Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 8-й де́нь.
Слу́жба на пренесе́ніе честны́хъ и многоцѣле́бныхъ моще́й преподо́бныхъ и богоно́сныхъ оте́цъ на́шихъ Зоси́мы и Савва́тія, Солове́цкихъ нача́льниковъ, но́выхъ чудотво́рцевъ.

Въ лѣ́то 7074 (1566) пренесены́ бы́ша мо́щи святы́хъ отъ предѣ́лъ во свою́ и́мъ це́рковь.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Небе́сныхъ чино́въ.

Небе́сныхъ бла́гъ жела́юще,* мірска́я сла́дкая отверго́сте,* ненасы́тимыя сла́дости рачи́теліе бы́сте,* а́лчбою и жа́ждею томя́ себе́,* е́же ны́нѣ вои́стинну обрѣто́сте,* отцы́ преподо́бніи Зоси́мо и Савва́тіе.

До́льняя, я́ко преходя́щая,* отве́ргше разу́мно,* вы́шняя, при́сно пребыва́ющая, возлюби́сте,* блаже́нніи отцы́ Зоси́мо и Савва́тіе,* и та́мо водворя́етеся* добродѣ́телей восхожде́ньми.

Воздержа́ніемъ сла́сти попра́сте* и сле́зными исто́чники* пла́мень погаси́сте страсте́й;* тѣ́мже зе́млю ны́нѣ кро́ткихъ наслѣ́довавше,* свеселя́етеся преподо́бнымъ и пра́веднымъ,* отцы́ святíи Зоси́мо и Савва́тіе.

Сла́ва, гла́съ 2:

Пріиди́те, по́стническое сосло́віе, дне́сь ублажи́мъ и́хже вои́стинну блаже́нныхъ оте́цъ, по́стникомъ бо удобре́ніе яви́шася, добродѣ́тельми украси́вшеся изря́дно. Тѣ́мже, любо́вію соше́дшеся, духо́внѣ торжеству́имъ, къ ни́мже возопіе́мъ: о преподо́бніи отцы́ Зоси́мо и Савва́тіе, я́ко иму́ще дерзнове́ніе ко Христу́ Бо́гу, ми́ръ и оставле́ніе испроси́те любо́вію чту́щимъ всечестну́ю па́мять ва́шу.

И ны́нѣ, пра́здника.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ добродѣ́телей* вы́ показа́стеся* и прія́телище дарова́ніемъ,* отцы́ преподо́бніи* Зоси́мо и Савва́тіе.

Сти́хъ: Честна́ предъ Го́сподемъ* сме́рть преподо́бныхъ Его́.

Страсте́й побѣди́тели,* пло́ти томи́тели,* язы́ку воздержа́тели,* сласте́мъ умертви́тели бы́сте,* преподо́бніи Зоси́мо и Савва́тіе.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Чи́стыми ва́шими моли́твами* Бо́гови прибли́жившеся,* благода́ть имѣ́ете* нечи́стыя отгоня́ти ду́хи отъ человѣ́къ,* преподо́бніи отцы́ Зоси́мо и Савва́тіе.

Сла́ва, и ны́нѣ, [гла́съ и подо́бенъ то́йже]:

Обра́дованная, ра́дуйся,* я́же Ра́дость мíру ро́ждшая,* Христа́ Жизнода́вца,* и прама́тернюю, Дѣ́во,* печа́ль отъе́мшая.

Тропа́рь, гла́съ 8:

Яко свѣти́льницы яви́стеся всесвѣ́тліи во ото́цѣ окіа́на мо́ря, преподо́бніи отцы́ Зоси́мо и Савва́тіе, вы́ бо, кре́стъ Христо́въ на ра́мо взе́мше, усе́рдно Тому́ послѣ́довасте и, чистото́ю Бо́гови прибли́жившеся, отону́дуже си́лами чуде́съ обогати́стеся. Тѣ́мъ и мы́ любе́зно притека́емъ къ ра́камъ честны́хъ моще́й ва́шихъ и уми́льно глаго́лемъ: о преподо́бніи, моли́те Христа́ Бо́га спасти́ся душа́мъ на́шимъ.

Сла́ва, и ны́нѣ, пра́здника.



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 10, пра́здника 4 и святы́мъ на 6.

Стихи́ры преподо́бному Зоси́мѣ, гласъ 8. Подо́бенъ: О, пресла́внаго чудесе́!

Отче преподо́бне Зоси́мо,* впери́въ у́мъ тво́й къ Бо́гу вѣ́рою,* мірска́го смѣше́нія* возгнуша́лся еси́ непостоя́ннаго* и, кре́стъ тво́й взе́мъ,* Всеви́дцу послѣ́довалъ еси́,* тѣ́ло непокори́вое* по́двиги воздержа́нія* по́мыслу порабо́тивъ* си́лою Боже́ственнаго Ду́ха.

