Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 6-й де́нь.
Свято́е Преображе́ніе Го́спода Бо́га и Спа́са на́шего Іису́са Христа́.

НА МАЛѢЙ ВЕЧЕРНИ,
[На Го́споди воззва́хъ,] пое́мъ стихи́ры на 4, гласъ 1. Подо́бенъ: Небе́сныхъ чино́въ.

Иже съ Моисе́омъ глаго́лавый дре́вле* на горѣ́ Сина́йстѣй о́бразы, глаго́ля:* Азъ есмь Бо́гъ Сы́й;* дне́сь же на горѣ́ Ѳаво́рстѣй преобра́жся,* началообра́зное показу́я, луча́ми облиста́яся.* Тѣ́мже, Христе́, велича́ю Твою́ си́лу. [Два́жды.]

Пои́мь осо́бь Твоя́, Христе́, ученики́,* Петра́, Іа́кова и Іоа́нна,* во́лею на го́ру си́хъ возве́лъ еси́,* чу́до стра́шное показа́въ* и нестерпи́мое Боже́ственнаго прише́ствія Твоего́ издале́ча* присносу́щное благолѣ́піе.

Твоего́, Христе́, прише́ствія непостижи́маго* тре́петни бы́вше апо́столи дре́вле,* ни́цъ на зе́млю па́дше,* Боже́ственнѣй Твое́й дивля́хуся си́лѣ:* со́лнца просія́въ свѣ́тлѣе, Бла́же,* неизрече́нною си́лою Твое́ю.

Сла́ва, и ны́нѣ, гла́съ 8:

Мра́къ зако́нный свѣ́тлый преображе́нія прія́тъ о́блакъ, въ не́мже Моисе́й и Илія́ бы́вше, и пресвѣ́тлыя сла́вы сподо́бльшеся, Бо́гу глаго́лаху: Ты́ еси́ Бо́гъ на́шъ, Ца́рь вѣко́въ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Дне́сь Христо́съ* на горѣ́ Ѳаво́рстѣй,* Ада́мово премѣни́въ* очернѣ́вшее естество́,* просвѣти́въ, богосодѣ́ла.

Сти́хъ: Твоя́ су́ть небеса́,* и Твоя́ е́сть земля́.

Сія́ніемъ добродѣ́телей* просвѣ́щшеся, вопіе́мъ,* на горѣ́ святѣ́й зря́ще Боже́ственное* Госпо́дне Преображе́ніе.

Сти́хъ: Ѳаво́ръ и Ермо́нъ* о и́мени Твое́мъ возра́дуетася.

Со́лнце у́бо,* зе́млю уясня́я,* а́біе захо́дитъ,* Христо́съ же, со сла́вою облиста́въ на горѣ́,* мíръ просвѣти́лъ е́сть.

Сла́ва, и ны́нѣ, гла́съ и подо́бенъ то́йже:

Ви́дѣша на Ѳаво́рѣ* Моисе́й же и Илія́* отъ Дѣ́вы Отрокови́цы* Бо́га воплоща́ема,* человѣ́комъ на избавле́ніе.

Тропа́рь, гла́съ 7:

Преобрази́лся еси́ на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.


НА ВЕЛИЦѢЙ ВЕЧЕРНИ,
Стихоло́гія не быва́етъ, то́кмо а́ще е́сть недѣ́ля, тогда́ пое́мъ каѳи́сму всю́; а́ще въ понедѣ́льникъ, пе́рвый антифо́нъ.

На Го́споди, воззва́хъ: стихи́ры на 8, самогла́сны, гла́съ 4, по два́жды. Космы́ мона́ха:

Пре́жде Креста́ Твоего́, Го́споди, гора́ небеси́ подо́бящися, и о́блакъ, я́ко сѣ́нь, протяза́шеся, Тебѣ́ преобразу́ющуся, отъ Отца́ же свидѣ́тельствуему: та́мо бѣ́ Пе́тръ со Іа́ковомъ и Іоа́нномъ, я́ко хотя́ху бы́ти съ Тобо́ю и во вре́мя преда́нія Твоего́, да, ви́дѣвше чудеса́ Твоя́, не устраша́тся страда́ній Твои́хъ, и́мже поклони́тися на́мъ въ ми́рѣ сподо́би, вели́кія ра́ди Твоея́ ми́лости.

Пре́жде Креста́ Твоего́, Го́споди, пои́мь ученики́ на го́ру высо́ку, преобрази́лся еси́ предъ ни́ми, луче́ю си́лы озаря́я и́хъ, отсю́ду у́бо человѣколю́біемъ, отону́ду вла́стію, показа́ти хотя́ воскресе́нія свѣ́тлость, его́же и на́съ, Бо́же, въ ми́рѣ сподо́би, я́ко Ми́лостивъ и Человѣколю́бецъ.

Гора́, я́же, иногда́ мра́чна и ды́мна, ны́нѣ же честна́ и свята́ е́сть, на не́йже но́зѣ Твои́ стоя́стѣ, Го́споди, превѣ́чное бо сокрове́нное та́инство напослѣ́докъ явле́но сотвори́, стра́шное Твое́ преображе́ніе, Петру́, и Іоа́нну, и Іа́кову. Иже, такова́ сія́нія лица́ Твоего́ не терпя́ще и свѣ́тлости ри́зъ Твои́хъ, ни́цъ на лицѣ́ земли́ покрыва́хуся, и́же и у́жасомъ одержи́ми, дивля́хуся, ви́дяще Моисе́я и Илію́, глаго́люща съ Тобо́ю, хотя́щая приключи́тися Тебѣ́; и гла́съ отъ Отца́ свидѣ́тельствоваше, глаго́ля: Се́й е́сть Сы́нъ Мо́й возлю́бленный, о Не́мже благоизво́лихъ, Того́ послу́шайте, Иже и да́руетъ мíрови ве́лію ми́лость.

На горѣ́ высо́цѣ преобра́жся, Спа́съ, верхо́вныя имѣ́я ученики́, пресла́вно облиста́лъ е́сть, показу́я, я́ко высото́ю добродѣ́телей облиста́вше и Боже́ственнѣй сла́вѣ сподо́бятся. Глаго́лющіи со Христо́мъ Моисе́й и Илія́ пока́зоваху, я́ко живы́ми и ме́ртвыми облада́етъ и и́же дре́вле зако́номъ и проро́ки глаго́лавый е́сть Бо́гъ, Ему́же и гла́съ Оте́чь изъ о́блака свѣ́тла послу́шествоваше, глаго́лющій: Того́ послу́шайте, Иже Кресто́мъ а́да плѣни́вша и ме́ртвымъ да́рующа живо́тъ вѣ́чный.

Сла́ва, и ны́нѣ, гла́съ 6. Анато́лія:

Прообразу́я воскресе́ніе Твое́, Христе́ Бо́же, тогда́ поя́тъ три́ Твоя́ ученики́, Петра́, и Іа́кова, и Іоа́нна, на Ѳаво́ръ возше́лъ еси́. Тебѣ́ же, Спа́се, преобразу́ющуся, Ѳаво́рская гора́ свѣ́томъ покрыва́шеся, ученицы́ Твои́, Сло́ве, поверго́ша себе́ до́лу на земли́, не терпя́ще зрѣ́ти неви́димаго зра́ка, а́нгели служа́ху стра́хомъ и тре́петомъ, небеса́ убоя́шася, земля́ вострепета́, ви́дяще на земли́ сла́вы Го́спода.

