Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 3-й де́нь.
Слу́жба преподо́бнаго отца́ на́шего Анто́нія Ри́млянина, Новгоро́дскаго чудотво́рца.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 1. Подо́бенъ: Небе́сныхъ чино́въ.

Наста́вникъ мона́шествующихъ,* о́тче Анто́ніе, бы́лъ еси́,* себе́ пе́рвѣе безъ кро́ве Бо́гови же́ртву принося́,* воздержа́ніемъ, и любому́дріемъ,* и смире́нія высо́кими нра́вы,* и безмѣ́рнымъ поще́ніемъ врага́ посрами́лъ еси́, преподо́бне.* Моли́ спасти́ся душа́мъ на́шимъ.

Свѣтоно́сная твоя́ па́мять,* преподо́бне о́тче Анто́ніе,* испо́лнена ра́дости и весе́лія яви́ся,* отону́дуже свяще́нная ча́да твоя́, соше́дшеся,* па́мять твою́ духо́вно пра́зднующе,* прославля́емъ Го́спода,* тебе́ та́ко просла́вльшаго.

Сла́ва, гла́съ 6:

Дне́сь вели́кій Но́вградъ, я́ко но́ваго Авраа́ма, пресе́льника тя́ пресла́вно, о́тче, пріе́мъ, ра́дуется, блаже́нна же оби́тель, иму́щи мо́щи твоя́ въ себѣ́, зѣло́ весели́тся: отъ Ри́ма бо на ка́мени по вода́мъ прише́лъ еси́ въ вели́кій Но́вградъ. Тѣ́мже, па́мять твою́ торжеству́юще, воспѣва́ютъ Бо́га, тебе́ дарова́вшаго стѣ́ну си́мъ неразори́му. Мы́ же, ча́да твоя́, твои́мъ повелѣ́ніемъ наставля́еми, ны́нѣ пресла́вное твое́ успе́ніе пра́зднующе, мо́лимся спасти́ся душа́мъ на́шимъ.

И ны́нѣ, богоро́диченъ, [гла́съ то́йже:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Отъ земны́хъ къ небе́снымъ оби́телемъ* пресла́вно, о́тче, преше́лъ еси́* и та́мо пра́ведныхъ че́сти сподо́бился еси́,* съ ни́миже моли́ся* спасти́ся душа́мъ на́шимъ.

Сти́хъ: Честна́ предъ Го́сподемъ* сме́рть преподо́бныхъ Его́.

Тѣле́сная чу́вства воздержа́ніемъ,* о́тче, умертви́лъ еси́,* тѣ́мъ и на ка́мени по вода́мъ ше́ствіе творя́,* вели́кого Нова́града дости́глъ еси́,* и оби́тель въ не́мъ сотвори́лъ еси́,* и учени́къ мно́жества Христу́ приве́лъ еси́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ста́до твое́,* тебе́ почита́ющихъ, преподо́бне,* и твое́ успе́ніе пра́зднующихъ,* на боже́ственное тѣ́хъ возвыша́я раче́ніе,* въ боже́ственную жи́знь всели́.

Сла́ва, и ны́нѣ, гла́съ то́йже. Самогла́сенъ:

Хра́мъ прече́стенъ Бо́жій Ма́тери, я́коже Сама́ восхотѣ́, воздви́глъ еси́ и та́мо мно́жества учени́къ собра́лъ еси́, въ не́мъ воспѣва́ти Влады́чицу Богоро́дицу. Ейже моли́ся, мо́лимся, преподо́бне Анто́ніе, не оста́вити на́съ, си́рыхъ, я́коже обѣща́лся еси́, свяще́нное твое́ ста́до избавля́ти отъ сѣ́тей вра́жіихъ, да тебе́ вси́, я́ко чадолюби́ва отца́, пѣ́сньми непреста́нно почита́емъ, прося́ще отъ Христа́ Бо́га прія́ти тобо́ю ве́лію ми́лость.

Тропа́рь пи́санъ на вели́цѣй вече́рни.



НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ]. На Го́споди воззва́хъ: стихи́ры [на 8], гла́съ 6. Подо́бенъ: Все́ отло́жше.

