Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 8-й де́нь.
Свята́го Емиліа́на исповѣ́дника, епи́скопа Кизи́ческаго.

[ВЕЧЕРЪ,]
На Го́споди воззва́хъ: стихи́ры пра́здника, гла́съ 4. Подо́бенъ: Да́лъ еси́ зна́меніе.

О, любозри́теліе* су́щихъ па́че ума́* и любопослу́шницы!* Умно у́зримъ Христа́,* облиста́вша Боже́ственными заря́ми,* и огласи́мся Роди́тельнымъ гла́сомъ,* возлю́бленнаго проповѣ́дающе Сы́на,* укрѣ́пльшаго человѣ́ческую не́мощь на Ѳаво́рѣ* и источи́вшаго просвѣще́ніе ду́шъ на́шихъ.

Дне́сь показа́лъ еси́* Твое́ Божество́, Го́споди,* честны́мъ апо́столомъ Твои́мъ,* Моисе́ю и Иліи́ же,* я́ко Бо́гъ зако́на и благода́ти сы́й,* избавля́я на́съ отъ сме́ртныхъ ны́нѣ соу́зъ,* съ ни́миже Твое́ человѣколю́бное смотре́ніе сла́вимъ,* Іису́се Всеси́льне,* Спа́се ду́шъ на́шихъ.

Ины стихи́ры свята́го, гла́съ то́йже. Подо́бенъ: Зва́нный свы́ше.

Иже о́бразъ Христо́въ я́вѣ поче́тъ,* егда́ Льво́во суровство́ разгорѣ́ся* и лю́ди восколеба́,* обновля́я Копрони́мову безбо́жную е́ресь,* тогда́ сего́, прему́дре, я́вѣ обличи́лъ еси́,* твое́ дерзнове́ніе пріи́мъ,* совоку́плену архіере́евъ прише́ствію.* Тѣ́мже показа́лся еси́ до́блѣйшій* во́инъ Христо́въ, всеблаже́нне,* Его́же моли́* спасти́ и просвѣти́ти ду́ши на́ша.

Иже въ небе́сныя* оби́тели всели́лся еси́,* егда́ сопроти́вный нра́въ безбо́жный* и злочести́вый показа́,* въ заточе́ніихъ осуди́ твою́ тве́рдость.* Тогда́ рая́, отону́дуже испадо́хомъ,* еди́но оте́чество, богогла́се, я́вѣ вѣ́дый,* съ весе́ліемъ, ра́дуяся, претерпѣ́лъ еси́.* Тѣ́мже пра́ведно* нетлѣ́нный сподо́бился еси́ живо́тъ зрѣ́ти, Христа́,* Его́же моли́* спасти́ и просвѣти́ти ду́ши на́ша.

Огненъ язы́къ прему́дро имѣ́я,* егда́ смѣ́сный иноплеме́нный зако́нъ положи́,* не покланя́тися веля́щь* Христо́ву честно́му о́бразу,* Ле́въ окая́нный,* тогда́ ты́ Боже́ственный зако́нъ сопроти́въ положи́лъ еси́,* я́ко прехо́дитъ поклоне́ніе ико́нное,* я́коже нѣ́гдѣ нѣ́кто рече́, къ первообра́зному.* И твои́мъ сло́вомъ, я́ко отъ гро́ма, устраши́ся* звѣ́рь злоимени́тый,* всечестны́й о́тче, богоглаго́ливе свяще́нне.

Сла́ва, и ны́нѣ, гла́съ 1:

Иже дре́вле съ Моисе́омъ глаго́лавый на горѣ́ Сина́йстѣй о́бразы, — А́зъ е́смь, — глаго́ля, — Сы́й, — дне́сь на горѣ́ Ѳаво́рстѣй преобра́жся предъ ученики́, показа́ началообра́зную добро́ту зра́ка, въ Себѣ́ воспріи́мъ человѣ́ческое существо́, и таковы́я благода́ти свидѣ́тели поста́вль Моисе́я и Илію́, о́бщники творя́ше весе́лія, провозвѣща́ющія сла́вное Креста́ ра́ди и спаси́тельное воскресе́ніе.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Гора́ Бо́жія Ѳаво́ръ* о и́мени Твое́мъ,* Спа́се, ра́дуется,* Отцу́ возлю́бленна Тя́* Сы́на проповѣ́дуя.

