Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа во 2-й де́нь.
Слу́жба свята́го блаже́ннаго Васи́лія, Христа́ ра́ди юро́диваго, Моско́вскаго чудотво́рца.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 8. Подо́бенъ: О, пресла́внаго чудесе́!

Богоблаже́нне Васи́ліе,* возненави́дѣвъ вре́менная мíра сего́,* умертви́лъ еси́ вся́ плотскíя сла́дости,* богоуго́дно подвиза́яся,* на высоту́ восте́клъ еси́ добродѣ́телей* и, вра́жія ко́зни попра́въ,* побѣ́ды вѣне́цъ воспрія́лъ еси́,* отъ земли́ преста́вився.* И ны́нѣ на небеси́ съ ли́ки пра́ведныхъ веселя́ся,* моли́ спасти́ся душа́мъ на́шимъ.

Богодохнове́нне Васи́ліе,* потща́лся еси́ побѣди́ти сѣ́ти лука́ваго,* испо́лненныя невѣ́рія и сла́бости* и всѣ́хъ преле́стныхъ мíра сего́.* Дарова́ній Свята́го Ду́ха сподо́бився,* показа́лся еси́ юро́дъ мíру, но Христу́ му́дръ:* подвиза́лся еси́ Ца́рства ра́ди небе́снаго,* е́же и дости́глъ еси́.* И ны́нѣ со а́нгелы ликовству́я,* моли́ спасти́ся душа́мъ на́шимъ.

Сла́ва, гла́съ то́йже, самогла́сенъ:

Возлюби́лъ еси́ небе́сная и, возненави́дѣвъ земна́я, ме́рзка сотвори́лъ еси́ я́, тѣ́снымъ и ско́рбнымъ путе́мъ ше́ствуя, побѣди́лъ еси́ стра́сти мíра сего́. Въ терпѣ́ніи и страда́ніи хра́бръ яви́вся, разори́лъ еси́ вся́ ко́зни вра́жія и поче́рплъ еси́ жела́ніемъ исто́чника благода́тнаго, и бы́сть благода́ть Бо́жія въ се́рдцы твое́мъ, и въ соверше́нная предложе́нія во́ли Бо́жіи себе́ предложи́лъ еси́. Преблаже́нне Васи́ліе, моли́ спасти́ся душа́мъ на́шимъ.

И ны́нѣ, богоро́диченъ, [гла́съ то́йже:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ чистоты́,* чу́дне Васи́ліе, бы́лъ еси́,* пи́щи мно́гія, и добролю́бія тѣле́снаго,* и ри́знаго одѣя́нія не восхотѣ́лъ еси́,* стра́хомъ Бо́жіимъ стяжа́въ безмо́лвіе.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

До́мъ Ду́ха Свята́го,* свя́те Васи́ліе, бы́лъ еси́,* до́мъ роди́телей и всѣ́хъ земны́хъ веще́й* отъ младе́нчества возненави́дѣвъ* бу́дущія ра́ди жи́зни.

Сти́хъ: Насажде́ни въ до́му Госпо́дни* во дво́рѣхъ Бо́га на́шего процвѣту́тъ.

До́мъ Христо́ва благодаре́нія,* богодохнове́нне, бы́лъ еси́,* бога́тство сокрове́нно въ души́ имѣ́лъ еси́,* возсія́ луча́ свѣтла́ благода́ти* въ мы́сли твое́й.

Сла́ва, гла́съ 5:

Приклони́лъ еси́ вы́ю твою́ отъ ю́ности къ Боже́ственному зва́нію, преблаже́нне Васи́ліе, и, взе́мъ яре́мъ спаси́тельнаго словесе́ Христа́ Бо́га на́шего, расто́ргнулъ еси́ сѣ́ти вра́жія и попра́лъ еси́ всю́ горды́ню его́. Ра́зумъ непреле́стенъ стяжа́въ, посредѣ́ мо́лвъ сохрани́лъ еси́ себе́, живы́й съ до́льними, и ходя́й пло́тію, и, ступа́яй ду́хомъ, ви́дѣлъ еси́ го́рняя, и ско́ро восте́клъ еси́ къ вѣнцу́ вы́шняго зва́нія. Моли́ спасти́ся душа́мъ на́шимъ.

[И ны́нѣ, богоро́диченъ, гла́съ то́йже:

Тебѣ́ мо́лимся, я́ко Бо́жіей Ма́тери, Благослове́нная: моли́ о спасе́ніи ду́шъ на́шихъ.]

Тропа́рь, гла́съ 8:

Житіе́ твое́, Васи́ліе, нело́жное, и чистота́ нескве́рна, Христа́ ра́ди тѣ́ло твое́ изнури́лъ еси́ посто́мъ и бдѣ́ніемъ, и мра́зомъ и теплото́ю со́лнечною, и слото́ю и дожде́внымъ о́блакомъ, и просвѣти́ся лице́ твое́, я́ко со́лнце, и ны́нѣ прихо́дятъ къ тебѣ́ Россíйстіи наро́ди, цари́ же и кня́зи, и вси́ лю́діе, прославля́юще свято́е твое́ успе́ніе. Тѣ́мъ Христа́ Бо́га моли́, да изба́витъ ны́ отъ ва́рварскаго плѣне́нія и междоусо́бныя бра́ни и ми́ръ мíрови пода́стъ и душа́мъ на́шимъ ве́лію ми́лость.

[Сла́ва, и ны́нѣ, богоро́диченъ, гла́съ то́йже:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 2. Подо́бенъ: Егда́ отъ дре́ва.

Егда́ на́йде на тя́ Боже́ственное раче́ніе, Васи́ліе чу́дне, тогда́ мірскíй мяте́жъ оттря́слъ еси́, усе́рдно послѣ́довалъ еси́ Христу́, ско́рбнымъ и тѣ́снымъ путе́мъ ше́ствуя, и бы́лъ еси́ земны́й а́нгелъ, и яви́лся еси́ небе́сный человѣ́къ. Преста́вився къ вѣ́чнымъ оби́телемъ, предстои́ши въ ра́дости святы́хъ Христу́ Бо́гу на́шему, Его́же со дерзнове́ніемъ моли́ о душа́хъ на́шихъ. [Два́жды.]

Егда́ озари́лся еси́ Ду́хомъ Боже́ственнымъ, тогда́ мíра вся́ кра́сная отве́рглъ еси́, ничто́же на тѣ́лѣ твое́мъ носи́лъ еси́ отъ тлѣ́нныхъ одѣя́ній, нагото́ю тѣле́сною Христу́ рабо́тая, жела́я блаже́нства вѣ́чнаго, презрѣ́лъ еси́ до́льняя. И ны́нѣ предстои́ши Христу́ Бо́гу на́шему во сла́вѣ со святы́ми а́нгелы, Его́же со дерзнове́ніемъ моли́ о душа́хъ на́шихъ.

Егда́, преблаже́нне Васи́ліе, совле́клся еси́ тлѣ́нныхъ одѣя́ній, тогда́ обле́клся еси́ въ но́ваго человѣ́ка, обновле́на Христо́вою кро́вію, отлага́я ве́тхая мудрова́нія, за́дняя забыва́я, на пре́дняя простира́яся, и собра́лъ еси́ бога́тство духо́вное, и прине́слъ еси́ нача́тки трудо́въ твои́хъ Христу́ Бо́гу на́шему, Его́же со дерзнове́ніемъ моли́ о душа́хъ на́шихъ.

Ины стихи́ры, гла́съ 5. Подо́бенъ: Ра́дуйся.