Мірскíя молвы́, преподо́бне, возненави́дѣвъ,* Христа́ еди́наго возлюби́лъ еси́* и, Того́ Кре́стъ на ра́мо взе́мъ, поне́слъ еси́,* боже́ственно вооружи́вся,* змíя вселука́ваго сле́зными ту́чами потопи́лъ еси́.* Плотскíя стра́сти воздержа́ніемъ, му́дре, ми́мо те́клъ еси́,* терпѣ́ніемъ же, и посто́мъ, и ча́стыми моли́твами* пло́ть твою́ ду́ху покори́лъ еси́.* Безстра́стіемъ души́ и ума́ чистото́ю* по́двигъ трудо́въ твои́хъ отъ Него́ стяжа́лъ еси́.* Тѣ́мже, пра́зднующе па́мять твою́, мо́лимъ тя́:* моли́ся Го́сподеви* поми́ловатися душа́мъ на́шимъ. [Три́жды.]

Преподо́бне о́тче Анто́ніе,* любве́ ра́ди Христо́вы* вся́, я́же на земли́, оста́вилъ еси́.* По́стническими труды́ твое́ житіе́ уясни́лъ еси́.* Воздержа́ніемъ и слеза́ми душе́вное о́ко очи́стилъ еси́.* Умъ тво́й безстра́стіемъ просвѣти́лъ еси́* и Боже́ственнымъ смире́ніемъ украси́лъ еси́.* Собра́лъ еси́ мона́шествующихъ мно́жества* и уче́ніи твои́ми, я́ко нѣ́коею лѣ́ствицею восхо́дною на не́бо,* на высоту́ добродѣ́телей возве́лъ еси́.* Тѣ́мже ны́нѣ, ча́да твоя́,* о́крестъ ра́ки твоея́ предстоя́ще,* любе́зно вопіе́мъ ти́:* моли́ся Го́сподеви, преблаже́нне,* поми́ловатися душа́мъ на́шимъ. [Три́жды.]

Богому́дре о́тче Анто́ніе,* ди́вно отъ Ри́ма возсія́лъ еси́, я́ко со́лнце,* и Бо́жіимъ манове́ніемъ на ка́мени по вода́мъ, я́ко безпло́тенъ,* вели́каго Нова́града дости́глъ еси́,* хра́мъ прече́стенъ Бо́жіи Ма́тери воздви́глъ еси́,* и учени́къ мно́жества собра́лъ еси́* въ не́мъ воспѣва́ти Влады́чицу Богоро́дицу,* и оби́тель ве́лію созда́лъ еси́,* въ не́йже трудолю́бно подвиза́лся еси́,* посто́мъ, и бдѣ́ніемъ, и злострада́ніемъ,* и е́же на земли́ лега́ніемъ,* чистоту́ имѣ́я душе́вную и тѣле́сную* и па́мять сме́ртную, преподо́бне о́тче на́шъ.* Моли́ спасти́ся душа́мъ на́шимъ. [Два́жды.]

Сла́ва, гла́съ 8:

Пріиди́те, мона́ховъ мно́жества, дне́сь псало́мская пѣ́нія и цвѣ́ты духо́вныя принесе́мъ, я́ко вои́стинну мона́ховъ удобре́нію и преподо́бнымъ спожи́телю, хва́ляще, си́це рце́мъ: ра́дуйся, свѣти́льниче многосвѣ́тлый, возводя́ ко Христу́ мона́ховъ мно́жества, ра́дуйся, Вели́каго Нова́града похвала́ и утвержде́ніе, и всѣ́хъ вѣ́рныхъ благоути́шное приста́нище, и очище́ніе боля́щихъ во грѣсѣ́хъ, на боже́ственное тѣ́хъ возвыша́я раче́ніе. Тѣ́мже пречестну́ю твою́ и святу́ю и а́нгеломъ говѣ́йную обстоя́ще ра́ку, любе́зно облобыза́емъ, преподо́бне о́тче на́шъ Анто́ніе, Боже́ственнаго человѣколю́бія про́симъ получи́ти твои́ми къ Бо́гу моли́твами, и мíру ми́ръ испроси́ и душа́мъ на́шимъ ве́лію ми́лость.

И ны́нѣ, богоро́диченъ, [гла́съ то́йже]:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 6:

Возсія́ дне́сь пресвѣ́тлая и всепра́зднственная па́мять твоя́, преподо́бне Анто́ніе, созыва́ющи многочи́сленное по́стникъ сосло́віе и преподо́бныхъ ликостоя́нія, а́нгелы съ человѣ́ки, я́ко вои́стинну къ похвале́нію въ Тро́ицѣ покланя́емаго Бо́га на́шего. Сего́ ра́ди вѣ́рою притека́юще къ честнѣ́й ра́цѣ моще́й твои́хъ, исцѣле́нія оби́льна пріе́млемъ, тѣ́мже мо́лимъ тя́: душе́вное на́мъ здра́віе при́сно подава́й, тебе́ вѣ́рно ублажа́ющимъ.