Отче богому́дре Зоси́мо,* ты́ отъ утро́бы ма́терни* Христу́ прибли́жился еси́,* и всѣ́мъ смы́сломъ Тому́ прилѣжа́лъ еси́,* и, отъ твои́хъ по́двигъ Бо́гу Вседержи́телю* плоды́ досто́йныя прине́слъ еси́, преподо́бне,* добродѣ́тельными цвѣты́ украша́емь,* тѣ́мъ благи́хъ наслажде́ніе воспрія́лъ еси́, досточу́дне.

Преподо́бне о́тче* прему́дре Зоси́мо,* боля́щимъ ты́ яви́лся еси́ исцѣле́ніе,* и хромы́мъ хожде́ніе,* и всѣ́мъ, притека́ющимъ съ вѣ́рою* къ цѣльбоно́сному гро́бу твоему́* и прося́щимъ по́мощи и заступле́нія,* моли́твами твои́ми* исцѣле́ніе неску́дно подава́еши.

Ины стихи́ры преподо́бному Савва́тію, гла́съ 2. Подо́бенъ: Егда́ отъ дре́ва.

Егда уязви́лся еси́* боже́ственнымъ жела́ніемъ,* тогда́, вся́, я́же въ мíрѣ кра́сная,* нивочто́же вмѣни́въ,* во слѣ́дъ Спаси́теля поше́лъ еси́;* бога́тство мимотеку́щее* презрѣ́лъ еси́ до́блественнѣ,* сла́ву же и могу́щество,* я́ко ничто́же су́щее, оплева́лъ еси́.* Моли́, мо́лимъ тя́,* спасти́ и просвѣти́ти ду́ши на́ша.

Егда́ вше́лъ еси́ въ киновíю, Савва́тіе,* тогда́ своея́ во́ли до конца́ совле́кшися,* въ послуша́ніи пребы́лъ еси́ непререка́тельнѣ* и, всѣ́мъ покаря́яся, тружда́лся еси́,* доса́ды же и безче́стія* пріе́мля въ ра́дованіи;* тѣ́мже и Госпо́дь,* зря́ твое́, о́тче, смире́ніе бла́го,* прославля́етъ тя́.

Егда́ обѣ́ты и́ночества* Го́сподеви возда́лъ еси́,* тогда́, у́мное о́ко* бо́дрственно на не́бо впери́въ,* мы́сленныя враги́ слеза́ми потопи́лъ еси́;* и, непоро́чно ходи́ти* въ путе́хъ зако́на Госпо́дня* ду́шу утверди́вши, Савва́тіе,* дерзнове́ніе къ Бо́гу стяжа́лъ еси́.* Сего́ ра́ди мо́лимъ тя́,* Того́ моли́ спасти́ и просвѣти́ти ду́ши на́ша.

Сла́ва, гла́съ 1:

Дне́сь пресвѣ́тлая на́мъ наста́ па́мять преподо́бныхъ оте́цъ на́шихъ Зоси́мы и Савва́тія, ю́же, соше́дшеся, досто́йно почти́мъ, во псалмѣ́хъ, и пѣ́снехъ, и пѣ́ніихъ духо́вныхъ взыва́юще, и, тѣ́хъ чуде́снымъ ра́камъ предстоя́ще, си́це рце́мъ: ра́дуйтася, сокро́вища неистощи́маго храни́ла; ра́дуйтася, иму́щія исто́чника въ себѣ́ приснотеку́щаго; ра́дуйтася, превожделѣ́нныя на́мъ ра́цѣ, нося́щія вселюбе́зныхъ оте́цъ цѣльбо́носныя мо́щи; ра́дуйтася, люботру́дныя пло́ти показу́ющія; ра́дуйтася, благоуха́ющія на́мъ свяще́нныя арома́ты. О, чудотвори́вы ра́цѣ, цѣлу́юще ва́съ, пріе́млемъ благода́ть и Благода́теля Бо́га прославля́емъ, прославля́ющаго рабы́ Своя́ бога́тыми дарова́ніи, вопію́ще Ему́: о всѣ́хъ, Благíй Го́споди, сла́ва Тебѣ́.

И ны́нѣ, пра́здника.
Вхо́дъ. Проки́менъ дне́ и чте́нія три́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На литíи стихи́ры, гла́съ 1:

Преподо́бне о́тче Савва́тіе, соше́дшеся любо́вію въ па́мять твою́ ко всечестнѣ́й и чудотво́рнѣй ти́ ра́цѣ, свѣ́тло торжеству́юще и во гла́сѣхъ пѣ́сненныхъ пою́ще, вопіе́мъ: моли́ся Го́сподеви поми́ловатися душа́мъ на́шимъ.

