Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 5-й де́нь.
Предпра́зднство Преображе́нія Го́спода на́шего Іису́са Христа́ и свята́го му́ченика Евсигнíя.

[ВЕЧЕРЪ,]
На Го́споди воззва́хъ: стихи́ры предпра́зднства, гла́съ 4. Подо́бенъ: Да́лъ еси́ зна́меніе.

Пріиди́те, предлику́емъ,* и себе́ очи́стимъ,* и вѣ́рно угото́вимъ къ Боже́ственному восхо́ду* превы́шняго Бо́жія жи́тельства,* я́ко да самови́дцы Того́ вели́чества яви́мся* и сла́ву получи́мъ,* ю́же ви́дѣти сподо́бишася апо́столовъ предызбра́нніи* та́йно на горѣ́ Ѳаво́рстѣй.

Пріиди́те ны́нѣ,* лу́чшимъ измѣ́ншеся измѣне́ніемъ,* себе́ нау́тріе до́брѣ угото́вимъ* на го́ру предвзы́ти Бо́жію святу́ю,* неизмѣ́нно Христо́ву сла́ву блиста́ющу узрѣ́вше* я́сно па́че со́лнца,* и, Тро́ичнымъ озаря́еми Свѣ́томъ,* о се́мъ просла́вимъ Того́ схожде́ніе.

Ины стихи́ры му́ченика, гла́съ то́йже. Подо́бенъ: Яко до́бля.

Обагри́вся кро́вію пло́ти твоея́,* одѣ́ялся еси́ въ порфи́ру, сла́вне,* Боже́ственныя благода́ти* и ве́рхъ тво́й вѣнце́мъ обложи́лъ еси́* нетлѣ́нія жи́зни.* Креста́ же побѣ́ду, му́чениче всему́дре,* десни́цею обнося́, я́коже ски́птро,* со Христо́мъ ца́рствуеши,* всегда́ веселя́ся.

Во́инъ непобѣди́мь* позна́нъ бы́лъ еси́, Евсигнíе:* кре́стнымъ бо ору́жіемъ огражда́емь,* къ боре́ніемъ изше́лъ еси́ врага́ борца́* и низложи́лъ еси́ того́,* воева́въ свѣ́тло* и вѣне́цъ пріе́мъ побѣ́ды* отъ еди́наго Подвигополо́жника и Влады́ки* и при́сно ца́рствующаго.

Честны́ми твои́ми страстьми́* стра́сть честну́ю, сла́вне,* страда́льче Евсигнíе, изобрази́лъ еси́* и, побѣдоно́сецъ бы́въ,* въ вы́шнѣй митропо́ліи* со всѣ́ми живе́ши страстоте́рпцы, ра́дуяся* и обожа́яся прича́стіемъ Боже́ственнымъ.* Сего́ ра́ди честно́е твое́* и свято́е соверша́емъ торжество́.

Сла́ва, и ны́нѣ, гла́съ 5:

Пріиди́те, взы́демъ на го́ру Госпо́дню и въ до́мъ Бо́га на́шего, и у́зримъ сла́ву преображе́нія Его́, сла́ву я́ко Единоро́днаго отъ Отца́, свѣ́томъ пріи́мемъ Свѣ́тъ и, возвы́шени бы́вше ду́хомъ, Тро́ицу Единосу́щную воспои́мъ во вѣ́ки.

Аще суббо́та: И ны́нѣ, догма́тикъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Сія́ніемъ добродѣ́телей* просвѣ́щшеся,* произы́демъ на го́ру святу́ю,* да у́зримъ боже́ственное* Госпо́дне преображе́ніе.

Сти́хъ: Ми́лость и и́стина срѣто́стѣся,* пра́вда и ми́ръ облобыза́стася.

Зна́меніе боголѣ́пно* Божества́ показу́етъ* пре́жде Креста́ таи́нникомъ,* я́ко со́лнце облиста́въ,* Христо́съ на горѣ́ дне́сь.

Сти́хъ: Блаже́ни лю́діе, вѣ́дущіи воскликнове́ніе,* [Го́споди, во свѣ́тѣ лица́ Твоего́ по́йдутъ].

Естество́, е́же во Ада́мѣ,* Христо́съ измѣни́ти хотя́й* на го́ру ны́нѣ* восхо́дитъ Ѳаво́рскую,* да обнажи́тъ таи́нникомъ Божество́.

Сла́ва, и ны́нѣ, гла́съ то́йже. Самогла́сенъ:

Иже на горѣ́ Ѳаво́рстѣй преобрази́выйся во сла́вѣ, Христе́ Бо́же, и показа́вый ученико́мъ Твои́мъ сла́ву Твоего́ Божества́, озари́ и на́съ свѣ́томъ Твоего́ позна́нія и наста́ви на стезю́ за́повѣдей Твои́хъ, я́ко еди́нъ Бла́гъ и Человѣколю́бецъ.