Дне́сь похва́льную пѣ́снь въ па́мяти твое́й, о́тче, тебѣ́ прино́симъ, пріими́, и предвари́ къ Бо́гу моли́твами твои́ми, и изба́ви на́съ отъ шу́яго стоя́нія, и десна́го предстоя́нія сподо́би, да тя́ вси́, я́ко те́пла засту́пника, досто́йно ублажа́емъ, о́тче преподо́бне Анто́ніе.

Дне́сь вели́кій Но́вградъ, я́ко но́ваго Авраа́ма пресе́льника, тя́ пресла́вно, о́тче, пріе́мъ, ра́довашеся. Блаже́нна же и оби́тель, иму́щи въ себѣ́ честны́я мо́щи твоя́, отону́дуже истека́ютъ вѣ́рнымъ исцѣле́нія, блаже́нни же ученицы́ твои́, и́же себѣ́ такова́го учи́теля стяжа́вше и такова́ отца́ ча́да нареко́шася, Анто́ніе пречу́дне, моли́твенниче о душа́хъ на́шихъ.

Сла́ва, гла́съ 6:

Свѣ́тлая и всепра́зднственная дне́сь возсія́ на́мъ, я́коже второ́е со́лнце, всѣ́хъ празднолю́бныхъ собо́ры просвѣща́етъ и тму́ отго́нитъ дре́вняго помраче́нія честна́я па́мять Анто́нія чу́днаго, вели́кій Но́вградъ созыва́я къ честнѣ́й и чудотво́рнѣй его́ ра́цѣ. Тѣ́мъ, со стра́хомъ и ра́достію облобыза́юще, мо́лимся, я́коже кро́ткому Дави́ду, Импера́тору на́шему на проти́вныя одолѣ́ніе дарова́ти и ми́ра мíрови испроси́ти и душа́мъ на́шимъ ве́лію ми́лость.

И ны́нѣ, [богоро́диченъ, гла́съ то́йже]:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

На стихо́внѣ стихи́ры, гла́съ 1, самогла́сны:

Преподо́бне о́тче Анто́ніе,* соше́дшеся любо́вію въ па́мять твою́* ко всечестнѣ́й твое́й и чудотво́рнѣй ра́цѣ,* свѣ́тло торжеству́юще, во гла́сѣхъ пѣ́сненныхъ пою́ще,* Дави́дски глаго́лемъ:* блаже́нъ му́жъ, боя́йся Го́спода,* непоро́чно бо въ путе́хъ Госпо́днихъ ходи́лъ еси́.* Тѣ́мже съ преподо́бными водворя́яся,* Го́сподеви моли́ся поми́ловатися душа́мъ на́шимъ.

Сти́хъ: Честна́ предъ Го́сподемъ* сме́рть преподо́бныхъ Его́.

Дне́сь въ па́мять соше́дшеся, бра́тіе,* духо́вно почти́мъ честна́го отца́ на́шего Анто́нія,* и́же посто́мъ тѣ́ло свое́ изнури́въ,* воздержа́ніемъ же стра́сти охуди́въ* и бдѣ́ніемъ у́мъ очи́стивъ,* моли́твою же ду́шу просвѣти́въ,* нището́ю на небесѣ́хъ сокро́вище себѣ́ некра́домо стяжа́:* послуша́ніемъ Бо́га благопослушли́ва имѣ́,* чистото́ю жили́ще Пресвята́го Ду́ха бы́въ.* Его́же ра́ди враго́въ шата́нія Христо́съ низложи́,* Иже и да́руетъ на́мъ ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Преподо́бне и богоблаже́нне о́тче на́шъ Анто́ніе,* благода́тію Свята́го Ду́ха у́мъ тво́й озари́въ,* отъ Него́же пресвѣ́тлыми заря́ми се́рдце твое́ просвѣти́въ,* свѣтови́дѣнъ ве́сь вои́стинну бы́лъ еси́,* искуси́теля же вся́чески побѣди́лъ еси́,* тѣ́мже ны́нѣ на небесѣ́хъ лику́еши со а́нгелы* и со всѣ́ми святы́ми.* Помина́й на́съ, всегда́ блажа́щихъ тя́ на земли́* и пресвято́е твое́ успе́ніе почита́ющихъ.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Анто́ніе: твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ, [гла́съ то́йже:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.].