Свѣ́тлая па́мять твоя́, преподо́бне о́тче Зоси́мо, на́мъ сердца́ просвѣща́етъ, зря́ще бо честну́ю ти́ ра́ку, врачевство́ страсте́мъ, неудо́бь цѣли́мымъ, прославля́емъ просла́вльшаго тя́ Го́спода и твоя́ труды́ и по́двиги вѣнча́вша благода́тію. Усе́рдно и мы́, подвиго́мъ и трудо́мъ е́мшеся, твое́ю стезе́ю позна́хомъ ходи́ти во слѣ́дъ Христу́ Бо́гу, Его́же моли́ спасти́ и просвѣти́ти ду́ши на́ша.

Гла́съ 2:

Предстоя́ще гро́бу знаменоно́сному преподо́бнаго отца́ на́шего, о празднолю́бцы, возопіе́мъ похва́льными гла́сы, глаго́люще: ка́ко тя́ ублажи́мъ, Савва́тіе, на земли́ пожи́вша па́че человѣ́ка и въ вы́шнихъ блажи́маго со всѣ́ми уго́ждшими Го́сподеви? Съ ни́ми же предстоя́ во свѣ́тѣ Боже́ственнѣмъ, моли́, мо́лимъ тя́, изба́витися на́мъ отъ собла́знъ льсти́ваго и спасти́ся душа́мъ на́шимъ.

По успе́ніи твое́мъ, блаже́нне Зоси́мо, учи́тельница на́мъ быва́етъ твоя́ ра́ка, при́сно бо излива́ющимися чудесы́ вопіе́тъ: возлюби́те Го́спода, да обря́щете благода́ть вѣ́чную, и ничто́же па́че Его́ почти́те, да, егда́ пріи́детъ, обря́щете поко́й со избра́нными Его́, его́же да улучи́мъ твои́ми моли́твами.

Гла́съ 4:

Дне́сь соше́дшеся, бра́тіе, духо́внѣ почти́мъ преподо́бныхъ оте́цъ Зоси́му и Савва́тія, и́же посто́мъ тѣлеса́ своя́ изнури́ша, воздержа́ніемъ стра́сти потреби́ша, и бдѣ́ніемъ у́мъ очи́стиша, моли́твами же ду́ши просвѣти́ша, нището́ю бога́тство прія́ша благода́ти, и послуша́ніемъ Бо́га благопослу́шна стяжа́ша, чистото́ю жили́ще Пресвята́го Ду́ха бы́ша; и́хже ра́ди враго́въ шата́нія Христо́съ низложи́въ, да́руетъ и на́мъ ве́лію ми́лость.

Сла́ва, гла́съ 8:

Мона́ховъ мно́жества, наста́вники ва́съ чти́мъ, отцы́ святíи, ва́ми бо пу́ть пра́вый вои́стинну ходи́ти позна́хомъ. Блаже́ни есте́, я́ко Христу́ рабо́тасте и вра́жію обличи́сте си́лу, а́нгеломъ собесѣ́дницы и святы́мъ соприча́стницы и пра́веднымъ, съ ни́миже моли́теся Го́сподеви поми́ловатися душа́мъ на́шимъ.

И ны́нѣ, пра́здника.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Пріиди́те и пріими́те, бра́тіе,* лію́щіяся благода́ти* отъ гро́ба преподо́бнаго отца́ Савва́тія,* то́й бо подвиза́ся безъ лѣ́ности* во вре́меннѣй жи́зни* и я́ко безпло́тенъ во пло́ти поживе́,* тѣ́мже и прія́тъ да́ры отъ Христа́ Бо́га* и на́мъ про́ситъ очище́нія* и ве́лія ми́лости.

Сти́хъ: Честна́ предъ Го́сподемъ* [сме́рть преподо́бныхъ Его́].

Цѣльбоно́сному твоему́ гро́бу,* о́тче на́шъ Зоси́мо,* вся́къ приходя́й съ вѣ́рою не посрами́тся,* пріе́млетъ бо, и́хже тре́буетъ,* прославля́ющу тя́ Го́споду,* я́ко благоуго́дна раба́ бы́вша своему́ Влады́цѣ* и Того́ за́повѣди сохра́ньша.* Тѣ́мже тя́ чти́мъ и ублажа́емъ.

Сти́хъ: Блаже́нъ му́жъ, боя́йся Го́спода,* [въ за́повѣдехъ Его́ восхо́щетъ зѣло́].

Исто́чникъ приснотеку́щій* врачевства́ безме́зднаго* гро́бъ тво́й, досточу́дне о́тче Савва́тіе:* о вели́кія благода́ти,* о си́лы живоно́снаго мертвеца́!* Его́же моли́твами, Іису́се Царю́,* спаси́ ду́ши на́ша,* я́ко Еди́нъ Милосе́рдъ.

