Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 28-й де́нь.
Святы́хъ апо́столъ Іа́сона и Сосипа́тра и святы́хъ му́ченикъ Да́ды, Макси́ма и Кинтиліа́на.

[ВЕЧЕРЪ,]
На Го́споди воззва́хъ: стихи́ры апо́столовъ, гла́съ 8. Подо́бенъ: Му́ченицы Твои́, Го́споди.

Іа́сонъ богодухнове́нный* лѣ́ствица бы́сть,* до небе́съ дося́жущая,* вѣ́рныя возводя́щая* уче́ніемъ къ небе́снѣй жи́зни,* живе́тъ же по кончи́нѣ* и предстои́тъ, ра́дуяся,* Тро́ицѣ сла́вный.* Того́ моли́твами, Го́споди,* всѣ́мъ пода́ждь ве́лію ми́лость.

Іа́сонъ пребога́тый* исцѣле́нія всегда́ источа́етъ* приходя́щимъ къ ра́цѣ его́,* и уставля́етъ неду́ги душа́мъ,* и отгоня́етъ преле́стныя ду́хи,* и утиша́етъ бу́ри.* Того́ моли́твами, Го́споди,* всѣ́мъ пода́ждь ве́лію ми́лость.

Ины стихи́ры святы́хъ му́ченикъ, гла́съ 1. Подо́бенъ: Всехва́льніи му́ченицы.

Тро́ицу несозда́нную,* тріе́ на суди́щи святíи,* исповѣ́давше, му́ченицы,* уморе́ни бы́сте* и жи́зни нестарѣ́емѣй ны́нѣ сподо́бистеся,* пото́ка пи́щу наслѣ́довасте.* Тѣ́мже моли́теся* дарова́ти душа́мъ на́шимъ* ми́ръ и ве́лію ми́лость.

Непобѣди́міи му́ченицы,* то́ками излія́вшіяся кро́ве* пре́лести изсуши́сте тече́нія,* ту́чи излива́ете исцѣле́ній всѣ́мъ,* вѣ́рою притека́ющимъ,* и си́лу неду́говъ отъе́млете.* Тѣ́мже моли́теся* дарова́ти душа́мъ на́шимъ* ми́ръ и ве́лію ми́лость.

Вси́ почти́мъ, вѣ́рніи, пѣ́сньми дне́сь* Да́да боже́ственнаго,* и Макси́ма и Кинтиліа́на,* тве́рдыя ору́жники,* прему́дрыя му́ченики,* су́щія рая́ жи́тели,* ны́нѣ моля́щіяся* дарова́ти душа́мъ на́шимъ* ми́ръ и ве́лію ми́лость.

Сла́ва, и ны́нѣ, пра́здника, или́ богоро́диченъ:

Всепѣ́тая Влады́чице,* наде́жде вѣ́рныхъ и утвержде́ніе,* прибѣ́жище и по́мощь,* Тя́ мо́лимъ:* отъ вся́кія бѣды́ рабы́ Твоя́ сохрани́,* вѣ́рою покланя́ющіяся Рождеству́ Твоему́.* Его́же моли́* дарова́ти душа́мъ на́шимъ* ми́ръ и ве́лію ми́лость.

Крестобогоро́диченъ:

Своего́ Агнца* Агница и Непоро́чная Влады́чица* на Крестѣ́ я́ко ви́дѣ, зра́ка не иму́ща, ниже́ добро́ты:* увы́ Мнѣ́, — рыда́ющи, глаго́лаше, —* гдѣ́ добро́та Твоя́ за́йде, Сладча́йшій?* гдѣ́ благолѣ́піе?* гдѣ́ благода́ть блиста́ющая* о́браза Твоего́,* Сы́не Мо́й любе́знѣйшій?

Тропа́рь, гла́съ 3:

Апо́столи святíи, моли́те ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.


[НА УТРЕНИ,]
Кано́нъ, творе́ніе Іо́сифово. Гла́съ 8.

Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.

Со а́нгельскими живы́й ли́ки, и невече́рняго Свѣ́та всегда́ исполня́емь, и прича́стіемъ и́стиннымъ обожа́емь, пребога́те, любо́вію пра́зднующія твою́ святу́ю па́мять просвѣти́, Го́сподеви пою́щія: сла́вно бо просла́вися.

Боже́ственное тя́ отню́дъ распали́, Іа́соне, жела́ніе те́плое, тѣ́мже послѣ́довалъ еси́ о́гнь на зе́млю воврещи́ Прише́дшему, сла́вне, отъ Него́же просвѣща́емь, свѣ́тло взыва́лъ еси́: Го́сподеви пои́мъ, сла́вно бо просла́вися.

