Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 4-й де́нь.
Святы́хъ седми́ отроко́въ, и́же во Ефе́сѣ.

[ВЕЧЕРЪ,
На Го́споди воззва́хъ:] стихи́ры, гла́съ 1. Подо́бенъ: Небе́сныхъ чино́въ.

Иже по естеству́ уме́ршіи* па́че естества́ вои́стинну,* я́коже отъ сна́, а́біе воста́ша,* вку́пѣ се́дмь о́троцы Боже́ственніи.* Чу́до ужа́сное:* три́ста бо лѣ́тъ и се́дмьдесять и два́,* я́коже ме́ртвіи, въ пеще́рѣ спа́ша.

Со Іамвли́хомъ боже́ственнымъ и Максимиліа́номъ* Мартиніа́на и Іоа́нна,* Анто́нія же вку́пѣ съ Діони́сіемъ почти́мъ ны́нѣ,* я́ко моля́щіяся о на́съ,* восхваля́юще съ си́ми* и му́драго благоче́стно Ексакустодіа́на.

Ины стихи́ры Богоро́дицы, подо́бны:

Препросла́вленна еси́ въ ро́ды родо́въ,* Дѣ́во Ма́ти Отрокови́це, Богоро́дице Марíе,* мíра Предста́тельнице,* ро́ждшая пло́тію Сы́на Безнача́льнаго Отца́,* соприсносу́щна же Ду́ху вои́стинну,* Его́же моли́ спасти́ на́съ.

Одержи́ми прегрѣше́ньми ненаде́жными, Чи́стая,* Тя́ Предста́тельницу еди́ну иму́ще, Дѣ́во,* вопіе́мъ благода́рно:* очи́сти ны́, Пресвята́я Богоневѣ́сто,* Ты́ бо еси́ мíру прибѣ́жище* и заступле́ніе ро́ду на́шему.

Согрѣше́ній пучи́ною обурева́емь,* въ ти́хое приста́нище* чи́стыя моли́твы Твоея́, Богороди́тельнице, прибѣ́гъ,* взыва́ю Ти́: спаси́ мя,* держа́вную Твою́ просте́рши десни́цу,* рабу́ Твоему́, Пренепоро́чная.

Сла́ва, и ны́нѣ:

Жезло́мъ Твоея́ моли́твы,* Богороди́тельнице Чи́стая,* звѣри́ныя стра́сти* окая́нныя души́ моея́ отжени́ вско́рѣ,* ми́рно жи́знь мою́ управля́ющи,* и свято́му мя́ ста́ду избра́нныхъ Твои́хъ ове́цъ причти́.

Крестобогоро́диченъ:

У Креста́ предстоя́щи Сы́на и Бо́га Твоего́* и долготерпѣ́ніе Того́ смотря́ющи,* глаго́лаше, пла́чущи, Ма́ти Чи́стая:* увы́ Мнѣ́, Ча́до сладча́йшее,* что́ сія́ стра́ждеши непра́ведно, Сло́ве Бо́жій,* да спасе́ши человѣ́чество?

Тропа́рь, гла́съ 4:

Му́ченицы Твои́, Го́споди, [во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости; тѣ́хъ моли́твами спаси́ ду́ши на́ша].

Или́ се́й, гла́съ то́йже:

Ве́лія вѣ́ры чудесе́, въ пеще́рѣ, я́ко въ черто́зѣ ца́рскомъ, святíи се́дмь о́троцы пребы́ша, и умро́ша безъ тли́, и по мно́зѣхъ временѣ́хъ воста́ша, я́ко отъ сна́, во увѣре́ніе воскресе́нія всѣ́хъ человѣ́ковъ. Тѣ́хъ моли́твами, Христе́ Бо́же, поми́луй на́съ.