Сла́ва, гла́съ 4:

Возвесели́ся явле́нно, Христо́ва Це́ркве честна́я, и торжеству́й свѣ́тло, возсія́ бо дне́сь пресвѣ́тлая и всепра́зднственная па́мять [пренесе́нія честны́хъ моще́й] преподо́бныхъ и богоблаже́нныхъ оте́цъ Зоси́мы и Савва́тія. Имаши бо въ себѣ́ принесе́нное неистощи́мое сокро́вище, пречестны́я и всебога́тыя ра́ки моще́й преподо́бныхъ Зоси́мы и Савва́тія, облагоуха́ющи вѣ́рнымъ, и веселя́щи душе́вная чу́вства и тѣле́сная, и исцѣле́нія подаю́щи, и прося́щи отъ Бо́га ве́лія ми́лости, я́ко да ми́лостивъ бу́детъ на́мъ въ де́нь Су́дный.

И ны́нѣ, пра́здника.

[На благослове́ніи хлѣ́бовъ: Тропа́рь преподо́бныхъ, два́жды [пи́санъ на ма́лѣй вече́рни] и пра́здника, еди́ножды.]



[НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, преподо́бныхъ. И ны́нѣ, пра́здника.]

По 1-й каѳи́смѣ сѣда́ленъ, гла́съ 1:

Житіе́ на земли́ благоче́стно сконча́сте, чи́сто селе́ніе Свято́му Ду́ху яви́стеся, просвѣща́юще и́же вѣ́рою приходя́щихъ къ честны́мъ моще́мъ ва́шимъ, блаже́нніи; моли́те Влады́ку Христа́ Бо́га просвѣти́ти ду́ши пра́зднующихъ всечестну́ю па́мять ва́шу, богому́дріи Зоси́мо и Савва́тіе. [Два́жды.]

Сла́ва, и ны́нѣ, пра́здника.

По 2-й каѳи́смѣ сѣда́ленъ, гла́съ 5:

По́стники Госпо́дни пѣ́сньми почти́мъ, умертви́вшихъ вся́ прило́ги страсте́мъ, воздержа́ніемъ и тве́рдымъ терпѣ́ніемъ, вои́стинну посрами́вше зѣло́ проти́внаго и всю́ горды́ню его́. [Два́жды.]

Сла́ва, и ны́нѣ, пра́здника.

По поліеле́и сѣда́ленъ, гла́съ 8:

Егда́, блаже́нніи, къ боже́ственному жела́нію у́мъ сво́й впери́сте, тогда́ оста́висте до́лу влеку́щее мудрова́ніе и въ пусты́ню всели́стеся, въ морскíй о́стровъ, идѣ́же процвѣто́сте, я́ко ке́дръ добродѣ́тели прекра́сный, страсте́й искорени́вше те́рніе, и въ не́мъ насади́сте плоды́ трудо́въ свои́хъ, тѣ́мже и пожа́сте рукоя́тіе, неотъе́млемо бога́тство на небесѣ́хъ. Зоси́мо и Савва́тіе преподо́бніи, моли́те Христа́ Бо́га согрѣше́ній оставле́ніе пода́ти чту́щимъ любо́вію святу́ю па́мять ва́шу. [Два́жды.]

Сла́ва, и ны́нѣ, пра́здника.

[Степе́нна, 1-й антифо́нъ 4-го гла́са.] Проки́менъ, [гла́съ 4]: Честна́ предъ Го́сподемъ* [сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе...] Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бніи отцы́, слу́хъ сво́й смире́нно Ева́нгелію Христо́ву приклони́вше, призыва́ніе отъ Вы́шняго во оби́тели небе́сныя прія́ли и, Тому́ вѣ́рно послѣ́дующе, мíра кра́сная во уме́ты вмѣни́вше, еди́ныя добро́ты вожделѣ́сте Христа́; Ему́же прилѣ́жно моли́теся низпосла́ти мíрови ми́ръ и Це́рквамъ единомы́сліе, Импера́тору на́шему побѣ́дное на враги́ одолѣ́ніе и душа́мъ на́шимъ ве́лію ми́лость.

Кано́нъ пра́здника со ирмосо́мъ на 6 и преподо́бнымъ отце́мъ на 8, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Просвѣще́ніемъ Трисо́лнечнаго Божества́ озари́вшеся, прему́дріи, свѣти́ла яви́стеся, осіява́юща всю́ду; тѣ́мъ и на́съ, те́мностію страсте́й омраче́нныхъ, просвѣще́ніемъ благода́ти озари́ти помоли́теся и душа́мъ получи́ти спасе́нія.

Свѣ́томъ Боже́ственныя благода́ти просвѣща́еми, Зоси́мо и Савва́тіе преблаже́нніи, вѣ́рно свѣтоно́сную ва́шу па́мять торжеству́ющихъ просвѣти́те и отъ тмы́ грѣхо́вныя моли́твами свои́ми, преподо́бніи, изба́вите.

Ду́ху Свято́му хра́мъ, прему́дріи, бы́сте, и къ Нему́ все́ духо́вное жела́ніе обрати́сте, и сего́ ра́ди кро́ткихъ зе́млю наслѣ́довасте; душе́вную на́шу стра́стную бу́рю, преподо́бніи, укроти́те, да, въ тишинѣ́ боже́ственнѣй бы́вше, пѣсносло́вимъ ва́ша по́двиги.