Ра́дуйся, богому́дре Васи́ліе, Свята́го Ду́ха дарова́ніе вни́де въ помышле́ніе твое́, и ве́сь свобо́денъ бы́лъ еси́ о Го́сподѣ, всѣ́хъ земны́хъ веще́й житія́ сего́ су́етнаго. Предспѣ́яй добродѣ́тельнымъ по́двигомъ и терпѣ́ніемъ, юро́дственное жи́тельство избра́лъ еси́, измѣни́въ тлѣ́нная упова́ніемъ на Бо́га, жела́я сподо́битися Ца́рства небе́снаго. Хране́ніе положи́лъ еси́ усто́мъ твои́мъ и, ходя́ путе́мъ за́повѣдей Госпо́днихъ, побѣди́лъ еси́ бра́нь непрія́зненну, чи́стъ по́мыслъ всегда́ имѣ́лъ еси́, вѣ́ры ра́ди и любве́ Бо́жія, и, пріе́мъ возме́здіе, со а́нгелы селе́ніе, моли́ спасти́ся душа́мъ на́шимъ. [Два́жды.]

Ра́дуйся, преблаже́нне Васи́ліе, и́же во младе́нствѣ благоче́стія дости́гнувъ, погаси́лъ еси́ пла́мень по́хотный и, свѣ́томъ разу́мнымъ отъ Бо́га просвѣ́щся, тща́ніе прилѣ́жно во умѣ́ имѣ́лъ еси́ дне́, хотя́щаго бы́ти, и, премѣни́въ тлѣ́нная наде́ждею бу́дущихъ бла́гъ, до́мъ и жили́ще Ду́ха Свята́го, богому́дре, бы́лъ еси́, садя́ сады́ добры́ въ души́, дѣ́тели житія́ святы́хъ оте́цъ соверша́я, и са́дове твои́ благоуго́дны Го́сподеви, Иже и по сме́рти яви́ тя́ на́мъ исто́чника исцѣле́ній. И ны́нѣ со а́нгелы на небеси́ ликовству́я, моли́ спасти́ся душа́мъ на́шимъ.

Ра́дуйся, богоблаже́нне Васи́ліе, возненави́дѣвъ житіе́ мíра сего́, разже́гся любо́вію Госпо́днею, я́ко огне́мъ, попали́лъ еси́ по́мыслы гну́сныя, и вся́ у́зы ны́нѣшняго житія́ преле́стныя расто́ргнулъ еси́, и благи́ми искуше́ніи да́ра Христо́ва ду́шу очи́стилъ еси́, я́ко зла́то въ горни́лѣ. И на земли́ я́ко а́нгелъ бы́лъ еси́, подо́бенъ серафи́му, обрѣ́тъ би́сера добра́ и избра́нна небе́снаго и прода́въ имѣ́нія твоя́ вся́, Того́ еди́наго стяжа́лъ еси́ въ мы́сли твое́й, и, благода́ть пріе́мь просвѣти́тельную, моли́ спасти́ся душа́мъ на́шимъ.

Сла́ва, гла́съ 8:

Человѣ́че Бо́жій, му́же жела́ній духо́вныхъ, Ца́рствія наслѣ́дниче, не премолчи́ за ны́ вопи́ти ко Го́споду, преблаже́нне Васи́ліе, и къ ра́цѣ моще́й твои́хъ притека́ющихъ да́ра исцѣле́нія сподо́би. И моли́ ИМПЕРАТОРУ на́шему дарова́ти на враги́ побѣ́ду и одолѣ́ніе и на́мъ, творя́щимъ па́мять твою́, грѣхо́въ проще́ніе, и душа́мъ спасе́ніе, и мíрови ми́ръ и ве́лію ми́лость.

И ны́нѣ, богоро́диченъ:

[Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.]

Вхо́дъ. Проки́менъ дне́. Та́же пареміи́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Иже по благода́ти Бо́жіи, да́ннѣй ти́, преблаже́нне Васи́ліе, я́ко прему́дрый худо́жникъ, основа́ніе положи́въ вѣ́ру, добродѣ́тельми на го́ру безстра́стія возше́лъ еси́, мра́къ, и мглу́, и бу́рю отрази́въ, прему́дростію вы́шнею ве́сь обле́клся еси́, на высоту́ возше́дъ, къ свѣ́ту преложи́лся еси́. И въ наро́дѣ живы́й, я́ко въ столпѣ́ пребыва́я, и ничто́же восхотѣ́въ мíра сего́, ниже́ на тѣ́лѣ твое́мъ что́ отъ тлѣ́нныхъ носи́въ, а́нгелы удиви́лъ еси́ и человѣ́ки ужаси́лъ еси́, бѣ́сы посрами́лъ еси́. И ны́нѣ во свѣ́тѣ пребыва́я со святы́ми а́нгелы, моли́ спасти́ся душа́мъ на́шимъ.

Устрани́вся Го́спода ра́ди отъ всѣ́хъ земны́хъ, отлучи́лся еси́ роди́телей и сро́дникъ, я́ко незна́емь, отъ Свята́го Ду́ха утѣше́ніе воспріи́мъ и безтѣле́снымъ въ тѣлеси́ ревнова́въ, очище́но тѣ́ло и просвѣще́нъ у́мъ имѣ́я, въ боголю́біе чистоты́ прише́лъ еси́ и безлѣ́ностно Христу́ послѣ́довалъ еси́, Ему́же въ вы́шнихъ, преблаже́нне, со а́нгельскими чи́нми предстоя́, моли́ изба́витися на́мъ отъ лука́вства вра́жія и спасти́ся душа́мъ на́шимъ.

Ду́хомъ Бо́жіимъ наставля́емь, богоблаже́нне Васи́ліе, мірска́я треволне́нія оттря́слъ еси́ и возненави́дѣлъ еси́ любве́ ра́ди Бо́жія. Вся́ жите́йская усе́рдно оста́вивъ и напра́вивъ но́гу твою́ на богоуго́дную стезю́, прите́клъ еси́ ко блаже́нному безстра́стію. Сто́лпъ крѣ́пости отъ лица́ вра́жія бы́лъ еси́ и, я́ко небе́сный человѣ́къ и земны́й а́нгелъ, свѣти́льниче неугаса́емый, отъе́млеши неду́ги страсте́й и болѣ́зни исцѣля́еши приходя́щимъ ти́ съ вѣ́рою, моли́ о спасе́ніи ду́шъ на́шихъ.

Сла́ва, гла́съ 5:

Пріиди́те, Россíйстіи собо́ри христіа́нстіи, припаде́мъ къ ра́цѣ Васи́лія чу́днаго и возопіе́мъ ему́ съ весе́ліемъ: ра́дуйся, я́ко отъ младе́нства добру́ лѣ́ствицу обрѣ́лъ еси́, отъ всего́ земна́го и те́мныхъ страсте́й прило́га, безъ преткнове́нія къ боже́ственному Свѣ́ту прилага́яся, ско́рбнымъ и тѣ́снымъ путе́мъ Христо́ви ше́ствуя. Ра́дуйся, преблаже́нне Васи́ліе, си́лою Христо́вою ди́венъ яви́лся еси́ въ житіи́ твое́мъ, я́коже отъ чре́ва ма́терня изше́лъ еси́, та́ко и въ наро́дѣ на́гъ ходя́, не срамля́яся, мра́за и жже́нія со́лнечнаго никогда́же уклоня́яся, мудрѣ́йшимъ юро́дствомъ, и терпѣ́ніемъ, и страда́ніемъ Христу́ послѣ́довалъ еси́. Ра́дуйся, богодохнове́нне Васи́ліе, обрѣты́й боговидѣ́нія восхо́дъ, побѣди́лъ еси́ полки́ бѣсо́вскія, я́ко а́нгелъ яви́лся еси́ въ житіи́ твое́мъ. И кто́ мо́жетъ изчести́ чудеса́ твоя́? Въ да́льнихъ бо страна́хъ по мо́рю, я́ко по су́ху, ходя́ща ви́дяху тя́. Ра́дуйся, досточу́дне Васи́ліе, вся́ Христо́ва уче́нія дѣ́лы испо́лнилъ еси́, и по преставле́ніи просія́ свѣ́тлость житія́ твоего́, и воспрія́лъ еси́ бога́тство благода́тное, мíръ просвѣща́я чудесы́. Моли́ся прилѣ́жно Христу́ Бо́гу на́шему дарова́ти Правосла́вному ИМПЕРАТОРУ на́шему ми́ръ и здра́віе, и лѣ́тъ умноже́ніе, во утвержде́ніе вѣ́ры христіа́нскія, и на сопроти́вныя побѣ́ды, и лю́ди ца́рствія ЕГО безпеча́льны сотвори́ти, и спасти́ся душа́мъ на́шимъ.

