́етъ въ на́съ, отъ Ду́ха, Его́же да́лъ е́сть на́мъ. Возлю́бленніи, не вся́кому ду́ху вѣ́руйте, но искуша́йте ду́хи, а́ще отъ Бо́га су́ть, я́ко мно́зи лжепроро́цы изыдо́ша въ мíръ. О се́мъ познава́йте Ду́ха Бо́жія и ду́ха ле́стча: вся́къ ду́хъ, и́же исповѣ́дуетъ Іису́са Христа́, во пло́ти прише́дша, отъ Бо́га е́сть. И вся́къ ду́хъ, и́же не исповѣ́дуетъ Іису́са Христа́, во пло́ти прише́дша, отъ Бо́га нѣ́сть, и се́й е́сть анти́христовъ, его́же слы́шасте, я́ко гряде́тъ, и ны́нѣ въ мíрѣ е́сть уже́. Вы́ отъ Бо́га есте́, ча́дца, и побѣди́сте тѣ́хъ, я́ко бо́лій е́сть Иже въ ва́съ, не́жели и́же въ мíрѣ. Они́ отъ мíра су́ть, сего́ ра́ди отъ мíра глаго́лютъ, и мíръ тѣ́хъ послу́шаетъ. Мы́ отъ Бо́га есмы́: и́же зна́етъ Бо́га, послу́шаетъ на́съ, и и́же нѣ́сть отъ Бо́га, не послу́шаетъ на́съ.

Собо́рнаго посла́нія Іоа́ннова чте́ніе.

Возлю́бленніи, а́ще си́це возлюби́лъ е́сть на́съ Бо́гъ, и мы́ до́лжни есмы́ дру́гъ дру́га люби́ти. Бо́га никто́же нигдѣ́же ви́дѣ. Аще дру́гъ дру́га лю́бимъ, Бо́гъ въ на́съ пребыва́етъ, и любы́ Его́ соверше́нна е́сть въ на́съ. О се́мъ разумѣ́емъ, я́ко въ Не́мъ пребыва́емъ, и То́й въ на́съ, я́ко отъ Ду́ха Своего́ да́лъ е́сть на́мъ. И мы́ ви́дѣхомъ и свидѣ́тельствуемъ, я́ко Оте́цъ посла́ Сы́на Спаси́теля мíру. Иже а́ще исповѣ́сть, я́ко Іису́съ е́сть Сы́нъ Бо́жій, Бо́гъ въ не́мъ пребыва́етъ, и то́й въ Бо́зѣ. И мы́ позна́хомъ, и вѣ́ровахомъ, любо́вь ю́же и́мать Бо́гъ въ на́съ. Бо́гъ Любы́ е́сть, и пребыва́яй въ любви́ въ Бо́зѣ пребыва́етъ, и Бо́гъ въ не́мъ пребыва́етъ.

На стихо́внѣ стихи́ры, гла́съ 6. Подо́бенъ: Тридне́венъ.

Вообра́жся за милосе́рдіе, Христе́, во Ада́ма, пе́рваго человѣ́ка, отъ Дѣ́вы, яви́лся еси́ вторы́й Ада́мъ, на горѣ́ же, Спа́се мо́й, Ѳаво́рстѣй преобрази́лся еси́, обнажа́я Божество́ Твое́.

Сти́хъ: Твоя́ су́ть небеса́, и Твоя́ е́сть земля́.

Удиви́шася, зря́ще, Твоея́ благода́ти лу́чшіи зако́на, преображе́нія, Христе́, на горѣ́ святѣ́й, съ ни́миже покланя́емся Тебѣ́ со Отце́мъ и Боже́ственнымъ Ду́хомъ.

Сти́хъ: Ѳаво́ръ и Ермо́нъ о и́мени Твое́мъ возра́дуетася.

Просвѣща́ется тва́рь я́сно Твои́мъ преображе́ніемъ, Христе́, е́же боже́ственнымъ апо́столомъ на Ѳаво́рѣ, Моисе́ю же и Илíи, показа́лъ еси́, Бо́гъ сы́й, неизрече́нно просія́въ па́че со́лнца.

Сла́ва, гла́съ 2:

Ре́вности боже́ственныя испо́лненъ, апо́столе Матѳíе досточу́дне, ревну́я, поревнова́лъ еси́ Бо́гу Вседержи́телю, Иже и Боже́ственныхъ тя́ чуде́съ испо́лнена показа́, стра́нную бо ре́вность имѣ́я, дѣ́йствіемъ нра́въ стяжа́лъ еси́. Тѣ́мже, въ вы́шнихъ сы́й, съ вы́шними ли́ки вселя́емь, моли́ся, богови́дче, Сло́ву, Христу́ Бо́гу на́шему, дарова́ти на́мъ ве́лію ми́лость.

