Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 3-й де́нь.
Преподо́бныхъ оте́цъ на́шихъ Исаа́кія, Далма́та и Фа́вста.

[ВЕЧЕРЪ,
На Го́споди воззва́хъ:] стихи́ры преподо́бныхъ, гла́съ 8. Подо́бенъ: Му́ченицы Твои́, Го́споди.

Далма́тъ и Исаа́кій, ре́вность добродѣ́тельную воспріе́мше, Аріеву е́ресь и Несто́ріеву разори́ша я́вѣ и, правосла́вныхъ побо́рницы бы́вше, сла́ву отъ всѣ́хъ прія́ша. Тѣ́хъ, Христе́, моли́твами да́руй лю́демъ Твои́мъ ве́лію ми́лость.

Звѣ́зды тве́рди воздержа́нія я́вльшеся, просвѣти́сте мона́шествующихъ, отцы́ преподо́бніи, ду́ши, тму́ де́монскую отгна́вше. Тѣ́мже по кончи́нѣ ублажа́етеся, моля́щеся спасти́ся всѣ́мъ, творя́щимъ боже́ственную па́мять ва́шу.

Стихи́ры Богоро́дицы, гла́съ и подо́бенъ то́йже:

Исхити́ мя, Влады́чице, изъ руки́ змíя человѣкоубíйцы, борю́щаго мя́ ле́стію пожре́ти до конца́. Сокруши́ че́люсти сего́, молю́ся, и кова́рствія разори́, я́ко да, изба́влься сего́ ногте́й, велича́ю си́лу Твою́.

Азъ е́смь дре́во непло́дное, Всенепоро́чная, неплодя́щее плода́ спасе́ннаго. Тѣ́мже и трепе́щу посѣче́нія, да не ка́ко вве́рженъ бу́ду во о́гнь негаси́мый, окая́нный. Тѣ́мже Ти́ припа́даю: сего́ изба́ви мя́ и плодоно́сна покажи́, Чи́стая, Сы́ну Твоему́ хода́тайствомъ Твои́мъ.

Помышле́нія скве́рна и устны́ льсти́вы, дѣла́ же моя́ су́ть вся́ нечи́ста, и что́ сотворю́? ка́ко усря́щу Судію́? Влады́чице Дѣ́во, моли́ Сы́на и Содѣ́теля Твоего́ и Го́спода, я́ко да въ покая́ніи пріи́метъ ду́хъ мо́й, я́ко Еди́нъ Благоутро́бенъ.

Сла́ва, и ны́нѣ, богоро́диченъ:

Го́ре прогнѣ́вавшему своего́ Бо́га, увы́ мнѣ́, въ невѣ́дѣніи и пребыва́ющу во уны́ніи и лѣ́ности, я́коже а́зъ. Влады́чице Дѣ́во! Ты́ помози́ ми́, омраче́нному, и моли́ся Твоему́ Сы́ну и Содѣ́телю да́ти ми́ согрѣше́ній проще́ніе.

Крестобогоро́диченъ:

Юница Нескве́рная Юнца́ ви́дящи на дре́вѣ, пригвожда́ема во́лею, рыда́ющи жа́лостнѣ, — увы́ Мнѣ́! — вопія́ше, — люби́мѣйшее Ча́до! что́ Ти со́нмъ воздаде́ безблагода́тный евре́йскій, хотя́ Мя обезча́дствовати отъ Тебе́, Вселюбе́зне?

Аще же суббо́та или́ недѣ́ля, пое́мъ стихи́ры святы́хъ и тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ мíрѣ упра́ви живо́тъ на́шъ.


НА УТРЕНИ,
Оба кано́на окто́иха и святы́хъ на 4, его́же краегране́сіе: Свѣ́тлыя воспою́ мона́ховъ звѣ́зды. Гла́съ 8.

Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль, пѣ́снь же воспѣва́шеся: Го́сподеви пои́мъ, сла́вно бо просла́вися.

Свѣ́ту Боже́ственному свѣ́тло предстоя́ще, и трисо́лнечныя зари́ всегда́ наполня́еми, и прича́стіемъ и́стиннымъ обожа́еми, блаже́нніи, вѣ́рою пра́зднующія ва́шу па́мять всесвяще́нную, Го́сподеви пою́щія, боже́ственно озари́те.