И ны́нѣ, богоро́диченъ:

Хра́мъ и Две́рь еси́, [Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ].

На стихо́внѣ стихи́ры, гла́съ 8. Подо́бенъ: Что́ ва́съ нарече́мъ?

Что́ тя нарече́мъ, Васи́ліе чу́дне?* Ангела ли? Тѣ́ла бо отврати́лся еси́.* Херуви́ма ли? Яко на тебѣ́ почи́лъ е́сть Христо́съ.* Серафи́ма ли? Яко непреста́нно просла́вилъ еси́ Христа́.* Си́лы ли? Дѣ́йствуеши бо исцѣле́нія.* Мно́га ти́ имена́* и бо́льша дарова́нія,* непреста́нно моли́ спасти́ ду́ши на́ша.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Что́ тя нарече́мъ, Васи́ліе преблаже́нне?* Нагото́ю тѣ́ла послѣ́довалъ еси́ Христу́,* мудрѣ́йшимъ юро́дствомъ прехи́трилъ еси́ діа́вола,* сего́ связа́я плени́цами сле́зъ твои́хъ* и бога́тство нося́ въ души́ некра́домо,* вся́ Христо́ва уче́нія дѣ́ломъ испо́лнилъ еси́.* И ны́нѣ на небесѣ́хъ лику́я,* непреста́нно моли́ Христа́ Бо́га* спасти́ ду́ши на́ша.

Сти́хъ: Насажде́ни въ дому́ Госпо́дни* во дво́рѣхъ Бо́га на́шего процвѣту́тъ.

Что́ тя имену́емъ, Васи́ліе преблаже́нне?* Ангельски бо на земли́* пожи́лъ еси́ безвеще́ственно,* ничто́же имѣ́яй, вся́ содержа́лъ еси́.* Яви́лся еси́ зна́емь, въ да́льныхъ страна́хъ чудодѣ́йствуя,* и Россíйскую зе́млю* чуде́съ заря́ми просвѣти́лъ еси́.* Непреста́нно моли́ Христа́ Бо́га* спасти́ ду́ши на́ша.

Сла́ва, гла́съ 6. Самогла́сенъ:

Пріиди́те, ца́ріе, и святи́тели, и кня́зи правосла́вніи, и вси́ Россíйстіи собо́ри христіа́нстіи, притеце́мъ къ ра́цѣ Васи́лія чу́днаго и возопіе́мъ любо́вію: о преблаже́нне Васи́ліе! Непреста́нно воздѣжи́ ру́цѣ за ны́ ко Го́споду, моля́ся за ИМПЕРАТОРА Правосла́внаго и за вся́ правосла́вныя христіа́ны, и за лю́ди Россíйскія страны́, изба́витися гра́ду на́шему и всѣ́мъ страна́мъ правосла́вія отъ гла́да и губи́тельства, и отъ наше́ствія иноплеме́нникъ, и междоусо́бныя бра́ни и дарова́ти ИМПЕРАТОРУ Правосла́вному [и́мярекъ] на враги́ побѣ́ду и одолѣ́ніе, и Це́рквамъ соедине́ніе, и мíру устрое́ніе, и душа́мъ на́шимъ ве́лію ми́лость.

И ны́нѣ, богоро́диченъ:

[Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь [свята́го], два́жды. Сла́ва, и ны́нѣ, богоро́диченъ.

По 1-й стихоло́гіи сѣда́ленъ, гла́съ 8:

Яви́вся чу́денъ въ терпѣ́ніи твое́мъ, вся́чески Христу́ угоди́лъ еси́, преблаже́нне Васи́ліе, му́дрою мы́слію утверди́лъ еси́ ду́шу твою́, порабо́тивъ плотска́я мудрова́нія ду́ху, избра́въ до́брая, Бо́га ра́ди тружда́тися, му́жески глаго́лалъ еси́: а́ще я́ра зима́, но сла́докъ ра́й, болѣ́зненно тружда́тися, но блаже́нно воспрія́тіе. Тѣ́мже, преблаже́нне Васи́ліе, моли́ Христа́ Бо́га спасти́ ду́ши на́ша. [Два́жды]

Сла́ва, и ны́нѣ, богоро́диченъ:

Богоро́дице Цари́це, правосла́вныхъ похвало́, ерети́ческая шата́нія разори́ и ли́ца и́хъ посрами́, не покланя́ющіяся, Пречи́стая, о́бразу Твоему́ потреби́. Мы́ же, вѣ́рніи раби́, Богома́ти, Сы́на Твоего́, покланя́емся о́бразу Твоему́ и мо́лимъ Тя́, въ де́нь су́дный изба́вити на́съ муче́нія и сподо́бити Ца́рствія небе́снаго, Ма́ти Христа́ Бо́га.

По 2-й стихоло́гіи сѣда́ленъ, гла́съ 2:

Сла́вы и бога́тства не восхотѣ́въ, вся́ ни во что́же вмѣни́лъ еси́, преблаже́нне Васи́ліе, да Христа́ пріобря́щеши, Его́же и получи́лъ еси́ мно́гими труды́ и терпѣ́ніемъ. И ны́нѣ зри́ши, и́хже о́ко не ви́дѣ, и у́хо не слы́ша, и на се́рдце человѣ́ку не взы́де, я́же тебѣ́ угото́ва Бо́гъ, возлюби́вшему Его́. Тѣ́мже, му́дре, мо́лимъ тя́: моли́ Христа́ Бо́га спасти́ ду́ши на́ша. [Два́жды]

Сла́ва, и ны́нѣ, богоро́диченъ:

Чу́дная Цари́це Богоро́дице, Пречи́стая Дѣ́во благослове́нная и отъ родо́въ избра́нная земны́хъ на спасе́ніе, ду́шу мою́, во грѣсѣ́хъ вся́ческихъ лю́тѣ обурева́ему, наста́ви на стезю́ покая́нія, да воспою́ Тя, ра́дуяся: благослове́на Ты́ въ жена́хъ, Всенепоро́чная Влады́чице.

[Велича́ніе:

Ублажа́емъ тя́, святы́й блаже́нный Васи́ліе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 5:

Духо́вно торжеству́емъ въ па́мять чу́днаго Васи́лія: се́й бо а́нгелы удиви́ и человѣ́ки пра́здновати устро́и, Христа́ сла́вити, прославля́ющаго святы́я Своя́, просла́ви бо его́ Госпо́дь сла́вою, ю́же зря́тъ вси́ святíи, сея́ сла́вы сподо́бися получи́ти. Тѣ́мъ, моля́щеся, ему́ глаго́лемъ: не забу́ди на́съ, творя́щихъ святу́ю па́мять твою́, да зове́мъ ти́: ра́дуйся, прему́дре Васи́ліе, покры́вый твоя́ добродѣ́тели мудрѣ́йшимъ юро́дствомъ Христа́ ра́ди; ра́дуйся, я́ко терпѣли́вно Христу́ рабо́тая, сосу́домъ пло́ти твоея́, на́гъ сы́й, прія́лъ еси́ вѣне́цъ нетлѣ́нный; ра́дуйся, Васи́ліе, хвала́мъ досто́йный. [Два́жды]

Слава, и нынѣ, богородиченъ:

Богоро́дицѣ возопіе́мъ, вѣ́рніи, любо́вію: ра́дуйся, Бо́жіе селе́ніе; ра́дуйся, па́дшихъ воста́ніе; ра́дуйся, ме́ртвыхъ воскресе́ніе; ра́дуйся, вѣ́рныхъ спасе́ніе; ра́дуйся, ненаде́жныхъ наде́ждо извѣ́стная; ра́дуйся, святы́хъ сла́ва и весе́ліе; ра́дуйся, а́нгеловъ торжество́ непремо́лчное; ра́дуйся, Обра́дованная, Госпо́дь съ Тобо́ю и Тебе́ ра́ди съ на́ми.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Отъ ю́ности, преблаже́нне, сосу́дъ избра́нъ яви́лся еси́ и жили́ще Свята́го Ду́ха бы́лъ еси́, крѣ́постію ума́ непоколеби́мь пребы́лъ еси́ и надъ страстьми́ воцари́лся еси́, великоду́шне Васи́ліе. Презрѣ́въ плотска́я одѣя́нія, процвѣ́лъ еси́, я́ко кри́нъ се́льный, одѣ́явся добродѣ́тельми, я́ко ри́зою свѣ́та, яви́лся еси́ крѣпкостоя́теленъ проти́ву зи́мныя я́рости и со́лнечнаго опале́нія и нагото́ю тѣ́ла твоего́ послѣ́довалъ еси́ Христу́ Бо́гу на́шему, Его́же и Кре́стъ на ра́му поне́слъ еси́, безпреста́ни сраспина́яся Ему́. Того́ моли́ ми́ръ вселе́ннѣй дарова́ти и душа́мъ на́шимъ ве́лію ми́лость.

Кано́нъ Богоро́дицы со ирмосо́мъ на 6. И свята́го два́ кано́на, на 8.

[Кано́нъ] пе́рвый, гла́съ 8.
Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль, пѣ́снь же воспѣва́шеся: Го́сподеви пои́мъ, сла́вно бо просла́вися.

Одѣя́йся свѣ́томъ, я́ко ри́зою, одѣ́я тя́, Васи́ліе чу́дне, ри́зою безстра́стія. Тѣ́мже взима́яся ду́хомъ къ Боже́ственному видѣ́нію и озари́вся благода́тію Бо́жія про́мысла, стра́ненъ показа́лся еси́ отъ всѣ́хъ сро́дникъ и зна́емыхъ, и пресели́лся еси́ къ сро́дству небе́сному, и ны́нѣ живе́ши жи́знь безконе́чную.

Показа́лся еси́ Россíйской земли́ свѣти́ло вели́кое, просвѣща́я на́съ свѣ́томъ твои́хъ добродѣ́телей. И кто́ мо́жетъ изчести́ мно́гія по́двиги и труды́ твоя́, и всено́щная стоя́нія, и ины́хъ мно́жества къ си́мъ добродѣ́телей, и́мже возме́здіе отъ Бо́га прія́лъ еси́?

Ума́ человѣ́ча превзы́де чи́нъ, ди́вное на земли́ житіе́ пожи́лъ еси́, бдя́, и моля́ся, и тружда́яся, и на́гъ на земли́ скита́яся, не имѣ́я гдѣ́ главы́ подклони́ти, во все́мъ животѣ́ твое́мъ. И сего́ ра́ди всели́лся еси́ во оби́тели небе́сныя. Мно́ги бо, — рече́ Госпо́дь, — оби́тели въ дому́ Отца́ Моего́, по мѣ́рѣ добродѣ́телей.

Богоро́диченъ: Ко́е спасе́ніе и́но таково́, я́коже Ты́, Пречи́стая Богоро́дице, крѣ́пкое поможе́ніе и те́плое заступле́ніе? Изба́ви ду́шу мою́ отъ сѣ́ти діа́воли, Ты́ бо еси́ всѣ́хъ земны́хъ спасе́ніе, спаси́ и мене́, лю́тѣ потопля́ема волна́ми грѣхо́вными, моли́твами уго́дника Твоего́ Васи́лія.

Другíй кано́нъ, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Возлюби́вый усе́рдно Го́спода и жела́тельно подвиза́яся дости́гнути Ца́рства небе́снаго, просвѣти́лся еси́ Боже́ственною благода́тію. Те́мныя о́блаки души́ моея́ разгони́, и у́мъ ми́ озари́, и отве́рзи ми́ устнѣ́ къ пѣ́нію, восхвали́ти тя́, преблаже́нне Васи́ліе.

Анто́ній Вели́кій рече́: имѣ́ющимъ здра́въ у́мъ не тре́бовати писа́нія; на тебѣ́ же сбы́стся, прему́дре Васи́ліе. Главу́ твою́ всегда́ имѣ́я къ небеси́ возведе́ну, очи́ма же го́рняя зря́, ума́ чистото́ю тща́лся еси́ ко Ада́му и къ вѣ́рному Авраа́му.

Стра́ненъ сро́дникъ твои́хъ бы́лъ еси́, и бли́жнихъ любве́ чу́ждь, и во твое́мъ язы́цѣ, я́ко иноязы́ченъ, во ино́мъ же въ ра́зумѣ сѣдя́й. И ничто́же отъ земны́хъ одѣя́ній на тѣ́лѣ твое́мъ носи́лъ еси́, я́коже Ада́мъ, до́ндеже не ви́дѣлъ еси́ обнаже́нія души́ твоея́, ниже́ безобра́зіе пло́ти твоея́ позна́лъ еси́.

Иже себе́ позна́вый, пости́глъ еси́ стра́хъ Госпо́день. Разжже́ніе плотско́е хла́домъ Свята́го Ду́ха угаси́въ, всегда́ душе́вныма очи́ма на у́мныя си́лы взира́ти изво́лилъ еси́ и преплы́лъ еси́ вели́кую сію́ жите́йскую пучи́ну жесто́кимъ путе́мъ, богоблаже́нне.

Богоро́диченъ: Влады́чице, Ма́ти Бо́жія Пречи́стая, Благослове́нная и Пренепоро́чная, души́ моея́ стру́пы исцѣли́ и стра́сти плотскíя умертви́, у́мъ мо́й отъ вся́каго вре́да вра́жія и напа́стей изми́, Богоро́дице.

Катава́сія: Кре́стъ начерта́въ, Моисе́й...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Ды́мъ, и пра́хъ, и сѣ́нь вмѣни́лъ еси́ кра́сная вѣ́ка сего́ и ничто́же отъ любве́ Христо́вы па́че изво́лилъ еси́, Сего́ жела́я насы́титися сла́вы и весе́лія присносу́щнаго, въ ня́же жела́ютъ а́нгели прини́кнути. И, си́хъ ра́дости получи́въ, предстои́ши во свѣ́тѣ Святѣ́й Тро́ицѣ, ра́дуяся, Ейже моли́ся за ны́, преблаже́нне Васи́ліе.

Воцари́вся надъ страстьми́, великоду́шне Васи́ліе, одолѣ́лъ еси́ плотско́е жела́ніе, и яви́лся еси́ чистоты́ сокро́вище духо́вное, и сего́ ра́ди прія́лъ еси́ та́влу бѣлу́, на не́йже напи́сано и́мя но́во, ди́вно, невѣ́домо. И не бы́сть на души́ твое́й скве́рны, ни вра́ски: убѣли́лъ бо еси́ ю́ то́ки сле́зъ твои́хъ, и ны́нѣ непреста́нно ра́дуешися.

Вѣ́ру неоску́дну въ души́ имѣ́я, преблаже́нне, да́нный тебѣ́ тала́нтъ трудолю́бно воздѣ́лалъ еси́ и прія́лъ еси́ вла́сть надъ десятію́ градо́въ добродѣ́телей, бѣ́сы прогоня́ти, прокаже́нныя очища́ти, разсла́бленныя бы́стро ходи́ти, слѣпы́я просвѣща́ти, и усугу́би да́ръ всѣ́мъ исцѣле́нія, творя́щимъ святу́ю па́мять твою́.

