Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 8-й де́нь.
Слу́жба Пресвятѣ́й Богоро́дицѣ, въ че́сть и па́мять явле́нія чудотво́рныя Ея́ ико́ны, нарица́емыя «То́лгскія».

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 1:

Боже́ственнымъ манове́ніемъ* чуде́сное о́гненнаго столпа́ сія́ніе* наставля́етъ святи́теля прему́драго* къ Твоему́ ли́ку, Пренепоро́чная, пріити́,* да, суевѣ́рія тму́ отгна́вши,* и́стинный вѣ́рнымъ свѣ́тъ пока́жеши спасе́нія.

Кто́ по досто́инству щедро́ты Твоя́ исповѣ́сть, Чи́стая?* Дѣ́йствіемъ бо Сы́на Твоего́* отъ водна́го естества́ и рѣ́чнаго устремле́нія* мо́стъ новосодѣ́ланный угото́вивши,* призыва́еши святи́теля къ зра́ку Твоего́ пресвѣ́тлаго лица́,* въ о́бразѣ на возду́сѣ я́вльшагося.

Безпло́дное мѣ́сто* плодоно́сно чудесы́ Твои́ми яви́ла еси́ То́лгу,* Пречи́стая Дѣ́во,* заре́ю бо благода́ти Твоея́* отго́ниши о́блакъ страсте́й душе́вныхъ* и свобожда́еши вѣ́рныя отъ мра́ка грѣхо́внаго.

Сла́ва, и ны́нѣ, гла́съ 4:

Пресвѣ́тлое Твое́ явле́ніе,* Пренепоро́чная Богоро́дице,* ли́къ а́нгельскій пѣсносло́витъ на небеси́* и человѣ́ческій ро́дъ восхваля́етъ на земли́,* я́ко, Ма́ти су́щи Живота́,* мо́лиши о на́съ Христа́ Бо́га на́шего,* на Тя́ бо крѣ́пкую наде́жду по Бо́зѣ возложи́хомъ,* Путеводи́тельнице нело́жная на́шего спасе́нія.

На стихо́внѣ стихи́ры, гла́съ 2:

Весели́ся, Россíя, весели́ся,* я́ко весе́лія твоего́ и спасе́нія Путеводи́тельница* отъ о́гненнаго столпа́* въ наставле́ніе пути́ и́стиннаго прихо́дитъ.

Сти́хъ: Помяну́ и́мя Твое́* во вся́комъ ро́дѣ и ро́дѣ.

Ты́ земноро́дныхъ пропису́ешися защище́ніе,* я́вльшися бо въ столпѣ́ о́гненномъ* преесте́ственно на То́лгѣ,* предви́дима еси́ всѣ́мъ.

Сти́хъ: Слы́ши, Дщи́, и ви́ждь,* и приклони́ у́хо Твое́.

Отло́жимъ, вѣ́рніи, печа́ль,* се́ бо втора́я горя́щая,* святи́телемъ ви́дѣнная купина́* на очище́ніе грѣ́шнымъ явля́ется.

Сла́ва, и ны́нѣ, гла́съ то́йже:

То́лга мѣ́сто освяще́нія,* Бо́гомъ избра́нное,* огнено́сною Ду́ха благода́тію освяще́нно е́сть,* Дѣ́вѣ во украше́ніе, грѣ́шнымъ во спасе́ніе.

По трисвято́мъ тропа́рь, гла́съ 4:

Дне́сь свѣ́тло сія́етъ на То́лгѣ* о́бразъ Тво́й, Пречи́стая Дѣ́во Богоро́дице,* и, я́ко со́лнце незаходи́мое, всегда́ вѣ́рнымъ подаде́ся,* Его́же ви́дѣвъ на возду́сѣ,* неви́димо а́нгелы, я́ко ники́мъ, держи́ма,* преосвяще́нный епи́скопъ гра́да Росто́ва Три́фонъ* тече́ ко явле́нному свѣтя́щемуся столпу́ о́гненну,* и по вода́мъ, я́ко по су́ху, пре́йде,* и моля́шеся Ти́ вѣ́рно о па́ствѣ и о лю́дехъ.* И мы́, къ Тебѣ́ притека́юще, зове́мъ:* Пресвята́я Дѣ́во Богоро́дице,* вѣ́рно Тя́ сла́вящихъ спаса́й,* Импе́ратора на́шего [и́мярекъ], архіере́евъ* и вся́ Россíйскія наро́ды отъ всѣ́хъ бѣ́дъ избавля́й* по вели́цѣй Твое́й ми́лости.


НА МАЛОМЪ ПОВЕЧЕРІИ,

Конда́къ, гла́съ 4:

Стра́нное и богопрія́тное свѣтоно́снаго зра́ка Твоего́ явле́ніе,* Пречи́стая Дѣ́во,* съ вѣ́рою взира́ющимъ быва́етъ извѣ́стное ча́яніе спасе́нія,* столпо́мъ бо о́гненнымъ явля́ющи предста́тельство,* неусы́пное и те́плое за ны́ къ Бо́гу возсыла́еши моле́ніе,* и́мже Благовѣ́рнаго Импера́тора на́шего [и́мярекъ]* и все́ наслѣ́діе Его́* отъ вся́кихъ бѣ́дъ изба́ви, мо́лимся,* да ра́достными усты́ вопіе́мъ Ти́ вси́:* ра́дуйся, Хода́таице вѣ́чнаго блаже́нства.


