Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

Проявленіе мощей, иже во святыхъ отца нашего Петра, митрополита Кіевскаго и всея Россіи чудотворца.

Свят. Петр, митр. Киевский и всея России, Московский чудотворецПраздникъ проявленія мощей св. митрополита Петра былъ установленъ по особому обстоятельству, отъ котораго и получилъ свое названіе «проявленіе». Въ Святцахъ, напечатанныхъ въ Москвѣ 1646 г., подъ 4-мъ числомъ августа, сказано: «Проявленіе мощей иже во святыхъ отца нашего, митрополита Московскаго» и при этомъ замѣчено слѣдующее: «Святитель Петръ, митрополитъ, явися благочестивой царицѣ Анастасіи (супругѣ Іоанна IV Грознаго), не повелѣвая никомуже гробъ свой раскрывати никогда, и повелѣ ей своею печатію раку свою запечатлѣти и того дне уставиша праздникъ сей праздновати». (Святцы съ краткимъ святыхъ житіемъ, изданіе Московское 1646, 1648 г. и Супрасльское 1774 г.).

До конца XVII в. день сей праздновался повсемѣстно, во время же книжной справы былъ низведенъ до уровня мѣстнаго московскаго празднества.

Служба свят. Петру полагается та же, что и на перенесеніе мощей 24 Августа. (Ср. Минея 1630 г., л. 108-124 об., и Минея 1893 г. 232 – 241 об.)

Служба святителю Петру, митр. Кіевскому, Московскому чудотворцу

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 4-й де́нь.
Проявле́ніе моще́й, и́же во святы́хъ отца́ на́шего Петра́, митрополи́та Кíевскаго и всея́ Россíи чудотво́рца.

ВЕЧЕРЪ,
Блаже́нъ му́жъ, 1-й антифо́нъ. На Го́споди воззва́хъ: стихи́ры, гла́съ 1. Подо́бенъ: О, ди́внаго чудесе́!

О, ди́внаго чудесе́! Иже иногда́ земле́ю покрове́ный, дне́сь пресла́вно, я́ко на херуви́мскомъ носи́лѣ, на плещу́ архіере́йску и Самоде́ржца но́сится, всенаро́дное же мно́жество, свяще́нники и лю́діе, че́стно послѣ́дствующе, ра́достная глаго́лютъ: архіере́ю Пе́тре, ра́дуйся и моли́ дарова́ти твои́мъ пренесе́ніемъ мíрови ве́лію ми́лость.

Твое́ пресла́вное пренесе́ніе сла́вятъ архіере́и, съ Правовѣ́рнымъ Импера́торомъ, ку́пно со свяще́нныхъ собо́ры и всенаро́днымъ мно́жествомъ, въ пресла́внѣмъ твое́мъ пренесе́ніи крася́щеся, пра́зднственная ликова́нія тебѣ́ воспѣва́юще, глаго́лютъ: пресла́вне Пе́тре, ра́дуйся и моли́ дарова́ти моли́твами твои́ми мíрови ве́лію ми́лость.

Ины стихи́ры, гла́съ 2. Подо́бенъ: Кíими похва́льными.

Кíими похва́льными пѣ́сньми ны́нѣ соста́вимъ ликова́ніе въ честнѣ́мъ пра́здницѣ твоего́ пренесе́нія, святи́телю? Духо́вно пра́зднующе, мо́лимся: моли́ Правовѣ́рному Импера́тору побѣди́тельная на враги́ дарова́ти, тебе́ бо те́пла моли́твенника ко Влады́цѣ стяжа́хомъ, подаю́щему мíрови ве́лію ми́лость.

Кíими похва́льными добро́тами воспое́мъ во архіере́ехъ сла́внаго, и въ вѣ́рѣ вели́каго, и въ повелѣ́ніихъ доброразсу́днаго, и во уче́ніи язы́ка сла́достнаго, уче́ніемъ Це́рковь обогаща́юща? Его́же вѣнцы́ вѣнча́етъ Христо́съ, Бо́гъ на́шъ, имѣ́яй ве́лію ми́лость.

Кíими духо́вными пѣ́сньми воспое́мъ святи́теля, уче́ніемъ къ богоразу́мію всѣ́хъ наста́вльшаго, исто́чника чуде́съ пречу́днаго, и пресвѣ́тлаго Це́ркви свѣти́льника, и учи́теля прему́дра, Россíйскія земли́ прекра́сное удобре́ніе? Его́же ра́ди Христо́съ враго́въ шата́ніе низложи́, имѣ́яй ве́лію ми́лость.