Богоро́диченъ: Лю́тыми страсте́й навѣ́ты обурева́емь е́смь, Отрокови́це, и прило́ги грѣхо́вными погружа́емь; къ Твоему́ еди́ному ти́хому и невла́емому приста́нищу любо́вію прибѣга́ю, Всепѣ́тая: уще́дривъ, спаси́ мя, Приснодѣ́во.

Катава́сія пра́здника.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Высото́ю смире́нія украша́еми, Зоси́мо и Савва́тіе преподо́бніи, и все́ у́бо жела́ніе ко Влады́цѣ своему́ простро́сте, я́ростная же движе́нія на враги́ вооружи́сте, со изря́дными дѣ́лы свои́ми, посто́мъ и моли́твами.

Пло́тей свои́хъ воста́нія крѣ́пкимъ поще́ніемъ, преподо́бніи, умертви́вше, оби́телище бы́сте Влады́чне; Его́же умоли́те изба́витися скорбе́й и мучи́тельства страсте́й съ вѣ́рою притека́ющимъ къ ва́мъ, преблаже́нніи.

Иму́щи споспѣшеству́ющу Боже́ственную си́лу, исцѣле́нія безчи́сленная источа́ютъ мо́щи ва́ша, Зоси́мо и Савва́тіе преподо́бніи: отгоня́ютъ отъ человѣ́къ болѣ́зни тѣле́сныя и душе́вныя стра́сти врачу́ютъ по́двиги ва́шими, всечестнíи.

Богоро́диченъ: Тружда́етъ мя́ бу́ря грѣхо́вная и возмуще́ніе безмѣ́стныхъ помышле́ній: умилосе́рдися, Всенепоро́чная, и ру́ку ми́ по́мощи, я́ко Ми́лостива, простри́, я́ко да, спа́сся, велича́ю Тя́.

Конда́къ и и́косъ пра́здника.
Сѣда́ленъ, гла́съ 4:

Жите́йское мо́ре воздержа́ніемъ безбѣ́дно преплы́вше и ко приста́нищу мы́сленному безстра́стія, ра́дующеся, доидо́сте, преподо́бніи отцы́ Зоси́мо и Савва́тіе, богому́дріи и преблаже́нніи; моли́те Христа́ Бо́га спасти́ся душа́мъ на́шимъ. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Умо́мъ и душе́ю предочи́стившеся, преподо́бніи, пре́лесть душепа́губную всеконе́чнѣ отъ себе́ отве́ргше и, чу́вства своя́ къ нему́тнѣй тишинѣ́ упра́висте, во ото́къ морскíй, прему́дріи, всели́стеся, воспѣва́юще: сла́ва си́лѣ Твое́й, Го́споди.

Зако́ны но́выми и Ве́тхимъ Завѣ́томъ ра́зума святы́хъ поуча́ющеся, Зоси́мо и Савва́тіе преподо́бніи, вся́кія добродѣ́тели о́бразъ навы́кше, му́дрѣй пчелѣ́ подо́бящеся, и прія́телище изря́дно Ду́ху Свято́му, прему́дріи, бы́сте, воспѣва́юще: сла́ва си́лѣ Твое́й, Го́споди.

Вся́ческими, преподо́бніи, свѣтя́щеся чудодѣ́йствы и Боже́ственною озаря́еми благода́тію, всѣ́мъ позна́стеся сокро́вище исцѣле́ній неистощи́мо, страсте́й отгоня́ете омраче́ніе и вра́жія низлага́ете ополче́нія, воспѣва́юще: сла́ва си́лѣ Твое́й, Го́споди.

Богоро́диченъ: Изъ утро́бы Твоея́ чи́стыя, Отрокови́це, возсія́въ, Боже́ственное Со́лнце, и́же су́щихъ во тмѣ́ многобо́жія просвѣти́ и въ сѣ́ни сме́ртнѣй сѣдя́щихъ, Влады́чице, осія́, Ему́же воспѣва́юще, зове́мъ: сла́ва си́лѣ Твое́й, Го́споди.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Тѣ́сный предпоче́тше простра́нному пути́, преподо́бніи, и ра́дующеся, во ото́цѣ морстѣ́мъ вся́чески утѣсня́еми, претерпѣ́сте, боже́ственными поуче́ніи ду́ши своя́ очища́юще и добро́ту Бо́жію неизглаго́ланную при́сно взира́юще, преблаже́нніи.

Незло́биви, и кро́тцы, и ми́лостиви, преподо́бніи, бы́сте; тѣ́мже благода́ть и ми́лость отъ Бо́га свы́ше пріе́мше, ми́лостивно на́съ просвѣща́йте, любо́вію святу́ю па́мять ва́шу почита́ющихъ.