Тропа́рь, гла́съ 4:

Христо́во преображе́ніе предусря́щемъ, свѣ́тло торжеству́юще предпра́зднственная, вѣ́рніи, и возопіи́мъ: приспѣ́ де́нь боже́ственнаго весе́лія: восхо́дитъ на го́ру Ѳаво́рскую Влады́ка, Божества́ Своего́ облиста́ти красоту́. [Еди́ножды.]


НА УТРЕНИ,
На Бо́гъ Госпо́дь: тропа́рь предпра́зднства, три́жды.

По 1-й каѳи́смѣ сѣда́ленъ, гла́съ 4. Подо́бенъ: Яви́лся еси́.

Пра́здникъ пресвѣ́телъ Влады́чень пріи́де, пріиди́те вси́, на го́ру, у́мно предочи́стившеся, взы́демъ Ѳаво́рскую, Христа́ ви́дѣти.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ 4. Подо́бенъ: Удиви́ся Іо́сифъ.

Предпра́зднства де́нь, вѣ́рніи, дне́сь свѣ́тло сла́внаго и стра́шнаго преображе́нія Христо́ва соверша́юще, согла́сно возопіе́мъ: смѣше́ніе на́ше преобрази́, Спа́се, боже́ственною Твое́ю пло́тію сооблиста́въ тому́, и отда́ждь пе́рвѣйшее достоя́ніе нетлѣ́нія, я́ко Милосе́рдъ, да Тя́ вси́ славосло́вимъ, еди́наго Бо́га на́шего.

Сла́ва, и ны́нѣ, то́йже.

Кано́нъ предпра́зднства со ирмосо́мъ на 6, и трипѣ́снецъ на 4, и свята́го на 4. Подо́бнѣ пое́мъ 8-ю и 9-ю пѣ́сни; 3-ю же и про́чія пѣ́сни, да́же до осмы́я, предпра́зднства со ирмосо́мъ на 8 и свята́го на 4. [Аще случи́тся предпра́зднство въ недѣ́лю, трипѣ́снецъ выпѣва́емъ на повече́ріи].

Кано́нъ предпра́зднства, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Да облиста́етъ до́лѣ свѣ́тъ не́бо па́че со́лнца, и земля́ да слы́шитъ глаго́лы Жива́го Бо́га, сыновство́ преобразу́емаго: Оте́цъ бо свидѣ́тельствуетъ на горѣ́ Ѳаво́рстѣй.

Человѣ́къ зри́мый, но Бо́гъ кры́емый, на Ѳаво́ръ Христо́съ восхо́дитъ, Божества́ зарю́ обнажа́я, е́же па́че со́лнца, сла́вы свѣтлостьми́.

Разу́мно ны́нѣ предгряде́тъ яви́тися Моисе́ю Христо́съ, сла́вы видѣ́ніе показу́я на горѣ́ Ѳаво́рстѣй лице́мъ къ лицу́ нехода́тайственною бесѣ́дою, ра́дующеся, дне́сь предпра́зднуемъ.

Трипѣ́снецъ, гла́съ то́йже.
Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Се́й предпра́зднственный де́нь соверша́юще, вѣ́рніи, преображе́нія Христа́, Изба́вителя на́шего, воспле́щимъ пѣ́сньми.

Вхо́дъ пости́гши свята́го преображе́нія Христо́ва, и мы́ облиста́емся боже́ственными измѣне́ніи, сіе́ облобыза́юще.

По ны́нѣшнемъ Христо́съ дни́, пое́мь ученики́, на го́ру восхо́дитъ и, та́мо преобра́жся, облиста́етъ Божество́мъ.

Го́ру Ѳаво́рскую, пріиди́те вси́, дости́гше у́мно, Христа́ у́зримъ, предъ ученики́ Свои́ми стра́шно преобразу́ющася.

Яко Дави́дъ проро́къ, вопіе́мъ Ти́: Ѳаво́рская гора́ и Ермо́нъ о Твое́мъ и́мени, Христе́, возра́дуются, въ преображе́ніи Твое́мъ.

Го́ру превысо́кую — се́рдце, очище́но отъ страсте́й, иму́щіи, у́зримъ Христо́во преображе́ніе, просвѣща́ющее у́мъ на́шъ.

Тро́иченъ: Тро́ицу просла́вимъ правосла́вно, со Отце́мъ Сы́на и Ду́ха Свята́го, Еди́но Божество́, Еди́ницу Тріѵпоста́сную.

Богоро́диченъ: Ма́терь и Дѣ́ву Тя́ правосла́вно исповѣ́дуемъ, вѣ́рніи, неизрече́нно ро́ждшую Христа́ Бо́га на́шего, еди́наго Многоми́лостиваго.