И ны́нѣ, гла́съ то́йже:

Иже на горѣ́ Ѳаво́рстѣй преобра́жся во сла́вѣ, Христе́ Бо́же, и показа́въ ученико́мъ Твои́мъ сла́ву Твоего́ Божества́, озари́ и на́съ свѣ́томъ Твоего́ разумѣ́нія и наста́ви на стезю́ за́повѣдей Твои́хъ, я́ко еди́нъ Бла́гъ и Человѣколю́бецъ.

Тропа́рь апо́стола, гла́съ 3:

Апо́столе святы́й Матѳíе, моли́ Ми́лостивого Бо́га, да прегрѣше́ній оставле́ніе пода́стъ душа́мъ на́шимъ.

Сла́ва, и ны́нѣ, пра́здника, гла́съ 7:

Преобрази́лся еси́ на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.


НА УТРЕНИ,
На Бо́гъ Госпо́дь: тропа́рь пра́здника, два́жды. Сла́ва, апо́стола. И ны́нѣ, пра́здника.

По 1-й стихоло́гіи сѣда́ленъ, гла́съ 2:

Улови́въ язы́ки, апо́столъ сла́вный, и научи́въ концы́ земны́я Тебѣ́ кла́нятися со Отце́мъ и Ду́хомъ, Христе́ Бо́же. Того́ ра́ди утверди́ Це́рковь Твою́, и вѣ́рнымъ низпосли́ благослове́ніе Твое́, Еди́не ми́лостиве и человѣколю́бче. [Два́жды.]

Сла́ва, и ны́нѣ, пра́здника, гла́съ 4. Подо́бенъ: Удиви́ся Іо́сифъ.

Человѣ́ческое измѣне́ніе, е́же со сла́вою Твое́ю, Спа́се, второ́е и стра́шное Твоего́ прише́ствія показу́яй, на горѣ́ Ѳаво́рстѣй преобрази́лся еси́. Илія́ и Моисе́й глаго́лаху съ Тобо́ю, и тріе́хъ отъ учени́къ спризва́въ, и́же ви́дѣвше, Влады́ко, сла́ву Твою́, блиста́нію Твоему́ удиви́шася. Иже тогда́ си́мъ свѣ́тъ Тво́й возсія́вый, просвѣти́ ду́ши на́ша.

По 2-й стихоло́гіи сѣда́ленъ, гла́съ 4:

Лучу́, я́ко со́лнце пра́вды, испусти́ тя Христо́съ, просвѣти́ти всю́ зе́млю, апо́столе сла́вный Матѳíе, боже́ственными твои́ми моли́твами озаря́еши, и боже́ственнымъ свѣ́томъ невече́рнимъ всѣ́хъ просвѣща́еши, вѣ́рою соверша́ющихъ святу́ю па́мять твою́. [Два́жды.]

Сла́ва, и ны́нѣ, пра́здника, гла́съ то́йже. Подо́бенъ: Вознесы́йся.

Возше́дъ со ученики́ на го́ру, и во сла́вѣ Отчи облиста́въ, съ Моисе́омъ Илія́ Тебѣ́ предстоя́тъ, зако́нъ и проро́цы бо я́ко Бо́гу слу́жатъ. Ему́же и сыновство́ есте́ственное Роди́тель исповѣ́дая, нарица́ше Сы́на, Его́же воспѣва́емъ съ Тобо́ю и Ду́хомъ.

По поліеле́и сѣда́ленъ, гла́съ 8. Подо́бенъ: Прему́дрости.

Идольскую горды́ню низложи́въ, Спа́совы стра́сти жела́я, Матѳíе апо́столе, яви́лся еси́ мíру съ небесе́, всѣ́мъ источая́ чудеса́, и язы́комъ бы́лъ еси́, преблаже́нне, учи́тель. Тѣ́мже твою́ па́мять по досто́инству почита́емъ, въ пѣ́снехъ сла́вяще и вѣ́рно велича́юще, богогла́се пребога́те, моли́ Христа́ Бо́га, грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника, гла́съ 4. Подо́бенъ: Удиви́ся Іо́сифъ.

На горѣ́ Ѳаво́рстѣй преобрази́лся еси́, Бо́же, посредѣ́ Иліи́ и Моисе́я прему́дрыхъ, со Іа́ковомъ, и Си́мономъ, и Іоа́нномъ. Пе́тръ же, сы́й ту́, сія́ Тебѣ́ глаго́лаше: добро́ е́сть здѣ́ сотвори́ти три́ сѣ́ни: еди́ну Моисе́ю, и еди́ну Иліи́, и еди́ну Тебѣ́, Влады́цѣ Христу́. Иже тогда́ си́мъ свѣ́тъ Тво́й возсія́вый, просвѣти́ ду́ши на́ша.

