Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 27.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 1-й де́нь.
Послѣ́дованіе ма́лаго освяще́нія воды́.

Въ сі́й 1-й де́нь Августа во оби́телехъ и прихо́дскихъ хра́мѣхъ соверша́ютъ чи́нъ свяще́нія воды́, и быва́етъ си́це:

Приугото́вану столу́ и укра́шену и водѣ́ въ ча́шѣ, или́ всхо́димъ на исто́чники. И благослови́вшу іере́ю, глаго́лется трисвято́е и псало́мъ 142: Го́споди, услы́ши моли́тву мою́... Та́же: Бо́гъ Госпо́дь, во гла́съ 4. И тропа́рь: Къ Богоро́дице прилѣ́жно..., два́жды. Сла́ва, и ны́нѣ: Не умолчи́мъ никогда́, Богоро́дице... Та́же псало́мъ 50-й: Поми́луй мя́, Бо́же... Посе́мъ пою́тся тропари́ свяще́нія воды́.

Гла́съ 6:

Еже ра́дуйся а́нгеломъ пріи́мшая и ро́ждшая Зижди́теля Твоего́, Дѣ́во, спаса́й Тя́ велича́ющія. [Два́жды.]

Воспѣва́емъ Сы́на Твоего́, Богоро́дице, и вопіе́мъ: Пречи́стая Влады́чице, вся́кія бѣды́ изба́ви рабы́ Твоя́.

Царе́мъ, проро́комъ и апо́столомъ и му́ченикомъ Ты́ еси́ похвала́ и предста́тельница мі́ру, Всенепоро́чная.

Язы́къ вся́къ правосла́вныхъ похваля́етъ, и блажи́тъ, и сла́витъ Пречи́стое Рождество́ Твое́, Марі́е Богоневѣ́стная.

Да́ждь, Христе́ мо́й, и мнѣ́, недосто́йному, долго́въ оставле́ніе, молю́ся, Тя́ ро́ждшія моли́твами, я́ко Благоутро́бенъ.

На Тя́ моя́ упова́нія возложи́хъ, Богоро́дице, спаси́ мя моли́твами Твои́ми и да́руй ми́ прегрѣше́ній оставле́ніе.

Оживи́ мя, ро́ждшая Жизнода́вца и Спа́са, спаси́ моли́твами Твои́ми, Благослове́нная, наде́ждо ду́шъ на́шихъ.

Зижди́теля всѣ́хъ во утро́бѣ Твое́й заче́ншая, Дѣ́во Всенепоро́чная, моли́твами Твои́ми спаси́ ду́ши на́ша.

Богоро́дице, ро́ждшая сло́вомъ па́че сло́ва Сло́во, Всепѣ́тая, Того́ моли́ спасти́ ду́ши на́ша.

Ми́лостива мнѣ́ Судію́ же и Сы́на Твоего́, прегрѣши́вшему па́че вся́каго человѣ́ка, Твои́ми моли́твами содѣ́лай, Влады́чице.

По до́лгу вопіе́мъ Ти́: ра́дуйся, Богоро́дице, Чи́стая Приснодѣ́во, моля́щеся моли́твами Твои́ми спасти́ся.

Изба́ви мя́ огня́ вѣ́чнаго и му́къ, предлежа́щихъ мнѣ́, Богороди́тельнице, я́ко да ублажа́ю Тя́.

Не пре́зри моле́нія Твои́хъ рабо́въ, мо́лимся, Влады́чице Всепѣ́тая, я́ко да изба́вимся вся́каго обстоя́нія.

Неду́говъ, и вся́кихъ болѣ́зней, и бѣ́дъ на́съ свободи́, къ свяще́нному Твоему́ покро́ву прибѣга́ющихъ.

Стра́нное чу́до, е́же въ Тебѣ́, Богороди́тельнице: на́съ бо ра́ди по на́мъ роди́ся всѣ́хъ Зижди́тель изъ Тебе́ и Бо́гъ на́шъ.

