Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа во 2-й де́нь.
Пренесе́ніе моще́й свята́го первому́ченика и архидіа́кона Стефа́на.

[ВЕЧЕРЪ,]
На Го́споди воззва́хъ: стихи́ры первому́ченика, на 6, гла́съ 8. Подо́бенъ: О, пресла́внаго чудесе́!

Вѣне́цъ благода́тей* тво́й ве́рхъ, Стефа́не, му́чениче Христо́въ,* тезоимени́тно пріе́мъ* и гри́вну, я́ко зла́то, добродѣ́телей обложи́въ твое́й вы́и,* му́дрости бы́лъ еси́ прему́дростное жили́ще.* Юже поче́лъ еси́,* притвори́въ любе́зну себѣ́,* ея́же ра́ди почти́лся еси́* сла́вою и благода́тію.

Вѣне́цъ су́щему че́стенъ* Царю́ и Бо́гу прине́слся еси́, апо́столе,* ка́меннымъ біе́ніемъ,* слове́сенъ и многоче́стенъ,* па́че зла́та и ка́мене честна́го,* вѣнча́нъ сла́вою и благода́тію,* Стефа́не всече́стне,* му́чениковъ первострада́льне,* сла́дкое дѣ́ло же и и́мя,* помяни́ всѣ́хъ на́съ.

Ины стихи́ры самогла́сны, гла́съ 2. Анато́ліево:

Пе́рвый въ діа́конѣхъ, пе́рвый въ му́ченицѣхъ показа́лся еси́, всесвяты́й Стефа́не: пу́ть бо бы́лъ еси́ святы́мъ, и мно́ги Го́споду приве́лъ еси́ му́ченики. Тѣ́мъ не́бо тебѣ́ отве́рзеся и Бо́гъ тебѣ́ яви́ся, Того́ моли́ спасти́ся душа́мъ на́шимъ.

Во святы́ню обле́клся еси́, Стефа́не блаже́нне, первому́чениче и перводіа́коне, а́нгеловъ соприча́стниче, хода́тайствуй и моли́ся о на́съ Спа́су Го́споду безгрѣ́шному.

Первому́ченика и до́бляго Христо́ва уго́дника, Стефа́на перводіа́кона досто́йно почти́мъ: то́й бо стоя́ посреди́ беззако́нниковъ, одесну́ю Отца́ Сы́на ви́дѣ.

Сла́ва, гла́съ 6. Анато́ліево:

Пе́рвый въ му́ченицѣхъ показа́лся еси́ и въ діа́конѣхъ, Стефа́не апо́столе, страда́льцевъ удобре́ніе, вѣ́рныхъ утвержде́ніе, сла́ва пра́ведныхъ, честну́ю твою́ па́мять пра́зднующимъ проси́, я́ко предстоя́ престо́лу Христа́, всѣ́хъ Царя́, прегрѣше́ній очище́нія и Ца́рствія небе́снаго сподо́битися.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ ро́ждшая вопія́ше: что́ стра́нное е́же ви́жу та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, жи́зни Пода́телю?

На стихо́внѣ окто́иха. Сла́ва, гла́съ 8. Кипріа́ново:

Ра́дуйся о Го́сподѣ, вѣнцено́сче Стефа́не, подо́бникъ Влады́ки, зане́же и первому́ченикъ бы́лъ еси́ Христа́, Царя́ на́шего, и ле́сть беззако́нныхъ іуде́й упраздни́лъ еси́, моля́ся о на́съ ко Го́споду.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Тя ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, —* Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый* милосе́рдіемъ Твои́мъ?

Тропа́рь, гла́съ 4:

Ца́рскимъ вѣнце́мъ вѣнча́ся тво́й ве́рхъ отъ страда́ній, я́же претерпѣ́лъ еси́ по Христѣ́ Бо́зѣ, му́чениковъ первострада́льче Стефа́не, ты́ бо, іуде́йское обличи́вый неи́стовство, ви́дѣлъ еси́ твоего́ Спа́са одесну́ю Отца́: Того́ у́бо моли́ о душа́хъ на́шихъ.