Степе́нна, 1-й антифо́нъ 4-го гла́са. Проки́менъ, гла́съ 4: Во всю́ зе́млю изы́де вѣща́ніе и́хъ,* [и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Вся́кое дыха́ніе... Ева́нгеліе Іоа́нна, зача́ло 67.

По 50-мъ псалмѣ́ стихи́ра, гла́съ 6:

Излия́ся благода́ть во устна́хъ твои́хъ, сла́вне апо́столе Матѳíе, и бы́лъ еси́ свѣти́льникъ Це́ркве Христо́вы, уча́ слове́сныя о́вцы, вѣ́ровати въ Тро́ицу Единосу́щную, и во еди́но Божество́.

Кано́нъ пра́здника со ирмосо́мъ на 6. Творе́ніе ки́ръ Космы́, гла́съ 4.

Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Глаго́лы живо́тныя друго́мъ Христо́съ и о Боже́ственнѣмъ наказу́я Ца́рствіи, рече́: во Мнѣ́ Отца́ позна́йте; свѣ́томъ я́ко облиста́я непристу́пнымъ, въ ра́дости пою́ще: пои́мъ Бо́гу на́шему, я́ко просла́вися.

Си́лою язы́къ облече́теся, дру́зи ученицы́, чу́дни же бу́дете въ бога́тствѣ и́хъ, я́ко сла́вы напо́лнитеся, я́ко явлю́ся свѣтлѣ́е со́лнца, облиста́я въ ра́дости пою́щихъ: пои́мъ Бо́гу на́шему, я́ко просла́вися.

Дне́сь Христо́съ, на горѣ́ Ѳаво́рстѣй просія́въ я́сно Боже́ственною заре́ю, я́коже обѣща́ся, ученико́мъ обнажи́ зра́къ, свѣтоно́сныя же напо́лнишеся Боже́ственныя зари́, въ ра́дости поя́ху: пои́мъ Бо́гу на́шему, я́ко просла́вися.

Инъ кано́нъ свята́го апо́стола, на 8, его́же краегране́сіе: Пѣ́сньми тя́ пою́, Матѳíе, Христо́въ дру́же. Творе́ніе Ѳеофа́ново, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Пѣ́сньми твое́ свѣтоно́сное пою́щу, Матѳíе, ны́нѣ торжество́, съ небесе́ ми зарю́ спасе́нія да́ти, моли́ся.

Ве́ліе со́лнце яви́лся еси́ свѣ́та вели́каго, досточу́дне, съ на́ми бо бы́вшу, бесѣ́довалъ еси́, нехода́тайственнѣ, апо́столе.

Зако́номъ Влады́ки, блаже́нне, повину́яся, мре́жею уловля́еши твоего́ язы́ка, изъ глубины́ невѣ́дѣнія концы́.

Богоро́диченъ: Всего́ мя́ спаса́етъ, Сло́во Пребоже́ственное бла́гостію, восхотѣ́въ изъ утро́бы Твоея́ воплоти́тися, Чи́стая Ма́ти Дѣ́во.

Катава́сія пра́здника: Ли́цы изра́ильтестіи...

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Во всего́ Ада́ма обле́кся, Христе́, очернѣ́вшее, измѣни́въ, просвѣти́лъ еси́ дре́вле естество́ и измѣне́ніемъ зра́ка Твоего́ богосодѣ́лалъ еси́.

Столпо́мъ огнезра́чнымъ и о́блакомъ дре́вле, Иже въ пусты́ни Изра́иля веды́й, дне́сь на горѣ́ Ѳаво́рстѣй, неизрече́нно во свѣ́тѣ Христо́съ просія́.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ и пое́тъ Тя́ ду́хъ мо́й.

Возмо́глъ еси́, укрѣпля́емь живонача́льнымъ, му́дре, манове́ніемъ, крѣ́пкаго коры́сти восхи́тити и порабо́тити благода́тію.

Любя́ Учи́теля, служа́ Того́ манове́ніемъ вседѣ́йственнымъ, отъ пре́лести спаса́еши человѣ́ки, досточу́дне.

Тя́ двоенадеся́тному числу́ ученико́въ ли́ка свята́го, вседѣ́йственный Ду́хъ исполня́юща, богоглаго́ливе, избира́етъ.

Богоро́диченъ: Имѣ́я Тя́ по́мощь, злы́хъ враго́въ стремле́нія, Чи́стая, не ужаса́юся, имѣ́я Тя́ предста́тельницу, тѣ́хъ побѣжда́ю полки́.

