Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 1-й де́нь.
Пра́зднество Всеми́лостивому Спа́су и Пресвятѣ́й Богоро́дицѣ.

ВЕЧЕРЪ,
Блаже́нъ му́жъ, 1-й антифо́нъ. На Го́споди, воззва́хъ: поста́вимъ стихо́въ 8 и пое́мъ стихи́ры пра́здника 4 [и] Креста́ 4.
Стихи́ры Всеми́лостиваго Спа́са, гла́съ 4. Подо́бенъ: Да́лъ еси́ зна́меніе.

Оте́ческихъ не оста́вль нѣ́дръ,* я́ко Всеми́лостивъ со ученики́ водворя́яся,* Ты́ бо еси́ живо́тный Хлѣ́бъ, отъ Него́же мíръ причаща́ется* и пребыва́етъ на́мъ пи́ща неоскудѣва́ема,* причаще́ніемъ же оживля́етъ на нетлѣ́ніе человѣ́чество,* сме́ртныя измѣни́въ зло́бы,* Іису́се Всеми́лостиве,* Спа́се ду́шъ на́шихъ.

Хва́лимъ Твое́ пра́зднество, вѣ́рніи, Всеми́лостиве Христе́,* я́ко отъ Отца́ прише́лъ еси́ спасти́ ны.* Тѣ́мже пое́мъ Тя́ пѣ́сньми благода́рными,* я́ко Ты́ обнажи́лъ еси́ на́мъ боголѣ́пно боже́ственную Твою́ си́лу,* пресла́вно чу́до творя́,* на спасе́ніе на́мъ, благотворя́щимъ.* Тѣ́мже сла́вимъ, Милосе́рде, смотре́ніе Твое́,* Іису́се Всемогíй,* Спа́се ду́шъ на́шихъ.

Ины стихи́ры, Креста́, гла́съ то́йже. Подо́бенъ: Зва́ный свы́ше.

Дне́сь ра́дуется вѣ́рныхъ мно́жество боже́ственное:* явля́ется бо небе́сный Кре́стъ конце́мъ,* осіява́етъ тве́рдь свѣ́томъ непристу́пнымъ,* возду́хъ озаря́етъ* и земли́ лице́ украша́етъ.* Пое́тъ боже́ственными пѣ́сньми Це́рковь Христо́ва,* слу́житъ, почита́ющи,* свы́ше ю́ соблюда́ющій* Кре́стъ боже́ственный и пречу́дный.* Его́же си́лою укрѣпля́еми,* Влады́цѣ присту́пимъ, зову́ще:* умири́ мíръ и просвѣти́ ду́ши на́ша.

Да ра́дуется тва́рь и игра́етъ:* дне́сь бо облиста́ Кре́стъ въ концѣ́хъ съ небесе́,* земна́я просвѣща́я,* и совоку́плены показа́ расточе́ныя.* Дне́сь лику́ютъ съ ли́ки а́нгельскими человѣ́цы,* и́бо браня́щее средогра́діе,* Кресто́мъ разоре́но,* во еди́но вся́ я́вѣ совокупи́.* Тѣ́мъ, предсія́я па́че со́лнца,* всю́ тва́рь просвѣща́етъ благода́тію,* и уясня́етъ, и спаса́етъ* вѣ́рно того́ чту́щія.

Па́че со́лнечныя зари́,* хотя́й мíрови, я́коже ски́птръ честны́й,* Царя́ Христа́* и кончи́ну показа́ти,* Кре́стъ Боже́ственный се́ предсія́етъ я́сно въ концѣ́хъ.* Се́й возведе́ изъ а́да ро́дъ человѣ́чь,* а́да вельми́ плѣни́въ,* врага́ низложи́въ,* де́моновъ горды́ню до конца́ погуби́.* Ны́нѣ же проявля́етъ воскресе́ніе Спа́сово* и спаса́етъ зову́щія:* умири́ мíръ и просвѣти́ ду́ши на́ша.

Сла́ва, гла́съ то́йже, самогла́сенъ:

Живонача́льный исто́чникъ, Всеми́лостивый Христо́съ Спа́съ на́шъ, Иже отъ Дѣви́ческія Твоея́ роди́вся утро́бы пло́тски, це́рковь и две́рь небе́сную показа́ Тебе́ хва́лящимъ. Ты́ же не преста́й моля́щися къ Нему́ о пою́щихъ и хва́лящихъ Тя́, моли́твами Твои́ми и ми́лостію утвержда́ющи ца́рствіе и Вѣ́рнаго Импера́тора на́шего.

И ны́нѣ, Креста́, гла́съ 8. Іоа́нна мона́ха:

Его́же дре́вле Моисе́й прообразова́въ собо́ю, Амали́ка низложи́въ, побѣди́, и Дави́дъ пѣснопѣ́вецъ подно́жію Твоему́, вопія́, кла́нятися повелѣва́ше, Честно́му Кресту́ Твоему́, Христе́ Бо́же, дне́сь, грѣ́шніи, кла́няемся, устна́ми недосто́йными Тя́, изво́лившаго пригвозди́тися на не́мъ, воспѣва́юще, мо́лимся: Го́споди, съ разбо́йникомъ Ца́рствія Твоего́ сподо́би на́съ.

Вхо́дъ. Проки́менъ дне́. Чте́нія три́.

При́тчей чте́ніе. [Глава́ 3.]

Сы́не, не пренебрега́й наказа́нія Госпо́дня, ниже́ ослабѣва́й, отъ Него́ облича́емый. Его́же бо лю́битъ Госпо́дь, наказу́етъ, біе́тъ же вся́каго сы́на, его́же пріе́млетъ. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ. Не сопротивля́ется е́й ничто́же лука́вое, благоразу́мна е́сть всѣ́мъ, лю́бящимъ ю́, вся́кое же честно́е недосто́йно ея́ е́сть. Долгота́ бо житія́ и лѣ́та жи́зни въ десни́цѣ ея́, въ шу́ицѣ же ея́ бога́тство и сла́ва, отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Путіе́ ея́, путіе́ добры́, и вся́ стези́ ея́ съ ми́ромъ. Дре́во живота́ е́сть всѣ́мъ, держа́щимся ея́ и восклоня́ющимся на ню́, я́ко на Го́спода, тверда́.