Сти́хъ: Твоя́ су́ть небеса́,* и Твоя́ е́сть земля́.

Чу́до бя́ше ви́дѣти,* Со́лнца сла́вы,* въ преображе́ніи* чу́вственнаго со́лнца* лучи́ скры́вшаго.

Сти́хъ: Ѳаво́ръ и Ермо́нъ* о и́мени Твое́мъ возра́дуетася.

Отъ земли́ у́бо ученицы́,* Моисе́й же отъ ме́ртвыхъ* и Илія́ я́ко свы́ше,* Тебѣ́ преобразу́ему,* раболѣ́пно предста́ша.

Сла́ва, и ны́нѣ, гла́съ 1:

Твоего́ Единоро́днаго Сы́на прови́дѣвъ Ду́хомъ плотско́е къ человѣ́комъ прише́ствіе, богооте́цъ Дави́дъ, издале́ча къ весе́лію созыва́етъ тва́рь и проро́чески взыва́етъ: Ѳаво́ръ и Ермо́нъ о и́мени Твое́мъ возра́дуются. На сію́ бо возше́дъ го́ру, Спа́се, со ученики́ Твои́ми, очернѣ́вшее Ада́мово естество́, преобра́жся, облиста́ти па́ки сотвори́лъ еси́, претвори́въ е́ въ Твоего́ Божества́ сла́ву же и свѣ́тлость. Тѣ́мже вопіе́мъ Ти́: Содѣ́телю вся́ческихъ, Го́споди, сла́ва Тебѣ́.

Тропа́рь, гла́съ 7:

Преобрази́лся еси́ на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.


НА УТРЕНИ,
[На Бо́гъ Госпо́дь: тропа́рь пра́здника, три́жды.]

По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

На горѣ́ Ѳаво́рстѣй преобрази́лся еси́, Іису́се, и о́блакъ свѣ́телъ, протяза́ющся, я́ко сѣ́нь, апо́столы сла́вою покры́, тѣ́мже и на зе́млю ни́цъ па́даху, не терпя́ще зрѣ́ти свѣ́тлости непристу́пныя сла́вы лица́ Твоего́, безнача́льне Спа́се, Христе́ Бо́же. Иже тогда́ си́мъ свѣ́тъ Тво́й возсія́вый, просвѣти́ ду́ши на́ша.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ и подо́бенъ то́йже:

Непристу́пною Твое́ю, Христе́, сла́вою Боже́ственнаго Твоего́ Свѣ́та преобра́жся, Твоя́ облиста́лъ еси́ боже́ственныя ученики́, Іоа́нна, и Петра́, и Іа́кова, ужаси́лъ еси́ тѣ́хъ Боже́ственною благода́тію. Гла́съ же Оте́чь, возлю́бленнаго Сы́на свидѣ́тельствующъ, слы́шаша и ви́дѣша лица́ Твоего́ сла́ву, Спа́се. Иже всѣ́хъ, Сло́ве, спасти́ хотя́, просвѣти́ ду́ши на́ша.

Сла́ва, и ны́нѣ, то́йже.

Кано́нъ пра́здника ки́ръ Іоа́нна, со ирмосо́мъ на 8, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Моисе́й, на мо́рѣ проро́чески ви́дѣвъ о́блакомъ и столпо́мъ дре́вле о́гненнымъ сла́ву Госпо́дню, вопія́ше: Изба́вителю и Бо́гу на́шему пои́мъ.

Яко ка́менемъ, тѣ́ломъ покры́вся, обоже́ніемъ Неви́димаго зря́, Моисе́й богови́децъ взыва́ше: Изба́вителю и Бо́гу на́шему пои́мъ.

Ты́ на горѣ́ зако́ннѣй и на Ѳаво́рстѣй ви́дѣнъ бы́лъ еси́ Моисе́емъ во мра́цѣ дре́вле, во свѣ́тѣ же ны́нѣ непристу́пнѣмъ Божества́.

