Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 7-й де́нь.
Слу́жба преподо́бному отцу́ на́шему Пи́мину многоболѣ́зненному, Пече́рскому.

ВЕЧЕРЪ,
Блаже́нъ му́жъ: 1-й антифо́нъ. На Го́споди, воззва́хъ: стихи́ры, гла́съ 1. Подо́бенъ: Небе́сныхъ чино́въ.

Иже мíръ возненави́дѣвъ, преподо́бне, жи́знь, наслажде́ніемъ плотски́мъ до́лу влеку́щую, на многолѣ́тную болѣ́знь премѣни́ти себѣ́ у Го́спода проси́лъ еси́, въ не́йже благоду́шествуя, Бо́гови благода́рственная вы́ну возсыла́лъ еси́, псало́мнически рекíй: прильпе́ по Тебѣ́ душа́ моя́, я́ко да пріи́метъ мя́, Христе́, десни́ца Твоя́, наставля́ющая на пу́ть пра́въ и живо́тъ вѣ́чный.

Тебѣ́, преподо́бне о́тче Пи́мине, по мно́жеству болѣ́зненныхъ искуше́ній, я́же тѣ́ломъ вселюбе́зно подъя́лъ еси́, утѣше́нія ны́нѣ въ свѣ́тѣ непристу́пномъ увеселя́ютъ ду́шу, предстои́ши бо со а́нгельскими чи́ны престо́лу Влады́чню, идѣ́же и о на́съ помоли́ся улучи́ти свы́ше ми́ръ и отъ страсте́й свобожде́ніе.

Сла́ва, гла́съ 5:

Пріиди́те, и́ночествующихъ ли́цы, восхва́лимъ Пи́мина преподо́бнаго, подо́бника бы́вша вели́кому Анто́нію: я́коже бо то́й отъ а́нгела прія́тъ и́ноческое одѣя́ніе, та́ко и се́й отъ а́нгельскія руки́ сподо́бися во и́ночество облещи́ся, съ ни́миже ны́нѣ нетлѣ́нныя нося́ ри́зы, съ пра́ведными весели́тся, съ преподо́бными ликовству́етъ, и мо́литъ съ ни́ми Христа́ Бо́га о душа́хъ на́шихъ.

И ны́нѣ, пра́здника.
Вхо́дъ. Проки́менъ дне́. И чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 1, самогла́сны:

Свѣща́, тебѣ́ отъ а́нгеловъ да́нная, прообразова́ше свѣ́тлость души́ твоея́, преподо́бне о́тче, тѣ́мъ и житіе́ твое́ нескве́рно, просвѣти́ся искуше́ніемъ предъ человѣ́ки. Еже мы́, чту́ще, велича́емъ и сла́вимъ Отца́ Небе́снаго, съ Сы́номъ и Святы́мъ Ду́хомъ.

Сти́хъ: Честна́ предъ Го́сподемъ сме́рть преподо́бныхъ Его́.

Жела́ніе се́рдца твоего́ и любо́вь, я́же къ го́рнимъ, ви́дѣвъ, Ца́рь Превы́шній посла́ а́нгелы Своя́ къ тебѣ́, о́тче, облекти́ тя во и́ноческій о́бразъ и наслади́ти вы́шняго пѣ́нія, я́ко да сла́дцѣ терпѣ́ніемъ болѣ́зненныя жи́зни сея́, го́ресть наверши́ши, и болѣ́зньми стя́жеши поко́й безболѣ́зненный.

Сти́хъ: Блаженъ мужъ, бояйся Господа, въ заповѣдехъ Его восхощетъ зѣло.

Мíра отверже́ніе, нищета́ изво́льная и дѣ́вство непоро́чное, безмѣ́рное же терпѣ́ніе и любо́вь соверше́нна къ Бо́гу, вои́стинну вели́кія су́ть добродѣ́тели, и́миже, а́ки скороше́ственною колесни́цею, восте́клъ еси́ къ го́рнимъ и предста́лъ Творцу́ всѣ́хъ и Бо́гу. Ему́же и о на́съ моли́ся, преподо́бне, тече́ніе на́мъ безъ собла́знъ соверши́ти и улучи́ти ми́лость въ Де́нь су́дный.