Сла́ва, гла́съ 6:

Архіере́овъ похвалу́, и свяще́нныхъ всѣ́хъ украше́ніе, и къ Бо́гу моли́твенника непрестае́ма, и исто́чника чуде́съ преизоби́льна, дне́сь, любо́вію соше́дшеся, святи́теля Петра́ восхва́лимъ, и честны́я его́ мо́щи обстоя́ще, благода́рная тому́ прино́симъ, глаго́люще: ра́дуйся, святи́телю Пе́тре, свѣти́льниче пресвѣ́тлый, озаря́я изря́дно твое́ достоя́ніе, Импера́тора же и лю́ди, о ни́хже непреста́нно Христу́ моли́ся, ми́рно житіе́ дарова́ти, да вси́ честно́е твое́ пренесе́ніе любо́вію ублажа́емъ и мо́лимся: моли́ спасти́ся душа́мъ на́шимъ.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. [И чте́нія три́.]

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе. [Глава́ 4-5.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

Прему́дрости Соломо́ни чте́ніе. [Глава́ 10.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

На литíи стихи́ры, гла́съ 2. Самогла́сны:

Христо́во ста́до слове́сныхъ ове́цъ на зла́цѣ благоче́стія до́брѣ упа́слъ еси́, святи́телю, тѣ́мже и по преставле́ніи церко́вная твоя́ ча́да не оста́ви, посѣща́я, и я́ко Тро́ицѣ со святи́тели предстоя́, моли́ся спасти́ всѣ́хъ, твое́ честно́е пренесе́ніе любо́вію почита́ющихъ, Пе́тре всехва́льне.

Тезоимени́таго ра́ди твоего́ житія́, и сла́дости язы́ка, и разсужде́нія доброразсу́днаго па́стыря тя́ лю́демъ Христо́съ вруча́етъ. Его́же моли́ спасти́ и уще́дрити всѣ́хъ, пресвѣ́тлую па́мять твою́ пра́зднующихъ и честно́е пренесе́ніе моще́й твои́хъ любо́вію почита́ющихъ, Пе́тре пресла́вне, моли́твенниче те́плый о душа́хъ на́шихъ.

Дне́сь пресла́вно, святи́телю, отъ твои́хъ и къ твои́мъ че́стно прехо́диши, да твои́мъ ше́ствіемъ всѣ́хъ освяти́ши и ра́дости напо́лниши па́мять твою́ любо́вію пра́зднующихъ, и честно́е прехожде́ніе твое́ вѣ́рно сла́вящихъ, и прилѣ́жно вопію́щихъ: моли́, мо́лимся, спасти́ся душа́мъ на́шимъ.

Сла́ва, гла́съ 8:

Гра́дъ освяти́ся, и наро́ди благослови́шася, и Це́рковь перворо́дныхъ ду́хомъ ликовству́етъ въ пренесе́ніи честны́хъ моще́й твои́хъ, святи́телю Пе́тре, съ людьми́ зову́щи: ты́ моя́ крѣ́пость и утвержде́ніе, ты́ моя́ добро́та, и тобо́ю хвалю́ся. Моли́ спасти́ся всѣ́мъ, любо́вію всемíрное твое́ пренесе́ніе при́сно сла́вящимъ.

И ны́нѣ, богоро́диченъ:

[Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Отъ Вы́шняго про́мысла* прему́дрости навы́къ,* лю́ди твоя́* твои́мъ уче́ніемъ просвѣти́лъ еси́,* о ни́хже не преста́й, святи́телю, моля́ся.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

До́мъ Ду́ха Пресвята́го* отъ ю́ности, святи́телю, бы́лъ еси́,* тѣ́мже и на́съ Тому́ жили́ще* моли́твами твои́ми покажи́,* да вси́ честно́е твое́ пренесе́ніе почита́емъ.

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

Всѣ́хъ архіере́овъ россíйскихъ* похвалу́ тя́ свѣ́мы, святи́телю,* и свяще́нниковъ благолѣ́піе;* спаса́й всѣ́хъ, честно́е твое́ пренесе́ніе* пѣ́сньми сла́вящихъ.

Сла́ва, гла́съ то́йже, самогла́сенъ:

Ви́дѣнъ бы́сть, такова́я могу́щимъ ви́дѣти, на угото́ваннѣмъ тебѣ́, о́тче, мѣ́стѣ пресла́вно го́лубь паря́щь: я́вѣ бо всѣ́мъ назна́менавъ показа́, я́ко и по честнѣ́мъ преставле́ніи твое́мъ Ду́хъ Пресвяты́й дѣ́йствуетъ всегда́ тобо́ю. Его́же моли́ спребыва́ти лю́бящимъ тя́, и честно́е твое́ пренесе́ніе духо́внѣ пра́зднующимъ, да вси́ тебе́ дерзнове́нно, я́ко чадолюби́ва отца́, пѣ́сньми почита́емъ.

И ны́нѣ, богоро́диченъ:

[О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]

Тропа́рь, гла́съ 4:

Наста́ дне́сь всечестны́й пра́здникъ пренесе́нія честны́хъ моще́й твои́хъ, святи́телю Пе́тре, веселя́ изря́дно твое́ ста́до, и вѣ́рнаго Импера́тора, и лю́ди, о ни́хже не оскудѣва́й, моля́ся Христу́ Бо́гу, е́же отъ Него́ дарова́ннѣй ти́ па́ствѣ сохрани́тися отъ вра́гъ ненавѣ́тованнѣй и спасти́ся душа́мъ на́шимъ.

