Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Августа въ 1-й де́нь.
Происхожде́ніе честны́хъ дре́въ Честна́го и Животворя́щаго Креста́ и па́мять святы́хъ седми́ му́ченикъ Маккаве́й, и ма́тере и́хъ Соломонíи, и учи́теля и́хъ Елеаза́ра.

ВЕЧЕРЪ,
Обы́чная каѳи́сма. На Го́споди, воззва́хъ, стихи́ры на 6: Креста́ 3, гла́съ 4. Подо́бенъ: Зва́нный свы́ше.

Да ра́дуется тва́рь и игра́етъ:* дне́сь бо облиста́ Кре́стъ въ концѣ́хъ съ небесе́,* земна́я просвѣща́я,* и совоку́плены показа́ расточе́ныя.* Дне́сь лику́ютъ съ ли́ки а́нгельскими человѣ́цы,* и́бо браня́щее средогра́діе,* Кресто́мъ разоре́но,* во еди́но вся́ я́вѣ совокупи́.* Тѣ́мъ, предсія́я па́че со́лнца,* всю́ тва́рь просвѣща́етъ благода́тію,* и уясня́етъ, и спаса́етъ* вѣ́рно того́ чту́щія.

Па́че со́лнечныя зари́,* хотя́й мíрови, я́коже ски́птръ честны́й,* Царя́ Христа́* и кончи́ну показа́ти,* Кре́стъ Боже́ственный се́ предсія́етъ я́сно въ концѣ́хъ.* Се́й возведе́ изъ а́да ро́дъ человѣ́чь,* а́да вельми́ плѣни́въ,* врага́ низложи́въ,* де́моновъ горды́ню до конца́ погуби́.* Ны́нѣ же проявля́етъ воскресе́ніе Спа́сово* и спаса́етъ зову́щія:* умири́ мíръ и просвѣти́ ду́ши на́ша.

И святы́хъ 3, гла́съ 1. Подо́бенъ: Всехва́льніи му́ченицы.

Зако́на ве́рхъ,* седмію́ столпы́ возвы́шенъ,* мучи́тельство не поколеба́,* и́бо ско́тскій* гони́теля гнѣ́въ му́жески претерпѣ́ша,* тѣ́ло преда́вше сѣку́щимъ,* благоро́дніи ю́ноши и бра́тія,* Моисе́йскимъ преда́ніемъ храни́теліе.

Па́че зри́мыхъ* у́мъ вои́стинну возвы́сивше,* у́ды плотскíя отсѣца́ху,* благочести́віи и до́бліи о́троцы,* съ ма́терію богому́дрою,* вели́кими наде́ждами вжиля́еми,* я́же ны́нѣ получи́ша,* у Авраа́ма почи́вше на ло́нѣхъ, пра́отца своего́.

Душе́вною до́блестію* тве́рдо себе́ вооружи́вше,* и я́рость я́ко преоби́дѣвше,* проти́ву борцу́ крѣ́пко прилѣжа́ху* благоче́стія ра́ди* и зако́на оте́ческаго хране́ніемъ,* свяще́ннѣйшій Елеаза́ръ* и прему́дріи ю́ноши* съ ма́терію богому́дрою.

Сла́ва, гла́съ 8. Іоа́нна мона́ха:

Святíи Маккаве́и мучи́телю глаго́лаху: на́мъ, о Антіо́ше, еди́нъ Ца́рь Бо́гъ, отъ Него́же бы́хомъ и къ Нему́ обраща́емся: мíръ жде́тъ и́нъ на́съ, ви́димаго высоча́йшій и твердѣ́йшій, оте́чество же на́мъ — Іерусали́мъ крѣ́пкій и неги́бнущій, торжество́ же — е́же со а́нгелы житіе́. Го́споди, моли́твами и́хъ поми́луй и спаси́ на́съ.

И ны́нѣ, гла́съ то́йже. Іоа́нна мона́ха:

Его́же дре́вле Моисе́й прообразова́въ собо́ю, Амали́ка низложи́въ, побѣди́, и Дави́дъ пѣснопѣ́вецъ подно́жію Твоему́, вопія́, кла́нятися повелѣва́ше, Честно́му Кресту́ Твоему́, Христе́ Бо́же, дне́сь, грѣ́шніи, кла́няемся, устна́ми недосто́йными Тя́, изво́лившаго пригвозди́тися на не́мъ, воспѣва́юще, мо́лимся: Го́споди, съ разбо́йникомъ Ца́рствія Твоего́ сподо́би на́съ.

На стихо́внѣ окто́иха. Сла́ва, гла́съ 8. Космы́ мона́ха:

Ду́ши пра́ведныхъ въ руцѣ́ Госпо́дни, я́коже Авраа́ма, и Исаа́ка, и Іа́кова, и́же пре́жде зако́на пра́отцы и Маккаве́овъ пра́дѣди, ны́нѣ восхваля́емыхъ отъ на́съ: сíи бо крѣпкоду́шніи Авраа́мстіи вну́цы су́ще, вѣ́рѣ поревнова́вше своего́ пра́отца Авраа́ма, и да́же до сме́рти подвиза́шася за благоче́стіе. Благоче́стно бо воспита́вшеся и зако́нно пострада́вше, нече́стіе обличи́ша го́рдаго Антіо́ха и, ничто́же предпоче́тше вре́менныя жи́зни, вѣ́чныя ра́ди, вся́ Бо́гу возложи́ша: ду́шу, му́жество, ра́зумъ, тѣ́ло мя́гкое и воздая́нія чистоты́ воспита́ніемъ. О, ко́рене благочести́ва, изъ него́же вы́ прозябо́сте, Маккаве́и! О, ма́тере святы́я, ро́ждшія равночи́сленное седмери́цы число́! Но мо́лимъ ва́съ, Маккаве́и, съ ма́терію ва́шею Соломонíею и му́дрымъ свяще́нникомъ Елеаза́ромъ, егда́ предстоите́ Христу́ Бо́гу, Его́же ра́ди потруди́стеся, труды́ плодо́въ ва́шихъ прія́ти отъ Него́, прилѣ́жну мольбу́ сотвори́те о человѣ́чествѣ: твори́тъ бо, ели́ко хо́щетъ, и испо́лнитъ хотѣ́нія ва́ша, боя́щихся Его́.