Хра́мъ Тво́й, Богоро́дице, показа́ся врачевство́ неду́говъ безме́здное и оскорбля́емыхъ ду́шъ утѣше́ніе.

Пресвята́я Богоро́дице, ро́ждшая Спа́са, отъ бѣ́дъ спаси́ и вся́кія ины́я ну́жды рабы́ Твоя́.

Изба́ви отъ вся́каго преще́нія, находя́щаго на рабы́ Твоя́, Пресвята́я Влады́чице, и вся́каго вре́да душе́внаго же и тѣле́снаго.

Спаси́ всѣ́хъ моли́твами Твои́ми, Дѣ́во Богоро́дице, къ Тебѣ́ притека́ющихъ, и изба́ви вся́кія ну́жды и ско́рби.

Кто́, притека́яй въ хра́мъ Тво́й, Богоро́дице, не пріе́млетъ ско́ро исцѣле́нія душе́внаго, вку́пѣ и тѣле́снаго, Пречи́стая?

Отъ всѣ́хъ умоля́емь, Ще́дре, святы́хъ и го́рнихъ чино́въ, очи́сти мя́ Ро́ждшею Тя́.

Пощади́, Спа́се, ду́ши уме́ршихъ бра́тій на́шихъ въ наде́жди жи́зни и осла́би, оста́ви и́мъ согрѣше́нія.

Ра́дуйся, мі́ра очисти́лище, Дѣ́во, ра́дуйся, ру́чко и свѣ́щниче всезлаты́й, Боже́ственныя ма́нны, и Свѣ́та, Богоневѣ́сто.

Пое́мъ Тя́, Бо́га, еди́наго въ Тро́ицѣ, вопію́ще гла́съ трисвяты́й, моля́щеся спасе́ніе получи́ти.

Сла́ва: О Дѣ́во, ро́ждшая Спа́са и Влады́ку мі́ра и Го́спода! Того́ моли́ спасти́ ду́ши на́ша.

И ны́нѣ: Ра́дуйся горо́, ра́дуйся купино́, ра́дуйся врата́, ра́дуйся лѣ́ствице, ра́дуйся боже́ственная трапе́зо, ра́дуйся всѣ́хъ по́моще, Влады́чице.

Моли́твами, Ми́лостиве, Ма́тере Твоея́ Пречи́стыя и всѣ́хъ святы́хъ Твои́хъ Твоя́ ми́лости лю́демъ Твои́мъ да́руй.

Моли́твами сла́вныхъ арха́нгелъ и а́нгелъ и го́рнихъ чино́въ, рабы́ Твоя́, Спа́се, до́брѣ сохрани́.

Моли́твами честна́го и сла́внаго Крести́теля Твоего́, Проро́ка, Предте́чи, Христе́ Спа́се мо́й, рабы́ Твоя́ сохрани́.

Моли́твами сла́вныхъ апо́столовъ и му́чениковъ, и всѣ́хъ святы́хъ Твои́хъ, Твоя́ ми́лости лю́демъ Твои́мъ да́руй.

Моли́твами сла́вныхъ безсре́бреникъ, Богоро́дице, рабы́ Твоя́ сохрани́, я́ко еси́ предста́тельство мі́ра и утвержде́ніе.

Сла́ва: Отца́ и Сы́на славосло́вимъ и Ду́ха Свята́го, глаго́люще: Тро́ице Свята́я, спаси́ ду́ши на́ша.

И ны́нѣ: Неизрече́нно въ послѣ́дняя заче́ншая и ро́ждшая Созда́теля Твоего́, Дѣ́во, спаса́й Тя́ велича́ющія.

Та́же: Милосе́рдія две́ри отве́рзи на́мъ, благослове́нная Богоро́дице, надѣ́ющіися на Тя́, да не поги́бнемъ, но да изба́вимся Тобо́ю отъ бѣ́дъ: Ты́ бо еси́ спасе́ніе ро́да христіа́нскаго.