Проро́чества Иса́іина чте́ніе. [Глава́ 60.]

Та́ко глаго́летъ Госпо́дь: отве́рзутся врата́ твоя́, Іерусали́ме, вы́ну де́нь и но́щь и не затворя́тся, е́же ввести́ къ тебѣ́ си́лу язы́ковъ и цари́ и́хъ ведо́мыя. Язы́цы бо и ца́ріе, и́же тебѣ́ не порабо́таютъ, поги́бнутъ, и язы́цы запустѣ́ніемъ запустѣ́ютъ. И сла́ва Лива́нова къ тебѣ́ пріи́детъ, въ кипари́сѣ, и пе́вкѣ, и ке́дрѣ, вку́пѣ просла́вити мѣ́сто свято́е Мое́, и мѣ́сто но́гъ Мои́хъ просла́влю. И по́йдутъ къ тебѣ́, боя́щіися, сы́нове смири́вшихъ тя́ и прогнѣ́вавшихъ тя́, и покло́нятся слѣда́мъ но́гъ твои́хъ вси́, прогнѣ́вавшій тя́, и нарече́шися гра́дъ Госпо́день, Сіо́нъ Свята́го Изра́илева. За е́же бы́ти тебѣ́ оста́влену и возненави́дѣну, и не бѣ́ помога́яй тебѣ́, и положу́ тя въ ра́дость вѣ́чную, весе́ліе родо́мъ родо́въ. И иссе́ши млеко́ язы́ковъ, и бога́тство царе́й снѣ́си, и разумѣ́еши, я́ко Азъ Госпо́дь, спаса́яй тя́ и избавля́яй тя́, Бо́гъ Изра́илевъ.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры самогла́сны, гла́съ 1. Андре́я Іерусали́мскаго:

Дне́сь я́ко вои́стинну святовѣща́нный глаго́лъ Дави́довъ коне́цъ прія́тъ, се́ бо я́вѣ пречи́стыхъ но́гъ Твои́хъ покланя́емся подно́жію и, на сѣ́нь крилу́ Твое́ю надѣ́ющеся, Всеще́дрый, вопіе́мъ Ти́: да зна́менается на на́съ свѣ́тъ лица́ Твоего́. Правосла́вныхъ люде́й Твои́хъ ро́гъ возвы́си Честна́го Креста́ Твоего́ воздви́женіемъ, Христе́ Многоми́лостиве.

Насажде́нное въ Кра́ніевѣ мѣ́стѣ Дре́во су́щаго живота́, на не́мже содѣ́ла спасе́ніе Превѣ́чный Ца́рь, посредѣ́ земли́, возноси́мо дне́сь, освяща́етъ мíра концы́, и обновля́ется воскресе́нія до́мъ. Ра́дуются а́нгели на небеси́, и веселя́тся человѣ́цы на земли́, Дави́дски вопію́ще и глаго́люще: возноси́те Го́спода Бо́га на́шего и покланя́йтеся подно́жію но́гу Его́, я́ко свя́то е́сть, подая́й мíру ве́лію ми́лость.

Прообразу́я Кре́стъ Тво́й, Христе́, патріа́рхъ Іа́ковъ, вну́комъ благослове́ніе да́руя, на глава́хъ премѣне́ны ру́ки сотвори́. Его́же, Спа́се, мы́ дне́сь вознося́ще, взыва́емъ: да́руй Христолюби́вому Импера́тору побѣ́ды, я́ко Константи́ну одолѣ́ніе.

Сла́ва, и ны́нѣ, гла́съ 5:

Зря́щи Тя́ тва́рь вся́, на Крестѣ́ на́га ви́сяща, Содѣ́теля и Зижди́теля всѣ́хъ, измѣня́шеся стра́хомъ и рыда́ше; со́лнце же свѣ́тъ омрачи́, и земля́ колеба́шеся, ка́меніе же разсѣда́шеся, и хра́ма свѣ́тлость раздира́шеся, ме́ртвіи воста́ша отъ гробо́въ, и а́нгельскія си́лы ужасо́шася, глаго́люще: О, чудесе́! Судія́ су́дится, и стра́ждетъ хотя́ за спасе́ніе мíра и обновле́ніе.

На стихо́внѣ стихи́ры, гла́съ 5. Подо́бенъ:

Ра́дуйся, Живоно́сный Кре́сте, благо́честія непобѣди́мая побѣ́да, две́рь ра́йская, вѣ́рныхъ утвержде́ніе, Це́ркве огражде́ніе, и́мже тля́ разори́ся и упраздни́ся, и попра́ся сме́ртная держа́ва, и вознесо́хомся отъ земли́ къ небе́снымъ, ору́жіе непобѣди́мое, бѣсо́въ сопротивобо́рче, сла́ва му́чениковъ, преподо́бныхъ я́ко вои́стинну удобре́ніе, приста́нище спасе́нія, да́руяй мíру ве́лію ми́лость.

Сти́хъ: Возноси́те Го́спода Бо́га на́шего и покланя́йтеся подно́жію но́гу Его́, я́ко свя́то е́сть.

Ра́дуйся, Госпо́день Кре́сте, и́мже разрѣши́ся отъ кля́твы человѣ́чество, су́щія ра́дости зна́меніе, прогоня́яй враги́ во твое́мъ воздви́женіи, всече́стне, на́мъ помо́щниче, царе́й держа́во, крѣ́пость пра́ведныхъ, свяще́нниковъ благолѣ́піе, вообража́емый и лю́тыхъ избавля́яй, же́злъ си́лы, и́мже пасе́мся, ору́жіе ми́ра, его́же со стра́хомъ обстоя́тъ а́нгели, Христа́ Боже́ственная сла́ва, подаю́щаго мíру ве́лію ми́лость.

Сти́хъ: Бо́гъ же Ца́рь на́шъ пре́жде вѣ́ка, содѣ́ла спасе́ніе посредѣ́ земли́.

Ра́дуйся, слѣпы́хъ наста́вниче, немощны́хъ врачу́, воскресе́ніе всѣ́хъ уме́ршихъ, воздви́гнувый ны́, во тлю́ па́дшія, Кре́сте Честны́й, и́мже разруши́ся кля́тва, и процвѣте́ нетлѣ́ніе, и земнíи обожи́хомся, и діа́волъ всеконе́чно низве́ржеся. Дне́сь воздвиза́ема тя́ ви́дяще рука́ми архіере́йскими, возно́симъ Вознесе́ннаго посредѣ́ тебе́, и тебѣ́ покланя́емся, почерпа́юще бога́тно ве́лію ми́лость.