Слава, и нынѣ, богородиченъ:

[Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА УТРЕНИ,
По 1-й стихоло́гіи сѣда́ленъ, гла́съ 3. Подо́бенъ: Боже́ственныя вѣ́ры.

Гра́дъ и лю́ди, честно́е твое́ пренесе́ніе со свяще́нными пра́зднующія, невече́рнимъ свѣ́томъ просвѣти́ и свы́ше тѣ́мъ Боже́ственную благода́ть низпосли́, да вси́ тебе́ ублажа́емъ при́сно и любо́вію вопіе́мъ: Пе́тре прехва́льне, моли́ Христа́ Бо́га спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Боже́ственная Ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая. Па́че всѣ́хъ мене́, пе́рсть бы́вша, оскверне́нна плотски́ми прегрѣше́нми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

По 2-й стихоло́гіи сѣда́ленъ, гла́съ 8. Подо́бенъ: Повелѣ́нное.

Возлюби́лъ еси́ о́ный вѣ́къ, при́сно пребыва́ющій, измѣни́въ тлѣ́нными вѣ́чнующая. Тѣ́мже къ го́рнимъ ше́ствіе невозбра́нно имѣ́лъ еси́, святи́телю Пе́тре прему́дре, Христа́ Бо́га моли́ спасти́ всѣ́хъ, честно́е твое́ пренесе́ніе пѣ́сньми сла́вящихъ. [Два́жды.]

Сла́ва, и ны́нѣ, богоро́диченъ:

Яже непремѣ́ннаго Бо́га поро́ждшая, премѣня́емое при́сно се́рдце мое́ грѣхо́мъ и лѣ́ностію, прило́гми льсти́ваго утверди́, Блага́я, моли́твами ма́терними Твои́ми, я́ко да и а́зъ благода́рно сла́влю Тя́, Богороди́тельнице Марíе; поми́луй ста́до Твое́, е́же стяжа́ла еси́, Всенепоро́чная.

По поліеле́и сѣда́ленъ, гла́съ 8. Подо́бенъ: Прему́дрости.

Украша́емь житія́ свѣ́тлостію, благи́ми нра́вы обогати́лся еси́, тѣ́мже и по преставле́ніи чудодѣ́йствуеши, святи́телю Пе́тре прехва́льне. Моли́ Христа́ Бо́га согрѣше́ній оставле́ніе дарова́ти любо́вію почита́ющимъ честно́е твои́хъ моще́й пренесе́ніе. [Два́жды.]

Сла́ва, и ны́нѣ, богоро́диченъ:

Яко Всенепоро́чная Невѣ́сто Творцу́, я́ко Неискусому́жная Ма́ти Изба́вителю, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище, и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити, и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и Вы́шняго прича́стія сподо́би, и Свѣ́та невече́рняго, моли́твами Твои́ми.

Та́же степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Вся́кое дыха́ніе... Ева́нгеліе Іоа́нна, зача́ло 35 отъ полу́.

По 50-мъ псалмѣ́ стихи́ра, гла́съ 6:

Егда́ пренесе́ніе честны́хъ твои́хъ моще́й, о́тче, бѣ́яше, тогда́ кня́зь вели́кій со кня́зи и со святи́тели, подъе́мше мо́щи, че́стно ноша́ху тебе́; наро́ди же, зря́ще тя́, свѣ́тло носи́ма, любо́вію одержи́ми бѣ́яху. Кня́зь же вели́кій Іоа́ннъ со слеза́ми вопія́ше ти́: О, влады́ко! Ко́е благохвале́ніе твоему́ пренесе́нію сотвори́мъ? Недоумѣ́ю и удивля́юся твоему́ милосе́рдію, е́же на на́съ показа́лъ еси́. Но у́бо, святи́телю Пе́тре, моли́ся прилѣ́жно Христу́ Бо́гу на́шему, сохрани́ти Импера́тора и гра́дъ тво́й, пренесе́ніе твое́ вѣ́рно сла́вящія.

Кано́на два́ пренесе́нія, и́маже краегране́сіе внима́й у червле́ныхъ слове́съ. Гла́съ 4.

Пѣ́снь 1.

Ирмо́съ: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Повелѣ́ніемъ Влады́ки твоего́, святи́телю, подо́бяся, кро́токъ и смире́нъ бы́лъ еси́ и отсю́ду ублажа́емыхъ чи́ну бы́ти сподо́бился еси́. Тѣ́мже дне́сь пресла́вное твое́ пренесе́ніе почита́емъ.

Благочести́ваго ко́рене пресвѣ́тлая о́трасль, пресла́вно прозя́блъ еси́, архіере́ю Пе́тре, и въ добродѣ́тели соверше́ннѣ пожи́въ, сосу́дъ чи́стъ Ду́ха Пресвята́го, о́тче, бы́лъ еси́.