Зри́: По отпуще́ніи вече́рни вно́сится Честны́й Кре́стъ, іере́ю оболче́ну въ фело́нь и діа́кону въ стиха́рь, со свѣща́ми и кади́ломъ, пою́ще тропа́рь: Спаси́, Го́споди, лю́ди Твоя́... и конда́къ, и полага́ется на престо́лъ.


НА УТРЕНИ,
Оба кано́на о́ктоиха на 8, безъ му́ченичновъ, и свята́го на 6, его́же краегране́сіе: Пѣ́сньми первому́ченика вѣнча́ю. Ѳеофа́нъ, гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Свѣтолу́чными блиста́ніи Ду́ха просвѣща́емь, преесте́ственными страда́ніи и тве́рдаго терпѣ́нія, тя́ пою́щія просвѣти́, предстоя́ Влады́цѣ, вѣнцено́сче пребога́те Стефа́не, му́чениковъ вѣнча́ніе.

Подвиготеку́щимъ нача́токъ бы́въ и верхо́вникъ му́ченическаго собо́ра, зрѣ́ти сподо́бился еси́ Страстополо́жника, сла́вне, десни́цею живоно́сною богоплете́нный тебѣ́ простира́юща вѣне́цъ, чу́дный Стефа́не.

Еди́нъ сы́й сокро́вище бла́гости, Спа́се, показа́лъ еси́ отъ земны́хъ нѣ́дръ сокро́вище многоцѣ́нное, бога́тство неиждива́емое, неотъе́млемо имѣ́ніе, коры́сть неги́блему, Стефа́на Твоего́ первому́ченика.

Ангелозра́чною я́вѣ свѣ́тлостію озаря́емь, а́нгельскими пѣ́сньми, первому́чениче Стефа́не и діа́коновъ перволу́чшій, сокрове́нъ я́ко яви́лся еси́, досто́йно вои́стинну почти́лся еси́, испо́лненъ благово́нія духо́внаго.

Богоро́диченъ: Воплоще́ннаго на́съ ра́ди, Пренепоро́чная, пре́жде Безпло́тнаго, Богонача́льнаго Сло́ва Отча родила́ еси́. О, дѣ́вства селе́ніе, и прія́телище чистоты́, и хра́мъ свяще́нія, Влады́чице мíра Богоневѣ́сто!

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Священносло́въ свяще́нный и богосло́въ показа́лся еси́, сплета́яся съ евре́йскими собо́ры, облича́я крѣ́пко си́хъ безбо́жіе и богобо́рный нра́въ, Стефа́не, му́чениче всеизря́дне.

Первому́ченика Христо́ва и служи́телей пе́рваго, му́ченикомъ тече́нія степе́нь показа́вша свѣ́тло, а́нгеловъ собесѣ́дника, пріиди́те согла́сно вси́, пѣ́сньми боже́ственными почти́мъ.

Сокрове́нное сокро́вище въ земли́ явля́ется, и мíръ благово́нія боже́ственнаго и бога́тыхъ даро́въ Це́рковь испо́лни му́чениковъ пе́рвый и служи́телей первоизбра́нный.

Умерщвле́нный мо́й у́мъ жи́зни дѣ́йствомъ, тобо́ю проповѣ́давшимся, му́дре, возста́ви пѣ́ти твое́ честно́е торжество́ и твои́мъ стопа́мъ послѣ́довати, Стефа́не блаже́нне, сподо́би.

Богоро́диченъ: Две́рь яви́лася еси́ мы́сленна восто́ка Вы́шняго, на земли́ я́вльшагося, Дѣ́во: Тобо́ю бо къ на́мъ Сло́во привни́де спасти́ всѣ́хъ отъ безслове́сія, Пречи́стая.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Апо́столе Христо́въ, діа́коновъ пе́рвый, первому́чениче му́дре, му́чениковъ ве́рхъ, мірскíя концы́ освяти́въ страда́ніи твои́ми и чудесы́ ду́ши человѣ́ковъ просвѣти́лъ еси́, чту́щія тя́ изба́ви вся́ческихъ бѣ́дъ, всехва́льне Стефа́не. [Два́жды.]