Сла́ва, гла́съ 4:

Оте́ческихъ не оста́вль нѣ́дръ, я́ко Всеми́лостивъ со ученики́ водворя́яся, Ты́ бо еси́ живо́тный Хлѣ́бъ, отъ Него́же мíръ причаща́ется, и пребыва́етъ на́мъ пи́ща неоскудѣва́ема, причаще́ніемъ же оживля́етъ на нетлѣ́ніе человѣ́чество, сме́ртныя измѣни́въ зло́бы, Іису́се Всеми́лостиве, Спа́се ду́шъ на́шихъ.

И ны́нѣ, Креста́, гла́съ 8:

Гла́съ проро́ка Твоего́ Моисе́я, Бо́же, испо́лнися, глаго́ляй: у́зрите живо́тъ ва́шъ, ви́сящъ предъ очесы́ ва́шими. Дне́сь Кре́стъ воздвиза́ется, и мíръ отъ ле́сти свобожда́ется; дне́сь Христо́во воскресе́ніе обновля́ется, и концы́ земли́ ра́дуются, въ кимва́лѣхъ Дави́дски пѣ́снь Тебѣ́ принося́ще и глаго́люще: содѣ́лалъ еси́ спасе́ніе посредѣ́ земли́, Бо́же, Кре́стъ и воскресе́ніе, и́хже ра́ди на́съ спа́слъ еси́, Бла́же и Человѣколю́бче, Всеси́льне Го́споди, сла́ва Тебѣ́.

Та́же, Ны́нѣ отпуща́еши... Трисвято́е, по Отче на́шъ...


Тропа́рь, гла́съ 8:

Съ Вы́шнихъ призира́я, убо́гія пріе́мля, посѣти́ на́съ, озло́бленныя грѣхи́, Влады́ко Всеми́лостиве, моли́твами Богоро́дицы да́руй душа́мъ на́шимъ ве́лію ми́лость.

Сла́ва, и ны́нѣ, Креста́, гла́съ 1:

Спаси́, Го́споди, лю́ди Твоя́ и благослови́ достоя́ніе Твое́, побѣ́ды Благовѣ́рному Импера́тору на́шему [и́мярекъ], на сопроти́вныя да́руя и Твое́ сохраня́я Кресто́мъ Твои́мъ жи́тельство.

И отпу́стъ.



НА УТРЕНИ,
На Бо́гъ Госпо́дь: тропа́рь пра́здника, два́жды. Сла́ва, и ны́нѣ, Креста́.

По 1-й стихоло́гіи сѣда́ленъ, гла́съ 6:

То́кмо водрузи́ся дре́во, Христе́, Креста́ Твоего́, основа́нія поколеба́шася сме́рти, Го́споди: его́же бо пожре́ жела́ніемъ а́дъ, отпусти́ тре́петомъ. Яви́лъ еси́ на́мъ спасе́ніе Твое́, Святы́й, и славосло́вимъ Тя́, Сы́не Бо́жій, поми́луй на́съ.

Сла́ва, и ны́нѣ, то́йже.


По 2-й стихоло́гіи сѣда́ленъ, гла́съ 6:

Дне́сь проро́ческое испо́лнися сло́во: се́ бо покланя́емся на мѣ́сто, идѣ́же стоя́ша но́ги Твоя́, Го́споди, и, дре́во спасе́нія пріе́мше, грѣхо́вныхъ страсте́й свобо́ду получи́хомъ моли́твами Богоро́дицы, Еди́не Человѣколю́бче.

Сла́ва, и ны́нѣ, то́йже.
И чте́ніе во Ева́нгеліи толково́мъ.

По поліеле́и сѣда́ленъ, гла́съ 8. Подо́бенъ: Повелѣ́нное та́йно.

Въ раи́ мя́ пре́жде дре́во обнажи́, о вкуше́ніи вра́гъ принося́ умерщвле́ніе; Креста́ же дре́во, живота́ одѣя́ніе человѣ́комъ нося́, водрузи́ся на земли́, и мíръ ве́сь испо́лнися вся́кія ра́дости. Его́же зря́ще возвыша́ема, Бо́гу вѣ́рою, лю́діе, согла́сно возопіи́мъ: испо́лнь сла́вы до́мъ Тво́й.

Сла́ва, и ны́нѣ, то́йже.


Степе́нна, 1-й антифо́нъ 4-го гла́са. Проки́менъ, гла́съ 4: Ви́дѣша вси́ концы́ земли́ спасе́ніе Бо́га на́шего. Сти́хъ: Воспо́йте Го́сподеви пѣ́снь но́ву, я́ко ди́вна сотвори́ Госпо́дь. Вся́кое дыха́ніе... Ева́нгеліе Іоа́нна, зача́ло 42, отъ полу́: Отче, просла́ви и́мя Твое́...

По 50-мъ псалмѣ́ стихи́ра, гла́съ 6:

Кре́сте Христо́въ, христіа́нъ упова́ніе, заблу́ждшихъ наста́вниче, обурева́емыхъ приста́нище, въ бране́хъ побѣ́да, вселе́нныя утвержде́ніе, неду́жныхъ врачу́, ме́ртвыхъ воскресе́ніе, поми́луй на́съ.

Кано́нъ пра́здника со ирмосо́мъ на 8, ирмо́съ по два́жды, тропари́ на 6 и Креста́ на 6. Катава́сія: Кре́стъ начерта́въ...

Кано́нъ Всеми́лостиваго Спа́са, гла́съ 8.

Пѣ́снь 1.

Ирмо́съ: Мо́ре огусти́лъ еси́, погрузи́вый со ору́жіемъ го́рдаго фарао́на, и лю́ди спа́слъ еси́ немо́кренно, Го́споди, и вве́лъ еси́ я́ въ го́ру святы́ни, вопію́щія: пои́мъ Тебѣ́, Бо́гу на́шему, пѣ́снь побѣ́дную, я́ко просла́вися.