И ны́нѣ, гла́съ то́йже:

Гла́съ проро́ка Твоего́ Моисе́я, Бо́же, испо́лнися, глаго́ляй: у́зрите живо́тъ ва́шъ, ви́сящъ предъ очесы́ ва́шими. Дне́сь Кре́стъ воздвиза́ется, и мíръ отъ ле́сти свобожда́ется; дне́сь Христо́во воскресе́ніе обновля́ется, и концы́ земли́ ра́дуются, въ кимва́лѣхъ Дави́дски пѣ́снь Тебѣ́ принося́ще и глаго́люще: содѣ́лалъ еси́ спасе́ніе посредѣ́ земли́, Бо́же, Кре́стъ и воскресе́ніе, и́хже ра́ди на́съ спа́слъ еси́, Бла́же и Человѣколю́бче, Всеси́льне Го́споди, сла́ва Тебѣ́.

Тропа́рь, гла́съ 1:

Болѣ́зньми святы́хъ, и́миже о Тебѣ́ пострада́ша, умоле́нъ бу́ди, Го́споди, и вся́ на́ша болѣ́зни исцѣли́, Человѣколю́бче, мо́лимся.

Сла́ва, и ны́нѣ, гла́съ то́йже:

Спаси́, Го́споди, лю́ди Твоя́ и благослови́ достоя́ніе Твое́, побѣ́ды Благовѣ́рному Импера́тору на́шему [и́мярекъ], на сопроти́вныя да́руя и Твое́ сохраня́я Кресто́мъ Твои́мъ жи́тельство.

З р и:   Извѣ́стно же да быва́етъ: Яко пре́жде клепа́нія вхо́дитъ іере́й въ сосудохрани́тельницу и полага́етъ Честны́й Кре́стъ на же́ртвенницѣ. И по отпуще́ніи вече́рни іере́й и діа́конъ облеку́тся въ ри́зы. И діа́конъ покади́тъ Честны́й Кре́стъ и рече́тъ: Благослови́, влады́ко. Іере́й: Благослове́нъ Бо́гъ на́шъ... Та́же: Трисвято́е, по Отче на́шъ: тропа́рь Креста́. Сла́ва, и ны́нѣ: конда́къ. И взима́етъ іере́й Кре́стъ съ блю́домъ на главу́ и вно́ситъ во олта́рь, предъи́дутъ предъ ни́мъ со двѣма́ лампа́дами. И полага́етъ Кре́стъ на трапе́зѣ, на Ева́нгельскомъ мѣ́стѣ, а Ева́нгеліе на го́рнее мѣ́сто. И возжгу́тъ предъ ни́мъ свѣщу́ на всю́ но́щь.


НА УТРЕНИ,

На Бо́гъ Госпо́дь: тропа́рь Креста́, два́жды. Сла́ва: му́чениковъ. И ны́нѣ: Креста́. И обы́чныя каѳи́смы, и сѣда́льны окто́иха. И чте́ніе. Кано́нъ окто́иха еди́нъ на 4 и Креста́ на 6, гла́съ 6, и му́чениковъ на 4, гла́съ 8.

Аще ли случи́тся пра́здникъ се́й въ суббо́ту и а́ще хра́мъ Христо́въ или́ Богоро́дицы, и пое́мъ кано́нъ хра́ма со ирмосо́мъ на 4, и Креста́ на 6, и святы́хъ на 4. Катава́сія: Кре́стъ начерта́въ...

Кано́нъ Креста́, его́же краегране́сіе: Кресту́ покланя́юся, вѣ́рныхъ спасе́нію. Гла́съ 6.

Пѣ́снь 1.

Ирмо́съ: Яко по су́ху, пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Кресту́, вѣ́рныхъ спасе́нію, покланя́юся, и те́плѣ облобыза́ю, и, объе́мля, вопію́: Дре́во всеблаже́нное Христо́во, ду́шу мою́ и у́мъ просвѣти́, молю́ся.

Побѣдоно́сно яви́ся на стра́сти и бѣ́сы дне́сь зна́меніе Креста́. Тѣ́мже, вѣ́рніи вси́, свѣ́тло просвѣ́щше ду́ши, ны́нѣ облобыза́емъ.

Лучеза́рная облиста́етъ сія́нія Кре́стъ Честны́й и просвѣща́етъ вѣ́рно покланя́ющіяся ему́ дне́сь, освяща́я ду́ши на́ша и тѣлеса́.

Жизнода́тельный Кре́стъ предлежа́щъ и зри́мь свѣтови́дную зарю́ препосыла́етъ благода́тей: присту́пимъ и пріи́мемъ просвѣще́ніе, весе́ліе, и спасе́ніе, и оставле́ніе, хвале́ніе Го́сподеви принося́ще.

Богоро́диченъ: Пресвята́я Дѣ́во, Яже Христа́ пло́тію ро́ждши, пострада́вшаго на́съ ра́ди во́лею на Крестѣ́, Тя́ блажа́щія че́стно, спаса́й мольба́ми Твои́ми.

Инъ кано́нъ му́чениковъ на 4, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петского зла́ избѣжа́въ, израильтя́нинъ вопія́ше: Изба́вителю и Бо́гу на́шему пои́мъ.

Ли́къ седмочи́сленныхъ страда́лецъ, я́влься еди́нымъ нра́вомъ въ лю́тыхъ, по утвержде́нію оте́ческаго зако́на, умре́ти не отреко́шася.

Сла́ву презрѣ́вше, я́же на земли́, жела́ніемъ Боже́ственнаго Ца́рствія, вся́ку болѣ́знь претерпѣ́ша боже́ственніи Маккаве́и, тѣ́мже досто́йно ны́нѣ чту́тся.

Зако́на храни́теліе Моисе́ева, вои́стинну до́бліи Маккаве́и, бра́тія дру́гъ со дру́гомъ яви́шася, внегда́ попра́ти и́мъ Антіо́хово безбо́жіе.

Богоро́диченъ: Чи́ни Тя́ а́нгелъ и человѣ́къ, Безневѣ́стная Ма́ти, восхваля́ютъ непреста́нно: Зижди́теля бо всѣ́хъ, я́ко Младе́нца, на руку́ Твое́ю понесла́ еси́.

Катава́сія: Кре́стъ начерта́въ, Моисе́й впря́мо жезло́мъ Чермно́е пресѣче́, Изра́илю пѣшоходя́щу; то́же обра́тно фарао́новымъ колесни́цамъ, уда́ривъ, совокупи́, вопреки́ написа́въ непобѣди́мое ору́жіе. Тѣ́мъ Христу́ пои́мъ, Бо́гу на́шему, я́ко просла́вися.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Ору́жіе дре́вле жи́зни блаже́нное дре́во дарова́ся храни́ти, за преслуша́ніе первозда́ннаго Ада́ма, Кре́стъ же сему́ пу́ть сотвори́.

