Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 29-й де́нь.
Па́мять и́же во святы́хъ отца́ на́шего митрополи́та Васи́лія, нетлѣ́нно почива́ющаго въ Остро́зѣ, е́же въ Че́рной Горѣ́.

НА МАЛѢЙ ВЕЧЕРНИ,
[На Го́споди, воззва́хъ: стихи́ры на 4,] гла́съ 4. Подо́бенъ: Яко бла́гъ.

Яко звѣзда́ многосвѣ́тлая,* святи́телю Васи́ліе,* вруче́нное ти́ ста́до утвержда́я, прехва́льне,* украси́лъ еси́ луча́ми правовѣ́рія догма́товъ* и е́реси тму́ отъ него́ отгна́лъ еси́, всече́стне.* Тѣ́мже мо́лимся ти́:* моли́ся изба́витися отъ бѣ́дъ и скорбе́й* творя́щимъ па́мять твою́. [Два́жды.]

Сія́етъ дне́сь па́мять святи́теля Васи́лія,* просвѣща́я вселе́нную,* я́ко пресвѣ́тлое со́лнце, въ Остро́зѣ,* озаря́я вѣ́рныхъ сердца́* и приходя́щія къ ра́цѣ моще́й его́* врачу́я отъ болѣ́зненныхъ неду́говъ;* тѣ́мже, сла́вяще па́мять его́,* усе́рдно лобыза́емъ святи́теля мо́щи,* моля́ся, да отжене́тъ тму́ е́ресей отъ ста́да своего́* си́лою отъ Дѣ́вы Возсія́вшаго.

Отъ Христо́вы Це́ркве,* преблаже́нне Васи́ліе,* отгна́лъ еси́ мы́сленныя во́лки* жезло́мъ за́повѣдей Христо́выхъ,* и сію́ крѣ́пко о́крестъ огради́лъ еси́* слове́сною крѣ́постію,* и преста́вился еси́ Христу́,* Ему́же нелѣ́ностно послужи́лъ еси́,* цѣ́лъ и неруши́мъ.* Тѣ́мже, свя́те, моли́ Го́спода,* да изба́витъ отъ тли́ и бѣ́дъ* вѣ́рою творя́щія всечестну́ю па́мять твою́.

Сла́ва, и ны́нѣ, гла́съ 2:

Возсія́, я́коже со́лнце, твоя́, святи́телю, па́мять, просвѣща́ющи мы́сленная вѣ́рныхъ сердца́, ю́же свѣ́тло соверша́емъ дне́сь, святи́телю Васи́ліе, моле́бно тя́ призыва́я: ра́дуйся, дре́во цѣлому́дренное, е́же не поработи́ ду́шу, но досто́йнымъ воздержа́ніемъ, я́ко щито́мъ Ду́ха, обложи́ся; ра́дуйся, па́стырю и учи́телю христоимени́тыхъ люде́й свои́хъ; ра́дуйся, церко́вное украше́ніе, архіере́омъ добро́то, мона́шествующимъ похвало́, Васи́ліе преосвяще́нне, моли́ся Христу́, да пода́стъ ми́ръ вселе́ннѣй и спасе́тъ ду́ши на́ша.

На стихо́внѣ стихи́ры, гла́съ 6:

Васи́ліе блаже́нне,* припа́дая ти́, молю́ся:* уще́дри и просвѣти́, о́тче прему́дре, ду́шу мою́,* я́ко да че́стно узрю́ Светода́вца Ще́драго.

Сти́хъ: Честна́ предъ Го́сподемъ* сме́рть [преподо́бныхъ Его́].

Хотя́щіи ми́ сотвори́ти зло́ врази́,* рыка́я, и́щутъ поги́бели мое́й,* изба́ви мя́, молю́ся ти́, святи́телю богому́дре,* зане́ я́ко имѣ́я дерзнове́ніе къ Бо́гу,* всеблаже́нне іера́рше Васи́ліе,* отъ лука́выхъ муже́й спаси́ мя.

Сти́хъ: Свяще́нницы Твои́ облеку́тся [въ пра́вду* и преподо́бніи Твои́ возра́дуются].

Приста́нище ти́хое, стѣ́ну необори́мую,* сто́лпъ утвержде́нія* и две́рь покая́нія стяжа́хомъ, вѣ́рніи,* сего́ ра́ди, припа́дающе, мо́лимся ти́, о́тче Васи́ліе:* огради́ на́съ моли́твами, я́ко му́дрый наста́вникъ* и побо́рникъ о душа́хъ на́шихъ.

Сла́ва, и ны́нѣ, гла́съ то́йже:

Супоста́тъ ры́каетъ на ста́до Твое́, Пречи́стая, лука́віи ка́ждый де́нь и́щутъ снѣ́дь себѣ́ сотвори́ти, но Ты́, Богоро́дице, изба́ви его́ отъ вся́каго вре́да и хище́нія.

Тропа́рь, гла́съ 4:

Отъ ю́ности твоея́ всего́ себе́ Го́сподеви отда́лъ еси́, пребыва́я въ моли́твахъ, трудѣ́хъ и постѣ́хъ, о́тче богоно́сне, о́бразъ бы́лъ еси́ добродѣ́тели своему́ ста́ду; сего́ ра́ди ви́дя Бо́гъ твое́ благо́е произволе́ніе, поставля́етъ тя́ Свое́й Це́ркви па́стыря и до́бляго архіере́я, и по преставле́ніи твое́мъ соблюде́ свято́е тѣ́ло твое́ неруши́мо, святи́телю Васи́ліе. Тѣ́мже, я́ко имѣ́я дерзнове́ніе, моли́ся Христу́ Бо́гу спасти́ся душа́мъ на́шимъ.

Сла́ва, и ны́нѣ, богоро́диченъ гла́са.



