Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 7-й де́нь.
Свята́го преподобному́ченика Дометíя.

[ВЕЧЕРЪ,]
На Го́споди воззва́хъ: стихи́ры пра́здника 3, гла́съ 4. Подо́бенъ: Зва́нный свы́ше.

Иже пре́жде вѣ́къ* Сы́й Бо́гъ Сло́во,* Иже свѣ́томъ,* я́ко ри́зою, одѣва́яйся,* преобразу́ющійся предъ ученики́ Твои́ми,* па́че со́лнца, Сло́ве, просія́лъ еси́,* Моисе́й же и Илія́ Тебѣ́ предста́ша,* ме́ртвымъ и живы́мъ Тя́, Го́спода, повѣ́дающе* и Твое́ сла́вяще неизрече́нное смотре́ніе и ми́лость,* и мно́гое милосе́рдіе,* и́мже спа́слъ еси́ мíръ,* грѣхо́мъ погиба́ющій.

Отъ Дѣви́ческаго о́блака Тя́ рожде́нна,* и пло́ть бы́вша,* и на горѣ́ Ѳаво́рстѣй* преобразу́ющася, Го́споди,* и о́блакомъ свѣ́тлымъ Тя́ окружа́ема,* гла́съ Роди́телевъ возлю́бленнаго Тя́ Сы́на,* ученико́мъ предстоя́щимъ Тебѣ́, я́вѣ ска́зоваше,* я́ко Единосу́щна* и Единопресто́льна.* Тѣ́мже Пе́тръ удивля́яся,* — добро́ е́сть здѣ́ бы́ти, — глаго́лаше,* не вѣ́дый, е́же глаго́лаше,* Благодѣ́телю Многоми́лостиве.

Ины стихи́ры свята́го, гла́съ 6. Подо́бенъ: Все́ отло́жше.

Все́ отложи́въ волше́бное обая́ніе,* и пе́рсское скверне́ніе, и ме́рзкая служе́нія,* Бо́гу прите́клъ еси́,* му́дрымъ промышле́ніемъ* окормля́ющему человѣ́чество,* Его́же и́менемъ апо́стольски исцѣли́лъ еси́* безслове́сныхъ неду́ги* и человѣ́ческія болѣ́зни,* притека́ющихъ усе́рдно къ тебѣ́, уго́дниче Христо́въ.* Его́же со дерзнове́ніемъ моли́* о душа́хъ на́шихъ.

Ве́сь возложи́лъ еси́ тво́й живо́тъ Го́споду* и те́плѣ отлучи́лся еси́* къ по́стному тече́нію, преподо́бне,* моли́тву несумнѣ́нну,* бдѣ́ніе всено́щное,* пѣ́ніе непреста́нное* и житіе́ непоро́чное* и а́нгельское показу́я.* Отсю́ду дѣ́йствіемъ чуде́съ обогати́лся еси́:* вѣ́сть бо сла́вити Госпо́дь рабы́ Своя́,* Его́же со дерзнове́ніемъ моли́* о душа́хъ на́шихъ.

Ве́сь одѣ́явся кре́стнымъ всеору́жіемъ* и неразруши́мымъ щито́мъ вѣ́ры обложи́вся,* стра́шенъ бы́лъ еси́* супроти́внымъ де́монскимъ ополче́ніемъ,* и́хже и отгна́лъ еси́,* ра́ною вѣ́ры пома́зався* и боже́ственными призыва́ніи,* и въ пу́ть ше́ствующія спа́слъ еси́ вре́да о́нѣхъ,* Дометíе, уго́дниче Христо́въ.* Его́же со дерзнове́ніемъ моли́* о душа́хъ на́шихъ.

Сла́ва, и ны́нѣ, гла́съ 6:

Прообразу́я воскресе́ніе Твое́, Христе́ Бо́же, тогда́ поя́тъ три́ Твоя́ ученики́, Петра́, и Іа́кова, и Іоа́нна, на Ѳаво́ръ возше́лъ еси́. Тебѣ́ же, Спа́се, преобразу́ющуся, Ѳаво́рская гора́ свѣ́томъ покрыва́шеся, ученицы́ Твои́, Сло́ве, поверго́ша себе́ до́лу на земли́, не терпя́ще зрѣ́ти неви́димаго зра́ка, а́нгели служа́ху стра́хомъ и тре́петомъ, небеса́ убоя́шася, земля́ вострепета́, ви́дяще на земли́ сла́вы Го́спода.

Вхо́дъ. Проки́менъ, гла́съ 7:

Бо́гъ на́шъ на небеси́ и на земли́,* вся́, ели́ка восхотѣ́, сотвори́.

Сти́хъ: Во исхо́дѣ Изра́илевѣ отъ Еги́пта, до́му Іа́ковля изъ люде́й ва́рваръ, бы́сть Іуде́я святы́ня Его́, Изра́иль о́бласть Его́.

Сти́хъ: Мо́ре ви́дѣ и побѣже́, Іорда́нъ возврати́ся вспя́ть.