Сопресто́льникъ и учи́тель всея́ земли́ Россíйскій, о́тче, бы́лъ еси́, тѣ́мъ ны́нѣ соше́дшеся въ пречестны́й хра́мъ на пренесе́ніе честны́хъ моще́й твои́хъ, святи́телю Пе́тре пречу́дне, про́симъ грѣхо́въ проще́нія.

Богоро́диченъ: Ты́ еди́на, Богоневѣ́сто, въ вы́шнихъ Сѣдя́щаго на руку́ пло́тію носи́ла еси́; Тебе́ избра́ отъ всѣ́хъ родо́въ прія́телище досто́йно Вседержи́тель.

Инъ кано́нъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Вели́каго кня́зя рука́ма че́стно, архіере́ю, ше́ствіе твори́ши, да вся́ твои́мъ прикоснове́ніемъ освяти́ши, пренесе́ніе твое́ сла́вящія.

Іоа́нна Ми́лостиваго нра́вомъ подо́бяся, и сего́ ра́ди ми́лостивъ къ тре́бующимъ, святи́телю, бы́лъ еси́, тѣ́мже дне́сь твое́ пренесе́ніе че́стно прославля́емъ.

Всея́ Россíи архіере́й, о́тче, бы́лъ еси́ и всѣ́хъ научи́лъ еси́ сла́вити въ Тро́ицѣ еди́но Божество́, при́сно пребыва́ющее. Тѣ́мже тя́ вси́ пѣ́сньми ублажа́емъ.

Богоро́диченъ: Засту́пнице скорбя́щихъ и спасе́ніе ненадѣ́ющихся, Богоро́дице Всепѣ́тая, моли́ прилѣ́жно изба́витися на́мъ отъ бѣ́дъ.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Благослове́ніемъ твои́мъ вся́ возмо́глъ еси́, о укрѣпля́ющемъ тя́ Христѣ́, и оляденѣ́вшія иногда́ лю́демъ бразды́ душе́вныя, прему́дрыми твои́ми уче́ньми, святи́телю, очи́стилъ еси́ и плодоно́сны сотвори́лъ еси́.

Фарисе́йское киче́ніе отъ ю́ности, о́тче, возненави́дѣвъ, и мытаре́ву смире́нію поревнова́въ, кро́токъ и смире́нъ ко всѣ́мъ бы́лъ еси́, сего́ ра́ди вси́ тя́, я́ко вину́ и о́бразъ благи́хъ, почита́емъ.

Испо́лни ра́дости и весе́лія, тебе́ при́сно, святи́телю Пе́тре, лю́бящія, и торже́ственная твоему́ честно́му пренесе́нію въ пѣ́снехъ всегда́ пою́щія.

Богоро́диченъ: Тя́, заступле́ніе небла́знено, Богома́ти, стяжа́вше и упова́ніе на Тя́ возлага́юще, спаса́емся, и къ Тебѣ́ прибѣга́юще, сохраня́емся.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Лице́мъ къ лицу́, зерца́ломъ разрѣ́шшимся, зри́ши Святу́ю Тро́ицу, Ейже со святи́тели о на́съ, Пе́тре, моли́ся, вѣ́рою твое́ пренесе́ніе сла́вящихъ.

Испо́лненъ ра́дости дне́сь де́нь пренесе́ніемъ тво́имъ, святи́телю, и всѣ́хъ къ торжеству́ воздвиза́еши, Христо́ви съ весе́ліемъ вопи́ти: нѣ́сть свя́та, па́че Тебе́, Человѣколю́бче.

Па́ки на́съ честны́мъ твои́мъ явле́ніемъ, святи́телю Пе́тре, весели́ши, па́ки твои́мъ прикоснове́ніемъ всѣ́хъ освяща́еши и учи́ши Христо́ви вопи́ти: нѣ́сть свя́та, па́че Тебе́, Го́споди.

Богоро́диченъ: Живота́ нетлѣ́ннаго Бо́жія Ски́нія была́ еси́, еди́на отъ вѣ́ка я́вльшися Дѣ́ва Ма́ти Чи́стая. Въ сѣ́ни мя́ су́ща сме́ртнѣй къ животу́ наста́ви моли́твами Твои́ми.

Сѣда́ленъ, гла́съ 4. Подо́бенъ: Вознесы́йся.

Моли́твамъ и ми́лостынямъ, святи́телю Пе́тре, при́сно прилѣжа́, ми́лостивъ къ тре́бующимъ, о́тче, незави́стно бы́лъ еси́, тѣ́мже тя́ почита́ющихъ отъ сопроти́вныхъ зо́лъ избавля́й, да вси́ твое́ пренесе́ніе любо́вію почита́емъ. [Два́жды.]