Сла́ва, гла́съ 8:

Мона́ховъ мно́жества, притека́емъ къ ра́цѣ твое́й, о́тче, покланя́емся нетлѣ́ннымъ моща́мъ твои́мъ, почерпа́емъ исцѣле́нія болѣ́знемъ, пріе́млемъ крѣ́пость на борю́щія ны́ враги́ и обрѣта́емъ на стра́сти побѣ́ду, получа́емъ оставле́ніе грѣхо́въ и сподобля́емся ми́лости Госпо́дни моли́твами твои́ми.

И ны́нѣ, пра́здника.

Тропа́рь, гла́съ 5:

Богоно́снаго Анто́нія смиренному́дріемъ подража́я, терпѣ́ніемъ Іову подо́бяся, не исцѣле́нія отъ болѣ́зни, но па́че протяже́нія тоя́ жела́лъ еси́ себѣ́, терпѣливоду́шне Пи́мине, да не ка́ко здра́въ бы́въ, и отъ мѣ́ста сего́ роди́телми исто́рженъ, сожи́тія преподо́бныхъ и чи́на и́хъ лиши́шися, тѣ́мъ па́че наде́жды отъ сами́хъ а́нгелъ постриже́нъ бы́лъ еси́, съ ни́миже моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, пра́здника.



НА УТРЕНИ,
На Бо́гъ Госпо́дь: тропа́рь пра́здника, [два́жды]. Сла́ва, преподо́бному. И ны́нѣ, пра́здника.

По 1-мъ стихосло́віи сѣда́ленъ, гла́съ 5. Подо́бенъ: Собезнача́льное.

Іовле терпѣ́ніе имѣ́лъ еси́, о́тче, на одрѣ́ бо болѣ́зни лежа́ дово́льна лѣ́та, стру́пы отъ главы́ до но́гъ обложе́нъ, благодари́лъ еси́ Бо́га, изволя́я въ жи́зни се́й ве́сь согни́ти, да въ о́ной безъ истлѣ́нія бу́деши, и смра́да обоня́ніе терпѣ́ти, да благоуха́ніе Христо́во яви́шися. Сотвори́ у́бо и на́съ терпѣли́вы моли́твами твои́ми.

Сла́ва, и ны́нѣ, пра́здника или́ се́й богоро́диченъ:

Болѣ́зни а́довы обыдо́ша мя́, и низлежу́ на ло́жи злы́хъ дѣя́ній мои́хъ, но, Яже безъ болѣ́зни ро́ждшая, уврачу́й неду́ги моя́ и воздви́гни мя́ къ добродѣ́телемъ, сотворя́я мя́ цѣ́ла моли́твами Твои́ми.

По 2-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Ско́ро услы́ша тя́ Бо́гъ, моля́щася, блаже́нне, и испо́лни жела́ніе се́рдца твоего́, посла́въ а́нгелы Своя́ во а́нгельскій о́бразъ облещи́ тя. Тѣ́мже и ты́ ско́рый на́мъ въ по́мощь бу́ди и жела́ніе се́рдца на́шего исполня́й, моля́ а́нгельскаго Влады́ку облещи́ ны свы́ше ми́лостію Свое́ю.

Сла́ва, и ны́нѣ, пра́здника или́ се́й богоро́диченъ:

Ско́ро услы́ши моле́нія ра́бъ Твои́хъ, Влады́чице, и предвари́ покры́ти ны́ кро́вомъ крилу́ Твое́ю, да́же не порабо́тимся грѣху́ до конца́, но да порабо́таимъ усе́рдно Сы́ну Твоему́, Го́сподеви на́шему, да́рующему на́мъ ве́лію ми́лость.

По поліеле́и сѣда́ленъ, гла́съ 8. Подо́бенъ: Прему́дрости возле́гъ.