Очи́ма, устна́ми и душа́ми, ли́цы и сердцы́ поклони́мся вси́ Пресвято́му Кресту́ Жизнода́вца Христа́, и́мже мíръ ве́сь освяща́ется.

Хра́мы Бо́гу проро́чески дне́сь бы́вше, покланя́ющеся дре́ву Пресвята́го Креста́, и наслѣ́дницы Его́, со стра́хомъ вси́ цѣлу́емъ.

Пѣсносло́вимъ тя́, Кре́сте, и вѣ́рою моля́щіися си́лѣ твое́й: изми́ на́съ сѣте́й вра́жіихъ, и упра́ви на́съ къ приста́нищу всѣ́хъ спасе́нія, пою́щихъ тя́.

Богоро́диченъ: Дѣ́вою родила́ еси́ Сы́на, пре́жде Тебе́ рожде́ннаго отъ Отца́ пре́жде вѣ́къ, безъ ма́тере отъ Бо́га, распя́таго пло́тію, да спасе́тъ пре́жде согрѣ́шшія.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, Еди́не Человѣколю́бче.

По оте́ческимъ ходя́ще исправле́ніемъ зако́ннымъ, блаже́нніи Христо́вы страда́льцы, жи́знь нестарѣ́емую ва́шими стяжа́сте кровьми́, прехва́льніи.

Ни о́гнь, ни ме́чь преврати́ти когда́ возмо́же, до́блесть нра́ва, блаже́нніи, ва́шу, я́же въ вѣ́рѣ, въ не́йже упраздни́сте мучи́телей шата́нія.

Му́ки претерпѣ́ша за Христа́ Бо́га, прехва́льніи му́ченицы, и свы́ше прія́ша побѣ́ды по́чести, непреста́нно моля́щеся спасти́ ду́ши на́ша.

Богоро́диченъ: Дѣ́вою родила́ еси́, Неискусобра́чная, и Дѣ́вою пребыла́ еси́ Ма́ти Безневѣ́стная, Богоро́дице Марíе, Христа́ Бо́га на́шего моли́ спасти́ся на́мъ.

Катава́сія: Же́злъ во о́бразъ та́йны пріе́млется, прозябе́ніемъ бо предразсужда́етъ свяще́нника, неплодя́щей же пре́жде Це́ркви, ны́нѣ процвѣте́ дре́во Креста́, въ держа́ву и утвержде́ніе.

Конда́къ святы́хъ, гла́съ 2. Подо́бенъ: Вы́шнихъ ища́.

Прему́дрости Бо́жія столпи́ седмочи́сленніи и Боже́ственнаго Свѣ́та свѣти́льницы седмосвѣ́щніи, Маккаве́и всему́дріи, пре́жде му́чениковъ преве́ліи му́ченицы, съ ни́миже всѣ́хъ Бо́гу моли́теся, спасти́ся почита́ющимъ ва́съ.

Икосъ:

Хвали́ те́плѣ, Сіо́не, Бо́га твоего́, я́ко укрѣпи́лъ е́сть се́й вереи́ вра́тъ твои́хъ, и сы́ны твоя́ благослови́. Сíи бо, я́ко во́инство непобѣди́мое, ополче́ніе вои́стинну до́блественно и крѣпкому́дренно, проти́ву кова́рствомъ злочести́выхъ богому́дренно ста́ша, вку́пѣ побѣ́ды вѣнцы́ небе́снаго Сіо́на пріе́млютъ и Боже́ственному престо́лу предстоя́тъ, о всѣ́хъ непреста́нно моля́щеся. Проси́те спасти́ся пою́щимъ ва́съ.

Сѣда́ленъ святы́хъ, гла́съ 8. Подо́бенъ: Прему́дрости.

Благоче́стно наказа́вшеся, о́троцы му́дріи, му́ченически, мучи́телей преще́нія му́жески посрами́сте, я́ко зако́на побо́рницы и отцу́ послу́шницы бы́сте, святíи, съ ма́терію богому́дрою усе́рдно пострада́сте. Тѣ́мже и сме́ртію живо́тъ иску́пльше вои́стинну небе́сный, вѣ́чно ра́дуетеся, Маккаве́и крѣпкоду́шніи, моли́те Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять ва́шу.

Сла́ва, и ны́нѣ, Креста́, гла́съ 6:

Кре́стъ Тво́й, Го́споди, освяти́ся, въ не́мъ бо быва́ютъ исцѣле́нія немощны́мъ во грѣсѣ́хъ, его́же ра́ди припа́даемъ Ти́: поми́луй на́съ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Да кропи́тъ вся́ земля́ ра́дованіе, да веселя́тся древа́ дубра́вная, дне́сь обоже́на Всечестны́мъ Кресто́мъ, сія́ющи конце́мъ.

Показа́вый орга́нъ умерщвле́нія, живоно́сно мíрови, побѣдотво́рное ору́жіе непобѣди́мое, пресла́вный Кре́сте, сердца́ на́ша просвѣти́.

Ты́ Боже́ственная побѣ́да, ты́ содѣ́лованіе на́шего спасе́нія, ты́ вѣ́рнымъ соодолѣ́ніе и Боже́ственная же́ртва, о, Всечестны́й Кре́сте, пою́щія тя́ освяти́!

Не́бо все́й земли́ свесели́тся, страстоте́рпцы, му́ченицы, апо́столи, ду́ши пра́ведныхъ ра́достно ны́нѣ ра́дуются, и вся́ спаса́етъ зри́мо предлежа́щее посредѣ́ жизнода́тельное Дре́во, и вѣ́рныя освяща́етъ благода́тію.

Богоро́диченъ: Вои́стинну Ты́ яви́лася еси́, вои́стинну родила́ еси́ Сы́на Вы́шняго, на Крестѣ́ ру́цѣ просте́ршаго, Дѣ́во Ма́ти Марíе, и мíръ призва́вшаго.

Инъ.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тся богови́дно усмотри́ и со стра́хомъ славосло́вяше си́лу Твою́.

Зако́нъ, блаже́нніи, написа́вше, я́коже дре́вле Моисе́й, во свои́хъ скрижа́лѣхъ по́мысла: не преступи́сте сего́ да́же до сме́рти, но тве́рдо подвиза́стеся.

Зако́нныя Бо́гу принося́ще же́ртвы, и Моисе́йскому ревну́юще житію́, преоби́дѣша вся́ко законоположе́ніе мучи́тельское, страстоте́рпцы Христо́вы.

Якоже ка́мень во́лненное стоя́ніе, си́це мно́ги му́ки, страда́льцы, му́жескимъ умо́мъ, Маккаве́и, да́же до сме́рти претерпѣ́сте.