НА ВЕЛИЦѢЙ ВЕЧЕРНИ,
Блаже́нъ му́жъ, [1-й антифо́нъ]. На Го́споди воззва́хъ: стихи́ры на 8, гла́съ 6. Подо́бенъ: Все́ отло́жше.

Всеосвяще́нъ богоно́сецъ показа́лся еси́,* святи́телю Васи́ліе,* пома́заніе Бо́жіе имѣ́я,* я́ко Ду́хомъ Святы́мъ обложе́нъ,* и свѣ́тло входя́ вы́ну во Свята́я святы́хъ,* богонача́льными свѣтлостьми́ озаря́емь,* причаща́лся еси́ Святы́хъ Та́инъ благода́ти,* тѣ́мже, я́ко и́стиненъ святи́тель,* со дерзнове́ніемъ моли́ся* о душа́хъ на́шихъ. [Два́жды.]

Просвѣти́ся житіе́ твое́* добродѣ́тельными свѣтлостьми́* и си́мъ ста́до свое́ научи́лъ еси́,* отгна́вши отъ него́ ле́сти тму́,* тѣ́мже показа́лся еси́ свѣтоза́рное со́лнце,* преблаже́нне Васи́ліе,* всели́выйся, идѣ́же сія́етъ Свѣ́тъ невече́рній,* и сы́нъ дне́сь благода́ти Свята́го Ду́ха яви́лся еси́.* Сего́ ра́ди не забу́ди,* о́тче приснопа́мятне,* твою́ честну́ю па́мять соверша́ющихъ* и любо́вію ублажа́ющихъ тя́.

Умъ тво́й манове́ніемъ* е́же къ Бо́гу, пресла́вне,* вѣ́рою удобря́емь,* яви́ тя богому́дра наста́вника,* зане́ умерщвля́лъ еси́ вожделѣ́нія пло́ти* и тлѣ́нное благода́тію въ нетлѣ́ннѣмъ обрати́вый,* безпло́тнымъ сочета́лся еси́, о́тче Васи́ліе,* свѣ́тлый свѣти́льниче* и моли́твенниче о душа́хъ,* любо́вію чту́щихъ святу́ю па́мять твою́.

[Ины стихи́ры,] гла́съ 2. Подо́бенъ: Егда́ отъ дре́ва.

Въ Захо́лміи пожи́лъ еси́,* блаже́нне Васи́ліе,* яви́выйся до́брый па́стырь Христо́вы Це́ркве,* егда́ же отту́ду во Остро́гъ преше́лъ еси́,* посто́мъ, бдѣ́ніемъ и моли́твами* удруча́лъ еси́ тѣ́ло свое́,* благоугожда́я Бо́гу,* Иже просла́ви святы́я мо́щи твоя́, богоно́сне,* я́же исцѣля́ютъ неду́ги всѣ́хъ,* и́же вѣ́рою и любо́вію* соверша́ютъ всесла́вную па́мять твою́;* тѣ́мже мо́лимся ти́:* изба́ви и на́съ отъ вся́кихъ зо́лъ и обстоя́ній* моли́твами твои́ми.

Побѣди́тель тезоимени́тый* вои́стину вѣ́рнымъ лю́демъ яви́лся еси́,* огражда́я и́хъ отъ напа́стей,* о́тче Васи́ліе,* всегда́ бо призыва́емь, предваря́еши ско́ро* притека́ющихъ подъ кро́въ тво́й,* спаса́я въ де́нь и но́щь вѣ́рныя* отъ зловре́дныхъ стрѣ́лъ лука́ваго.

Зерца́ло Се́рбстѣй земли́* напослѣ́докъ дне́й яви́лся еси́, о́тче Васи́ліе,* сего́ ра́ди пріиди́те, лю́діе,* цѣлу́емъ святы́я и чудотво́рныя мо́щи* богоно́снаго отца́ на́шего,* и́же разрѣша́етъ грѣхо́вныя плени́цы,* прогоня́я ду́хи лука́выя* и свобожда́я вѣ́рныя рабы́ своя́,* о ни́хже мо́лится Христу́ Бо́гу,* да изба́витъ и спасе́тъ ду́ши и́хъ.

Вели́кій засту́пникъ* и те́плый хода́тай къ Бо́гу* о обрѣта́ющихся въ ско́рбехъ и бѣда́хъ бы́лъ еси́,* блаже́нне Васи́ліе,* священнопроповѣ́дниче Христо́въ на земли́ су́щимъ,* и́же съ на́ми вопію́тъ къ тебѣ́:* спаси́ ны отъ вся́кихъ зо́лъ,* о́тче Васи́ліе,* моли́твами твои́ми.

Сла́ва, гла́съ 8:

До́блестьми твои́ми, о́тче Васи́ліе, просвѣти́лъ еси́ вѣ́рныхъ сердца́; ќто бо слы́ша безмѣ́рное твое́ смире́ніе, терпѣ́нію твоему́ не удиви́тся? Къ ни́щимъ милосе́рдъ бы́лъ еси́, подава́я по́мощи тре́бующимъ, всѣ́хъ науча́я стра́ху Госпо́дню, и ны́нѣ неувяда́емымъ вѣнце́мъ увяза́лся еси́, о́тче, моля́ся о душа́хъ на́шихъ.

И ны́нѣ, [богоро́диченъ:] Ца́рь Небе́сный за человѣколю́біе...
Вхо́дъ. Проки́менъ дне́. Чте́нія тр́и.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры, гла́съ 2:

Ра́ка моще́й твои́хъ, о́тче Васи́ліе, зари́ испуща́етъ, цѣльбы́ подава́я приходя́щимъ къ не́й, отъ неду́гъ свобожда́я и́хъ; сего́ ра́ди весели́ся и лику́й, Це́ркви Остро́жская съ окре́стными стра́ны, возсія́ ти бо свѣ́тлая па́мять блаже́ннаго Васи́лія, и́же всегда́ мо́лится о душа́хъ на́шихъ.