Гряди́те, вѣ́рніи, хвала́ми и пѣ́сньми свѣтоно́сную Це́рковь ублажа́юще, благоче́стія держа́телемъ просія́вшую, въ не́йже Всеми́лостиваго Христа́ Бо́га на́шего да просла́вимъ, вопію́ще: пое́мъ Тебѣ́, Бо́гу на́шему, я́ко просла́вися.

Умъ да возвыша́ется всѣ́хъ вѣ́рныхъ къ небеси́, вы́спрь Сѣдя́щему, въ пребоже́ственнѣй Его́ Це́ркви, и, ликовству́юще вѣ́рно, почти́мъ боже́ственное пра́зднество Смири́вшаго земна́я съ небе́сными.

Богоро́диченъ: Скрижа́ль богопи́санна утро́ба Твоя́, Богоро́дице, въ не́йже Сло́во Отчее написа́ся, Его́же чу́вственно на́мъ поро́ждши, къ Нему́ моли́ся, изба́вити ны́ отъ вся́кія ну́жды и ско́рби.

Богоро́диченъ: Весели́тся свѣ́тло ве́рхъ проро́ческій о Тебѣ́, Дѣ́во, Иса́ія, безму́жное Твое́ Рождество́ ви́дя, проро́чествуетъ: Отчее бо Сло́во ро́ждши на́мъ, и по рождествѣ́ Дѣ́ва пребыла́ еси́.

Инъ кано́нъ Креста́, гла́съ 6.
Пѣ́снь 1.

Ирмо́съ: Яко по су́ху, пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Кресту́, вѣ́рныхъ спасе́нію, покланя́юся, и те́плѣ облобыза́ю, и, объе́мля, вопію́: Дре́во всеблаже́нное Христо́во, ду́шу мою́ и у́мъ просвѣти́, молю́ся.

Побѣдоно́сно яви́ся на стра́сти и бѣ́сы дне́сь зна́меніе Креста́. Тѣ́мже, вѣ́рніи вси́, свѣ́тло просвѣ́щше ду́ши, ны́нѣ облобыза́емъ.

Лучеза́рная облиста́етъ сія́нія Кре́стъ Честны́й и просвѣща́етъ вѣ́рно покланя́ющіяся ему́ дне́сь, освяща́я ду́ши на́ша и тѣлеса́.

Богоро́диченъ: Пресвята́я Дѣ́во, Яже Христа́ пло́тію ро́ждши, пострада́вшаго на́съ ра́ди во́лею на Крестѣ́, Тя́ блажа́щія че́стно, спаса́й мольба́ми Твои́ми.

Пѣ́снь 3.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Ликовству́ютъ съ на́ми дне́сь ку́пно вся́ а́нгельская чинонача́лія, не чу́вственно, но духо́вно обступа́юще, Влады́ко, Твою́ Святу́ю Це́рковь, Ты́ же свы́ше ми́ръ Тво́й пода́ждь на́мъ, я́ко Всеми́лостивъ.

Лику́етъ дне́сь съ на́ми ли́къ проро́ческій, ку́пно же и апо́стольскій, Спа́се, и вси́ му́ченичестіи ли́цы, ду́хомъ прозря́ще Тебе́, многоимени́таго Бо́га, вѣ́рными сла́вима.

Богоро́диченъ: Дави́дски Ты́ именова́лася еси́ усыре́нная гора́, Дѣ́во, безлѣ́тное Сло́во Отчее омладѣ́вшееся во утро́бѣ Твое́й пріе́мши, и ро́ждши пло́тію Бо́жію ѵпоста́сную му́дрость.

Богоро́диченъ: Мы́сленный сокруши́ся томи́тель, отъ го́рняго неисцѣ́льную я́зву пріе́мь ка́мене, отъ чре́ва Твоего́ Христа́ Бо́га на́шего проше́дшаго, и земна́я съ небе́сными совоку́пльшаго.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Ору́жіе дре́вле жи́зни блаже́нное дре́во дарова́ся храни́ти, за преслуша́ніе первозда́ннаго Ада́ма, Кре́стъ же сему́ пу́ть сотвори́.

Очи́ма, устна́ми и душа́ми, ли́цы и сердцы́ поклони́мся вси́ Пресвято́му Кресту́ Жизнода́вца Христа́, и́мже мíръ ве́сь освяща́ется.

Хра́мы Бо́гу проро́чески дне́сь бы́вше, покланя́ющеся дре́ву Пресвята́го Креста́, и наслѣ́дницы Его́, со стра́хомъ вси́ цѣлу́емъ.

Богоро́диченъ: Дѣ́вою родила́ еси́ Сы́на, пре́жде Тебе́ рожде́ннаго отъ Отца́ пре́жде вѣ́къ, безъ ма́тере отъ Бо́га, распя́таго пло́тію, да спасе́тъ пре́жде согрѣ́шшія.

Конда́къ пра́здника, гла́съ 4. Подо́бенъ: Яви́лся еси́ дне́сь.

Вся́кія скве́рны, Всеми́лостивый Спа́се, а́зъ бы́хъ дѣ́латель и во отча́янія ро́въ впа́дся, но стеню́ отъ се́рдца и вопію́ къ Тебѣ́, Сло́ве: ускори́, Ще́дрый, и потщи́ся на по́мощь на́шу, я́ко Ми́лостивъ.

Икосъ:

Иму́ще Тебе́, Всеми́лостивый Спа́се, крѣ́пкое утвержде́ніе и Пречи́стую Ма́терь Твою́ стѣ́ну неразори́му и ти́хое приста́нище, никогда́же убои́мся вра́жіихъ воста́ній: Твои́мъ бо неви́димымъ про́мысломъ сохраня́емы и покро́вомъ, ви́димыя и неви́димыя враги́ побѣжда́емъ. Твою́ Пречи́стую Ма́терь имѣ́юще Помо́щницу, вра́жіихъ ко́зней, я́ко отъ сѣ́тей, избѣга́емъ, ра́достію воспѣва́емъ прера́дованная: ускори́, Ще́дрый, и потщи́ся на по́мощь на́шу, я́ко Ми́лостивъ.

Сѣда́ленъ пра́здника, гла́съ 4:

Ско́рое, и тве́рдое, и крѣ́пкое утѣше́ніе, Всеми́лостиве, посли́ на́мъ, да Ти́ во гла́сѣ хвале́нія трисвяту́ю пѣ́снь возсыла́емъ, душе́ю сокруше́нною припа́дающе, мо́лимся: Спа́се всего́ мíра, Ты́ еси́ Бо́гъ ка́ющихся.