Тро́иченъ: Безнача́льная Тро́ице, Еди́нице покланя́емая, сопресто́льная Еди́нице, Тро́ице воспѣва́емая, му́ченикъ мольба́ми изба́ви на́съ отъ бѣ́дъ и напа́стей, воспѣва́ющихъ Тя́.

Богоро́диченъ: Ра́дуйся отъ на́съ, Свята́я Богоро́дице; ра́дуйся, ра́дость ро́ждшая мíрови; ра́дуйся, еди́на заступле́ніе человѣ́комъ, благослове́нная Богоро́дице Чи́стая.

Катава́сія: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́ве Бо́жій, и́стиннаго Бо́га, отъ мра́ка грѣхо́внаго взыва́юща.

Подъи́мемъ съ ра́достію преблаже́нный Кре́стъ, въ це́рквахъ и градѣ́хъ се́й предложе́нный, и поклони́мся, да долго́въ пріи́мемъ оставле́ніе.

Умерщвля́ется змíй лука́вый ны́нѣ, и́же тмы́ нача́льникъ, сія́нія не терпя́, е́же облиста́етъ Живоно́сный Кре́стъ, Боже́ственнаго Царя́ ски́птро честно́е.

Яко пресвѣ́тла звѣзда́ и я́ко би́серъ благолѣ́пенъ и пресія́нное со́лнце, вся́ озаря́етъ земли́ концы́ Кре́стъ Госпо́день, его́же облобыза́емъ.

Воскли́кните, язы́цы, воспо́йте, игра́йте, колѣ́на, и по́йте Бо́гу, да́вшему Креста́ неруши́мое утвержде́ніе, е́же ны́нѣ предлежи́тъ; вси́ вѣ́рніи, ра́дуемся, я́ко того́ ра́ди блага́я пріе́млюще.

Богоро́диченъ: Спасе́нію Тя́ нача́ло, вси́ вѣ́рніи, вѣ́дуще, ублажа́емъ, Чи́стая: Ты́ бо пре́жде Су́щаго пло́тію родила́ еси́, хотѣ́ніемъ Свои́мъ пригвожде́нна на Крестѣ́.

Инъ.

Ирмо́съ: Отъ но́щи невѣ́дѣнія Боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Якоже оте́ческій зако́нъ не разо́рше, святíи му́ченицы, вѣнцы́ пра́ведными Христо́съ ва́съ Са́мъ вѣнча́.

Елеаза́ру равноста́тни въ ра́зумѣ я́вльшеся, блаже́нніи дѣ́ти, и принесо́стеся со о́нѣмъ Христу́, духо́вное всесожже́ніе.

Иже святы́ми свобожда́яй отъ ле́сти вся́ческая, спаси́ на́съ, Го́споди, тѣ́хъ моли́твами, я́ко Благоутро́бенъ.

Богоро́диченъ: Херуви́мовъ я́вльшися честнѣ́йши, Дѣ́во Всепѣ́тая, моли́ся Сы́ну Твоему́, спасти́ ду́ши пою́щихъ Тя́.

Катава́сія: О, треблаже́нное Дре́во, на не́мже распя́ся Христо́съ, Ца́рь и Госпо́дь! и́мже паде́ дре́вомъ прельсти́вый, Тобо́ю прельсти́вся, Бо́гу пригвозди́вшуся пло́тію, подаю́щему ми́ръ душа́мъ на́шимъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Яко Боже́ственъ сосу́дъ, я́ко свѣти́льникъ свѣ́телъ, въ це́рквахъ дне́сь, и въ хра́мѣхъ, и градѣ́хъ Кре́стъ предлежи́мь ви́дяще, и Уясни́вшаго сего́ воспое́мъ.

Умерщвля́ется сме́рть, и уморя́ется тлѣ́ніе, и бѣсо́встіи полцы́ отбѣга́ютъ, побѣ́дный и стра́шный дне́сь предлежа́щь ви́дяще Кре́стъ Христо́въ, не смѣ́юще прикосну́тися ему́.

Воспѣва́юще Тя́, Бо́га, и Царя́, и Го́спода, я́ко дарова́лъ еси́ на́мъ Кре́стъ — стѣ́ну неруши́му, его́же ны́нѣ облобыза́емъ ра́достію, и лю́тыхъ отбѣга́емъ.

Богоро́диченъ: Ядомъ зміи́нымъ пра́баба пи́щею, я́же во Еде́мѣ, пома́зася; Дѣ́ва же, ро́ждши Нача́льника жи́зни, источи́ мíру нетлѣ́ніе и воскресе́ніе.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Ри́зою себе́ му́ченическою одѣ́явше, святíи, сію́ труды́ страда́нія ва́шего испестри́сте.

Жела́юще бы́ти со Христо́мъ, всесла́вніи му́ченицы, тече́ніе страда́нія неукло́ннымъ по́мысломъ преидо́сте.

Зако́нъ, и́же предаде́ Моисе́й, храня́ще, святíи, зако́нно пострада́ша, посра́мльше Антіо́ха мучи́теля.

Богоро́диченъ: Еди́на сло́вомъ пло́тію Сло́ва ро́ждшая, изба́ви, мо́лимся, отъ сѣте́й врага́ ду́ши на́ша.

Катава́сія: Во́днаго звѣ́ря во утро́бѣ дла́ни Іо́на крестови́дно распросте́ръ, спаси́тельную стра́сть прообража́ше я́вѣ, тѣ́мъ, тридне́венъ изше́дъ, премíрное Воскресе́ніе пропи́саше, пло́тію пригвожде́ннаго Христа́ Бо́га и тридне́внымъ воскресе́ніемъ мíръ просвѣ́щшаго.

Конда́къ, гла́съ 4. Подо́бенъ:

Вознесы́йся на Кре́стъ во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ си́лою Твое́ю Благовѣ́рнаго Импера́тора на́шего [и́мярекъ], побѣ́ды дая́ Ему́ на сопоста́ты, посо́біе иму́щу Твое́, ору́жіе мíра непобѣди́мую побѣ́ду.

Икосъ:

Иже до тре́тіяго небесе́ восхище́нъ бы́сть въ ра́й, и глаго́лы слы́шавъ неизрече́нныя и боже́ственныя, и́хже не лѣ́ть язы́ки человѣ́ческими глаго́лати, что́ Гала́томъ пи́шетъ, я́ко рачи́теліе писа́ній прочто́сте и позна́сте: мнѣ́, глаго́летъ, хвали́тися да не бу́детъ, то́кмо во еди́номъ Крестѣ́ Госпо́дни, на не́мже страда́въ, уби́ стра́сти. Того́ у́бо и мы́ извѣ́стно да держи́мъ, Кре́стъ Госпо́день, хвалу́ вси́: е́сть бо на́мъ спаси́тельное сіе́ Дре́во, ору́жіе ми́ра, непобѣди́мая побѣ́да.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Спаси́тельному дре́ву поклони́мся, Кресту́ пресвято́му, ему́же слу́жатъ а́нгельская вся́ во́инства, предлежа́щь ви́дяще, вѣ́рніи, источа́ющъ на́мъ освяще́ніе и жи́знь.