Мно́гія болѣ́зни твоя́, блаже́нне Пи́мине, мно́гимъ здра́вія вино́вны бы́ша: са́мъ боля́, боля́щія исцѣля́лъ еси́, са́мъ слежа́ въ неду́зѣ, неду́жныя возставля́лъ еси́, сло́вомъ отгоня́лъ еси́ вся́ку не́мощь. Тѣ́мже, ны́нѣ притека́юще къ нетлѣ́ннымъ моще́мъ твои́мъ, мо́лимъ тя́: источа́й тѣлесе́мъ здра́віе и душа́мъ пода́ждь цѣльбу́, моля́ Христа́ Бо́га грѣхо́въ оставле́ніе дарова́ти, чту́щимъ любо́вію святу́ю па́мять твою́.

Сла́ва, и ны́нѣ, пра́здника.


Степе́нна, 1-й антифо́нъ 4-го гла́са. Проки́менъ, гла́съ 4: Восхва́лятся преподо́бніи во сла́вѣ* и возра́дуются на ло́жахъ свои́хъ. Сти́хъ: По́йте Го́сподеви, преподо́бніи Его́, [и исповѣ́дайте па́мять святы́ни Его́]. Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 5:

Пріиди́те, и́ночествующихъ ли́цы... [Зри́ Сла́вникъ на Го́споди, воззва́хъ.]

Кано́нъ преподо́бному, гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Глубино́ю недоумѣ́нія содержи́мь, молю́ Тя, прему́дрости глубино́, Іису́се: возведи́ у́мъ мо́й и подви́гни язы́къ восхвали́ти уго́дника Твоего́, Пи́мина, вели́кое терпѣ́ніе.

Во глубинѣ́ безстра́стія стра́сти, преподо́бне, потопи́въ, преше́лъ еси́ мо́ре мíра немо́крыми нога́ми, я́ко ни у́мъ тво́й тимѣ́нію грѣхо́вному не прикосну́ся, отъ него́же и мене́ сохрани́ моли́твами твои́ми.

Во глубинѣ́ сле́зъ твои́хъ потопи́лъ еси́ мы́сленного фарао́на, ны́нѣ же въ приста́нищи небе́сномъ пое́ши пѣ́снь побѣ́дную, идѣ́же и о мнѣ́, преподо́бне, моли́ся.

Богоро́диченъ: Во глубинѣ́ зо́лъ потопля́ему ми́, Влады́чице, пода́ждь ру́ку по́мощи, я́коже Сы́нъ Тво́й Петро́ви, и приведи́ къ приста́нищу спасе́нія.

Пѣ́снь 3.

Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая, Це́рковь, прише́ствіемъ Твои́мъ, въ не́йже утверди́ся мое́ се́рдце.

Процвѣла́ е́сть оби́тель Пече́рская преподо́бными отцы́, я́коже вертогра́дъ благово́нными кри́ны, посредѣ́ же и́хъ и ты́, преподо́бне, въ житіи́ святы́нею, по преставле́ніи же нетлѣ́ніемъ кра́сно процвѣ́лъ еси́.

Процвѣ́лъ еси́ богоуго́днымъ твои́мъ житіе́мъ, я́коже цвѣ́тъ по́льный, преподо́бне, ны́нѣ же святы́я твоя́ мо́щи въ пеще́рѣ издаю́тъ благоуха́ніе, я́ко кри́нъ удо́льный, и источа́ютъ благода́ть съ вѣ́рою притека́ющимъ.

Кри́нъ въ те́рніи, Пи́минъ въ терпѣ́ніи болѣ́зней процвѣте́ чистото́ю, и́же въ ра́йскія пресажде́нъ вертогра́ды, облагоуха́етъ на́съ ны́нѣ моли́твами свои́ми.

Богоро́диченъ: Цвѣ́те благово́нный, Пречи́стая Дѣ́во, отжени́ смра́дъ грѣха́ моего́ и яви́ мя благоуха́ніе Христо́во моли́твами Твои́ми.

Сѣда́ленъ, гла́съ 2:

Сильнѣ́е бѣ́ моли́тва твоя́, свя́те, къ Бо́гу, егда́ отцы́ Пече́рстіи о исцѣле́ніи твое́мъ моля́хуся, ты́ же приложе́нія болѣ́зней себѣ́ у Го́спода проси́лъ еси́ и преодолѣва́ше моле́ніе твое́ еди́наго всѣ́хъ мольбы́. Вѣ́руемъ у́бо, я́ко и ны́нѣ мно́го мо́гутъ святы́я твоя́ моли́твы.