Сла́ва, и ны́нѣ, богоро́диченъ:

Свѣ́та ро́ждшая Пречи́стаго, отъ Отца́ возсія́вшаго пре́жде вѣ́къ, просвѣти́, Отрокови́це, ду́шу мою́ и у́мъ, дале́че отъ мене́ отгоня́щи тму́ страсте́й, да Тя́ ублажа́ю, Присноблаже́нную, вѣ́рнымъ упова́ніе.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Митрополи́та тя́ Россíйская страна́ пресла́вно, святи́телю Пе́тре, стяжа́вши, тобо́ю красу́ется, съ кня́зи и архіере́и, и со всенаро́днымъ мно́жествомъ, Христа́ воспѣва́ющими, си́мъ тебе́ при́сно дарова́вшаго.

Всея́ Россíи первопресто́льникъ и архіере́й, святи́телю Пе́тре, бы́лъ еси́ и всѣ́хъ твои́мъ уче́ніемъ просвѣти́лъ еси́. Тѣ́мже па́мять твою́ почита́емъ, и пренесе́ніе твое́ сла́вяще, вопіе́мъ: моли́ о всѣ́хъ, пою́щихъ тя́.

Богоро́диченъ: Крѣ́пкое Тя́ ору́жіе на враги́ предлага́емъ, и ско́рби вся́кія лю́тыхъ обстоя́ній отрѣва́емъ вре́дъ, и ерети́ческихъ возмуще́ній, Ма́ти Бо́жія, избѣга́емъ.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Благода́рное сіе́ пѣ́ніе принося́щихъ ти́ ча́дъ не пре́зри, святи́телю, но пріими́ сіе́ и доноша́й Творцу́ и Бо́гу, да вси́ честно́е твое́ пренесе́ніе любо́вію почита́емъ.

Принесе́ся да́ръ Бо́гу — тобо́ю мно́жество спаса́емыхъ, твоему́ уче́нію при́сно послѣ́дующихъ и Христа́ во хвале́ніи воспѣва́ющихъ, тебе́ си́мъ дарова́вшаго.

Ру́къ твои́хъ къ Бо́гу воздѣя́ніемъ, святи́телю, пресла́вная чудодѣ́йствуеши, вѣ́рою приходя́щимъ исцѣле́нія подая́, тѣ́мже вси́ твое́ пренесе́ніе че́стно почита́емъ.

Богоро́диченъ: Съ Бо́гомъ Тя́ Засту́пницу стяжа́хомъ: Ты́ бо Ма́ти Бо́жія была́ еси́ Творца́ и Содѣ́теля, на́ше воображе́ніе пріе́мша, Всенепоро́чная, всѣ́хъ отъ сме́рти и тли́ спа́сшаго.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Многогрѣ́шнаго, нерадѣ́ніемъ изжи́вша житіе́, не возгнуша́йся, святи́телю, но твои́ми моли́твами очи́сти, твое́ пренесе́ніе пѣ́сньми при́сно трудолю́бно сла́вящаго.

Пахо́мія а́нгельскому видѣ́нію сподо́бившася, сего́ пра́вилу навы́къ, мно́гажды безъ сна́ въ моли́твѣ всю́ но́щь, святи́телю, пребы́лъ еси́, отону́дуже сподо́бился еси́ го́рняго зва́нія.

Смире́нъ нра́въ и высоко́ е́же по Бо́зѣ житіе́ стяжа́лъ еси́, святи́телю. Тѣ́мже и Всеви́дящее Око, ви́дѣвъ до́брое твое́ произволе́ніе, сла́вна тя́ всѣ́мъ конце́мъ показа́, Христо́съ — Спа́съ ду́шъ на́шихъ.

Богоро́диченъ: Еди́ну Тебе́, Всенепоро́чная, отъ родо́въ избра́въ Пречи́стую, всели́ся въ Тя́ и человѣ́ки обожи́. Тѣ́мже, я́ко ма́терне дерзнове́ніе къ Нему́ стяжа́вши, моли́ о и́же Богоро́дицу Тя́ имену́ющихъ.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Рыда́ютъ попремно́гу го́рцѣ бѣ́сове, моли́твами твои́ми отъ человѣ́къ отгони́ми; изря́дная же ча́да твоя́, ны́нѣ тебе́ че́стно, святи́телю Пе́тре, преноси́ма ви́дяще, ра́дуемся.

Боже́ственную благода́ть въ честнѣ́мъ твое́мъ пренесе́ніи зря́ще, попремно́гу свяще́нная твоя́ ча́да ра́дуются: зра́комъ бо голуби́нымъ извѣща́етъ всѣ́мъ лю́бящимъ тя́ Ду́ха Свята́го спребыва́ніе.

Къ Бо́гу моли́твами твои́ми, о́тче, ми́рно житіе́ дарова́ти моли́ся и укрепи́ Импера́тора и все́ Правосла́віе; да тобо́ю отъ злы́хъ избавля́еми, почита́емъ честно́е твое́ пренесе́ніе, Пе́тре прехва́льне.

Богоро́диченъ: Наслажда́ющеся, Пречи́стая, Твои́хъ дарова́ній, благода́рственное воспѣва́емъ пѣ́ніе, вѣ́дуще Тя́ Богома́терь.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ.