Сти́хъ: Что́ ти е́сть, мо́ре, я́ко побѣ́гло еси́? и тебѣ́, Іорда́не, я́ко возврати́лся еси́ вспя́ть?

Та́же ектенія́.

(Зри́:) Аще случи́тся пра́здникъ се́й въ суббо́ту: Въ пято́къ ве́чера пое́мъ проки́менъ вели́кій: Бо́гъ на́шъ на небеси́ и на земли́.., со стихи́ его́. Въ суббо́ту же ве́чера въ пра́здникъ пое́мъ проки́менъ: Госпо́дь воцари́ся...

(Зри́:) Аще случи́тся пра́здникъ се́й въ недѣ́лю: Пое́мъ въ суббо́ту ве́чера проки́менъ: Госпо́дь воцари́ся.., со стихи́ его́. Въ недѣ́лю же ве́чера пое́мъ проки́менъ вели́кій: Бо́гъ на́шъ на небеси́ и на земли́.., со стихи́ его́.

На стихо́внѣ стихи́ры, гла́съ 6. Подо́бенъ: Тридне́венъ.

Вообра́жся за милосе́рдіе, Христе́, во Ада́ма, пе́рваго человѣ́ка, отъ Дѣ́вы, яви́лся еси́ вторы́й Ада́мъ, на горѣ́ же, Спа́се мо́й, Ѳаво́рстѣй преобрази́лся еси́, обнажа́я Божество́ Твое́.

Сти́хъ: Твоя́ су́ть небеса́, и Твоя́ е́сть земля́.

Удиви́шася, зря́ще, Твоея́ благода́ти лу́чшіи зако́на, преображе́нія, Христе́, на горѣ́ святѣ́й, съ ни́миже покланя́емся Тебѣ́ со Отце́мъ и Боже́ственнымъ Ду́хомъ.

Сти́хъ: Ѳаво́ръ и Ермо́нъ о и́мени Твое́мъ возра́дуетася.

Просвѣща́ется тва́рь я́сно Твои́мъ преображе́ніемъ, Христе́, е́же боже́ственнымъ апо́столомъ на Ѳаво́рѣ, Моисе́ю же и Иліи́, показа́лъ еси́, Бо́гъ Сы́й, неизрече́нно просія́въ па́че со́лнца.

Сла́ва, и ны́нѣ, гла́съ 5:

Пріиди́те, взы́демъ на го́ру Госпо́дню и въ до́мъ Бо́га на́шего и у́зримъ сла́ву преображе́нія Его́, сла́ву я́ко Единоро́днаго отъ Отца́, свѣ́томъ пріи́мемъ Свѣ́тъ и, возвы́шени бы́вше ду́хомъ, Тро́ицу Единосу́щную воспои́мъ во вѣ́ки.

Тропа́рь, гла́съ 4:

По́стнически предподвиза́вся на горѣ́, у́мная враго́въ ополче́нія всеору́жіемъ Креста́ погуби́лъ еси́, всеблаже́нне. Па́ки же ко страда́льчеству му́жески обле́клся еси́, уби́въ Копрони́ма мече́мъ вѣ́ры, и обои́хъ ра́ди вѣнча́лся еси́ отъ Бо́га, преподобному́чениче Дометíе приснопа́мятне.

Сла́ва, и ны́нѣ, пра́здника, гла́съ 7:

Преобрази́лся еси́ на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.

На повече́ріи конда́къ пра́здника [и до отданія].



НА УТРЕНИ,
По 1-й стихоло́гіи сѣда́ленъ, гла́съ 4. Подо́бенъ: Яви́лся еси́ дне́сь.

Пра́здникъ пресвѣ́телъ Влады́чень пріи́де: пріиди́те вси́, на го́ру, у́мно предочи́стившеся, взы́демъ Ѳаво́рскую, Христа́ ви́дѣти.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

На горѣ́ Ѳаво́рстѣй преобрази́лся еси́, Бо́же, посреди́ Иліи́ и Моисе́я прему́дрыхъ, со Іа́ковомъ, и Си́мономъ, и Іоа́нномъ. Пе́тръ же, сы́й ту́, сія́ Тебѣ́ глаго́лаше: добро́ е́сть здѣ́ сотвори́ти три́ сѣ́ни: еди́ну Моисе́ю, и еди́ну Иліи́, и еди́ну Тебѣ́, Влады́цѣ Христу́. Иже тогда́ си́мъ свѣ́тъ Тво́й возсія́вый, просвѣти́ ду́ши на́ша.

Сла́ва, и ны́нѣ, то́йже.

Кано́нъ пра́здника со ирмосо́мъ на 8. Ки́ръ Космы́, гла́съ 4.
Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Глаго́лы живо́тныя друго́мъ Христо́съ и о Боже́ственнѣмъ наказу́я Ца́рствіи, рече́: во Мнѣ́ Отца́ позна́йте; свѣ́томъ я́ко облиста́я непристу́пнымъ, въ ра́дости пою́ще: пои́мъ Бо́гу на́шему, я́ко просла́вися.