Отче Васи́ліе, по возвраще́ніи изъ Аѳо́нскія горы́ яви́лся еси́ па́ствѣ свое́й, я́ко па́стырь и учи́тель, наставля́я ю́ и́стиннѣй вѣ́рѣ; она́ же, ра́дуяся, прославля́етъ святу́ю па́мять твою́, я́же и по сме́рти твое́й показу́етъ свѣ́тлость житія́ твоего́, на е́же взира́я, взыва́емъ ти́ богогла́сными пѣ́сньми: о́тче богоно́сне, спаси́ служа́щія въ Захо́лміи и Скенде́ріи бра́тію на́шу отъ навѣ́товъ вра́жіихъ.

Гла́съ 4:

Отче Васи́ліе, ра́ка моще́й твои́хъ проповѣ́дуетъ си́лу благода́ти Всесвята́го Ду́ха, Иже чре́зъ мо́щи явля́етъ ми́лость вѣ́рнымъ, огражда́я Остро́гъ, въ не́мже благоуха́ніе цѣльбы́ подае́тъ, показу́я тя́ подо́бна апо́столомъ чудесы́, и́миже да́льнія, я́ко и бли́жнія просвѣща́еши и отъ бѣ́дъ пресла́вно избавля́еши; тѣ́мже, богоблаже́нне, свободи́ отъ лю́тыхъ зо́лъ и ва́рваровъ всѣ́хъ, блажа́щихъ и любо́вію призыва́ющихъ тя́.

Поте́клъ еси́ хвали́ти своего́ Го́спода и Влады́ку, о́тче Васи́ліе, напослѣ́докъ дне́й яви́выйся крестоно́снымъ лю́демъ, я́ко богоблагода́тный па́стырь и учи́тель; тѣ́мже ны́нѣ наслажда́яся благи́хъ, стяжа́лъ еси́ дерзнове́ніе къ Бо́гу, Ему́же простри́ моли́твы о душа́хъ сла́вящихъ тя́.

Пресла́вное житіе́ твое́ вселе́ннѣй ди́вна тя́ показа́, богому́дре о́тче: преподо́бнымъ украше́ніе бы́лъ еси́, я́ко со́лнце, на земли́ лучи́ распросте́рши, озари́лъ еси́ вѣ́рныхъ сердца́, соверша́ющихъ святу́ю па́мять твою́, всеблаже́нне Васи́ліе.

Сла́ва, гла́съ 6:

Святи́телемъ удобре́ніе, отце́мъ красоту́, исто́чника чуде́съ и вѣ́рныхъ засту́пника, соше́дшеся, о празднолю́бцы, пѣ́сньми и похвала́ми воспои́мъ, глаго́люще: ра́дуйся, Захо́лміи и Скенде́ріи храни́телю, Черны́я Горы́ и Примо́рія сто́лпе непребори́мый и предсѣда́телю; ра́дуйся, всесвѣ́тлый свѣти́льниче, и́же Се́рбскія концы́ просвѣща́еши чудесы́; ра́дуйся, скорбя́щихъ боже́ственная ра́досте и оби́димыхъ те́плый предста́телю, и ны́нѣ, о́тче Васи́ліе, моли́ся о чту́щихъ при́сно ра́достную па́мять твою́, огражда́я вѣ́рное ти́ ста́до правосла́вное.

И ны́нѣ, [богоро́диченъ,] гла́съ 8:

Ра́дуйся, зако́на исполне́ніе; ра́дуйся, хра́ме Святы́я Тро́ицы, Невѣ́сто Пречи́стая; ра́дуйся, Боже́ственное носи́ло всѣ́хъ Царя́; ра́дуйся, огню́ невеще́ственный, я́ко клеща́ми нося́щи на рука́хъ Твои́хъ у́глія, но́вый раю́, вертогра́де затворе́нный, трапе́зо пресвѣ́тлая, голуби́це нескве́рная, престо́ле Вы́шняго, о́дре боже́ственномы́сленный, его́же Ду́хъ Святы́й осѣни́, Отрокови́це Свята́я.

На стихо́внѣ стихи́ры, гла́съ 8:

Отче святы́й Васи́ліе,* я́ко заря́ разу́мнаго свѣ́та,* церко́вное свѣти́ло, красота́ мона́шествующимъ,* по́стнаго житія́ пра́вило,* бу́ди на́мъ засту́пникъ,* свобожда́я отъ губи́тельнаго врага́ ду́ши на́ша,* моли́твами твои́ми.

Сти́хъ: Честна́ предъ Го́сподемъ* сме́рть преподо́бныхъ Его́.

Вели́кую вла́сть отъ Бо́га пріе́мь,* о́тче Васи́ліе,* мно́жества лука́выхъ бѣсо́въ отгоня́еши,* спаса́я отъ озлобле́ній всѣ́хъ,* вѣ́рою и любо́вію притека́ющихъ къ ра́цѣ моще́й твои́хъ.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

Ка́ко досто́йно воспое́мъ вели́каго святи́теля Васи́лія,* честна́го ума́ богоза́рное свѣти́ло,* е́же освяща́етъ и боже́ственнымъ ра́зумомъ просвѣща́етъ вѣ́рное ста́до,* я́ко исповѣ́датель глубины́ та́инъ спасе́нія,* тѣ́мже согла́сно рце́мъ ему́ вси́:* ра́дуйся, отце́въ о́тче Васи́ліе.

Сла́ва, гла́съ то́йже:

Ты́ бы́лъ еси́ па́стырь до́брый и учи́тель те́плый, святи́телю Васи́ліе, всегда́ тя хва́ляще, вопіе́мъ ти́: тобо́ю Бо́гъ украси́ Це́рковь Свою́, и тѣ́ло твое́, многолѣ́тно въ земли́ пребы́вшее, нетлѣ́нно яви́ся лю́демъ твои́мъ; тѣ́мже не преста́й моли́тися о чту́щихъ святу́ю па́мять твою́.