Конда́къ пра́здника, гла́съ 7:

На горѣ́ преобрази́лся еси́, и я́коже вмѣща́ху ученицы́ Твои́, сла́ву Твою́, Христе́ Бо́же, ви́дѣша, да егда́ Тя́ у́зрятъ распина́ема, страда́ніе у́бо уразумѣ́ютъ во́льное, мíрови же проповѣ́дятъ, я́ко Ты́ еси́ вои́стинну Отчее сія́ніе.

Икосъ:

Воста́ните, лѣни́віи, и́же всегда́ ни́зу пони́кшіи въ зе́млю, души́ моея́ по́мыслы, возми́теся и возвы́ситеся на высоту́ Боже́ственнаго восхожде́нія. Притеце́мъ къ Петру́ и къ Зеведе́евымъ и вку́пѣ со о́нѣми Ѳаво́рскую го́ру дости́гнемъ, да ви́димъ съ ни́ми сла́ву Бо́га на́шего, гла́съ же услы́шимъ, его́же свы́ше слы́шаша и проповѣ́даша Отчее сія́ніе.

Сѣда́ленъ апо́стола, гла́съ 8. Подо́бенъ: Прему́дрости.

Мо́лніями твои́хъ слове́съ боже́ственныхъ, попали́лъ еси́ пре́лесть лука́вую, вѣ́рныя просвѣти́лъ еси́, воспѣва́ти е́же во пло́ти прише́ствіе, блаже́нне, всѣ́ми Влады́чествующего, и Того́ стра́сти Боже́ственнѣй поревнова́лъ еси́. Отону́дуже соше́дшеся, святу́ю твою́ па́мять соверша́емъ, веселя́щеся, и согла́сно вопіе́мъ ти́: Матѳíе апо́столе, моли́ Христа́ Бо́га, согрѣше́ній оставле́ніе дарова́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника, гла́съ то́йже. Подо́бенъ: Повелѣ́нное.

Сокрове́нную мо́лнію подъ пло́тію существа́ Твоего́, Христе́, и Боже́ственнаго благолѣ́пія на святѣ́й показа́лъ еси́ горѣ́, Благодѣ́телю, просія́въ су́щимъ съ Тобо́ю ученико́мъ, и, разумѣ́вше нестерпи́му су́щу сла́ву Твою́, — Свя́тъ еси́, — возопи́ша, я́ко непристу́пенъ Сы́й, ви́дѣнъ бы́лъ еси́ пло́тію мíрови, еди́не Человѣколю́бче.

Пѣ́снь 4.

Ирмо́съ: Услы́шахъ сла́вное смотре́ніе Твое́, Христе́ Бо́же, я́ко роди́лся еси́ отъ Дѣ́вы, да отъ ле́сти изба́виши зову́щія: сла́ва си́лѣ Твое́й, Го́споди.

Зако́нъ въ Сина́и писа́ніемъ вообража́я, Христе́ Бо́же, во о́блацѣ, и огни́, и мра́цѣ, и въ ви́хрѣ яви́лся еси́ носи́мь: сла́ва си́лѣ Твое́й, Го́споди.

Да увѣ́риши сла́вное строе́ніе Твое́, Христе́ Бо́же, я́ко Сы́й пре́жде вѣ́къ и То́йже на о́блацѣ восхожде́ніе положи́вый, на Ѳаво́рѣ неизрече́нно просія́лъ еси́.

Соглаго́люще, предстоя́ху раболѣ́пно Тебѣ́, Влады́цѣ Христу́, къ ни́мже па́рою огня́ и мра́ка, и то́нкимъ хла́домъ бесѣ́довалъ еси́: сла́ва си́лѣ Твое́й, Го́споди.

Возвѣща́ху сла́вное Креста́ ра́ди Твоего́, на Ѳаво́ръ прише́дше, и́же во огни́ Тя́ и купинѣ́ дре́вле предви́дѣвый Моисе́й, и взя́тый на колесни́цѣ о́гненней Илія́, Христе́.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Еди́но естество́ Божества́, еди́но ца́рство и госпо́дство возвѣща́я, преблаже́нне, язы́ковъ стада́ улови́лъ еси́.

Наведе́ тя Госпо́дь на мо́ре житія́, прему́дре, я́коже коня́, смуща́юща многобо́жія го́рькія во́ды.

Сло́вомъ боже́ственнымъ обнови́лъ еси́ оляденѣ́вшая сердца́, сла́вне, всѣ́явъ благоче́стіе, и́стины позна́ніе.

Богоро́диченъ: Дѣ́вства сосу́де и невмѣсти́маго естества́ селе́ніе, ду́шу мою́ просвѣти́, омраче́нную мно́гими страстьми́.