Кано́нъ свята́го, на 4, гла́съ 1.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Съ премíрными живы́й чинонача́льствы, богому́дре блаже́нне, творя́щія твое́ ра́достно любе́зное торжество́, о́тче, назира́я, спасе́нія сподо́би.

Ве́сь Влады́цѣ спримѣси́вся и отону́дными облиста́вся огнесія́ньми, все́ просвѣти́лъ еси́ твои́ми уче́ньми благочести́выми торжество́, я́ко священноявле́нъ я́влься, богому́дре богопрія́тне.

Умъ влады́ку страсте́мъ добродѣ́телію, святи́телю, поста́вилъ еси́, я́коже пра́веденъ строи́тель души́ и тѣ́ла, о́тче, подая́ кому́ждо потре́бная.

Таи́нникъ изря́денъ су́щихъ па́че ума́, Це́ркви я́вѣ предстоя́, яви́лся еси́, пресла́вне, и держа́венъ и́стины побо́рникъ, че́люсти льво́въ сокруша́я и загражда́я уста́.

Богоро́диченъ: Еди́наго во двою́ благоче́стно отъ утро́бы Твоея́ рожде́нна вѣ́мы естества́хъ, Пренепоро́чная, Бо́га вку́пѣ па́че естества́ и Человѣ́ка, иму́ща соверше́нна коего́ждо сво́йства.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Осѣня́ющая сла́ва въ сѣ́ни пе́рвѣе и Моисе́еви бесѣ́дующи, Твоему́ уго́днику, о́бразъ бы́сть облиста́вшаго неизрече́нно на Ѳаво́рѣ, Влады́ко, Твоего́ преображе́нія.

Совзыдо́ша Ти́, Сло́ве Единоро́дный, вы́шніи апо́стольстіи верси́ на го́ру Ѳаво́рскую, и сопредста́ша Ти́ Моисе́й же и Илія́, я́ко Бо́жія слуги́, Еди́не Человѣколю́бче.

Бо́гъ Сло́во сы́й, ве́сь зе́мленъ бы́сть, всему́ Божеству́ смѣси́въ человѣ́чество во ѵпоста́си Свое́й, ю́же во двою́ существу́ Моисе́й и Илія́ же ви́дѣша на горѣ́ Ѳаво́рѣ.

Инъ.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Моли́твенника богому́дра Христу́, вѣ́рніи, тя́ предлага́емъ, Того́ ра́ди свѣ́тло до́бльствовавша, и о́бразъ Сего́ поче́тша, и зако́нъ соблю́дша честна́го проповѣ́данія, и ю́же свы́ше вѣ́ру сохра́нша.

Му́чениковъ утвержде́ніе яви́лся еси́, богому́дре досточу́дне, злочести́вое шата́ніе низложи́лъ еси́, Це́ркве я́влься забра́ло незы́блемо и неукло́нно и хода́тай боже́ственъ, тве́рдо облича́я безу́мныя.

Яда е́реси испи́въ до сы́тости, вселука́вый учи́тельнымъ твои́мъ сло́вомъ обличи́ся: свѣ́томъ бо тма́ отгоня́ется и обнажа́ется плете́ніе лука́ваго совѣ́та боже́ственныя му́дрости сія́ньми.

Богоро́диченъ: Свѣ́тлымъ Тя́ гла́сомъ ны́нѣ отъ души́ вои́стинну Богома́терь, Бо́га ро́ждшую, проповѣ́даемъ, воплоще́нна изъ Тебе́ Безпло́тнаго, въ на́съ все́льшася, не преложе́ніе пріе́мша, ни смѣше́ніемъ смѣ́шшася, Всенепоро́чная.

По 3-й пѣ́сни конда́къ свята́го, гла́съ 3:

До́бляго тя́ побо́рника по Тро́ицѣ я́вльшася Це́рковь сла́витъ, пою́щи, Емиліа́не, за ню́же пострада́лъ еси́. Сего́ ра́ди почита́емъ па́мять твою́, язы́ческаго наше́ствія изба́ви рабы́ твоя́.