Богоро́диченъ: Азъ, Дѣ́во Свята́я Богоро́дице, наде́жду имѣ́я на Тя́, спаса́юся. Разгони́, Влады́чице, враги́ души́ моея́ и напра́ви мя́ на пу́ть жи́зненный, да, спа́сся, вопію́ Ти: ра́дуйся, Помо́щнице мíра, наде́жно христіа́нская; ра́дуйся, Госпо́дь съ Тобо́ю, Благослове́нная.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Любо́вію Бо́жіею угаси́лъ еси́ любо́вь роди́телей, ме́чь же духо́вный всегда́ воздвиза́я, и́мже во́лю хотѣ́нія твоего́ отсѣца́я, утверди́лъ еси́ стопы́ ра́зума твоего́ на ка́мени любве́ Христо́вы.

Иже о твое́й пло́ти не пе́кся, жи́знь мíра сего́ возненави́дѣлъ еси́ и о плотски́хъ небре́глъ еси́, всегда́ подвиза́яся у́мъ чи́стъ къ Бо́гу предста́вити. И прине́слъ еси́ себе́, я́ко непоро́чну и благопрія́тну Вели́кому Архіере́ю же́ртву.

Еже стяжа́лъ еси́ отъ младе́нства вѣ́рою несумнѣ́нною смиренному́дріе и соверше́нную къ Бо́гу любо́вь и, вся́ чу́вства порабо́тивъ, я́ко безстра́стенъ бы́лъ еси́, у́мъ отъ тва́ри возвы́сивъ, лицу́ же Госпо́дню ду́шу предста́вилъ еси́.

Богоро́диченъ: Спаси́ мя, Ма́ти Бо́жія, спасе́нія нача́ло мíру я́вльшися, и изба́ви молвы́, и нечи́стыхъ страсте́й, и вся́кія проти́вныя ско́рби, да сла́влю Тя́, Богоро́дице.

Сѣда́ленъ, гла́съ 8. Подо́бенъ: Яко Всенепоро́чная.

Отъ земны́хъ на небе́сная помы́сливъ и дѣ́ломъ соверши́въ, кра́сная мíра сего́ во уме́ты вмѣни́лъ еси́, Христа́ ра́ди юро́дъ бы́въ на земли́, терпѣ́ніемъ и жесто́кимъ подвиза́ніемъ сы́нъ свѣ́та показа́лся еси́ и въ Ца́рствіи небе́снѣмъ свѣ́тло зри́ши Святу́ю Тро́ицу, преблаже́нне Васи́ліе. Юже моли́ согрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва, другíй сѣда́ленъ, гла́съ 4:

Бы́въ до́мъ Бо́жій и жили́ще Свята́го Ду́ха, блаже́нне Васи́ліе, це́рковь тѣ́ла твоего́ непоро́чну соблю́лъ еси́, и, прише́дъ, всели́ся въ тя́ Оте́цъ, и Сы́нъ, и Святы́й Ду́хъ, и дарова́ тебѣ́ терпѣ́ніе, и му́жество, и хра́брость духо́вную, и несму́тною мы́слію по Боже́ственному пути́ ше́ствовати. И, пріе́мъ да́ръ исцѣле́ній, моли́ Христа́ Бо́га спасти́ ду́ши на́ша.

И ны́нѣ, богоро́диченъ:

Красотѣ́ Твое́й, Богора́дованная, арха́нгелъ Гавріи́лъ предстоя́, дивля́шеся и вопія́ше Ти́: О, Невѣ́сто неискусобра́чная, Отрокови́це небла́зненная! Ка́ко Ти́ изреку́ пре́жде вѣ́къ сокрове́нную та́йну? Ты́ бо еси́ небе́снымъ и земны́мъ соедине́ніе. Ра́дуйся, Обра́дованная, Госпо́дь съ Тобо́ю.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́!

Бы́лъ еси́ подъ влады́кою учине́нъ Христо́ва повелѣ́нія, и повелѣва́я рабу́ своему́, тѣ́лу, сотвори́ти слу́жбу свою́, Христу́ рабо́тая, и покори́ уму́, влады́цѣ, страстны́я по́мыслы, и бы́лъ еси́ сы́нъ послуша́нія, вопія́ Христу́: си́лѣ Твое́й сла́ва, Человѣколю́бче.

Имѣ́ющимъ цѣ́лъ у́мъ не тре́бовати писа́нія, — рече́ вели́кій Анто́ній. На тебѣ́ сіе́ сбы́стся, прему́дре Васи́ліе: не учи́вся кни́гамъ, вся́ разумѣ́лъ еси́ Боже́ственная Писа́нія, непреста́нно поя́ Христу́: си́лѣ Твое́й сла́ва, Человѣколю́бче.

Во гра́дѣ, я́ко въ пусты́ни, живы́й, преблаже́нне Васи́ліе, и ни отъ чего́же смуща́яся, но вѣнча́лся еси́ ра́ди трудо́въ твои́хъ, посѣща́я вдови́цу, я́коже Илія́ проро́къ Саре́ѳтяныню, и поя́ пѣ́снь немо́лчную: си́лѣ Твое́й сла́ва, Человѣколю́бче.

Богоро́диченъ: Иже Отцу́ и Ду́ху Собезнача́льный отъ Тебе́ изво́ли роди́тися на́шего ра́ди спасе́нія и дарова́ Тя ро́ду христіа́нскому те́плую Засту́пницу и въ бѣда́хъ ско́рую Помо́щницу. Тѣ́мже, Ма́ти безму́жная, покланя́емся вѣ́рно Рождеству́ Твоему́.

Инъ.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Мíра сего́ вся́ возненави́дѣлъ еси́, пло́ть ду́ху порабо́тивъ, и, удали́вшуся тебѣ́ тѣле́сныя любве́, въ юро́дство претвори́лся еси́, до́брѣ разсмотри́въ преити́ тя́жкую пучи́ну, успѣ́хъ прія́ти сподо́бился еси́, чу́дне Васи́ліе.

Омраче́ніе возненави́дѣвъ грѣхо́вное и пла́менемъ чистоты́ пресѣ́къ пла́мень, терпѣ́ніемъ и мудрѣ́йшимъ юро́дствомъ, я́ко златы́ми крила́ми, на небеса́ возлетѣ́лъ еси́ и равноа́нгельную дости́глъ еси́ степе́нь.

Любо́вію Христо́вою сро́дниковъ отре́клся еси́ и надъ страстьми́ ца́рь показа́лся еси́, ско́рбнымъ путе́мъ ше́ствуя, и, дости́гнувъ простра́ннаго жили́ща, на́съ, плѣне́нныхъ грѣхо́вными страстьми́, свободи́, преблаже́нне.

Богоро́диченъ: Кро́въ, и заступле́ніе, и прибѣ́жище бу́ди ми́, Дѣ́во, рабу́ Твоему́, и исцѣли́ мя отъ безмѣ́рныхъ зо́лъ, да пою́, Пречи́стая: сла́ва Рождеству́ Твоему́.

Пѣ́снь 5.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Процвѣ́тъ, я́ко кипари́съ, посредѣ́ земли́ Россíйскія, уго́дниче Христо́въ Васи́ліе, прине́слъ еси́ плоды́ ду́ха во мно́зѣ терпѣ́ніи, безъиме́нство, и тѣле́сное удруче́ніе, и отъ бѣсо́въ и злы́хъ человѣ́къ озлобле́ніе. Сего́ ра́ди прія́лъ еси́ ны́нѣ вѣ́чное утѣше́ніе.