Сла́ва, и ны́нѣ, богоро́диченъ:

Мно́го мо́жетъ моли́тва Ма́терняя на умоле́ніе Влады́ки, моли́ у́бо Его́ о на́съ, Дѣ́во Ма́ти, и печа́ль на́шу возвѣсти́ Ему́, да, послу́шавъ Тя́, ми́лостивъ на́мъ бу́детъ, и печа́ль въ ра́дость претво́рши, пода́стъ живо́тъ вѣ́чный.

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Пѣ́ти и сла́вити Бо́га досто́йно, пода́ждь на́мъ о́тче преподо́бне, моли́твами твои́ми, да всегда́ ублажа́емъ тя́.

Пѣ́нія а́нгельская въ полу́нощи слы́шаша бли́зъ су́щіи отцы́, егда́ въ ри́зу тя́ спасе́нія облека́ху. И на́съ у́бо а́нгельскихъ пѣ́ній наслажда́тися сподо́би хода́тайствомъ твои́мъ, блаже́нне.

Пою́ тебѣ́, о́тче, усе́рдно, ублажа́ю преподо́біе твое́, велича́ю незло́біе и кро́тость твою́, хвалю́ терпѣ́ніе, удивля́юся нетлѣ́нію твоему́ и покланя́юся цѣле́бнымъ моще́мъ твои́мъ.

Богоро́диченъ: Пѣвцы́ Твоя́ спаси́, о Всепѣ́тая Ма́ти, пла́ча вѣ́чнаго избавля́ющи, ми́лостію Твое́ю отри́ вся́ку сле́зу отъ о́чію мое́ю и ра́дости вѣ́чныя сподо́би.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо, Влады́ко, къ Свѣтонача́льнику, Отцу́ Твоему́, отъ но́щи невѣ́дѣнія приведе́ніе и́мамы.

Хода́тайствомъ твои́мъ, свя́те, отъ вся́каго навѣ́та вра́жія соблюда́й оби́тель, въ не́йже са́мъ богоуго́днѣ пожи́лъ еси́, и и́ночествующимъ помо́щникъ бу́ди, на твоя́ бо моли́твы упова́емъ.

Хода́тай бу́ди мнѣ́ къ Пра́ведному Судіи́, блаже́нне: е́смь бо неради́въ, я́коже о́ный схи́мникъ, его́же бра́тіи при кончи́нѣ свое́й показа́лъ еси́, и́же о́бразъ вели́къ имѣ́яше, дѣ́ла же ни ма́ла. Сего́ ра́ди схи́ма его́ нетлѣ́нна на обличе́ніе и осужде́ніе ему́ блюде́тся.

Хода́тайствуй ми́ спасе́ніе отча́янному, блаже́нне, наста́ви на покая́ніе грѣ́шнаго, преподо́бне, пода́ждь исправле́ніе развраще́нному, о́тче, да не постыжду́ся, надѣ́яся на твоя́ моли́твы.

Богоро́диченъ: Хода́таице ко Творцу́, Пречи́стая Дѣ́во, всего́ мя, грѣха́ми оскверне́ннаго, очи́сти моли́твами Твои́ми, на Тя́ бо все́ упова́ніе мое́ возлага́я, не постыжду́ся во вѣ́къ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Въ бе́зднѣ злы́хъ ве́сь мíръ лежи́тъ, сего́ ра́ди отве́рглся еси́ его́, да Благо́му благоугожда́еши Бо́гу; Ему́же благоугоди́ти и мене́ сподо́би, уго́дниче Бо́жій.

Въ бе́зднѣ болѣ́зней тя́жкихъ лежа́, мно́гажды отъ служа́щихъ небрего́мый и оставля́емый бы́въ, Бо́га то́чію посѣща́ющаго тя́ имѣ́лъ еси́; не оста́ви на́съ, о́тче, присѣще́ніемъ моли́твъ твои́хъ, я́ко вы́ну болѣ́знуемъ.

Въ бе́здну а́дскую мно́жества ра́ди грѣхо́въ мои́хъ да не осужде́нъ бу́ду; ты́, о́тче, Пра́ведному Судіи́ предста́ни и умоли́ Его́, да изба́витъ мя́ пра́веднаго суда́ Своего́.