Си́лою язы́къ облече́теся, дру́зи ученицы́, чу́дни же бу́дете въ бога́тствѣ и́хъ, я́ко сла́вы напо́лнитеся, я́ко явлю́ся свѣтлѣ́е со́лнца, облиста́я въ ра́дости пою́щихъ: пои́мъ Бо́гу на́шему, я́ко просла́вися.

Дне́сь Христо́съ, на горѣ́ Ѳаво́рстѣй просія́въ я́сно Боже́ственною заре́ю, я́коже обѣща́ся, ученико́мъ обнажи́ зра́къ, свѣтоно́сныя же напо́лнишеся Боже́ственныя зари́, въ ра́дости поя́ху: пои́мъ Бо́гу на́шему, я́ко просла́вися.

Кано́нъ свята́го, на 4. Творе́ніе Ѳеофа́ново, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Къ Бо́гу отше́дъ, му́ченическою сія́я благода́тію, пою́щимъ тя́ вѣ́рно свѣтоно́сную вдохни́ зарю́, моля́ Христа́, богоблаже́нне.

Расто́ргъ мре́жи пре́лести, и́стинно Христу́ прите́клъ еси́, мы́слію чи́стою пе́рсская служе́нія оста́вль и волше́бнаго избѣ́гъ безбо́жія.

Хи́трѣ усмотри́лъ еси́, я́ко не Бо́гъ, я́ко созда́нное со́лнце, но ни еди́наго отъ ви́димыхъ надъ неви́димаго Бо́га, наста́вленъ бы́лъ еси́, по́мысломъ му́дрымъ объе́мся.

Богоро́диченъ: Тя́, Всесвята́я Дѣ́во, Сы́на Бо́жія ро́ждшую, бы́вшаго по на́мъ ра́ди на́съ, проповѣ́дуемъ Чи́стую Богома́терь, вѣ́рніи, и ублажа́емъ.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Во всего́ Ада́ма обле́кся, Христе́, очернѣ́вшее, измѣни́въ, просвѣти́лъ еси́ дре́вле естество́ и измѣне́ніемъ зра́ка Твоего́ богосодѣ́лалъ еси́.

Столпо́мъ огнезра́чнымъ и о́блакомъ дре́вле, Иже въ пусты́ни Изра́иля веды́й, дне́сь на горѣ́ Ѳаво́рстѣй, неизрече́нно во свѣ́тѣ Христо́съ просія́.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Извѣ́стною вѣ́рою утве́рждься, я́коже непрекло́ненъ сто́лпъ, непрело́женъ яви́лся еси́, ни словесы́ волше́бными, ни ра́зумомъ пе́рсскаго бая́нія прельще́нъ.

Яда душегу́бнаго бѣжа́лъ еси́, е́же тва́ри служи́ти и со́лнце почита́ти, су́щаго же вои́стинну Бо́га, я́ко всѣ́хъ Зижди́теля, благоче́стія любо́вію взыска́лъ еси́.

Вода́мъ боже́ственнымъ прича́щся пакибытія́, ду́шу озари́лъ еси́ и бы́лъ еси́ вои́стинну сы́нъ благода́ти Бо́жія, наслѣ́дникъ боже́ственныхъ наслажде́ній.

Богоро́диченъ: Прему́дрость хра́мъ себе́ созда́ боже́ственъ па́че ума́ же и сло́ва, все́льшися въ чи́стую утро́бу Твою́, ю́же че́стнѣ очи́щши Ду́хомъ, Всенепоро́чная.

Конда́къ, гла́съ 6:

Яко преоби́дѣвъ тлѣ́нная и до́лу влеку́щая мудрова́нія, преподобному́чениче Дометíе, вели́къ наста́вникъ мона́хомъ показа́лся еси́, не устраши́вся я́рости царя́, не хотя́ща чти́ти Христа́, и́стиннаго Бо́га. Сего́ ра́ди и сконча́лся еси́, воспѣва́я пѣ́снь: Бо́гъ е́сть со мно́ю, и никто́же на мя́.

Сѣда́ленъ, гла́съ 8. Подо́бенъ: Прему́дрости.

Пе́рсское служе́ніе оста́вль, ко Влады́цѣ прише́лъ еси́, ба́нею креще́нія, сла́вне, просвѣ́щся мы́слію, и, мона́шествовавъ преподо́бно, посто́мъ умертви́лъ еси́ плотскíя стра́сти, богому́дре Дометíе. Тѣ́мже пострада́въ и пре́лесть побѣди́въ, сугу́бъ вѣне́цъ побѣ́ды воспрія́лъ еси́. Сего́ ра́ди вопіе́мъ тебѣ́: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, и ны́нѣ, гла́съ то́йже. Подо́бенъ: Повелѣ́нное.

Сокрове́нную мо́лнію подъ пло́тію существа́ Твоего́, Христе́, и Боже́ственнаго благолѣ́пія на святѣ́й показа́лъ еси́ горѣ́, Благодѣ́телю, просія́въ су́щимъ съ Тобо́ю ученико́мъ и, разумѣ́вше нестерпи́му су́щу сла́ву Твою́, — Свя́тъ еси́, — возопи́ша, — я́ко непристу́пенъ Сы́й, ви́дѣнъ бы́лъ еси́ пло́тію мíрови, Еди́не Человѣколю́бче.