Си́ла бо Моя́, — рече́ Госпо́дь, — въ не́мощи соверша́ется. Се́ бо на тебѣ́ соверши́ся Бо́жіе смотре́ніе, чу́дне Васи́ліе, си́лою Христо́вою ди́венъ яви́лся еси́ въ житіи́ твое́мъ, зло́ стражда́, ника́коже болѣ́зни ощуща́лъ еси́: облегчева́ше тя́ жела́ніе бу́дущихъ бла́гъ, я́же получи́лъ еси́.

Зва́ніе твое́ не отъ человѣ́къ бы́сть, но отъ Бо́га, прему́дре Васи́ліе. И, я́ко еле́нь, жаждя́, на исто́чники воды́ живы́я поте́клъ еси́, напитава́я ду́шу Христо́вою любо́вію, и ктому́ ника́коже отъ зно́я грѣхо́внаго вжажда́лся еси́: укрѣпи́ бо тя́ на се Ца́рь ми́ра.

Богоро́диченъ: Ангели и арха́нгели, херуви́ми и серафи́ми многоочи́тіи, нача́ла, и вла́сти, и госпо́дствія раболѣ́пно покланя́ются Рождеству́ Твоему́, Богоро́дице, сла́вяще Тя́, Влады́чице. Тѣ́мже и мы́, Ма́ти Преблагослове́нная, покланя́емся со стра́хомъ и мо́лимъ Тя́: спаси́ ду́ши на́ша.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Иже до тре́тіяго небесе́ возше́дый рече́: мы́ юро́ди Христа́ ра́ди. Ты́ же, преблаже́нне, по благода́ти въ таково́е юро́дство преложи́лся еси́, досажде́ніе неразу́мныхъ люде́й претерпѣ́въ, и ко́зни бѣсо́вскія попра́лъ еси́, и я́ко а́нгелъ на земли́ яви́лся еси́ на́мъ.

Бо́га ра́ди житіе́ сла́вы мíра сего́ отъ младе́нства возненави́дѣлъ еси́, возлюби́въ нищету́ и терпѣ́ніе, огне́мъ печа́ли очны́я сле́зы изсуши́лъ еси́ и вся́ ско́рбная претерпѣ́лъ еси́, преблаже́нне Васи́ліе.

Прему́дростію Бо́жіею просвѣще́нъ еси́, о́гнь веще́ственный невеще́ственнымъ угаси́въ, и чистото́ю житія́ твоего́ безтѣле́снаго во́инства усвое́нію сподо́бился еси́.

Богоро́диченъ: Источа́еши исцѣле́ній струи́ боля́щимъ, Дѣ́во, всю́ду, Тя́ бо исто́чника показа́ милосе́рдія, Влады́чице, ми́лости Госпо́дь, изъ Тебе́ рожде́йся па́че ума́.

Пѣ́снь 6.

Ирмо́съ: Якоже проро́ка изба́вилъ еси́ изъ глубины́ преиспо́днія, Христе́ Бо́же, и мене́ отъ грѣхо́въ мои́хъ изба́ви, я́ко Человѣколю́бецъ, и упра́ви живо́тъ мо́й, молю́ся.

Кто́ мо́жетъ изчести́ чудеса́ прему́драго Васи́лія, его́же ви́дяху по мо́рю ше́ствующа немо́кренно, я́ко по су́ху? И ви́дяху невѣ́рніи язы́цы, дивля́хуся и, прише́дше въ Россíю, повѣ́даху: мы́, — реко́ша, — ви́дѣхомъ такова́ человѣ́ка, по мо́рю ше́ствующа; и́стинно бо свидѣ́тельство и отъ вра́гъ прино́сится. Мы́ же глаго́лемъ: сла́ва Бо́гу, творя́щему чудеса́ ди́вная.

Уподо́бился еси́, прему́дре Васи́ліе, всѣ́ми нра́вы и обы́чаемъ Симео́ну, юро́дивому Христа́ ра́ди, и Андре́ю Царегра́дскому, и вели́кому отцу́ Мака́рію, и Ону́фрію, и Па́влу Ѳиве́йскому, и Макси́му чу́дному, и Проко́пію Вели́кому. Съ ни́миже сожи́тель яви́лся еси́ во Ца́рствіи Христа́ Бо́га на́шего.

О, прему́дре Васи́ліе, чу́дный житіе́мъ и ра́зумомъ! Мо́лимъ тя́, блаже́нне: моли́ Христа́ Бо́га на́шего за ИМПЕРАТОРА Правосла́внаго, и всѣ́мъ вѣ́рнымъ спасе́ніе испроси́, и мíру ми́ръ, и отъ грѣ́хъ свобожде́ніе, и умоли́ Ца́рствію бы́ти наслѣ́дникомъ.

Богоро́диченъ: Кто́ на́съ изба́витъ отъ му́ки вѣ́чныя и отъ сме́рти душе́вныя, а́ще не Ты́ воздѣ́жеши пречи́стѣи ру́цѣ, Богоро́дице, Сы́ну Твоему́ и Бо́гу на́шему? Да спасе́тъ ны́, ни отку́дуже иму́щія по́мощи, Твои́мъ покро́вомъ, Преблагослове́нная.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Остръ у́мъ всегда́ къ Бо́гу имѣ́въ, я́ко нечу́вственъ ко всѣ́мъ жите́йскимъ бы́лъ еси́, вся́ же кова́рства лука́ваго, я́ко сѣ́ть, расто́ргнулъ еси́ и пресвѣ́тлое свѣти́ло мíрови показа́лся еси́, богоблаже́нне Васи́ліе.

Ду́хомъ Бо́жіимъ наставля́емь, благоюро́диве, чистоту́ естества́ твоего́ преесте́ственну, небесоподража́тельное житіе́ имѣ́лъ еси́ и ангелолѣ́пное видѣ́ніе. Тѣ́мже моли́ спасти́ся на́мъ отъ вра́гъ на́шихъ.

Ангелъ житіе́мъ на земли́ показа́лся еси́, и, на го́ру безсме́ртія возше́дъ добродѣ́тельми, а́нгельскія полки́ удиви́лъ еси́, и на враги́ храбо́рникъ чу́денъ показа́лся еси́. И ны́нѣ посо́бствуй ИМПЕРАТОРУ на́шему, преблаже́нне, да твои́ми моли́твами проти́вніи побѣжда́ются.

Богоро́диченъ: Ру́ки Твоя́ пречи́стыя, Дѣ́во Ма́ти, просте́рши, покры́й на Тя́ надѣ́ющіяся и Сы́ну Твоему́ зову́щія: всѣ́мъ пода́ждь, Христе́, ми́лости Твоя́.

Конда́къ, гла́съ 4:

Ду́хомъ Бо́жіимъ води́мь, преблаже́нне Васи́ліе, оттря́слъ еси́ мірскíй мяте́жъ, и житія́ треволне́нія возгнуша́лся еси́, и, совле́кся одѣя́ній тлѣ́нныхъ и обле́кся въ ри́зу безстра́стія, убѣжа́лъ еси́ ловле́нія льсти́ваго міроде́ржца, и бы́лъ еси́ стра́ненъ во твое́мъ язы́цѣ, и, па́че земна́го бога́тства избра́въ бога́тство небе́сное, увя́злся еси́ вѣнце́мъ терпѣ́нія. И ны́нѣ, преблаже́нне Васи́ліе, моли́ Христа́ Бо́га о творя́щихъ святу́ю па́мять твою́, да зове́мъ ти́: ра́дуйся, преблаже́нне Васи́ліе.