И ны́нѣ, [богоро́диченъ,] гла́съ то́йже: Безневѣ́стная Дѣ́во...

Тропа́рь [свята́го] два́жды и Богоро́дице Дѣ́во... еди́ножды.



НА УТРЕНИ,
На Бо́гъ Госпо́дь: тропа́рь свята́го, два́жды. Сла́ва, и ны́нѣ, богоро́диченъ.

По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й, Спа́се.

Служи́тель бы́въ Христу́, всече́стне, научи́лъ еси́ лю́ди и просвѣти́лъ и́хъ боже́ственнымъ креще́ніемъ, вразумля́я, наста́вилъ еси́, о́тче Васи́ліе, ста́до твое́. Тѣ́мже проповѣ́дника тя́ и́стины вси́ имену́емъ, уго́дниче Христо́въ, моли́ся спасти́ся душа́мъ на́шимъ. [Два́жды.]

Сла́ва, и ны́нѣ, [богоро́диченъ]:

Безневѣ́стная Чи́стая Богоро́дице Дѣ́во, еди́на Предста́тельнице вѣ́рныхъ и покро́ве, изба́ви всѣ́хъ отъ бѣ́дъ и скорбе́й и лю́тыхъ обстоя́ній, на Тебе́ упова́ніе иму́щихъ, Отрокови́це, и ду́ши на́ша спаси́ боже́ственными мольба́ми Твои́ми.

По 2-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Отъ ю́ности взе́мъ кре́стъ сво́й, благоче́стно Христу́ послѣ́довалъ еси́, плотско́е мудрова́ніе воздержа́ніемъ побѣди́лъ еси́, мíра отбѣ́гши, мона́шескому житію́ отда́выйся, тѣ́мже, о́тче, Ду́хъ Святы́й въ тя́ бряца́етъ и на святи́тельскомъ сѣда́лищи возведе́ тя, идѣ́же возвели́чилъ еси́ Влады́ку Христа́ и Его́ Пречи́стую Ма́терь разли́чными дарова́ньми и чудесы́, посе́мъ ра́ка моще́й твои́хъ украси́ся, святи́телю Васи́ліе. [Два́жды.]

Сла́ва, и ны́нѣ, [богоро́диченъ]:

Дѣ́во Всенепоро́чная, превы́ше Бо́га ро́ждши, со святи́телемъ Его́ Васи́ліемъ, моли́ непреста́нно, оставле́ніе прегрѣше́ній и исправле́ніе житія́ да́ти на́мъ всѣ́мъ, вѣ́рою и любо́вію пою́щимъ Тя́ по до́лгу, еди́на Всепѣ́тая.

По поліеле́и сѣда́ленъ, гла́съ 8. Подо́бенъ: Прему́дрости.

Стра́сти посто́мъ и моли́твою обузда́въ, яви́лся еси́ вели́кій святи́тель и па́ству твою́ пресла́вно упа́слъ еси́, о́тче Васи́ліе, креще́ніемъ просвѣти́лъ еси́ ю́ и наказа́лъ сла́вити Еди́наго Бо́га въ Тріе́хъ Ли́цѣхъ. Вѣ́рою приходя́щія къ святѣ́й це́ркви и къ ра́цѣ моще́й твои́хъ, спаса́й моли́твами къ Бо́гу, да пода́стъ оставле́ніе грѣхо́въ чту́щимъ любо́вію святу́ю па́мять твою́. [Два́жды.]

Сла́ва, и ны́не, [богоро́диченъ]:

Небе́сную две́рь и ковче́гъ, всесвяту́ю го́ру и всесвѣ́тлый о́блакъ воспои́мъ, неопали́мую купину́, слове́сный ра́й, Евино воззва́ніе, все́й вселе́ннѣй вели́кое сокро́вище, въ не́мже обрѣ́теся спасе́ніе мíру, оставле́ніе людски́хъ согрѣше́ній, тѣ́мже и вопіе́мъ Ей: о Богома́ти, моли́ Христа́ Бо́га спасти́ ду́ши покланя́ющихся пресвято́му Рождеству́ Твоему́.

Степе́нна, 1-й антифо́нъ, 4-го гла́са. Проки́менъ, гла́съ 4: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Уста́ пра́веднаго [поуча́тся прему́дрости, и язы́къ его́ возглаго́летъ су́дъ]. Ева́нгеліе отъ Іоа́нна, зача́ло 36.

По 50-мъ псалмѣ́ стихи́ра, гла́съ 6:

Наслѣ́дниче Бо́жій, соприча́стниче блаже́нныхъ селе́ній, служи́телю Христо́въ, свя́те Васи́ліе, по и́мени твоему́ та́ко и житіе́ твое́ просія́ на́мъ, со сѣди́нами проявля́шеся свѣ́тлость ра́зума твоего́ и незло́біе души́ твоея́, кро́тость сло́́ва прославля́ше свято́е житіе́ твое́, е́же, собра́вшеся, велича́емъ, и въ успе́ніи блажа́ще тя́, мо́лимъ: помози́ дости́гнути и на́мъ та́мо, идѣ́же еси́, богоно́сне Васи́ліе.

Кано́нъ Богоро́дице со ирмосо́мъ на 6 и свято́му на 8. Гла́съ 6.

Пѣ́снь 1.

Ирмо́съ: Яко по су́ху, пѣшеше́ствовавъ Изра́иль, гони́теля фарао́на ви́дя потопля́ема, Бо́гу побѣ́дную пѣ́снь вопіе́тъ: сла́вно бо просла́вися.

Съ вы́шними ли́ки, я́ко святи́тель и служи́тель Бо́жій, предста́лъ еси́, па́стырю до́брый Захо́лміи, до́брѣ упа́сши вруче́нное ти́ ста́до, о на́съ прилѣ́жно моли́ся, получи́ти вѣ́чныхъ бла́гъ моли́твами твои́ми, о́тче Васи́ліе.