Пѣ́снь 5.

Ирмо́съ: Отъ свѣ́та пресѣкíй перворо́дный свѣ́тъ, я́ко во свѣ́тѣ дѣла́ пою́тъ Тя́, Христе́, Содѣ́теля, во свѣ́тѣ Твое́мъ пути́ на́ша напра́ви.

Предъ лице́мъ Твои́мъ го́ры уклони́шася, свѣ́тъ бо и предъ нога́ми, неботе́чныя лучи, Христе́, со́лнца пріи́де, зра́къ зе́мленъ я́ко прія́ти благоволи́лъ еси́.

Се́ Спа́съ, — вопія́ху Моисе́й и Илія́, ученико́мъ на горѣ́ святѣ́й Ѳаво́рстѣй оглаша́емымъ, — Христо́съ, Его́же дре́вле провозвѣсти́хомъ Су́щаго Бо́га.

Неизмѣ́нное естество́, человѣ́ческому примѣ́шся, оби́льно невеще́ственнаго Божества́ свѣ́тъ изобнажи́въ апо́столомъ, неизрече́нно возсія́.

Тя́, присносу́щное сія́ніе, во Оте́честѣй сла́вѣ ученицы́ я́ко ви́дѣвше возсія́вша, Христе́, Тебѣ́ вопія́ху: во свѣ́тѣ Твое́мъ пути́ на́ша напра́ви.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Яко многопло́дну ло́зу, и́стинный тя́ простре́ виногра́дъ, дѣ́лающа гро́здъ, пролива́юща вино́ спаси́тельное, его́же пи́вше, блаже́нне, одержи́міи неразу́міемъ, пре́лести пія́нство отверго́ша.

Ученико́въ двоенадеся́тыхъ яви́лся еси́, исполня́я ли́къ блаже́нный, изъ него́же преда́тель себе́ отве́ргъ, приобрѣ́те го́рькое удавле́ніе, на Христа́ воздви́гъ пя́ту, тайновѣща́телю Матѳíе чу́дне.

Со́ль Боже́ственна, вве́рглся еси́, блаже́нне, въ мíръ, Матѳíе апо́столе, гно́й пре́лести очища́я сла́дкими уче́ніи, отгоня́ болѣ́зни и отъе́мля я́звы ду́шъ и тѣле́съ, прехва́льне.

Богоро́диченъ: Безобра́зныхъ ри́зъ и дре́вняго совлече́ся умерщвле́нія Ада́мъ, Дѣ́во, пречи́стымъ Твои́мъ Рождество́мъ Богоневѣ́сто, и во оде́жду свя́ту и и́стинну облече́ся, ника́коже оскверне́ну страстьми́.

Пѣ́снь 6.

Ирмо́съ: Внегда́ скорбѣ́ти ми́, возопи́хъ ко Го́споду, и услы́ша мя́ Бо́гъ спасе́нія моего́.

Сія́нія па́че со́лнца Свѣ́тъ яснѣ́йшій, Спа́съ, просія́ на Ѳаво́рѣ, на́съ просвѣти́лъ е́сть.

Возше́дъ на го́ру Ѳаво́рскую, преобрази́лся еси́, Христе́, и ле́сть всю́ омрачи́въ, на́съ просвѣти́лъ еси́.

Тя́ Бо́га позна́вше сла́вніи апо́столи, на Ѳаво́рѣ же, Христе́, уди́вльшеся, колѣ́на преклони́ша.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Бо́гъ бы́лъ еси́ положе́нъ, едине́ніемъ Боже́ственнымъ обожа́емь, и перводѣ́лательны отъ Бо́га лучи́ пріи́мъ, вѣ́рныя просвѣти́лъ еси́, и зе́млю отъ мглы́ и́дольскія очи́стилъ еси́.

Се́ тебѣ́ вмѣща́ется, ученику́, вся́ко прорече́ніе свяще́нныхъ проро́къ: самови́децъ бо бы́въ, Его́же дре́вле провозвѣсти́ша, служи́телю Матѳíе, подо́бникъ же и апо́столъ.

Богоро́диченъ: Свяще́ніе у́мное и неприкоснове́нно очисти́лище, свѣ́щникъ зла́тъ, и трапе́зу одушевле́ну, Хлѣ́бъ носи́вшую живота́, Дѣ́во, вѣ́рніи, Тя́ имену́емъ.

Конда́къ, гла́съ 4. Подо́бенъ: Яви́лся еси́ дне́сь.

Свѣтоза́рное, я́ко со́лнце, во ве́сь мíръ изше́дшее, вѣща́ніе твое́ просвѣща́етъ язы́ческую Це́рковь благода́тію, чудоно́сче Матѳíе апо́столе.