Богоро́диченъ: Яко бе́здну ми́лости ро́ждшая, отъ бе́здны безмѣ́рныхъ беззако́ній мои́хъ исхи́ти мя́, милосе́рдія Ма́ти, молю́ся Ти́.

Конда́къ, гла́съ 6:

Долговре́менную болѣ́знь благода́рнѣ претерпѣ́вшаго, пріиди́те, соше́дшеся, восхва́лимъ Пи́мина многотерпѣли́ваго, и́же бо иногда́ за смра́дъ въ болѣ́зни бѣ́ гнуша́емь, се́й ны́нѣ благоуха́ніе испуща́етъ, съ вѣ́рою къ ра́цѣ моще́й его́ приходя́щимъ, и прого́нитъ злосмра́діе страсте́й отъ вопію́щихъ: пріиди́, Пи́мине, къ на́мъ, и ничто́же успѣ́етъ вра́гъ на ны́.

Икосъ:

Вси́, и́же разли́чными болѣ́зньми и страстьми́ одержи́міи, соше́дшеся къ многоболѣ́зненному Пи́мину, почуди́теся терпѣ́нію его́: то́й бо, мно́гажды гла́денъ и жа́жденъ пребы́въ, не поскорбѣ́ на служа́щихъ ему́, но съ ра́достію вся́ терпя́ше, благодаря́ Бо́га; два́десятъ же лѣ́тъ въ страда́ніи свое́мъ препроводи́въ, я́ко зла́то въ горни́лѣ искуси́ся, и обрѣ́теся досто́инъ Бо́гови, и прія́тъ отъ Него́ да́ръ цѣли́ти неду́ги и прогоня́ти стра́сти отъ притека́ющихъ къ нему́ съ вѣ́рою. Къ тому́ у́бо и мы́ притеце́мъ и того́ призове́мъ, вопію́ще: пріиди́, Пи́мине, къ на́мъ, и ничто́же успѣ́етъ вра́гъ на ны́.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть, Христо́съ же простре́ богочести́вымъ отроко́мъ ро́су духо́вную, Сы́й благослове́нъ и препросла́вленъ.

Богопроти́внаго мíра возненави́дѣлъ еси́, о́тче, вѣ́дый Глаго́лющаго: хотя́й бы́ти мíру дру́гъ, вра́гъ Бо́жій быва́етъ. Пода́ждь у́бо и на́мъ бѣ́гати мíра и всѣ́хъ его́ по́хотей.

Богопроти́вный зако́нъ зла́го моего́ обы́чая ну́ждею влече́тъ мя на дѣла́ зла́я, и не е́же хощу́, сіе́ творю́, но е́же не хощу́, сіе́ содѣва́ю. Ты́ у́бо, преподо́бне, моли́твами твои́ми отъ того́ мя зла́ свободи́.

Богопроти́вное велѣ́ніе ца́рствующаго грѣха́ во удесѣ́хъ мои́хъ принужда́етъ мя́ ча́сто прогнѣ́вати Бо́га, къ тебѣ́ прибѣга́ю, о́тче, отъ ну́ждныхъ мя́ грѣхо́въ изба́ви.

Богоро́диченъ: Бо́га ро́ждшая, Дѣ́во, да́ждь на́мъ испо́лнити повелѣ́нія Сы́на Твоего́, и да ни въ че́мъ же проти́вни Ему́ обря́щемся по́мощію Твое́ю.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те, вся́ дѣла́ Госпо́дня, Го́спода.

Пе́щь страсте́й да угаси́ши, о́тче, умноже́нія болѣ́зней отъ Бо́га проси́лъ еси́, въ ни́хже прохла́да тебѣ́ бы́сть, о́тче, чистота́ душе́вная и тѣле́сная, ю́же и на́мъ храни́ти моли́твами твои́ми да́ждь, да съ тобо́ю Пречи́стому Бо́гу пое́мъ: благослови́те, вся́ дѣла́ Госпо́дня, Го́спода.