Яко вели́кое со́лнце, вели́чіемъ по́двигъ ва́шихъ возсія́сте на́мъ, Зоси́мо и Савва́тіе преподо́бніи, земны́я осіява́юще концы́ и вся́ просвѣща́юще свѣ́томъ богоразу́мія. Тѣ́мъ мо́лимъ вы́, просвѣти́те на́шъ ра́зумъ, отцы́ преблаже́нніи.

Богоро́диченъ: Отъ мно́жества востаю́щихъ на ны́ въ болѣ́зни исчезе́ живо́тъ на́шъ, погрязо́хомъ въ про́пасти безчи́сленныхъ согрѣше́ній. Спаси́ ны, Влады́чице, и возведи́, я́ко ми́лостива, Всенепоро́чная, Тебе́ бо и́мамы Еди́ну Предста́тельницу непобѣди́му, раби́ Твои́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Ева́нгельски, преподо́бніи, Христа́ возлю́бльше, мíра отврати́стеся, въ непроходи́мыя же и въ пусты́я ото́ки заше́дше, Еди́ному Влады́цѣ своему́ прилѣпи́стеся; отъ Него́же и трудо́мъ воздая́ніе пріе́мше, животу́ вѣ́чному я́вѣ причасти́вшеся, за пою́щія вы́ моли́теся.

Богому́дрыми по́мыслы преудобри́вшеся, преподо́бніи, и вся́, я́же на земли́ льстя́щая, я́ко уме́ты вмѣни́вше, къ нестарѣ́ющему преста́вистеся блаже́нству, съ ли́ки во свѣ́тѣ безпло́тныхъ си́лъ о Бо́зѣ при́сно сликовству́юще, преблаже́нніи.

Стра́нна и пресла́вна, преподо́бніи, о Бо́зѣ содѣва́юще чудеса́, всѣ́мъ и́же въ мо́ри пла́вающимъ и злѣ́ стра́ждущимъ, призыва́еми, ско́ро предстае́те, отъ бѣ́дъ избавля́юще; и на́съ, бѣ́дствующихъ лю́тѣ и напа́стьми одержи́мыхъ, ми́лостивно предста́вше, спаса́йте, преблаже́нніи.

Богоро́диченъ: Грѣха́ тя́жкое бре́мя, е́же отяготѣ́ на мнѣ́, Пречи́стая, облегчи́, Ты́ бо еси́ Предста́тельница грѣ́шникомъ Пресла́вная, Изба́вителя и Спа́са ро́ждши земны́мъ.

Конда́къ, гла́съ 2:

Христо́вою любо́вію уязви́вшеся, преподо́бніи, и Того́ кре́стъ, на ра́мо взе́мше, понесли́ есте́, боже́ственнѣ вооружи́вшеся на неви́димыя враги́, и непреста́нныя моли́твы, я́ко копіе́ въ рука́хъ, иму́ще, крѣ́пко побѣди́ли есте́ бѣсо́вская ополче́нія; благода́ть Госпо́дню пріе́мше цѣли́ти неду́ги ду́шъ и тѣле́съ притека́ющихъ къ ра́камъ честны́хъ моще́й ва́шихъ, чуде́съ лучи́ испуща́ете всю́ду. Тѣ́мъ зове́мъ ва́мъ: ра́дуйтеся, преподо́бніи отцы́ Зоси́мо и Савва́тіе, мона́хомъ удобре́ніе.

Икосъ:

Кто́ дово́ленъ изрещи́ ва́шихъ чудодѣя́ній, преподо́бніи отцы́ Зоси́мо и Савва́тіе? Мы́ у́бо, ра́достію и боже́ственною любо́вію почита́юще всехва́льную и всечестну́ю па́мять ва́шу, ма́лое сіе́ пѣ́ніе прино́симъ: ра́дуйтеся, испо́лненніи Христо́вы красоты́ и пресвѣ́тла отъ Него́ и преизоби́льна воспріи́мшіи воздая́нія, тѣлесы́ у́бо ва́съ морскíй о́стровъ прія́тъ, ду́ши же са́мое не́бо, [идѣ́же] по́чести трудо́въ свои́хъ, прехва́льніи, воспріе́мше отъ Христа́, всѣ́хъ Царя́ и Бо́га. Тѣ́мъ мо́лимъ вы́: посѣща́йте ми́лостивно и моли́те непреста́нно о всѣ́хъ на́съ.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Въ моли́твахъ бо́дренное, и въ поще́ніихъ крѣ́пкое, и терпѣ́ніе во искуше́ніихъ неосла́бное ума́ чистото́ю, преподо́бніи, показа́сте и, земны́хъ досто́йно отсту́пльше, небе́сное наслажде́ніе обрѣто́сте, воспѣва́юще: благослове́нъ Бо́гъ оте́цъ на́шихъ.