Сѣда́ленъ, гла́съ то́йже. Подо́бенъ: Боже́ственныя вѣ́ры.

Боже́ственнымъ Ду́хомъ просвѣще́нъ, проповѣ́далъ еси́ со дерзнове́ніемъ правосла́вія, всеблаже́нне, преда́нія и царя́ посрами́лъ еси́ беззако́ннаго, въ заточе́нія непра́ведно отсыла́емь. Отче преподо́бне, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, пра́здника. Подо́бенъ: Красотѣ́ дѣ́вства.

Боже́ственныя Твоея́ сла́вы сія́ніе, я́коже можа́ху, показа́лъ еси́, Сло́ве Бо́жій, ученико́мъ Твои́мъ, на Ѳаво́рстѣй горѣ́ преобразу́яйся, и́мже спросвѣти́хомся и мы́, пою́щіи Тя́, Еди́не Неизмѣ́нне и Безсме́ртне Го́споди, Тебѣ́ бо вѣ́рою вопіе́мъ: сла́ва, Христе́, Ца́рствію Твоему́.

Пѣ́снь 4.

Ирмо́съ: Изъ пло́ти Твоея́ лучи́ Божества́ исхожда́ху проро́комъ и апо́столомъ. Тѣ́мъ нача́льницы, пою́ще, взыва́ху: сла́ва си́лѣ Твое́й, Го́споди.

Иже купину́ сохрани́вый неврежде́ну, прикосну́вшуюся огню́, Моисе́ю богосія́нную пло́ть показа́лъ еси́, Влады́ко, пою́щему: сла́ва си́лѣ Твое́й, Го́споди.

Скры́ся заре́ю Божества́ чу́вственное со́лнце, я́ко на горѣ́ Ѳаво́рѣ ви́дѣвъ Тя́ преобразу́ющася, Іису́се мо́й: сла́ва си́лѣ Твое́й, Го́споди.

Огнь, не опаля́я ве́щи тѣле́сныя, ви́дѣнъ бы́сть невеще́ственъ, я́коже Моисе́ю и апо́столомъ яви́лся еси́, Иліи́ же, Влады́ко, еди́нъ отъ двою́, во дву́ соверше́нну естеству́.

Инъ.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Возмо́глъ еси́ шата́ніе низложи́ти льсти́ваго, присво́ився добродѣ́телію, всеблаже́нне Емиліа́не, Всемогу́щему и Си́льному во бранѣ́хъ, пребога́те, и ны́нѣ зове́ши: сла́ва си́лѣ Твое́й, Го́споди.

Пріима́лъ еси́ го́рькая заточе́нія, отсыла́емь, терпѣли́въ показа́лся еси́, богому́дре Емиліа́не, сло́вомъ благода́ти огра́ждся, священнотаи́нниче чу́дне, Бо́гу взыва́я: сла́ва си́лѣ Твое́й, Го́споди.

Зако́нно яви́лся еси́, изъ дѣ́тства освяще́нъ, по́стными просвѣти́вся, всеблаже́нне Емиліа́не, пе́рвыми обуче́ньми, и архіере́й, священному́чениче, по́слѣжде показа́лся еси́, богоно́се преизря́дне.

Богоро́диченъ: Иже вся́кія вы́ше разумѣва́емый тва́ри, е́же па́че ума́ живонача́льна богозда́нія на земли́ соверша́я та́инства, дѣ́вства укра́шену свѣтлостьми́, во Твою́ утро́бу всели́ся, Пречи́стая.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Вѣтíйствующій язы́къ Твоего́ вели́чества не мо́жетъ вѣща́ти: я́ко бо, Держа́й живо́тъ и сме́ртію Влады́й, предста́вилъ еси́ на Ѳаво́рстѣй горѣ́ Моисе́я и Илію́, свидѣ́тельствующія Твое́ Божество́.

Иже рука́ми неви́димыми созда́въ по о́бразу Твоему́, Христе́, человѣ́ка, началообра́зную Твою́ въ созда́ніи добро́ту показа́лъ еси́, не я́ко во о́бразѣ, но я́ко Са́мъ Сы́й по существу́, Бо́гъ бы́лъ еси́ и Человѣ́къ.