Смотря́юще на еди́на пребыва́ющая, теку́щихъ стремле́нія вся́ко отри́нусте и, всѣ́мъ умо́мъ Го́сподеви прилѣпля́ющеся, оста́вивше плотскíя сла́сти, отцы́ всечестнíи, тѣ́мже къ невече́рнѣй зари́ преста́вистеся.

Свяще́нными поуче́ніи окриля́емь, Далма́те, о́тче му́дре, и украша́емь боже́ственными уче́ніи боже́ственнаго Исаа́кія, я́вѣ восте́клъ еси́ къ высотѣ́ добродѣ́телей и сто́лпъ и утвержде́ніе мона́ховъ бы́лъ еси́, тѣ́мже тя́ ублажа́емъ.

Богоро́диченъ: Препросла́вленная, Бо́га ро́ждшая, безсла́вія мя́ страсте́й премѣни́, и да́ждь ми́ по́мыслъ, Дѣ́во, умиле́нія, и возсія́й покая́нія просвѣще́ніе, Чи́стая, въ мы́сли мое́й, я́ко да велича́ю Тя́, всѣ́хъ возвели́чившую.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Неле́стную тя́ звѣзду́ восто́ка, преподо́бне о́тче, устреми́вшася, Исаа́кіе, вси́ позна́хомъ, го́рькую ересе́й потребля́юща тму́ и вѣ́рныя словесы́ твои́ми просвѣща́юща.

Разу́мно возсія́въ чи́стыми сія́ньми, Фа́всте, по́двигъ твои́хъ, о́тче, свѣ́тъ бы́лъ еси́, просвѣща́я вся́, зря́щія тя́, блаже́нне, и вѣ́рно житію́ твоему́ послѣ́дующія.

Пѣ́сньми непреста́нными и моли́твами, преподо́бніи, стра́сти тѣле́сныя вся́ успи́вше, благода́ть неусы́пну и неотъе́млемо бога́тство отъ Бо́га прія́сте, преблаже́нніи.

До́лгимъ поще́ніемъ, я́ко Моисе́й, преподо́бне, твое́ терпѣ́ніе, Далма́те, всѣ́мъ показа́лъ еси́, украша́яся пресвѣ́тлыми твои́ми болѣ́зньми и удобря́яся житіе́мъ твои́мъ.

Богоро́диченъ: Умный Тя́ свѣ́щникъ и свѣтоза́ренъ позна́хомъ, вну́трь пріе́мшую, Дѣ́во, Огнь нетерпи́мый, Боже́ственную пала́ту и высо́кій престо́лъ, на не́мже почи́ Пресу́щественный.

Сѣда́ленъ, гла́съ 8. Подо́бенъ: Прему́дрости.

Свѣ́томъ Тро́ическимъ свѣ́тло осія́вшеся, отцы́, свѣтови́дно, тму́ оста́висте сласте́й глубо́кую и свѣти́льницы дѣ́лы боже́ственными, просвѣща́юще вѣ́рныхъ сердца́, блаже́нніи, яви́стеся. Тѣ́мже свѣтоно́сную и честну́ю ва́шу па́мять почита́емъ дне́сь и согла́сно взыва́емъ: богоно́сніи пребога́тіи, моли́те Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять ва́шу.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца и Па́стыря и Изба́вителя, Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Яко многопло́дны ло́зы и́стиннаго виногра́да бы́вше, вино́ источи́ша преподо́бніи чи́стое всѣ́мъ умиле́нія.

Собо́ру согла́сника, преподо́бне Далма́те, вси́ тя́ позна́хомъ, благочести́выя утвержда́юща и го́рдыя отрѣва́юща.

Яко па́че всѣ́хъ просія́вша, всѣ́хъ преимѣ́ти попече́ніе тя́, блаже́нне, боже́ственный собо́ръ предповелѣ́, добродѣ́тельми боже́ственными укра́шена.