Пѣ́снь 4.

Ирмо́съ: Услы́шахъ сла́вное смотре́ніе Твое́, Христе́ Бо́же, я́ко роди́лся еси́ отъ Дѣ́вы, да отъ ле́сти изба́виши зову́щія: сла́ва си́лѣ Твое́й, Го́споди.

Зако́нъ въ Сина́и писа́ніемъ вообража́я, Христе́ Бо́же, во о́блацѣ, и огни́, и мра́цѣ, и въ ви́хрѣ яви́лся еси́ носи́мь: сла́ва си́лѣ Твое́й, Го́споди.

Да увѣ́риши сла́вное строе́ніе Твое́, Христе́ Бо́же, я́ко Сы́й пре́жде вѣ́къ и То́йже на о́блацѣ восхожде́ніе положи́вый, на Ѳаво́рѣ неизрече́нно просія́лъ еси́.

Соглаго́люще, предстоя́ху раболѣ́пно Тебѣ́, Влады́цѣ Христу́, къ ни́мже па́рою огня́ и мра́ка, и то́нкимъ хла́домъ бесѣ́довалъ еси́: сла́ва си́лѣ Твое́й, Го́споди.

Возвѣща́ху сла́вное Креста́ ра́ди Твоего́, на Ѳаво́ръ прише́дше, и́же во огни́ Тя́ и купинѣ́ дре́вле предви́дѣвый Моисе́й, и взя́тый на колесни́цѣ о́гненней Илія́, Христе́.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Позна́лъ еси́, сла́вне, естество́мъ Невѣ́домаго, слове́сно взыска́лъ еси́ и, обрѣ́тъ Сего́, возжела́въ, поклони́лся еси́, ра́дуяся, Того́ вели́чествію.

Ли́ку цѣлому́дрому те́плѣ прите́клъ еси́ мона́шествующихъ святы́хъ и, добродѣ́телей ре́вностію распала́емь, по́жилъ еси́ чи́стѣ въ постѣ́хъ и моли́твахъ.

Удо́бь разрѣши́ соу́зы естества́ богому́дренное твое́ жела́ніе, [о́тче,] и страсте́й угаси́ пе́щь росода́тельнымъ просвѣще́ніемъ Свята́го Ду́ха.

Богоро́диченъ: Крѣ́пость моя́ е́сть Бо́гъ и Госпо́дь, Богоро́дице Дѣ́во, вопло́щшееся Сло́во Пребоже́ственно изъ нетлѣ́ннаго Твоего́ чре́ва и живо́тъ на́мъ дарова́.

Пѣ́снь 5.

Ирмо́съ: Отъ свѣ́та пресѣкíй перворо́дный свѣ́тъ, я́ко во свѣ́тѣ дѣла́ пою́тъ Тя́, Христе́, Содѣ́теля, во свѣ́тѣ Твое́мъ пути́ на́ша напра́ви.

Предъ лице́мъ Твои́мъ го́ры уклони́шася, свѣ́тъ бо и предъ нога́ми, неботе́чныя лучи, Христе́, со́лнца пріи́де, зра́къ зе́мленъ я́ко прія́ти благоволи́лъ еси́.

Се́ Спа́съ, — вопія́ху Моисе́й и Илія́, ученико́мъ на горѣ́ святѣ́й Ѳаво́рстѣй оглаша́емымъ, — Христо́съ, Его́же дре́вле провозвѣсти́хомъ Су́щаго Бо́га.

Неизмѣ́нное естество́, человѣ́ческому примѣ́шся, оби́льно невеще́ственнаго Божества́ свѣ́тъ изобнажи́въ апо́столомъ, неизрече́нно возсія́.

Тя́, присносу́щное сія́ніе, во Оте́честѣй сла́вѣ ученицы́ я́ко ви́дѣвше возсія́вша, Христе́, Тебѣ́ вопія́ху: во свѣ́тѣ Твое́мъ пути́ на́ша напра́ви.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Ра́зумомъ боже́ственнымъ сія́я, блаже́нне, ви́димыхъ всѣхъ проразсуди́лъ еси́ неви́димыхъ присносу́ществіе, сія́ніемъ чистоты́ просвѣща́емь.

Боже́ственныя вкуси́въ добродѣ́тели, безмо́лвія и отше́льствія, утверди́лъ еси́ мы́сль нему́тну, устрое́ніе храня́, о́тче Дометíе.

Яко вои́стинну ве́ліе и чу́дно, е́же къ лу́чшему преложе́ніе твое́ и всему́дрый ра́зумъ, Вы́шняго бо руки́ измѣ́на и благода́ти Боже́ственныя дѣ́ло бы́сть.

Богоро́диченъ: Дѣ́ва пребыла́ еси́ безъ вре́да и ма́терская показу́еши, Всенепоро́чная Влады́чице: дѣ́вству бо рождество́ счета́ла еси́ и но́сиши обои́хъ сво́йства.