Сла́ва, и ны́нѣ, Креста́, гла́съ 8. Подо́бенъ: Повелѣ́нное.

Прообража́ше та́йно дре́вле Іису́съ Нави́нъ Креста́ о́бразъ, егда́ ру́цѣ простре́ крестови́дно, Спа́се мо́й, и ста́ со́лнце, до́ндеже враги́ низложи́, противостоя́щія Ти́, Бо́гу; ны́нѣ бо за́йде, на Крестѣ́ Тя́ зря́, и, держа́ву сме́ртную разруши́въ, ве́сь мíръ совоздви́глъ еси́.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́!

Шестокри́льніи, Ми́лостиве, и многоочи́тіи херуви́ми, Влады́ко, Твоему́ престо́лу предстоя́ще, сла́вятъ. Ихже посли́ на́мъ, вѣ́рнымъ, и освяти́ Твою́ боже́ственную Це́рковь съ вопію́щими: сла́ва си́лѣ Твое́й, сла́ва, Христе́, снизхожде́нію Твоему́.

Дави́дъ возвели́чися, Спа́се, Твои́мъ Боже́ственнымъ просія́ Ду́хомъ, проповѣ́давый отъ Дѣ́вы Твое́ рождество́; Ты́ же, я́ко Всеми́лостивъ, возвели́чи и возвы́си Твою́ святолѣ́пную Це́рковь боже́ственную.

Богоро́диченъ: Лу́къ крѣ́пкаго міроде́ржца Твои́мъ чревоноше́ніемъ, Влады́чице, сокруши́ся: Ты́ бо пло́ть Боже́ственнаго воплоще́нія свѣтоно́снѣ подала́ еси́ у́дицѣ Отчу Сло́ву, Еже пра́дѣдня улови́ на́шего врага́. Тѣ́мъ Ему́ вопіе́мъ: сла́ва си́лѣ Твое́й, Го́споди.

Богоро́диченъ: Дави́дски возвели́чилася еси́ и гла́сы проро́чески гора́ Бо́жія усыре́на яви́лася еси́, Дѣ́во. Ка́мень усѣ́ченный отъ чре́ва Твоего́ ражда́ется — Христо́съ Бо́гъ, Ему́же пое́мъ: сла́ва си́лѣ Твое́й, сла́ва, Христе́, снизхожде́нію Твоему́.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Да кропи́тъ вся́ земля́ ра́дованіе, да веселя́тся древа́ дубра́вная, дне́сь обоже́на Всечестны́мъ Кресто́мъ, сія́ющи конце́мъ.

Показа́вый орга́нъ умерщвле́нія, живоно́сно мíрови, побѣдотво́рное ору́жіе непобѣди́мое, пресла́вный Кре́сте, сердца́ на́ша просвѣти́.

Ты́ Боже́ственная побѣ́да, ты́ содѣ́лованіе на́шего спасе́нія, ты́ вѣ́рнымъ соодолѣ́ніе и Боже́ственная же́ртва, о, Всечестны́й Кре́сте, пою́щія тя́ освяти́!

Богоро́диченъ: Вои́стинну Ты́ яви́лася еси́, вои́стинну родила́ еси́ Сы́на Вы́шняго, на Крестѣ́ ру́цѣ просте́ршаго, Дѣ́во Ма́ти Марíе, и мíръ призва́вшаго.

Пѣ́снь 5.

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди, ра́звѣ Тебе́, ино́го не вѣ́мы, и́мя Твое́ имену́емъ.

Ца́рствуетъ при́сно Твое́ Пребоже́ственное и́мя, Отче, Сло́ве же и Ду́ше, лю́бящимъ Тя́ свы́ше, я́ко Ми́лостивъ, ми́рную управля́й жи́знь.

Вѣко́въ сы́й Творе́цъ, смотре́ніемъ Твои́мъ пло́ти прибли́жился еси́, да, пло́ть обожи́въ, возведе́ши на высоту́ ко Отцу́ и къ Твоему́ хотѣ́нію.

Богоро́диченъ: Трапе́зу Сло́ва жи́зненнаго, Неискусобра́чная Марíе, разумѣ́хомъ Тя́, вѣ́рніи, отъ плода́ попо́лзшіися, Плодо́мъ же чре́ва Твоего́ къ свѣ́ту разу́мному приведе́ни бы́хомъ.

Богоро́диченъ: Сія́ютъ проро́честіи гла́си, я́ко со́лнце лучи́ пресвѣ́тлыя пуща́юще, Твое́ провозвѣща́юще безму́жное, Дѣ́во, рождество́. Оте́цъ изво́ли, Сы́нъ же хотѣ́ніемъ во чре́вѣ Твое́мъ младе́нствуетъ, дѣ́йствомъ Ду́ха, и пребыва́еши Дѣ́ва.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́ве Бо́жій, и́стиннаго Бо́га, отъ мра́ка грѣхо́внаго взыва́юща.

Подъи́мемъ съ ра́достію преблаже́нный Кре́стъ, въ це́рквахъ и градѣ́хъ се́й предложе́нный, и поклони́мся, да долго́въ пріи́мемъ оставле́ніе.

Умерщвля́ется змíй лука́вый ны́нѣ, и́же тмы́ нача́льникъ, сія́нія не терпя́, е́же облиста́етъ Живоно́сный Кре́стъ, Боже́ственнаго Царя́ ски́птро честно́е.

Яко пресвѣ́тла звѣзда́ и я́ко би́серъ благолѣ́пенъ и пресія́нное со́лнце, вся́ озаря́етъ земли́ концы́ Кре́стъ Госпо́день, его́же облобыза́емъ.

Богоро́диченъ: Спасе́нію Тя́ нача́ло, вси́ вѣ́рніи, вѣ́дуще, ублажа́емъ, Чи́стая: Ты́ бо пре́жде Су́щаго пло́тію родила́ еси́, хотѣ́ніемъ Свои́мъ пригвожде́нна на Крестѣ́.

Пѣ́снь 6.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся. Тѣ́мже, я́ко Іо́на, та́ко вопію́ Ти: возведи́ отъ тли́ живо́тъ мо́й, Благоутро́бне Го́споди.