Вхо́дъ. Проки́менъ дне́. [И чте́нія три́.]

Исхо́да чте́ніе. [Глава́ 24.]

Рече́ Госпо́дь къ Моисе́ю: взы́ди ко Мнѣ́ на го́ру и ста́ни та́мо, и да́мъ ти́ скрижа́ли ка́менныя, зако́нъ и за́повѣди, я́же написа́хъ взако́нити и́мъ. И воста́въ Моисе́й и Іису́съ, предстоя́й ему́, взыдо́ша на го́ру Бо́жію. И ста́рцемъ рече́: безмо́лвствуйте та́мо, до́ндеже возврати́мся къ ва́мъ, и се́ Ааро́нъ и Оръ съ ва́ми, а́ще кому́ прилучи́тся су́дъ, да и́дутъ къ ни́мъ. И взы́де Моисе́й на го́ру, и покры́ о́блакъ го́ру. И сни́де сла́ва Бо́жія на го́ру Сина́йскую, и покры́ ю́ о́блакъ ше́сть дне́й, и призва́ Госпо́дь Моисе́я въ де́нь седмы́й изъ среды́ о́блака. Видѣ́ніе же сла́вы Госпо́дни, я́ко о́гнь, паля́ на версѣ́ горы́, пря́мо сыно́въ Изра́илевыхъ. И вни́де Моисе́й посредѣ́ о́блака, и взы́де на го́ру, и бѣ́ та́мо, на горѣ́, четы́редесять дне́й и четы́редесять ноще́й.

Исхо́да чте́ніе. [Глава́ 33.]

Во дне́хъ о́нѣхъ, глаго́ла Госпо́дь къ Моисе́ю лице́мъ къ лицу́, я́ко а́ще бы кто́ возглаго́лалъ къ своему́ дру́гу, и отсыла́шеся въ по́лкъ; слуга́ же Іису́съ, сы́нъ Нави́нъ, ю́ноша не исхожда́ше изъ ски́ніи. И рече́ Моисе́й ко Го́споду: се́ Ты́ мнѣ́ глаго́леши, изведи́ лю́ди сія́, Ты́ же не яви́лъ ми́ еси́, его́же по́слеши со мно́ю. Ты́ же мнѣ́ ре́клъ еси́: вѣ́мъ тя́ па́че всѣ́хъ, и благода́ть и́маши у Мене́. Аще у́бо обрѣто́хъ благода́ть предъ Тобо́ю, яви́ ми Сама́го Тебе́ разу́мно, да ви́жу Тя́: я́ко да обрѣ́тъ бу́ду благода́ть предъ Тобо́ю, и да разумѣ́ютъ, я́ко лю́діе Твои́ язы́къ се́й. И глаго́ла ему́ Госпо́дь: Азъ Са́мъ предъиду́ предъ тобо́ю и упоко́ю тя́. И рече́ къ Нему́ Моисе́й: а́ще Са́мъ Ты́ не ше́ствуеши съ на́ми, да не изведе́ши мя́ отсю́ду. И ка́ко вѣ́домо бу́детъ вои́стинну, я́ко обрѣто́хъ благода́ть у Тебе́, а́зъ же и лю́діе Твои́, то́чію иду́щу Ти́ съ на́ми? И просла́вленъ бу́ду а́зъ же и лю́діе Твои́ па́че всѣ́хъ язы́къ, ели́цы су́ть на земли́. Рече́ же Госпо́дь къ Моисе́ю: сіе́ сло́во твое́, е́же ре́клъ еси́, сотворю́, обрѣ́лъ бо еси́ благода́ть предо Мно́ю, и вѣ́мъ тя́ па́че всѣ́хъ. И глаго́ла Моисе́й: покажи́ ми сла́ву Твою́. И рече́: Азъ предъиду́ предъ тобо́ю сла́вою Мое́ю и воззову́ о и́мени Мое́мъ: Госпо́дь предъ тобо́ю. И поми́лую, его́же а́ще ми́лую, и уще́дрю, его́же а́ще ще́дрю. И рече́: не возмо́жеши ви́дѣти лице́ Мое́, не бо́ у́зритъ человѣ́къ лице́ Мое́, и жи́въ бу́детъ. И рече́ Госпо́дь: се́ мѣ́сто у Мене́, и ста́неши на ка́мени, до́ндеже у́бо пре́йдетъ сла́ва Моя́, и положу́ тя въ разсѣ́линѣ ка́мене, и покры́ю руко́ю Мое́ю надъ тобо́ю, до́ндеже мимоиду́. И отъиму́ ру́ку Мою́, и тогда́ у́зриши за́дняя Моя́, лице́ же Мое́ не яви́тъ ти ся. И у́треневавъ Моисе́й, зау́тра взы́де на го́ру Сина́йскую, я́коже глаго́ла ему́ Госпо́дь. И сни́де Госпо́дь во о́блацѣ, и предста́ Ему́ та́мо Моисе́й, и призва́ и́менемъ Госпо́днимъ. И мимои́де Госпо́дь предъ лице́мъ его́, и призва́: Госпо́дь Бо́гъ Ще́дръ и Ми́лостивъ, Долготерпѣли́въ, и Многоми́лостивъ, и Истиненъ. И потща́вся Моисе́й, прини́къ на зе́млю, поклони́ся Го́сподеви.

Ца́рствъ тре́тіихъ чте́ніе. [Глава́ 19.]

Во дне́хъ о́нѣхъ, пріи́де Илія́ въ Вирсавíю, я́же е́сть земля́ Іу́дова, и оста́ви о́трочища своего́ та́мо. И са́мъ по́йде въ пусты́ню пу́ть дне́, и пріи́де, и сѣ́де подъ сме́рчіемъ, и у́спе, и со́нъ ви́дѣ та́мо, подъ са́домъ. И се́ нѣ́кій прикосну́ся ему́, и рече́ ему́: воста́ни, я́ждь и пíй. И воззрѣ́ Илія́, и се́ при возгла́віи его́ опрѣсно́къ ячме́нный и корча́гъ воды́; и воста́, и яде́, и пи́тъ, и обра́щся, у́спе. И обра́щся Ангелъ Госпо́день втори́цею, и косну́ся его́, и рече́ ему́: воста́ни, я́ждь и пíй, я́ко мно́гъ отъ тебе́ пу́ть. И воста́, и яде́, и пи́тъ, и и́де въ крѣ́пости я́ди тоя́ четы́редесять дне́й и четы́редесять ноще́й до горы́ Хори́вскія. И вни́де та́мо въ пеще́ру, и всели́ся въ не́й. И се́ глаго́лъ Госпо́день къ нему́, и рече́ ему́ Госпо́дь: изы́ди и ста́ни на горѣ́ предъ Го́сподемъ. И се́ Госпо́дь мимои́детъ, и ду́хъ ве́лій и крѣ́покъ разоря́я го́ры, и сокруша́я ка́меніе предъ Го́сподемъ: не въ ду́сѣ Госпо́дь; и по ду́сѣ тру́съ, и не въ тру́сѣ Госпо́дь; и по тру́сѣ о́гнь, и не во огни́ Госпо́дь; и по огни́ гла́съ хла́да то́нка, и та́мо Госпо́дь. И бы́сть, я́ко услы́ша Илія́, покры́ лице́ свое́ ми́лотію свое́ю, и изы́де, и ста́ бли́зъ пеще́ры. И рече́ Госпо́дь къ нему́: иди́ и возврати́ся въ пу́ть тво́й, и по́йдеши въ пу́ть пусты́ни Дама́сковы, и пома́жеши Елиссе́я, сы́на Асафа́това, вмѣ́сто тебе́ проро́ка.