Побѣдоно́сный яви́ся пресвяты́й Кре́стъ, Животода́вца Христа́, свы́ше же бѣсо́мъ всѣ́хъ мно́жество отгоня́, ва́рварское шата́ніе, и побѣди́теля явля́я Импера́тора на́шего.

Яко одушевле́ну, тебѣ́, припа́дая, взыва́ю, Кре́сте мо́й пресвяты́й: ты́ ми́ просвѣти́ ду́шу, и у́мъ, и слу́хъ, и устнѣ́, и язы́къ, и дыха́ніе, и о́чи къ путе́мъ Ца́рства Христо́ва.

Пое́мъ, сла́вимъ, и покланя́емся, и велича́емъ Твою́, Христе́, держа́ву, я́ко подаде́ на́мъ, рабо́мъ Твои́мъ, Кре́стъ Боже́ственный, сла́дость неисчерпа́емую и храни́лище душа́мъ и тѣ́ломъ на́шимъ.

Богоро́диченъ: Юноши три́ пе́щь не опали́, Рождество́ прообразу́ющи Твое́: и́бо Боже́ственный о́гнь Тя́ не опали́, всели́вся въ Тя́ и вся́ научи́въ пѣ́ти: благослове́нъ Бо́гъ оте́цъ на́шихъ.

Инъ.

Ирмо́съ: Въ нача́лѣ зе́млю основа́вый, и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Му́ченическими пострада́вше болѣ́зньми, мучи́тельскихъ не устраши́стеся преще́ній, Христу́ вопію́ще: благослове́нъ Бо́гъ оте́цъ на́шихъ. [Два́жды.]

Терпѣ́нія пожда́вше болѣ́зней, вра́жія лю́тая побѣди́сте кова́рства, Христу́ вопію́ще: благослове́нъ Бо́гъ оте́цъ на́шихъ.

Богоро́диченъ: Иже во утро́бу Дѣ́выя всели́выйся, и Тоя́ ра́ди Ада́ма обно́вль, благослове́нъ Бо́гъ оте́цъ на́шихъ.

Катава́сія: Безу́мное велѣ́ніе мучи́теля злочести́ваго лю́ди поколеба́, ды́шущее преще́ніе и злохуле́ніе богоме́рзкое, оба́че три́ о́троки не устраши́ я́рость звѣ́рская, ни о́гнь снѣда́яй, но, противоды́шущу росоно́сному Ду́ху, со огне́мъ су́ще, поя́ху: препѣ́тый отце́въ и на́съ Бо́же, благослове́нъ еси́.

Пѣ́снь 8.

Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо въ мертвецѣ́хъ вмѣня́ется въ вы́шнихъ Живы́й, и во гро́бъ ма́лъ страннопріе́млется. Его́же, о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Тво́й Кре́стъ прообразу́я Іа́ковъ иногда́, на вну́ки поло́жь дла́ни премѣ́нно и благослови́въ и́хъ, благода́ти во язы́цѣхъ науча́я: о́троцы, благослови́те, свяще́нніи, по́йте, лю́діе, превозноси́те Его́ во вѣ́ки.

О, неизрече́ннаго Твоего́, Христе́, сни́тія и неизглаго́ланныхъ благи́хъ! Воплоти́ся и, ра́спятъ бы́въ, сме́рть пріе́мъ, и рѣши́ши человѣ́ки отъ кля́твы, источи́въ нетлѣ́ніе на треблаже́ннѣмъ Дре́вѣ, препросла́вленный Кре́стъ се́й во вѣ́ки.

Пресвяты́й Кре́стъ, Боже́ственную побѣ́ду, жи́зни нача́льника, ле́сти потреби́теля, дне́сь похва́лимъ Кре́стъ всесвяты́й Госпо́день, бѣсо́въ губи́теля и ва́рваровъ прогони́теля, царе́й побѣдотво́рца и покрови́теля.

Богоро́диченъ: Гвоздьми́ пригвожде́на Христа́, копіе́мъ прободе́на въ нетлѣ́нная ре́бра, тро́стіемъ въ главу́ біе́ма, же́лчь вкуша́юща, зря́щи, Дѣ́ва вопія́ше: гдѣ́ Твоя́ добро́та за́йде, прекра́сное Сло́во, Препросла́вленне па́че сыно́въ человѣ́ческихъ?

Инъ.

Ирмо́съ: Безнача́льнаго Царя́ сла́вы, Его́же трепе́щутъ небе́сныя си́лы, по́йте, свяще́нницы, лю́діе, превозноси́те во вся́ вѣ́ки.

Истины рачи́теліе и зако́на извѣ́стніи храни́теліе бы́вше, прехва́льніи му́ченицы, пое́те Христа́ во вѣ́ки.

Седмора́сленный пло́дъ свята́го ко́рене, я́ко вои́стинну, се́дмь Маккаве́и, му́ченики Госпо́дни, почти́мъ досто́йно.

Зако́ну ревни́тели, единоду́шныя страда́льцы, вѣ́рніи, се́дмь Маккаве́и съ ро́ждшею и́хъ почти́мъ досто́йно.

Тро́иченъ: Тро́ице нераздѣли́мая Еди́нице, въ Божествѣ́ сла́влю Еди́ну и въ тріе́хъ пою́ Тя ли́цѣхъ, Еди́ну си́лу.

Богоро́диченъ: Въ послѣ́дняя на́съ ра́ди, отъ Дѣ́вы воплоще́ннаго Бо́га, свяще́нницы по́йте, и превозноси́те Его́ во вѣ́ки.

Катава́сія: Благослови́те, о́троцы, Тро́ицы равночи́сленніи, Содѣ́теля Отца́ Бо́га, по́йте снизше́дшее Сло́во и о́гнь въ ро́су претво́ршее, и превозноси́те всѣ́мъ жи́знь подава́ющаго Ду́ха Всесвята́го во вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Тлѣ́нни отъ преслуша́нія бы́хомъ, Бо́жія за́повѣди престу́пницы я́вльшеся: сего́ ра́ди сме́рть пріи́де человѣ́комъ. Тѣ́мже безсме́ртіе процвѣте́ дне́сь — побѣ́дный Кре́стъ Христо́въ, его́же цѣлу́емъ.