Икосъ:

Трудолю́бному житію́ твоему́ а́нгели удиви́шася, му́жески бо воста́лъ еси́ на естество́: разумѣ́въ непостоя́нное житія́ сего́, совле́клся еси́ одѣя́ній и, на́гъ сы́й, ста́лъ еси́ проти́ву ко́знемъ діа́вольскимъ, я́коже хра́брый ратобо́рецъ, по словеси́, преблаже́нне, апо́столову: нѣ́сть на́ша бра́нь къ кро́ви и пло́ти, но къ нача́ломъ, и ко власте́мъ, и къ міродержи́телемъ тмы́ вѣ́ка сего́. И, сему́ нагото́ю тѣле́сною спле́тся до́блественнѣ, ни отъ ко́еяже стра́сти побѣди́лся еси́, но всѣ́хъ сѣте́й убѣжа́лъ еси́ го́рдаго веліа́ра, прескочи́въ про́пасть а́дову, ю́же изры́ вра́гъ между́ Ла́заремъ и бога́тымъ, и ны́нѣ у Авраа́ма на ло́нѣ почива́еши, отнесе́нъ святы́ми а́нгелы. Моли́ся, преблаже́нне, Христу́ Бо́гу на́шему о творя́щихъ святу́ю па́мять твою́, да зове́мъ ти́: ра́дуйся, преблаже́нне Васи́ліе.

Пѣ́снь 7.

Ирмо́съ: На по́лѣ Деи́рѣ иногда́ мучи́тель пе́щь поста́ви на муче́ніе богоно́сныхъ, въ не́йже три́ о́троки пѣсносло́вяху Еди́наго Бо́га, тро́ично воспѣва́ху, глаго́люще: отце́въ Бо́же, благослове́нъ еси́.

Де́нь Госпо́день всегда́ предъ очи́ма зря́, прему́дре Васи́ліе, предстоя́лъ еси́ на́гъ, я́коже суди́щу нелицемѣ́рному Сы́на Бо́жія, и послужи́лъ еси́ Влады́цѣ твоему́ во мно́зѣ терпѣ́ніи, воспѣва́я: оте́цъ на́шихъ Бо́же, благослове́нъ еси́.

Разумѣ́въ, блаже́нне Васи́ліе, я́ко ничто́же ну́жднѣе души́, за ню́же Христо́съ у́мре и воскре́се, не оскверни́лъ еси́ ри́зы душе́вныя, ю́же прія́лъ еси́ отъ свята́го креще́нія. И ны́нѣ, предстоя́ Христу́, взыва́еши: оте́цъ на́шихъ Бо́же, благослове́нъ еси́.

Ничто́же разлучи́тъ мя́ отъ любве́ Христо́вы, — сія́ преблаже́нный Васи́лій глаго́лаше, — ни высота́, ни глубина́, ни а́нгели, ни си́лы, ни сла́ва, ни бога́тство, ничто́же бо хощу́ кра́сныхъ мíра сего́, па́че Іису́са сла́дкаго, Ему́же вопію́: оте́цъ на́шихъ Бо́же, благослове́нъ еси́.

Богоро́диченъ: Пре́жде рождества́ пребы́сть Дѣ́вою Ма́ти Сы́на Бо́жія и по рождествѣ́ яви́ся па́ки Дѣ́ва: Бо́гъ бо бѣ́, идѣ́же хо́щетъ, побѣжда́ются естества́ чи́ни. Ты́ бо яви́лася еси́ село́ простра́нно Сы́на Отча, Благослове́нная, Ему́же вопіе́мъ: благослове́нъ Бо́гъ оте́цъ на́шихъ.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Тве́рдый душе́ю адама́нтъ показа́лся еси́, блаже́нне, вои́стинну житіе́ твое́ па́че естества́, я́коже въ ка́ющихся оби́тели, и осяза́ніемъ и сластьми́ мíра сего́ безстра́стенъ пребыва́я, ве́лій же отъ видѣ́нія пребы́лъ еси́ безъ вре́да.

Испо́лнился еси́ Свята́го Ду́ха благода́ти, разумѣ́въ Госпо́дне благовѣ́стіе, широ́кій и простра́нный пу́ть, вводя́й въ па́губу, возненави́дѣлъ еси́ и возлюби́лъ еси́ безмо́лвіе; тѣ́снымъ и приско́рбнымъ путе́мъ Христу́ послѣ́дуя, отъ земны́хъ къ небе́снымъ оби́телемъ пресла́вно возше́лъ еси́.

Благода́рное сіе́ пѣ́ніе, приноси́мое тебѣ́, не пре́зри, преблаже́нне, но ми́лостивно пріими́ и ра́дости духо́вныя испо́лни на́съ, умоли́ Го́спода пода́ти ИМПЕРАТОРУ на́шему лѣ́тъ умноже́ніе и мíру устрое́ніе.

Богоро́диченъ: Благоутро́бія ми́лости иму́щи, смире́нныя моея́ души́ не пре́зри, вѣ́рно молю́ Тя, Отрокови́це, но уще́дри вско́рѣ, и спаси́ мя отъ пучи́ны согрѣше́ній мои́хъ, и, обно́вльши благода́ть Твою́ на мнѣ́, просвѣти́, Дѣ́во Чи́стая.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Ви́дя Госпо́дь труды́ твоя́ и мно́гія по́двиги, чуде́съ да́ромъ обогати́ тя, просія́лъ бо еси́ на свѣ́щницѣ Христо́ва сія́нія, и яви́ тя вселе́ннѣй зна́ема ра́ди чуде́съ исцѣле́нія, и вси́ вопію́тъ съ тобо́ю, преблаже́нне: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

Слы́шалъ еси́, прему́дре Васи́ліе, Спа́сову за́повѣдь: а́ще, рече́, человѣ́къ ве́сь мíръ пріобря́щетъ и отщети́тъ ду́шу свою́, что́ да́стъ измѣ́ну на души́ свое́й? Ты́ же сіе́ въ се́рдцы твое́мъ скры́лъ еси́ и пе́клся еси́, ка́ко угоди́ти Бо́гу, Ему́же взыва́еши: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

Ничи́мже ме́ньши пре́жнихъ святы́хъ, чу́дне Васи́ліе, яви́лся еси́, изря́денъ мно́гими труды́ и по́двиги и та́йными къ Бо́гу моли́твами, а́ще человѣ́комъ и невѣ́домы, но Бо́гомъ вся́ зри́мы и вѣ́домы, Ему́же вопіе́ши: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

Богоро́диченъ: Благослови́те, вся́ дѣла́ Госпо́дня, Го́спода, ро́ждшагося отъ Дѣ́вы Марíи, и спа́сшаго всеро́днаго Ада́ма отъ паде́нія, и возне́сшаго па́ки человѣ́чество на высоту́ небе́сную, и сѣдя́щаго одесну́ю Отца́, Ему́же вопію́тъ вси́ а́нгели: да благослови́тъ вся́ тва́рь Го́спода и превозно́ситъ Его́ во вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Огнь стра́шный разумѣва́я, земны́хъ ничто́же возлюби́лъ еси́. Печа́лію душе́вною и глубо́кимъ сѣ́тованіемъ у́мъ во глубину́ смире́нія погрузи́лъ еси́, жела́я всели́тися въ небе́сное Ца́рство, е́же и получи́въ, ны́нѣ ра́дуешися ра́достію безконе́чною.

Равноа́нгельную че́сть досто́йно получи́лъ еси́, преблаже́нне Васи́ліе, и, со безпло́тными Бо́гу предстоя́, призира́й на ны́ съ небе́снаго кру́га, ра́дости пода́телю, и возсія́й свѣ́тъ тво́й на́мъ, я́ко да ви́димъ твоя́ чудеса́.

Имже о́бразомъ жела́етъ еле́нь пали́мь на исто́чники, си́це и ты́, преблаже́нне, всегда́ подвиза́яся, жела́лъ еси́ боже́ственнаго хотѣ́нія и вся́ благоуго́дно Го́сподеви соверши́лъ еси́. И ны́нѣ со святы́ми пое́ши непреста́нно: по́йте, вся́ дѣла́, Го́спода и превозноси́те Его́ во вѣ́ки.

Богоро́диченъ: Лука́во вре́мя живота́ моего́ и вся́кія зло́бы испо́лнено, сатанѣ́ лука́вому лю́тѣ мя́ смуща́ющу, Ты́ мя исто́ргни того́, Богороди́тельнице, па́кости, на Тя́ бо все́ возложи́хъ ча́яніе мое́, спаси́ мя Твои́ми бо́дрыми моли́твами.