Икосъ:

Струю́ сло́ва пода́ждь ми́, Го́споди, водно́е естество́ содѣ́явый, и се́рдце мое́ укрѣпи́, Благоутро́бне, Иже зе́млю утверди́вый сло́вомъ Твои́мъ, и просвѣти́ мое́ помышле́ніе, свѣ́томъ, я́ко ри́зою, одѣва́яйся, да глаго́лю и пою́ подо́бная: досто́йно почести́, Многоми́лостиве, Твоего́ Матѳíя апо́стола.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Облиста́вшеся свѣ́томъ непристу́пныя сла́вы, на Ѳаво́рстѣй горѣ́ апо́столи, Христу́ вопія́ху: оте́цъ на́шихъ Бо́же, благослове́нъ еси́.

Сія́ніемъ Боже́ственнаго шу́ма, и росода́тельнымъ о́блакомъ, Христе́, и заре́ю Твое́ю наслажда́еми, апо́столи поя́ху: оте́цъ на́шихъ Бо́же, благослове́нъ еси́.

Въ непристу́пномъ свѣ́тѣ, я́ко ви́дѣ Тя́ Пе́тръ, на Ѳаво́рстѣй горѣ́ облиста́вша, Христе́, возопи́: оте́цъ на́шихъ Бо́же, благослове́нъ еси́.

Съ нача́льникомъ жи́зни Христо́мъ су́ще, дѣ́ти Зеведе́евы, я́ко испусти́ зра́ка свѣ́тъ, возгремѣ́ша: оте́цъ на́шихъ Бо́же, благослове́нъ еси́.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

То́къ изсуши́лъ еси́ пре́лести наводне́ніемъ твоея́ боже́ственныя му́дрости, и пото́комъ пи́щи напои́лъ еси́ вѣ́рою вопію́щія, сла́вне: Бо́же, благослове́нъ еси́.

Си́лою Бо́га Всеси́льнаго изнемого́ша вра́жія кова́рства предъ лице́мъ твоего́, апо́столе, ше́ствія и сокруши́шася го́ры же и хо́лми безбо́жія.

Богоро́диченъ: Се́, Юже рече́ Дѣ́ву ду́хомъ вели́кій Иса́ія, во чре́вѣ Бо́га зача́тъ и ражда́етъ, Ему́же пое́мъ: Го́споди Бо́же, благослове́нъ еси́.

Пѣ́снь 8.

Ирмо́съ: Въ Вавило́нѣ о́троцы, боже́ственною распала́еми ре́вностію, мучи́теля и пла́мене преще́ніе му́жески попра́ша, и посредѣ́ огня́ вве́ржени, ороша́еми, поя́ху: благослови́те, вся́ дѣла́ Госпо́дня, Го́спода.

Манове́ніемъ вся́ нося́й, нога́ми пречи́стыми на го́ру взы́де Ѳаво́рскую Христо́съ, на не́йже па́че со́лнечныя лучи́ облиста́ лице́мъ, и́же зако́ну старѣ́йшія и благода́ти, показа́ пою́щія: благослови́те, вся́ дѣла́ Госпо́дня, Го́спода.

Непристу́пною сла́вою на горѣ́ я́влься неизрече́нно Ѳаво́рстѣй, неодержи́мый и незаходи́мый Свѣ́тъ, Отчее сія́ніе, тва́рь уясни́въ, человѣ́ки обожи́, пою́щія: благослови́те, вся́ дѣла́ Госпо́дня, Го́спода.

Священнолѣ́пно стоя́ще Моисе́й же и Илія́ на горѣ́ Ѳаво́рѣ, Боже́ственныя начерта́ніе я́сно ѵпоста́си ви́дѣвше, Христа́ во Оте́честѣй облиста́вша сла́вѣ, воспѣва́ху: благослови́те, вся́ дѣла́ Госпо́дня, Го́спода.

Иже во зра́цѣ Боже́ственнаго ра́ди явле́нія, лице́ просла́вися иногда́ Моисе́ово, Христо́съ же, я́ко ри́зою, свѣ́томъ и сла́вою одѣва́ется, свѣ́та бо самодѣ́теленъ Сы́й, озаря́етъ пою́щія: благослови́те, вся́ дѣла́ Госпо́дня, Го́спода.

Отъ свѣторо́дна о́блака, Христа́ ученицы́ объя́та зря́ще на Ѳаво́рѣ и ни́цы на зе́млю па́дше, у́мъ просвѣ́щше, со Отце́мъ Сего́ поя́ху и Ду́хомъ: благослови́те, вся́ дѣла́ Госпо́дня, Го́спода.

Инъ.