Умо́мъ невеще́ственнымъ нра́вомъ подо́бяся, на земли́ на́съ ра́ди ве́щію, блаже́нне, тѣ́ла Явльшемуся ми́лостивно, преблаже́нне, служи́лъ еси́; служи́тель же Сего́ свяще́ненъ, зовы́й, бы́лъ еси́: Го́сподеви пои́мъ, сла́вно бо просла́вися.

Богоро́диченъ: Отъ Дѣ́вы безму́жны ви́дѣнъ бы́сть, воплоща́емь за милосе́рдіе мно́гое, Недоумѣ́нный, страстьми́ тѣ́ла окая́нно пони́кшихъ, возводя́ къ безстра́стію я́вѣ стра́стію пло́ти Своея́, Ему́же обы́чно пои́мъ: сла́вно бо просла́вися.

Инъ кано́нъ му́чениковъ. Іо́сифово. Гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Бо́гу Вседержи́телю со дерзнове́ніемъ, добропобѣ́дніи му́ченицы, предстоя́ще всегда́, моли́те согрѣше́ній очище́ніе посла́ти на́мъ.

Вѣнча́стеся, му́ченицы, добро́тою боже́ственною, по́двигъ сконча́вше и многоко́зненнаго врага́ побѣди́вше. Тѣ́мже ва́съ обра́дованно пѣ́сненно славосло́вимъ при́сно.

Крѣ́постію Ду́ха Пресвята́го, крѣ́пость погуби́сте льсти́ваго змíя, богоблаже́нніи, и безсме́ртныхъ даро́въ ны́нѣ наслажда́етеся.

Богоро́диченъ: По́лный истощи́ся за милосе́рдіе и пло́ть бы́сть, возводя́, Чи́стая, къ пе́рвой на́съ добро́тѣ, и́же вѣ́рою на земли́ восхваля́ющія Тя́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Цѣвни́ца яви́лся еси́ Ду́ха, возглаша́я на́мъ уче́нія богокра́сная, отрѣва́я прелука́вая пѣ́нія.

Источи́ язы́къ тво́й, я́коже рѣка́, жи́зни исто́чники и го́рькія во́ды преле́стныя, изсуши́, сла́вне.

Исцѣле́нія то́чатъ свяще́нныя твоя́, му́дре, мо́щи разли́чная, Ду́ха Свята́го дѣ́йствомъ и благода́тію.

Богоро́диченъ: Умертви́, Пречи́стая, живопода́тельною мольбо́ю Твое́ю во мнѣ́ живу́щій грѣ́хъ, Яже Живо́тъ ро́ждшая.

Инъ.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Ве́деніемъ ну́жднымъ, святíи, за Христа́ у́зницы бы́вше, соу́зу пре́лести злу́ю разрѣши́сте благода́тію, разрѣ́шше же ся отъ пло́ти, къ жи́зни преста́вистеся.

Ви́дѣти Бо́жію красоту́, страда́льцы, жела́юще, прехва́льніи, ра́ны, и вяза́нія, и ну́ждную сме́рть претерпѣ́сте, тве́рдостію ума́ крася́щеся.

Зако́нно, му́ченицы прехва́льніи, стра́ждуще нра́ва крѣ́постію, одѣ́ястеся, вку́пѣ побѣ́днымъ вѣнце́мъ, и Тро́ицѣ Честнѣ́й ра́достно ны́нѣ предстоите́.

Богоро́диченъ: Иже естество́мъ неопи́санный, вопло́щся изъ Тебе́, опису́ется, Богора́дованная Чи́стая, Его́же непреста́нно моли́ уще́дрити и спасти́ пою́щія Тя́.

Сѣда́ленъ, гла́съ 8. Подо́бенъ: Прему́дрости.

Свѣтосія́нными заря́ми слове́съ честны́хъ, просвѣти́лъ еси́ всѣ́хъ богоподо́бно, Іа́соне апо́столе, и тму́ отгна́лъ еси́, и, пострада́въ, блаже́нне, источа́еши исцѣле́нія, и тѣле́съ уставля́еши лю́тыя болѣ́зни. Тѣ́мъ, соше́дшеся, свято́е твое́ вси́ твори́мъ торжество́, Спа́са сла́вяще, и вѣ́рно вопіе́мъ ти́: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, гла́съ 1. Подо́бенъ: Гро́бъ Тво́й.

Тве́рдостію души́ прибли́жившеся болѣ́знемъ, непобѣди́ми мно́гими козньми́ льсти́ваго, яви́стеся, му́ченицы, а́нгеломъ равноче́стни. Тѣ́мже вся́ вселе́нная почита́етъ боре́нія и честна́я ва́ша страда́нія, и́миже просла́вистеся.