Пѣ́снь 6.

Ирмо́съ: Внегда́ скорбѣ́ти ми́, возопи́хъ ко Го́споду, и услы́ша мя́ Бо́гъ спасе́нія моего́.

Сія́нія па́че со́лнца Свѣ́тъ яснѣ́йшій, Спа́съ, просія́ на Ѳаво́рѣ, на́съ просвѣти́лъ е́сть.

Возше́дъ на го́ру Ѳаво́рскую, преобрази́лся еси́, Христе́, и ле́сть всю́ омрачи́въ, на́съ просвѣти́лъ еси́.

Тя́ Бо́га позна́вше сла́вніи апо́столи, на Ѳаво́рѣ же, Христе́, уди́вльшеся, колѣ́на преклони́ша.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Тве́рдо наноси́мое врага́ и супоста́та искуше́ніе претерпѣ́лъ еси́ и, разли́чно, преблаже́нне, искуше́нъ бы́въ, за́вистію бори́мъ, побѣди́тель яви́лся еси́, достосла́вне.

Житіе́ твое́ боже́ственное, жи́знь богови́дна и свѣтоно́сна бы́сть: мíра бо кра́сная оста́вль, боже́ственное благолѣ́піе уплоди́лъ еси́, богому́дре, и красоту́.

Зна́менія и чудеса́ сподо́бился еси́ соверша́ти па́че естества́, сла́вне, си́лою Боже́ственною воору́жся, имы́й свы́ше споспѣшеству́ющую тебѣ́ благода́ть, достосла́вне.

Богоро́диченъ: Свѣ́та жили́ще, и черто́гъ боголѣ́пенъ па́че ума́ воплоще́нія всѣ́хъ, Дѣ́во, Содѣ́теля: Ты́ бо еди́на яви́лася еси́ достоблаже́нное Тому́ поко́ище.

Конда́къ пра́здника, гла́съ 7. Самогла́сенъ:

На горѣ́ преобрази́лся еси́, и я́коже вмѣща́ху ученицы́ Твои́, сла́ву Твою́, Христе́ Бо́же, ви́дѣша, да егда́ Тя́ у́зрятъ распина́ема, страда́ніе у́бо уразумѣ́ютъ во́льное, мíрови же проповѣ́дятъ, я́ко Ты́ еси́ вои́стинну Отчее сія́ніе.

Икосъ:

Воста́ните, лѣни́віи, и́же всегда́ ни́зу пони́кшіи въ зе́млю, души́ моея́ по́мыслы, возми́теся и возвы́ситеся на высоту́ Боже́ственнаго восхожде́нія. Притеце́мъ къ Петру́ и къ Зеведе́евымъ и вку́пѣ со о́нѣми Ѳаво́рскую го́ру дости́гнемъ, да ви́димъ съ ни́ми сла́ву Бо́га на́шего, гла́съ же услы́шимъ, его́же свы́ше слы́шаша и проповѣ́даша Отчее сія́ніе.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Облиста́вшеся свѣ́томъ непристу́пныя сла́вы, на Ѳаво́рстѣй горѣ́ апо́столи, Христу́ вопія́ху: оте́цъ на́шихъ Бо́же, благослове́нъ еси́.

Сія́ніемъ Боже́ственнаго шу́ма, и росода́тельнымъ о́блакомъ, Христе́, и заре́ю Твое́ю наслажда́еми, апо́столи поя́ху: оте́цъ на́шихъ Бо́же, благослове́нъ еси́.

Въ непристу́пномъ свѣ́тѣ, я́ко ви́дѣ Тя́ Пе́тръ, на Ѳаво́рстѣй горѣ́ облиста́вша, Христе́, возопи́: оте́цъ на́шихъ Бо́же, благослове́нъ еси́.

Съ нача́льникомъ жи́зни Христо́мъ су́ще, дѣ́ти Зеведе́евы, я́ко испусти́ зра́ка свѣ́тъ, возгремѣ́ша: оте́цъ на́шихъ Бо́же, благослове́нъ еси́.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

На тебѣ́, о́тче, пресвѣ́тлая Ду́ха благода́ть почи́ и дѣ́йствія пресла́вна показа́ тебѣ́, вопію́щему и пою́щему вѣ́рно: благослове́нъ еси́, Бо́же оте́цъ на́шихъ.

Тве́рдымъ умо́мъ проше́лъ еси́ стезю́ поще́нія и при кончи́нѣ подвиго́въ му́ченикъ и́стиненъ бы́лъ еси́, зовы́й Христу́: благослове́нъ еси́, Бо́же оте́цъ на́шихъ.

Яко ро́ждшеся моли́твами твои́ми, дѣ́ти тебѣ́, отцу́, сподвиза́шася и, въ пеще́рѣ терпя́ще, страда́ша съ тобо́ю, согла́сно зову́ще Христу́: благослове́нъ еси́, Бо́же оте́цъ на́шихъ.