Избра́нъ бы́въ отъ Го́спода служи́ти свято́му Ева́нгелію че́стно, преблаже́нне, захо́лмстіи лю́діе, стяжа́вше тя́ па́стыря, вразумля́хуся уче́ніи твои́ми, свя́те Васи́ліе.

Ра́зумомъ Бо́жіимъ обогаща́емь, сло́во живо́тно отъ се́рдца источи́лъ еси́, напая́я ду́ши и сердца́ вѣ́рныхъ, оляденѣ́вшія страстьми́, чуде́съ заря́ми твои́ми, богоблаже́нне Васи́ліе.

Просвѣти́ ду́шу и се́рдце мое́, молю́ся Ти́, Свѣтода́вче, тва́ри Содѣ́телю, пода́ждь мнѣ́ да́ръ пѣ́нія воспѣва́ти Твоего́ уго́дника, пресла́внаго Васи́лія, научи́вшаго на́съ твори́ти во́лю Твою́, Бо́же мо́й.

Обрѣ́лъ еси́ небе́сную прему́дрость, я́ко вруче́нный ти́ тала́нтъ, и́же умножа́я, богоно́сне Васи́ліе, разори́лъ еси́ де́моновъ ле́сти и умудри́лъ лю́ди боже́ственнымъ уче́ніемъ.

Зачина́ется Превѣ́чный, и обновля́ется естество́ на́ше, рожде́ннаго отъ Отрокови́цы проповѣ́дуя, имѣ́ющаго два́ естества́ во еди́нѣй ѵпоста́си.

Богоро́диченъ: Свяще́ннѣйшій ли́къ проро́чески проявля́ше издале́ча хотя́щей Ти́ бы́ти и́стиннѣй Ма́тери Бо́жіей, тѣ́мже и мы́, сла́вяще Тя́, воспѣва́емъ, я́ко вы́шшую херуви́мъ и всея́ тва́ри, Богома́ти.

Катава́сія по уста́ву.

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо повѣ́сивый, основа́лъ еси́ на вода́хъ зе́млю, Всеси́льне.

Иска́паетъ Боже́ственная сла́дость изъ у́стъ твои́хъ, о́тче Васи́ліе, па́ству твою́ напои́лъ еси́, христоимени́тыя лю́ди, блаже́нне Васи́ліе.

Гро́бъ, идѣ́же лежи́тъ честно́е тѣ́ло твое́, благово́ніе источа́етъ, я́коже ра́й Бо́жій, облагоуха́я вѣ́рныя и служа́щія въ оби́тели твое́й, тѣ́мже, ра́дуяся, пресла́вне, не забу́ди и на́съ, о́тче Васи́ліе.

Скендерíйская у́бо страна́ пріе́млетъ тѣ́ло твое́, ду́хъ же тво́й отхо́дитъ въ Вы́шній Іерусали́мъ, идѣ́же лику́етъ съ проро́ки, апо́столы и всѣ́ми святы́ми, съ ни́ми же ку́пно моли́ся о на́съ Человѣколю́бцу Бо́гу, богоблаже́нне Васи́ліе.

Святи́телю Васи́ліе, уче́ньми свои́хъ святы́хъ у́стъ, изъ у́стъ непрія́зненныхъ волко́въ, лю́ди своя́ изба́вилъ еси́ и приве́лъ Творцу́, подава́я всѣ́мъ да́ръ исцѣле́нія.

Сло́во Безнача́льное, во пло́ти явле́нное, дарова́вшее на́мъ па́стыря и учи́теля, я́коже просла́вилъ еси́, Христе́, Своего́ слугу́, не забу́ди па́ству его́, я́же прославля́етъ своего́ іера́рха, ди́внаго во святы́хъ Твои́хъ, блаже́ннаго Васи́лія.

Богоро́диченъ: Разумѣ́ти, Чи́стая, рождества́ Твоего́ неизрече́нныя глуби́ны недоумѣ́етъ у́мъ человѣ́ческій, Бо́гъ бо Себе́ смири́въ щедро́ты ра́ди, во чре́вѣ Твое́мъ, всего́ мя́ обнови́.

Сѣда́ленъ, гла́съ 4. Подо́бенъ: Яви́лся еси́ дне́сь вселе́ннѣй.

Правосла́вно, свя́те Васи́ліе, Це́рковь Христо́ву упа́слъ еси́, ерети́ческія отгоня́я го́рькія пле́велы, сего́ ра́ди въ вы́шнихъ водворя́ешися, блаже́нне. [Два́жды.]

Сла́ва, и ны́нѣ, [богоро́диченъ]:

Сло́во Отчее, Христа́ Бо́га на́шего, изъ Тебе́ воплоти́вшагося, Богоро́дице Дѣ́во, велича́я, ублажа́емъ Тя́, Чи́стая Богоневѣ́сто.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, свята́я Це́рковь боголѣ́пно пое́тъ, взыва́ющи, отъ смы́сла чи́ста о Го́сподѣ пра́зднующи.

Ты́, о́тче свяще́нне Васи́ліе, испо́лненъ Свята́го Ду́ха, лука́выя ду́хи отгна́лъ еси́, духо́вными вѣ́ры уче́ньми твои́ми просвѣща́я ста́до твое́.

Еди́ницу несозда́нную богосло́вствуя, въ Тре́хъ Ли́цы раздѣля́ему, несѣко́мую и несмѣ́сну, просвѣща́еши свяще́ннымъ богосло́віемъ ста́до твое́, блаже́нне Васи́ліе.

Нача́льный богогла́сенъ Бо́жіимъ прича́стіемъ яви́лся еси́, о́тче Васи́ліе, просвѣща́еши омраче́нныя, я́ко рачи́тель добродѣ́тели, науча́я сла́вящія па́мять твою́.