НА УТРЕНИ,
Оба кано́на окто́иха, и святы́хъ кано́нъ на 4, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Число́мъ сія́ющія честны́я дѣ́ти се́дмь, пріиди́те, вѣ́рно почти́мъ, я́ко просвѣща́ютъ Христо́ву Це́рковь, свѣти́льники седмосвѣ́тлыя, лу́чшія зако́нныхъ.

Иже въ плотско́е пе́рвѣе умерщвле́ніе, жи́ви су́ще, Христо́во о́троцы се́дмь одѣ́яшася, я́коже со́нъ, сме́рть пресла́вно пріе́мше, утвержда́юще уче́ніе воскресе́нія.

Іерихо́нъ паде́ся гла́сомъ тру́бъ седми́, пре́лести же возноше́ніе седмогла́сіемъ ны́нѣ вѣ́ры страда́лецъ сни́де до а́да и разори́ся.

Богоро́диченъ: Новолѣ́пно рождество́ обновля́еши, Безневѣ́стная, и́бо Отцу́ Собезнача́льное и Боже́ственному Ду́ху соприсносу́щное Сло́во изъ Тебе́ воплоти́ся, спряже́нія не оста́вль.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Звѣ́зды неукло́нны се́дмь, яви́стеся, вѣ́рою сія́юще, страстоте́рпцы, и и́же ле́сти, ныря́ющія глубино́ю, къ приста́нищу спаси́тельному упра́висте.

Предъ суди́щемъ тве́рдо ста́вше, святíи, мучи́телей, я́коже иногда́ Маккаве́и, во́инства измѣни́стеся тлѣ́нныя жи́зни, вво́инившеся Христу́.

Досто́йно Бо́гу прія́тна яви́стеся же́ртва моли́твы, святíи о́троцы, и воне́ю благоуха́нною смра́дъ обличи́вше пре́лести тве́рдо.

Богоро́диченъ: Купина́ въ Сина́и прообража́ше Твое́, Дѣ́во, пресла́вное рождество́: огне́мъ бо Божества́ не опали́лася еси́, въ ложесна́ пріе́мши вѣ́рно.

Сѣда́ленъ, гла́съ 4. Подо́бенъ: Ско́ро предвари́.

Яко столпи́ су́ще Це́ркве Христо́вы, стѣ́ны разверго́сте невѣ́рія тве́рдо, седмобра́тніи му́ченицы. Тѣ́мже пре́жде сме́рти е́ллинскій гнѣ́въ, и па́ки по сме́рти ерети́ческую бу́рю отгна́вше, и воскресе́нія вѣ́ру удержа́вше, моли́теся вѣ́рою утверди́тися на́мъ.

Сла́ва, и ны́нѣ, богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Крестобогоро́диченъ:

На Крестѣ́ Тя возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рти, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Свяще́нное совокупле́ніе и число́мъ я́вѣ почте́ное, седмери́цу честны́хъ отроко́въ воспое́мъ.

Умудре́на су́етіемъ нечести́ваго пре́лести царя́ Ефе́сстіи о́троцы показа́ша безу́мна.

Же́ртвы пренепоро́чныя я́ко вои́стинну и заколе́нія Госпо́дня вѣ́рою яви́стеся, о́троцы святíи.

Богоро́диченъ: Не пре́зри, моля́щи о на́съ, при́сно Благослове́нная, изба́витися вся́кія ско́рби, Чи́стая.

Пѣ́снь 5.

Ирмо́съ: Свѣ́та Пода́телю, и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Нечу́вственно пе́рвѣе, о́бщею уме́рше на земли́ сме́ртію, па́че естества́ воскресну́сте а́біе, увѣря́юще я́вѣ, Ефе́сстіи о́троцы, ме́ртвыхъ воскресе́ніе.

Освя́щшеся Бо́гови исповѣ́даніемъ и́стинныя вѣ́ры, я́ко страда́льцы зако́нніи Госпо́дни, изба́влени бы́сте, му́дріи, темни́цъ и ра́нъ и вѣнцы́ прія́сте.