Сраствори́вся неслія́нно, у́гль горя́щь показа́лъ еси́ на́мъ Божества́, попаля́ющь у́бо грѣхи́, ду́ши же просвѣща́ющь, на Ѳаво́рстѣй горѣ́, Моисе́я со Иліе́ю, ученико́въ же старѣ́йшія удиви́лъ еси́.

Инъ.

Ирмо́съ: Бо́гъ Сы́й мíра, Оте́цъ щедро́тъ, Вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Разумѣ́въ проразумѣ́ніемъ боже́ственнымъ Христо́съ вели́кія твоея́ души́ предложе́ніе, вели́кими почестьми́ украси́ я́вѣ, оде́ждами свяще́нства тя́ уясни́въ и му́ченическими страда́ньми, священнотаи́нниче всече́стне.

Привле́къ благода́ть Ду́ха, рѣ́ки уче́ній поче́рплъ еси́, всеблаже́нне освяще́нне, ста́да Христо́ва, тѣ́мже, тобо́ю о́бразъ Его́ почита́ти навы́кше и святы́хъ всѣ́хъ, богобо́рца посрамля́емъ.

Умертви́въ пло́ти твоея́ мудрова́ніе въ по́стныхъ болѣ́знехъ, пребога́те, заре́ю Ду́ха оживи́лъ еси́ у́мъ. Тѣ́мже во обои́хъ просія́лъ еси́, іера́рше, Бо́гу благоугоди́въ, священному́чениче досточу́дне.

Богоро́диченъ: Святы́хъ Свята́я, Дѣ́во Чи́стая, святы́хъ Свята́го родила́ еси́, всѣ́хъ освяща́ющаго Христа́ Изба́вителя. Тѣ́мже Тя́, Цари́цу и Влады́чицу всѣ́хъ, я́ко Ма́терь Зижди́теля тва́ри проповѣ́дуемъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Яко ве́ліе и стра́шное узрѣ́ся видѣ́ніе дне́сь: съ небесе́ у́бо чу́вственное, отъ земли́ же несравне́нное, облиста́ Со́лнце пра́вды мы́сленное на горѣ́ Ѳаво́рстѣй.

Пре́йде у́бо сѣ́нь зако́нная, изнемо́гшая, пріи́де же я́вѣ Христо́съ и́стина, — Моисе́й возопи́, на Ѳаво́рѣ ви́дѣвъ Твое́ Божество́.

Сто́лпъ о́гненный — Христа́ преобразу́ющася, о́блакъ же — я́вѣ благода́ть Ду́ха, осѣни́вшую на Ѳаво́рѣ, предсказа́ша явле́ннѣйше.

Инъ.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ нетлѣ́нія, Ро́ждшую сохрани́ неврежде́нну.

Уста́вити восхотѣ́въ па́жить е́реси, усе́рдно къ бѣда́мъ отлучи́лся еси́ и обличи́лъ еси́ со дерзнове́ніемъ, всеблаже́нне, нра́въ держа́щаго безбо́жія, ты́ пе́рвѣе глаго́лати наче́нъ собра́нному собо́ру богому́дрому.

Еди́ного Христа́ те́плѣ любя́ и Сего́ улучи́ти Боже́ственнаго сія́нія жела́я, іера́рше Госпо́день богопрія́тне, му́ченическу показа́лъ еси́, о́тче, тве́рдость, просія́въ пе́рвѣе поще́ніемъ, и сугу́бы вѣнцы́ прія́лъ еси́ я́вѣ.

Горѣ́ тво́й у́мъ Бо́гу бли́зъ и Боже́ственными заря́ми, блаже́нне, сія́юще, имѣ́лъ еси́, преподо́бне, легко́ житія́ преплы́лъ еси́ мо́ре и ко приста́нищемъ небе́снымъ ны́нѣ устреми́лся еси́, вѣ́тры Свята́го Ду́ха направля́емь, богодухнове́нне.