Тропа́рь, гла́съ 4:

Ве́тхій Ри́мъ, оте́чество твое́, оста́вивъ, на ка́мень, я́ко на ле́гкій кора́бль, возше́лъ еси́ и на не́мъ па́че естества́, а́ки безпло́тенъ, по вода́мъ ше́ствовалъ еси́, промышле́ніемъ боже́ственнаго ра́зума направля́емь, вели́каго Нова́града дости́глъ еси́ и, оби́тель въ не́мъ сотвори́въ, тѣ́ло твое́ въ не́й предложи́лъ еси́, я́ко да́ръ освяще́нъ. Тѣ́мъ мо́лимъ тя́, о́тче Анто́ніе: моли́ Христа́ Бо́га, да спасе́тъ ду́ши на́ша.

Сла́ва, и ны́нѣ, богоро́диченъ: Еже отъ вѣ́ка утае́нное...



НА УТРЕНИ,
На Бо́гъ Госпо́дь: Тропа́рь, два́жды. Сла́ва, и ны́нѣ, богоро́диченъ.

По 1-й стихоло́гіи сѣда́ленъ, гла́съ 1. Подо́бенъ: Ка́мени запеча́тану.

Мона́шеское житіе́ измла́да, преподо́бне, возлюби́въ, и Христу́ отъ души́ послѣ́довавъ, богому́дре Анто́ніе, и отсю́ду просія́въ добродѣ́тельнымъ твои́мъ житіе́мъ, въ моли́твахъ, и поще́ніихъ, и бдѣ́ніихъ мона́ховъ о́бразъ бы́лъ еси́ вели́кій. Тѣ́мже вопіе́мъ ти́: сла́ва Да́вшему ти́ крѣ́пость, сла́ва Вѣнча́вшему тя́, сла́ва Даю́щему тобо́ю всѣ́мъ исцѣле́ніе. [Два́жды.]

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

По 2-й стихоло́гіи сѣда́ленъ, гла́съ 8. Подо́бенъ: Прему́дрости.

Отъ земны́хъ на небе́сная помы́сливъ, и дѣ́ломъ соверши́лъ еси́ ко Го́споду любо́вь, подо́бяся мо́лніи, отъ восто́ка до за́пада преходя́, я́коже другíй Авваку́мъ несе́нъ бы́сть а́нгеломъ съ пи́щею въ Вавило́нъ. Ты́ же Боже́ственнаго про́мысла а́нгеломъ на ка́мени, я́ко на корабли́, Вели́каго Нова́града дости́гъ, и хра́мъ пречу́денъ Бо́жія Ма́тере созда́лъ еси́, и оби́тель ве́лію воздви́глъ еси́ въ сла́ву Христа́ Бо́га, и мона́ховъ мно́жества собра́лъ еси́. Но егда́ бы́лъ еси́ въ жи́зни, пе́клся и́ми, я́ко при́сный оте́цъ, та́ко и ны́нѣ, о́тче преподо́бне Анто́ніе, моли́ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

По поліеле́и сѣда́ленъ, гла́съ 4:

Вели́кій Но́вградъ торжеству́етъ о Бо́зѣ досто́йно въ па́мять твою́, о́тче Анто́ніе, моли́твами твои́ми спаса́еми отъ искуше́ній, и бѣ́дъ, и вся́каго преще́нія, находя́щаго на ны́. И па́ки, преподо́бне, не преста́й моля́ся Христу́ Бо́гу спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Мно́гими прегрѣше́ньми а́зъ, блу́дный, у́мъ помрачи́въ, вопію́ Твоему́ крѣ́пкому заступле́нію, Богоро́дице: просвѣти́ души́ моея́ зѣ́ницы, возсія́й ми́ покая́нія свѣ́тлую зарю́ и облецы́ мя́ во ору́жіе свѣ́та, Дѣ́во Богороди́тельнице Чи́стая.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Вся́кое дыха́ніе...] Ева́нгеліе преподо́бническое: [Матѳе́я, зача́ло 43.]

По 50-мъ псалмѣ́ стихи́ра, гла́съ 6:

Преподо́бне о́тче Анто́ніе, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ Пресвяты́я Богоро́дицы, на 6, гла́съ 2: Нетре́ну, необы́чну... И преподо́бнаго кано́нъ, на 8, гла́съ 2.

Пѣ́снь 1.

Ирмо́съ: Гряди́те лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Агнче незло́бивый, отве́рзи ми́ устнѣ́ недосто́йніи, язы́къ мо́й уясни́, и се́рдце мое́ просвѣти́, и у́мъ мо́й озари́ свѣ́томъ Твоего́ богоразу́мія, да возмогу́ воспѣва́ти па́мять преподо́бнаго Анто́нія, его́же на земли́ удиви́лъ еси́.