Побѣди́вше тве́рдо и́дольскую ле́сть, сла́вніи му́ченицы, и отъ нечести́выхъ ересе́й уче́нія, сохраня́йте при́сно исповѣ́дающія ме́ртвыхъ воскресе́ніе.

Богоро́диченъ: Во дву́хъ естества́хъ и ѵпоста́си еди́нѣй бы́сть, соверше́нъ сы́й Человѣ́къ неслія́нно и соверше́нъ Бо́гъ, рожде́йся отъ Святы́я Ма́тере Пресу́щный.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Боже́ственныя прему́дрости равночи́сленніи столпи́, да восхва́лятся святíи о́троцы се́дмь, словесы́, я́ко ка́меніемъ, сокру́шше мучи́телей безбо́жное повелѣ́ніе.

Зако́номъ Боже́ственнаго промышле́нія соблюда́еми, гото́вое прія́сте погребе́ніе пеще́ру, въ не́йже ме́ртви и нетлѣ́нни, многолѣ́тни, святíи, яви́стеся.

Нетлѣ́нія воста́сте свидѣ́тели, вѣ́ру отгоня́юще тлетво́рную и ме́ртвую и Бо́гу моля́щеся о надѣ́ющихся воскресе́нія.

Богоро́диченъ: Ны́нѣ естество́ же́нское возра́довася, ны́нѣ печа́ль преста́, ра́дость же процвѣте́, я́ко Марíя роди́ ра́дость, Спа́са Христа́ Бо́га.

Конда́къ, гла́съ 4. Подо́бенъ: Вознесы́йся.

Мíра су́щая тлѣ́нная презрѣ́вше и нетлѣ́нныя да́ры пріе́мше, уме́рше, кромѣ́ тлѣ́нія пребы́ша. Тѣ́мже востаю́тъ по мно́гихъ лѣ́тѣхъ, все́ погре́бше лю́тыхъ невѣ́ріе, я́же во хвале́ніи дне́сь, вѣ́рніи, восхваля́юще, Христа́ воспои́мъ.

Пѣ́снь 7.

Ирмо́съ: Тѣ́лу злато́му прему́дрыя дѣ́ти не послужи́ша, и въ пла́мень са́ми поидо́ша, и бо́ги и́хъ обруга́ша, среди́ пла́мене возопи́ша и ороси́ я́ а́нгелъ: услы́шася уже́ у́стъ ва́шихъ моли́тва.

Прія́телища Бо́жія чи́ста и избра́нна о́троцы яви́шася: и́миже преда́нія ересе́й отъ Це́ркве отго́нятся и правосла́віе сія́етъ, я́ко е́сть воскресе́ніе вся́кой души́ же и пло́ти, я́коже роди́ся.

Яко су́ще тве́рди, пре́жде сме́рти вои́стинну во страда́ніи свое́мъ святíи о́троцы а́біе яви́шася и по уме́ртвіи жи́ви, сла́вою содержи́ми Боже́ственною, благоче́стно увѣ́ривше собо́ю и́стинное воскресе́ніе.

Душа́мъ вку́пѣ и тѣлесе́мъ чу́вственнымъ бу́детъ воскресе́ніе, я́коже бо не мо́щно безъ тѣ́ла души́ въ мíръ пріити́, си́це ни тѣлеси́ безъ души́, — прехва́льніи глаго́лаху, — или́ просла́вится душа́, или посрами́тся.

Богоро́диченъ: Ро́ждшая Бо́га Спа́са всѣ́хъ, Марíе, отча́янныхъ еси́ исправле́ніе, грѣ́шныхъ обновле́ніе, и ненаде́жныхъ наде́жда, и пою́щихъ по́мощь: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Въ пещи́ о́трочестѣй прообрази́лъ еси́ иногда́ Твою́ Ма́терь, Го́споди, о́бразъ же Сія́ изъ огня́ изыма́ше, неопа́льно входя́щія. Юже пое́мъ, я́вльшуюся Тобо́ю конце́мъ дне́сь, и превозно́симъ во вся́ вѣ́ки.