Та́же [діа́конъ]: Го́споду помо́лимся. [Ликъ: Го́споди поми́луй.] Свяще́нникъ: Яко Свя́тъ еси́, Бо́же на́шъ, [и Тебѣ́ сла́ву возсыла́емъ, Отцу́, и Сы́ну, и Свято́му Ду́ху, ны́нѣ, и при́сно, и во вѣ́ки вѣко́въ.] Ли́къ: Ами́нь.

Та́же настоя́щія тропари́, гла́съ 6:

Ны́нѣ наста́ вре́мя, всѣ́хъ освяща́ющее, и пра́ведный на́съ жде́тъ Судія́, но обрати́ся, душе́, къ покая́нію, я́ко блудни́ца, зову́щи со слеза́ми: Го́споди, поми́луй мя́.

Вода́ми одожди́вый, Христе́, исто́чникъ исцѣле́ній, во всечестнѣ́мъ хра́мѣ Дѣ́вы дне́сь, Твоего́ благослове́нія окропле́ніемъ, отгоня́еши неду́ги немощству́ющихъ, Врачу́ ду́шъ и тѣле́съ на́шихъ.

Дѣ́ва родила́ еси́ Неискусобра́чная и Дѣ́ва пребыла́ еси́, Ма́ти Безневѣ́стная, Богоро́дице Марі́е, Христа́ Бо́га на́шего моли́ спасти́ся на́мъ.

Пресвята́я Богоро́дице Дѣ́во, ру́къ на́шихъ дѣла́ испра́ви и проще́ніе прегрѣше́ній на́шихъ испроси́, внегда́ пѣ́ти на́мъ а́нгельское пѣ́ніе:

Святы́й Бо́же, Святы́й Крѣ́пкій, Святы́й Безсме́ртный, поми́луй на́съ. [Три́жды.]

И по трисвято́мъ діа́конъ глаго́летъ: Во́нмемъ. Свяще́нникъ: Ми́ръ всѣ́мъ. Ли́къ: И ду́хови твоему́.

Чте́цъ: Проки́менъ, гла́съ 3: Госпо́дь просвѣще́ніе мое́* и Спаси́тель мо́й, кого́ убою́ся? Сти́хъ: Госпо́дь Защи́титель живота́ моего́, отъ кого́ устрашу́ся?

Апо́столъ ко Евре́емъ, зача́ло 306:

Бра́тіе, святя́й и освяща́еміи отъ Еди́наго вси́, ея́же ра́ди вины́ не стыди́тся бра́тію нарица́ти и́хъ, глаго́ля: возвѣщу́ и́мя Твое́ бра́тіи Мое́й, посредѣ́ це́ркве воспою́ Тя. И па́ки: Азъ бу́ду надѣ́яся На́нь. И па́ки: се́ Азъ и дѣ́ти, я́же Ми́ да́лъ е́сть Бо́гъ. Поне́же у́бо дѣ́ти приобщи́шася пло́ти и кро́ви, и То́й пріи́скреннѣ пріобщи́ся тѣ́хже, да сме́ртію упраздни́тъ иму́щаго держа́ву сме́рти, си́рѣчь діа́вола. И изба́витъ си́хъ, ели́цы стра́хомъ сме́рти чрезъ все́ житіе́ пови́нни бѣ́ша рабо́тѣ. Не отъ а́нгелъ у́бо когда́ пріе́млетъ, но отъ сѣ́мене Авраа́мова пріе́млетъ. Отню́дуже до́лженъ бѣ́ по всему́ подо́битися бра́тіи, да ми́лостивъ бу́детъ и вѣ́ренъ Первосвяще́нникъ въ тѣ́хъ, я́же къ Бо́гу, во е́же очи́стити грѣхи́ людскі́я. Въ не́мже бо пострада́, Са́мъ искуше́нъ бы́въ, мо́жетъ и искуша́емымъ помощи́.

Свяще́нникъ: Ми́ръ ти́.

[Чте́цъ:] Аллилу́ія, гла́съ 6. Сти́хъ 1: Отры́гну се́рдце мое́ сло́во бла́го. Стихъ 2: Глаго́лю а́зъ дѣла́ моя́ царе́ви.