Мно́гимъ милосе́рдіемъ и щедро́тами, Содѣ́телю тва́ри и вѣко́въ Тво́рче, моле́бное пѣ́ніе пріими́, и проще́ніе на́шихъ согрѣше́ній да́руй Твоего́ уго́дника преподо́бнаго Анто́нія моле́ніемъ, и тишину́ се́рдцу моему́.

Свѣ́тлое и богоуго́дное житіе́ твое́, я́ко свѣ́тъ, вои́стинну на земли́ показа́ся, Боже́ственную ви́дѣти свѣ́тлость, Анто́ніе, сподо́бился еси́. Тѣ́мже и, ви́димая вся́ оста́вивъ, Непостижи́маго зрѣ́ти сподо́бился еси́.

Богоро́диченъ: Мои́хъ прегрѣше́ній, Влады́чице, плени́цу расто́ргни, Твоего́ Сы́на и Го́спода моля́щи, и томя́щій мя́ грѣ́хъ, Приснодѣ́во, низложи́, я́ко да воспѣва́ю Тя́ всегда́, Всенепоро́чная, Тобо́ю спаса́емь.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Жезло́мъ добродѣ́телей стра́стное мо́ре пресѣ́къ и го́рдаго врага́, я́коже друга́го фарао́на, моли́твою твое́ю погрузи́въ, избра́нное твое́ ста́до но́ваго Изра́иля невре́дно соблюди́, Анто́ніе преподо́бне.

Возлюби́лъ еси́, блаже́нне, всено́щное бдѣ́ніе, и моли́тву непреста́нну, и любо́вь нелицемѣ́рну, си́ми очища́я у́мъ тво́й, ду́шу же просвѣща́я, тѣ́ло твое́ смиря́лъ еси́ и ко дневны́мъ трудо́мъ благопоко́рно устроя́лъ еси́.

Хра́мъ тя́, вси́ вѣ́рніи, Ду́ха Пресвята́го вѣ́мы, хра́мъ боголѣ́пенъ Бо́жіи Ма́тери воздви́глъ еси́, и огра́ду ве́лію устро́илъ еси́, и мона́ховъ мно́жества совокупи́лъ еси́, въ не́мже ны́нѣ вся́къ неду́гъ моли́твами твои́ми отгоня́ется.

Богоро́диченъ: Во ины́хъ жена́хъ ма́ти, до́ндеже дѣ́ва, не позна́ся, ни ма́ти по рождествѣ́ дѣ́вствовати сподо́бися, на Тебѣ́ же, Дѣвома́ти, обоя́ устро́ишася. Тѣ́мъ весе́ліемъ ду́ха воспѣва́ю: нѣ́сть непоро́чны, па́че Тебе́, Влады́чице.

Сѣда́ленъ, гла́съ 8. Подо́бенъ: Прему́дрости.

Ангельски на земли́ пожи́въ, богому́дре Анто́ніе, лико́мъ по́стническимъ счи́слился еси́: кре́стъ бо на ра́мена твоя́ взе́мъ, послѣ́довалъ еси́ Влады́цѣ Христу́, и стра́сти душетлѣ́нныя воздержа́ніемъ, преподо́бне, увяди́лъ еси́, и бы́лъ еси́ духо́вно прія́телище и сосу́дъ чи́стъ Го́сподеви. Тѣ́мже вопіе́мъ ти́: моли́ Христа́ Бо́га грѣхо́въ оставле́ніе дарова́ти пра́зднующимъ любо́вію пречестну́ю и святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Всенепоро́чная Невѣ́ста Творцу́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и вы́шняго прича́стія сподо́би и свѣ́та невече́рняго моли́твами Твои́ми.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Умертви́въ себе́ мíрови, жи́знь равноа́нгельну на земли́ пожи́лъ еси́, пресла́вне, и, я́ко да́ръ освяще́нъ, Влады́цѣ, Анто́ніе, твою́ ду́шу чи́сту предста́вилъ еси́, и Боже́ственнаго Ца́рствія досто́йно, о́тче, получи́лъ еси́.

Вѣ́триломъ, о́тче, воздержа́нія окриля́емь, страстны́я тмы́ отбѣжа́въ и къ безстра́стія путе́мъ наставля́емь, къ Свѣ́ту невече́рнему восте́клъ еси́ и, отъ Сего́ озари́вся, нетлѣ́нія бога́тство наслѣ́довалъ еси́, Анто́ніе преподо́бне.

Вели́кій Но́вградъ ны́нѣ весе́ліемъ, о́тче, красу́ется, имѣ́я мо́щи твоя́ въ себѣ́, преподо́бне Анто́ніе, ученицы́ же твои́, твоему́ житію́ ревну́юще, о твое́й па́мяти ра́дующеся, Го́сподеви пою́тъ: сла́ва си́лѣ Твое́й, Го́споди.