Богоро́диченъ: Спасе́нія приста́нище Тя́ стяжа́вше, отъ бу́ри спаса́емся и, наде́жду, ю́же къ Тебѣ́, я́ко основа́ніе ду́шъ держа́ще, зове́мъ Христу́: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Въ Вавило́нѣ о́троцы, боже́ственною распала́еми ре́вностію, мучи́теля и пла́мене преще́ніе му́жески попра́ша, и посредѣ́ огня́ вве́ржени, ороша́еми, поя́ху: благослови́те, вся́ дѣла́ Госпо́дня, Го́спода.

Манове́ніемъ вся́ нося́й, нога́ми пречи́стыми на го́ру взы́де Ѳаво́рскую Христо́съ, на не́йже па́че со́лнечныя лучи́ облиста́ лице́мъ, и́же зако́ну старѣ́йшія и благода́ти, показа́ пою́щія: благослови́те, вся́ дѣла́ Госпо́дня, Го́спода.

Непристу́пною сла́вою на горѣ́ я́влься неизрече́нно Ѳаво́рстѣй, неодержи́мый и незаходи́мый Свѣ́тъ, Отчее сія́ніе, тва́рь уясни́въ, человѣ́ки обожи́, пою́щія: благослови́те, вся́ дѣла́ Госпо́дня, Го́спода.

Священнолѣ́пно стоя́ще Моисе́й же и Илія́ на горѣ́ Ѳаво́рѣ, Боже́ственныя начерта́ніе я́сно ѵпоста́си ви́дѣвше, Христа́ во Оте́честѣй облиста́вша сла́вѣ, воспѣва́ху: благослови́те, вся́ дѣла́ Госпо́дня, Го́спода.

Иже во зра́цѣ Боже́ственнаго ра́ди явле́нія, лице́ просла́вися иногда́ Моисе́ово, Христо́съ же, я́ко ри́зою, свѣ́томъ и сла́вою одѣва́ется, свѣ́та бо самодѣ́теленъ Сы́й, озаря́етъ пою́щія: благослови́те, вся́ дѣла́ Госпо́дня, Го́спода.

Отъ свѣторо́дна о́блака, Христа́ ученицы́ объя́та зря́ще на Ѳаво́рѣ и ни́цы на зе́млю па́дше, у́мъ просвѣ́щше, со Отце́мъ Сего́ поя́ху и Ду́хомъ: благослови́те, вся́ дѣла́ Госпо́дня, Го́спода.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Снѣда́емь любо́вію, о́тче, Зижди́теля, зда́ній отри́нулъ еси́ вся́кое пристра́стіе, Ду́хомъ Бо́жіимъ я́вѣ направля́емь, Его́же превозно́симъ во вся́ вѣ́ки.

Земна́я попече́нія оттря́съ, небе́сными наде́ждами, о́тче, обогати́лся еси́ и е́же о Христѣ́ блаже́нствомъ, Его́же ны́нѣ наслажда́ешися во вся́ вѣ́ки.

Свѣтолу́чныя зари́, о́тче, пріе́мъ, Свята́го и Боже́ственнаго, прему́дре, Ду́ха, очи́ма я́вѣ Сего́, блаже́нне, ви́дѣлъ еси́, Боже́ственныхъ та́инъ стра́шно науча́юща тя́.

Богоро́диченъ: Боговѣща́нная цѣвни́ца Твоего́ пра́отца ковче́гъ Тя́ свя́тъ прообрази́, нося́щъ Бо́га, въ пло́ть обле́кшася, Его́же превозно́симъ во вся́ вѣ́ки.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Ужа́сни но́вымъ свѣтоли́тіемъ внеза́пу ученицы́ освѣ́щшеся, дру́гъ дру́га зря́ху, уди́вльшеся же и къ земли́ прекло́ншеся, Тебѣ́, Влады́цѣ всѣ́хъ, поклони́шася.

Шу́мъ изъ о́блака посыла́шеся богогла́сенъ, извѣству́я чу́до: Оте́цъ бо свѣ́товъ, — Се́й е́сть Сы́нъ Мо́й возлю́бленный, — апо́столомъ вопія́ше: Того́ послу́шайте.

Но́вая ви́дѣвше и пресла́вная, гла́съ Оте́ческій внуши́вше, на Ѳаво́рѣ Словесе́ слуги́, изображе́ніе Первообра́знаго, Се́й е́сть, — вопія́ху, — Спа́съ на́шъ.

Образе непремѣ́нный Су́щаго, недви́жиме, печа́ть неизмѣ́нна, Сы́не, Сло́ве, му́дросте и мы́шце, десни́це Вы́шняго, Си́ло, Тя́ воспѣва́емъ со Отце́мъ же и Ду́хомъ.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Свѣ́томъ невеще́ственнымъ озаря́емь, свѣтови́дѣнъ досто́йно, богоно́се, бы́лъ еси́, житіе́ непоро́чно стяжа́въ, о́тче, и всесвя́то, ны́нѣ же предстои́ши моли́твенникъ Влады́цѣ и Бо́гу о ста́дѣ твое́мъ.