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ. На Го́споди воззва́хъ:] стихи́ры, гла́съ 1:

Кра́йнимъ Свои́мъ благоутро́біемъ* человѣ́ческій ро́дъ управля́яй Всеви́децъ Бо́гъ* къ содержа́нію и спасе́нію* мно́гую благода́ть дае́тъ Ти́, Чи́стая.* Моисе́й, неопали́мую купину́ ви́дя,* предощуща́етъ нетлѣ́нное дѣ́вство Твое́, Богоневѣ́стная,* Три́фонъ святи́тель,* сто́лпъ о́гненный усмотрѣ́въ,* глаго́летъ явле́ніе Твое́, на То́лгѣ бы́вшее.* О, благонаде́жнаго Твоего́ заступле́нія!* О, Бо́жія толи́каго въ Тебѣ́ вели́чія, Дѣ́во Чи́стая,* чуде́сная въ не́мощи Помо́щнице!

Стра́ннымъ Свои́мъ совѣ́томъ, Нетлѣ́нная Дѣ́во,* устро́и Тя́ Влады́ка всѣ́хъ* въ предста́тельство земны́мъ извѣ́стное.* Сто́лпъ о́гненный Изра́илю предводи́тель бы́сть* въ зе́млю обѣща́нную,* огне́мъ ды́шущее моле́ніе Твое́* возно́ситъ вѣ́рныя въ небе́сное блаже́нство.* О, пресла́внаго Твоего́ бдѣ́нія!* О, усе́рднаго къ на́мъ, грѣ́шнымъ, раче́нія, Дѣ́во Чи́стая,* Бо́жіе къ сме́ртнымъ благоволе́ніе!

Глубино́ю му́дрости избра́ Тя́, Всечи́стая,* всея́ тва́ри Зижди́тель Бо́гъ* и поста́ви на То́лгѣ Враче́бницу безме́здную.* Кто́ бо, въ ну́ждѣ притека́яй къ Тебѣ́,* смертоно́сныя не уврачу́етъ я́звы?* Исто́чникъ бо нетлѣ́нія бы́вши,* излія́ла еси́ мѵ́ро многоцѣле́бное* вѣ́рнымъ въ духо́вное весе́ліе,* болѣ́зней во укроще́ніе, Дѣ́во Чи́стая,* свѣ́тлое благода́ти позна́ніе.

Человѣколю́бную Свою́ ми́лость* къ человѣ́ческому ро́ду показу́я, Христо́съ Госпо́дь* благоволе́ніемъ и совѣ́томъ Отчимъ неиспы́таннымъ* Пренепоро́чную и Очище́нную Ду́хомъ Святы́мъ* явля́етъ на То́лгѣ въ ико́нѣ чудотво́рной* въ защище́ніе вѣ́рнымъ Ма́терь Свою́.* О, толи́каго про́мысла, щедролю́бія и та́инства Бо́жія!* О, нетлѣ́ннаго дѣ́вственныя благода́ти сокро́вища!* Имже обогати́вши ненаде́жныя ду́ши на́ша,* предста́ви я́ свя́ты Сы́на Твоего́ престо́лу, Богоневѣ́стная.

Свѣ́тъ невеще́ственный святи́тель ви́дя* въ веще́ственнѣмъ тѣлеси́,* въ полу́нощи та́йно къ Тебѣ́ прихо́дитъ, Всечи́стая,* и, узрѣ́въ Боже́ственное* свѣ́тлаго Твоего́ явле́нія дѣ́йствіе,* за милосе́рдіе мно́гое къ человѣ́ческому естеству́ во благода́ти бы́вшее,* припа́дая со усе́рдіемъ и те́плыми слеза́ми, моля́шеся, глаго́ля:* ра́дуйся, чуде́сное ду́шъ человѣ́ческихъ примире́ніе.

Сла́ва, и ны́нѣ, гла́съ 8:

Пріиди́те, вѣ́рніи,* чуде́сное дѣ́вственное пресвѣ́тлаго зра́ка* на То́лгѣ восхвалимъ явле́ніе,* се́ бо втора́я гора́ Хори́въ,* на не́йже купину́, огне́мъ горя́щую, святи́тель ви́дѣ.* Се́ мѣ́сто и земля́ свята́я,* на не́йже прино́сится Бо́гу Живо́му же́ртва,* се́ сто́лпъ о́гненный,* и́мже свобожда́емся лю́тыя* мы́сленнаго фарао́на рабо́ты.* Се́ ка́мень горы́ Хори́ва,* отъ него́же вмѣ́сто сла́дкихъ во́дъ* безцѣ́нное на укроще́ніе неду́говъ излія́но мѵ́ро,* се́ пусты́ня живо́тныя ма́нны,* е́юже насы́тивши на́съ духо́внѣ, Пречи́стая,* сподо́би и Ца́рствія Сы́на Твоего́.

Вхо́дъ. Проки́менъ дне́. И чте́нія три́, по чи́ну и́хъ.

Исхо́да чте́ніе. [Глава́ 3.]

Моисе́й бя́ше пасы́й о́вцы Іоѳо́ра, те́стя своего́, свяще́нника Мадіа́мска, и гна́ше о́вцы въ пусты́ню; и пріи́де въ го́ру Бо́жію Хори́въ. Яви́ся же ему́ Ангелъ Госпо́день въ пла́мени о́гненнѣ изъ купины́; и ви́дитъ, я́ко купина́ гори́тъ огне́мъ, купина́ же не сгара́ше. Рече́ же Мои́сей: мимоше́дъ, уви́жду видѣ́ніе вели́кое сіе́, я́ко не сгара́етъ купина́. Егда́ же ви́дѣ Госпо́дь, я́ко приступа́етъ ви́дѣти, воззва́ его́ Госпо́дь изъ купины́, глаго́ля: Моисе́е, Моисе́е! Онъ же рече́: что́ е́сть, Го́споди? Онъ же рече́: не приближа́йся сѣ́мо; изу́й сапоги́ отъ но́гъ твои́хъ: мѣ́сто бо, на не́мже ты́ стои́ши, земля́ свята́ е́сть.