Ева́нгеліе отъ Іоа́нна, зача́ло 14:

Во вре́мя о́но, взы́де Іису́съ во Іерусали́мъ. Есть же во Іерусали́мѣхъ на о́вчей купѣ́ли, я́же глаго́лется евре́йски Виѳезда́, пя́ть притво́ръ иму́щи. Въ тѣ́хъ слежа́ше мно́жество боля́щихъ, слѣпы́хъ, хромы́хъ, сухи́хъ, ча́ющихъ движе́нія воды́. Ангелъ бо Госпо́день на вся́ко лѣ́то схожда́ше въ купѣ́ль и возмуща́ше во́ду, и и́же пе́рвѣе вла́зяше по возмуще́ніи воды́, здра́въ быва́ше, яцѣ́мъ же неду́гомъ одержи́мь быва́ше.

Та́же діа́конъ ектенію́:

Ми́ромъ Го́споду помо́лимся. [Ли́къ: Го́споди поми́луй. [То́же пое́тся по ка́ждомъ проше́ніи.] ]

О свы́шнѣмъ ми́рѣ, [и спасе́ніи ду́шъ на́шихъ, Го́споду помо́лимся].

О ми́рѣ всего́ мі́ра, [благостоя́ніи святы́хъ Бо́жіихъ церкве́й, и соедине́ніи всѣ́хъ, Го́споду помо́лимся].

О святѣ́мъ хра́мѣ се́мъ, [и съ вѣ́рою, благоговѣ́ніемъ и стра́хомъ Бо́жіимъ входя́щихъ въ о́нь, Го́споду помо́лимся].

О Святѣ́йшемъ Прави́тельствующемъ Сѵно́дѣ, [и о митрополи́тѣ на́шемъ [имяре́къ, а́ще е́сть о́бласть его́], честнѣ́мъ пресви́терствѣ, во Христѣ́ діа́конствѣ, о все́мъ при́чтѣ и лю́дѣхъ, Го́споду помо́лимся].

О Благочести́вѣйшемъ, [Самодержа́внѣйшемъ, Вели́комъ Госуда́рѣ на́шемъ Импера́торѣ [имяре́къ] всея́ Россі́и, и о Супру́гѣ Его́, Благочести́вѣйшей Госуда́рынѣ Императри́цѣ [имяре́къ], Го́споду помо́лимся].

[О Наслѣ́дникѣ Его́, Благовѣ́рномъ Госуда́рѣ, Цесаре́вичѣ и Вели́комъ Кня́зѣ [имяре́къ], и о все́мъ Ца́рствующемъ До́мѣ, и о все́й пала́тѣ, и во́инствѣ Ихъ, Го́споду помо́лимся].

О пособи́ти и покори́ти подъ но́зѣ Ихъ [вся́каго врага́ и супоста́та, Го́споду помо́лимся].

О гра́дѣ се́мъ, [ [аще въ монастырѣ́: О святѣ́й оби́тели се́й,] вся́комъ гра́дѣ и странѣ́, и вѣ́рою живу́щихъ въ ни́хъ, Го́споду помо́лимся].

О благорастворе́ніи возду́ховъ, [о изоби́ліи плодо́въ земны́хъ, и вре́менѣхъ ми́рныхъ, Го́споду помо́лимся].

О пла́вающихъ, путеше́ствующихъ, [неду́гующихъ, стра́ждущихъ, плѣне́нныхъ, и о спасе́ніи и́хъ, Го́споду помо́лимся].

О е́же освяти́тися вода́мъ си́мъ си́лою, и дѣ́йствіемъ, и наи́тіемъ Свята́го Ду́ха, Го́споду помо́лимся.

О е́же снизходи́ти на во́ды сія́ очисти́тельному Пресу́щныя Тро́ицы дѣ́йству, [Го́споду помо́лимся].

О е́же бы́ти водѣ́ се́й цѣли́тельной ду́шъ и тѣле́съ, и вся́кія сопроти́вныя си́лы отгна́тельной, [Го́споду помо́лимся].

