Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 30-й де́нь.
Святи́теля Игна́тія, епи́скопа Кавка́зскаго и Черномо́рскаго.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 2. Подо́бенъ: Егда́ отъ дре́ва.

Святи́телю Игна́тіе пречу́дне,* бы́сть Ѳиваи́да Россíйская* земля́ сѣ́верная,* и́ноческихъ по́двиговъ* и трудо́въ твои́хъ нача́ло,* идѣ́же Подвигополо́жника* Го́спода Іису́са,* въ моли́твеннѣмъ дѣ́ланіи* тебе́ укрѣпля́юща, обрѣ́лъ еси́.

Егда́, въ во́зрастъ прише́дъ,* нача́льникъ мона́ховъ содѣ́лался еси́,* тогда́ оби́тель сѣ́верная* во и́мя Се́ргія преподо́бнаго* прія́тъ тя́, о́тче,* и та́мо позна́лъ еси́* мѣ́ру скорбе́й вели́кихъ* и болѣ́зней тя́жкихъ,* та́же и утѣше́нія* отъ при́сныхъ бра́тій твои́хъ,* и посѣще́нія я́вльшагося ти́* Ду́ха Утѣ́шителя сподо́бился еси́.

Страны́ ю́жныя,* близъ По́нта лежа́щія,* послуша́ніемъ Святѣ́й Це́ркви* дости́глъ еси́, о́тче,* во святи́тельстѣмъ зва́ніи твое́мъ* яви́лся еси́ оте́цъ и наста́вникъ* наро́довъ и племе́нъ Кавка́зскихъ,* жа́ждавшихъ сло́ва Христо́ва.

Егда́ же вре́мя* отше́ствія твоего́ прибли́жися,* святи́телю Госпо́день Игна́тіе,* тогда́ во оби́тели и́ночестѣй* на бре́зѣ Во́лжстѣмъ,* труды́ сло́ва и моли́твы полага́я,* со упова́ніемъ къ Бо́гу отше́лъ еси́,* въ Не́мже обрѣ́тъ поко́й и ми́ръ мно́гъ.

Сла́ва, и ны́нѣ, пра́здника.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Уче́ньми отца́ духо́внаго наставля́емь,* о́тче Игна́тіе,* пра́виломъ жи́зни и́ноческія обуча́лся еси́* и, въ послуша́ніихъ разли́чныхъ* упражня́яся усе́рдно,* пу́ть святы́хъ соверши́лъ еси́.

Сти́хъ: Честна́ предъ Го́сподемъ* сме́рть преподо́бныхъ Его́.

Му́дрость стяжа́въ духо́вную,* та́кожде и зна́ніе писа́ній оте́ческихъ,* ча́да послуша́нія* во мно́жествѣ приобрѣ́лъ еси́, о́тче,* и́хже къ Ца́рству небе́сному и вѣ́чному* духо́вно руководи́лъ еси́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Возлюби́въ ду́шу бли́жняго твоего́,* е́же ко Го́споду Спа́су привести́ ю́,* любо́вь духо́вную къ ча́домъ твои́мъ явля́я,* псало́мски восклица́лъ еси́:* пріиди́те, ча́да, послу́шайте мене́,* стра́ху Госпо́дню научу́ ва́съ.

Сла́ва, и ны́нѣ, пра́здника.

Тропа́рь пи́санъ на вели́цѣй вече́рни.



НА ВЕЛИЦѢЙ ВЕЧЕРНИ,
Блаже́нъ му́жъ: 1-й антифо́нъ. На Го́споди воззва́хъ: стихи́ры, гла́съ 5. Подо́бенъ: Ра́дуйся.

Ра́дуйся и весели́ся свѣ́тло,* земле́ Россíйская,* но́ваго святи́теля Бо́жія,* Игна́тія, яви́вшая,* и́же вѣ́ру Христо́ву* писа́ньми свои́ми изъясни́* и, зако́ны Ду́ха воспису́я,* стезю́ житія́ духо́внаго* я́сно содѣ́ла.