Кано́нъ свята́го, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Съ пресла́вными чи́нми а́нгельскими, пресла́вне, сы́й, непреста́нно па́мять твою́ сла́вящія спаса́й.

Хра́мъ Утѣ́шителевъ освяще́нный тво́й у́мъ, страстоте́рпче, показа́ся, сего́ ра́ди тя́ вѣ́рою почита́емъ.

Умерщвле́ніе живоно́сно пло́тію Пострада́вшаго изобрази́лъ еси́ пло́тію твое́ю, преблаже́нне, и и́стиннѣй жи́зни сподо́бился еси́.

Держа́ву беззако́ннующихъ, укрѣ́плься Ду́хомъ, низложи́лъ еси́ и зако́ны Госпо́дни, пресла́вне му́чениче, удержа́лъ еси́.

Богоро́диченъ: Разрѣши́ся кля́тва, преста́ же печа́ль Рождество́мъ Твои́мъ, Всеблагослове́нная Отрокови́це, вѣ́рныхъ весе́ліе, Пренепоро́чная.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Влады́чествуяй тва́рію все́ю, ви́дѣнъ бы́сть, зра́къ раба́ пріе́мъ, и́мже Божества́ непристу́пное сія́ніе ученико́мъ показа́лъ е́сть, я́коже вмѣща́ху зрѣ́ти.

На го́ру и́детъ облиста́ти сла́вы Со́лнце, Христо́съ, и свы́ше сія́ющую денни́цу омрачи́ти свѣ́томъ, Его́же заря́ми сія́юще, предпра́зднуимъ дне́сь.

Живота́ вѣ́чнаго исполня́я глаго́лы, предста́ Христо́съ, показу́я ве́щи друго́мъ разумѣ́ти, въ Себѣ́ благоволи́, Оте́ческую сла́ву блиста́ющую.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Ста́лъ еси́ предъ суди́щемъ, исповѣ́дуя Бо́га Царя́, му́чениче му́дре, пло́ть взе́мшаго, и человѣ́ки назда́вшаго.

Же́ртва непоро́чна, всесожже́на у́гльми му́ченическими, и́же отъ Дѣ́вы принесе́ся Углю.

Вода́ми духо́вными наводня́емь, сла́вне, му́тныя многобо́жія изсуши́лъ еси́ струи́.

Богоро́диченъ: Все́ мое́ жела́ніе къ Тебѣ́ дви́жу, Чи́стая Влады́чице, плотски́хъ похоте́й мя́ вско́рѣ премѣни́.

Сѣда́ленъ свята́го, гла́съ 4. Подо́бенъ: Ско́ро предвари́.

Му́ченика Евсигнíя похва́лимъ, я́ко всю́ упраздни́вшаго ле́сть си́лою Христо́вою и вѣ́ру уясни́вшаго: претерпѣ́ бо му́ки пои́стиннѣ, и обличи́ мучи́телей суровство́ все́, и вѣне́цъ побѣ́ды десни́цею Бо́жіею прія́тъ.

Сла́ва, и ны́нѣ, предпра́зднства, гла́съ то́йже. Подо́бенъ: Удиви́ся Іо́сифъ.

Гото́вися ны́нѣ, Ѳаво́ре, се́ бо гряде́тъ Христо́съ, Божества́ зарю́ па́че ума́ показа́ти на тебѣ́ сла́внымъ ученико́мъ, я́коже можа́ху. Илія́ и Моисе́й стра́хомъ предстоя́ста, о́блакъ же Свѣ́та осѣня́ше, и гла́съ слы́шашеся свы́ше отъ Отца́ Свѣ́товъ, глаго́лющь: Се́й е́сть Сы́нъ Мо́й возлю́бленный, Того́ послу́шайте.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Небе́сный ли́къ съ земны́ми ра́дуется и предпра́зднуетъ Свѣтода́вца сія́ніе, Иже несказа́нно облиста́етъ, измѣня́я человѣ́ческій зра́къ на Ѳаво́рѣ, я́коже благоволи́.

Богочеловѣ́чнымъ прише́ствіемъ человѣ́комъ прибли́жився, чуде́съ заре́ю мíръ та́йно просвѣти́лъ еси́, блиста́ющеюся же сла́вою Божества́ просія́лъ еси́ на Ѳаво́рѣ непристу́пнымъ Свѣ́томъ.

Іису́съ, Нави́нъ сы́нъ, пе́рвѣе со́лнце уста́ви, прообразу́я де́нь Боже́ственныя стра́сти, Са́мъ же, Спа́се, пре́жде Честна́го Креста́ Твоего́, сія́нія скры́лъ еси́ со́лнца заря́ми Боже́ственными лица́ Твоего́.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Дрема́ніе отри́нувъ уны́нія, му́чениче Евсигнíе, бо́дренно къ страда́нію несумнѣ́нною вѣ́рою дерзну́лъ еси́.