Исхо́да чте́ніе. [Глава́ 13.]

Обведе́ Бо́гъ лю́ди путе́мъ, и́же въ пусты́ни, къ Чермно́му мо́рю: пя́таго же ро́да изыдо́ша сы́нове Изра́илевы отъ земли́ Еги́петскія. И взя́ Моисе́й ко́сти Іо́сифовы съ собо́ю, кля́твою бо закля́ Іо́сифъ сы́ны Изра́илевы, глаго́ля: присѣще́ніемъ присѣти́тъ ва́съ Госпо́дь, и изнесе́те отсю́ду ко́сти моя́ съ собо́ю. Воздви́гшеся же сы́нове Изра́илевы отъ Сокхо́ѳа, ополчи́шася во Оѳо́мѣ при пусты́ни. Бо́гъ же вожда́ше и́хъ: въ де́нь у́бо столпо́мъ о́блачнымъ показа́ти и́мъ пу́ть, но́щію же столпо́мъ о́гненнымъ свѣти́ти и́мъ. И не оскудѣ́ сто́лпъ о́блачный во дни́, и сто́лпъ о́гненный но́щію предъ всѣ́ми людьми́.

Исхо́да чте́ніе. [Глава́ 17.]

Воздви́жеся ве́сь со́нмъ сыно́въ Изра́илевыхъ отъ пусты́ни Си́нъ по полко́мъ свои́мъ сло́вомъ Госпо́днимъ и ополчи́шася въ Раѳиди́нѣ. Не бя́ше же воды́ лю́демъ пи́ти. И ху́ляху лю́діе Моисе́я, глаго́люще: да́ждь на́мъ во́ду, да піе́мъ. И рече́ и́мъ Моисе́й: что́ ху́лите мя́? и что́ искуша́ете Го́спода? Возжажда́ша же та́мо лю́діе воды́ и ропта́ху на Моисе́я, глаго́люще: вску́ю сіе́? Изве́лъ еси́ на́съ изъ Еги́пта умори́ти на́съ, и ча́да на́ша, и скоты́ жа́ждею? Возопи́ же Моисе́й ко Го́споду, глаго́ля: что́ сотворю́ лю́демъ си́мъ? Еще́ ма́ло, и побію́тъ мя́ ка́меніемъ. И рече́ Госпо́дь къ Моисе́ю: пойди́ предъ людьми́ си́ми, и пойми́ съ собо́ю отъ ста́рецъ людски́хъ, и же́злъ, и́мже пресѣ́клъ еси́ мо́ре, возми́ въ ру́ку твою́, и пойди́. Азъ же ста́ну та́мо пре́жде прише́ствія твоего́ у ка́мене въ Хори́вѣ. И уда́риши въ ка́мень, и изы́детъ изъ него́ вода́, и да пію́тъ лю́діе. Сотвори́ же Моисе́й та́ко предъ сы́ны Изра́илевыми.

На литíи стихи́ры, гла́съ 6:

Кто́, сицево́е пресла́вное чу́до* ви́дя, не удиви́тся?* Или́ кто́, благоутро́біе Ма́тернее* разсужда́яй, не ужа́снется?* Яко во огни́ зра́ка Своего́* не измѣня́етъ Дѣ́ва Всенепоро́чная.* Бо́жія бо це́рковь, попуще́ніемъ Бо́жіимъ,* огне́мъ соже́гшися, паде́,* но зра́къ пресвѣ́тлаго лица́ Твоего́,* а́нгельскима рука́ма отъ пла́мене изнесе́нъ,* стоя́щъ на дре́вѣ яви́ся,* свѣ́томъ сія́ющъ невреди́мо.* Но, о Благоутро́бная Влады́чице! Печа́ли сопротивле́ніе,* ско́рбь на ра́дость бра́тіи претворя́ющая,* да́ждь на враги́ побѣ́ду* Благочести́вѣйшему Импера́тору на́шему [и́мярекъ]* и всѣ́мъ Его́ лю́демъ одолѣ́ніе лю́тыхъ страсте́й,* лиша́ющихъ наде́жды спасе́нія.

Гла́съ 2:

Пріиди́те, Яросла́встіи лю́діе, и хвали́теся, съ весе́ліемъ ликовству́юще, Бо́жія бо Ма́ти ва́съ ми́лостивно посѣти́ чудотво́рнымъ Свои́мъ о́бразомъ святы́мъ, и́мже да́руетъ въ ну́ждахъ посо́біе, въ ско́рбѣхъ исцѣле́ніе, въ бѣда́хъ избавле́ніе и всѣ́мъ на́мъ подае́тъ ве́лію ми́лость.

Сла́ва, и ны́нѣ, гла́съ 8:

Свѣти́ся, сла́вный гра́де Яросла́вль, обрѣта́я бли́зъ себе́ оби́тель сію́, я́же на То́лгѣ, въ не́йже е́сть свѣти́ло ве́ліе, присноприходя́щее къ тебѣ́. Ангели сея́ трепе́щутъ, и человѣ́цы ту́ю воспѣва́ютъ: ра́дуйся, неисповѣди́мая ра́досте всѣ́мъ, свята́я Дѣ́во; ра́дуйся, о́бразомъ Свои́мъ святы́мъ на́съ просвѣща́ющая; ра́дуйся, всѣ́мъ исцѣле́ніе во вся́кихъ ско́рбѣхъ подава́ющая; ра́дуйся, отъ вся́кихъ бѣ́дъ и зо́лъ избавля́ющая; ра́дуйся, всѣ́мъ похвала́, и на́мъ, вѣ́рнымъ, утвержде́ніе, и душа́мъ спасе́ніе; ра́дуйся, Невѣ́сто неневѣ́стная.