О е́же низпосла́ти Го́споду Бо́гу благослове́ніе Іорда́ново, и освяти́ти во́ды сія́, [Го́споду помо́лимся].

О всѣ́хъ тре́бующихъ отъ Бо́га по́мощи и заступле́нія, [Го́споду помо́лимся].

О е́же просвѣти́тися на́мъ просвѣще́ніемъ ра́зума, Единосу́щною Тро́ицею, [Го́споду помо́лимся].

Яко да Госпо́дь Бо́гъ на́шъ пока́жетъ ны́ сы́ны и наслѣ́дники Ца́рствія Своего́, воды́ сея́ причаще́ніемъ же и кропле́ніемъ, [Го́споду помо́лимся].

О изба́витися на́мъ отъ вся́кія ско́рби, гнѣ́ва и ну́жды, [Го́споду помо́лимся].

Заступи́, спаси́, поми́луй [и сохрани́ на́съ, Бо́же, Твое́ю благода́тію].

Пресвяту́ю, Пречи́стую, [Преблагослове́нную, Сла́вную Влады́чицу на́шу Богоро́дицу и Приснодѣ́ву Марі́ю, со всѣ́ми святы́ми помяну́вше, са́ми себе́ и другъ дру́га, и ве́сь живо́тъ на́шъ Христу́ Бо́гу предади́мъ]. Ли́къ: Тебѣ́, Го́споди.

[Свяще́нникъ] возгла́съ:

Яко подоба́етъ Тебѣ́ вся́кая сла́ва, [че́сть и поклоне́ніе, Отцу́ и Сы́ну и Свято́му Ду́ху, ны́нѣ и при́сно и во вѣ́ки вѣко́въ. Ли́къ: Ами́нь].

Та́же моли́тву сію́:

Го́споди Бо́же на́шъ, Вели́кій въ совѣ́тѣ и ди́вный въ дѣ́лѣхъ, всея́ тва́ри Содѣ́телю, храня́й завѣ́тъ Тво́й и ми́лость Твою́ лю́бящимъ Тя́ и соблюда́ющимъ повелѣ́нія Твоя́, всѣ́хъ въ ну́ждахъ умиле́нныя пріе́мляй сле́зы, сего́ бо ра́ди прише́лъ еси́ въ ра́біи зра́цѣ, не привидѣ́ніи на́съ устраша́я, но здра́віе тѣ́лу и́стинное подава́яй и глаго́ляй: се́ здра́въ бы́лъ еси́, ктому́ не согрѣша́й, но и отъ бре́нія здра́вы о́чи содѣ́лалъ еси́ и, умы́тися повелѣ́въ, свѣ́ту всели́тися сотвори́лъ еси́ сло́вомъ. Супроти́вныхъ страсте́й во́лны смуща́яй, и житія́ сего́ сла́ное мо́ре изсуша́яй, и тяжелоно́сныя сласте́й укроща́яй во́лны, Са́мъ, Человѣколю́бче Царю́, да́вый на́мъ снѣгосвѣ́тлою одѣ́ятися оде́ждою, отъ воды́ же и Ду́ха, и прича́стіемъ же воды́ сея́, и окропле́ніемъ Твое́ благослове́ніе на́мъ низпосли́, скве́рну страсте́й омыва́ющее. Ей, мо́лимся, посѣти́ на́шу, Бла́же, не́мощь и исцѣли́ на́ша неду́ги душе́вныя же и тѣле́сныя, ми́лостію Твое́ю, моли́твами Всепречи́стыя, Преблагослове́нныя Влады́чицы на́шея Богоро́дицы и Приснодѣ́вы Марі́и, си́лою Честна́го и Животворя́щего Креста́, предста́тельствы честны́хъ небе́сныхъ си́лъ безпло́тныхъ, честна́го сла́внаго Проро́ка, Предте́чи и Крести́теля Іоа́нна, святы́хъ сла́вныхъ и всехва́льныхъ апо́столъ, преподо́бныхъ и богоно́сныхъ оте́цъ на́шихъ; и́же во святы́хъ оте́цъ на́шихъ, вели́кихъ іера́рховъ и вселе́нскихъ учи́телей: Васи́лія Вели́каго, Григо́рія Богосло́ва и Іоа́нна Златоу́стаго; и́же во святы́хъ оте́цъ на́шихъ: Аѳана́сія и Кири́лла, патріа́рховъ Александрі́йскихъ; и́же во святы́хъ отца́ на́шего Спиридо́на, Тримиѳу́нтскаго чудотво́рца; и́же во святы́хъ отца́ на́шего Никола́я, архіепи́скопа Мѵрликі́йскаго, чудотво́рца; и́же во святы́хъ оте́цъ на́шихъ, всея́ Россі́и чудотво́рцовъ: Петра́, Алексі́я, Іо́ны и Фили́ппа; свята́го и сла́внаго великому́ченика Гео́ргія Побѣдоно́сца; свята́го и сла́внаго великому́ченика Дими́трія Мѵроточи́ваго; святы́хъ и добропобѣ́дныхъ му́чениковъ; святы́хъ и пра́ведныхъ Богооте́цъ Іоаки́ма и Анны; святы́хъ сла́вныхъ чудотво́рцовъ и безсре́брениковъ: Космы́ и Даміа́на, Ки́ра и Іоа́нна, Пантелеи́мона и Ермола́я, Сампсо́на и Діоми́да, Мокі́я и Аники́ты, Ѳалале́я и Три́фона; [святы́хъ седми́ му́ченикъ Маккаве́й: Ави́ма, Антони́на, Гу́рія, Елеаза́ра, Евсево́на, Али́ма и Марке́лла, и ма́тере и́хъ святы́я Соломоні́и, и учи́теля и́хъ свята́го му́ченика Елеаза́ра], и́хже и па́мять соверша́емъ, и всѣ́хъ святы́хъ Твои́хъ.

