Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 29-й де́нь.
Святы́хъ девяти́ му́чениковъ, и́же въ Ки́зицѣ, и преподо́бнаго Ме́мнона чудотво́рца.

[ВЕЧЕРЪ,]
На Го́споди воззва́хъ: стихи́ры му́чениковъ, гла́съ 8. Подо́бенъ: О, пресла́внаго чудесе́!

Ѳео́гнія и Ру́ѳа, Антипа́тра,* Ѳеости́ха и Арте́му,* Ма́гна и Ѳеодо́та,* сла́внаго Ѳавма́сія* и боже́ственнаго Филимо́на,* страда́ніи свѣ́тло облиста́вшія* и су́щія во тмѣ́ просвѣти́вшіи,* вѣ́рою почти́мъ* и пѣ́сньми ублажи́мъ,* свяще́нную си́хъ пра́зднующе па́мять, веселя́щеся.

Цвѣ́ти му́чениковъ кра́сніи,* по́лкъ свяще́нный,* богособра́нное совокупле́ніе,* Це́рковь изря́дная,* со́нмъ богоизбра́ненъ,* ли́къ святы́й, собо́ръ блаже́нный,* за Тро́ицу подви́гшеся,* Се́й моли́теся, Сію́ умоли́те о на́съ,* я́ко да пріи́мемъ грѣхо́въ оставле́ніе.

Ины стихи́ры преподо́бнаго, гла́съ и подо́бенъ то́йже:

Преподо́бне Ме́мноне блаже́нне,* предочи́стивъ ду́шу воздержа́ніемъ,* бы́лъ еси́ чи́сто Ду́ха и красно́ оби́телище;* тѣ́мже лука́встія ду́хи отгоня́еши* и неду́ги притека́ющимъ къ тебѣ́* исцѣля́еши всегда́.* О на́съ, восхваля́ющихъ тя́,* Христу́ моли́ся.

Преподо́бне Ме́мноне сла́вне,* облада́въ страстьми́ душе́вными,* нача́льникъ бы́лъ еси́ мона́ховъ,* къ трудо́мъ помазу́я воздержа́нія усе́рдно си́хъ,* и́хже и предста́вилъ еси́* Всеви́дцу Сло́ву.* Пожи́въ же житіе́ блаже́нно* и скве́рны непримѣ́сно,* съ ни́ми на́съ всегда́ помина́й,* восхваля́ющихъ тя́.

Преподо́бне Ме́мноне пребога́те,* воды́ дре́вле исто́чникъ* истещи́ сотвори́лъ еси́,* въ Госпо́дню хвалу́ и душа́мъ въ снабдѣ́ніе.* Отъ глубины́ мо́ря корабли́ спа́слъ еси́,* пру́жія вре́да моли́твами сохрани́лъ еси́,* чудеса́ безмѣ́рная соверша́еши всегда́.* О на́съ, восхваля́ющихъ тя́,* Христу́ моли́ся.

Сла́ва, и ны́нѣ, пра́здника, или́ богоро́диченъ:

Пло́ть отъ крове́й Твои́хъ* пріе́мъ, Первовѣ́чный Бо́гъ* Тя́ Предста́тельницу показа́* человѣ́комъ, Чи́стая.* Тѣ́мже изба́ви рабы́ Твоя́* отъ вся́кія бѣды́, и обстоя́нія,* и сѣ́тей лука́ваго врага́* и сія́нія причасти́тися сподо́би избра́нныхъ,* вся́ сла́вящія и покланя́ющіяся Тебѣ́.

Крестобогоро́диченъ:

Тя́ ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, — Ча́до сла́дкое!* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый* милосе́рдіемъ Твои́мъ?


[НА УТРЕНИ,]
Кано́нъ му́чениковъ, гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Боже́ственными добро́тами наслажда́ющеся вку́пѣ, и пото́ка пи́щнаго напита́ющеся бога́тно, и прича́стіемъ обожа́еми, му́ченицы вѣнцено́сцы, ва́съ блажа́щія отъ лю́тыхъ бѣ́дъ изба́вите.