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́ Бо́га, па́че ума́ же и сло́ва, непреста́нно моли́ съ вы́шними си́лами пода́ти оставле́ніе грѣхо́въ на́шихъ всѣ́хъ и исправле́ніе житія́, вѣ́рою и любо́вію при́сно Тя́ сла́вящимъ.

Крестобогоро́диченъ:

Нескве́рная Агница, Агнца и Па́стыря, повѣ́шена на дре́вѣ, ме́ртва зря́щи, пла́чущи, вѣща́ше, ма́терски восклица́ющи: ка́ко претерплю́ Твое́ е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти́: си́лѣ Твое́й сла́ва, Человѣколю́бче.

Струи́ на́мъ дне́сь мѵ́ра источи́ благово́нія, исто́чникъ исхо́дитъ и рѣка́ Боже́ственныхъ бла́гъ, и пи́щный пото́къ отве́рзе сла́вный, пе́рвый му́чениковъ, и́же вѣ́ры испо́лненъ, и си́лы Боже́ственныя, и благода́ти.

Яко свяще́нъ и свѣ́телъ и благонаро́читъ де́нь первому́ченика, испо́лненъ свѣ́та и духо́внаго вои́стинну весе́лія, Ца́рскому гра́ду яви́ся, сохраня́я держа́ву честны́я Це́ркве и ва́рварскую де́рзость отгоня́я.

Благо́е наслѣ́діе воспрія́лъ еси́ досто́йно, Стефа́не блаже́нне, идѣ́же Христо́съ Ца́рь всѣ́хъ, ты́ всели́лся еси́, Того́ бо яви́лся еси́ служи́тель, зна́меній и чуде́съ творя́ си́лы и подая́ боля́щимъ исцѣле́нія.

Непрекло́ненъ Це́ркве и непоколеби́мь и водруже́нъ сто́лпъ простре́ся отъ земли́ да́же до небе́съ, заре́ю благоче́стія просвѣща́я вся́ концы́, Стефа́нъ, вели́кій и́стины проповѣ́дникъ, страда́нія и́стинный побо́рникъ.

Богоро́диченъ: Но́въ Ада́мъ за пе́рваго Ты́ бы́лъ еси́, отъ Дѣ́вы за прама́терь, Изба́витель всѣ́хъ и Спа́съ, за сме́рть и́стинна жи́знь безсме́ртная. Тѣ́мже, Тя́ ро́ждшую Богоро́дицу вѣ́дуще, по достоя́нію, вси́ вѣ́рніи, ублажа́емъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и къ свѣ́ту за́повѣдей Твои́хъ пути́ моя́ напра́ви, молю́ся.

Беззако́нныхъ евре́евъ су́етный вои́стинну собо́ръ терпѣли́вно обличи́лъ еси́, отъ тѣ́хъ, богогла́се, покрыва́емь мета́ніи ка́менными, на небеса́ я́ко побѣдоно́сецъ возне́слся еси́ ду́хомъ, Стефа́не.

Яко красе́нъ, я́ко у́тро, мíру яви́лся еси́, сла́вне Стефа́не, мглу́ отгоня́, и де́моновъ прогоня́ мечта́нія и неду́гующихъ стра́сти, и душе́вныхъ не́мощей цѣля́ гное́нія, богодохнове́нне.

Мы́сленно со а́нгелы, блаже́нне, ра́дуяся, мíра концы́ освяща́еши вои́стинну твои́мъ прише́ствіемъ и благода́тію, благово́нія мѵ́ры духо́вными благоуха́я и бѣ́дъ и бу́ри избавля́я.

Богоро́диченъ: Ма́тернее дерзнове́ніе е́же къ Сы́ну Твоему́ иму́щи, Всечи́стая, сро́днаго промышле́нія, е́же о на́съ, не пре́зри, мо́лимся: я́ко Тебе́ и еди́ну христіа́не ко Влады́цѣ очище́ніе ми́лостивно предлага́емъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Ангеломъ я́ко подо́бникъ произволе́ніемъ бы́въ, ви́дъ а́нгельскій стяжа́лъ еси́, блаже́нне, съ ни́миже ра́дуяся и обходя́, пою́щія тя́ спаса́й.