Твои́ по́двизи воздержа́нія му́ченическими по́двиги по достоя́нію вѣнча́шася, и сугу́бо страда́ніе показа́лъ еси́ благому́жествомъ, и́хже прія́лъ еси́, и вѣ́чныхъ бла́гъ обрѣ́лъ еси́ наслажде́ніе.

Укрѣ́плься си́лою Боже́ственною и благода́тію, я́влься всѣ́мъ благоче́стія учи́тель, показа́лся еси́, чудесы́ украша́емь, вся́ утвержда́я, вся́ исцѣля́я, приходя́щія къ тебѣ́ вѣ́рно, богоблаже́нне.

Богоро́диченъ: Въ Тебѣ́ содѣ́яся вы́ше человѣ́ка, па́че естества́, Дѣ́во Богоро́дице, та́инство: Бо́жія бо была́ еси́ Роди́тельница, нося́щи на объя́тіяхъ и пита́ющи небе́сными во́инствы пѣсносло́вимаго.

Свѣ́тиленъ:

Свѣ́те неизмѣ́нный Сло́ве, Свѣ́та Отца́ нерожде́нна, въ явле́ннѣмъ свѣ́тѣ Твое́мъ, дне́сь на Ѳаво́рѣ свѣ́тъ ви́дѣхомъ Отца́, свѣ́тъ и Ду́ха, свѣ́томъ наставля́ющаго всю́ тва́рь.

Сла́ва, и ны́нѣ, то́йже.

На стихо́внѣ стихи́ры, гла́съ 6. Подо́бенъ: Ангельскія.

Возсія́въ па́че ума́ отъ Дѣ́вы Пресвяты́я, Сло́ве Бо́жій, во Ада́ма ве́сь обле́кся, и́же пре́жде омрачи́вшееся естество́ все́ просвѣти́лъ еси́, Боже́ственнымъ зра́ка Твоего́ измѣне́ніемъ, преобра́жся на горѣ́ Ѳаво́рстѣй, Влады́ко, пре́жде Честна́го Твоего́ Креста́, Христе́ Бо́же на́шъ.

Сти́хъ: Твоя́ су́ть небеса́, и Твоя́ е́сть земля́.

Свѣторо́днымъ осія́ема о́блакомъ ви́дяще Христа́ на Ѳаво́рѣ боже́ственніи ученицы́, ни́цы со стра́хомъ на зе́млю прекло́ньшеся, у́мъ же и се́рдце просвѣ́щше, съ Моисе́омъ и Иліе́ю зря́ще я́сно, воспѣва́ху Сего́, я́ко Бо́га, со Отце́мъ и Ду́хомъ.

Сти́хъ: Ѳаво́ръ и Ермо́нъ о и́мени Твое́мъ возра́дуетася.

Гора́, я́же иногда́ бя́ше мра́чна и ды́мна, се́ ны́нѣ честна́ и свята́ е́сть. Иже пе́рвѣе у́бо Изра́иля наста́вивый, я́коже пи́шетъ, столпо́мъ огнезра́чнымъ и о́блакомъ, дне́сь просія́ неизрече́нно па́че со́лнца Христо́съ на се́й, я́ко Бо́гъ просвѣтивъ вся́ческая.

Сла́ва, и ны́нѣ, гла́съ 5:

Зако́на и проро́ковъ Тя́, Христе́, Творца́ и Исполни́теля свидѣ́тельствоваша, зря́ще во о́блацѣ, Моисе́й богови́децъ и Илія́ огнеколесни́чникъ и неопа́льный небоше́ственникъ въ преображе́ніи Твое́мъ. Съ ни́миже и на́съ Твоего́ просвѣще́нія сподо́би, Влады́ко, пѣ́ти Тя́ во вѣ́ки.


НА ЛИТУРГІИ,

Блаже́нна пра́здника, пѣ́снь 1-я, обои́хъ кано́новъ со ирмосо́мъ на 6. Проки́менъ пра́здника, и свята́го, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Ефесе́емъ, зача́ло 233. Аллилу́ія, гла́съ 4: Пра́ведникъ я́ко фи́никсъ процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ]. Ева́нгеліе Іоа́нна, зача́ло 52. Прича́стенъ пра́здника и свята́го: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].


(Зри́.) Аще ли случи́тся попра́зднство Преображе́нія Христо́ва въ суббо́ту:

Тогда́ въ пято́къ [на вече́рни,] на Го́споди воззва́хъ... Сла́ва, пра́здника. И ны́нѣ, богоро́диченъ пе́рвый настоя́щаго гла́са.


(Мрк.) Аще ли случи́тся попра́зднство Преображе́нія Христо́ва въ недѣ́лю:

Въ суббо́ту на ма́лѣй вече́рни стихи́ры воскре́сны и богоро́дицы, по обы́чаю.