На литíи стихи́ры самогла́сны, гла́съ 2:

Иже свѣ́томъ Твои́мъ всю́ вселе́нную освяти́въ, на горѣ́ высо́цѣ преобрази́лся еси́, Бла́же, показа́въ ученико́мъ Твои́мъ си́лу Твою́, я́ко мíръ избавля́еши отъ преступле́нія. Тѣ́мже вопіе́мъ Ти́: Милосе́рде Го́споди, спаси́ ду́ши на́ша.

Иже на горѣ́ Ѳаво́рстѣй преобра́жся во сла́вѣ, Христе́ Бо́же, и показа́въ ученико́мъ Твои́мъ сла́ву Твоего́ Божества́, озари́ и на́съ свѣ́томъ Твоего́ разумѣ́нія, и наста́ви на стезю́ за́повѣдей Твои́хъ, я́ко еди́нъ Бла́гъ и Человѣколю́бецъ.

Иже пре́жде со́лнца Свѣ́тъ Христо́съ тѣле́снѣ на земли́ жи́тельствуя, и пре́жде Креста́ вся́, я́же стра́шнаго смотре́нія, соверши́въ боголѣ́пно, дне́сь на Ѳаво́рстѣй горѣ́, та́йно Тро́ицы о́бразъ показу́я, изя́щныя три́ ученики́, Петра́, и Іа́кова, и Іоа́нна, на ню́ возве́лъ еси́ наединѣ́, и ма́ло скры́въ пло́ти воспрія́тіе, преобрази́лся еси́ предъ ни́ми, явля́я началообра́зныя добро́ты благолѣ́піе и то́ не всесоверше́нно: о́во извѣству́я ты́я, вку́пѣ и щадя́, да не ка́ко со зра́комъ и е́же жи́ти погубя́тъ, но я́ко можа́ху вмѣща́ти, тѣле́сныма очи́ма стерпя́ще. И проро́ковъ верхо́вныя, Моисе́я и Илію́, приве́лъ еси́, непрекосло́внѣ свидѣ́тельствующія Его́ Божество́, и я́ко То́й е́сть и́стинное Оте́ческаго существа́ Сія́ніе, госпо́дствуяй живы́ми и ме́ртвыми. Тѣ́мъ и о́блакъ, я́коже сѣ́нь, объя́тъ и́хъ, и гла́съ свы́ше Оте́чь изъ о́блака шу́мно предсвидѣ́тельствующъ и глаго́лющъ: Се́й е́сть, Его́же нетлѣ́нно изъ чре́ва пре́жде денни́цы роди́хъ, Сы́нъ возлю́бленный Мо́й, Его́же посла́хъ спасти́, во Отца́ и Сы́на и Ду́ха Свята́го креща́емыя, и исповѣ́дающія вѣ́рно, я́ко нераздѣ́льна е́сть еди́на держа́ва Божества́, Того́ послу́шайте. Са́мъ у́бо, Человѣколю́бче Христе́ Бо́же, и на́съ озари́ свѣ́томъ непристу́пныя Твоея́ сла́вы, и досто́йны покажи́ наслѣ́дники безконе́чнаго Ца́рствія Твоего́, я́ко Пребла́гъ.

Сла́ва, гла́съ 5:

Пріиди́те, взы́демъ на го́ру Госпо́дню и въ до́мъ Бо́га на́шего и у́зримъ сла́ву преображе́нія Его́, сла́ву я́ко Единоро́днаго отъ Отца́, свѣ́томъ пріи́мемъ Свѣ́тъ и, возвы́шени бы́вше ду́хомъ, Тро́ицу Единосу́щную воспои́мъ во вѣ́ки.

И ны́нѣ, гла́съ то́йже:

Зако́на и проро́ковъ Тя́, Христе́, Творца́ и Исполни́теля свидѣ́тельствоваша, зря́ще во о́блацѣ, Моисе́й богови́децъ и Илія́ огнеколесни́чникъ и неопа́льный небоше́ственникъ въ преображе́ніи Твое́мъ. Съ ни́миже и на́съ Твоего́ просвѣще́нія сподо́би, Влады́ко, пѣ́ти Тя́ во вѣ́ки.

На стихо́внѣ стихи́ры самогла́сны, гла́съ 1:

Иже дре́вле съ Моисе́омъ глаго́лавый на горѣ́ Сина́йстѣй о́бразы, А́зъ е́смь, глаго́ля, Сы́й, дне́сь на горѣ́ Ѳаво́рстѣй преобра́жся предъ ученики́, показа́ началообра́зную добро́ту зра́ка, въ Себѣ́ воспріи́мъ человѣ́ческое существо́, и таковы́я благода́ти свидѣ́тели поста́вль Моисе́я и Илію́, о́бщники творя́ше весе́лія, провозвѣща́ющія сла́вное Креста́ ра́ди и спаси́тельное воскресе́ніе.

Сти́хъ: Твоя́ су́ть небеса́, и Твоя́ е́сть земля́.

Твоего́ Единоро́днаго Сы́на прови́дѣвъ Ду́хомъ плотско́е къ человѣ́комъ прише́ствіе, богооте́цъ Дави́дъ, издале́ча къ весе́лію созыва́етъ тва́рь и проро́чески взыва́етъ: Ѳаво́ръ и Ермо́нъ о и́мени Твое́мъ возра́дуются. На сію́ бо возше́дъ го́ру, Спа́се, со ученики́ Твои́ми, очернѣ́вшее Ада́мово естество́, преобра́жся, облиста́ти па́ки сотвори́лъ еси́, претвори́въ е́ въ Твоего́ Божества́ сла́ву же и свѣ́тлость. Тѣ́мже вопіе́мъ Ти́: Содѣ́телю вся́ческихъ, Го́споди, сла́ва Тебѣ́.

Сти́хъ: Ѳаво́ръ и Ермо́нъ о и́мени Твое́мъ возра́дуетася.

Неодержи́мое Твоего́ свѣтоли́тія, и непристу́пное Божества́, зря́ще апо́столовъ лу́чшіи, на горѣ́ преображе́нія, безнача́льне Христе́, Боже́ственнымъ измѣни́шася у́жасомъ, и о́блакомъ осія́вшеся свѣ́тлымъ, гла́съ слы́шаху Оте́чь, извѣству́ющъ та́инство Твоего́ вочеловѣ́ченія, я́ко еди́нъ еси́ и по воплоще́ніи, Сы́нъ Единоро́дный и Спа́съ мíра.

Сла́ва, и ны́нѣ, гла́съ 6:

Петру́, и Іа́кову, и Іоа́нну, лу́чшимъ ученико́мъ Твои́мъ, Го́споди, дне́сь показа́лъ еси́ на горѣ́ Ѳаво́рстѣй сла́ву Боже́ственнаго Твоего́ зра́ка: ви́дяху бо ри́зы Твоя́, облиста́вшія, я́ко свѣ́тъ, и лице́ Твое́ па́че со́лнца, не терпя́ще зрѣ́ти нестерпи́мое Твоего́ сія́нія, на зе́млю низпа́даху, ника́коже зрѣ́ти могу́ще. Гла́съ же слы́шаху, свидѣ́тельствующъ свы́ше: Се́й е́сть Сы́нъ Мо́й возлю́бленный, прише́дый въ мíръ спасти́ человѣ́ка.