Ко́рень го́рести нечести́выхъ, возра́стшій лю́тѣ, боже́ственніи о́троцы, посѣ́кше пре́лести е́реси, приноша́ютъ пло́дъ вѣ́ры, жи́вы, и погре́бшеся вѣ́рно, и воскре́сше.

Ефе́сскихъ нача́льниковъ, о́троцы святíи се́дмь и страстоте́рпцы, Христо́ве Це́ркви и ца́рству вѣ́рному, боже́ственное яви́стеся утвержде́ніе, Его́же превозно́симъ во вся́ вѣ́ки.

Тве́рди я́вльшеся на земли́ и равночи́сленніи показа́вшеся звѣзда́мъ, неле́стное ше́ствіе Боже́ственныя вѣ́ры о́троцы творя́ще, взыва́ху: Тя́ превозно́симъ, Христе́, во вѣ́ки.

Богоро́диченъ: Никто́же поги́бе, Чи́стая, вѣ́ры наде́жду имѣ́я на Тя́, правосла́вно, Ма́ти Бо́жія, то́кмо за́вистію отмета́ющіися Твоего́ не покланя́тися зра́ка воображе́нію.

Пѣ́снь 9.

Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Бога́тство чуде́съ и Боже́ственныхъ та́инъ открове́ніе святы́хъ яви́ся ны́нѣ воскресе́ніе: и́же бо иногда́ есте́ственною пло́тію уме́рше сме́ртію, нетлѣ́нно ны́нѣ воскресо́ша, одѣ́яни, я́коже не уме́рше.

Зна́нія сокро́вище и вѣ́ры тве́рдое огражде́ніе святы́хъ дѣте́й яви́ся пеще́ра, провозвѣща́я бу́дущее всѣ́хъ воскресе́ніе: не четверодне́внаго Ла́заря, но вѣ́чныя воскреси́ мертвецы́.

Вѣнце́мъ муче́нія, пострада́вше, зако́нно одѣ́ястеся, о́троцы се́дмь, и столпы́ прему́дрости Бо́жія, и уче́ніемъ правосла́вія воста́ніе яви́сте, я́ко Це́ркви побо́рницы и моли́твенницы воспѣва́ющихъ ва́съ.

Богоро́диченъ: Тѣ́ло и ду́шу Твою́ нескве́рно Бо́гу соблю́дши, Чи́стая, Ца́рь же возжела́ Твоея́ добро́ты, Христо́съ, и Ма́терь Своего́ воплоще́нія показа́, Марíе пресла́вная, спасе́ніе мнѣ́ при́сно подава́я.

Свѣти́ленъ. Подо́бенъ: Жены́, услы́шите.

Ору́жіемъ Честна́го Твоего́ Креста́ воору́жшеся, страстоте́рпцы Твои́, Сло́ве, сопроти́вныя си́лы тве́рдо побѣди́ша и съ Тобо́ю, Христе́ мо́й, всѣ́хъ Царю́, ца́рствуютъ вку́пѣ.

Богоро́диченъ: Вои́стинну Богоро́дицу, Тя́ исповѣ́дуемъ, Влады́чице, Тебе́ ра́ди спа́сшіися, и́бо Бо́га неизрече́нно родила́ еси́, разо́ршаго Кресто́мъ сме́рть, къ Себѣ́ же привле́кша собо́ры, съ ни́миже Тя́ восхваля́емъ, Дѣ́во.

На стихо́внѣ окто́иха. Сла́ва, и ны́нѣ, богоро́диченъ.

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 58 об. – 62.

/ Къ оглавленію раздѣла /


Наверхъ / Къ титульной страницѣ

0