Се́ Дре́во пресвято́е, крѣ́пкая наде́жда вѣ́рнымъ яви́ся, кля́твы избавле́ніе, человѣ́комъ ра́дость предлежи́тъ, облича́я тмы́ нача́льника, сему́ поклони́мся, вѣ́рніи, съ весе́ліемъ.

Нача́ло благослове́нія, и утвержде́ніе христіа́нъ, и стѣна́, и тве́рдое заступле́ніе, и кля́твы избавле́ніе яви́ся на́мъ Дре́во вожделѣ́нное, ору́жіе непобѣди́мое, просвѣти́ и освяти́ на́съ, покланя́ющихся тебѣ́.

Богоро́диченъ: Хра́ме и две́ре освяще́нія, Престо́ле Бо́жій, о́блаче и свѣ́щниче всесвѣ́тлый и ковче́же благода́ти, Всенепоро́чная, че́стнѣ покланя́ющіяся о́бразу честно́му Единоро́днаго Твоего́ Сы́на, покры́й и сохрани́.

Инъ.

Ирмо́съ: Велича́емъ Тя́, Ма́терь Бо́жію, и сла́вимъ Тя́, Богоро́дице Дѣ́во, я́ко Спа́са ро́ждшую ду́шъ на́шихъ.

Сокро́вище Боже́ственныхъ дарова́ній вои́стинну показа́стеся, бога́тство неотъе́млемое, всехва́льни му́ченицы.

Моли́твенницы до́бліи къ Зижди́телю всѣ́хъ су́ще, испроси́те невла́емую жи́знь душа́мъ на́шимъ.

Иже Боже́ственною ре́вностію и теплото́ю души́ творя́щія ва́шу па́мять сохрани́те неснѣда́емы отъ лука́ваго.

Тро́иченъ: Съ Сы́номъ Отцу́ и Ду́ху пра́вому поклони́мся, со а́нгелы зову́ще: сла́ва въ вы́шнихъ Бо́гу.

Богоро́диченъ: Ра́дуйся, две́ре свята́я, Бо́гу отве́рстая, еди́ному Прему́дрому, Юже осѣни́ Ду́хъ Пресвяты́й.

Катава́сія: Та́инъ еси́, Богоро́дице, ра́й, невоздѣ́ланно возрасти́вшій Христа́, Имже кре́стное живоно́сное на земли́ насади́ся Дре́во; тѣ́мъ, ны́нѣ возноси́му, покланя́ющеся ему́, Тя́ велича́емъ.

Свѣти́ленъ окто́иха. Сла́ва, му́чениковъ:

Чу́дныя воспое́мъ Маккаве́и, Еліаза́ра, о́троки и Соломонíю: сíи бо низложи́ша шата́нія началозло́бнаго змíя и, зако́на служи́теліе бы́вше, вѣнча́шася.

И ны́нѣ, Креста́:

Кре́стъ — храни́тель всея́ вселе́нныя, Кре́стъ — красота́ Це́ркве, Кре́стъ — царе́й держа́ва, Кре́стъ — вѣ́рныхъ утвержде́ніе, Кре́стъ — а́нгеловъ сла́ва и де́моновъ я́зва.

На хвали́техъ стихи́ры на 6: Креста́ 3, гла́съ 1. Подо́бенъ: Небе́сныхъ чино́въ.

Небе́сная ше́ствія* Кре́стъ Честны́й гото́витъ всѣ́мъ,* тому́ покланя́ющимся вѣ́рою несумнѣ́нною,* и лико́мъ невеще́ственныхъ си́лъ,* Иже на не́мъ Пригвозди́выйся,* сочета́етъ любо́вію пою́щія того́.

Кла́няющеся вѣ́рою Кресту́ Честно́му,* на не́мъ распе́ншагося воспое́мъ Влады́ку,* Того́ манове́ніемъ,* устнѣ́ вку́пѣ и ду́шу очища́юще,* и сія́ніи сего́ мы́сленными уясни́мся,* хва́ляще его́.

Го́ресть дре́вле услажда́я, Моисе́й* изба́ви Изра́иля,* о́бразъ Креста́ напису́я,* мы́ же сего́, вси́ вѣ́рніи,* та́йно и боже́ственно вообража́юще въ сердца́хъ на́шихъ,* всегда́ спаса́емся держа́вою его́.

И святы́хъ 3, самогла́сны, гла́съ то́йже:

Многострада́льная ма́ти, къ подвиго́мъ созва́вши своя́ дѣ́ти, глаго́лаше: Авраа́мстѣй сѣди́нѣ послѣ́дуйте, да заколе́нію Исаа́кову причастите́ся. Тíи же пріима́ху наставля́ющую, предпостиза́ху уча́щую, дру́гъ по дру́зѣ томле́нія му́ки ви́дяще, и́хже моли́твами, Бо́же, поми́луй на́съ.

Гла́съ 4:

Се́дмь столпи́ избра́нніи, отъ еди́наго ка́мене слове́снаго усѣ́чени бы́ша, непоколеби́мь показа́ша зако́на сто́лпъ. Тѣ́мже благоволи́, Спа́се, въ ми́рѣ сохрани́тися душа́мъ на́шимъ.

Гла́съ 5:

Иже зако́на храни́теліе и Соломонíи сы́нове, на суди́щи стра́ждуще, ко Антіо́ху вопія́ху: мы́, Антіо́ше, за оте́ческій зако́нъ терпи́мъ. Не отлучи́тъ же на́съ ни о́гнь, ни ме́чь, ни звѣ́ріе, ни ра́ны, но вку́пѣ у́мремъ съ ма́терію ста́рицею и учи́телемъ отце́мъ, живу́ще и сра́дующеся въ неконча́емыя вѣ́ки.

Сла́ва, гла́съ 4:

На Маккаве́и собра́вшуюся ра́ть, пріиди́те, у́зримъ, вѣ́рніи, му́жество: мучи́тель бо ца́рь, вся́ язы́ки удержа́въ, держи́мь бѣ́яше отъ ста́рца и дѣте́й седьми́ и еди́ныя жены́. Тѣ́мже моли́твами и́хъ, Бо́же, поми́луй на́съ.