На благословѣ́ніи хлѣ́бовъ тропа́рь, гла́съ 7:
Преобрази́лся еси́ на горѣ́... [Три́жды.] Пи́санъ на ма́лѣй вече́рни.
И чте́ніе пра́здника.



НА УТРЕНИ,
На Бо́гъ Госпо́дь: тропа́рь пра́здника, три́жды.

По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Человѣ́ческое измѣне́ніе, е́же со сла́вою Твое́ю, Спа́се, второ́е и стра́шное Твоего́ прише́ствія показу́яй, на горѣ́ Ѳаво́рстѣй преобрази́лся еси́. Илія́ и Моисе́й глаго́лаху съ Тобо́ю, и тріе́хъ отъ учени́къ спризва́въ, и́же, ви́дѣвше, Влады́ко, сла́ву Твою́, блиста́нію Твоему́ удиви́шася. Иже тогда́ си́мъ свѣ́тъ Тво́й возсія́вый, просвѣти́ ду́ши на́ша.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ и подо́бенъ то́йже:

На горѣ́ Ѳаво́рстѣй преобрази́лся еси́, Іису́се, и о́блакъ свѣ́телъ, протяза́ющся, я́ко сѣ́нь, апо́столы сла́вою покры́, тѣ́мже и на зе́млю ни́цъ па́даху, не терпя́ще зрѣ́ти свѣ́тлости непристу́пныя сла́вы лица́ Твоего́, безнача́льне Спа́се, Христе́ Бо́же. Иже тогда́ си́мъ свѣ́тъ Тво́й возсія́вый, просвѣти́ ду́ши на́ша.

Сла́ва, и ны́нѣ, то́йже.

По поліеле́и сѣда́ленъ, гла́съ то́йже. Подо́бенъ: Вознесы́йся.

Возше́дъ со ученики́ на го́ру и во сла́вѣ Отчи облиста́въ, съ Моисе́омъ Илія́ Тебѣ́ предстоя́тъ, зако́нъ и проро́цы бо я́ко Бо́гу слу́жатъ. Ему́же и сыновство́ есте́ственное Роди́тель исповѣ́дая, нарица́ше Сы́на, Его́же воспѣва́емъ съ Тобо́ю и Ду́хомъ.

Сла́ва, и ны́нѣ, гла́съ 8. Подо́бенъ: Повелѣ́нное.

Сокрове́нную мо́лнію подъ пло́тію существа́ Твоего́, Христе́, и Боже́ственнаго благолѣ́пія на святѣ́й показа́лъ еси́ горѣ́, Благодѣ́телю, просія́въ су́щимъ съ Тобо́ю ученико́мъ, и, разумѣ́вше нестерпи́му су́щу сла́ву Твою́, — Свя́тъ еси́, — возопи́ша, я́ко непристу́пенъ сы́й, ви́дѣнъ бы́лъ еси́ пло́тію мíрови, Еди́не Человѣколю́бче.

Степе́нна, 1-й антифо́нъ 4-го гла́са. Проки́менъ, гла́съ 4: Ѳаво́ръ и Ермо́нъ о и́мени Твое́мъ возра́дуетася. Сти́хъ: Твоя́ су́ть небеса́, и Твоя́ е́сть земля́. Ева́нгеліе Луки́, зача́ло 45.

По 50-мъ псалмѣ́. Сла́ва:

Вся́ческая дне́сь ра́дости испо́лнишася: Христо́съ преобрази́ся предъ ученики́.

И ны́нѣ, то́йже.

Стихи́ра самогла́сна, гла́съ 5:

Божества́ Твоего́, Спа́се, ма́лу зарю́ обнажи́въ совозше́дшимъ съ Тобо́ю на го́ру, премíрныя Твоея́ сла́вы сотвори́лъ еси́ рачи́тели. Тѣ́мже ужа́сно зовя́ху: добро́ е́сть на́мъ здѣ́ бы́ти. Съ ни́миже и мы́ Тебе́, преобра́жшагося Спа́са Христа́, пое́мъ во вѣ́ки.

Кано́на два́: ки́ръ Космы́, гла́съ 4, и ки́ръ Іоа́нна, гла́съ 8.
Ирмосы́ обою́ кано́новъ по два́жды, тропари́ вси́ пое́мъ на 12.

Кано́нъ, гла́съ 4.

Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Глаго́лы живо́тныя друго́мъ Христо́съ и о Боже́ственнѣмъ наказу́я Ца́рствіи, рече́: во Мнѣ́ Отца́ позна́йте; свѣ́томъ я́ко облиста́я непристу́пнымъ, въ ра́дости пою́ще: пои́мъ Бо́гу на́шему, я́ко просла́вися.

Си́лою язы́къ облече́теся, дру́зи ученицы́, чу́дни же бу́дете въ бога́тствѣ и́хъ, я́ко сла́вы напо́лнитеся, я́ко явлю́ся свѣтлѣ́е со́лнца, облиста́я въ ра́дости пою́щихъ: пои́мъ Бо́гу на́шему, я́ко просла́вися.

Дне́сь Христо́съ, на горѣ́ Ѳаво́рстѣй просія́въ я́сно Боже́ственною заре́ю, я́коже обѣща́ся, ученико́мъ обнажи́ зра́къ, свѣтоно́сныя же напо́лнишеся Боже́ственныя зари́, въ ра́дости поя́ху: пои́мъ Бо́гу на́шему, я́ко просла́вися.

Другíй кано́нъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Моисе́й, на мо́рѣ проро́чески ви́дѣвъ о́блакомъ и столпо́мъ дре́вле о́гненнымъ сла́ву Госпо́дню, вопія́ше: Изба́вителю и Бо́гу на́шему пои́мъ.

Яко ка́менемъ, тѣ́ломъ покры́вся, обоже́ніемъ Неви́димаго зря́, Моисе́й богови́децъ взыва́ше: Изба́вителю и Бо́гу на́шему пои́мъ.

Ты́ на горѣ́ зако́ннѣй и на Ѳаво́рстѣй ви́дѣнъ бы́лъ еси́ Моисе́емъ во мра́цѣ дре́вле, во свѣ́тѣ же ны́нѣ непристу́пнѣмъ Божества́.

Катава́сія: Кре́стъ начерта́въ, Моисе́й...

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Во всего́ Ада́ма обле́кся, Христе́, очернѣ́вшее, измѣни́въ, просвѣти́лъ еси́ дре́вле естество́ и измѣне́ніемъ зра́ка Твоего́ богосодѣ́лалъ еси́.

Столпо́мъ огнезра́чнымъ и о́блакомъ дре́вле, Иже въ пусты́ни Изра́иля веды́й, дне́сь на горѣ́ Ѳаво́рстѣй, неизрече́нно во свѣ́тѣ Христо́съ просія́.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Осѣня́ющая сла́ва въ сѣ́ни пе́рвѣе и Моисе́еви бесѣ́дующи, Твоему́ уго́днику, о́бразъ бы́сть облиста́вшаго неизрече́нно на Ѳаво́рѣ, Влады́ко, Твоего́ преображе́нія.

Совзыдо́ша Ти́, Сло́ве Единоро́дный, вы́шніи апо́стольстіи верси́ на го́ру Ѳаво́рскую, и сопредста́ша Ти́ Моисе́й же и Илія́, я́ко Бо́жія слуги́, Еди́не Человѣколю́бче.