О Го́сподѣ Спа́сѣ твое́мъ, му́чениче, ра́дуяся, досточу́дне, му́ки тѣле́сныя, я́ко пи́щу сла́дку, ты́ вмѣни́лъ еси́.

Го́рдое шата́ніе за зло́бу попо́лзшагося, страстоте́рпче, низве́рглъ еси́, боже́ственными нра́вы смиря́яся.

Во́инъ непобѣди́мь яви́лся еси́, во бранѣ́хъ подвиза́яся, сконча́въ же муче́ніе, враги́ безпло́тныя потреби́лъ еси́.

Богоро́диченъ: Равноси́льна, сопресто́льна родила́ еси́ Сло́ва Отцу́ и Ду́ху, Его́же моли́ спасти́ мя, Пресвята́я Отрокови́це, Приснодѣ́во.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Христу́, ра́дующеся, вѣ́рно послѣ́дуемъ: се́ бо и́детъ къ горѣ́, ученики́ лу́чшія съ Собо́ю веды́й, предъ ни́миже непристу́пною добро́тою возсія́въ па́че со́лнца, показа́ сла́ву Свою́.

Да просвѣти́тся дне́сь не́бо свѣтлѣ́йше восхо́домъ, е́же къ горѣ́, отону́дуже облиста́етъ Христо́съ непристу́пнымъ Свѣ́томъ, со́лнечныя лучи́ сла́вою Божества́ омрача́я, я́ко свѣ́та Пода́тель.

Та́инство показа́ Христо́съ ученико́мъ на Ѳаво́рѣ, просія́въ па́че зари́ лице́мъ, оде́ждою же ри́зъ Свои́хъ убѣли́вся свѣ́тло, я́ко снѣ́гъ, одѣва́яйся, я́ко ри́зою, свѣ́томъ псало́мски.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Искренно прилѣпля́яся, прему́дре, Влады́цѣ, себе́ удали́лъ еси́ отъ лука́вствія, Евсигнíе.

Ме́ртвымъ ка́пищемъ че́сти не прине́слъ еси́, богоно́се, Бо́га жи́ва, Го́спода на небесѣ́хъ вѣ́дый.

На дре́вѣ воздви́женъ, му́чениче доблему́дренне, стра́сть изобрази́лъ еси́ Безстра́стнаго вѣ́рою.

Богоро́диченъ: Сло́во во утро́бѣ Твое́й, Чи́стая, воплоща́ется, безслове́сныхъ плотски́хъ страсте́й мíръ избавля́я.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Черто́гъ сла́вы бу́дущія ра́дости друго́мъ гото́вя, восхо́дитъ на го́ру Христо́съ, къ житію́ небе́сному отъ жи́зни, до́лу влеку́щія, возводя́ и́хъ.

Удивля́я ра́зумъ Христо́съ ученико́въ, небе́сное на земли́ сія́ніе облиста́, зако́нъ и проро́ковъ раболѣ́пно представля́я нача́льники, и́миже ме́ртвымъ и живы́мъ свидѣ́тельствуется Бо́гъ.

Свѣти́льникъ яви́тися ны́нѣ гряде́тъ, Христо́съ, въ те́мнѣмъ мѣ́стѣ сія́ніемъ Боже́ственнаго блиста́нія, Его́же къ сія́нію и́демъ, пря́мо лицу́ Его́ ра́дующеся.

Инъ.

Ирмо́съ: Моли́тву пролію́ ко Го́споду, и Тому́ возвѣщу́ печа́ли моя́, я́ко золъ душа́ моя испо́лнися, и живо́тъ мой а́ду прибли́жися, и молю́ся, я́ко Іо́на: отъ тли, Бо́же, возведи́ мя.

Разумѣ́нія и́стинная въ се́рдцы благоро́дными поло́жъ о́бразы, не невѣ́дый разумѣ́нія, блаже́нне, вра́жія, на суди́ще поте́клъ еси́ и погуби́лъ еси́ кре́стнымъ всеору́жіемъ сего́ во́инство.

Де́моновъ служи́теліе, служи́теля тя́ Тро́ицѣ разумѣ́вше, му́камъ, и темни́цамъ, и непра́веднѣй сме́рти предаю́тъ, му́чениче Евсигнíе, но побѣжда́ются твои́мъ непобѣди́мымъ сопротивле́ніемъ, пребога́те.

Пото́цы крове́й твои́хъ, му́чениче, му́тныя беззако́нія пото́ки, и рѣ́ки безбо́жія ле́стныя, и лука́выя изсуши́ша струи́ исцѣле́ній же вѣ́рнымъ неизчерпа́емая пучи́на яви́шася.