И сохрани́, Го́споди, раба́ Твоего́ Благочести́вѣйшаго, Самодержа́внѣйшаго, Вели́каго Госуда́ря на́шего Импера́тора [имяре́къ] всея́ Россі́и. [Три́жды.]

И Супру́гу Его́, Благочести́вѣйшую Госуда́рыню Императри́цу [имяре́къ]; Ма́терь Его́, Благочести́вѣйшую Госуда́рыню Императри́цу [имяре́къ]; Наслѣ́дника Его́, Благовѣ́рнаго Госуда́ря, Цесаре́вича и Вели́каго Кня́зя [имяре́къ] и ве́сь Ца́рствующій До́мъ.

Спаси́, Го́споди, и поми́луй Святѣ́йшій Прави́тельствующій Всероссі́йскій Сѵно́дъ.

Да́руй и́мъ душе́вное и тѣле́сное здра́віе и рабо́тному Тебѣ́, сему́ христіа́нскому жи́тельству во все́мъ ми́лостивъ бу́ди. Помяни́, Го́споди, вся́кое епи́скопство правосла́вныхъ, пра́во пра́вящихъ сло́во Твоея́ и́стины, и ве́сь свяще́нническій и мона́шескій чи́нъ, и спасе́ніе и́хъ. Помяни́, Го́споди, ненави́дящихъ и лю́бящихъ на́съ, служа́щихъ бра́тій на́шихъ, предстоя́щихъ и благосло́вною вино́ю отше́дшихъ и заповѣ́давшихъ на́мъ, недосто́йнымъ, моли́тися о ни́хъ. Помяни́, Го́споди, въ плѣне́ніи и ско́рбехъ су́щихъ бра́тій на́шихъ и поми́луй и́хъ по вели́цѣй ми́лости Твое́й, вся́кія ну́жды избавля́яй. Яко Ты́ еси́ Исто́чникъ исцѣле́ній, Христе́ Бо́же на́шъ, и Тебѣ́ сла́ву возсыла́емъ со Безнача́льнымъ Твои́мъ Отце́мъ и съ Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ, и при́сно, и во вѣ́ки вѣко́въ. Ли́къ: Ами́нь.