На вели́цѣй вече́рни, по обы́чной каѳи́смѣ на Го́споди воззва́хъ: стихи́ры воскре́сны 3, и восто́ченъ [Анато́ліевъ] еди́нъ и пра́здника 3, того́ дне́, и свята́го мине́и 3. [(Зри́:) Аще ли пое́тся святы́мъ на 6, или́ ему́же и поліеле́й, пое́мъ стихи́ры воскре́сны три́, и пра́здника 3, и свята́го 4. Сла́ва, свята́го.] Аще же ни́, Сла́ва, пра́здника. И ны́нѣ, богоро́диченъ пе́рвый, гла́са. На литíи стихи́ры пра́здника того́ дне́ рядовы́я стихо́вныя. Сла́ва, и ны́нѣ, пра́здника: пи́санъ на у́трени на стихо́внѣ. Аще ли и́мать святы́й сла́вникъ, Сла́ва, свята́го. И ны́нѣ, пра́здника. На стихо́внѣ стихи́ры воскре́сны. Сла́ва, свята́го, а́ще е́сть. И ны́нѣ, пра́здника. Аще ли ни́, Сла́ва, и ны́нѣ, пра́здника. На благослове́ніи хлѣ́бовъ: тропа́рь Богоро́дице Дѣ́во.., два́жды, и пра́здника, еди́ножды.

На у́трени, на Бо́гъ Госпо́дь: тропа́рь воскре́сенъ, два́жды. Сла́ва, свята́го, а́ще е́сть. И ны́нѣ, пра́здника. Аще ли ни́, Сла́ва, и ны́нѣ, пра́здника. По каѳи́смахъ сѣда́льны воскре́сны съ богоро́дичны и́хъ, и чте́ніе во Ева́нгеліи толково́мъ, и непоро́чны съ тропари́. Ипакои́ гла́са. Степе́нна, и проки́менъ гла́са. И Вся́кое дыха́ніе... Ева́нгеліе воскре́сно, и стихи́ра воскре́сна. Кано́нъ воскре́сенъ со ирмосо́мъ на 4, и Богоро́дицы на 2, и пра́здника на 4, и свята́го на 4. Катава́сія: Ли́цы изра́ильтестіи... Аще поліеле́й или́ славосло́віе, пое́мъ кано́нъ воскре́сенъ со ирмосо́мъ на 4, и пра́здника на 4, и свята́го на 6. По 3-й пѣ́сни конда́къ пра́здника, и свята́го, а́ще и́мать, и и́косъ, и сѣда́ленъ свята́го. Сла́ва, и ны́нѣ, пра́здника и чте́ніе. По 6-й пѣ́сни конда́къ воскре́сенъ, и и́косъ, и про́логъ. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва, свя́таго, а́ще и́мать. Аще ли ни́: Сла́ва, и ны́нѣ, пра́здника. На хвали́техъ стихи́ры воскре́сны 4 и свята́го, а́ще и́мать, подо́бны 3 и самогла́сенъ, и́же на Сла́ву, пое́мъ съ припѣ́вы его́. Аще ли не и́мать святы́й хвали́тны, пое́мъ воскре́сны 4 и пра́здника на 4, того́ дне́, стихо́вныя у́трени съ припѣ́вы пра́здника. Сла́ва, стихи́ра ева́нгельская. И ны́нѣ, Преблагослове́нна еси́... Славосло́віе вели́кое. По трисвято́мъ тропа́рь воскре́сенъ то́чію, ектеніи́, и отпу́стъ, и оглаше́ніе, и обы́чное исхожде́ніе въ притво́ръ. Та́же ча́съ пе́рвый.

На 1-мъ часѣ́ тропа́рь воскре́сенъ. Сла́ва пра́здника. И ны́нѣ, богоро́диченъ часо́въ. По Отче на́шъ: конда́къ пра́здника. Та́кожде и въ про́чія часы́ глаго́лемъ конда́къ пра́здника и воскре́сенъ, премѣня́юще; а́ще поліеле́й, и свята́го.

На литургíи: блаже́нна гла́са на 6, и пра́здника пѣ́снь рядова́я на 4. Аще ли и́матъ святы́й пѣ́снь: и блаже́нна воскре́сна на 4, и пра́здника пѣ́снь рядова́я на 4, и свята́го пѣ́снь 6-я на 4. По вхо́дѣ тропа́рь воскре́сенъ и пра́здника, та́же хра́ма и свята́го, а́ще и́мать. Сла́ва, конда́къ свята́го. И ны́нѣ, пра́здника. Аще ли не и́мать святы́й тропаря́ и кондака́, Сла́ва, воскре́сенъ. И ны́нѣ, пра́здника. Проки́менъ воскре́сенъ гла́са и пра́здника. Апо́столъ и Ева́нгеліе дне́. Прича́стенъ: Хвали́те Го́спода съ небе́съ... и пра́здника. Аще и́мать святы́й Апо́столъ и Ева́нгеліе, тогда́ пое́мъ проки́менъ воскре́сенъ гла́са, и свята́го. Апо́столъ и Ева́нгеліе дне́, и свята́го. Прича́стенъ: Хвали́те Го́спода съ небе́съ... и свята́го.

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 82 – 90.

/ Къ оглавленію раздѣла /


Наверхъ / Къ титульной страницѣ

0