Ирмо́съ: Седмери́цею пе́щь халде́йскій мучи́тель Богочести́вымъ неи́стовно разжже́, си́лою же лу́чшею, спасе́ны сія́ ви́дѣвъ, Творцу́ и Изба́вителю вопія́ше: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Уста́ Бо́жія бы́въ, изъ горта́ни восхи́тилъ еси́ человѣкоубíйцы, и́хже лю́тѣ пожре́, и снѣ́дь содѣ́ла свое́й зло́бѣ, му́дре, и ба́нею пакибытія́ си́хъ приве́лъ еси́ Го́сподеви, пою́щія непреста́нно: лю́діе, превозноси́те во вся́ вѣ́ки.

Пре́лести меча́, зло́бы ору́жія, ору́жіе бы́въ Бо́жія Сло́ва, сла́вне, до конца́ истни́лъ еси́ и́дольскія тре́бы, столпы́ же и хра́мы Боже́ственною си́лою низложи́лъ еси́, хра́мы же вопію́щія Тро́ицы содѣ́лалъ еси́: лю́діе, превозноси́те во вся́ вѣ́ки.

Слове́сное яви́ся не́бо, повѣ́дуя Единоро́днаго сла́ву Бо́жію неизглаго́ланную, Матѳíй всему́дрый, мо́лнія благода́ти, лове́цъ заблу́ждшихъ, свѣ́щникъ боже́ственнаго свѣтозаре́нія, неизрече́нныхъ таи́нникъ, того́ съ весе́ліемъ воспое́мъ согла́сно.

Богоро́диченъ: Па́че естества́ зачала́ еси́, па́че сло́ва родила́ еси́ Содѣ́теля человѣ́ческаго естества́, бы́вша Человѣ́ка, Отцу́ неразлу́чна, Влады́чице Чи́стая. Его́же пое́тъ вся́ тва́рь: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Ужа́сни но́вымъ свѣтоли́тіемъ внеза́пу ученицы́ освѣ́щшеся, дру́гъ дру́га зря́ху, уди́вльшеся же и къ земли́ прекло́ншеся, Тебѣ́, Влады́цѣ всѣ́хъ, поклони́шася.

Шу́мъ изъ о́блака посыла́шеся богогла́сенъ, извѣству́я чу́до: Оте́цъ бо свѣ́товъ, — Се́й е́сть Сы́нъ Мо́й возлю́бленный, — апо́столомъ вопія́ше: Того́ послу́шайте.

Но́вая ви́дѣвше и пресла́вная, гла́съ Оте́ческій внуши́вше, на Ѳаво́рѣ Словесе́ слуги́, изображе́ніе Первообра́знаго, Се́й е́сть, — вопія́ху, — Спа́съ на́шъ.

Образе непремѣ́нный Су́щаго, недви́жиме, печа́ть неизмѣ́нна, Сы́не, Сло́ве, му́дросте и мы́шце, десни́це Вы́шняго, Си́ло, Тя́ воспѣва́емъ со Отце́мъ же и Ду́хомъ.

Инъ.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Дру́га тя́ рече́ Спа́съ, Того́ служа́ща повелѣ́ніемъ, блаже́нне апо́столе, и наслѣ́дника Ца́рствія Своего́, въ бу́дущій стра́шный де́нь сосѣда́теля, Матѳíе прему́дре, двоенадеся́тыхъ учени́къ исполне́ніе.

Вѣ́триломъ, блаже́нне, Креста́ преше́дъ волну́ющееся мо́ре житія́, дости́глъ еси́ ко приста́нищу поко́я и кра́йнему жела́нію, радуяся, ны́нѣ предстои́ши со апо́стольскимъ ли́комъ, моля́ о на́съ Человѣколю́бца.

Свѣ́щникъ вои́стинну златоза́ренъ, свѣти́ло Ду́ха сія́ющее, яви́ся язы́къ тво́й, попаля́ющь иноплеме́нная уче́нія, погаша́ющь о́гнь, му́дре, чуждíй, свѣ́тъ облиста́ющь во тмѣ́ неразу́мія спя́щимъ.

Богоро́диченъ: Уста́вила еси́ еди́на въ жена́хъ кля́тву первозда́нныхъ, Богоневѣ́сто, Неопи́саннаго пло́тію ро́ждши опису́ема, обнови́ла еси́ предѣ́лы естества́, Нескве́рная, разстоя́щая пе́рвѣе пресла́внымъ хода́тайствомъ Твои́мъ соедини́ла еси́.

Свѣти́ленъ апо́стола. Подо́бенъ: Ду́хомъ во святи́лищи.