Богоро́диченъ: Дрема́ніемъ лѣ́ности мя́ со́нъ грѣхо́вный, Чи́стая, пости́же, бдѣ́нною моли́твою Твое́ю къ покая́нію ны́нѣ воздви́гни.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Пресе́льникъ отъ восто́ка къ Ца́рскому гра́ду бы́лъ еси́ и боже́ственнымъ сѣ́менемъ жи́тницу сего́ умно́жилъ еси́, искорени́въ вся́къ лука́вый Аріевъ вре́дъ, свяще́нне о́тче Исаа́кіе.

Учени́къ Исаа́кію, я́коже Иліи́ Елиссе́й, бы́лъ еси́, свяще́нне Далма́те, ми́лотію дарова́ній Ду́ха раздѣля́я во́ду лука́ваго де́моновъ вре́да и вѣ́рнымъ управля́я пу́ть.

Зако́номъ Боже́ственнымъ повину́вся, зако́нъ грѣхо́вныхъ до конца́ уклони́вся, и яви́лся еси́ сто́лпъ предъиды́й боже́ственнаго собо́ра, богоно́се Фа́всте, и мона́ховъ пра́вило и о́бразъ, и вѣ́рныхъ непоколеби́мое утвержде́ніе.

Богоро́диченъ: Истинную Богоро́дицу Тя́ вси́ ро́дове родо́въ сла́вятъ, святѣ́йшу а́нгелъ я́вѣ бы́вшу, Пресвята́я Дѣ́во. Тѣ́мже вопію́: освяти́ мою́ ду́шу, оскверни́вшуюся страстьми́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Собесѣ́дникъ яви́лся еси́ а́нгеломъ, о́нѣхъ бо поревнова́лъ еси́ житію́ на земли́, пу́ть ше́ствуя, Далма́те, и воздержа́ніемъ истнѣва́я тѣ́ло твое́, наста́вниче мона́ховъ и пра́вило вои́стинну извѣ́стнѣйшее.

Ре́вностію Госпо́дни любве́, я́коже Илія́, распаля́емь, блаже́нне, я́ко Аха́ва, предста́теля тмы́ со дерзнове́ніемъ, Исаа́кіе, обличи́лъ еси́, неду́говавша лука́вою Арія безу́мнаго е́ресію.

Яви́стеся наста́вницы заблу́ждшимъ и приста́нища вѣ́рно спаса́емымъ, чудотво́рцы, богоно́сніи отцы́ Фа́всте, и Далма́те, и боже́ственный Исаа́кіе, служи́тели Іису́совы, мона́шествующихъ свѣти́льницы присносвѣ́тліи.

Богоро́диченъ: Неду́говавшую ду́шу мою́ грѣхми́ и вся́кими врага́ искуше́ньми, посѣще́ніемъ, Пресвята́я Дѣ́во, спаси́тельнымъ Твои́мъ поспѣше́ніемъ посѣти́ и исцѣли́, я́ко Блага́, Богоро́дице, упова́ніе мое́, Препѣ́тая.

Конда́къ, гла́съ 2. Подо́бенъ: Въ моли́твахъ.

Поще́ніемъ возсія́вшія, я́ко свѣти́ла, и е́реси разврати́вшія вѣ́рою, пѣ́сньми Исаа́кія восхва́лимъ и съ Далма́томъ Фа́вста, я́ко Христо́вы уго́дники, Того́ моля́щія о всѣ́хъ на́съ.

Икосъ:

Кто́ дово́ленъ отъ человѣ́къ изрещи́ преподо́бныхъ оте́цъ свѣ́тлыя добродѣ́тели, и по́двиги, и труды́, ре́вность боже́ственную, дерзнове́ніе чи́стое житія́, боже́ственная дѣя́нія, я́же на земли́ соверши́ша сíи, я́ко а́нгели? Но, оба́че сія́ чту́ще, Тро́ицу вѣ́рно воспое́мъ: тíи бо, То́й свѣ́тло со а́нгельскими ли́ки предстоя́ще, при́сно мо́лятъ о всѣ́хъ на́съ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Угліе яви́стеся, Боже́ственнымъ вжига́еми огне́мъ Утѣ́шителя, попаля́юще у́бо ве́щь зло́бную, вѣ́рныя же просвѣща́юще, богоно́сніи, во вѣ́ки.