Ра́дуйся, святи́телю Игна́тіе преди́вне,* измла́да пу́ть за́повѣдей Христо́выхъ возлюби́въ,* избра́нникъ Госпо́день преди́венъ яви́лся еси́,* горни́ло же искуше́ній и бѣ́дъ преше́дъ,* учи́тель правосла́внымъ лю́демъ показа́ся,* жи́зни вѣ́чныя зако́ны* духо́вныя изъясня́я.

Ра́дуйся, и́же во и́ночестѣмъ чи́нѣ* и́мя Богоно́сца воспрія́лъ еси́,* си́це и са́мъ, святи́телю Игна́тіе,* ско́рби и болѣ́зни,* я́ко священному́ченикъ, терпя́,* чрезъ все́ житіе́ твое́* и́мя Христо́во вну́трь се́рдца своего́* запечатлѣ́лъ еси́,* моли́твою непреста́нною укрѣпля́яся.

Ра́дуйся, святи́телю Христо́въ богому́дре,* Бо́га и́стиннаго и жи́ва взыска́въ,* да́же до конца́ днíй твои́хъ* предстоя́лъ еси́ Христу́,* моли́твою непреста́нною* и любо́вію укрѣпля́яся,* та́же терпѣ́ніемъ скорбе́й* находя́щихъ утвержда́яся.

Сла́ва, гла́съ 4:

Къ пра́вдѣ вѣ́чнѣй и жи́зни неконча́емѣй устреми́лся еси́, святи́телю Игна́тіе пречу́дне, и сія́ бли́жнимъ твои́мъ исповѣ́дуя, къ любви́ Бо́жіей призыва́лъ еси́, ны́нѣ же въ незаходи́мѣй сла́вѣ житія́ непрестаю́щаго въ Ца́рствіи Христо́вѣ сія́еши.

И ны́нѣ, пра́здника.
Вхо́дъ. Проки́менъ дне́. И чте́нія три́ святи́тельская.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Мы́сль спаси́тельную, е́же послѣ́довати уче́нію святы́хъ оте́цъ, наре́клъ еси́, о́тче преподо́бне, звѣзду́ твою́, путево́дствующую тя́ и освѣща́ющую тѣ́сный пу́ть ума́ и се́рдца твоего́ къ Бо́гу.

Мы́сль блага́я, путево́дствующая тя́, о́тче богому́дре, на исто́чники воды́ живы́я приведе́ во оби́тели и́ноческія, идѣ́же въ по́двизѣхъ мно́зѣхъ Бо́га приобрѣ́лъ еси́.

Сла́ва, гла́съ то́йже:

Страну́ и́стины обрѣ́лъ еси́, о́тче преподо́бне, уче́ніе святы́хъ оте́цъ, и тѣ́хъ писа́ніемъ чрезъ все́ житіе́ твое́ усе́рдно послѣ́довавъ, взыва́лъ еси́: сíи су́ть звѣ́зды небе́сныя, испуща́ющія согла́сный и еди́ный свѣ́тъ; сíи су́ть корабли́, иду́щіи къ при́стани еди́нѣй; се́й ли́къ, воспѣва́яй еди́ную Боже́ственную пѣ́снь. И тѣ́хъ уче́нію послѣ́дуя, ду́шу твою́ къ вѣ́чнѣй жи́зни упра́вилъ еси́.

И ны́нѣ, пра́здника.

На стихо́внѣ стихи́ры, гла́съ 6:

Пѣ́снь свяще́нную* воспѣ́лъ еси́, преподо́бне о́тче,* подъ сѣ́нію Креста́ Госпо́дня,* пѣ́снь хвалы́ и благодаре́нія,* тѣ́мже и лю́демъ Бо́жіимъ,* въ стра́нствіи су́щимъ,* воздава́ти хвалу́ Бо́гови* у подно́жія дре́ва Кре́стнаго* помози́ твои́ми моли́твами.

Сти́хъ: Честна́ предъ Го́сподемъ* сме́рть преподо́бныхъ Его́.