Богоро́диченъ: Спасти́ человѣ́ческое естество́, я́ко Милосе́рдъ, истлѣ́вшее лю́тѣ за́вистію зміи́ною, Пребоже́ственный благоизво́ливъ, во чре́во Твое́ всели́ся, и пло́ть неизмѣ́нна бы́сть, еди́ну Тя́, Чи́сту, обрѣ́тъ, Богоро́дице Дѣ́во Пречи́стая.

Конда́къ пра́здника, гла́съ 7. Самогла́сенъ:

На горѣ́ преобрази́лся еси́, и я́коже вмѣща́ху ученицы́ Твои́, сла́ву Твою́, Христе́ Бо́же, ви́дѣша, да егда́ Тя́ у́зрятъ распина́ема, страда́ніе у́бо уразумѣ́ютъ во́льное, мíрови же проповѣ́дятъ, я́ко Ты́ еси́ вои́стинну Отчее сія́ніе.

Икосъ:

Воста́ните, лѣни́віи, и́же всегда́ ни́зу пони́кшіи въ зе́млю, души́ моея́ по́мыслы, возми́теся и возвы́ситеся на высоту́ Боже́ственнаго восхожде́нія. Притеце́мъ къ Петру́ и къ Зеведе́евымъ и вку́пѣ со о́нѣми Ѳаво́рскую го́ру дости́гнемъ, да ви́димъ съ ни́ми сла́ву Бо́га на́шего, гла́съ же услы́шимъ, его́же свы́ше слы́шаша и проповѣ́даша Отчее сія́ніе.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Ны́нѣ ви́дѣна бы́ша апо́столомъ неви́димая Божества́ во пло́ти, на горѣ́ Ѳаво́рстѣй облиста́вша, вопію́щимъ: благослове́нъ еси́, Го́споди Бо́же, во вѣ́ки.

Ужасо́шася стра́хомъ, уди́вльшеся благолѣ́пію Боже́ственнаго Ца́рства, на горѣ́ Ѳаво́рстѣй апо́столи, вопію́ще: благослове́нъ еси́, Го́споди Бо́же, во вѣ́ки.

Ны́нѣ неуслы́шанная услы́шана бы́ша: безъ отца́ бо Сы́нъ отъ Дѣ́вы Оте́ческимъ гла́сомъ сла́вно свидѣ́тельствуется, я́ко Бо́гъ и Человѣ́къ, То́йже во вѣ́ки.

Положе́ніемъ не бы́лъ еси́ Вы́шняго, существо́мъ же Сы́нъ возлю́бленъ, пре́жде Сы́й, на́мъ прибли́жился еси́ непрело́жно: благослове́нъ еси́, Го́споди Бо́же, во вѣ́ки.

Инъ.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Святи́телей благолѣ́пное украше́ніе, о́тче, ты́ еси́ вои́стинну: ца́рствовавъ бо надъ страстьми́, сто́лпъ неруши́мь яви́лся еси́, досточу́дне, Це́ркви забра́ло, хва́льнаго велича́я Бо́га, препросла́вленнаго.

Но́вый Дави́дъ на́мъ показа́лся еси́, иноплеме́нная уче́нія пра́щею низложи́въ добролу́чныхъ твои́хъ слове́съ, пресла́вне, и учи́тельными стрѣля́ньми, хва́льнаго имену́я Бо́га, препросла́вленнаго.

Ста́лъ еси́ свѣ́тло, о́тче, на суди́щи мучи́теля Христа́ ра́ди и словеса́, я́ко отъ исто́чника Боже́ственна, источи́лъ еси́, всѣ́мъ бо проповѣ́далъ еси́ ико́нное поклоне́ніе, я́вѣ вѣ́дый преходи́ти то́ къ первообра́зному.