Богоро́диченъ: Истинную Тя́ сѣ́нь свидѣ́тельствоваша многоразли́чными о́бразы, я́вѣ показу́юще воплоще́ннаго изъ Тебе́ Еди́наго отъ Тро́ицы, Пречи́стая, неизмѣ́нно, Богома́ти Чи́стая, и мíръ обно́вльша.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Возше́дъ на высоту́ добродѣ́телей, до́лу влеку́щія стра́сти оплева́лъ еси́, сла́дость показу́я спасе́нія, о́тче преподо́бне Анто́ніе, ста́ду твоему́ проси́ грѣхо́въ проще́нія.

Мѣ́сто проше́нія, о́тче, со тща́ніемъ исполня́я, хра́мъ боголѣ́пенъ Бо́жія Ма́тере воздви́глъ еси́, въ не́мже ны́нѣ пра́здничною ра́достію мона́ховъ мно́жества веселя́тся, па́мять твою́ прославля́юще.

Не забу́ди ста́да твоего́, е́же, му́дре, собра́лъ еси́ и въ жи́зни се́й упа́слъ еси́ благоче́стно, и ны́нѣ потщи́ся, о́тче на́шъ Анто́ніе, да привлече́ши во огра́ду небе́сную.

Богоро́диченъ: Упра́ви у́мъ мо́й, Влады́чице, тружда́ющійся въ пучи́нѣ скорбе́й и потопля́емый наше́ствіемъ тлетво́рныхъ страсте́й. Спаси́ къ Тебѣ́ прибѣга́ющаго, ины́я бо по́мощи, Чи́стая, ра́звѣ Тебе́, не зна́емъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Отъ земны́хъ къ небе́снымъ оби́телемъ пресла́вно возше́лъ еси́, богому́дре Анто́ніе, и та́мо зрѣ́ти неизрече́нныхъ сподо́бился еси́, и́хже о́ко не ви́дѣ, и у́хо не слы́ша, и на се́рдце человѣ́ку не взы́де, я́же угото́ва Бо́гъ лю́бящимъ Его́.

Дрема́нія очи́ма твои́ма отню́дъ не да́лъ еси́, къ Бо́гу все́ твое́ жела́ніе впери́въ и Тому́ невозвра́тно отъ души́ послѣ́довавъ, но́щи житія́ непреткнове́нно премину́лъ еси́, видѣ́ніи Боже́ственными окормля́емь, блаже́нне Анто́ніе, въ Боже́ственную жи́знь всели́лся еси́.

Вели́каго святи́теля Ники́ты, блаже́нне Анто́ніе, благослове́нія сподо́бився, духо́внаго наказа́нія поуче́ніе отъ него́ воспрія́лъ еси́, бу́рею бо грѣха́ не погрузи́лся еси́, и въ ти́хо приста́нище дости́глъ еси́ небе́снаго Ца́рствія, и та́мо я́снѣ наслажда́ешися Боже́ственнаго видѣ́нія.

Богоро́диченъ: Обетша́вшія ны́ го́рькимъ дре́ва пре́жде вкуше́ніемъ и па́дшіяся поползе́ніемъ, Пречи́стая, обнови́ла еси́, Зижди́теля ро́ждши, Сло́во Ѵпост́сное, Дѣ́во Ма́ти Влады́чице.

Конда́къ, гла́съ 8. Подо́бенъ: Взбра́нной.

Ри́мское воспита́ніе, Вели́кому же Нову́граду благода́тное процвѣте́ніе, мно́гими бо труды́ и по́двиги въ не́мъ Бо́гу угоди́лъ еси́. Сего́ ра́ди чуде́съ дарова́ній отъ Него́ сподо́бился еси́, и тѣ́ло твое́ мно́гими лѣ́ты соблюде́ нетлѣ́нно. Мы́ же, сіе́ лобыза́юще, ра́достно отъ души́ вопіе́мъ ти́: ра́дуйся, о́тче Анто́ніе.