Торжеству́етъ ве́село дне́сь великоимени́тый гра́дъ, христоимени́тіи лю́діе отъ Тебе́ свы́ше про́сятъ вели́кихъ даро́въ, Спа́се, Ты́ же, я́ко Бла́гъ и Всеми́лостивъ, ста́до Твое́ сохраня́й.

Крѣ́пкое утвержде́ніе свы́ше посли́, Христе́ Спа́се, крѣ́пкаго Тя́ свѣ́дущимъ и Всеми́лостиваго Бо́га, и христоимени́тую Це́рковь утверди́, я́ко Всемогíй.

Богоро́диченъ: Изба́ви мя́ лю́тыхъ, Дѣ́во, умоля́ющи Побѣди́теля лю́таго врага́, и сподо́би мя́ досто́йно одесну́ю ста́ти Твоего́ Сы́на.

Богоро́диченъ: Ты́ обожи́ла еси́ мя́, Влады́чице, Бо́га ро́ждши, Ты́ ме́ртвенное существо́ мое́ отъ сме́рти къ жи́зни возвела́ еси́, да моего́ преступле́нія кля́тва потреби́тся, боже́ственною любо́вію Тя́ ублажа́ющаго.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Яко Боже́ственъ сосу́дъ, я́ко свѣти́льникъ свѣ́телъ, въ це́рквахъ дне́сь, и въ хра́мѣхъ, и градѣ́хъ Кре́стъ предлежи́мь ви́дяще, и Уясни́вшаго сего́ воспое́мъ.

Умерщвля́ется сме́рть, и уморя́ется тлѣ́ніе, и бѣсо́встіи полцы́ отбѣга́ютъ, побѣ́дный и стра́шный дне́сь предлежа́щь ви́дяще Кре́стъ Христо́въ, не смѣ́юще прикосну́тися ему́.

Богоро́диченъ: Ядомъ зміи́нымъ пра́баба пи́щею, я́же во Еде́мѣ, пома́зася; Дѣ́ва же, ро́ждши Нача́льника жи́зни, источи́ мíру нетлѣ́ніе и воскресе́ніе.

Конда́къ, гла́съ 4. Подо́бенъ:

Вознесы́йся на Кре́стъ во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ си́лою Твое́ю Благовѣ́рнаго Импера́тора на́шего [и́мярекъ], побѣ́ды дая́ Ему́ на сопоста́ты, посо́біе иму́щу Твое́, ору́жіе мíра непобѣди́мую побѣ́ду.

Икосъ:

Иже до тре́тіяго небесе́ восхище́нъ бы́сть въ ра́й, и глаго́лы слы́шавъ неизрече́нныя и боже́ственныя, и́хже не лѣ́ть язы́ки человѣ́ческими глаго́лати, что́ Гала́томъ пи́шетъ, я́ко рачи́теліе писа́ній прочто́сте и позна́сте: мнѣ́, глаго́летъ, хвали́тися да не бу́детъ, то́кмо во еди́номъ Крестѣ́ Госпо́дни, на не́мже страда́въ, уби́ стра́сти. Того́ у́бо и мы́ извѣ́стно да держи́мъ, Кре́стъ Госпо́день, хвалу́ вси́: е́сть бо на́мъ спаси́тельное сіе́ Дре́во, ору́жіе ми́ра, непобѣди́мая побѣ́да.

Пѣ́снь 7.

Ирмо́съ: Халде́йская пе́щь, огне́мъ распала́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Ты́ еси́ небе́снаго кру́га Верхотво́рче, Го́споди, Тя́ вѣ́дуще, Всеми́лостиваго, припа́даемъ Ти́, вопію́ще: ускори́, Ще́дрый, и потщи́ся на по́мощь на́съ, о́трочески пою́щихъ: благослове́нъ Бо́гъ оте́цъ на́шихъ.

Две́рь милосе́рдіемъ отве́рзлъ еси́ на́мъ неизглаго́ланныя пи́щи, отве́рзи и ны́нѣ, Всеми́лостиве Спа́се, Твоя́ свы́ше Боже́ственныя да́ры Тебѣ́ вѣ́рно вопію́щимъ: благослове́нъ Бо́гъ оте́цъ на́шихъ.

Тро́иченъ: Отца́ просла́вимъ, и Сы́на, и Ду́ха, во Еди́номъ Божествѣ́ Тріѵпоста́сное Естество́, Существо́ нераздѣ́льно, несозда́нно, безнача́льно и пресу́щественно.

Богоро́диченъ: Прообрази́ша Твою́ неопали́мую утро́бу неопали́міи въ пещи́ о́гненнѣй ю́ноши, огне́мъ Божества́ прохлажда́еми. Его́же пріи́мши, породила́ еси́ Бо́га Сло́ва пою́щимъ: благослове́нъ Бо́гъ оте́цъ на́шихъ.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Спаси́тельному дре́ву поклони́мся, Кресту́ пресвято́му, ему́же слу́жатъ а́нгельская вся́ во́инства, предлежа́щь ви́дяще, вѣ́рніи, источа́ющъ на́мъ освяще́ніе и жи́знь.

Побѣдоно́сный яви́ся пресвяты́й Кре́стъ, Животода́вца Христа́, свы́ше же бѣсо́мъ всѣ́хъ мно́жество отгоня́, ва́рварское шата́ніе, и побѣди́теля явля́я Импера́тора на́шего.

Яко одушевле́ну, тебѣ́, припа́дая, взыва́ю, Кре́сте мо́й пресвяты́й: ты́ ми́ просвѣти́ ду́шу, и у́мъ, и слу́хъ, и устнѣ́, и язы́къ, и дыха́ніе, и о́чи къ путе́мъ Ца́рства Христо́ва.

Богоро́диченъ: Юноши три́ пе́щь не опали́, Рождество́ прообразу́ющи Твое́: и́бо Боже́ственный о́гнь Тя́ не опали́, всели́вся въ Тя́ и вся́ научи́въ пѣ́ти: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Ангели и небеса́, на Престо́лѣ сла́вы сѣдя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во вѣ́ки.

Держа́ву ца́рствія сохраня́й, Сло́ве, Благовѣ́рнаго Импера́тора на́шего, я́ко Всеми́лостивъ, пра́отецъ моли́твами, крѣ́пкою Твое́ю си́лою, крѣ́пость же и си́лу неоску́дно на проти́вныя пода́ждь, да вопіе́мъ: благослови́те, вся́ дѣла́ Госпо́дня, Го́спода.