На стихо́внѣ стихи́ры, гла́съ 8:

Что́ Тя́ нарече́мъ, Богоро́дице?* Воскресе́ніе ли ме́ртвыхъ?* я́ко отъ сна́ воскреси́ла еси́ о́трока при надгро́бномъ пѣ́ніи.* Зарю́ ли у́треннюю?* бо́дрствуеши бо непреста́нно* те́плыми къ Бо́гу моли́твами.* Сто́лпъ ли о́гненный, грѣхи́ пояда́ющій?* Или́ зе́млю, Хлѣ́бъ жи́зни произраща́ющую?* Моли́ спасти́ся душа́мъ на́шимъ.

Сти́хъ: Освяти́лъ е́сть* селе́ніе Свое́ Вы́шній.

Что́ Тя́ нарече́мъ, Богоро́дице Дѣ́во?* Цвѣ́тъ ли рая́ Боже́ственнаго?* я́ко на То́лгѣ украси́ла еси́ пусты́ню.* Воню́ ли благоуха́нія сла́дкаго?* я́ко То́лгскую оби́тель облагоуха́ла еси́.* Сосу́дъ ли ди́вныя ма́сти?* я́ко мѵ́ро цѣле́бное излія́ла еси́,* неду́жнымъ врачева́ніе подаю́щи.* Моли́ Сы́на Твоего́, Христа́ Бо́га на́шего, спасти́ся душа́мъ на́шимъ.

Сти́хъ: Бо́гъ посредѣ́ его́,* и не подви́жится.

Что́ Тя́ нарече́мъ, Богоро́дице?* Исто́чникъ ли животво́рныхъ во́дъ?* я́ко Ты́ духо́вную утоля́еши жа́жду.* Стѣ́ну ли крѣ́пку?* я́ко Ты́ Россíю и гра́дъ на́шъ защища́еши* и сію́ спаса́еши оби́тель.* Тве́рдь еси́ грѣ́шникомъ извѣ́стнѣйшая,* возводя́щая къ небеси́ вѣ́рныя,* моли́ Христа́ Бо́га* спасти́ся душа́мъ на́шимъ.

Сла́ва, и ны́нѣ, гла́съ то́йже:

Ра́дуйтеся, вѣ́рныхъ собо́ри,* и все́ человѣ́ческое, лику́й, естество́,* я́ко Пречи́стыя Дѣ́вы* честна́го зра́ка явле́ніемъ на То́лгѣ* гра́дъ Яросла́вль спаса́ется.* Сего́ ра́ди вси́, отъ належа́щихъ ну́ждъ избавля́еми,* вопіе́мъ Влады́чицѣ:* ра́дуйся, благи́хъ вино́вная,* извѣ́стное христіа́нъ упова́ніе.

На благослове́ніи хлѣ́бовъ: тропа́рь, гла́съ 4: Дне́сь свѣ́тло сія́етъ.., три́жды. [Пи́санъ на ма́лѣй вече́рни.]



НА УТРЕНИ,
На Бо́гъ Госпо́дь: тропа́рь Богоро́дицы, три́жды.

По 1-й каѳи́смѣ сѣда́ленъ, гла́съ 4:

Пресвѣ́тлаго зра́ка Твоего́ явле́ніе на То́лгѣ* ра́дость прино́ситъ всѣ́мъ вѣ́рующимъ,* и гра́дъ Яросла́вль тя́жкихъ скорбе́й свобожда́ется,* бога́тство бла́гости несказа́нно въ оби́тели процвѣта́етъ.* Къ Не́йже вси́, бѣ́дъ изба́вльшеся лю́тыхъ,* ку́пно съ Гавріи́ломъ возопіи́мъ:* ра́дуйся, Благода́тная!* Изъ Тебе́ бо спасе́ніе Христо́съ Бо́гъ на́шъ,* естество́ на́ше пріе́мый,* угото́ва на́мъ,* Его́же моли́ спасти́ся душа́мъ на́шимъ.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ 4:

Свѣтови́днымъ явле́ніемъ Твои́мъ* и боже́ственнымъ блиста́ніемъ* озари́ сла́вящія Тя́* и у́мъ къ содержа́нію крѣ́пкому и́стиннаго благоче́стія* просвѣти́, Пренепоро́чная Дѣ́во,* нело́жна бо еси́ мíру всему́* Предводи́тельница къ вѣ́чному ра́дованію.* Сего́ ра́ди пра́зднуемъ любо́вію вси́* явле́ніе Твоего́ зра́ка, славосло́вяще Тя́:* не лиши́ на́съ Ца́рствія Сы́на Твоего́,* еди́на Благослове́нная.

Сла́ва, и ны́нѣ, то́йже.

По поліеле́и сѣда́ленъ, гла́съ 8:

Вели́чіе Твое́ кто́ исповѣ́сти мо́жетъ, Всенепоро́чная Дѣ́во? Явле́ніемъ бо Твои́мъ всю́ удиви́ла еси́ Россíю, отъ ико́ны бо Твоея́ исте́кшее мѵ́ро мно́гія уврачева́ неду́ги и исцѣли́ болѣ́зни. О, Всеми́лостивая Влады́чице! Не отри́ни и ны́нѣ на́съ въ бѣда́хъ отъ Твоего́ заступле́нія, но моли́твами Твои́ми защити́, спаси́ чту́щаго Тя́ Импера́тора на́шего [и́мярекъ], и все́ христолюби́вое Его́ во́инство ми́ромъ огради́, да, Тобо́ю хва́лящеся и все́ упова́ніе на Тя́ возлага́юще, не постыди́мся во вѣ́ки.

Сла́ва, и ны́нѣ, то́йже.

Степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. [Вся́кое дыха́ніе...] Ева́нгеліе отъ Луки́, зача́ло 4: Во дни́ о́ны, воста́вши Маріа́мъ...