Возше́лъ еси́ на лѣ́ствицу добродѣ́телей, блаже́нне, показу́я пу́ть спасе́нія своему́ ста́ду, сего́ ра́ди правосла́вніи лю́діе отъ Захо́лміи, Скенде́ріи и Че́рныя Го́ры, почита́я тя́, лобыза́ютъ святы́я мо́щи твоя́, о́тче Васи́ліе.

Естество́мъ несказа́ннаго, милосе́рдіемъ пребога́таго, Христа́ просла́вилъ еси́ на земли́, пребога́те о́тче, тѣ́мже и просла́вленъ, наслажда́ешися блаже́нства, свя́те Васи́ліе.

Богоро́диченъ: Кля́тва прама́тере на́шея Евы разори́ся Тобо́ю, Богома́ти, Ты́ бо на́мъ Исто́чника спасе́нія родила́ еси́, Истины присносу́щаго Живота́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, [ у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща].

Бо́жіимъ свѣ́томъ озаря́емь, лю́бящихъ Бо́га ду́ши озари́лъ еси́, свя́те, просвѣща́я и́хъ боговѣ́дѣніемъ сло́ва открове́нна, и́мже просвѣти́ и на́съ, чту́щихъ святолѣ́пную па́мять твою́, Васи́ліе.

Боже́ственнымъ свѣ́томъ и чи́стымъ по́мысломъ возвыша́яся, непоро́ченъ яви́лся еси́ слуга́ Христа́ Спа́са, о́тче Васи́ліе, сего́ ра́ди моли́ся и о ста́дѣ свое́мъ, спасти́ся ему́ отъ злы́хъ навѣ́товъ ага́рянскихъ.

Благода́тію призыва́емь, разруши́лъ еси́ и́дольскія безбо́жія словесы́ Ева́нгельскими; я́коже имѣ́я дерзнове́ніе, защити́ и на́съ моли́твами твои́ми, блаже́нне Васи́ліе, отъ злы́хъ обстоя́ній, навѣ́тующихъ на ны́.

Мно́гимъ чудотворе́ніемъ утѣша́я ста́до свое́ правосла́вное, ше́ствовалъ еси́ ко Аѳо́нстѣй горѣ́, и отту́ду возвраща́яся, благовѣсти́лъ еси́ лю́демъ свято́е уче́ніе Христо́во, и́мже просвѣща́й и на́съ, священнотаи́нниче Васи́ліе.

Бо́жіимъ опредѣле́ніемъ прише́лъ еси́ въ Остро́жскую страну́, пото́мъ же посѣти́лъ еси́ Скендерíйскую о́бласть, поучи́въ ю́ зако́ну Бо́жію, тѣ́мже и лю́діе вѣ́рніи, живу́щіи въ ни́хъ, пріе́мше тя́, хва́лятъ тя́ и велича́ютъ я́ко своего́ предста́теля, о́тче Васи́ліе.

Щито́мъ Правосла́вія охраня́еши лю́ди своя́ отъ па́губныхъ е́ресей, блаже́нне Васи́ліе, огражда́я и́хъ отъ злово́нія благоуха́ніемъ богоно́сныхъ моще́й твои́хъ, до́брый па́стырю Васи́ліе.

Богоро́диченъ: По стра́ннѣмъ рождествѣ́ Твое́мъ, пребыла́ еси́ дѣ́вою, Марíе Богоневѣ́сто, мо́лимся Ти́: чу́днымъ покро́вомъ Твои́мъ спаси́ неду́гующія и защити́ правосла́вныя лю́ди Твоя́.

Пѣ́снь 6.

Ирмо́съ: Проро́ку Іо́нѣ подража́я, вопію́ Ти: живо́тъ мо́й, Спа́се, свободи́ изъ тли́, и спаси́ мя, Многоми́лостиве, зову́ща, сла́ва Тебѣ́.

Язы́къ тво́й, Ду́хомъ изощре́нъ разу́мно, я́ко тро́сть скоропи́сца, написа́ въ се́рдца благочести́выхъ сло́во бога́тное и всесвяще́нное Бо́жіимъ манове́ніемъ, о́тче блаже́ннѣйшій Васи́ліе.

Поуча́яся Боже́ственнымъ, вше́лъ еси́ во Свята́я святы́хъ, просвѣща́я Ду́хомъ вѣ́рныя, я́ко Тро́ическою заре́ю освяще́нъ, о́тче Васи́ліе.

Ко спасе́нію устроя́я люде́й Бо́жіихъ, Явльшагося во пло́ти проповѣ́дуеши, па́стырю, и я́ко учи́тель Захолмíйскій и Черного́рскій, наставля́еши ста́до твое́, Тѣ́мже, уго́дниче Бо́жій, спаси́ служа́щія и приходя́щія къ оби́тели твое́й, и́же усе́рдно лобыза́ютъ честну́ю ра́ку моще́й твои́хъ.

Отъ напа́стей и разли́чныхъ бѣ́дъ и скорбе́й, наноси́мыхъ вѣ́рнымъ отъ лука́выхъ, изба́ви ны́, о́тче, я́ко уго́дникъ Христо́въ, чту́щія свято́е твое́ успе́ніе, блаже́нне Васи́ліе.

Заступле́ніе вѣ́рнымъ и весе́ліе ра́достное печа́льнымъ, обогати́ ны духо́вною ра́достію, жела́ющія и прося́щія твоего́ заступле́нія, новоявле́нне Васи́ліе.

Богоро́диченъ: Ты́ была́ еси́, Дѣ́во Всепѣ́тая, две́рь Царя́ Небе́снаго и хра́мъ сла́вы Его́, отве́рзи и на́мъ две́ри милосе́рдія и введи́ на́съ моли́твами Твои́ми въ жили́ще сла́вы небе́сныя.

Конда́къ, гла́съ 8. Подо́бенъ: Взбра́нной Воево́дѣ.