Богоро́диченъ: Страннолѣ́пно дѣ́вствуеши, ро́ждши всѣ́хъ Творца́, на престо́лѣ херуви́мстѣмъ почива́ющаго, еди́на Всеблаже́нная, Дѣ́во Ма́ти Всепѣ́тая, хва́льнаго отце́въ Бо́га и препросла́вленнаго.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Услы́шавше, Влады́ко, отъ Отца́ свидѣ́тельствуема, и я́ко человѣ́ческа твердѣ́йша зра́ка зрѣ́ти лица́ Твоего́ блиста́нія не терпя́ще, Твои́ ученицы́ на зе́млю ни́цъ па́даху, со стра́хомъ пою́ще: свяще́нницы, благослови́те, лю́діе, превозноси́те во вся́ вѣ́ки.

Ца́рствующимъ еси́ Ца́рь прекра́сенъ и и́же всю́ду владя́щимъ Госпо́дь си́ленъ, Блаже́нъ и во свѣ́тѣ живы́й непристу́пнѣмъ, Ему́же ученицы́ уди́вльшеся, Моисе́й же и Илія́ вопія́ху: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Яко не́бомъ владу́щему, и земле́ю госпо́дствующему, и надъ преиспо́дними о́бласть иму́щему, Христе́, предста́ша Ти́: отъ земли́ у́бо — апо́столи, я́ко съ небесе́ же — Ѳесви́тянинъ Илія́, Моисе́й же — отъ ме́ртвыхъ, пою́ще согла́сно: лю́діе, превозноси́те во вся́ вѣ́ки.

Уны́нія ражда́ющія печа́ли на земли́ оста́виша, апо́столовъ избра́нніи, Человѣколю́бче, я́ко Тебѣ́ послѣ́доваша, ко и́же отъ земли́ преложе́нію боже́ственнаго житія́. Тѣ́мже, и по достоя́нію Твоего́ Богоявле́нія улучи́вше, поя́ху: лю́діе, превозноси́те Его́ во вѣ́ки.

Инъ.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Всю́ огне́мъ мы́сленнымъ хвра́стную е́реси попали́лъ еси́ пе́щь, призыва́ніемъ боже́ственнымъ, я́коже Илія́ іере́и сту́дныя закла́лъ еси́ мече́мъ духо́внымъ. И ны́нѣ воспѣва́еши, веселя́ся: да благослови́тъ тва́рь вся́ Го́спода и превозно́ситъ во вся́ вѣ́ки.

Благода́ти же и си́лы Боже́ственныя испо́лненъ яви́лся еси́, треблаже́нне, цѣлому́дрія добро́тою укра́шенъ боголѣ́пно, благоче́стіе непрело́жное держа́лъ еси́. Съ ни́мже ны́нѣ Влады́цѣ предстоя́, да благослови́тъ тва́рь, вопіе́ши, Го́спода и превозно́ситъ во вся́ вѣ́ки.

Свы́ше пѣвцы́ твоя́ назира́еши, свяще́нный о́тче богому́дре, показу́я стезю́ на́мъ пра́вую твои́ми моли́твами и сокруша́я ересе́й шата́нія, да со дерзнове́ніемъ пое́мъ, ико́ну Христо́ву почита́юще, и поклони́мся, и Богоро́дицы, и святы́хъ всѣ́хъ.

Богоро́диченъ: Поро́ка нѣ́сть въ добро́тѣ Твое́й, Дѣ́во: Ты́ бо, еди́на Пречи́стая, яви́лася еси́ отъ вѣ́ка Всечи́стая, дѣ́вства луча́ми озари́вши мíръ и чистоты́ свѣ́томъ. Тѣ́мже, воспѣва́юще, пое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческого чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Да Твое́ пока́жеши я́вѣ неизрече́нное второ́е сни́тіе, я́ко да вы́шній Бо́гъ яви́шися, стоя́ посредѣ́ бого́въ, апо́столъ на Ѳаво́рѣ, Моисе́я же и Илію́, неизрече́нно осія́лъ еси́. Тѣ́мже вси́ Тя́, Христе́, велича́емъ.

Пріиди́те, Мнѣ́ покори́теся, лю́діе, возше́дше на го́ру святу́ю пренебе́сную, невеще́ственно ста́немъ во гра́дѣ Жива́го Бо́га и у́зримъ мы́сленно Божество́ невеще́ственное, Отца́ и Ду́ха, въ Сы́нѣ Единоро́днѣмъ облиста́ющее.