Икосъ:

Ка́ко возмогу́ исчести́ премно́гая твоя́ чудеса́? Или́ ка́ко изрещи́ жесто́кое твое́ житіе́? Не и́мамъ бо се́рдца чи́ста, я́ко сіе́ сра́мными дѣя́ньми оскверни́хъ и ду́шу мою́ лука́выми по́мыслы осмради́хъ. Но оба́че дерза́ю воспѣва́ти, а́ще ты́ ми пода́си сло́во, недосто́йному твоему́ рабу́, ты́ бо земны́й а́нгелъ и небе́сный человѣ́къ во пло́ти обрѣ́лся еси́, преподо́бне. На земли́ бо о тлѣ́нныхъ небре́глъ еси́ и Христу́ отъ души́ послѣ́довалъ еси́ болѣ́зньми, и труды́, и зѣ́льнымъ воздержа́ніемъ, и злострада́ніемъ, и на земли́ лега́ніемъ. Посто́мъ, и бдѣ́ніемъ, и моли́твами о́бразъ бы́лъ еси́ твои́мъ ученико́мъ и сего́ ра́ди сосу́дъ чи́стъ и оби́тель Ду́ха Пресвята́го яви́лся еси́. Тѣ́мъ тя́ чти́мъ, ра́дуйся, о́тче Анто́ніе.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Отъ гра́да и оте́чества твоего́ пресе́льникъ бы́лъ еси́, къ Бо́гу ру́цѣ простира́я, спасе́ніе обрѣ́тъ; вода́мъ же послужи́вшимъ тебѣ́ Бо́жіимъ манове́ніемъ, вели́каго Нова́града дости́глъ еси́, идѣ́же бя́ше уго́дно Влады́цѣ. Ему́же ны́нѣ ра́достно пое́ши: благослове́нъ Бо́гъ оте́цъ на́шихъ.

Вели́каго Нова́града архіере́я, и христолюби́выхъ люде́й, и мона́ховъ мно́жества ра́дости испо́лнилъ еси́ и духо́внаго весе́лія твои́мъ ди́внымъ и чрезъесте́ственнымъ прехожде́ніемъ: на ка́мени бо, я́ко на корабли́, прише́лъ еси́, Спу́тника, о́тче, Христа́ обрѣ́тъ. Къ Нему́же ны́нѣ ра́достно зове́ши: благослове́нъ Бо́гъ оте́цъ на́шихъ.

Лику́ютъ собра́нія мона́шествующихъ и веселя́тся наро́довъ мно́жества вели́каго Нова́града въ честнѣ́мъ преставле́ніи Анто́нія всеблаже́ннаго, моле́бный соверша́юще пра́здникъ, ра́достно отъ души́ вопію́тъ: благослове́нъ Бо́гъ оте́цъ на́шихъ.

Богоро́диченъ: Пе́щь прообразова́ше Твое́ рождество́, Всенепоро́чная: о́троки бо не опали́, я́коже ложесна́ Твоя́, о́гнь непостоя́нный. Тѣ́мже мо́лимъ Тя́: огня́ вѣ́чнаго изба́ви рабы́ Твоя́.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Авраа́мскій стяжа́въ нра́въ, прему́дре, отъ страны́ Ри́мскія пресе́льникъ бы́въ вели́каго Нова́града и та́мо Бо́га узрѣ́лъ еси́, обѣщава́юща тебѣ́ воздая́ніе бога́тно. Тѣ́мъ, веселя́ся, усе́рдно Христу́ вопіе́ши: благослови́те, вся́ дѣла́, Го́спода и превозноси́те Его́ во вѣ́ки.

На земли́ пожи́въ, я́ко а́нгелъ, съ пло́тію, я́ко безпло́тенъ, безпло́тныя враги́ подъ но́ги покори́лъ еси́, чистоту́ стяжа́лъ еси́ посто́мъ, и бдѣ́ніемъ, и моли́твами. Тѣ́мже со а́нгелы на небесѣ́хъ свѣ́тло лику́я, Христу́ вопіе́ши: благослови́те, вся́ дѣла́, Го́спода и превозноси́те Его́ во вѣ́ки.

Ри́мъ оте́чество твое́ проповѣ́дуетъ, преподо́бне, вели́кій же Но́вградъ хва́лится тобо́ю, пріе́мь отъ Го́спода сокро́вище некра́домое: помо́щника бо вели́каго, блаже́нне Анто́ніе, тя́ воспріе́мъ, съ ли́ки мона́шескими ны́нѣ весели́тся. Тѣ́мъ, па́мять твою́ пра́зднующе, ра́достно вопіе́мъ: благослови́те, вся́ дѣла́, Го́спода и превозноси́те Его́ во вѣ́ки.