На смире́ніе на́ше свы́ше ми́лостивно назира́й, вѣ́рно тебе́ при́сно сла́вящихъ, и моли́ся, вся́кія ско́рби изба́вити, тебе́ те́пла предста́теля къ Бо́гу, святи́телю, стяжа́вшія.

Селе́ніе яви́лся еси́ прекра́сно Ду́ха Свята́го, богодохнове́нными уче́ніи твои́ми оби́льно пита́я слове́сная твоя́ ча́да. Отню́дуже и по преставле́ніи спребыва́еши лю́бящимъ тя́, святи́телю.

Богоро́диченъ: Пое́мъ, Дѣ́во Богома́ти, па́че естества́ рождество́ Твое́ и Твою́ нетлѣ́нную чистоту́, и́бо изъ Тебе́ ди́вно сочта́ся дѣ́вство и рождество́ нетлѣ́нно, Богоневѣ́сто.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Аще и преста́вился еси́ отъ земны́хъ, святи́телю, но жи́въ въ вы́шнихъ со а́нгелы Бо́гу предстои́ши. Помина́й на́съ, честно́е твое́ пренесе́ніе при́сно сла́вящихъ.

Блаже́ни роди́теліе, и́же тебе́ роди́вшіи, блаже́нно же и мѣ́сто, е́же тебе́ воспита́вшее, блаже́нъ же и преблаже́нъ и гра́дъ, и́же тебе́ такова́ учи́теля стяжа́вый, Пе́тре пресла́вне.

Не терпи́ши, святи́телю, про́чее вре́мя подъ земле́ю сокрове́нъ бы́ти, тѣ́мже и всѣ́мъ себе́ явля́еши, я́ко да всѣ́хъ твои́мъ явле́ніемъ освяти́ши, блаже́нне.

Богоро́диченъ: Вседержи́тельною си́лою нося́й вся́ческая, не́мощною пло́тію изъ Тебе́ одѣ́яся, Дѣ́во Пренепоро́чная, на благодѣя́ніе человѣ́ковъ, Человѣколю́бецъ.

Конда́къ, гла́съ 8:

Яко врача́ преизря́дна, и исто́чника чудесе́мъ оби́льна, дне́сь соше́дшеся любо́вію, духо́вная твоя́ ча́да, въ пренесе́ніе честны́хъ моще́й твои́хъ, архіере́ю Пе́тре, мо́лимъ тя́: моли́ Христа́ Бо́га дарова́ти честны́мъ твои́мъ пренесе́ніемъ вѣ́рному Импера́тору на́шему на враги́ побѣди́тельная, да твои́ми къ Бо́гу моли́твами находя́щихъ зо́лъ изба́вльшеся, ра́достною душе́ю и весе́ліемъ се́рдца благода́рная ти́ воспое́мъ, глаго́люще: ра́дуйся, о́тче Пе́тре, архіере́евъ и всея́ Россíйскія земли́ удобре́ніе.

Икосъ:

Отъ ю́ности боже́ственное твое́ житіе́, святи́телю, до́брѣ испра́вль, внима́тельнымъ о́комъ всегда́ къ вы́шнимъ зря́, и та́мошнихъ непреста́нно жела́я, отню́дуже вели́кія ра́ди добродѣ́тели и прему́дрости язы́ка, архіере́йства са́номъ укра́шенъ бы́въ, Це́рковь и лю́ди твои́ми уче́ніи обогати́лъ еси́. Тѣ́мже и тече́ніе благоче́стно соверши́въ, къ Бо́гу пресла́вно ду́хомъ преше́лъ еси́, на́мъ честны́я мо́щи въ па́мять оста́вль, и́хже ны́нѣ честно́е и пресла́вное пренесе́ніе пра́зднующе, мо́лимся, побѣди́тельная на враги́ вѣ́рному Импера́тору дарова́ти, я́ко да въ тишинѣ́ богоуго́дно пожи́вше, тебѣ́ ра́достною душе́ю благода́рная воспое́мъ, глаго́люще: ра́дуйся, о́тче Пе́тре, архіере́евъ и всея́ Россíйскія земли́ удобре́ніе.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Свы́ше отъ Бо́га да́ръ тезоимени́тому гра́ду и все́й земли́ да́нъ бы́лъ еси́, святи́телю Пе́тре, удивля́я уче́ніемъ вся́, Христу́ вопію́щія: благослове́нъ Бо́гъ оте́цъ на́шихъ.

Архіере́овъ пресвѣ́тлая добро́та, о́тче Пе́тре, бы́лъ еси́ и Христо́вы Це́ркве сто́лпъ и утвержде́ніе. Тѣ́мже помина́й честно́е твое́ пренесе́ніе сла́вящія, пресла́вне.