Богоро́диченъ: Изсуши́вши сады́ зло́бы въ Тебѣ́ прозябе́ніемъ Сло́ва, Ма́ти Чи́стая, изъ ко́рене души́ моея́ лука́выя мы́сли отсѣцы́ и насади́ добродѣ́телей кра́сная, Дѣ́во, прозябе́нія.

Конда́къ, гла́съ 4. Подо́бенъ: Яви́лся еси́.

Боже́ственнымъ дне́сь преображе́ніемъ человѣ́ческое все́ естество́ просіява́етъ боже́ственно, въ весе́ліи зову́щее: преобразу́ется Христо́съ, спаса́яй вся́.

Икосъ:

Преображе́ніемъ Боже́ственнымъ зра́къ на́шъ, и́же дре́вле тлѣ́ніемъ растле́нный во а́довыхъ сокро́вищахъ пра́отца Ада́ма, дне́сь Зижди́тель изъ тли́ возведе́, обожа́етъ на́шъ ра́зумъ, пребыва́етъ же Бо́гъ вку́пѣ и Человѣ́къ, естества́ ка́яждо соедине́на нося́ непрело́жна же и нераздѣ́льна. Тѣ́мже ны́нѣ на Ѳаво́рѣ несказа́нно сія́етъ и изъ всея́ пло́ти дае́тъ лучи́ Божества́ Своего́, просвѣща́я вопію́щія: преобразу́ется Христо́съ, спаса́яй всѣ́хъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Къ преложе́нію отъ земли́, на высоту́ восходя́щему, учени́къ избра́нію послѣ́дуемъ, Христо́во смотря́юще стра́нное видѣ́ніе. Уди́вльшеся же съ ни́ми, возопіе́мъ: Бо́же, благослове́нъ еси́.

Оскве́рншееся очи́стилъ еси́ естество́ человѣ́ческое водо́ю же и огне́мъ, Твое́ю пло́тію сего́ свѣ́тлость показу́еши, Спа́се, лице́мъ Твои́мъ просія́въ па́че со́лнца во о́бразъ бу́дущія сла́вы.

Взы́демъ со Христо́мъ на го́ру святу́ю, возводя́щимъ Зеведе́евы сы́ны и Петра́ лу́чшаго, и́хже избра́ сла́вѣ Свое́й свидѣ́тели, зову́щія: Бо́же, благослове́нъ еси́.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Кровьми́, му́чениче, излія́нными любве́ ра́ди Христа́ вопло́щшагося, просвѣти́въ твою́ ду́шу, къ Сему́ преста́вился еси́, вопія́, ра́дуяся: Бо́же, благослове́нъ еси́.

Горя́ любо́вію Спа́са, избѣжа́лъ еси́ про́пасти нече́стія и зи́му лю́тыхъ претерпѣ́лъ еси́ му́къ, взыва́я, Евсигнíе: Бо́же, благослове́нъ еси́.

Еще́ теку́щимъ ка́плямъ, пресла́вне, боже́ственныхъ твои́хъ крове́й, Влады́цѣ Христу́ предста́лъ еси́, воспѣва́я: благослове́нъ еси́, Го́споди Бо́же, во вѣ́ки.

Да боже́ственнаго Ца́рствія вѣ́чную жи́знь наслѣ́диши, вре́меннаго живота́ сла́вы возгнуша́лся еси́, вопія́, Евсигнíе: Бо́же, благослове́нъ еси́.

Богоро́диченъ: Но́во родила́ еси́ Отроча́, Его́же роди́ Оте́цъ пре́жде вѣ́къ, Богоро́дице Чи́стая. Ему́же вси́ воспѣва́емъ: Бо́же, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Кто́ не удиви́тся, Всецарю́ сла́вы, великолѣ́пію сла́вы Твоея́, въ не́же преобра́жся, показа́лъ еси́ друго́мъ Твои́мъ, Боже́ственными свѣтлостьми́ облиста́въ и́хъ? Съ ни́миже предпра́зднующихъ вѣ́рою уясни́ свѣ́томъ Твои́мъ на́съ, Тя́ пою́щихъ.

Высоту́ небе́снаго житія́ и сла́вы присносу́щныя Боже́ственное сія́ніе да́руй рабо́мъ Твои́мъ, ны́нѣ предпра́зднующимъ Твоего́ преображе́нія свѣ́тлое торжество́, въ не́же Свѣ́тъ облиста́я, уясня́еши Тя́ воспѣва́ющія, Христе́ Свѣтода́вче.

Свѣ́та Пода́тель и Свѣ́тъ сы́й непристу́пенъ, Присносу́щне, Пребезнача́льне, одѣя́йся свѣ́томъ, я́коже ри́зою, свѣ́тъ въ мíрѣ просія́лъ еси́, съ пло́тію прише́дъ, и свѣ́тъ на горѣ́ облиста́еши, сла́вы Отчія показа́въ о́бразъ.