Якоже со́лнечныя лучи́, возсія́вше, заря́ми тве́рдыхъ по́двигъ, страда́льцы, и чуде́съ сія́ніи вся́ просвѣща́ете, страсте́й но́щь рѣшите́ и де́моновъ мра́къ разоря́ете.

Умерщвле́ни на земли́ я́звами болѣ́зней, къ неболѣ́зненнѣй жи́зни преидо́сте вку́пѣ, ю́ніи многострада́льніи. Тѣ́мже то́чите исцѣле́нія, вся́ку болѣ́знь облегча́юще богопрія́тными моли́твами, пребога́тіи.

Богоро́диченъ: Родила́ еси́ Бо́га изъ чи́стыхъ Твои́хъ крове́й, вопло́щшася па́че ума́ зра́комъ и́же по на́съ, Ма́ти Пренепоро́чная. Тѣ́мже вси́ Тя́, ро́дове родо́въ, ублажа́ютъ, святы́хъ му́ченикъ утвержде́ніе.

Инъ кано́нъ преподо́бнаго, гла́съ то́йже.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Боже́ственною Пресвята́го Ду́ха блиста́яся благода́тію, свѣтоно́сне Ме́мноне, и честно́е творя́щія твое́ успе́ніе свѣ́тлою моли́твою твое́ю страсте́й мглу́ очи́сти.

Преподо́бне, тво́й кре́стъ взе́мъ, послѣ́довалъ еси́ распе́ншемуся Сло́ву на́съ ра́ди и плотска́я движе́нія воздержа́ніемъ, преподо́бне, и ни́зу лега́ніемъ умертви́лъ еси́.

Поще́ніемъ, и моли́твами, и слеза́ми Бо́гу соединя́яся, прія́лъ еси́ благода́ть отъ Него́ цѣли́ти неду́ги и отгони́ти ду́хи, Ме́мноне богому́дре преблаже́нне.

Богоро́диченъ: Обле́кся изъ Тебе́ Бо́гъ въ человѣ́ка за бла́гость, сугу́бъ про́йде, Пресвята́я Чи́стая, дѣ́йствы и естествы́. Его́же моли́ всегда́ просвѣти́ти пою́щія Тя́.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Ме́ртвымъ истука́ннымъ пожре́ти ника́коже восхотѣ́вше, Поже́ршемуся на́съ ра́ди же́ртва жива́ принесо́стеся, о́троцы прекра́сніи, святíи му́ченицы.

Зако́ны Боже́ственными, укрѣпля́еми си́лою Ду́ха, беззако́ннующихъ совѣ́ты и ловле́нія низложи́сте и, зако́ннѣ пострада́вше, сла́ву улучи́сте.

Да восхва́лится Арте́ма и Филимо́нъ, Ѳеости́хъ и Ма́гнъ, Ру́ѳъ сла́вный, и Антипа́тръ, и Ѳавма́сій, Ѳео́гній и Ѳеодо́тъ великоимени́тіи.

Богоро́диченъ: Ору́жія вся́ вра́жія ны́нѣ до конца́ оскудѣ́ша, Тебѣ́ ро́ждшей Христа́, уя́звлена копіе́мъ, Всенепоро́чная, о Не́мже му́ченицы, уязви́вшеся, пострада́ша.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Якоже со́лнце на земли́, добродѣ́телей просвѣще́ніемъ просія́лъ еси́, всѣ́хъ ду́ши, преподо́бне, благода́тію просвѣща́я духо́вною.

Желѣ́зомъ твоя́ чре́сла препоя́сана имѣ́лъ еси́ страсте́й на умерщвле́ніе, я́вѣ, преподо́бне Ме́мноне, одѣ́явся безстра́стіемъ.

Человѣколюби́въ бы́въ немощны́мъ, отъ Бо́га прія́лъ еси́ благода́ть мно́гу, преподо́бне, стра́сти цѣли́ти неисцѣ́льныя.

Богоро́диченъ: Сло́во Бо́жіе въ Твое́ нескве́рное чре́во всели́ся и земны́мъ, Пречи́стая, вся́къ грѣ́хъ отъя́ло е́сть.