Бо́гъ Сло́во сы́й, ве́сь зе́мленъ бы́сть, всему́ Божеству́ смѣси́въ человѣ́чество во ѵпоста́си Свое́й, ю́же во двою́ существу́ Моисе́й и Илія́ же ви́дѣша на горѣ́ Ѳаво́рѣ.

Сѣда́ленъ, гла́съ 4. Подо́бенъ: Удиви́ся Іо́сифъ.

На горѣ́ Ѳаво́рстѣй преобрази́лся еси́, Іису́се, посредѣ́ Иліи́ и Моисе́я прему́дрыхъ, со Іа́ковомъ, и Петро́мъ и Іоа́нномъ. Пе́тръ же, сопребыва́я, сія́ Тебѣ́ глаго́лаше: добро́ здѣ́ е́сть сотвори́ти три́ сѣ́ни: еди́ну Моисе́ю, и еди́ну Иліи́, и еди́ну Тебѣ́, Влады́цѣ Христу́. Иже тогда́ свѣ́тъ Тво́й си́мъ возсія́вый, просвѣти́ ду́ши на́ша.

Сла́ва, и ны́нѣ, то́йже.

Пѣ́снь 4.

Ирмо́съ: Услы́шахъ сла́вное смотре́ніе Твое́, Христе́ Бо́же, я́ко роди́лся еси́ отъ Дѣ́вы, да отъ ле́сти изба́виши зову́щія: сла́ва си́лѣ Твое́й, Го́споди.

Зако́нъ въ Сина́и писа́ніемъ вообража́я, Христе́ Бо́же, во о́блацѣ, и огни́, и мра́цѣ, и въ ви́хрѣ яви́лся еси́ носи́мь: сла́ва си́лѣ Твое́й, Го́споди.

Да увѣ́риши сла́вное строе́ніе Твое́, Христе́ Бо́же, я́ко Сы́й пре́жде вѣ́къ и То́йже на о́блацѣ восхожде́ніе положи́вый, на Ѳаво́рѣ неизрече́нно просія́лъ еси́.

Соглаго́люще, предстоя́ху раболѣ́пно Тебѣ́, Влады́цѣ Христу́, къ ни́мже па́рою огня́ и мра́ка, и то́нкимъ хла́домъ бесѣ́довалъ еси́: сла́ва си́лѣ Твое́й, Го́споди.

Возвѣща́ху сла́вное Креста́ ра́ди Твоего́, на Ѳаво́ръ прише́дше, и́же во огни́ Тя́ и купинѣ́ дре́вле предви́дѣвый Моисе́й, и взя́тый на колесни́цѣ о́гненней Илія́, Христе́.

Инъ.

Ирмо́съ: Изъ пло́ти Твоея́ лучи́ Божества́ исхожда́ху проро́комъ и апо́столомъ. Тѣ́мъ нача́льницы, пою́ще, взыва́ху: сла́ва си́лѣ Твое́й, Го́споди.

Иже купину́ сохрани́вый неврежде́ну, прикосну́вшуюся огню́, Моисе́ю богосія́нную пло́ть показа́лъ еси́, Влады́ко, пою́щему: сла́ва си́лѣ Твое́й, Го́споди.

Скры́ся заре́ю Божества́ чу́вственное со́лнце, я́ко на горѣ́ Ѳаво́рѣ ви́дѣвъ Тя́ преобразу́ющася, Іису́се мо́й: сла́ва си́лѣ Твое́й, Го́споди.

Огнь, не опаля́я ве́щи тѣле́сныя, ви́дѣнъ бы́сть невеще́ственъ, я́коже Моисе́ю и апо́столомъ яви́лся еси́, Иліи́ же, Влады́ко, еди́нъ отъ двою́, во дву́ соверше́нну естеству́.

Пѣ́снь 5.

Ирмо́съ: Отъ свѣ́та пресѣкíй перворо́дный свѣ́тъ, я́ко во свѣ́тѣ дѣла́ пою́тъ Тя́, Христе́, Содѣ́теля, во свѣ́тѣ Твое́мъ пути́ на́ша напра́ви.

Предъ лице́мъ Твои́мъ го́ры уклони́шася, свѣ́тъ бо и предъ нога́ми, неботе́чныя лучи, Христе́, со́лнца пріи́де, зра́къ зе́мленъ я́ко прія́ти благоволи́лъ еси́.

Се́ Спа́съ, — вопія́ху Моисе́й и Илія́, ученико́мъ на горѣ́ святѣ́й Ѳаво́рстѣй оглаша́емымъ, — Христо́съ, Его́же дре́вле провозвѣсти́хомъ Су́щаго Бо́га.

Неизмѣ́нное естество́, человѣ́ческому примѣ́шся, оби́льно невеще́ственнаго Божества́ свѣ́тъ изобнажи́въ апо́столомъ, неизрече́нно возсія́.

Тя́, присносу́щное сія́ніе, во Оте́честѣй сла́вѣ ученицы́ я́ко ви́дѣвше возсія́вша, Христе́, Тебѣ́ вопія́ху: во свѣ́тѣ Твое́мъ пути́ на́ша напра́ви.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Вѣтíйствующій язы́къ Твоего́ вели́чества не мо́жетъ вѣща́ти: я́ко бо, Держа́й живо́тъ и сме́ртію Влады́й, предста́вилъ еси́ на Ѳаво́рстѣй горѣ́ Моисе́я и Илію́, свидѣ́тельствующія Твое́ Божество́.

Иже рука́ми неви́димыми созда́въ по о́бразу Твоему́, Христе́, человѣ́ка, началообра́зную Твою́ въ созда́ніи добро́ту показа́лъ еси́, не я́ко во о́бразѣ, но я́ко Са́мъ Сы́й по существу́, Бо́гъ бы́лъ еси́ и Человѣ́къ.

Сраствори́вся неслія́нно, у́гль горя́щь показа́лъ еси́ на́мъ Божества́, попаля́ющь у́бо грѣхи́, ду́ши же просвѣща́ющь, на Ѳаво́рстѣй горѣ́, Моисе́я со Иліе́ю, ученико́въ же старѣ́йшія удиви́лъ еси́.

Пѣ́снь 6.

Ирмо́съ: Внегда́ скорбѣ́ти ми́, возопи́хъ ко Го́споду, и услы́ша мя́ Бо́гъ спасе́нія моего́.

Сія́нія па́че со́лнца Свѣ́тъ яснѣ́йшій, Спа́съ, просія́ на Ѳаво́рѣ, на́съ просвѣти́лъ е́сть.

Возше́дъ на го́ру Ѳаво́рскую, преобрази́лся еси́, Христе́, и ле́сть всю́ омрачи́въ, на́съ просвѣти́лъ еси́.

Тя́ Бо́га позна́вше сла́вніи апо́столи, на Ѳаво́рѣ же, Христе́, уди́вльшеся, колѣ́на преклони́ша.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Яко ве́ліе и стра́шное узрѣ́ся видѣ́ніе дне́сь: съ небесе́ у́бо чу́вственное, отъ земли́ же несравне́нное, облиста́ Со́лнце пра́вды мы́сленное на горѣ́ Ѳаво́рстѣй.

Пре́йде у́бо сѣ́нь зако́нная, изнемо́гшая, пріи́де же я́вѣ Христо́съ и́стина, — Моисе́й возопи́, на Ѳаво́рѣ ви́дѣвъ Твое́ Божество́.