Изъясни́лъ еси́ на́мъ, о́тче,* писа́ніи твои́ми,* что́ е́сть ча́ша Христо́ва.* Сію́ ча́шу скорбе́й и напа́стей,* о́тче преподо́бне,* я́ко да́ръ Бо́жій,* съ благодаре́ніемъ пріима́ти* въ житіи́ на́шемъ* помози́ на́мъ твои́ми моли́твами.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Жите́йское мо́ре* страсте́й и скорбе́й* душе́ю тве́рдою преше́лъ еси́,* я́ко кораблеце́мъ,* тѣ́мже ду́ши на́ша,* волна́ми грѣхо́вными обурева́емыя,* сохрани́ въ спаси́тельнѣмъ корабли́* Це́ркве Христо́вы,* я́ко моли́твенникъ изря́дный.

Сла́ва, и ны́нѣ, пра́здника.

Тропа́рь, гла́съ 8:

Правосла́вія побо́рниче, покая́нія и моли́твы дѣ́лателю и учи́телю изря́дный, архіере́евъ богодухнове́нное украше́ніе, мона́шествующихъ сла́во и похвало́: писа́ніи твои́ми вся́ ны́ уцѣлому́дрилъ еси́. Цѣвни́це духо́вная, Игна́тіе богому́дре, моли́ Сло́ва Христа́ Бо́га, Его́же носи́лъ еси́ въ се́рдцѣ твое́мъ, дарова́ти на́мъ пре́жде конца́ покая́ніе.

Инъ тропа́рь, гла́съ то́йже:

Избра́нникъ возлю́бленъ Христо́ви яви́лся еси́, Тому́ скорбьми́ мно́гими и моли́твою непреста́нною прилѣпи́вся, благода́ть Ду́ха Свята́го стяжа́въ, учи́тель изря́денъ лю́демъ бы́лъ еси́. Помина́й на́съ, святи́телю Игна́тіе, богоно́се Россíйскій, да уче́ніи и моли́твами твои́ми покая́ніе спаси́тельное обря́щемъ и любо́вію серде́чною Христу́ усво́имся.

Сла́ва, и ны́нѣ, пра́здника.



НА УТРЕНИ,
На Бо́гъ Госпо́дь: тропа́рь пра́здника два́жды. Сла́ва, святи́теля. И ны́нѣ, пра́здника.

По 1-мъ стихосло́віи сѣда́ленъ, гла́съ 2:

Моли́твами и скорбьми́ мно́гими въ житіи́ твое́мъ Христу́ соедини́вся, учи́тель изря́денъ и помо́щникъ лю́демъ твои́мъ яви́лся еси́, святи́телю Игна́тіе, моли́ о чту́щихъ па́мять твою́, блаже́нне. [Два́жды.]

Сла́ва, и ны́нѣ, пра́здника.

По 2-мъ стихосло́віи сѣда́ленъ, гла́съ 8:

Ре́клъ еси́, о́тче: е́же размышля́ти о вочеловѣ́ченіи Бо́га Сло́ва, о спаси́тельныхъ страда́ніихъ и Воскресе́ніи Его́, степе́нь е́сть видѣ́нія духо́внаго, ю́же моли́твами твои́ми сподо́би ны́ стяжа́ти, о́тче преподо́бне. [Два́жды.]

Сла́ва, и ны́нѣ, пра́здника.

По поліеле́и сѣда́ленъ, гла́съ 5. Подо́бенъ: Преподо́бне о́тче.

Преподо́бне о́тче, святи́телю всече́стне, ты́ учи́лъ еси́, я́ко моли́тва, вѣ́ра пра́вая и терпѣ́ніе скорбе́й потре́бны, во е́же спасти́ся. Помози́ на́мъ, свя́тче Бо́жій, да уче́ньми твои́ми огражда́еми, спасе́ніе ду́шъ на́шихъ улучи́мъ. [Два́жды.]

Сла́ва, и ны́нѣ, пра́здника.

[Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Ева́нгеліе Іоа́нна, зача́ло 35 отъ полу́.]

По 50-мъ псалмѣ́ стихи́ра, гла́съ 6:

Позна́лъ еси́ та́йну святы́я трапе́зы Госпо́дни въ сія́ніи свѣти́ла вели́каго: я́коже со́лнце, учи́лъ еси́, во вся́цѣй ка́пли росы́ отображе́но е́сть, та́кожде и въ трапе́зѣ Госпо́дни кíйждо пріобще́нъ е́сть Христу́ всецѣ́ло по Божеству́ и человѣ́честву. Къ сему́ же та́инству со стра́хомъ Бо́жіимъ и неосужде́нно приступа́ти твои́ми моли́твами, свя́те Игна́тіе, на́съ сподо́би.

Кано́нъ пра́здника и святи́теля, гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Пу́ть духо́вный, къ Бо́гу Жи́ву веду́щій, преше́лъ еси́, святи́телю Игна́тіе, я́сно указу́я на́мъ, ка́ко подоба́етъ стезю́ житія́ земна́го преходи́ти, уче́нію Христо́ву вне́млюще.

Пе́рвую степе́нь въ лѣ́ствицѣ добродѣ́телей Ева́нгельскихъ, нищету́ духо́вную, узрѣ́лъ еси́, о́тче, и то́й послѣ́довати, ту́ю возлюби́ти, то́ю пути́ духо́внаго нача́ло полага́ти завѣ́тъ тво́й да́лъ еси́.

Нищета́ ду́ха, — ре́клъ еси́, — со́ль е́сть всѣ́хъ же́ртвъ духо́вныхъ, нищета́ бо ду́ха блаже́нство пе́рвое нарече́ся во святѣ́мъ Ева́нгеліи Христо́вѣ, е́йже вси́ про́чіи блаже́нства, кро́тость, милосе́рдіе, се́рдца чистота́, послѣ́дуютъ и е́ю соверша́ются.

Богоро́диченъ: Ма́ти Свѣ́та, Пречи́стая Богороди́тельнице, житіе́ спаси́тельно на земли́ съ Сы́номъ и Бо́гомъ Твои́мъ соверши́вшая, на́съ, недосто́йныхъ, укрѣпи́, отъ грѣхо́въ изба́ви и къ пра́вдѣ вѣ́чнѣй ше́ствовати утверди́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Пра́вду Христо́ву въ житіи́ свое́мъ воспису́я, святи́телю Христо́въ Игна́тіе, обрѣ́лъ еси́ на пути́ се́мъ, е́же пла́кати и рыда́ти о содѣ́янныхъ злы́хъ и къ Спаси́телю мíра притека́ти.

Въ ю́ности пла́чемъ и́ноческимъ го́рцѣ воспла́калъ еси́ въ ке́лліи свое́й о разруше́ніи хра́ма се́рдца человѣ́ческаго, Бо́гомъ созда́ннаго Богослуже́нія возвы́шеннаго ра́ди, о плѣне́ніи души́ и ума́, отъ си́хъ же всѣ́хъ то́кмо еди́нѣмъ Богочеловѣ́комъ Спаси́телемъ изба́вимся.

И па́ки пла́чь стяжа́лъ еси́, о́тче, въ и́ночестѣмъ житіи́ твое́мъ, егда́ вся́ прегра́ды, отъ Бо́га удаля́ющія тя́, препобѣди́лъ еси́. Сего́ пла́ча ра́ди помяни́ на́съ, чту́щихъ святу́ю па́мять твою́.

Богоро́диченъ: Дѣ́во Пречи́стая, печа́ли на́ша и ско́рби утоля́ющая, пла́чь спаси́тельный подава́й на́мъ, да о бе́зднѣ зо́лъ на́шихъ и непра́вдъ воспла́чемъ предъ Тобо́ю.