Инъ.

Ирмо́съ трипѣ́снца: Царя́ Христа́, Его́же исповѣ́даша плѣне́нніи о́троцы, въ пещи́ глаго́люще ве́ліимъ гла́сомъ: вся́ дѣла́, по́йте Го́спода.

Госпо́дня свѣ́тлаго преображе́нія настоя́щій де́нь облиста́въ, мíрови повелѣва́етъ вопи́ти: вся́ дѣла́, по́йте и превозноси́те Его́ во вѣ́ки.

Мы́слію, вѣ́рніи, пріиди́те, по́йдемъ къ горѣ́ святѣ́й ви́дѣти преображе́ніе Христо́во всесвѣ́тлое: вся́ бо просвѣща́етъ, славосло́вящія сіе́ во вѣ́ки.

Дне́сь Христо́ву преображе́нію чи́стымъ се́рдцемъ предусрѣ́теніе сотвори́мъ и возопіи́мъ свѣ́тло: вся́ дѣла́, Го́спода по́йте и превозноси́те Его́ во вѣ́ки.

Тро́иченъ: Въ Ли́цѣхъ Тре́хъ Еди́ное Божество́ богосло́вимъ, Отца́ и Сы́на и Ду́ха Пресвята́го, ку́пно, вся́ дѣла́, по́йте и превозноси́те Его́ во вѣ́ки.

Богоро́диченъ: Царя́ Христа́, Его́же на́мъ роди́ Дѣ́ва Марíя и по рождествѣ́ пребы́вши Дѣ́ва Чиста́, вся́ дѣла́, по́йте и превозноси́те Его́ во вѣ́ки.

Инъ.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Щито́мъ, всеблаже́нне, благоче́стія всю́ду огражда́емь, беззако́ннующія побѣди́лъ еси́ благода́тію, поя́ непреста́нно: благослови́те, вся́ дѣла́ Госпо́дня, Го́спода.

Внегда́ скорбѣ́ти тебѣ́, къ Бо́гу воззва́лъ еси́ Благодѣ́телю, и услы́ша тебе́, и отъ лю́тыхъ изба́ви тя́, вопію́ща: благослови́те, вся́ дѣла́ Госпо́дня, Го́спода.

Не бого́мъ безду́шнымъ че́сть безслове́снѣйшу, му́чениче, прине́съ, чиста́ же́ртва Бо́гу прине́слся еси́, поя́ непреста́нно: благослови́те, вся́ дѣла́ Госпо́дня, Го́спода.

Да бу́дущую получи́ши, прему́дре, жи́знь и сла́ву, умертви́лся еси́ мíрови и, вопія́, Евсигнíе, уморе́нъ бы́лъ еси́: благослови́те, вся́ дѣла́ Госпо́дня, Го́спода.

Богоро́диченъ: Ми́лостивая Дѣ́во, Бо́га Преми́лостиваго поро́ждшая, ми́лости Боже́ственныя вся́ сподо́би, пою́щія: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ра́дуйся, не́бо, отъ земли́ возсія́ющаго ны́нѣ провѣ́дый, Со́лнца Незаходи́маго, и сла́вою Боже́ственною покры́ти хотя́щаго со́лнечныя свѣ́тлости; земля́ же да лику́етъ свѣ́тло, небе́сною заре́ю и свѣ́тлостію сія́ющи и свѣ́тъ быва́ющи.

Поя́ Дави́дъ Твое́ преображе́ніе, предвозгласи́: кто́ уподо́бится Тебѣ́, Го́сподеви, глаго́ля, въ сынѣ́хъ Бо́жіихъ? Ты́ бо, прославля́яся въ совѣ́тѣхъ святы́хъ, вели́къ яви́лся еси́ су́щимъ о́крестъ Тебе́, стра́шенъ въ сла́вѣ Боже́ственнаго зра́ка.

О, Сло́во Бо́жіе, му́дрость, и си́ла, и о́бразъ Оте́чь! О, Бо́же, разумѣва́емый вѣ́рными, и Человѣ́че познава́емый! Твоего́ преображе́нія на́съ сподо́би, соверши́ти свѣ́тлое торжество́, во свѣ́тѣ до́брыхъ дѣ́лъ сія́ющихъ.

Инъ.

Ирмо́съ трипѣ́снца: Тя́, Неискусобра́чную Богоро́дицу, небе́сный черто́гъ, ро́ждшую Нача́льника спасе́нія на́шего, пѣ́сньми велича́емъ.

Се́й первовхо́дный де́нь Твоего́, Христе́, творя́ще пресла́внаго и всесвѣ́тлаго преображе́нія, пѣ́сньми Тя́ велича́емъ.