Сто́лпъ о́гненный — Христа́ преобразу́ющася, о́блакъ же — я́вѣ благода́ть Ду́ха, осѣни́вшую на Ѳаво́рѣ, предсказа́ша явле́ннѣйше.

Конда́къ, гла́съ 7. Самогла́сенъ:

На горѣ́ преобрази́лся еси́, и я́коже вмѣща́ху ученицы́ Твои́, сла́ву Твою́, Христе́ Бо́же, ви́дѣша, да егда́ Тя́ у́зрятъ распина́ема, страда́ніе у́бо уразумѣ́ютъ во́льное, мíрови же проповѣ́дятъ, я́ко Ты́ еси́ вои́стинну Отчее сія́ніе.

Икосъ:

Воста́ните, лѣни́віи, и́же всегда́ ни́зу пони́кшіи въ зе́млю, души́ моея́ по́мыслы, возми́теся и возвы́ситеся на высоту́ Боже́ственнаго восхожде́нія. Притеце́мъ къ Петру́ и къ Зеведе́евымъ и вку́пѣ со о́нѣми Ѳаво́рскую го́ру дости́гнемъ, да ви́димъ съ ни́ми сла́ву Бо́га на́шего, гла́съ же услы́шимъ, его́же свы́ше слы́шаша и проповѣ́даша Отчее сія́ніе.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Облиста́вшеся свѣ́томъ непристу́пныя сла́вы, на Ѳаво́рстѣй горѣ́ апо́столи, Христу́ вопія́ху: оте́цъ на́шихъ Бо́же, благослове́нъ еси́.

Сія́ніемъ Боже́ственнаго шу́ма, и росода́тельнымъ о́блакомъ, Христе́, и заре́ю Твое́ю наслажда́еми, апо́столи поя́ху: оте́цъ на́шихъ Бо́же, благослове́нъ еси́.

Въ непристу́пномъ свѣ́тѣ, я́ко ви́дѣ Тя́ Пе́тръ, на Ѳаво́рстѣй горѣ́ облиста́вша, Христе́, возопи́: оте́цъ на́шихъ Бо́же, благослове́нъ еси́.

Съ нача́льникомъ жи́зни Христо́мъ су́ще, дѣ́ти Зеведе́евы, я́ко испусти́ зра́ка свѣ́тъ, возгремѣ́ша: оте́цъ на́шихъ Бо́же, благослове́нъ еси́.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Ны́нѣ ви́дѣна бы́ша апо́столомъ неви́димая Божества́ во пло́ти, на горѣ́ Ѳаво́рстѣй облиста́вша, вопію́щимъ: благослове́нъ еси́, Го́споди Бо́же, во вѣ́ки.

Ужасо́шася стра́хомъ, уди́вльшеся благолѣ́пію Боже́ственнаго Ца́рства, на горѣ́ Ѳаво́рстѣй апо́столи, вопію́ще: благослове́нъ еси́, Го́споди Бо́же, во вѣ́ки.

Ны́нѣ неуслы́шанная услы́шана бы́ша: безъ отца́ бо Сы́нъ отъ Дѣ́вы Оте́ческимъ гла́сомъ сла́вно свидѣ́тельствуется, я́ко Бо́гъ и Человѣ́къ, То́йже во вѣ́ки.

Положе́ніемъ не бы́лъ еси́ Вы́шняго, существо́мъ же Сы́нъ возлю́бленъ, пре́жде Сы́й, на́мъ прибли́жился еси́ непрело́жно: благослове́нъ еси́, Го́споди Бо́же, во вѣ́ки.

Пѣ́снь 8.

Ирмо́съ: Въ Вавило́нѣ о́троцы, боже́ственною распала́еми ре́вностію, мучи́теля и пла́мене преще́ніе му́жески попра́ша, и посредѣ́ огня́ вве́ржени, ороша́еми, поя́ху: благослови́те, вся́ дѣла́ Госпо́дня, Го́спода.

Манове́ніемъ вся́ нося́й, нога́ми пречи́стыми на го́ру взы́де Ѳаво́рскую Христо́съ, на не́йже па́че со́лнечныя лучи́ облиста́ лице́мъ, и́же зако́ну старѣ́йшія и благода́ти, показа́ пою́щія: благослови́те, вся́ дѣла́ Госпо́дня, Го́спода.

Непристу́пною сла́вою на горѣ́ я́влься неизрече́нно Ѳаво́рстѣй, неодержи́мый и незаходи́мый Свѣ́тъ, Отчее сія́ніе, тва́рь уясни́въ, человѣ́ки обожи́, пою́щія: благослови́те, вся́ дѣла́ Госпо́дня, Го́спода.

Священнолѣ́пно стоя́ще Моисе́й же и Илія́ на горѣ́ Ѳаво́рѣ, Боже́ственныя начерта́ніе я́сно ѵпоста́си ви́дѣвше, Христа́ во Оте́честѣй облиста́вша сла́вѣ, воспѣва́ху: благослови́те, вся́ дѣла́ Госпо́дня, Го́спода.

Иже во зра́цѣ Боже́ственнаго ра́ди явле́нія, лице́ просла́вися иногда́ Моисе́ово, Христо́съ же, я́ко ри́зою, свѣ́томъ и сла́вою одѣва́ется, свѣ́та бо самодѣ́теленъ Сы́й, озаря́етъ пою́щія: благослови́те, вся́ дѣла́ Госпо́дня, Го́спода.

Отъ свѣторо́дна о́блака, Христа́ ученицы́ объя́та зря́ще на Ѳаво́рѣ и ни́цы на зе́млю па́дше, у́мъ просвѣ́щше, со Отце́мъ Сего́ поя́ху и Ду́хомъ: благослови́те, вся́ дѣла́ Госпо́дня, Го́спода.

Инъ.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Услы́шавше, Влады́ко, отъ Отца́ свидѣ́тельствуема, и я́ко человѣ́ческа твердѣ́йша зра́ка зрѣ́ти лица́ Твоего́ блиста́нія не терпя́ще, Твои́ ученицы́ на зе́млю ни́цъ па́даху, со стра́хомъ пою́ще: свяще́нницы, благослови́те, лю́діе, превозноси́те во вся́ вѣ́ки.

Ца́рствующимъ еси́ Ца́рь прекра́сенъ и и́же всю́ду владя́щимъ Госпо́дь си́ленъ, Блаже́нъ и во свѣ́тѣ живы́й непристу́пнѣмъ, Ему́же ученицы́ уди́вльшеся, Моисе́й же и Илія́ вопія́ху: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Яко не́бомъ владу́щему, и земле́ю госпо́дствующему, и надъ преиспо́дними о́бласть иму́щему, Христе́, предста́ша Ти́: отъ земли́ у́бо — апо́столи, я́ко съ небесе́ же — Ѳесви́тянинъ Илія́, Моисе́й же — отъ ме́ртвыхъ, пою́ще согла́сно: лю́діе, превозноси́те во вся́ вѣ́ки.

Уны́нія ражда́ющія печа́ли на земли́ оста́виша, апо́столовъ избра́нніи, Человѣколю́бче, я́ко Тебѣ́ послѣ́доваша, ко и́же отъ земли́ преложе́нію боже́ственнаго житія́. Тѣ́мже, и по достоя́нію Твоего́ Богоявле́нія улучи́вше, поя́ху: лю́діе, превозноси́те Его́ во вѣ́ки.