По 50-мъ псалмѣ́ стихи́ра, гла́съ 6:

Се́й де́нь Госпо́день,* торжеству́йте, лю́діе,* се́ бо свѣтоно́сный о́блакъ* на возду́сѣ чуде́снѣ простира́ется,* и столпо́мъ о́гненнымъ на То́лгѣ* ви́димо явля́ется* Еди́на и Еди́наго* на рука́хъ ма́тернихъ держа́щи,* Христа́, Зижди́теля вселе́нныя,* во спасе́ніе ду́шъ на́шихъ.

Кано́нъ [похвалѣ́ Богоро́дицы со ирмосо́мъ на 6 и пра́здника, на 8], гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Умъ мо́й, мно́гими напа́стьми помраче́нный, просвѣти́, Дѣ́во, Свѣ́тъ ро́ждшая Боже́ственный, во́лю, въ добродѣ́тели уныва́ющую, воспламени́ свяще́нною любо́вію, па́мять, въ славосло́віи изнемога́ющую, укрѣпи́, да пресвѣ́тлое Твое́ на То́лгѣ явле́ніе воспою́ досто́йно, Чи́стая.

Хра́мъ Трисо́лнечнаго Свѣ́та прекра́сный, украси́ моя́ чу́вства, молю́ся, да, всѣ́ми чу́вствы цѣлому́дренъ сы́й, честно́е Твое́ на То́лгѣ явле́ніе цѣлому́дренно воспою́, Чи́стая.

Къ Твое́й пресвѣ́тлаго зра́ка ико́нѣ припа́даю, окая́нный: ду́шу мою́ просвѣти́, яви́ и тѣ́ло нескве́рно и, отъ лю́тыхъ мя́ неду́говъ свободи́вши, покажи́ прича́стника наслѣ́дія небе́снаго, Богоневѣ́стная.

Якоже столпо́мъ о́гненнымъ зарю́ Твоего́ зра́ка яви́ла еси́ богоно́сному святи́телю, та́ко и ны́нѣ свѣ́томъ благода́ти явля́еши вѣ́рнымъ Твое́ ско́рое предста́тельство и заступле́ніе. При́зри у́бо на рабы́, призыва́ющія Тя́ и тре́бующія Твоея́ по́мощи, Благода́тная, да́руй Благочести́вѣйшему Импера́тору на́шему [и́мярекъ] на враги́ держа́вное одолѣ́ніе, вино́вна бо еси́ всѣ́хъ благи́хъ, вѣ́чную бла́гость на́мъ воплоти́вшая, небеси́ хвала́ и мíру помо́щнице.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Низложи́ во мнѣ́ нало́ги бѣсо́вскія, го́рдость въ добродѣ́телехъ, лицемѣ́ріе въ свя́тости, тщесла́віе во бдѣ́ніи, высокоу́міе въ благоговѣ́ніи и неблагода́рность въ благодѣя́ніихъ Сы́на Твоего́, еди́на Всепѣ́тая Дѣ́во.

Стра́нна мя́ любоче́стія сотвори́, молю́ Тя́, Дѣ́во, и чу́жда любопы́тства о человѣ́ческихъ согрѣше́ніихъ, де́рзость и изли́шнее на ми́лость Сы́на Твоего́ упова́ніе отдали́ отъ мене́, да досто́йны Сы́ну Твоему́ плоды́ принесу́, еди́на Пречи́стая.

Нача́ло и ху́дость моего́ естества́ познава́я, молю́ Тя́, Дѣ́во, да́ждь ми́ презрѣ́ніе самолю́бія, бѣ́гство человѣ́ческія хвалы́, позна́ніе со́бственнаго грѣха́ и со́бственныя не́мощи, еди́на Богоблаже́нная.

Кра́ткій всѣ́хъ веще́й и всего́ мíра сме́ртнаго коне́цъ и муче́ніе бу́дущее за суету́ дѣя́ній тщесла́вныхъ помышля́ти сподо́би мя́, Дѣ́во, да, благода́тію Сы́на Твоего́ къ пути́ и́стиннаго покая́нія наста́вленъ, вѣ́чнаго избѣ́гну прокля́тія, Пренепоро́чная.

По 3-й пѣ́сни сѣда́ленъ, гла́съ 4:

Сто́лпъ Тво́й о́гненный еди́ну печа́ть благода́ти Твоея́ си́льнѣйшую мни́мъ, Всенепоро́чная, се́ю бо въ соблюде́ніе за́повѣдей Сы́на Твоего́ и Бо́га печа́таеши вѣ́рныхъ сердца́ прекрѣ́пко, да не вра́гъ, ху́лящій и́мя Твое́, преодолѣ́въ ле́стію, порабо́титъ на́съ, рабы́ Твоя́, въ поги́бель кромѣ́шнюю. Но поспѣ́шествомъ бла́гости Твоея́, съ Твои́мъ зна́меніемъ, пока́жемся имени́ты наслѣ́дницы Ца́рствія нетлѣ́ннаго, Пречи́стая Дѣ́во.

Сла́ва, и ны́нѣ, гла́съ 8:

Возбра́нное на́мъ и ди́вное избавле́ніе дарова́ся, о́бразъ Тво́й честны́й, Преблагослове́нная Госпоже́ Дѣ́во Богоро́дице, къ нему́же мы́ взира́юще, си́це къ Тебѣ́ зове́мъ: ра́дуйся, Импера́тору на́шему во бра́нѣхъ помо́щнице и похвало́ и святи́телемъ благолѣ́піе; ра́дуйся, прибѣ́жище на́ше, и упова́ніе, и спасе́ніе; ра́дуйся, красото́ и сла́во оби́тели То́лгскія и всея́ Россíи прибѣ́жище и защище́ніе; ра́дуйся, Невѣ́сто неневѣ́стная.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Жестокосе́рдіемъ отягче́ннаго мя́ облегчи́, немилосе́рдіемъ къ тре́бующимъ окамене́нную утро́бу мою́ умягчи́, бу́рею сребролю́бія объя́таго мя́ утиши́, Богоневѣ́стная Влады́чице.