Глаго́лъ, блаже́нне, твои́хъ богодохнове́нныхъ си́ла, я́ко шу́мъ гро́мный, во у́ши, богопрія́тне, я́вѣ возгремѣ́ беззако́нныхъ и ли́ца и́хъ помрачи́.

Сла́ву Оте́ческую узрѣ́ти сподо́бился еси́ и сея́ соесте́ственное сія́ніе, Стефа́не, страда́ніи возвѣща́я тебѣ́ свѣ́тлыя вѣнцы́, богогла́се всече́стне.

Богоро́диченъ: Сы́нъ Единоро́дный и пре́жде вѣ́къ неви́димый напослѣ́докъ дне́й Пе́рвенецъ бы́сть, ви́димь пло́тію изъ Тебе́, Богома́ти, Бо́гъ спасе́нія моего́.

Кондакъ, гласъ 6:

Пе́рвый сѣ́ялся еси́ на земли́ небе́снымъ дѣ́лателемъ, всехва́льне Стефа́не, пе́рвый на земли́ за Христа́ кро́вь излія́лъ еси́, блаже́нне, пе́рвый отъ Него́ побѣ́ды вѣнце́мъ увя́злся еси́ на небесѣ́хъ, страда́льцевъ нача́ло, вѣне́чниче, му́чениковъ первострада́льне.

Икосъ:

Ра́йскія цвѣ́ты зря́, благово́ніемъ свои́мъ кра́снымъ исполня́ющія всю́ вселе́нную, стра́нному и́хъ дивлю́ся зрѣ́нію: въ ле́дѣ зи́мнѣмъ мно́жае цвѣту́тъ па́че, е́же стра́нно во цвѣ́тѣхъ. И му́ченикъ Христо́въ, процвѣты́й пе́рвѣе, и две́рь бы́въ стра́ждущимъ зако́нно, и цвѣту́щимъ зимо́ю муче́нія, пу́ть показа́ всѣ́мъ неле́стный, хотя́щимъ страда́ти, до́брый подвигонача́льникъ, и́же болѣ́зньми просія́въ, вѣне́чниче, му́чениковъ первострада́льне.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Тече́ніе крове́й твои́хъ небе́сныя две́ри отве́рзе и Подвигополо́жника, предстоя́ща и простира́юща тебѣ́ вѣне́цъ, показа́, зову́щу: благослове́нъ Бо́гъ оте́цъ на́шихъ.

Яко звѣ́ріе, похи́тивше богоубíйцы богоявле́ннаго, скверноубíйственными дла́ньми сего́ убива́ху, моля́щася о убива́ющихъ прилѣ́жно и пою́ща: благослове́нъ Бо́гъ оте́цъ на́шихъ.

Зако́нно обличи́лъ еси́ беззако́нныя, зако́нный подо́бникъ Спа́совъ, и богобо́рны си́хъ показа́лъ еси́, отъ ни́хже ка́меніемъ побива́емь, пѣ́лъ еси́: благослове́нъ Бо́гъ оте́цъ на́шихъ.