Яко отъ младе́нства себе́ порабо́тивъ Го́сподеви, посто́мъ и бдѣ́ніемъ свое́ тѣ́ло удруча́я, му́дре, сосу́дъ че́стенъ Ду́ху Пресвято́му яви́лся еси́, сего́ ра́ди поставля́етъ тя́ па́стыремъ Своея́ Це́ркви, ю́же до́брѣ па́слъ еси́. Тѣ́мже ко Го́споду отхо́диши, Его́же возлюби́лъ еси́. Мо́лимся ти́, помяни́ и на́съ, вѣ́рою чту́щихъ святу́ю па́мять твою́, да вси́ зове́мъ ти́: ра́дуйся, всече́стне о́тче Васи́ліе.

Икосъ:

Воспое́мъ ны́нѣ хвала́ми святи́теля, па́стыря и учи́теля Захолмíйскаго, Скендерíйскаго, Че́рныя горы́ и Примо́рія, я́ко да моли́твами его́ изба́вимся нече́стія и навѣ́товъ лука́ваго, и́бо о́нъ яви́ся лю́демъ свои́мъ нескве́рненъ и нетлѣ́ненъ, прине́сши Христу́ себе́ въ непоро́чную же́ртву, Бо́гу благопрія́тну, я́ко святи́тель, освяще́нъ тѣ́ломъ и душе́ю, тѣ́мже, вѣ́рніи лю́діе, пріиди́те и восхвали́те Це́ркви и́стиннаго предста́теля, до́бляго побо́рника вѣ́ры Правосла́вныя, преди́внаго чудотво́рца, ми́лостиваго моли́твенника о душа́хъ на́шихъ, пресла́внаго Васи́лія.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Просвѣща́емь благода́тію по Боже́ственному манове́нію, бы́лъ еси́ свѣтода́тельная звѣзда́, въ послѣ́днее вре́мя просія́въ заря́ми, му́дре, пою́щимъ: благослове́нъ Бо́гъ оте́цъ на́шихъ.

Святѣ́йшая Це́рковь озари́ тя, во е́же украси́ти ю́ добродѣ́тельными дѣя́ньми, живу́щей въ тебѣ́ Нераздѣ́льнѣй Тро́ицѣ, Ейже вопіе́мъ: благослове́нъ Бо́гъ оте́цъ на́шихъ.

Вещми́ су́етными ве́сь у́мъ человѣ́ческій обуя́, ему́же да́ждь цѣльбу́ сло́вомъ твои́мъ, Васи́ліе, науча́я лю́ди пѣ́ти: благослове́нъ Бо́гъ оте́цъ на́шихъ.

Диви́мся пресла́внымъ чудесе́мъ твои́мъ, блаже́нне Васи́ліе, и́миже неду́ги исцѣля́еши и отъ бѣ́дъ избавля́еши, тѣ́мже, повину́яся велѣ́нію твоему́, вопіе́мъ Го́сподеви: благослове́нъ Бо́гъ оте́цъ на́шихъ.

На́шему смире́нію бу́ди засту́пникъ, о́тче Васи́ліе, и науча́й на́съ всегда́ пѣ́ти: благослове́нъ еси́, Бо́же оте́цъ на́шихъ.

Богоро́диченъ: Сѣдя́й въ нѣ́дрѣхъ неопи́санно Бо́га Отца́, ны́нѣ, Пречи́стая, почи́тъ въ нѣ́дрѣхъ Твои́хъ опи́санно, Твои́мъ обложе́нъ зра́комъ спасе́нія ра́ди на́шего, Ему́же усе́рдно вопіе́мъ: Препѣ́тый и Превозноси́мый во вѣ́ки.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Го́рдаго змíя твои́мъ смире́ніемъ сте́рлъ еси́, блаже́нне Васи́ліе, возвыша́яся Бо́гу свои́мъ честны́мъ ра́зумомъ; тѣ́мже тя́ чти́мъ, Христа́ превознося́ще во вѣ́ки.

Богосло́вствуя о воплоще́нномъ Сло́вѣ, лю́ди своя́ отъ рабо́ты и ле́сти спа́слъ еси́, отгоня́ ага́рянская безбо́жія, о́тче Васи́ліе.

Возра́слъ еси́, я́ко цвѣ́тъ благоуха́нія, въ Захо́лміи, о́тче богоно́сне, Скенде́рія же, тя́ пріе́мля, всѣ́мъ прино́ситъ, я́ко во́ни, цѣле́бныя да́ры.

Иска́павый Бо́жія благода́ти сла́дость, я́ко гора́ ма́слина, тѣ́ло твое́ слу́житъ оби́тели твое́й, е́юже хва́лимся, воспѣва́юще дѣла́ Бо́жія.

Лико́въ премíрныхъ приснотеку́щій свѣтоно́сный исто́чникъ, благода́ти хра́мъ, Пречи́стая Дѣ́во, сохрани́ на́съ моли́твами уго́дника Бо́жія Васи́лія.

Богоро́диченъ: Избавля́еши на́съ пе́рвыя кля́твы Твои́мъ Рождество́мъ, Благослове́нная Отрокови́це, сего́ ра́ди вопіе́мъ Ти́ гла́сомъ Гавріи́ла: ра́дуйся, Вино́вная всѣ́хъ спасе́нію.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и Тя́ ублажа́емъ.

Въ земли́ кро́ткихъ яви́лся еси́, о́тче Васи́ліе, кро́токъ, и незло́бивъ бы́въ, съ вы́шними совокупля́яся во́инствы, я́ко добродѣ́тельными свѣтлостьми́ укра́шенъ, блаже́нне.

Престо́лъ украша́я свѣ́тло во всѣ́хъ, да́же посредѣ́ злочести́выхъ градо́въ, въ ни́хже пожи́въ, я́ко а́нгелъ, святи́тельствомъ пома́занъ, о́тче богому́дре.