Сѣда́ленъ, гла́съ 1. Подо́бенъ: Гро́бъ Тво́й.

Ли́къ свѣтови́денъ свяще́нныхъ страда́лецъ, совокупле́ніе красно́, богособра́ненъ собо́ръ, девяточи́сленный соста́въ, пострада́вше крѣ́пко, попра́вше вра́жіе мучи́тельство и причто́стеся а́нгельскимъ лико́мъ, Го́сподеви предстоите́.

Сла́ва, преподо́бнаго, гла́съ 8. Подо́бенъ: Прему́дрости.

Яко звѣзду́ тя́ вси́ свѣтови́дну, добродѣ́тельми и чуде́съ заря́ми мíръ просвѣща́юща, восхваля́емъ, блаже́нне: прича́стникъ бо Боже́ственныя свѣ́тлости бы́лъ еси́, и къ сія́нію, Ме́мноне, преше́лъ еси́ незаходи́мому. Тѣ́мже свѣтоно́сную и святу́ю па́мять твою́ почита́емъ, всегда́ Спа́са сла́вяще, и вѣ́рно вопіе́мъ ти́: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

И ны́нѣ, пра́здника, или́ богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Сожже́нія страда́льцы и богожре́нная заколе́нія, приноше́ніе соверше́нно, же́ртвы прія́тны, приведо́стеся во́лею поже́ршемуся и сме́рть умертви́вшему. Тѣ́мже ва́съ ублажа́емъ.

Чу́до вели́кое показу́юще, сля́ченныя испра́висте, страда́льцы, ру́ки, и во́днаго труда́ изба́висте прибѣ́гшаго съ любо́вію къ ра́цѣ ва́шей, наро́чита му́жа иногда́, досточу́дніи.

Да ублажа́тся досто́йно Арте́ма и Антипа́тръ, Ѳеости́хъ и Ру́ѳъ, Ма́гнъ, и Филимо́нъ, и Ѳео́нъ, и Ѳео́гнъ съ сла́внымъ Ѳеодо́томъ, пострада́вшіи, зову́тъ: сла́ва, Христе́, си́лѣ Твое́й.

Богоро́диченъ: Иже въ нѣ́дрѣхъ Отчихъ неизрече́нно сѣдя́й, на Твои́хъ объя́тіихъ сѣди́тъ, Дѣ́во, я́ко Младе́нецъ, Его́же блаже́нную стра́сть вообража́юще, добропобѣ́дніи о́троцы изво́лиша умре́ти.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Струя́ми, преподо́бне, сле́зными твое́ се́рдце очи́стивъ, во́ды на безво́днѣмъ мѣ́стѣ истека́ти устро́илъ еси́, Бо́гу тя́ просла́вльшу, Ме́мноне, я́ко Своего́ уго́дника.

Пресла́внымъ житіе́мъ, я́ко звѣзда́, сія́я, свяще́нными чудесы́ твои́ми, друго́е ты́ не́бо показа́лся еси́, блаже́нне, вѣ́рою зову́щимъ: сла́ва си́лѣ Твое́й, Го́споди.

Зако́номъ, преподо́бне, повину́яся Влады́чнимъ, я́же подъ тобо́ю су́щія наста́вилъ еси́, упа́съ, преподо́бне, многоусугу́бивъ же я́ко ра́бъ послушли́въ, Дарова́вшему тебѣ́ тала́нтъ.

Богоро́диченъ: Привлече́нный у́мъ мо́й, Богороди́тельнице, къ сла́достемъ тѣле́снымъ Твои́мъ хода́тайствомъ, молю́ся, утверди́, Яже еди́на ро́ждшая Благода́вца Бо́га.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Якоже мы́сленное у́гліе, вже́гше у́мъ, попали́сте вои́стинну хвра́стную вся́ку пре́лесть, блаже́нніи, и запале́ніе угаси́сте и́дольское росо́ю вѣ́ры.

Раздѣле́нія въ тѣлесѣ́хъ не имѣ́сте мно́зѣхъ, за Нераздѣ́льную пострада́ти, страда́льцы, Тро́ицу иду́ще, тѣ́мже разруши́сте діа́вола ополче́ніе вся́ко.