Пе́щь многолѣ́тныхъ болѣ́зней а́ще опаля́ше ти тѣ́ло, но святы́я души́ твоея́ ничи́мже вреди́ти можа́ше: во всѣ́хъ бо си́хъ приклю́чшихся не согрѣши́лъ еси́, но посредѣ́ искуше́ній, а́ки посредѣ́ пла́мене, неопали́мь пребыва́я, со о́троки воспѣва́лъ еси́: благослови́те, вся́ дѣла́ Госпо́дня, Го́спода.

Аки въ пещи́, въ пло́ти мое́й возжего́хъ о́гнь по́хотей и умно́жихъ нечистоты́ пла́мень невоздержа́ніемъ мои́мъ; Ты́, о́гнь пояда́яй, Бо́же, прохлади́ пла́мень, угаси́ о́гнь и ороси́ пе́щь страсте́й мои́хъ моли́твами уго́дника Твоего́, Пи́мина, да съ ни́мъ Тебѣ́, въ Тро́ицѣ сла́вимому Бо́гу, пою́: благослови́те, вся́ дѣла́ Госпо́дня, Го́спода.

Богоро́диченъ: Пе́щь иногда́ о́гненная, отроко́въ неопали́вшая, прообрази́ рождество́ Твое́, Пречи́стая: Огнь бо заче́нши Боже́ственный, пребыла́ еси́ неопали́ма, и а́зъ у́бо молю́ Тя, о Влады́чице, неопали́ма мя́ соблюди́ отъ огня́ сопроти́внаго, да, ра́дуяся, пою́ Ти: вся́ дѣла́ Госпо́дня, Госпожу́ Богоро́дицу по́йте и превозноси́те, прославля́юще пресвято́е и́мя Ея́ во вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Безнача́льне Роди́телю, приво́димъ Ти́ въ моли́тву уго́дника Твоего́ Пи́мина, и́же отъ нача́ла и́ночества своего́ все́ю душе́ю возлюби́ Тя, и все́ю крѣ́постію порабо́та Тебѣ́; при́зри на его́ по́двиги, и тѣ́хъ ра́ди послу́шай о на́съ его́ моле́нія, и благíй коне́цъ да́руй на́мъ.

Собезнача́льный Отцу́ и Ду́ху, Сы́не, представля́емъ Ти въ моли́тву блага́го и вѣ́рнаго раба́ Твоего́ Пи́мина; при́зри на его́ многолѣ́тныя и тя́жкія болѣ́зни, и тѣ́хъ ра́ди послу́шай о на́съ его́ моле́нія, и ми́лостивъ на́мъ бу́ди.

Соприсносу́щный Отцу́ и Сы́ну, Ду́ше Святы́й, предлага́емъ Ти́ усе́рдныя моли́твы Пи́мина блаже́ннаго, того́ послу́шай, и на́съ, его́ ра́ди, поми́луй.

Богоро́диченъ: Ма́ти Бо́жія, съ блаже́ннымъ Пи́миномъ и со всѣ́ми преподо́бными отцы́ Пече́рскими, Бо́гу угоди́вшими, моли́ Пресвяту́ю и Нераздѣ́льную Тро́ицу поми́ловати рабы́ Своя́, Тя́ при́сно сла́вящія.

Свѣти́ленъ:

Черто́гъ Спа́совъ отве́рстъ тебѣ́, преподо́бне Пи́мине, и́маши бо бра́чну а́нгельскаго о́браза отъ а́нгелъ на тя́ возложе́нную оде́жду, въ не́йже вше́дши на бра́къ Агнчій, не забу́ди на́съ, тя́ почита́ющихъ.

Сла́ва, и ны́нѣ, пра́здника или́ богоро́диченъ:

Черто́же нескве́рный, Пречи́стая Дѣ́во, на́съ, одѣя́нія бра́чнаго не иму́щихъ, покры́й честно́ю ри́зою Твое́ю и введи́ въ Черто́гъ небе́сный.