Во упова́ніи тлѣ́нныхъ и вре́менныхъ веще́й не оста́ви мя́ и пла́мень хище́нія непра́веднаго, бе́здною милосе́рдія Твоего́ покры́вши, угаси́ во мнѣ́, еди́на Приснодѣ́во.

Идолослуже́ніе въ лихоима́ніи и безбо́жность въ заблужде́ніи и́стинного благоче́стія и Правосла́вныя вѣ́ры потреби́ отъ правосла́вныхъ, Влады́чице, и въ коне́цъ разори́ отъ единовѣ́рныхъ, да единоду́шно восхва́лимъ Тя́, еди́на Приснодѣ́во.

Умъ мо́й, молю́ Тя́, благоустро́й къ позна́нію еди́наго Су́щаго Бо́га, къ разсмотре́нію вѣ́чныхъ бла́гъ, и щедролю́біе да́руй ми́, я́коже Тави́ѳѣ, и благода́тію Христо́вою украси́ мя́, я́коже Корни́лія со́тника, еди́на Приснодѣ́во.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Огнь нечистоты́ и вся́кія скве́рны во мнѣ́ разжиза́тельный мо́ремъ бла́гости Твоея́ потопи́, и мглу́ грѣхо́вную разжени́, и се́рдце мое́ ра́дости испо́лни, Всенепоро́чная.

Срамосло́вію безобра́зному не да́ждь во мнѣ́ мѣ́ста, Влады́чице, селе́ніе собла́зновъ разори́, хра́мъ мя́ чистоты́ и вся́каго благоче́стія содѣ́лай, да чи́стыми усты́ велича́ю Тя́ вы́ну, Всенепоро́чная.

Сме́рть, су́дъ, гее́нну, Ца́рствіе небе́сное въ па́мяти мое́й углуби́, Влады́чице, да, поне́ послѣ́дняя сія́ въ па́мяти содержа́, нало́ги лю́тыхъ беззако́ній оста́влю и по сме́рти мое́й получу́ Тобо́ю Ца́рство небе́сное, ны́нѣ же велича́ю Тя́ при́сно, еди́но души́ моея́ Упова́ніе.

Любо́вь сея́ жи́зни преизли́шнюю, и вре́меннаго плотска́го поко́я раче́ніе отложи́ отъ мене́, молю́ Тя́, Чи́стая, да, су́етнаго помышле́нія избѣ́гъ, Тобо́ю получу́ нетлѣ́нное на небеси́ бога́тство, еди́но души́ моея́ Упова́ніе.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Ра́дости, къ преогорче́нію бли́жняго низвлеку́щія, чу́жда мя́ содѣ́лай, Пречу́дная Цари́це, о нестрое́ніихъ и́скренняго безъ печа́ли бы́ти не допуща́й мене́, Человѣколюби́вая Влады́чице, и враго́въ злодѣ́йствія изба́ви мя́, прилѣ́жно молю́ Тя́, Всенепоро́чная.

За́висти въ по́мыслѣ мое́мъ не да́ждь вкореня́тися, ро́ждшаяся отъ ко́рене свя́та, Дѣ́во, и братоненавидѣ́нія изба́ви мя́, Чи́стая, да не за́вистію діа́волею, прине́сшею сме́рть въ ми́ръ, помраче́нъ бы́въ, лишу́ся Бо́жія благода́ти и жи́зни вѣ́чныя, Всенепоро́чная.

Равноду́шіе въ бѣда́хъ положи́ во мнѣ́, Всечи́стая, съ ра́дующимися въ благополу́чіи духо́вную ра́дость, къ сѣ́тующимъ въ злоключе́ніи сожалѣ́ніе да́руй ми́, Пресвята́я, и братолю́біе по тому́жде естеству́ и по пріобще́нію тоя́жде благода́ти Христо́вы низпосли́ ми́ свы́ше, любве́ пучи́ну ро́ждшая Дѣ́во.

Жела́ніе кра́йнее согрѣ́й во мнѣ́ вся́кому по естеству́ и по и́мени Христо́ву отъ души́ благотвори́ти, Блага́я, да не ка́ко зло́бъ лю́тыхъ душа́ моя́ испо́лнится, и живо́тъ мо́й а́ду прибли́жится, и пре́данъ бу́ду безъ ми́лости, я́ко не сотвори́вый ми́лости, во тму́ кромѣ́шнюю, Всенепоро́чная.

По 6-й пѣ́сни конда́къ, гла́съ 8:

Чу́дное и богопрія́тное свѣтоно́снаго зра́ка Твоего́ явле́ніе, Пречи́стая Дѣ́во, съ вѣ́рою взира́ющимъ быва́етъ извѣ́стное ча́яніе спасе́нія, столпо́мъ бо о́гненнымъ явля́юще предста́тельство, неусы́пное и те́плое за ны́ къ Бо́гу возсыла́еши моле́ніе, и́мже Благовѣ́рнаго Импера́тора на́шего [и́мярекъ] и все́ наслѣ́діе Его́ отъ вся́кихъ бѣ́дъ изба́ви, мо́лимся, да ра́достными усты́ вопіе́мъ Ти́ вси́: ра́дуйся, Предводи́тельнице вѣ́чнаго блаже́нства.