Пло́дъ духо́вный и же́ртву непоро́чную, житіе́ свое́, преподо́бніи, Влады́цѣ принесо́сте, въ воздержа́ніи бо вся́цѣмъ пожи́сте, отъ Него́же и по́чести трудо́мъ, я́ко подвигоподви́жницы, воспріе́мше, дѣ́йствуете пресла́вная чудеса́, воспѣва́юще: благослове́нъ Бо́гъ оте́цъ на́шихъ.

Страстьми́ коле́блющихся и бу́рею грѣхо́вною, преподо́бніи, погружа́емыхъ, я́ко вели́кое къ Бо́гу дерзнове́ніе иму́ще, руково́дствуйте и всегда́, прему́дріи, сохраня́йте почита́ющихъ ва́съ благоче́стно, я́ко да воспѣва́емъ: благослове́нъ Бо́гъ оте́цъ на́шихъ.

Богоро́диченъ: Изба́ви на́съ отъ напа́стей, и скорбе́й, и печа́лей разли́чныхъ, и иноплеме́нныхъ наше́ствія, и междоусо́бныя бра́ни, Влады́чице Всепѣ́тая, я́ко да Тя́ сла́вимъ и Сы́ну Твоему́ взыва́емъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Въ пребыва́лища при́сно живу́щая всели́стеся, преподо́бніи, нетлѣ́нныхъ бла́гъ наслажда́ющеся и Трисо́лнечныя свѣ́тлости исполня́ющеся. На́съ, призыва́ющихъ вы́, те́плымъ предста́тельствомъ ва́шимъ отъ всѣ́хъ лю́тыхъ спаса́йте, пою́щихъ: благослови́те, вся́ дѣла́ Госпо́дня, Го́спода.

На́мъ, и́же любо́вію почита́ющимъ ва́съ и честно́е ва́ше соверша́ющимъ торжество́, Христо́вы уго́дницы Зоси́мо и Савва́тіе, преподо́бніи отцы́, согрѣше́ніемъ испроси́те оставле́ніе, и страсте́й премѣне́ніе, и Боже́ственнаго свѣ́та осія́ніе, пою́щимъ: благослови́те, вся́ дѣла́ Госпо́дня, Го́спода.

Тро́иченъ: О, Пребезнача́льное естество́ и Трисоста́вное еди́нство, Отче и Сы́не и Ду́ше Пресвяты́й, пріими́ о на́съ моли́твенники, Твоя́ преподо́бныя уго́дники, и пода́ждь прегрѣше́ніемъ разрѣше́ніе, и житію́ исправле́ніе, и злы́хъ отчужде́ніе, и сподо́би ны́ въ ми́рѣ воспѣва́ти Твою́ держа́ву: благослови́те, вся́ дѣла́ Госпо́дня, Го́спода.

Богоро́диченъ: Яко Еди́на ро́ждшая безсѣ́меннымъ рождество́мъ Христа́ Бо́га, Ма́ти Безневѣ́стная Чи́стая, Сего́ ми́лостива сотвори́, Влады́чице, спасти́ рабы́ отъ наси́лія и мучи́тельства вра́жія, вопію́щія Христо́ви, Сы́ну Твоему́: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Вы́спрь къ Бо́гу иму́ще мы́сль, Зоси́мо и Савва́тіе преподо́бніи, земна́я оста́вльше, небе́сная воспрія́сте, Бо́гу и Спа́су ва́съ вельми́ просла́вльшу, трудо́въ ра́ди ва́шихъ и воздержа́нія неосла́бнаго; сего́ ра́ди почита́емъ ва́съ, преблаже́нніи.

Ихже бла́гъ, преподо́бніи, получи́сте, и небе́сныя сла́вы, ея́же отъ Бо́га сподо́бистеся, Ему́же вы́ну предстоите́, моли́теся и на́мъ неотлуче́ннымъ бы́ти, мо́лимъ вы́, ра́достію и боже́ственною любо́вію почита́ющимъ по́двиги ва́ша, всечестнíи.

О, боже́ственная, и богому́драя, и свяще́нная дво́ице, Зоси́мо и Савва́тіе! Мíрови ми́ру отъ Бо́га низпосла́тися испроси́те, це́рквамъ соедине́ніе, Импера́тору побѣди́тельная и всѣ́мъ скорбя́щимъ утѣше́ніе и спасе́ніе, преблаже́нніи.

Богоро́диченъ: Пощади́ мя, Христе́ Спа́се, пощади́ моли́твами Ро́ждшія Тя́ и всѣ́хъ святы́хъ Твои́хъ; егда́ ся́деши суди́ти дѣло́мъ мои́мъ, беззако́нія моя́ и грѣхи́ моя́ пре́зри, я́ко Еди́нъ безгрѣ́шенъ.

Свѣти́ленъ:

Мірска́го пристра́стія, я́ко отъ скве́рны, уклони́вшеся и а́лчбою пло́ть умертви́вше, блаже́нніи, небе́сною сла́вою со а́нгелы обогати́стеся; тѣ́мже непреста́нно о на́съ моли́те Христа́ Бо́га, преподо́бніи Зоси́мо и Савва́тіе. [Два́жды.]