И ны́нѣ, Креста́, гла́съ то́йже:

Пособи́вый, Го́споди, кро́ткому Дави́ду покори́ти иноплеме́нника, Вѣ́рному на́шему Импера́тору [и́мярекъ] спобо́рствуй, и ору́жіемъ Креста́ низложи́ враги́ на́ша. Покажи́, Благоутро́бне, на на́съ дре́внія ми́лости Твоя́, и да разумѣ́ютъ вои́стинну, я́ко Ты́ еси́ Бо́гъ, и, на Тя́ надѣ́ющіися, побѣжда́емъ, моля́щіися обы́чно Пречи́стѣй Твое́й Ма́тери, дарова́тися на́мъ ве́ліей ми́лости.

Славосло́віе вели́кое, ти́хо, со гла́сомъ.

Іере́ю же оболче́ну су́щу во всю́ оде́жду свяще́нническую, прихо́дитъ съ кади́ломъ къ святѣ́й трапе́зѣ, предходя́щу ему́ діа́кону съ лампа́дою, и кади́тъ святу́ю трапе́зу и Честны́й Кре́стъ, и та́ко взима́етъ Честны́й Кре́стъ съ блю́домъ на главу́, и исхо́дитъ сѣ́верными дверьми́ изъ олтаря́, предъиду́щимъ ему́ со двѣма́ лампа́дами и съ кади́ломъ; прихо́дитъ же пря́мо ца́рскихъ двере́й, и стои́тъ, ожида́я конца́ трисвята́го. Кончава́ему же трисвято́му, возглаша́етъ іере́й: Прему́дрость, про́сти. И кли́рицы пою́тъ тропа́рь: Спаси́, Го́споди, лю́ди Твоя́..., три́жды. И та́ко прихо́дитъ іере́й, нося́ на главѣ́ Честны́й Кре́стъ, предъ святы́я ца́рскія две́ри ко анало́гію, ему́же укра́шену су́щу, полага́етъ на не́мъ Честны́й Кре́стъ. И твори́тъ поклоне́ніе Честно́му Кресту́, три́жды, поя́ тихогла́сно: Кресту́ Твоему́ покланя́емся, Влады́ко, и свято́е воскресе́ніе Твое́ сла́вимъ. И ли́кове то́же пою́тъ велегла́сно, три́жды. Та́же цѣлу́ютъ Честны́й Кре́стъ и покланя́ются па́ки еди́ною.

Пою́ще стихи́ры самогла́сны, гла́съ 2:

Пріиди́те, вѣ́рніи, Животворя́щему Дре́ву поклони́мся, на не́мже Христо́съ, Ца́рь сла́вы, во́лею ру́цѣ распросте́ръ, вознесе́ на́съ на пе́рвое блаже́нство, я́же пре́жде вра́гъ сла́стію укра́дъ, изгна́ны отъ Бо́га сотвори́. Пріиди́те, вѣ́рніи, Дре́ву поклони́мся, и́мже сподо́бихомся неви́димыхъ вра́гъ сокруши́ти главы́. Пріиди́те, вся́ оте́чествія язы́ковъ, Кре́стъ Госпо́день пѣ́сньми почти́мъ: ра́дуйся, Кре́сте, па́дшаго Ада́ма соверше́нное избавле́ніе, о тебѣ́ бо вѣ́рнѣйшіи ца́ріе на́ши хва́лятся, я́ко твое́ю си́лою исма́ильтескія лю́ди держа́вно покаря́юще. Тя́ ны́нѣ со стра́хомъ христіа́не цѣлу́юще, на тебѣ́ пригвозди́вшагося Бо́га сла́вимъ, глаго́люще: Го́споди, на то́мъ пригвозди́выйся, поми́луй на́съ, я́ко Бла́гъ и Человѣколю́бецъ.

Гла́съ 5:

Зря́щи Тя́ тва́рь вся́, на Крестѣ́ на́га ви́сяща, Содѣ́теля и Зижди́теля всѣ́хъ, измѣня́шеся стра́хомъ и рыда́ше; со́лнце же свѣ́тъ омрачи́, и земля́ колеба́шеся, ка́меніе же разсѣда́шеся, и хра́ма свѣ́тлость раздира́шеся, ме́ртвіи воста́ша отъ гробо́въ, и а́нгельскія си́лы ужасо́шася, глаго́люще: О, чудесе́! Судія́ су́дится, и стра́ждетъ хотя́ за спасе́ніе мíра и обновле́ніе.

Гла́съ 8:

Дне́сь Влады́ка тва́ри и Госпо́дь сла́вы на Крестѣ́ пригвожда́ется и въ ре́бра пробода́ется. Же́лчи и о́цта вкуша́етъ сла́дость церко́вная. Вѣнце́мъ отъ те́рнія облага́ется, покрыва́яй не́бо о́блаки. Оде́ждею облачи́тся поруга́нія, и зауша́ется бре́нною руко́ю, руко́ю созда́вый человѣ́ка. По плеще́ма біе́нъ быва́етъ, одѣва́яй не́бо о́блаки. Заплева́нія и ра́ны пріе́млетъ, поноше́нія и зауше́нія, и вся́ терпи́тъ мене́ ра́ди осужде́ннаго, Изба́витель мо́й и Бо́гъ, да спасе́тъ мíръ отъ пре́лести, я́ко Благоутро́бенъ.

Сла́ва, и ны́нѣ, гла́съ то́йже:

Дне́сь неприкоснове́нный существо́мъ, прикоснове́нъ мнѣ́ быва́етъ, и стра́ждетъ стра́сти свобожда́яй мя́ отъ страсте́й; свѣ́тъ подава́яй слѣпы́мъ, отъ беззако́нныхъ усте́нъ оплева́ется, и дае́тъ плещи́ за плѣне́нныя на ра́ны. Сего́ Чи́стая Дѣ́ва и Ма́ти на Крестѣ́ зря́щи, болѣ́зненно вѣща́ше: увы́ Мнѣ́, Ча́до Мое́, что́ сіе́ сотвори́лъ еси́? Кра́сный добро́тою па́че всѣ́хъ человѣ́къ, бездыха́нный и беззра́чный явля́ешися, не имѣ́я ви́да, ниже́ добро́ты. Увы́ Мнѣ́, Мо́й Свѣ́те, не могу́ спя́ща зрѣ́ти Тя́, утро́бою уязвля́юся, и лю́тое ору́жіе се́рдце Мое́ прохо́дитъ. Воспѣва́ю Твоя́ стра́сти, покланя́юся благоутро́бію Твоему́, Долготерпѣли́ве, сла́ва Тебѣ́!

Посе́мъ ектеніи́: Поми́луй на́съ, Бо́же... и Испо́лнимъ у́треннюю моли́тву... Діа́конъ: Прему́дрость. Іере́й отпу́стъ, и пе́рвый ча́съ. На 1-мъ часѣ́ тропа́рь Креста́. Сла́ва: святы́хъ. И ны́нѣ: богоро́диченъ часо́въ. По Отче на́шъ: конда́къ Креста́ и соверше́нный отпу́стъ.