Икосъ:

Лучеза́рная Твоего́ явле́нія на То́лгѣ свѣ́тлость ди́вно блиста́ніемъ свои́мъ всѣ́хъ осіява́етъ, Бо́жіею бо въ Тебѣ́ су́щею благода́тію ближа́йшая Бо́гу бы́вши, всѣ́мъ позна́вшимъ Тя́ и́стинную Богоро́дицу земноро́днымъ подае́ши незави́стную исцѣле́нія ра́дость, е́юже вся́ земля́ Россíйская преизоби́льно обогати́вшися ны́нѣ, весели́тся непреста́нно и вопіе́тъ Тебѣ́ съ единовѣ́рными: ра́дуйся, Предводи́тельнице вѣ́чнаго блаже́нства.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Весе́ліе мірско́е пресѣцы́ и душетлѣ́нное пристра́стіе умертви́ во мнѣ́, Дѣ́во, презрѣ́ніе вре́менныхъ, жела́ніе вѣ́чныхъ бла́гъ и нетлѣ́нную ра́дость пода́ждь ми́ съ пою́щими: отце́въ Бо́же, благослове́нъ еси́.

Безчи́нное утѣше́ніе и изли́шество, у́мъ вредя́щее, душѣ́ скве́рну ражда́ющее, отлучи́ отъ мене́, Дѣ́во, и сподо́би, тѣ́лу здра́віе ну́ждное подава́я, житію́ же утѣше́ніе дово́льное, предвкуше́ніемъ вѣ́чныхъ бла́гъ наслажда́тися ку́пно съ пою́щими: отце́въ Бо́же, благослове́нъ еси́.

Грѣхо́мъ, сме́рть лю́тую ражда́ющимъ, оскверни́хъ и окаля́хъ ду́шу мою́, но Ты́, Пречи́стая Влады́чице, очи́сти мя́ отъ сего́, и наста́ви на богоуго́дное житіе́, украси́ же воздержа́ніемъ и благоговѣ́ніемъ, и да́ждь ми́ чи́стымъ се́рдцемъ пѣ́ти: отце́въ Бо́же, благослове́нъ еси́.

Обнови́ мя́, омраче́ннаго самолю́біемъ, просвѣти́ свѣ́томъ зра́ка Твоего́ Влады́чице, и, по́хоти плотскíя укроти́вши во мнѣ́, сподо́би мя́ Ро́ждшемуся отъ Тебе́ непреста́нно чи́стыми уста́ми пѣ́ти: отце́въ Бо́же, благослове́нъ еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Возмуще́ніе души́ моея́ утоли́, Всенепоро́чная, отъ клеветы́ навѣ́тующихъ изба́ви мя́, вражду́ грѣхо́вную во мнѣ́ укроти́ и не́нависть съ памятозло́біемъ отврати́ отъ мене́, Дѣ́во, да прославля́ю Тя́, Чи́стая, во вѣ́ки.

Огнь я́рости, во мнѣ́ зѣло́ разжже́нный, росо́ю благода́ти Твоея́ угаси́, хулу́, умножа́ющую души́ моея́ озлобле́ніе, и вся́кій ви́дъ зло́бы, гнѣздя́щійся въ се́рдцѣ мое́мъ, искорени́, Дѣ́во, да прославля́ю Тя́, Чи́стая, во вѣ́ки.

Образъ благода́ти Бо́жія напиши́, Всечи́стая, въ души́ мое́й и печа́тію ми́лости Твоея́ укрѣпи́ и утверди́ мя, да, всѣ́хъ зло́бъ изба́вленъ, ми́рными усты́ прославля́ю Тя́, Чи́стая, во вѣ́ки.

Кро́тости и незло́бія Твоего́ не отыми́ отъ мене́, Пренепоро́чная Дѣ́во, терпѣ́ніе ми́ да́руй тве́рдое во искуше́ніи, да, ра́дуяся, прославля́ю Тя́, Чи́стая, во вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Ско́рби се́рдца моего́ отложи́, уны́ніе, презира́ющее благода́ть, отыми́ отъ мене́ и лѣ́ность ко взыска́нію добродѣ́тели потреби́ огне́мъ благода́ти Твоея́, Чи́стая.

Малоду́шіемъ уныва́ющаго мя́ оживи́, отча́яніемъ па́дшаго возста́ви, лише́ніемъ и нерадѣ́ніемъ до́брыхъ ме́ртваго воскреси́, Дѣ́во, Жи́знь безсме́ртную ро́ждшая.

Усе́рдіе во мнѣ́ къ Бо́жіей во́ли сози́жди благода́тію Сы́на Твоего́, ре́вность ко сла́вѣ Бо́жіей воспламени́ въ се́рдцѣ мое́мъ, благоговѣ́ніе ко святы́ни Бо́жіей устро́й и постоя́нство въ благодѣя́ніи да́руй ми́, Дѣ́во, Предводи́тельнице моего́ спасе́нія.

Любо́вь небе́сныя сла́дости въ нѣ́дра души́ моея́ всади́, попече́ніе вѣ́чныхъ бла́гъ свы́ше посли́ ми́, умиле́ніе къ покая́нію и сокруше́ніе къ исправле́нію да́ждь ми́, Дѣ́во, лучеза́рнымъ сія́ніемъ чуде́снѣ я́вльшаяся.

Свѣти́ленъ, гла́съ 6:

Досто́йное дне́сь Ма́тери, Творца́ всѣ́хъ ро́ждшей, почте́ніе воздади́мъ, вѣ́рніи, Сія́ бо явле́ніемъ Свои́мъ две́рь ра́йскую отверза́етъ, и на́съ отъ скве́рны очища́етъ, и на враги́ Христолюби́вому Импера́тору на́шему [и́мярекъ] подае́тъ одолѣ́ніе.

Сла́ва, и ны́нѣ, то́йже.