Усе́рдно, вѣ́дяще сла́вное преображе́ніе Госпо́дне, озари́мъ духо́вно помышле́нія на́ша, сіе́ велича́юще.

До́брымъ измѣне́ніемъ измѣ́ньшеся, Христо́вымъ преображе́ніемъ, обря́щемся свѣтоявле́нни добродѣя́ніи на́шими, сіе́ велича́юще.

Тро́иченъ: Тя́, Тріѵпоста́сную Тро́ицу и Нераздѣ́льное Существо́, Отца́ и Сы́на и Ду́ха Свята́го, пѣ́сньми велича́емъ.

Богоро́диченъ: Тя́, купину́, ю́же Моисе́й ви́дѣ горя́щую и неопаля́емую, о́гнь пріе́мшую Божества́, пѣ́сньми велича́емъ.

Инъ.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Крѣ́постію, му́чениче, Христо́вою некрѣ́пкаго врага́ умертви́лъ еси́, вознося́щагося и су́етно вои́стинну ны́нѣ шата́ющагося, и ме́чному усѣче́нію главу́ преклони́лъ еси́, и освяти́лъ еси́ кро́внымъ тече́ніемъ зе́млю всю́.

Яко украше́ніе всѣ́хъ страда́льцевъ, я́ко му́чениковъ красота́, Евсигнíе, я́ко сто́лпъ непоколеби́мь Це́ркве, я́ко огражде́ніе благочести́выхъ прея́вственно, я́ко боже́ственная лѣ́пота притека́ющихъ къ тебѣ́, я́ко всесвѣ́тлая звѣзда́, ублажи́лся еси́.

Иска́паютъ мѵ́ро па́ры по́товъ твои́хъ благово́нное, Евсигнíе, и сердца́ на́ша, тя́ чту́щихъ, благоуха́ютъ, и смра́дъ страсте́й, бѣ́дъ и скорбе́й отгоня́ютъ, страстоте́рпче Христо́въ до́блій.

Со́лнце сла́вы, Іису́се, уясни́вый па́мять дне́сь страда́льца Твоего́, того́ моли́твами просвѣти́, молю́ся, омрачи́вшуюся мою́ ду́шу пре́лестію зміи́ною, да сла́влю Тя́, я́ко Бо́га и́стинна и Человѣколю́бца.

Богоро́диченъ: Просвѣти́, две́ре Свѣ́та, се́рдца моего́ о́чи, молю́ся, тмо́ю грѣхо́вною ослѣ́пшія, и прія́тны Боже́ственнымъ покажи́ сія́ніемъ, да почита́ю Тя́, да боже́ственными гла́сы велича́ю Тя́.

Свѣти́ленъ предпра́зднства. Подо́бенъ: Не́бо звѣзда́ми.

Не́бо созда́вый и звѣзда́мъ свѣ́тъ вложи́вый, дне́сь на го́ру Ѳаво́рскую возше́дъ, освѣща́етъ ученики́ заре́ю Божества́ Своего́.

Сла́ва, и ны́нѣ, подо́бенъ:

Дне́сь на Ѳаво́рѣ Христо́съ Свѣ́тъ облиста́, дне́сь свы́ше шу́мъ, гла́съ Оте́чь, услы́шанъ бы́сть: Се́й е́сть, вопія́, Сы́нъ возлю́бленный Мо́й.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Пресвята́го сла́внаго преображе́нія* предсрѣ́теніе творя́ще въ настоя́щій де́нь,* Христа́ славосло́вимъ,* на́ше огне́мъ Божества́* преобрази́вша естество́* и я́коже пре́жде нетлѣ́ніемъ облиста́вша.

Сти́хъ: Ми́лость и и́стина срѣто́стеся,* пра́вда и ми́ръ облобыза́стася.

На святу́ю го́ру, пріиди́те, взы́демъ,* и всесвѣ́тлое преображе́ніе* вѣ́рою у́зримъ Госпо́дне,* Тому́ вѣ́рно покланя́ющеся, и глаго́лемъ:* Ты́ Бо́гъ еди́нъ еси́, вопло́щся* и обожи́въ человѣ́чество.

Сти́хъ: Го́споди, во свѣ́тѣ лица́ Твоего́ по́идемъ* и о и́мени Твое́мъ возра́дуемся во вѣ́ки.

Се́й е́сть де́нь предпра́зднственный,* въ о́ньже преобразу́ется Христо́съ,* су́щимъ съ Ни́мъ Моисе́ю и Иліи́* и Его́ ученико́мъ на горѣ́ Ѳаво́рстѣй,* гла́су такову́ глаго́лющу:* Се́й е́сть вои́стинну избра́нный Мо́й Сы́нъ.