Богоро́диченъ: Вели́кому та́инству рождества́ Твоего́ кто́ не удиви́тся, Богоро́дице? Или́ кíй язы́къ земны́й или́ у́мъ безпло́тныхъ изрещи́ возмо́жетъ? Па́че бо естества́ и смы́сла, Богоро́дице, Зижди́теля родила́ еси́.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Всегда́ къ ра́цѣ моще́й твои́хъ приступа́юще, любе́зно цѣлу́емъ и отъ души́ вопіе́мъ: о́тче преподо́бне Анто́ніе, моли́ся прилѣ́жно Христу́ Бо́гу за гра́дъ и лю́ди, ско́рбь на́шу на ра́дость премѣни́ти и грѣхо́въ проще́ніе испроси́ти, да тя́ непреста́нно велича́емъ.

Вели́кому Анто́нію тезоимени́тъ бы́лъ еси́, блаже́нне Анто́ніе, и того́ житію́ подража́лъ еси́, равноа́нгельно во оби́тели Пресвяты́я Богоро́дицы пожи́лъ еси́, тѣ́мже и ра́вну по́честь отъ Бо́га сподо́бился еси́ прія́ти, съ ни́мже ны́нѣ на небесѣ́хъ весели́шися. И на́съ помина́й, пра́зднующихъ па́мять твою́, да тя́ непреста́нно велича́емъ.

Ны́нѣ на тебѣ́ чу́до ве́ліе ви́дится и у́жаса испо́лнено: ка́ко погребе́но вои́стинну мно́го лѣ́тъ соблюде́ся невреди́мо, преподо́бне Анто́ніе, твое́ многотру́дное тѣ́ло, во гро́бѣ лежа́щее Бо́жіимъ манове́ніемъ? Яко́же Са́мъ вѣ́сть, сла́вящія Его́ прославля́етъ.

Богоро́диченъ: Исцѣли́ла еси́ сокруше́ніе, Всенепоро́чная, и ве́тхое страда́ніе земны́хъ, Бо́га ро́ждши, Царя́ Христа́, поне́сшаго пло́тію неду́ги на́ша. Тѣ́мже Тя́, вси́ ро́ди, Дѣ́во Влады́чице, ублажа́юще, Богоневѣ́сто, велича́емъ.

Свѣти́ленъ. Подо́бенъ: Со ученики́.

Христо́ву ны́нѣ престо́лу предстоя́, преподо́бне, съ Богома́терію, Пречи́стою Дѣ́вою, моля́ся не преста́й побѣ́ды на ва́рвары христолюби́вому Импера́тору на́шему дарова́ти, и душе́вное спасе́ніе, и мíру смире́ніе, Анто́ніе богому́дре.

Сла́ва, и ны́нѣ, то́йже.

На хвали́техъ стихи́ры, гла́съ 1. Подо́бенъ: Всехва́льніи му́ченицы.

Отче богому́дре Анто́ніе,* ты́ вся́ко на земли́ Христа́ возлюби́лъ еси́,* и Того́ боже́ственнымъ стопа́мъ послѣ́довати возжелѣ́лъ еси́:* кре́стъ бо на ра́мо взе́мъ,* послѣ́довалъ еси́, преподо́бне.* И ны́нѣ на небесѣ́хъ со а́нгелы* Тро́ицѣ предстои́ши, богови́дче,* Ейже моли́ся дарова́ти душа́мъ на́шимъ* ми́ръ и ве́лію ми́лость. [Два́жды.]

Отче прему́дре Анто́ніе,* тебе́ Бо́гъ показа́ па́стыря слове́сному Своему́ ста́ду* и украси́лъ еси́ пречу́дне це́рковь Бо́жія Ма́тере,* въ не́йже и до ны́нѣ лежа́тъ пречестны́я твоя́ мо́щи,* во гро́бѣ неразруши́мы,* исцѣле́нія подаю́тъ съ вѣ́рою притека́ющимъ.* И ны́нѣ моли́ся дарова́ти душа́мъ на́шимъ* ми́ръ и ве́лію ми́лость.

Отче преподо́бне Анто́ніе,* испроси́ я́же къ Бо́гу моли́твами твои́ми* Це́ркви утвержде́ніе,* мона́хомъ удобре́ніе,* благочести́вому Импера́тору на́шему [и́мярекъ],* здра́віе и побѣ́ды на враги́* и всѣ́мъ вѣ́рою притека́ющимъ* во оби́тель Пресвяты́я Бо́жія Ма́тере по́мощь.* Къ Не́йже моли́ся дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Анто́ніе: твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ, [гла́съ то́йже]:

Влады́чице, пріими́ [моли́твы ра́бъ Твои́хъ и изба́ви на́съ отъ вся́кія ну́жды и печа́ли].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Слу́жба вся́ преподо́бническая: [Блаже́нна отъ кано́на, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 50 – 58 об.

/ Къ оглавленію раздѣла /


Наверхъ / Къ титульной страницѣ

0