Свяще́нникъ: Ми́ръ всѣ́мъ. Ли́къ: И ду́хови твоему́. Діа́конъ: Главы́ ва́ша Го́сподеви приклони́те. Ли́къ: Тебѣ́, Го́споди.

Свяще́нникъ же моли́тву та́йно:

Приклони́, Го́споди, у́хо Твое́ и услы́ши ны́, Иже во Іорда́нѣ крести́тися изво́ливый и освяти́вый во́ды, благослови́ всѣ́хъ на́съ, и́же приклоне́ніемъ своея́ вы́и назна́менующихъ рабо́тное воображе́ніе, и сподо́би на́съ испо́лнитися освяще́нія Твоего́ причаще́ніемъ воды́ сея́, и да бу́детъ на́мъ, Го́споди, во здра́віе души́ и тѣ́ла.

Возгла́съ: Ты́ бо еси́ освяще́ніе на́ше, и Тебѣ́ сла́ву, и благодаре́ніе, и поклоне́ніе возсыла́емъ со Безнача́льнымъ Твои́мъ Отце́мъ, и Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ, и при́сно, и во вѣ́ки вѣко́въ. Ли́къ: Ами́нь.

Та́же, [свяще́нникъ] взе́мъ Честны́й Кре́стъ, благословля́етъ во́ды три́жды, крестообра́зно низводя́, и возводя́ и́ пра́во, и поя́ настоя́щій тропа́рь, гла́съ 1:

Спаси́, Го́споди, лю́ди Твоя́ и благослови́ достоя́ніе Твое́, побѣ́ды Благовѣ́рному Импера́тору на́шему [имяре́къ], на сопроти́вныя да́руя и Твое́ сохраня́я Кресто́мъ Твои́мъ жи́тельство. [Три́жды.]

И посе́мъ пою́тъ тропа́рь се́й, гла́съ 2:

Твои́хъ даро́въ досто́йны на́съ сотвори́, Богоро́дице Дѣ́во, презира́ющи согрѣше́нія на́ша и подаю́щи исцѣле́нія вѣ́рою пріе́млющимъ благослове́ніе Твое́, Пречи́стая.

Та́же цѣлу́етъ іере́й Честны́й Кре́стъ, та́кожде и вси́ лю́діе, и кропи́тъ всѣ́хъ свяще́нною водо́ю, олта́рь же и це́рковь всю́; лю́діе же пою́тъ настоя́щій тропа́рь, гла́съ 4:

Исто́чникъ исцѣле́ній иму́ще, святі́и безсре́бреницы, исцѣле́нія подава́ете всѣ́мъ тре́бующимъ, я́ко преве́ліихъ дарова́ній сподо́бльшіися отъ приснотеку́щаго Исто́чника, Спа́са на́шего. Глаго́летъ бо къ ва́мъ Госпо́дь, я́ко единоревни́телемъ апо́стольскимъ: се́ да́хъ ва́мъ вла́сть на ду́хи нечи́стыя, я́коже тѣ́хъ изгони́ти, и цѣли́ти вся́кій неду́гъ и вся́кую я́зю. Тѣ́мже въ повелѣ́ніихъ Его́ до́брѣ жи́тельствовавше, ту́не прія́сте, ту́не подава́ете, исцѣля́юще стра́сти ду́шъ и тѣ́лесъ на́шихъ.

При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи. Потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве и спасе́ніе ду́шъ на́шихъ.

Влады́чице, пріими́ моли́твы рабо́въ Твои́хъ, и изба́ви на́съ отъ вся́кія ну́жды и печа́ли.