Конда́къ и и́косъ пра́здника.
Сѣда́ленъ, гла́съ 3:

Поуча́лъ еси́, о́тче достохва́льне, я́ко моли́тву чи́сту стяжа́ти, та́же чу́вство покая́нія и пла́ча возлюби́ти дово́льно е́сть, во е́же спасе́ніе вѣ́чное улучи́ти, его́же и на́съ, грѣ́шныхъ, сподо́би моли́твами твои́ми, свя́те. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Та́йны житія́ и́ноческаго взыску́я, блаже́нне Игна́тіе, позна́лъ еси́, я́ко ка́ятися подоба́етъ и тру́дъ и́ноческій ничто́же и́но е́сть, е́же дѣ́ланіе непреста́ннаго покая́нія.

Въ покая́ніи, слеза́хъ и пла́чѣ о содѣ́янныхъ злы́хъ узрѣ́лъ еси́, о́тче, спасе́нія пу́ть, къ го́рнѣй жи́зни веду́щій, и́же предлежи́тъ и вся́кому нося́щему и́мя Христо́во.

Ре́клъ еси́, о́тче преподо́бне, я́ко до́лжно е́сть покая́ніемъ стра́сти отсѣка́ти, та́же покая́ніемъ добродѣ́ланіе стяжа́ти, и а́ще не у́зритъ о́ко на́ше, я́ко грѣ́шни есмы́, не и́мамы спасе́нія вѣ́чнаго улучи́ти.

Богоро́диченъ: Ма́ти Бо́жія, грѣ́шныхъ Спору́чнице и Помо́щнице, пу́ть на́шъ, къ Бо́гу веду́щій, покая́ніемъ и́стиннымъ укрѣпи́, зрѣ́ніемъ грѣха́ и исповѣ́даніемъ его́ напра́ви.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Пла́чемъ и покая́ніемъ непреста́ннымъ ду́шу твою́ снабдѣва́я, о́тче Игна́тіе, дѣ́латель моли́твы яви́лся еси́, сію́ отъ во́зраста младе́нческаго возлюби́въ, и въ основа́ніе жи́зни духо́вныя положи́лъ еси́.

Моли́твою усе́рдною житіе́ твое́ отъ ю́ности укрѣпля́я, да́же до кончи́ны по́двигъ тво́й моли́твенный ко Христу́ Бо́гу соблюда́лъ еси́, и́мже о Бо́зѣ Спа́сѣ утвержда́яся.

Въ во́зрастъ му́жескій прише́дъ, мона́ховъ нача́льникъ бы́въ и многообра́зныя ско́рби испыту́я, въ моли́твѣ тве́рдѣй и непреста́ннѣй со мно́гими слеза́ми осла́бу и отра́ду и́стинную почерпа́лъ еси́, о́тче всеблаже́нне.

Богоро́диченъ: Дѣ́во Пречи́стая, Ма́ти Христа́ Бо́га, вѣне́цъ моли́твы неусыпа́ющія, о на́съ, грѣ́шныхъ, мольбу́ Бо́гу принеси́ и моле́ніемъ Твои́мъ отъ напа́стей и скорбе́й на́съ изба́ви.

Пѣ́снь 6.

Ирмо́съ: Моли́тву пролію́ ко Го́споду, и Тому́ возвѣщу́ печа́ли моя́, я́ко золъ душа́ моя испо́лнися, и живо́тъ мой а́ду прибли́жися, и молю́ся, я́ко Іо́на: отъ тли, Бо́же, возведи́ мя.

Яви́лся еси́ учи́тель моли́твы серде́чныя, о́тче на́шъ Игна́тіе, я́сно наставля́я, ка́ко до́лжни есмы́ предъ лице́мъ Христо́вымъ предстоя́ти и моли́тву покая́нія твори́ти.

Подоба́етъ на моли́твѣ, — поуча́лъ еси́, о́тче, — вста́ти въ ли́цѣ прокаже́нныхъ, слѣпы́хъ, глухи́хъ, хромы́хъ и та́ко ко Христу́, отъ се́рдца сокруше́ннаго, отъ нищеты́ ду́ха на́шего, моли́тву тща́тися твори́ти.