На хвали́техъ стихи́ры, гла́съ 4:

Пресла́вное Твое́ на То́лгѣ явле́ніе, Пренепоро́чная Влады́чице, прокаже́ннымъ е́сть очище́ніе, торжество́ спаси́тельнаго примире́нія, оглаше́ніе соедине́нія, свидѣ́тельство благоутро́бія Твоего́, я́вственное усе́рдныя любве́ ко грѣ́шнымъ дарова́ніе и къ и́стинному вѣ́ры утвержде́нію прилѣ́жное наставле́ніе. [Два́жды.]

Ны́нѣ проро́честіи глаго́лы исполня́ются: освяти́лъ е́сть селе́ніе Свое́ Вы́шній, Бо́гъ посредѣ́ его́, и не подви́жится. Чудесы́ бо, Тобо́ю на То́лгѣ бы́вшими, селе́ніе Его́ освяща́ется, и Бо́гъ благода́тію посредѣ́ сего́ пребыва́етъ вы́ну, сего́ ра́ди кова́рнымъ ухищре́ніемъ и вра́жіими навѣ́ты не подви́жится во вѣ́ки.

Столпо́мъ явле́нія Твоего́ о́гненнымъ и пла́менемъ боже́ственнымъ попали́ уязвля́ющее со́вѣсть мою́ те́рніе и пото́ки изсуши́ беззако́нія, Влады́чице, и не яви́ мя́ враго́мъ бы́ти ра́дованіе, но, луча́ми свѣтоно́снаго зра́ка Твоего́ всю́ кова́рную мглу́ и́хъ разгна́вши, озари́ мя́ незаходи́маго Со́лнца свѣ́томъ, Всенепоро́чная Влады́чице.

Сла́ва, и ны́нѣ, гла́съ 8:

Пріиди́те, благочести́выхъ собра́нія,* пріиди́те, приступи́те и просвѣти́теся,* се́ бо во сла́вѣ свѣ́та* Влады́чица небе́сныхъ чино́въ* со пресвѣ́тлымъ Свои́мъ прихо́дитъ зра́комъ,* Сы́на Своего́ на рука́хъ держа́щи,* да спасе́тъ ца́рствующія гра́ды,* и гра́дъ на́шъ, и оби́тель сію́.* О, па́че ума́ чу́до пресла́вное!* Ка́ко явле́ніемъ свѣтоно́снаго Твоего́ зра́ка* ду́си лука́віи прогоня́ются,* болѣ́зни укроща́ются,* и все́ естество́ человѣ́ческое,* вину́ избавле́нія своего́ Тобо́ю пріи́мши,* вопіе́тъ Ти́, Всенепоро́чная:* ра́дуйся, Хода́таице вѣ́чнаго блаже́нства. Славосло́віе вели́кое. Тропа́рь, гла́съ 4: Дне́сь свѣ́тло сія́етъ на То́лгѣ... Ектеніи́. И отпу́стъ.


[НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, пѣ́снь Богоро́дицы, гла́съ 3: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филиппи́сіомъ, зача́ло 240. Аллилу́ія, гла́съ 8: Слы́ши, Дщи́, и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе отъ Луки́, зача́ло 54. Прича́стенъ: Ча́шу спасе́нія пріиму́ и и́мя Госпо́дне призову́.]


Моли́тва ко Пресвятѣ́й Богоро́дицѣ.

Пріими́, о Всеблагослове́нная и Всемо́щная Пречи́стая Госпоже́ Влады́чице, Богоро́дице Дѣ́во, сія́ моли́твы, со слеза́ми Тебѣ́ ны́нѣ приноси́мыя отъ на́съ, недосто́йныхъ рабо́въ Твои́хъ, къ цѣльбоно́сному о́бразу Твоему́ со умиле́ніемъ притека́ющихъ, я́ко Тебѣ́ Само́й ту́ су́щей, и слы́шащей моле́нія на́ша, и подаю́щей съ вѣ́рою прося́щимъ по коему́ждо проше́нію исполне́ніе. Скорбя́щимъ бо ско́рби облегча́еши, немощны́мъ здра́віе да́руеши, разсла́бленныхъ и неду́жныхъ исцѣля́еши, отъ бѣ́сныхъ бѣ́сы прогоня́еши, оби́димыя отъ оби́дъ избавля́еши, и наси́луемыя спаса́еши, грѣ́шныхъ ка́ющихся проща́еши, прокаже́нныхъ очища́еши, и ма́лыхъ дѣте́й ми́луеши, отъ у́зъ и темни́цъ свобожда́еши, и вся́кія многоразли́чныя стра́сти врачу́еши Ты́, Госпоже́ Влады́чице Богоро́дице, вся́ бо су́ть возмо́жна хода́тайствомъ Твои́мъ къ Сы́ну Твоему́, Христу́ Бо́гу на́шему. О, Всепѣ́тая Ма́ти, Пресвята́я Богоро́дице Дѣ́во Марíе! Не преста́й моли́тися о на́съ, недосто́йныхъ рабѣ́хъ Твои́хъ, сла́вящихъ Тя́ и почита́ющихъ, и покланя́ющихся пречи́стому о́бразу Твоему́, и наде́жду иму́щихъ невозвра́тну и вѣ́ру несумнѣ́нну къ Тебѣ́, Приснодѣ́вѣ Пресла́внѣй и Непоро́чнѣй, ны́нѣ и при́сно и во вѣ́ки вѣко́въ. Ами́нь.

Источникъ: Слу́жба Пресвятѣ́й Богоро́дицѣ, въ че́сть и па́мять явле́нія чудотво́рныя Ея́ ико́ны, нарица́емыя То́лгскія. — М.: Сѵнода́льная Тѵпогра́фія, 1906. — 18 л.

/ Къ оглавленію раздѣла /


Наверхъ / Къ титульной страницѣ

0