Богоро́диченъ: Всѣ́мъ человѣ́комъ Хода́таица еди́на яви́ся Боже́ственнаго избавле́нія, Изба́вителя всѣ́хъ ро́ждши, Всенепоро́чная, Ему́же пое́мъ: препѣ́тый оте́цъ на́шихъ Бо́же, благослове́нъ еси́.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Твое́ пренесе́ніе чту́щихъ, святи́телю, архіере́я же, и лю́ди, и свяще́нныхъ собо́ры, моли́твами твои́ми о́гненнаго родства́ изба́ви, Христу́ вопію́щія: благослове́нъ Бо́гъ оте́цъ на́шихъ.

Всеви́дящее Око, прови́дѣвъ твоего́ ра́зума доброразсу́дное, па́стыря тя́ Свои́мъ лю́демъ поставля́етъ, да всѣ́хъ научи́ши Христу́ воспѣва́ти: благослове́нъ Бо́гъ оте́цъ на́шихъ.

Во все́мъ житіи́ твое́мъ, святи́телю, наказа́тель и учи́тель всѣ́мъ бы́лъ еси́ и свѣти́льникъ многосвѣ́тлый, просвѣща́я во мра́цѣ невѣ́денія лежа́щія, и Христу́ вопія́: благослове́нъ Бо́гъ оте́цъ на́шихъ.

Богоро́диченъ: Зачала́ еси́, Пречи́стая, надъ всѣ́ми Бо́га и Го́спода, благоволи́вшаго спасти́ человѣ́ческій ро́дъ отъ тлѣ́нія и сме́рти, Ему́же по достоя́нію пою́ще, зове́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

Боже́ственное пребыва́ніе Свята́го Ду́ха, о́тче, бы́лъ еси́, тѣ́мже и въ житіи́ се́мъ я́ко внѣ́ мíра бы́въ, къ та́мошнимъ всегда́ раче́ніе имы́й. Тѣ́мже и всѣ́хъ научи́лъ еси́ Христо́ви пѣ́ти: Го́спода воспѣва́йте, дѣла́, и превозноси́те Его́ во вѣ́ки.

По Бо́зѣ засту́пника тя́ превели́ка, святи́телю, духо́вная твоя́ ча́да стяжа́вше, вся́кія сопроти́вныя ве́щи тобо́ю да изба́вимся, и въ тишинѣ́ поживе́мъ, Христо́ви пою́ще: Го́спода воспѣва́йте, дѣла́, и превозноси́те Его́ во вѣ́ки.

Богоро́диченъ: Глаго́ломъ проро́ческимъ послѣ́дующе, Дѣ́во, Богоро́дицу Тя́ возвѣща́емъ: родила́ бо еси́ Отроча́, всѣ́хъ древнѣ́йшее, Емману́илъ нарица́емо. Ему́же ны́нѣ зове́мъ: Го́спода по́йте, дѣла́, и превозноси́те Его́ во вѣ́ки.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Влады́ку всѣ́хъ за ны́ моли́, святи́телю, пресвѣ́тлый хра́мъ тебѣ́ воздви́гшаго, вѣ́дяще, я́ко и́маши дерзнове́ніе; тебе́ бо ко Христу́ предлага́емъ хода́тая и неусы́пна моли́твенника, Пе́тре прехва́льне.

Пресла́внымъ твои́мъ явле́ніемъ, святи́телю, вся́ко сомнѣ́ніе тво́й хра́мъ зда́ти хотя́щимъ отго́ниши и на дѣ́ло возставля́еши, Творцу́ вопи́ти: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

По боже́ственнѣмъ твое́мъ преставле́ніи, святи́телю, ю́ношу, разсла́бленнѣ ру́цѣ иму́ща отъ рожде́нія, исцѣли́лъ еси́, и я́ко ничто́же зла́ пострада́вша сотвори́лъ еси́, Христо́ви вопію́ща: благослови́те, вся́ дѣла́, Го́спода, по́йте и превозноси́те Его́ во вѣ́ки.

Богоро́диченъ: Помышле́нія моя́, Чи́стая, окорми́ къ Твоему́ ти́хому приста́нищу, Твоего́ безстра́стія и чистоты́, да Твоему́ Сы́ну воспѣва́ю: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Свѣ́телъ честны́й пра́здникъ преставле́нія твоего́, архіере́ю Пе́тре, свѣтлѣ́йше же пренесе́ніе твое́, его́же вси́ сла́вяще, тебе́ велича́емъ.

Исто́чникъ благоче́стія яви́лся еси́, святи́телю, церко́вная твоя́ ча́да напоя́я; тѣ́мже, соше́дшеся, благоче́стно свяще́нное твое́ пренесе́ніе любо́вію почита́емъ.

Слове́съ твои́хъ, о́тче, сла́дкое вѣща́ніе, вѣ́рныхъ сердца́ къ любви́ Бо́жіи привлече́, чуде́съ же свѣ́тлостію вся́ человѣ́ки удиви́лъ еси́. Тѣ́мже тя́ вси́ благоче́стно велича́емъ.