З р и́:   Въ сíй 1-й де́нь Августа во оби́телехъ и прихо́дскихъ хра́мѣхъ соверша́ютъ чи́нъ свяще́нія воды́.

З р и́:   А идѣ́же чи́нъ освяще́нія воды́ соверша́ется на у́трени, пое́мъ си́це: По славосло́віи, и по трисвято́мъ, и по тропарѣ́: Спаси́, Го́споди, лю́ди Твоя́... пою́тся тропари́: Еже ра́дуйся... и про́чее поря́ду свяще́ніе воды́, я́ко обы́чай. По освяще́ніи же воды́ и по тропарѣ́хъ: Исто́чникъ исцѣле́ній... и При́зри на моле́нія... и Влады́чице, пріими́... твори́мъ и поклоне́ніе Честно́му Кресту́, я́ко предписа́ся.

На часѣ́хъ: тропа́рь Креста́. Сла́ва: святы́хъ. И ны́нѣ: богоро́диченъ часо́въ. По трисвято́мъ, кондаки́ премѣня́емъ.


НА ЛИТУРГІИ,

Блаже́нна отъ кано́на Креста́, пѣ́снь 3-я на 4, и святы́хъ, пѣ́снь 6-я на 4. По вхо́дѣ тропа́рь Креста́ и му́чениковъ. Сла́ва: конда́къ му́чениковъ. И ны́нѣ: Креста́. Трисвято́е. Проки́менъ Креста́, гла́съ 6: Спаси́, Го́споди, лю́ди Твоя́ и благослови́ достоя́ніе Твое́. Сти́хъ: Къ Тебѣ́, Го́споди, воззову́, Бо́же мо́й, [да не премолчи́ши отъ мене́]. Другíй му́чениковъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Апо́столъ Креста́, къ Кори́нѳяномъ, зача́ло 125, [и] святы́хъ, ко Евре́емъ, зача́ло 330. Аллилу́ія, гла́съ 4: Помяни́ со́нмъ Тво́й, его́же стяжа́лъ еси́ испе́рва. Сти́хъ: Бо́гъ же Ца́рь на́шъ пре́жде вѣ́ка [содѣ́ла спасе́ніе посредѣ́ земли́]. И святы́хъ, [гла́съ то́йже:] Воззва́ша пра́ведніи, и Госпо́дь услы́ша и́хъ [и отъ всѣ́хъ скорбе́й и́хъ изба́ви и́хъ]. Ева́нгеліе Креста́, Іоа́нна, зача́ло 60, и святы́хъ, Матѳе́я, зача́ло 38. Прича́стенъ Креста́: Зна́менася на на́съ свѣ́тъ лица́ Твоего́, Го́споди. И святы́хъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́]. Ря́дъ же вычита́емъ напре́дъ или́ подъ зача́ло.


З р и:   Аще же 1-й де́нь Августа случи́тся въ недѣ́лю.

Въ суббо́ту ве́чера, на ма́лѣй вече́рни, стихи́ры воскре́сны и Богоро́дицы, по обы́чаю.

На вели́цѣй вече́рни, по каѳи́смѣ, на Го́споди, воззва́хъ: стихи́ры воскре́сны 3, и восто́ченъ [Анато́ліевъ1, и Креста́ 3, и му́чениковъ 3. Сла́ва: Креста́. И ны́нѣ: богоро́диченъ 1-й, гла́са. На литíи, стихи́ра хра́ма и му́чениковъ хвали́тныя. Сла́ва: му́чениковъ. И ны́нѣ: богоро́диченъ. На стихо́внѣ окто́иха воскре́сны. Сла́ва: му́чениковъ. И ны́нѣ: Креста́. На благослове́ніи хлѣ́бовъ, тропа́рь: Богоро́дице, Дѣ́во..., два́жды, и Креста́, еди́ножды. Та́же: Бу́ди и́мя Госпо́дне... и про́чее.   З р и:   Аще ли нѣ́сть бдѣ́нія: по Ны́нѣ отпуща́еши... тропа́рь воскре́сенъ. Сла́ва: святы́хъ. И ны́нѣ: Креста́.

На повече́ріи, по Досто́йнѣ, конда́къ Креста́.

На у́трени, на Бо́гъ Госпо́дь: тропа́рь воскре́сенъ, два́жды. Сла́ва: му́чениковъ. И ны́нѣ: Креста́. Кано́нъ воскре́сенъ со ирмосо́мъ на 4, и Богоро́дицы на 2, и Креста́ на 4, и му́чениковъ на 4. Катава́сія: Кре́стъ начерта́въ... По 3-й пѣ́сни, конда́къ му́чениковъ и сѣда́ленъ, два́жды. Сла́ва, и ны́нѣ: Креста́. По 6-й пѣ́сни, конда́къ Креста́, и и́косъ. Свѣти́ленъ воскре́сенъ. Сла́ва: му́чениковъ. И ны́нѣ: Креста́. На хвали́техъ стихи́ры воскре́сны 4. И Креста́, со Сла́внымъ 4, со стихи́ свои́ми: Возноси́те Го́спода Бо́га на́шего [и покланя́йтеся подно́жію но́гу Его́, я́ко свя́то е́сть]. Сти́хъ: Бо́гъ же, Ца́рь на́шъ [пре́жде вѣ́ка содѣ́ла спасе́ніе посредѣ́ земли́]. Сла́ва: стихи́ра ева́нгельская. И ны́нѣ: Преблагослове́нна еси́... Славосло́віе вели́кое. Тропа́рь воскре́сенъ то́чію. И быва́етъ водоосвяще́ніе, и поклоне́ніе Кресту́, и про́чее, я́коже вы́ше рече́ся.

На литургíи: Блаже́нна воскре́сны на 4, и Креста́, пѣ́снь 3-я на 4, и му́чениковъ, пѣ́снь 6-я на 4. По вхо́дѣ тропа́рь воскре́сенъ, и Креста́, и му́чениковъ. Та́же, конда́къ воскре́сенъ. Сла́ва: му́чениковъ. И ны́нѣ: Креста́. Проки́менъ, аллилу́ія и прича́стенъ Креста́ и му́чениковъ. Апо́столъ и Ева́нгеліе рядово́е, и Креста́, и му́чениковъ.

Источникъ: Минíа, мѣ́сяцъ Аѵгустъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 2-11 об., 16-17.

/ Къ оглавленію раздѣла /


Наверхъ / Къ титульной страницѣ

0