Воспѣва́етъ чудеса́ ва́ша отъ лука́ваго легео́на разрѣши́выйся де́монска, му́ченицы богови́дніи, къ честны́мъ ковче́гомъ ва́шимъ прише́дый со усе́рдіемъ.

Богоро́диченъ: Избавля́ющи яви́ся на́съ отъ бѣ́дъ и прегрѣше́ній, тлетво́рныхъ страсте́й, и скорбе́й, и обстоя́ній, вѣ́рою пою́щія Тя́, Богоро́дице, Приснодѣ́во.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Умъ тво́й, чи́стыми воззрѣ́ніи къ Бо́гу ве́сь бы́въ, богоблаже́нне, плотски́хъ сласте́й яви́ся вы́шши.

Сы́й вра́чь тѣле́съ, пребога́те, отжени́ скотскíя ду́шъ болѣ́зни благода́тію Ду́ха.

Блаже́нъ еси́ ты́, и добро́ тебѣ́ е́сть, побѣ́ждшу зло́бу вра́жію и стра́сти, преблаже́нне, умертви́вшу.

Богоро́диченъ: Родила́ еси́ Бо́га и Дѣ́ва пребыла́ еси́, Богоневѣ́сто, сего́ ра́ди ублажа́етъ Тя́ ве́сь человѣ́ческій язы́къ, ра́дуяся.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Честна́ сме́рть яви́ся боже́ственныхъ страда́льцевъ предъ Тобо́ю, Бо́же вся́ческихъ, и́хже ны́нѣ почита́я, врачевство́ безме́здное боля́щимъ яви́лъ еси́.

Возвы́сивше ру́цѣ и сердца́ высо́кимъ нра́вомъ къ Вы́шнему мужеу́мно, лука́ваго возноше́нія, му́ченицы богоно́сцы, низложи́сте.

Богоро́диченъ: Якоже сто́гъ, чре́во Твое́, Чи́стая, яви́ся, пшени́цу нося́щій безсме́ртія, всѣ́хъ вѣ́рныхъ ду́ши пита́ющую и му́ченики просвѣща́ющую.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Еди́нѣмъ то́чію зва́ніемъ пру́зи отгоня́ются и вся́къ вре́дъ де́монскій: Бо́га бо, Ме́мноне, ве́лій уго́дникъ, позна́лся еси́, вельми́ тя́, о́тче, просла́вльшаго.

Побѣди́въ плотска́го навѣ́та мудрова́ніе, Ду́ха благода́ть прія́лъ еси́ отгоня́ти неду́ги и боля́щія грѣха́ми цѣли́ти ду́ши, досточу́дне.

О, чу́до! Ка́ко отъ еди́наго то́кмо призыва́нія спаса́ются твоего́, пресла́вне Ме́мноне, вѣ́рніи пла́вающіи, тебе́ ви́дяще приспѣва́юща и во́лнъ молву́ кротя́ща?

Богоро́диченъ: Умертви́ пло́ти моея́, Дѣ́во, мудрова́ніе, Умертви́теля сме́рти и Жизнода́вца я́ко заче́нши и ро́ждши па́че сло́ва и смы́сла, Пречи́стая.

Конда́къ, гла́съ 2. Подо́бенъ: Вы́шнихъ ища́.

Тве́рдый и всесвѣ́тлый ли́къ му́ченикъ девяти́, Трисо́лнечнаго Божества́ исповѣ́дницы, на суди́щи Тому́ нача́льно взыва́ху: кро́вь и ду́ши на́ша съ тѣлесы́, я́ко непоро́чную же́ртву, прино́симъ Тебѣ́, Влады́ко, въ ли́цѣхъ небе́сныхъ Твои́хъ сопричти́, я́ко Бо́гъ Ми́лостивый.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Иска́паютъ ва́ши тру́дове, му́ченицы, боже́ственныя струи́ исцѣле́ній всегда́, болѣ́зней рѣ́ки изсуша́юще и скве́рну вся́ку отмыва́юще страсте́й, досточу́дніи.