Богоро́диченъ: Въ пло́ть изъ Тебе́, Всенепоро́чная, одѣ́явся, въ мíрѣ я́ко Человѣ́къ поживе́, и дре́вле всѣ́хъ му́чащаго Боже́ственною Свое́ю си́лою низложи́.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Прему́дрости сокро́вище бы́въ, святи́телю, сердца́ вѣ́рныхъ люде́й озаря́я уче́ніемъ твои́мъ. Тѣ́мже я́ко учи́теля тя́ прему́дра ублажа́емъ и свяще́нное твое́ пренесе́ніе почита́емъ.

Боже́ственнымъ уче́ніемъ твои́мъ, святи́телю, еретика́, чужда́я отъ Це́ркве уче́нія иму́ща, отрази́лъ еси́ и не хотя́ща повину́тися сего́ ана́ѳемѣ пре́далъ еси́.

Пѣвце́мъ тебѣ́, святи́телю Пе́тре, похва́льная пою́щимъ, свы́ше по́мощи низпосли́, да тебе́ всегда́ въ пѣ́снехъ велича́емъ.

Богоро́диченъ: Мѵ́ро та́йно имену́емъ Тя́, Пречи́стая, я́ко ро́ждши Бо́га пло́тію, благоуха́нія источа́юща дарова́ніе.

Свѣти́ленъ:

Архіере́ю Пе́тре, вои́стинну тезоимени́те верхо́вному, досто́йно зва́ніе отъ дѣ́лъ пріе́мъ, да́нный ти́ тала́нтъ до́брѣ умно́живъ, вну́трь черто́га бы́въ, идѣ́же со святы́ми живе́ши, помина́й твое́ пренесе́ніе сла́вящихъ. [Два́жды.]

[Сла́ва, и ны́нѣ,] богоро́диченъ:

Держа́внымъ Твои́мъ покро́вомъ отъ вра́гъ навѣ́та на́съ, Чи́стая, Твоя́ рабы́, сохрани́ вся́ невре́дны: Тя́ бо стяжа́хомъ еди́ну прибѣ́жище въ ско́рбехъ.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

Отче святи́телю Пе́тре,* всѣ́мъ благи́мъ о́бразъ дово́ленъ бы́лъ еси́,* къ го́рнему житію́ веду́щь,* смире́ніемъ и кро́тостію.* Тѣ́мже отсю́ду Христо́съ па́стыря тя́ лю́демъ Свои́мъ устроя́етъ,* Его́же моли́,* спасти́ и уще́дрити всѣ́хъ,* вѣ́рою и любо́вію* честно́е пренесе́ніе твое́ при́сно сла́вящихъ. [Два́жды.]

Отче святи́телю Пе́тре,* ты́, я́ко архіере́й свяще́нъ,* пресвѣ́тло вну́трь небе́снаго черто́га бы́въ,* сца́рствуеши всѣ́ми ца́рствующему Влады́цѣ Христу́,* Ему́же съ вы́шними ликостоя́ніи* пресла́вно предстои́ши.* Моли́ся спасти́ и уще́дрити вся́,* вѣ́рно боже́ственное твое́* и честно́е пренесе́ніе пѣ́сньми сла́вящія.

Отче богоно́се Пе́тре,* дне́сь пресла́вно въ це́ркви тѣле́снѣ,* свяще́нныхъ рука́ми свѣ́тло но́сишися,* и́же всегда́ ду́хомъ живы́й на небесѣ́хъ,* и со святы́ми водворя́яся,* не забу́ди, моля́ся,* спасти́ и уще́дрити вся́,* пресвѣ́тлое успе́ніе твое́* пѣ́сньми при́сно сла́вящія.

Сла́ва, гла́съ 6:

Еще́ отъ ю́наго во́зраста Бо́гу освяще́нъ бы́въ, святи́телю, и прему́дрости рачи́тель бы́лъ еси́, сего́ ра́ди и потща́лся еси́ тлѣ́нными вѣ́чнующая стяжа́ти, воздержа́нія брозда́ми себе́ обложи́въ, пло́ть ду́ху повину́лъ еси́. Тѣ́мже и по честнѣ́мъ твое́мъ преставле́ніи съ небе́сными совокупля́ешися ликостоя́ніи, и́хже и житію́ во пло́ти поревнова́лъ еси́. Христу́, Ему́же отъ ю́ности послужи́лъ еси́, моли́ся спасти́ся всѣ́мъ, честно́е пренесе́ніе твое́ пѣ́сньми при́сно сла́вящимъ.

И ны́нѣ, богоро́диченъ:

[Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

Славосло́віе вели́кое, [ектеніи́ и отпу́стъ.]



НА ЛИТУРГІИ,

Слу́жба святи́тельская: [Блаже́нна, отъ кано́на святи́теля пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Мѣ́сяцъ Августъ. — М.: Въ до́мѣ Патріа́ршемъ, 1630. — л. 108-124 об.

Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 232 – 241 об.

/ Къ оглавленію раздѣла /


Наверхъ / Къ титульной страницѣ

0