Пѣ́снь боже́ственную принося́ще Тебѣ́, Всеми́лостиве, въ пречи́стѣй Це́ркви, избра́нніи лю́діе Твои́ Тебе́ хва́лятъ, Ты́ же, я́ко Всеми́лостивъ, осѣни́ вы́шнею Твое́ю си́лою, да вопіе́мъ Ти́: благослови́те, вся́ дѣла́ Госпо́дня, Го́спода.

Богоро́диченъ: Кла́съ живо́тенъ недѣ́ланенъ возрасти́вши Боже́ственный, Чи́стая Дѣ́во, тричи́сленна Божества́ сія́ніе, Отчее безлѣ́тное Сло́во въ лѣ́то поро́ждши, къ Нему́же за ны́, я́ко Ма́ти, моли́ся о пою́щихъ Тя́.

Богоро́диченъ: Безнача́льна Роди́теля нѣ́дръ не отсту́пль, въ нѣ́дрѣхъ Дѣ́вы водвори́ся и роди́ся пло́тію, очища́я мою́ пло́ть и ду́шу па́дшую. Ему́же пое́мъ: благослови́те, хвали́те и превозноси́те Его́ во вѣ́ки.

Инъ.

Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо въ мертвецѣ́хъ вмѣня́ется въ вы́шнихъ Живы́й, и во гро́бъ ма́лъ страннопріе́млется. Его́же, о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Тво́й Кре́стъ прообразу́я Іа́ковъ иногда́, на вну́ки поло́жь дла́ни премѣ́нно и благослови́въ и́хъ, благода́ти во язы́цѣхъ науча́я: о́троцы, благослови́те, свяще́нніи, по́йте, лю́діе, превозноси́те Его́ во вѣ́ки.

О, неизрече́ннаго Твоего́, Христе́, сни́тія и неизглаго́ланныхъ благи́хъ! Воплоти́ся и, ра́спятъ бы́въ, сме́рть пріе́мъ, и рѣши́ши человѣ́ки отъ кля́твы, источи́въ нетлѣ́ніе на треблаже́ннѣмъ Дре́вѣ, препросла́вленный Кре́стъ се́й во вѣ́ки.

Пресвяты́й Кре́стъ, Боже́ственную побѣ́ду, жи́зни нача́льника, ле́сти потреби́теля, дне́сь похва́лимъ Кре́стъ всесвяты́й Госпо́день, бѣсо́въ губи́теля и ва́рваровъ прогони́теля, царе́й побѣдотво́рца и покрови́теля.

Богоро́диченъ: Гвоздьми́ пригвожде́на Христа́, копіе́мъ прободе́на въ нетлѣ́нная ре́бра, тро́стіемъ въ главу́ біе́ма, же́лчь вкуша́юща, зря́щи, Дѣ́ва вопія́ше: гдѣ́ Твоя́ добро́та за́йде, прекра́сное Сло́во, Препросла́вленне па́че сыно́въ человѣ́ческихъ?

Пѣ́снь 9.

Ирмо́съ: Чу́жде ма́теремъ дѣ́вство, и стра́нно дѣ́вамъ дѣторожде́ніе, на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ.

Чу́вственно, Влады́ко, дне́сь хва́лятъ Тя́ боже́ственніи ли́цы въ пречу́днѣй Твое́й це́ркви: цари́, ку́пно и лю́ди, и свяще́нныхъ собо́ри. Ты́ же, я́ко Ми́лостивъ, спаса́й, да Тя́, вся́ коле́на земна́я, непреста́нно велича́емъ.

Пѣ́снь возсыла́емъ дне́сь, вѣ́рніи, многоимени́тому Тебѣ́ Христу́ Бо́гу всѣ́хъ, и Твое́, Всеми́лостиве, духо́вно пра́зднующе пра́зднество, про́симъ отъ Тебе́, да утверди́ши ца́рство недви́жимо Вѣ́рнаго Импера́тора на́шего.

Богоро́диченъ: Емману́ила, Бо́га же и Человѣ́ка, Отца́ безнача́льнаго Сло́ва, яви́лася еси́ Ма́ти, Дѣ́во. Влады́чество, призыва́ющее Тя́, при́зри, и утвержда́й, проти́вныя покаря́ющи въ де́нь бра́ни руко́ю Благовѣ́рнаго Импера́тора на́шего.

Богоро́диченъ: Отъими́, о Дѣ́во! ве́щь тлѣ́нную ума́ моего́, Сло́во Отчее пло́тію ро́ждшая, просвѣти́ глубо́кую тму́ моего́ неразу́мія, и пріити́ мя́ сподо́би крило́ма разу́мныма въ тишину́ Боже́ственнаго хотѣ́нія.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Тлѣ́нни отъ преслуша́нія бы́хомъ, Бо́жія за́повѣди престу́пницы я́вльшеся: сего́ ра́ди сме́рть пріи́де человѣ́комъ. Тѣ́мже безсме́ртіе процвѣте́ дне́сь — побѣ́дный Кре́стъ Христо́въ, его́же цѣлу́емъ.

Се́ Дре́во пресвято́е, крѣ́пкая наде́жда вѣ́рнымъ яви́ся, кля́твы избавле́ніе, человѣ́комъ ра́дость предлежи́тъ, облича́я тмы́ нача́льника, сему́ поклони́мся, вѣ́рніи, съ весе́ліемъ.

Нача́ло благослове́нія, и утвержде́ніе христіа́нъ, и стѣна́, и тве́рдое заступле́ніе, и кля́твы избавле́ніе яви́ся на́мъ Дре́во вожделѣ́нное, ору́жіе непобѣди́мое, просвѣти́ и освяти́ на́съ, покланя́ющихся тебѣ́.

Богоро́диченъ: Хра́ме и две́ре освяще́нія, Престо́ле Бо́жій, о́блаче и свѣ́щниче всесвѣ́тлый и ковче́же благода́ти, Всенепоро́чная, че́стнѣ покланя́ющіяся о́бразу честно́му Единоро́днаго Твоего́ Сы́на, покры́й и сохрани́.