Ра́довахуся страстоте́рпцы, внегда́ скорбѣ́ти и́мъ, ра́достію неизглаго́ланною, поя́ху, усѣка́еми мече́мъ: благослове́нъ еси́, Го́споди, Бо́же оте́цъ на́шихъ.

Тяготу́ неду́говъ, стра́сти серде́чныя и болѣ́зни тѣле́сныя, вся́ку же находя́щую ско́рбь на́мъ облегчи́те, сла́вніи страда́льцы.

Богоро́диченъ: Яви́вшися всѣ́мъ му́ченикомъ, Чи́стая Ма́ти Бо́жія, держа́ва ве́лія, яви́лася еси́ человѣ́комъ заступле́ніе, Тя́ пою́щимъ всегда́ свяще́нными пѣ́сньми.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Сле́зными ту́чами страсте́й погаси́лъ еси́ пе́щь, ны́нѣ же огне́мъ, блаже́нне, вои́стинну попаля́еши чуде́съ твои́хъ ве́щный всегда́ неду́говъ вре́дъ благода́тію.

Всеусе́рдно Творца́ твоего́, блаже́нне, возлюби́лъ еси́. Тѣ́мже пло́ти и мíра, Ме́мноне му́дре, взыва́я внѣ́ бы́лъ еси́: благослове́нъ еси́ въ хра́мѣ сла́вы Твоея́, Го́споди.

Якоже дре́во, при исхо́дищихъ воздержа́нія, о́тче, насажде́нъ бы́въ, возда́лъ еси́ плоды́ чуде́съ дѣ́йство, Ме́мноне пребога́те, во бла́го вре́мя изоби́луя.

Отъ пруго́въ вре́дъ прибы́вшій уста́вилъ еси́ повелѣ́ніи боже́ственными, Ме́мноне му́дре, рѣ́чными удави́въ вода́ми, — благослове́нъ еси́, Бо́же мо́й, — зовы́й, возопи́лъ еси́.

Богоро́диченъ: Бу́ри безмѣ́рныхъ согрѣше́ній, Отрокови́це, изба́ви мя́, еди́на смире́нныхъ по́мощь крѣ́пкая и прегрѣше́ній очище́ніе: благослове́нна Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Ра́достную хвалу́ принесе́мъ вели́кія на́мъ засту́пники, страстоте́рпцы му́ченики Пода́вшему, вопію́щимъ: вся́ дѣла́, благослови́те Госпо́дня Го́спода.

Укорени́вшеся на ка́мени вѣ́ры благоро́днѣ, я́коже вѣ́тви, му́ченицы, плоды́ на́мъ страда́нія принесо́ша, вѣ́рою пою́щимъ: благослови́те, вся́ дѣла́ Госпо́дня, Го́спода.

Вра́чеве страсте́й великоимени́тіи, души́ моея́ стра́сти исцѣли́те, и гее́нны изба́вите, и тмы́ о́ныя кромѣ́шнія, моля́ще Христа́ Бо́га на́шего.

Богоро́диченъ: Законода́вца Христа́ родила́ еси́, зако́нно страда́вшія вѣнча́вшаго, страстоте́рпцы му́ченики, Его́же моли́ зако́номъ грѣха́ побѣжде́на мя́, Отрокови́це, исцѣли́ти.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Яко у́тро, просія́лъ еси́, я́ко звѣзда́, я́ко вели́кое со́лнце, Ме́мноне богодухнове́нне, ду́ши просвѣти́лъ еси́ благода́тію наста́вника тя́ поста́вльшимъ изря́дна, и учи́теля свяще́нна, и наказа́теля чу́дна, вопію́ща: вся́ дѣла́, благослови́те Госпо́дня Го́спода.

Глубоку́ я́зву врагу́, ражда́ющу сме́рть, преблаже́нне, да́лъ еси́, егда́ благода́тію Ду́ха смире́ну стяжа́лъ еси́ му́дрость, высокому́дрый того́ нра́въ въ зе́млю смиря́я и сѣ́ти душетлѣ́нныя его́ попира́я.