Тѣ́ло умертви́въ поще́ніемъ, покори́лъ еси́ ду́ху, Далма́те, и зло́бу вра́жію потопи́лъ еси́ ту́чами душе́вныхъ сле́зъ твои́хъ, богоно́се, во вѣ́ки.

Кончи́ну блаже́нну обрѣ́тше, въ небе́снѣмъ живете́ Ца́рствіи и преподо́бнымъ лико́мъ совокупи́стеся, отцы́, съ ни́миже вопіе́те: Го́споди Бо́же, благослове́нъ еси́.

Богоро́диченъ: Уста́вила еси́ то́къ сме́ртный, Безсме́ртнаго Бо́га ро́ждши, еди́на Богоро́дице Чи́стая, Ему́же вѣ́рою пое́мъ: благослове́нъ еси́, Го́споди Бо́же, во вѣ́ки.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Жезло́мъ кре́стнымъ мо́ре страсте́й расто́ргше, всю́ фарао́на мы́сленнаго си́лу погуби́сте, преподо́бніи, и мона́ховъ мно́жество свяще́нное къ земли́ безстра́стія, пою́ще Сего́ непреста́нно, спасо́сте, отцы́: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Ерети́чествующихъ возвыше́ніе проявле́нно смири́лъ еси́, издале́ча прови́дѣвъ тѣ́хъ разруше́ніе, ни́щимъ помо́глъ еси́ и во́ждь бы́лъ еси́ слѣпы́хъ, ста́рости же́злъ и вдови́цъ утѣше́ніе, Далма́те, взыва́я: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Ты́ ко тре́мъ четы́редесяте днíй пости́лся еси́, а́біе толи́ки па́че естества́ усну́лъ еси́, бо́дренно имѣ́я твое́ серде́чное о́ко, му́дре, и Бо́жіею просвѣща́емь заре́ю. Къ Нему́же вопіе́ши, Далма́те: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Всели́выйся Госпо́дь въ нескве́рное чре́во Твое́ всю́ чи́сту и свѣтоза́рну Тя́ показа́. Тѣ́мже, оскверне́на мя́ го́рькими обы́чаи и вре́дными проти́вныхъ нахо́ды, очи́сти, Дѣ́во, и сподо́би пѣ́ти: лю́діе, превозноси́те Го́спода во вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Возмого́ша, си́лою Христо́вою укрѣпля́еми, немощно́е шата́ніе борца́ побѣди́ти, небому́дренніи, мона́ховъ нача́льницы, и, ны́нѣ крася́щеся, преидо́ша къ дворо́мъ мы́сленнымъ, ра́дующеся.

Яви́стеся трисвѣ́тлыя свѣщи́, невече́рнюю зарю́ испуща́юще, цвѣ́ти неувяда́еміи ра́йстіи, благоуха́юще мы́сли вѣ́рныхъ, отцы́ требога́тіи. Тѣ́мже па́мять ва́шу всепра́зднственную вѣ́рно пра́зднуемъ.

Якоже вѣнце́мъ благолѣ́пнымъ, обложе́ни, прему́дріи, безстра́стіемъ и одѣ́яни Боже́ственныя любве́ исправле́ньми, въ черто́гъ Христо́въ, ра́дующеся, внидо́сте, почива́юще и болѣ́зней воздая́нія пріе́млюще.

Облиста́ сія́ніемъ мы́сленнымъ, озаря́ющи вѣ́рныхъ соста́вы, боже́ственная па́мять ва́ша, блаже́нніи, Далма́те, Фа́всте и Исаа́кіе, мона́шествующихъ нача́льницы, свѣти́льницы всемíрніи. Тѣ́мже просвѣти́те и на́ша душе́вная чу́вствія.

Богоро́диченъ: Просвѣти́, Две́ре Свѣ́та, се́рдце мое́, зло́бою ослѣ́пшее, и да не въ сме́рть попу́стиши ны́нѣ усну́ти ми́, нечи́стыми по́мыслы при́сно помрача́емому, да сла́влю Тя́ благода́рно, Богоро́дице Всепѣ́тая.

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 45 об. – 49 об.

/ Къ оглавленію раздѣла /


Наверхъ / Къ титульной страницѣ

0