Привле́клъ еси́ любо́вію мя́, Спа́се, и премѣни́лъ еси́ Боже́ственнымъ Твои́мъ жела́ніемъ, но попали́ огне́мъ невеще́ственнымъ грѣхи́ моя́ и насы́титися Твоея́ пи́щи сподо́би, да, обое́ игра́я, велича́ю, Бла́же, вели́чія Твоя́.

Инъ.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Обрѣ́лъ еси́ болѣ́зней возме́здіе, въ небе́сныхъ, богоно́се, се́лѣхъ, Емиліа́не, ны́нѣ жи́ти сподо́бленъ му́ченикъ съ боже́ственными во́инствы, я́ко боже́ственный святи́тель, священному́чениче пречу́дне.

Сло́вомъ и му́дростію изря́дне укра́шенъ яви́лся еси́ повелѣ́ньми, Емиліа́не, тѣ́мже Христо́съ вѣнча́ честну́ю твою́ главу́, пребога́те, Его́же ны́нѣ моли́ о на́съ при́сно, мо́лимся.

Врата́ небе́сная, преподо́бне, отве́рзъ, Влады́ка прія́тъ, Емиліа́не, твою́ ду́шу, на мѣ́стѣхъ прохла́дныхъ упоко́ивъ, я́ко пра́ведника, и ны́нѣ обхо́диши о́крестъ престо́ла всѣ́хъ Царя́.

Богоро́диченъ: О, па́че ума́ чуде́съ Твои́хъ, Богороди́тельнице, еди́на Всечи́стая Влады́чице! Вся́ бо ужаса́етъ а́нгельская во́инства и человѣ́ковъ разли́чныя собо́ры. Тѣ́мъ Тя́, Богоро́дице, непреста́нно велича́емъ.

Свѣ́тиленъ пра́здника:

Свѣ́те неизмѣ́нный Сло́ве, Свѣ́та Отца́ нерожде́нна, въ явле́ннѣмъ свѣ́тѣ Твое́мъ, дне́сь на Ѳаво́рѣ свѣ́тъ ви́дѣхомъ Отца́, свѣ́тъ и Ду́ха, свѣ́томъ наставля́ющаго всю́ тва́рь.

Сла́ва, и ны́нѣ, то́йже.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Бла́го же па́че ума́ ра́дости,* е́йже сподо́бися* на Ѳаво́рстѣй горѣ́* Боже́ственный ве́рхъ* учени́къ Твои́хъ, Го́споди.

Сти́хъ: Твоя́ су́ть небеса́,* и Твоя́ е́сть земля́.

Зна́меніе новолѣ́пно* Божества́ показу́етъ* пре́жде Креста́ ученико́мъ,* я́ко со́лнце, облиста́въ,* Христо́съ на горѣ́ дне́сь.

Сти́хъ: Ѳаво́ръ и Ермо́нъ* о и́мени Твое́мъ возра́дуетася.

Пріиди́те, земноро́дніи,* взы́демъ усе́рдно* на го́ру Ѳаво́рскую,* зрѣ́ти во сла́вѣ* Христа́ преобразу́ющася.

Сла́ва, и ны́нѣ, гла́съ 1:

Неодержи́мое Твоего́ свѣтоли́тія, и непристу́пное Божества́, зря́ще апо́столовъ лу́чшіи, на горѣ́ преображе́нія, безнача́льне Христе́, Боже́ственнымъ измѣни́шася у́жасомъ, и о́блакомъ осія́вшеся свѣ́тлымъ, гла́съ слы́шаху Оте́чь, извѣству́ющь та́инство Твоего́ вочеловѣ́ченія, я́ко еди́нъ еси́ и по воплоще́ніи, Сы́нъ Единоро́дный и Спа́съ мíра.


НА ЛИТУРГІИ,

Блаже́нна пра́здника, пѣ́снь 3-я, обои́хъ кано́новъ, со ирмосо́мъ на 6.

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 90 – 97.

/ Къ оглавленію раздѣла /


Наверхъ / Къ титульной страницѣ

0