Ви́дѣти сподо́бился еси́ та́мо блаже́нство, и наслажде́ніе вѣ́чнующее, свя́те, и святы́хъ свѣ́тлости, пожи́въ житіе́ до́брѣ, и ны́нѣ вопіе́ши ра́достно: благослови́те, вся́ дѣла́ Госпо́дня, Го́спода.

Мѣ́сто, безво́дное пре́жде, ны́нѣ же во́дно, проповѣ́дуетъ, преподо́бне, ко Го́споду вѣ́ру твою́ и благода́ть чуде́съ твои́хъ, я́же соверши́лъ еси́, вопія́ Пода́телю до́брыхъ: благослови́те, вся́ дѣла́ Госпо́дня, Го́спода.

Богоро́диченъ: Неду́говавшую тягото́ю лю́тыхъ и пото́пльшуюся смире́нную ду́шу мою́, Богоблагода́тная Влады́чице, посѣще́нія сподо́би и здра́ву до конца́ покажи́, зову́щую: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Се́ отверзо́шася ва́мъ небе́сная врата́, пострада́вшимъ, — рече́ Христо́съ страстоте́рпцемъ, — вни́дите и пріими́те, ра́дующеся, воздая́нія болѣ́зней досто́йная, отъ вѣ́ка хра́брствовавшимъ.

Кра́сни въ ра́нахъ тѣле́сныхъ бы́сте и а́нгеломъ уподо́бистеся, ны́нѣ же предстоите́ всѣ́хъ красотѣ́, ра́дующеся при́сно, прича́стіемъ я́вѣ удобря́еми кра́сныхъ, всечестнíи.

Ста́немъ въ дому́ Бо́жіи, восхваля́юще Антипа́тра, Ѳеости́ха же, Ру́ѳа и Филимо́на страда́нія, боже́ственнаго Ѳавма́сія чудеса́, Ма́гна и Арте́ма, Ѳео́гнія и Ѳеодо́та непобѣ́дное.

Де́нь спасе́нія на́мъ возсія́ святы́хъ торжество́, е́же соверша́юще моле́бно, вопіе́мъ и́мъ съ вѣ́рою: му́чениковъ свѣтоза́рный ве́рше, всѣ́хъ сердца́ озари́те.

Богоро́диченъ: Обле́кся изъ Тебе́ Ца́рь въ тѣле́сную багряни́цу, про́йде, ве́сь красе́нъ, изъ утро́бы Твоея́, и вся́ враги́ побѣди́, и побѣ́ду страда́льцемъ подаде́, Чи́стая еди́на Приснодѣ́во.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Возмо́глъ еси́, укрѣпля́емь, держа́вою богонача́льною, Ме́мноне богому́дре, всю́ вра́жію си́лу пребори́ти, тѣ́мже вѣне́цъ я́ко побѣдоно́сецъ пріе́мь, о на́съ Христу́ моли́ся.

Якоже отъ исто́чника, твоея́ ра́ки струи́ исцѣле́ній истека́ютъ, болѣ́зни и скве́рны си́лою Боже́ственнаго Ду́ха очища́ютъ и напоя́ютъ, преподо́бне, помышле́нія чту́щихъ тя́.

Дне́сь па́мять твоя́, о́тче, я́коже со́лнце, просвѣща́етъ вся́къ во́зрастъ и ра́зумъ: Свѣ́та бо дѣла́, Ме́мноне, соверши́лъ еси́ и къ Свѣ́ту незаходи́мому, ны́нѣ отше́дъ, всели́лся еси́.

Взя́лся еси́ ко оби́телемъ вѣ́чнымъ, Бо́га я́ко досто́йно зря́, и къ стадо́мъ преподо́бныхъ приче́лся еси́, Ме́мноне блаже́нне, съ ни́миже на́съ помина́й, на земли́ помина́ющихъ тя́.

Богоро́диченъ: Гла́съ Ти́ вопіе́мъ, Дѣ́во, ра́достно арха́нгеловъ: ра́дуйся, кля́твы разруше́ніе, преподо́бныхъ сла́во, му́чениковъ похвало́, проро́ковъ про́повѣдь и человѣ́ковъ спасе́ніе.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 138 об. – 144.

/ Къ оглавленію раздѣла /


Наверхъ / Къ титульной страницѣ

0