На 9-й пѣ́сни Честнѣ́йшую, не пое́мъ, а́ще и въ недѣ́лю, но пое́мъ припѣ́въ пра́здника: Велича́й, душе́ моя́, на Ѳаво́рѣ преобрази́вшегося Го́спода. Та́же ирмо́съ: Рождество́ Твое́...

Посе́мъ вторы́й ли́къ пое́тъ то́йже припѣ́въ и ирмо́съ. И ко второ́му кано́ну припѣва́ютъ то́йже припѣ́въ.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Ужа́сни но́вымъ свѣтоли́тіемъ внеза́пу ученицы́ освѣ́щшеся, дру́гъ дру́га зря́ху, уди́вльшеся же и къ земли́ прекло́ншеся, Тебѣ́, Влады́цѣ всѣ́хъ, поклони́шася.

Шу́мъ изъ о́блака посыла́шеся богогла́сенъ, извѣству́я чу́до: Оте́цъ бо свѣ́товъ, — Се́й е́сть Сы́нъ Мо́й возлю́бленный, — апо́столомъ вопія́ше: Того́ послу́шайте.

Но́вая ви́дѣвше и пресла́вная, гла́съ Оте́ческій внуши́вше, на Ѳаво́рѣ Словесе́ слуги́, изображе́ніе Первообра́знаго, Се́й е́сть, — вопія́ху, — Спа́съ на́шъ.

Образе непремѣ́нный Су́щаго, недви́жиме, печа́ть неизмѣ́нна, Сы́не, Сло́ве, му́дросте и мы́шце, десни́це Вы́шняго, Си́ло, Тя́ воспѣва́емъ со Отце́мъ же и Ду́хомъ.

Инъ.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческого чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Да Твое́ пока́жеши я́вѣ неизрече́нное второ́е сни́тіе, я́ко да вы́шній Бо́гъ яви́шися, стоя́ посредѣ́ бого́въ, апо́столъ на Ѳаво́рѣ, Моисе́я же и Илію́, неизрече́нно осія́лъ еси́. Тѣ́мже вси́ Тя́, Христе́, велича́емъ.

Пріиди́те, Мнѣ́ покори́теся, лю́діе, возше́дше на го́ру святу́ю пренебе́сную, невеще́ственно ста́немъ во гра́дѣ Жива́го Бо́га и у́зримъ мы́сленно Божество́ невеще́ственное, Отца́ и Ду́ха, въ Сы́нѣ Единоро́днѣмъ облиста́ющее.

Привле́клъ еси́ любо́вію мя́, Спа́се, и премѣни́лъ еси́ Боже́ственнымъ Твои́мъ жела́ніемъ, но попали́ огне́мъ невеще́ственнымъ грѣхи́ моя́ и насы́титися Твоея́ пи́щи сподо́би, да, обое́ игра́я, велича́ю, Бла́же, вели́чія Твоя́.

Свѣти́ленъ:

Свѣ́те неизмѣ́нный Сло́ве, Свѣ́та Отца́ нерожде́нна, въ явле́ннѣмъ свѣ́тѣ Твое́мъ, дне́сь на Ѳаво́рѣ свѣ́тъ ви́дѣхомъ Отца́, свѣ́тъ и Ду́ха, свѣ́томъ наставля́ющаго всю́ тва́рь. [Три́жды.]

На хвали́техъ, Вся́кое дыха́ніе: поста́вимъ стихи́ 4, гла́съ 4. Подо́бенъ: Зва́нный свы́ше.

Пре́жде Честна́го Креста́ Твоего́* и страда́нія,* пои́мь, и́хже проразсуди́лъ еси́,* отъ свяще́нныхъ учени́къ,* на Ѳаво́рскую, Влады́ко, возше́лъ еси́ го́ру,* показа́ти восхотѣ́въ си́мъ сла́ву Твою́:* и́же и ви́дѣвше Тя́, преобрази́вшася,* и па́че со́лнца просія́вша,* ни́цы па́дше, си́лѣ Твое́й удиви́шася, взыва́юще:* Ты́ безлѣ́тенъ Свѣ́тъ еси́, Христе́, и сія́ніе Отчее,* а́ще и во́лею пло́ть яви́лся еси́, Неизмѣ́нне. [Два́жды.]

Иже пре́жде вѣ́къ* Сы́й Бо́гъ Сло́во,* Иже свѣ́томъ,* я́ко ри́зою, одѣва́яйся,* преобразу́ющійся предъ ученики́ Твои́ми,* па́че со́лнца, Сло́ве, просія́лъ еси́,* Моисе́й же и Илія́ Тебѣ́ предста́ша,* ме́ртвымъ и живы́мъ Тя́, Го́спода, повѣ́дающе* и Твое́ сла́вяще неизрече́нное смотре́ніе и ми́лость,* и мно́гое милосе́рдіе,* и́мже спа́слъ еси́ мíръ,* грѣхо́мъ погиба́ющій.

Отъ Дѣви́ческаго о́блака Тя́ рожде́нна,* и пло́ть бы́вша,* и на горѣ́ Ѳаво́рстѣй* преобразу́ющася, Го́споди,* и о́блакомъ свѣ́тлымъ Тя́ окружа́ема,* гла́съ Роди́телевъ возлю́бленнаго Тя́ Сы́на,* ученико́мъ предстоя́щимъ Тебѣ́, я́вѣ ска́зоваше,* я́ко Единосу́щна* и Единопресто́льна.* Тѣ́мже Пе́тръ удивля́яся,* — добро́ е́сть здѣ́ бы́ти, — глаго́лаше,* не вѣ́дый, е́же глаго́лаше,* Благодѣ́телю Многоми́лостиве.

Сла́ва, и ны́нѣ, гла́съ 8. Византíево:

Поя́тъ Христо́съ Петра́, Іа́кова и Іоа́нна, на го́ру высоку́ еди́ны, и преобрази́ся предъ ни́ми, и просвѣти́ся лице́ Его́, я́ко со́лнце, ри́зы же Его́ бы́ша бѣлы́, я́ко свѣ́тъ; и яви́шася Моисе́й и Илія́ съ Ни́мъ глаго́люще, и о́блакъ свѣ́телъ осѣни́ и́хъ. И се́ гла́съ изъ о́блака, глаго́лющь: Се́й е́сть Сы́нъ Мо́й возлю́бленный, о Не́мже благоволи́хъ, Того́ послу́шайте.

Славосло́віе вели́кое, и отпу́стъ.



НА ЛИТУРГІИ.

Антифо́нъ 1, гла́съ 2.

Сти́хъ 1. Псало́мъ 65: Воскли́кните Го́сподеви, вся́ земля́, по́йте же и́мени Его́, дади́те сла́ву хвалѣ́ Его́.

Моли́твами Богоро́дицы, Спа́се, спаси́ на́съ.

Па́ки другíй ли́къ то́йже сти́хъ: Воскли́кните Го́сподеви, вся́ земля́, [по́йте же и́мени Его́, дади́те сла́ву хвалѣ́ Его́.]

Моли́твами Богоро́дицы, Спа́се, спаси́ на́съ.

И па́ки 1-й ли́къ, сти́хъ 2-й. Псало́мъ 76: Гла́съ гро́ма Твоего́ въ колеси́, освѣти́ша мо́лнія Твоя́ вселе́нную, подви́жеся и тре́петна бы́сть земля́.

Моли́твами Богоро́дицы, Спа́се, спаси́ на́съ.

Та́же 2-й ли́къ, сти́хъ 3-й. Псало́мъ 103: Во исповѣ́даніе и въ велелѣ́поту обле́клся еси́, одѣя́йся свѣ́томъ, я́ко ри́зою.