По кропле́ніи же ектенія́:

Поми́луй на́съ, Бо́же, [по вели́цѣй ми́лости Твое́й, мо́лимтися, услы́ши и поми́луй. Ли́къ: Го́споди поми́луй. [Три́жды.] ]

Еще́ мо́лимся, о е́же сохрани́тися [гра́ду сему́] [а́ще въ монастырѣ́: святѣ́й оби́тели се́й], и вся́кому гра́ду и странѣ́, отъ гла́да, губи́тельства, тру́са, пото́па, огня́, меча́, наше́ствія иноплеме́нниковъ и междоусо́бныя бра́ни; о е́же ми́лостиву и благоувѣ́тливу бы́ти Благо́му и Человѣколюби́вому Бо́гу на́шему, отврати́ти вся́кій гнѣ́въ, на ны́ дви́жимый, и изба́вити ны́ отъ належа́щаго и пра́веднаго Своего́ преще́нія, и поми́ловати ны́. [Ли́къ:] Го́споди поми́луй. [40.]

Іере́й: Услы́ши ны́, Бо́же Спаси́телю на́шъ, [упова́ніе всѣ́хъ конце́въ земли́ и су́щихъ въ мо́ри дале́че, и ми́лостивъ, ми́лостивъ бу́ди, Влады́ко, о грѣсѣ́хъ на́шихъ, и поми́луй ны́, ми́лостивъ бо и человѣколю́бецъ Бо́гъ еси́, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно и во вѣ́ки вѣко́въ]. Ли́къ: Ами́нь.

Іере́й: Ми́ръ всѣ́мъ. Ли́къ: И ду́хови твоему́. Діа́конъ: Главы́ ва́ша Го́сподеви приклони́те. Ли́къ: Тебѣ́, Го́споди.

Іере́й же глаго́летъ моли́тву велегла́сно:

Влады́ко Многоми́лостиве, Го́споди Іису́се Христе́, Бо́же на́шъ, [моли́твами Всепречи́стыя Влады́чицы на́шея Богоро́дицы и Приснодѣ́вы Марі́и, си́лою Честна́го и Животворя́щаго Креста́, предста́тельствы честны́хъ небе́сныхъ си́лъ безпло́тныхъ, честна́го сла́внаго Проро́ка, Предте́чи и Крести́теля Іоа́нна, святы́хъ сла́вныхъ и добропобѣ́дныхъ му́ченикъ, преподо́бныхъ и богоно́сныхъ оте́цъ на́шихъ, и́же во святы́хъ оте́цъ на́шихъ и вселе́нскихъ вели́кихъ учи́телей и святи́телей: Васи́лія Вели́каго, Григо́рія Богосло́ва и Іоа́нна Златоу́стаго; и́же во святы́хъ отца́ на́шего Никола́я, архіепи́скопа Мѵрликі́йскаго, чудотво́рца; и́же во святы́хъ оте́цъ на́шихъ, всея́ Россі́и чудотво́рцовъ: Петра́, Алексі́я, Іо́ны и Фили́ппа; святы́хъ и пра́ведныхъ Богооте́цъ Іоаки́ма и Анны; святы́хъ седми́ му́ченикъ Маккаве́й: Ави́ма, Антони́на, Гу́рія, Елеаза́ра, Евсево́на, Али́ма и Марке́лла, и ма́тере и́хъ святы́я Соломоні́и, и учи́теля и́хъ свята́го му́ченика Елеаза́ра, [и свята́го [имяре́къ], его́же е́сть хра́мъ,] и всѣ́хъ святы́хъ Твои́хъ, благопрія́тну сотвори́ моли́тву на́шу, да́руй на́мъ оставле́ніе прегрѣше́ній на́шихъ, покры́й на́съ кро́вомъ крилу́ Твое́ю, отжени́ отъ на́съ вся́каго врага́ и супоста́та, умири́ на́шу жи́знь, Го́споди, поми́луй на́съ и мі́ръ Тво́й, и спаси́ ду́ши на́ша, я́ко Бла́гъ и Человѣколю́бецъ]. И по молитвѣ, ликъ: Аминь.

И отпустъ.

Источникъ: Минíа, мѣ́сяцъ Аѵгустъ. — Кі́евъ: Въ тѵпогра́фіи Кі́ево-Пече́рской Ла́ѵры, 1863. — Л. 6 - 8 об.

/ Къ оглавленію раздѣла /


Наверхъ / Къ титульной страницѣ

0