Свѣти́ленъ Спа́са. Подо́бенъ: Жены́, услы́шите.

Свѣ́тъ невече́рній, Христе́, просвѣти́ на́съ лица́ Твоего́ зра́комъ и свѣ́тлости святы́хъ сподо́би, егда́ ся́деши возда́ти кому́ждо по дѣло́мъ, моли́твами ро́ждшія Тя́ Богоро́дицы. [Два́жды.]

Сла́ва, и ны́нѣ, Креста́:

Кре́стъ — храни́тель всея́ вселе́нныя, Кре́стъ — красота́ Це́ркве, Кре́стъ — царе́й держа́ва, Кре́стъ — вѣ́рныхъ утвержде́ніе, Кре́стъ — а́нгеловъ сла́ва и де́моновъ я́зва.

На хвали́техъ стихи́ры на 6, пра́здника 3, гла́съ 4. Подо́бенъ: Да́лъ еси́ зна́меніе.

Гра́дъ Тво́й пресвѣ́тло чти́мъ,* Всеми́лостиве Го́споди, пра́зднество Твое́ ве́село торжеству́юще,* Ты́ у́бо апо́стольскимъ ли́комъ уча́ ны́ боже́ственно,* мы́ же, со стра́хомъ и ра́достію зря́ще къ Тебѣ́,* про́симъ неизгла́голанныя пи́щи:* Ты́ бо Са́мъ живо́тное пита́ніе, сше́дый съ небесе́,* Іису́се Всеси́льне,* Спа́се ду́шъ на́шихъ.

Оте́ческихъ не оста́вль нѣ́дръ,* я́ко Всеми́лостивъ со ученики́ водворя́яся,* Ты́ бо еси́ живо́тный Хлѣ́бъ, отъ Него́же мíръ причаща́ется* и пребыва́етъ на́мъ пи́ща неоскудѣва́ема,* причаще́ніемъ же оживля́етъ на нетлѣ́ніе человѣ́чество,* сме́ртныя измѣни́въ зло́бы,* Іису́се Всеми́лостиве,* Спа́се ду́шъ на́шихъ.

Хва́лимъ Твое́ пра́зднество, вѣ́рніи, Всеми́лостиве Христе́,* я́ко отъ Отца́ прише́лъ еси́ спасти́ ны.* Тѣ́мже пое́мъ Тя́ пѣ́сньми благода́рными,* я́ко Ты́ обнажи́лъ еси́ на́мъ боголѣ́пно боже́ственную Твою́ си́лу,* пресла́вно чу́до творя́,* на спасе́ніе на́мъ, благотворя́щимъ.* Тѣ́мже сла́вимъ, Милосе́рде, смотре́ніе Твое́,* Іису́се Всемогíй,* Спа́се ду́шъ на́шихъ.

Ины стихи́ры Креста́, гла́съ 1. Подо́бенъ: Небе́сныхъ чино́въ.

Небе́сная ше́ствія* Кре́стъ Честны́й гото́витъ всѣ́мъ,* тому́ покланя́ющимся вѣ́рою несумнѣ́нною,* и лико́мъ невеще́ственныхъ си́лъ,* Иже на не́мъ Пригвозди́выйся,* сочета́етъ любо́вію пою́щія того́.

Кла́няющеся вѣ́рою Кресту́ Честно́му,* на не́мъ распе́ншагося воспое́мъ Влады́ку,* Того́ манове́ніемъ,* устнѣ́ вку́пѣ и ду́шу очища́юще,* и сія́ніи сего́ мы́сленными уясни́мся,* хва́ляще его́.

Го́ресть дре́вле услажда́я, Моисе́й* изба́ви Изра́иля,* о́бразъ Креста́ напису́я,* мы́ же сего́, вси́ вѣ́рніи,* та́йно и боже́ственно вообража́юще въ сердца́хъ на́шихъ,* всегда́ спаса́емся держа́вою его́.

Сла́ва, и ны́нѣ, гла́съ 4:

Пособи́вый, Го́споди, кро́ткому Дави́ду покори́ти иноплеме́нника, Вѣ́рному на́шему Импера́тору [и́мярекъ] спобо́рствуй, и ору́жіемъ Креста́ низложи́ враги́ на́ша. Покажи́, Благоутро́бне, на на́съ дре́внія ми́лости Твоя́, и да разумѣ́ютъ вои́стинну, я́ко Ты́ еси́ Бо́гъ, и, на Тя́ надѣ́ющіися, побѣжда́емъ, моля́щіися обы́чно Пречи́стѣй Твое́й Ма́тери, дарова́тися на́мъ ве́ліей ми́лости.

Славосло́віе вели́кое.

Та́же: Свяще́ніе воды́, и поклоне́ніе Честно́му Кресту́, и ектеніи́, и отпу́стъ, и ча́съ пе́рвый. На 1-мъ часѣ́ тропа́рь Спа́са. Сла́ва: Креста́. И ны́нѣ: богоро́диченъ часо́въ. По трисвято́мъ во всѣ́хъ часѣ́хъ, кондаки́ пра́здника и Креста́ глаго́лемъ, премѣня́юще, и соверше́нный отпу́стъ.


НА ЛИТУРГІИ,

Блаже́нна, 1-го кано́на пѣ́снь 3-я, и Креста́ пѣ́снь 6-я, и трисвято́е. Проки́менъ, гла́съ 6: Спаси́, Го́споди, лю́ди Твоя́ и благослови́ достоя́ніе Твое́. Сти́хъ: Къ Тебѣ́, Го́споди, воззову́, Бо́же мо́й, да не премолчи́ши отъ мене́. Апо́столъ къ Кори́нѳяномъ, зача́ло 125. Аллилу́ія, гла́съ 1: Помяни́ со́нмъ Тво́й, его́же стяжа́лъ еси́ испе́рва. Сти́хъ: Бо́гъ же, Ца́рь на́шъ пре́жде вѣ́ка, содѣ́ла спасе́ніе посредѣ́ земли́. Ева́нгеліе отъ Іоа́нна, зача́ло 60. На Литургíи пое́мъ Досто́йно, а не ирмо́съ Креста́. Прича́стенъ: Зна́менася на на́съ свѣ́тъ Лица́ Твоего́, Го́споди.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 17-27.

/ Къ оглавленію раздѣла /


Наверхъ / Къ титульной страницѣ

0