Моли́твами Богоро́дицы, Спа́се, спаси́ на́съ.

Сла́ва, и ны́нѣ: Моли́твами Богоро́дицы, Спа́се, спаси́ на́съ.

Антифо́нъ 2.

Псало́мъ 47. Сти́хъ 1: Го́ры Сіо́нскія, ре́бра сѣ́верова, гра́дъ Царя́ Вели́каго.

Спаси́ ны, Сы́не Бо́жій, преобрази́выйся на горѣ́, пою́щія Ти́: Аллилу́ія.

Другíй ли́къ, то́йже: [Го́ры Сіо́нскія, ре́бра сѣ́верова, гра́дъ Царя́ Вели́каго.

Спаси́ ны, Сы́не Бо́жій, преобрази́выйся на горѣ́, пою́щія Ти́: Аллилу́ія.]

Псало́мъ 77, сти́хъ 2: И введе́ я́ въ го́ру святы́ни Своея́, го́ру сію́, ю́же стяжа́ десни́ца Его́.

Спаси́ ны, Сы́не Бо́жій, преобрази́выйся на горѣ́, [пою́щія Ти́: Аллилу́ія.]

Сти́хъ 3: Го́ру Сіо́ню, ю́же возлюби́, и созда́, я́ко единоро́га, святи́лище Свое́.

Спаси́ ны, Сы́не Бо́жій, преобрази́выйся на горѣ́, [пою́щія Ти́: Аллилу́ія.]

Сла́ва, и ны́нѣ: Единоро́дный Сы́не и Сло́ве Бо́жій, [Безсме́ртенъ Сы́й, и изво́ливый спасе́нія на́шего ра́ди воплоти́тися отъ Святы́я Богоро́дицы и Приснодѣ́вы Марíи, непрело́жно вочеловѣ́чивыйся, распны́йся же Христе́ Бо́же, сме́ртію сме́рть попра́вый, Еди́нъ Сы́й Святы́я Тро́ицы, спрославля́емый Отцу́ и Свято́му Ду́ху, спаси́ ны.]

Антифо́нъ 3.

Псало́мъ 124, гла́съ 7. Сти́хъ 1: Надѣ́ющіися на Го́спода, я́ко гора́ Сіо́нъ не подви́жится во вѣ́къ.

Тропа́рь, гла́съ 7: Преобрази́лся еси́ на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.

Сти́хъ 2: Го́ры о́крестъ Его́, и Госпо́дь о́крестъ люде́й Свои́хъ отъ ны́нѣ и до вѣ́ка.

Тропа́рь: Преобрази́лся еси́ [на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.]

Псало́мъ 14. Сти́хъ 3: Го́споди, кто́ обита́етъ въ жили́щи Твое́мъ, или́ кто́ всели́тся во святу́ю го́ру Твою́?

Тропа́рь: Преобрази́лся еси́ [на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.]

Псало́мъ 23. Сти́хъ 4: Кто́ взы́детъ на го́ру Госпо́дню, или́ кто́ ста́нетъ на мѣ́стѣ святѣ́мъ Его́?

Тропа́рь: Преобрази́лся еси́ [на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.]

Входно́е: Го́споди, посли́ свѣ́тъ Тво́й и и́стину Твою́, та́ мя наста́виста и введо́ста мя́ въ го́ру святу́ю Твою́.

Тропа́рь: Преобрази́лся еси́ [на горѣ́, Христе́ Бо́же, показа́вый ученико́мъ Твои́мъ сла́ву Твою́, я́коже можа́ху, да возсія́етъ и на́мъ, грѣ́шнымъ, свѣ́тъ Тво́й присносу́щный, моли́твами Богоро́дицы, Свѣтода́вче, сла́ва Тебѣ́.]

Сла́ва, и ны́нѣ, конда́къ, гла́съ то́йже: На горѣ́ преобрази́лся еси́, и я́коже вмѣща́ху ученицы́ Твои́, сла́ву Твою́, Христе́ Бо́же, ви́дѣша, да егда́ Тя́ у́зрятъ распина́ема, страда́ніе у́бо уразумѣ́ютъ во́льное, мíрови же проповѣ́дятъ, я́ко Ты́ еси́ вои́стинну Отчее сія́ніе.

Трисвято́е. Проки́менъ, гла́съ 4: Яко возвели́чишася дѣла́ Твоя́, Го́споди, вся́ прему́дростію сотвори́лъ еси́. Сти́хъ: Благослови́, душе́ моя́, Го́спода, Го́споди Бо́же мо́й, возвели́чился еси́ зѣло́. Апо́столъ, Петро́ва посла́нія, зача́ло 65, Аллилу́ія, гла́съ 8: Твоя́ су́ть небеса́, и Твоя́ е́сть земля́. Сти́хъ: Блаже́ни лю́діе, вѣ́дущіи воскликнове́ніе, [Го́споди, во свѣ́тѣ лица́ Твоего́ по́йдутъ]. Ева́нгеліе Матѳе́я, зача́ло 70. За Досто́йно, ирмо́съ: Рождество́ Твое́ нетлѣ́нно яви́ся, и до отда́нія. Прича́стенъ: Го́споди, во свѣ́тѣ Лица́ Твоего́ по́йдемъ и о и́мени Твое́мъ возра́дуемся во вѣ́ки.

На трапе́зѣ же разрѣша́емъ на ры́бу, и еле́й, и вино́, а́ще среда́ или́ пято́къ.



З р и́:   Подоба́етъ вѣ́дати: Яко преда́ніе и́мамы отъ святы́хъ оте́цъ, отъ спаси́тельного сего́ пра́здника Преображе́нія снѣда́ти гро́здіе, идѣ́же обрѣта́ется, благослове́ніе пріе́мше отъ іере́я, принесе́ну бы́вшу гро́здію въ це́рковь и по анафо́рѣ раздробле́ну. Глаго́лется же сія́ моли́тва на благослове́ніе гро́здія, отъ святи́теля или́ отъ іере́я: Бо́же, Спаси́телю на́шъ...

В н и м а́ й:   Яко а́ще кто́ отъ бра́тіи снѣ́сть гро́здіе пре́жде сицева́го пра́здника, то преслуша́нія запреще́ніе да пріи́метъ, и да не вку́ситъ гро́здіе чрезъ ве́сь Августъ мѣ́сяцъ, я́ко заповѣ́данный уста́въ презрѣ́въ; я́ко да отъ сего́ навы́кнутъ и про́чіи повинова́тися уста́ву святы́хъ оте́цъ. Сіе́ же запреще́ніе да быва́етъ и блюду́щимъ виногра́ды бра́тіи.

Гро́здію же на трапе́зѣ по пра́здницѣ се́мъ три́жды въ недѣ́лю подоба́етъ предлага́тися бра́тіи: си́рѣчь въ понедѣ́льникъ, въ сре́ду, въ пято́къ, да вкуша́ютъ бра́тія.

Се́й уста́въ быва́етъ и на смо́квахъ, и надъ про́чими овощьми́, я́вѣ, я́ко времена́ и́хъ, ко́е когда́ приспѣ́етъ.

Сія́ же глаго́лемъ, кромѣ́ приноси́мыхъ блюду́щимъ смо́кви и раздае́мымъ: снѣда́ютъ бо сія́.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 71 об. - 81 об.

/ Къ оглавленію раздѣла /


Наверхъ / Къ титульной страницѣ

0