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Якоже рече́ Христо́съ, са́мая Истина, вну́трь ва́съ е́сть Ца́рство небе́сное. Ты́ бо, Васи́ліе чу́дне, бы́лъ еси́ сы́нъ и наслѣ́дникъ Ца́рствія Бо́жія, е́же скры́лъ еси́ вну́трь себе́ добродѣ́тельми. Сего́ ра́ди тя́ вси́ ублажа́емъ, Христа́ велича́юще.

Бди́те, — рече́ Госпо́дь, — и моли́теся, не вѣ́сте бо дне́ и часа́, ка́ко пріи́детъ Сы́нъ Бо́жій. Ты́ же, пра́ведне Васи́ліе, всегда́ гото́въ сы́й, ожида́лъ еси́ прише́ствія Христа́ Царя́ Небе́снаго, Его́же и ра́достно усрѣ́лъ еси́ и прія́лъ еси́ блаже́нство вѣ́чное, Христа́ велича́я.

Егда́ преста́вился еси́, преблаже́нне Васи́ліе, тогда́ стеко́шася ца́ріе и кня́зи и вси́ собо́ри Россíйстіи, ю́ноши и дѣ́вы, ста́рцы со ю́нотами твои́мъ честны́мъ моще́мъ поклони́тися, и воскли́кнуша ку́пно вси́ па́мять вѣ́чную, Христа́ велича́юще.

Богоро́диченъ: Возвели́чимъ Ма́терь Бо́га на́шего, Юже пою́тъ вси́ а́нгели и арха́нгели, и вси́ ро́ди и колѣ́на покланя́ются и блажа́тъ отъ ны́нѣ и до вѣ́ка, вопію́ще: ра́дуйся, о Благода́тная, Госпо́дь съ Тобо́ю.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Святы́мъ Ду́хомъ утѣше́ніе стяжа́въ, у́мныхъ си́лъ имѣ́лъ еси́ жи́тельство, преблаже́нне. Тѣ́мъ свѣтоно́сную твою́ па́мять похваля́юще, мо́лимъ: испо́лни на́съ ра́дости и весе́лія духо́внаго.

Умо́мъ и душе́ю укра́шенъ, преблаже́нне, и многострада́льнымъ житіе́мъ свѣ́тло просія́ па́мять твоя́, и мы, благода́тными твои́ми луча́ми просвѣща́ющеся, бѣ́дъ и неду́гъ избавля́емся.

Блага́я воспрія́лъ еси́ на небесѣ́хъ, и обрѣ́лъ еси́ ра́дость неизрече́нную, и на́съ просвѣти́лъ еси́ чудесы́, и ны́нѣ пребыва́еши со святы́ми а́нгелы во свѣ́тѣ Святы́я Тро́ицы, преблаже́нне Васи́ліе, сего́ ра́ди тя́ велича́емъ.

Богоро́диченъ: Ангельстіи собо́ри Тя́, Богороди́тельнице, сла́вятъ, и человѣ́честіи ро́ди пѣ́сньми Тя́ почита́ютъ непреста́нно, Ты́ бо Боже́ственнымъ Рождество́мъ земны́я съ небе́сными совокупи́ла еси́, тѣ́мъ Тя́ почита́емъ.

Свѣти́ленъ:

Свѣ́тъ Христо́въ всели́ся въ се́рдце твое́, Васи́ліе чу́дне, совле́клся бо еси́ ве́тхаго человѣ́ка и яви́лся еси́ но́въ, горя́ ду́хомъ по Христо́вѣ за́повѣди. И, умно́живъ тала́нтъ трудо́въ твои́хъ, яви́лся еси́ чу́денъ въ да́льныхъ страна́хъ и Россíйскую зе́млю просвѣти́лъ еси́, чуде́съ зарю́ испуща́я. И ны́нѣ предстои́ши во свѣ́тѣ Святы́я Тро́ицы, ра́дуяся. [Два́жды]

Сла́ва, и ны́нѣ, богоро́диченъ:

Свѣ́тъ ро́ждши ду́шъ на́шихъ, Богоро́дице, Христа́, отъ Отца́ возсія́вшаго и отгна́вшаго тму́ идолобѣ́сія, просвѣти́вшаго вся́ вѣ́рныя и дарова́вшаго на́мъ бы́ти благода́тію ча́домъ Бо́жіимъ, во свѣ́тѣ присносу́щнѣмъ водворя́тися и Ду́хомъ Бо́жіимъ освяща́тися, Тя́ воспѣва́ющимъ.

На хвали́техъ стихи́ры на 4, гла́съ 6. Подо́бенъ: Все́ отло́жше.

Все́ отло́жь* мірско́е мудрова́ніе,* поте́клъ еси́, ра́дуяся,* въ слѣ́дъ Христа́ Бо́га на́шего.* Ему́же во все́мъ животѣ́ твое́мъ* нело́жно рабо́тая,* показа́лъ еси́ труды́ и по́двиги,* и по́льзу мно́гимъ сотвори́лъ еси́,* и убѣли́лъ еси́ ри́зу душе́вную* снѣ́га бѣлѣ́йши,* да, во все́мъ послушли́въ бы́въ Христу́,* со дерзнове́ніемъ моли́ся* о душа́хъ на́шихъ. [Два́жды]

Вся́ оста́вилъ еси́ Христа́ ра́ди:* отца́ и ма́терь,* жену́, и ча́да, и сро́дствія,* се́ла и имѣ́нія,* презрѣ́въ плотска́я мудрова́нія,* ку́пно све́ргъ* и тѣле́сная одѣя́нія,* бы́лъ еси́ Христо́въ учени́къ избра́нный* и во все́мъ послушли́въ Тому́ яви́лся еси́.* Его́же со дерзнове́ніемъ моли́* о душа́хъ на́шихъ.

Ве́сь возложи́лся еси́,* му́дре Васи́ліе,* на щедро́ты Бо́га на́шего,* упова́я получи́ти Ца́рство небе́сное,* е́же и получи́лъ еси́* проти́во трудо́въ твои́хъ.* И ны́нѣ не забу́ди гра́дъ и лю́ди правосла́вныя,* изба́ви отъ гла́да тѣле́снаго,* вку́пѣ же и душе́внаго,* во все́мъ бо угоди́лъ еси́ Христу́,* Его́же со дерзнове́ніемъ моли́* о душа́хъ на́шихъ.

Сла́ва, гла́съ 8. Самогла́сенъ:

Стра́хъ Госпо́день всели́ся въ се́рдце твое́, и отъ сего́ разумѣ́лъ еси́ лу́чшая, е́же по боже́ственному пути́ ше́ствовати. И яви́лся еси́ ра́венъ святы́мъ отце́мъ, Мака́рію и отцу́ Ону́фрію, и Па́влу Ѳиве́йскому, и Макси́му чу́дному, и Проко́пію, си́хъ подража́тель изря́денъ бы́лъ еси́, а́нгельскаго и безвеще́ственнаго житія́. И, я́коже а́нгелъ свѣ́та, неизмѣ́нно рабо́тая твоему́ Влады́цѣ, преблаже́нне Васи́ліе, моли́ спасти́ ду́ши на́ша.

И ны́нѣ, богоро́диченъ:

[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна, отъ 1-го кано́на пѣ́снь 3-я и отъ 2-го кано́на пѣ́снь 6-я. Проки́менъ, [гла́съ 7]: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́тимися къ Тебѣ́]. Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́]. Ева́нгеліе Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ [отъ слу́ха зла́ не убои́тся].

Источникъ: Минíа, мѣ́сяцъ Аѵгустъ . — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 33 – 45 об.

/ Къ оглавленію раздѣла /


Наверхъ / Къ титульной страницѣ

0