Богоро́диченъ: Въ лѣ́то Безлѣ́тнаго неискусобра́чно, Чи́стая, заче́нши, и́же пе́рвѣе Безпло́тное Сло́во, пло́ти прія́тіемъ, Дѣ́во, родила́ еси́. Ему́же пое́мъ, согла́сно зову́ще: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Преесте́ственнымъ сія́я свѣтозаре́ніемъ, преизря́дне, и лица́ твоего́ зра́къ равноа́нгеленъ пока́зовалъ еси́, благода́ти изда́вшися, Стефа́не, я́же въ души́ твое́й, сокрове́ннѣ бога́тно. Тѣ́мже вопія́лъ еси́: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Вѣнцено́сче Стефа́не, души́ моея́ я́звы и грѣхо́вныя стру́пы очи́сти кропле́ніемъ крове́й твои́хъ, къ твоему́ бо заступле́нію ми́лостивному и христоподо́бному нра́ву прибѣго́хъ, зовы́й: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Благода́ти, сла́вне, тебѣ́ тезоимени́тый вѣне́цъ твоему́ честно́му верху́ положи́ Судія́ нелицемѣ́рный, Его́же благоче́стно проповѣ́далъ еси́, Зижди́теля, и Бо́га, и Царя́ всѣ́хъ, вопія́ непреста́нно: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Въ ру́ку Содѣ́теля пре́далъ еси́ ду́хъ тво́й, и небе́сная во́инства собесѣ́дника прія́ша [тя́], ра́дующеся, пе́рвѣе на земли́ равноа́нгельна, ны́нѣ же тѣ́хъ причте́на лико́мъ, непреста́нно пою́ща: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Свѣ́та незаходи́маго была́ еси́ сосу́дъ, Всечи́стая, Свѣ́тъ бо су́щимъ во тмѣ́ и сѣ́ни родила́ еси́, просвѣща́ющъ вся́ческая богоразу́мія благода́тію. Ему́же непреста́нно, вѣ́рніи, пое́мъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Страда́нія му́чениковъ нача́ло, свѣ́тло показа́вый муче́нія неле́стную стезю́, наставля́ющу къ небеси́, первому́ченикъ Стефа́нъ вся́ призыва́етъ духо́внѣ къ боже́ственному весе́лію и къ прича́стію свѣ́та, ко обще́нію святы́ни.

Вжиля́емь любо́вію Христо́вою и Сего́ поревнова́въ кро́тости и гла́су, глаго́лаше: не поста́ви убíйцамъ грѣха́, Го́споди, пріими́ же ду́хъ мо́й, Бла́же, и Боже́ственнаго Ца́рствія, пи́щи же неизрече́нныя, су́щія у Тебе́, сподо́би мя́.

Красе́нъ, и ви́да а́нгельскаго, и прему́дрости, и вѣ́ры испо́лненъ, и Боже́ственныя зари́ сія́я луча́ми, и богогла́сными усты́ богоглаго́лалъ еси́, я́ко рѣка́, боже́ственнѣ вѣтíйствуя, вы́шнее наслѣ́діе, богоблаже́нне, улучи́лъ еси́.

Вѣнце́мъ благода́тей вѣнча́лся еси́, и ли́ки му́ченическими окруже́нъ, и Христу́ Подвигополо́жнику предстоя́, о на́съ моли́ся, творя́щихъ свѣ́тло вои́стинну свѣтоно́сное твое́ торжество́, блаже́нне, и отъ бѣ́дъ на́съ изба́ви.

Богоро́диченъ: Яко всѣ́хъ Предста́тельнице христіа́нъ, Богома́ти Всенепоро́чная Влады́чице, я́ко Ми́лостива, изба́ви отъ бѣ́дъ и искуше́ній стра́ждущія рабы́ Твоя́ и неду́гующія лю́тыхъ прегрѣше́ній ра́нами и болѣ́зньми тя́жкими одержи́мыя изврачу́й.

Свѣти́ленъ. Подо́бенъ: Посѣти́лъ ны́.

Ка́менная мета́нія премíрный исплето́ша тебѣ́ нетлѣ́нія вѣне́цъ, и кро́вныя ка́пли — багряни́цу ца́рску, нача́льниче му́чениковъ, изря́дный Стефа́не.

Богоро́диченъ: Свята́я Влады́чице Пречи́стая и еди́на Неискусобра́чная, спасе́ніе и упова́ніе, Ты́ умоли́ изъ Тебе́ рожде́ннаго Изба́вителя на́шего спасти́ мíръ отъ ле́сти, и бѣ́дъ, и скорбе́й.

На хвали́техъ стихи́ры на 4, гла́съ 4. Подо́бенъ: Яко до́бля.

Соше́дшеся, празднолю́бцы, та́йно,* моле́бную и честну́ю* пра́зднуемъ первому́ченика дне́сь па́мять,* въ се́й пріе́млюще исцѣле́нія* честны́хъ дарова́ній его́,* и возопіе́мъ:* достойнопѣ́тый му́чениче,* моли́ изба́витися отъ бѣ́дъ* творя́щимъ па́мять твою́. [Два́жды.]