Егда́ тишина́ возвѣ́етъ въ се́рдцѣ на моли́твѣ, — поуча́лъ еси́, о́тче, — и ми́ръ ко всѣ́мъ, смире́ніе, сострада́ніе и любо́вь къ человѣ́комъ, тогда́ позна́емъ, я́ко благода́ть Ду́ха Свя́та сіе́ содѣ́ла.

Богоро́диченъ: Ма́ти Бо́жія, Ду́ха Свята́го прія́телище непостижи́мое, о сме́ртныхъ на́съ моли́ся и моли́тву на́шу къ Бо́гу упра́ви.

Конда́къ, гла́съ 8. Подо́бенъ: Аще и во Гро́бъ.

Аще и соверша́лъ еси́ стезю́ житія́ земна́го, святи́телю Игна́тіе, оба́че непреста́нно зрѣ́лъ еси́ зако́ны бытія́ вѣ́чнаго, сему́ поуча́я ученики́ словесы́ мно́гими, и́мже послѣ́довати и на́мъ, свя́тче, помоли́ся.

Икосъ:

Ре́клъ еси́, о́тче, въ писа́ніихъ твои́хъ, я́ко подоба́етъ имѣ́ти стра́хъ Бо́жій, да́бы вступи́ти въ соверше́нство всѣ́хъ добродѣ́телей, любо́вь Бо́жію, и та́ко Отцу́ Небе́сному уподо́битися. Сему́ уче́нію послѣ́довати и на́мъ, свя́тче, помоли́ся.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Въ зи́мнемъ обнаже́ніи вѣ́твей древе́сныхъ поуча́лся еси́, о́тче, та́йнѣ воскресе́нія ме́ртвыхъ, я́коже бо дре́во во вре́мя свое́ ли́ствіемъ покрыва́ется, та́ко и ко́сти человѣ́ческія оживу́тъ и, обле́кшеся пло́тію, въ мíръ но́вый вступи́ти и́мутъ.

Позна́лъ еси́, о́тче, ели́ко возмо́жно, та́йну кончи́ны бытія́ человѣ́ческаго, та́йну естества́ а́нгельскаго и души́ человѣ́ческія, и возда́лъ еси́ благодаре́ніе Бо́гу.

Еди́наго то́кмо Бо́га, Ду́ха Истины, исповѣ́далъ еси́, Иже Еди́нъ всесоверше́нъ е́сть, Ему́же покланя́ющеся, тя́, о́тче, велича́емъ.

Богоро́диченъ: Дѣ́во Марíе, Ма́ти Неизрече́ннаго Свѣ́та, на́съ, грѣ́шныхъ, отъ мы́сленныхъ паде́ній огради́, Боже́ственное же уче́ніе Це́ркве Святы́я въ сердца́хъ на́шихъ укрѣпи́.

Пѣ́снь 8.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Возлюби́лъ еси́, о́тче, служи́ти бра́тіи сло́вомъ Бо́жіимъ, и бы́сть тебѣ́ служе́ніе сіе́ въ по́двигъ житія́ твоего́, на́мъ же въ ра́дованіе непрело́жное, вопію́щимъ ти́: не оста́ви на́съ, о́тче, сло́вомъ и моли́твами твои́ми.

Въ служе́ніи Сло́ву услы́шалъ еси́ въ души́ твое́й гла́съ увѣре́нія во спасе́ніи, сего́ ра́ди пріи́скреннѣ возлюби́лъ еси́ бли́жнихъ твои́хъ и са́мое то Сло́во Бо́жіе.

Поуча́лъ еси́ бли́жнихъ твои́хъ, святи́телю, я́ко Спаси́тель на́шъ е́сть Огнь небе́сный, Иже и въ словесѣ́хъ Его́ ева́нгельскихъ дѣ́йствуетъ.