Сла́ва, и ны́нѣ, пра́здника.

На хвали́техъ стихи́ры, гла́съ 8. Подо́бенъ: О, пресла́внаго чудесе́!

Имѣ́я Боже́ственную благода́ть учи́теля,* цѣлоу́міемъ тя́ наставля́ющу* къ жела́нію боже́ственному,* отню́дуже мірска́го мяте́жа отре́клся еси́* и, болѣ́зненными себе́ труды́ умудря́я,* покори́лъ еси́ лу́чшему ху́ждшее,* Зоси́мо преподо́бне,* моли́ спасти́ся на́мъ.

Преподо́бне о́тче Савва́тіе,* любве́ ра́ди Христо́вы* вся́, я́же на земли́, презрѣ́лъ еси́* и, въ пусты́ню всели́вся,* плотскíя по́хоти мудрова́ніе умертви́лъ еси́,* по́стническими труды́ свое́ житіе́ уясни́лъ еси́;* тѣ́мъ и Христо́съ да́ромъ чуде́съ обогати́ тя.* Помина́й на́съ, чту́щихъ* па́мять твою́, досточу́дне.

Добродѣ́тели стяжа́лъ еси́,* и́миже Бо́гови* прибли́житися разумѣва́я,* къ Нему́же восте́кши* и при́сно хода́тайствуеши о на́съ,* е́же ми́рно житіе́ преити́* и святы́хъ ра́дости о́бщникомъ бы́ти.

Пріиди́те, вси́ хотя́щіи исцѣле́нія,* и почерпи́те вино́, ду́ши веселя́щее,* ника́коже сумня́щеся:* испо́лнь бо честнѣ́йшая ча́ша* преблаже́ннаго отца́ на́шего,* излива́етъ всѣ́мъ приходя́щимъ съ вѣ́рою* душа́мъ и тѣлесе́мъ здра́віе.

Сла́ва, гла́съ 8:

Мона́ховъ мно́жества, наста́вники ва́съ чте́мъ, отцы́ всечестнíи, ва́ми бо стезе́ю вои́стинну пра́вою ходи́ти позна́хомъ. Блаже́ни вы́, о Христѣ́ укрѣпи́вшеся, вра́жію низложи́сте си́лу, а́нгеломъ собесѣ́дницы и святы́мъ соприча́стницы, преподо́бніи, яви́стеся, съ ни́миже моли́теся Го́сподеви поми́ловатися душа́мъ на́шимъ.

И ны́нѣ, пра́здника.
Славосло́віе вели́кое. [Ектеніи́] и отпу́стъ.



НА ЛИТУРГІИ,

Слу́жба пра́здника и преподо́бныхъ: [Блаже́нна пра́здника пѣ́снь 3-я, на 4, и преподо́бныхъ пѣ́снь 6-я, на 4. Проки́менъ, пра́здника, гла́съ 4: Яко возвели́чишася дѣла́ Твоя́, Го́споди, вся́ прему́дростію сотвори́лъ еси́. Сти́хъ: Благослови́, душе́ моя́, Го́спода, Го́споди Бо́же мо́й, возвели́чился еси́ зѣло́. И преподо́бныхъ, гла́съ 7: Честна́ предъ Го́сподемъ сме́рть преподо́бныхъ его́. Апо́столъ, преподо́бныхъ, къ Гала́томъ, зача́ло 213. Аллилу́ія, пра́здника, гла́съ 8: Твоя́ су́ть небеса́, и Твоя́ е́сть земля́. Сти́хъ: Блаже́ни лю́діе, вѣ́дущіи воскликнове́ніе, [Го́споди, во свѣ́тѣ лица́ Твоего́ по́йдутъ]. И преподо́бныхъ, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе отъ Луки́, зача́ло 24. Прича́стенъ пра́здника: Го́споди, во свѣ́тѣ Лица́ Твоего́ по́йдемъ и о и́мени Твое́мъ возра́дуемся во вѣ́ки. И преподо́бныхъ: Ра́дуйтеся пра́ведніи о Го́сподѣ, пра́вымъ подоба́етъ похвала́.]

Источникъ: Слу́жба съ ака́ѳистомъ на пренесе́ніе честны́хъ и многоцѣле́бныхъ моще́й преподо́бныхъ и богоно́сныхъ оте́цъ на́шихъ Зоси́мы и Савва́тія, Солове́цкихъ нача́льниковъ, но́выхъ чудотво́рцевъ. — Изда́ніе 2-е. — М.: Въ Сѵнодальной тѵпогра́фіи, 1902. — Л. 2 – 15 об., 55 об. – 58 об.

/ Къ оглавленію раздѣла /


Наверхъ / Къ титульной страницѣ

0