Па́мять твоя́ дне́сь составля́етъ пра́здникъ, апо́стольскій ли́къ и му́ченическій собо́ръ ра́дуется, пра́ведныхъ похвало́, свѣти́ло Черного́рское, е́же вѣ́рніи, пѣ́сньми восхваля́юще, вопію́тъ ти́: изба́ви на́съ отъ вся́кихъ напа́стей и бѣ́дъ, блаже́нне Васи́ліе.

Пресла́вная па́мять твоя́ на́мъ возсія́, просвѣща́ющи вѣ́рныхъ, и́же мо́лятся ти́, да помяне́ши и́хъ и моли́твами твои́ми изба́виши вся́ лю́ди твоя́, о́тче му́дре Васи́ліе.

Умертви́ на́ша плотскíя стра́сти и по́хоти, уста́ви бу́рю душе́вныхъ волне́ній, укрѣпи́ же всѣ́хъ на́съ, и́же вѣ́рою и любо́вію почита́ютъ блаже́нную па́мять твою́, новоявле́нне Васи́ліе.

Богоро́диченъ: Якоже ка́пля небе́сная, во Твое́ чре́во, о Пресвята́я Дѣ́во, до́ждь сни́де, изсуша́я пото́ки льсти́выя, и всѣ́мъ вѣ́рующимъ избавле́ніе Тобо́ю, Пречи́стая, дарова́ся.

Свѣти́ленъ. Подо́бенъ: Посѣти́лъ ны́ е́сть свы́ше Спа́съ.

Сла́вно красу́ется дне́сь свѣтоза́рное торжество́ во святѣ́й сла́вѣ лица́ Бо́жія, я́ко пріи́де де́нь па́мяти святи́теля, его́же велича́юще, мо́лимъ: да помяне́тъ по и́мени служа́щихъ во оби́тели его́ и всѣ́хъ на́съ, хва́лящихъ па́мять его́. [Два́жды.]

Сла́ва, и ны́нѣ, [богоро́диченъ]:

На Тя́, Пречи́стая, упова́ніе къ Бо́гу возлага́емъ, моля́щеся Ти́: да отъ Христа́ Го́спода испро́сиши на́мъ невреди́мымъ до конца́ сохрани́тися.

На хвали́техъ стихи́ры [на 4], гла́съ 8. Подо́бенъ: О, пресла́внаго чудесе́!

Святи́телю Васи́ліе,* всѣ́лъ еси́ на лѣ́ствицу Боже́ственнаго ра́зума* и къ Бо́гу прибли́жился,* исцѣле́нія да́ръ пріе́мый,* и́мже исцѣля́еши неду́ги неисцѣ́льныя* и отгоня́еши ду́хи нечи́стыя,* тѣ́мъ, па́мять твою́ пра́зднующе,* ра́достію се́рдца Христа́ велича́емъ,* возвели́чившаго Своего́ уго́дника. [Два́жды.]

Отче чу́дне Васи́ліе,* имѣ́я свѣтови́денъ у́мъ,* свы́ше облиста́емь,* ста́до твое́ до́брѣ упа́слъ еси́.* Захо́лмія и Скенде́рія тобо́ю хва́лятся,* Че́рная Го́ра съ Примо́ріемъ показу́ютъ чудеса́ твоя́,* оби́тель же твоя́ со служа́щими въ не́й украша́ется тобо́ю.* Стра́сти ути́шивъ,* бѣсо́вское дѣ́йство уста́вилъ еси́,* безстра́стіемъ же, я́ко крыло́ма, возлетѣ́лъ еси́ та́мо,* идѣ́же неизрече́нна и недомы́слима добро́та,* тѣ́мъ ны́нѣ моли́ся* о всѣ́хъ на́съ, честву́ющихъ твое́ успе́ніе.

Отче отце́въ, свяще́нства пра́вило,* цѣлому́дрія о́бразъ,* мона́шествующихъ крѣ́пость бы́лъ еси́, Васи́ліе.* Сего́ ра́ди лику́й, Це́ркве Остро́жская, со служа́щими въ тебѣ́,* и́бо пріи́де де́нь па́мяти твоего́ утвержде́нія,* любве́ свѣти́льника, исто́чника чуде́съ,* Боже́ственнаго Ду́ха сосу́дъ,* пра́здникъ блаже́ннаго Васи́лія,* его́же блажа́ще,* усе́рдно хвала́ми почти́мъ.

Сла́ва, гла́съ 6:

Преподо́бне треблаже́нне, святѣ́йшій о́тче Васи́ліе, па́стырю до́брый вѣ́рнаго своего́ ста́да, учениче́ Христо́въ, положи́вый ду́шу о о́вцахъ, ны́нѣ, всехва́льне, моли́твами твои́ми испроси́ на́мъ ве́лію и бога́тую ми́лость.

И ны́нѣ, [богоро́диченъ]:

Бо́га, отъ Тебе́ воплоти́вшагося, разумѣ́хомъ, Богоро́дице Дѣ́во, Того́ моли́, Пречи́стая, о спасе́ніи ду́шъ на́шихъ.

Славосло́віе вели́кое и отпу́стъ.



НА ЛИТУРГІИ,

Блаже́нна кано́на, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ [и упова́етъ на Него́]. Сти́хъ: Услы́ши, Бо́же, гла́съ мо́й, внегда́ моли́тимися къ Тебѣ́. Апо́столъ ко Евре́емъ, зача́ло 335. Аллилу́ія, [гла́съ 2]: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Србљак. — Београд: Изданjе Свети Архиjереjски Синод Српске Православне Цркве, 1986. — С. 344-355.

Свѣрено съ изданіемъ: Зборник црквених богослужбених пјесама, псалама и молитава. Извод из Типика и црквенословенски рјечник за Православне Србске Цркве и школе. — Сремски Карловци: Српска манастирска штампариjа, 1901. — С. 282-289.

/ Къ оглавленію раздѣла /


Наверхъ / Къ титульной страницѣ

0