Якоже степе́ни* и лѣ́ствица на небе́сный восхо́дъ,* ка́менная мета́нія бы́ша тебѣ́,* на ню́же возше́дъ, ви́дѣлъ еси́* стоя́ща Го́спода одесну́ю Отца́,* тебѣ́ тезоимени́тъ вѣне́цъ простира́юща* десни́цею живоно́сною.* Его́же близъ я́ко добропобѣ́дникъ предстои́ши* и страда́льцевъ верхо́вный.

Духо́вною благода́тію* просвѣти́въ помышле́ніе,* зра́комъ я́ко а́нгелъ яви́лся еси́, Стефа́не,* облиста́вшу тѣлеси́* вну́треннею свѣ́тлостію* и зарю́ душе́вную явля́ющу ви́дящимъ,* ея́же ра́ди получи́лъ еси́ и свѣ́та зрѣ́ніе,* небесе́мъ тебѣ́ пресла́вно отве́рзеннымъ,* нача́ло му́чениковъ и похвало́.

Сла́ва, гла́съ то́йже, самогла́сенъ:

Стефа́нъ, до́брое нача́ло му́чениковъ, испо́лненъ благода́ти и си́лы, творя́й зна́менія и чудеса́ ве́лія въ лю́дехъ, отъ беззако́нныхъ ка́меніемъ побіе́нъ быва́ше, но просвѣти́ся, я́ко а́нгелъ, и зри́тъ сла́ву Тебе́, распе́ншагося на́съ ра́ди, одесну́ю Си́лы, и Ду́хомъ благода́ти на небеса́ взима́шеся. И сего́ ра́ди съ ликостоя́ніи а́нгельскими водворя́яся, мо́лится спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не Возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

На стихо́внѣ окто́иха. Сла́ва, гла́съ 5. Кипріа́ново:

Первому́чениче апо́столе и перводіа́коне, две́рь му́чениковъ и сла́ва пра́ведныхъ, апо́столовъ похвало́, ты́ небеса́ ви́дѣлъ еси́ отве́рста, на суди́щи стоя́, и Сы́на Бо́жія, одесну́ю стоя́ща Неви́димаго Отца́. Тѣ́мже, я́ко а́нгелъ, возсія́въ лице́мъ, въ ра́дости взыва́лъ еси́ о побива́ющихъ тя́ ка́меніемъ: не поста́ви и́мъ грѣха́ сего́. И ны́нѣ испроси́ отъ любве́ хва́лящимъ тя́ очище́ніе грѣхо́въ и ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Ра́дуйся.

Избавле́ніе на́съ ра́ди и цѣ́ну вели́кую — пречи́стую кро́вь Твою́ изво́лилъ еси́ да́ти, Безгрѣ́шне Христе́ мо́й, всѣ́мъ хотя́ спасе́ніе получи́ти. Тѣ́мже Тя́ зря́щи пригвожде́на Ма́ти Твоя́, рыда́ющи, власы́ терза́ше Си́, глаго́лющи: Ча́до, Агнче Всенепоро́чный, мíръ хотя́ изба́вити честно́ю Твое́ю Кро́вію, отъ о́чію Мое́ю ка́ко за́йде, Спа́се, незаходи́мое Со́лнце, и́же всѣ́мъ подая́й просвѣще́ніе, и ми́ръ, и ве́лію ми́лость?


НА ЛИТУРГІИ,

Блаже́нна окто́иха, и апо́стола, пѣ́снь 3-я, на 4. Проки́менъ, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Апо́столъ Дѣя́ній, зача́ло 17. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, и́бо и́стину Твою́ въ це́ркви святы́хъ. [Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Матѳе́я, зача́ло 87. Прича́стенъ: Во всю́ зе́млю изы́де вѣща́ніе и́хъ, [и въ концы́ вселе́нныя глаго́лы и́хъ].

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 27 об. – 33.

/ Къ оглавленію раздѣла /


Наверхъ / Къ титульной страницѣ

0