На хвали́техъ стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́! О, ди́внаго на тебѣ́ дѣ́йства Ду́ха Свята́го! Дѣ́йствующаго въ немощнѣ́й пло́ти твое́й, преподо́бне. Ты́ бо, са́мъ немощству́я, ины́хъ исцѣля́лъ еси́, и ко исправле́нію терпѣ́ніемъ твои́мъ приводи́лъ еси́. Тѣ́мъ хва́лящимъ тя́, о́тче, яви́ ми́лость твою́ и испроси́ отъ Христа́ Бо́га въ не́мощехъ на́шихъ исцѣле́ніе любо́вію свято́е твое́ преставле́ніе почита́ющимъ.

Отче богому́дре Пи́мине, ты издѣ́тска моли́твою болѣ́знемъ преда́лся еси́ и лю́тыми страда́ніи тѣ́ло свое́ изнури́лъ еси́, я́ко да чистоту́ пло́ти соблюде́ши и ду́шу непоро́чну Бо́гови предста́виши. Ему́же въ неболѣ́зненной жи́зни предстоя́, я́ко моли́твою свое́ю мо́щенъ посо́бствовати, о на́съ при́сно моли́ся, вѣ́рою пою́щихъ свято́е твое́ успе́ніе.

Отче преподо́бне Пи́мине, вся́къ боля́й въ жи́зни се́й многомяте́жной да навы́кнетъ терпѣ́нію твоему́ ревнова́ти и благода́рственная возсыла́ти Бо́гови, отъ Него́же въ наказа́ніе пріе́млемъ искуше́ніе ко исправле́нію душе́вныя болѣ́зни. Но о всѣ́хъ, притека́ющихъ къ ра́цѣ моще́й твои́хъ, засту́пникъ бу́ди и испроси́ отъ Христа́ Бо́га душе́вныя и тѣле́сныя не́мощи свобожде́ніе.

Сла́ва, гла́съ 2:

Мѵ́ро вои́стинну та́инственное, ко исцѣле́нію боля́щимъ, источа́етъ ра́ка отъ святы́хъ твои́хъ моще́й и облагоуха́етъ вѣ́рою приходя́щихъ, подая́ тѣ́мъ въ ну́ждахъ посо́біе; пода́ждь у́бо и на́мъ, о́тче всеблаже́нне, отъ приснотеку́щаго исто́чника твоея́ любве́ душе́вныхъ и тѣле́сныхъ болѣ́зней свобожде́ніе, я́ко пѣ́сненными добро́тами честно́е твое́ успе́ніе восхваля́емъ.

И ны́нѣ, пра́здника или́ богоро́диченъ:

Спаси́ отъ бѣ́дъ рабы́ Твоя́, [Богоро́дице Дѣ́во, я́ко вси́ по Бо́зѣ къ Тебѣ́ прибѣга́емъ, я́ко неруши́мѣй стѣнѣ́ и предста́тельству].

Славосло́віе вели́кое. [Ектеніи́.] И отпу́стъ.



[НА ЛИТУРГІИ,

Блаже́нна пра́здника, пѣ́снь 1-я, на 4, и преподо́бнаго, пѣ́снь 6-я, на 4. Проки́менъ пра́здника, гла́съ 4: Яко возвели́чишася дѣла́ Твоя́, Го́споди, вся́ прему́дростію сотвори́лъ еси́. Сти́хъ: Благослови́, душе́ моя́, Го́спода, Го́споди Бо́же мо́й, возвели́чился еси́ зѣло́. И преподо́бнаго, гла́съ 7: Честна́ предъ Го́сподемъ сме́рть преподо́бныхъ Его́. Апо́столъ преподо́бнаго, къ Гала́томъ, зача́ло 213. Аллилу́ія пра́здника, гла́съ 8: Твоя́ су́ть небеса́, и Твоя́ е́сть земля́. Сти́хъ: Блаже́ни лю́діе, вѣ́дущіи воскликнове́ніе, [Го́споди, во свѣ́тѣ лица́ Твоего́ по́йдутъ]. И преподо́бнаго, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе Луки́, зача́ло 24. Прича́стенъ пра́здника: Го́споди, во свѣ́тѣ Лица́ Твоего́ по́йдемъ и о и́мени Твое́мъ возра́дуемся во вѣ́ки. И преподо́бнаго: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 113 об. - 118.

/ Къ оглавленію раздѣла /


Наверхъ / Къ титульной страницѣ

0