Сла́ва, и ны́нѣ, гла́съ 5. Самогла́сенъ:

Зако́на и проро́ковъ Тя́, Христе́, Творца́ и Исполни́теля свидѣ́тельствоваша, зря́ще во о́блацѣ, Моисе́й богови́децъ и Илія́ огнеколесни́чникъ и неопа́льный небоше́ственникъ, въ преображе́ніи Твое́мъ. Съ ни́миже и на́съ просвѣще́нія Твоего́ сподо́би, Влады́ко, пѣ́ти Тя́ во вѣ́ки.


НА ЛИТУРГІИ,

Блаже́нна предпра́зднства, пѣ́снь 3-я и 6-я.


(Мрк.) Подоба́етъ вѣ́дати: а́ще случи́тся предпра́зднство Преображе́ння Христо́ва въ недѣ́лю:

Въ суббо́ту на ма́лѣй вече́рни, стихи́ры воскре́сны и Богоро́дицы, по обы́чаю.

На вели́цѣй вече́рни, по каѳи́смѣ, на Го́споди воззва́хъ: стихи́ры воскре́сны 3, и восто́ченъ [Анато́ліевъ] еди́нъ, и предпра́зднства 3, и му́ченика 3. Сла́ва, предпра́зднства. И ны́нѣ, богоро́диченъ 1-й настоя́щаго гла́са. На литíи стихи́ра хра́ма и предпра́зднства стихо́вны того́ дне́. Сла́ва, и ны́нѣ, предпра́зднства. На стихо́внѣ, стихи́ры воскре́сны, Сла́ва, и ны́нѣ, предпра́зднства. На благослове́ніи хлѣ́бовъ: тропа́рь Богоро́дице Дѣ́во, ра́дуйся.., три́жды. И чте́ніе въ посла́ніяхъ Апо́стольскихъ. (Зри.) А идѣ́же нѣ́сть бдѣ́нія: по Ны́нѣ отпуща́еши: Тропа́рь воскре́сенъ. Сла́ва, и ны́нѣ, предпра́зднства.

На повече́ріи пое́мъ трипѣ́снецъ и по Досто́йнѣ конда́къ предпра́зднства.

На у́трени тропа́рь воскре́сенъ, два́жды. Сла́ва, и ны́нѣ, предпра́зднства. И про́чее до кано́на воскре́сно. Кано́нъ воскре́сенъ со ирмосо́мъ на 4, и Богоро́дицы на 2, и предпра́зднства на 4, и свята́го на 4. Катава́сія: Кре́стъ начерта́въ... По 3-й пѣ́сни конда́къ и и́косъ предпра́зднства и сѣда́ленъ свята́го. Сла́ва, и ны́нѣ, предпра́зднства. По 6-й пѣ́сни конда́къ воскре́сенъ и и́косъ. На 9-й пѣ́сни пое́мъ Честнѣ́йшую... Свѣти́ленъ воскре́сенъ, два́жды. Сла́ва, и ны́нѣ, предпра́зднства. На хвали́техъ стихи́ры воскре́сны 4 и предпра́зднства стихи́ры, со сла́внымъ, 4. Сла́ва, стихи́ра ева́нгельская. И ны́нѣ: Преблагослове́нна еси́... Славосло́віе вели́кое. Тропа́рь воскре́сенъ, ектеніи́, и отпу́стъ, и оглаше́ніе Студи́тово, и обы́чное исхожде́ніе въ притво́ръ, и ча́съ 1-й.

На 1-мъ часѣ́ тропа́рь воскре́сенъ. Сла́ва, предпра́зднства. И ны́нѣ, богоро́диченъ часо́въ. По Отче на́шъ: конда́къ предпра́зднства. Та́кожде и на про́чихъ часѣ́хъ глаго́лемъ, премѣня́юще.

На литургíи: блаже́нна гла́са на 6 и предпра́зднства пѣ́снь 3-я. По вхо́дѣ тропа́рь воскре́сенъ, предпра́зднства, и хра́ма Богоро́дицы, а́ще е́сть, и хра́ма свята́го, или́ святы́я. Та́же конда́къ воскре́сенъ. Сла́ва, хра́ма свята́го, или́ святы́я. И ны́нѣ, предпра́зднства. Проки́менъ, Апо́столъ, аллилу́ія, Ева́нгеліе, и прича́стенъ дне́, и у́тренній Апо́столъ, и Ева́нгеліе ря́дъ подъ зача́ло.

(Зри́.) Вѣ́стно бу́ди: Яко а́ще случи́тся пра́здникъ Христо́ва Преображе́нія въ недѣ́лю, нкчто́же воскре́сно пое́тся, ниже́ Ева́нгеліе у́треннее чте́тся, но вся́ слу́жба пра́здника, ве́черъ, и у́тро, и на литургíи, неизмѣ́нно.

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 62 – 70.

/ Къ оглавленію раздѣла /


Наверхъ / Къ титульной страницѣ

0