Тече́ніе кра́сныхъ твои́хъ но́гъ, Матѳíе апо́столе, возврати́въ къ ше́ствію небе́сному, возше́лъ еси́, ра́дуяся, и, Тро́ицѣ предста́въ, во Отцѣ́ ви́диши Сы́на и Ду́ха Боже́ственнаго. Сего́ ра́ди вѣ́рою пресвяще́нную твою́ и боже́ственную пра́зднуемъ па́мять. [Два́жды.]

Сла́ва, и ны́нѣ, пра́здника:

Свѣ́те неизмѣ́нный Сло́ве, Свѣ́та Отца́ нерожде́нна, въ явле́ннѣмъ свѣ́тѣ Твое́мъ, дне́сь на Ѳаво́рѣ Свѣ́тъ ви́дѣхомъ Отца́, Свѣ́тъ и Ду́ха, Свѣ́томъ наставля́ющаго всю́ тва́рь.

На хвали́техъ стихи́ры на 6. Пра́здника 3, гла́съ 2. Подо́бенъ: До́ме Евфра́ѳовъ.

На горѣ́ Ѳаво́рстѣй* Тро́ицы сла́ва* я́вѣ позна́ся,* Тебѣ́ преобразу́ющуся,* Спа́се мо́й Преблагíй.

Облакъ свѣ́телъ,* я́сно простре́ся* въ преображе́ніи,* удиви́ боже́ственныхъ* учени́къ ве́рхъ.

Илія́ съ Моисе́омъ* предста́ша Тебѣ́, Сло́ве,* въ преображе́ніи,* Оте́цъ же свидѣ́тельствоваше,* съ небесе́ вѣща́я.

И апо́стола 3, гла́съ 4. Подо́бенъ: Яко до́бля.

Тро́стію благода́тною* отъ глубины́ су́етства* человѣ́ки извле́клъ еси́, досточу́дне,* Учи́теля ма́ніемъ* повину́вся, Матѳíе,* просвѣ́щшаго по всему́ твое́ разумѣ́ніе,* и апо́стола, и че́стна богогла́сника,* тя́, всеблаже́нне, показа́вша,* Того́ непости́жнаго Божества́.

Иже Ду́ха сія́ніе на тя́ сни́де,* во о́гненнѣ видѣ́ніи,* и тя́, блаже́нне, Боже́ственное прія́телище содѣ́ла,* ско́ро отгоня́ще безбо́жія мглу́,* и мíръ просвѣща́юща* сія́ніемъ всему́дрыхъ твои́хъ слове́съ, тайноглаго́льниче,* апо́столовъ украше́ніе,* Христо́въ самови́дче, блаже́нне.

Мо́лніями проповѣ́данія,* я́же во тмѣ́ сѣдя́щія,* сла́вне, просвѣти́въ,* показа́лъ еси́ сы́ны* Влады́ки и Бо́га вѣ́ры ра́ди,* Его́же страсте́мъ ревнова́лъ еси́ и сме́рти,* и сла́вы бы́лъ еси́ наслѣ́дникъ,* я́ко му́дръ, я́ко богогла́сенъ,* я́ко учени́къ и́стины.

Сла́ва, гла́съ 2:

Оста́вивъ земна́я, послѣ́довалъ еси́ Христу́, и зна́менався дохнове́ніемъ Свята́го Ду́ха, по́сланъ бы́въ отъ Него́ въ язы́ки поги́бшія, обраща́ти человѣ́ки во свѣ́тъ Богоразу́мія, апо́столе Матѳíе, и сконча́въ по́двиги боже́ственныя твоея́ стра́сти, и му́къ разли́чныхъ, ду́шу твою́ Христу́ пре́далъ еси́. Того́ моли́, всеблаже́нне, дарова́ти на́мъ ве́лію ми́лость.

И ны́нѣ, пра́здника, гла́съ то́йже:

Ви́дѣша на горѣ́ Ѳаво́рстѣй, Моисе́й же и Илія́, отъ Дѣ́вы Отрокови́цы Бо́га воплоще́нна человѣ́комъ на избавле́ніе.

Славосло́віе вели́кое, [ектеніи, и отпу́стъ].



НА ЛИТУРГІИ,

Блаже́нна, пра́здника пѣ́снь 4-я, на 4, и апо́стола, пѣ́снь 6-я, на 4. Проки́менъ, пра́здника. И свята́го, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ Дѣя́ній, зача́ло 2. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе отъ Луки́, зача́ло 40. Прича́стенъ пра́здника. И свята́го: Во всю́ зе́млю изы́де вѣща́ніе и́хъ, [и въ концы́ вселе́нныя глаго́лы и́хъ].

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 97 - 106.

/ Къ оглавленію раздѣла /


Наверхъ / Къ титульной страницѣ

0