Богоро́диченъ: Ма́ти Бо́жія, Бо́га Сло́ва ро́ждшая, да́ждь сло́во рабо́мъ Твои́мъ, е́же сказа́ти та́йну всеми́лостиваго заступле́нія Твоего́, въ та́йнѣ рожде́нія Сло́ва, Христа́ Бо́га, я́вльшуюся.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Мно́ги труды́ и болѣ́зни подъя́въ въ житіи́ твое́мъ, святи́телю всече́стне, Кресту́ Христо́ву, свѣ́тло сія́ющу, поклони́лся еси́ и моли́тву твою́ ко Христу́ просте́рлъ еси́.

Скорбьми́ обурева́емый, зрѣ́лъ еси́ въ видѣ́ніи въ ке́лліи свое́й Стра́нника, посѣти́вшаго тя́. Отку́ду ше́ствуеши? И гдѣ́ селе́ніе Твое́? Почто́ досе́лѣ оставля́лъ еси́ е́? — сла́дцѣ вопія́лъ еси́, о́тче, я́вльшемуся ти́ Христу́.

Въ хожде́ніи предъ Го́сподемъ позна́лъ еси́, о́тче, судьбы́ оте́чества твоего́, та́же и кончи́ну твою́ я́сно прови́дѣлъ еси́, къ Бо́гу Сло́ву, Христу́ возлю́бленному, моли́твенно устремля́яся.

Богоро́диченъ: Ма́ти Бо́жія, сія́ніе неизрече́ннаго Свѣ́та, стопы́ на́ша къ жи́зни вѣ́чнѣй напра́ви, проща́ющи вся́ зла́я, на́ми содѣ́янная.

Свѣти́ленъ пра́здника. Сла́ва, святи́теля:

Имя Богоно́сца пресла́внаго въ мона́шестѣмъ о́бразѣ твое́мъ воспріе́мь, о́тче Игна́тіе, святи́телю всече́стне, Христа́ моли́твою непреста́нною вну́трь се́рдца твоего́ всели́лъ еси́ и бы́лъ еси́ учи́тель, къ Свѣ́ту невече́рнему веды́й, богоно́сецъ вои́стинну досточу́дный яви́вся.

И ны́нѣ, пра́здника.

На хвали́техъ стихи́ры пра́здника 3 и свята́го 3.
Стихи́ры свята́го, гла́съ 8:

Въ житіи́ твое́мъ поуча́лъ еси́,* о́тче преподо́бне,* я́ко се́рдце человѣ́ческое* обрѣта́етъ поко́й,* егда́ въ за́повѣдехъ Христо́выхъ пребыва́етъ,* изобрази́ти бо въ души́ о́бразъ Христо́въ* бла́го е́сть и спаси́тельно,* сего́ же и на́съ дости́гнути* ми́лостивно сподо́би моли́твами твои́ми.

Христу́ послѣ́довалъ еси́ усе́рдно,* святи́телю Игна́тіе,* вся́ мірска́я отложи́въ* и Кре́стъ Госпо́день на ра́мо взе́мъ,* тѣ́мже пути́ соверше́нства дости́глъ еси́,* къ сему́ и на́съ приведи́, о́тче,* моли́твами твои́ми.

Пріиди́те, собо́ри люде́й Бо́жіихъ,* припаде́мъ усе́рдно ко исто́чнику приснотеку́щему,* святи́телю Игна́тію, богоно́сцу Россíйскому,* и восхва́лимъ, усе́рдно прося́ще:* моли́твами твои́ми, святи́телю,* пода́й просвѣще́ніе душа́мъ на́шимъ.

Сла́ва, и ны́нѣ, пра́здника.
[Славосло́віе вели́кое. Ектеніи́. И отпу́стъ.]



НА ЛИТУРГІИ,

Слу́жба пра́здника и святи́теля: [Блаже́нна отъ кано́на пра́здника, пѣ́снь рядова́я и свята́го пѣ́снь 3-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Мине́я Дополни́тельная. Вы́пускъ 1-й. — М.: Издательскій совѣтъ Русской Православной Церкви, 2005. — С. 268-277.

/ Къ оглавленію раздѣла /


Наверхъ / Къ титульной страницѣ

0