И ны́нѣ, пра́здника, или́ богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

Крестобогоро́диченъ:

Нескве́рная Агница, Агнца и Па́стыря, повѣ́шена на дре́вѣ, ме́ртва зря́щи, пла́чущи, вѣща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Учени́къ бы́въ Па́влу, прему́дрому священнопроповѣ́днику, подо́бникъ же Христу́, сла́вне, Того́ повину́яся боже́ственнымъ манове́ніемъ.

Черто́га оде́ждею укра́шенъ бы́лъ еси́ боже́ственныя Це́ркве, се́й Ду́хомъ, богоно́се, обручи́вся сла́дкимъ сло́вомъ му́дрости твоея́.

Вра́чь преиску́сенъ злоотгони́тельными боже́ственными дла́ньми твои́ми неду́гующихъ бы́лъ еси́, исцѣля́я стра́сти прелю́тыя.

Богоро́диченъ: Неискусобра́чная Влады́чице, спаси́ мя, Спа́са Сло́ва ро́ждшая, и бѣ́дъ свободи́, и вѣ́чнующаго осужде́нія.

Инъ.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ дѣла́ Твоя́, проро́къ глаго́лаше, и просла́вихъ си́лу Твою́.

Зако́нъ Боже́ственный утвержда́юще, беззако́ніе страда́льцы безбо́жныхъ отри́нуша, благоче́стно пострада́вше и Го́сподеви благоугоди́вше.

Ублажи́мъ дне́сь Да́да и Макси́ма до́блія, зако́нно пострада́вшія, и хвала́ми вѣнча́емъ Кинтиліа́на всечестна́го.

Непрело́жни, святíи, во вре́мя страда́нія бы́вше, вся́ку ле́сть низложи́сте и побѣ́дный вѣне́цъ отъ Бо́га Спа́са прія́сте.

Богоро́диченъ: Уны́ніемъ одержи́маго, Богороди́тельнице, воздви́гни мя́ твори́ти боже́ственное хотѣ́ніе, я́ко да ублажу́ Тя, Предста́тельнице всѣ́хъ неусы́пная.

Пѣ́снь 5.

Ирмо́съ: Отъ но́щи невѣ́дѣнія по душелови́тельному пути́ при́сно блудя́щаго, свѣ́томъ ра́зума Твоего́, Го́споди, преднаставля́я мя́, на стезю́ за́повѣдей Твои́хъ напра́ви.

Содержи́мыя ле́стію и па́губѣ безу́мно рабо́тающія человѣ́ки, преблаже́нне, боже́ственными уче́ніи свободи́лъ еси́.

Якоже нѣ́кое свѣти́ло, на высотѣ́ богоразу́мія, Іа́соне предлежа́, привле́клъ еси́ ко приста́нищу боже́ственному лю́тѣ потопля́емыя.

Умерщвле́нныя дре́вле су́щія зміи́нымъ угрызе́ніемъ, живото́чнымъ твои́мъ сло́вомъ, блаже́нне, удиви́въ, оживи́лъ еси́.

Богоро́диченъ: Святѣ́йши яви́лася еси́ херуви́мъ, на земли́ вопло́щши всѣ́хъ Влады́ку, Чи́стая Всенепоро́чная Влады́чице.

Инъ.

Ирмо́съ: Свѣ́тлый на́мъ возсія́й Свѣ́тъ Присносу́щный, у́тренюющимъ о судьба́хъ за́повѣдей Твои́хъ, Влады́ко Человѣколю́бче, Христе́, Бо́же на́шъ.

Боже́ственное и́мя и спаси́тельное исповѣ́давше предъ мучи́тели, святíи, мно́гихъ му́къ иску́съ претерпѣ́сте, и сме́рть непра́ведную.

Благода́тію укрѣпля́еми Боже́ственнаго Ду́ха, не убоя́стеся муче́ній тѣле́сныхъ, ни истука́ннымъ че́сти принесо́сте, добропобѣ́дніи му́ченицы.

Вѣне́цъ неувяда́емый пріе́мше, святíи му́ченицы, Тро́ицѣ ны́нѣ предстоите́ тріе́, незаходи́мому сія́нію сподо́блени, и ны́нѣ ублажа́етеся.

Богоро́диченъ: Исцѣли́, Влады́чице Всенепоро́чная, се́рдца моего́, молю́ Тя́, стра́сти неисцѣ́льныя и ума́ моего́ тму́ тя́жкую отжени́, Пречи́стая.

Пѣ́снь 6.

Ирмо́съ: Якоже проро́ка изба́вилъ еси́ изъ глубины́ преиспо́днія, Христе́ Бо́же, и мене́ отъ грѣхо́въ мои́хъ изба́ви, я́ко Человѣколю́бецъ, и упра́ви живо́тъ мо́й, молю́ся.

Преуди́влься добро́тѣ за милосе́рдіе на́мъ Прибли́жшагося, Іа́соне апо́столе, сему́ послѣ́довалъ еси́ и оста́вилъ еси́ жите́йскую красоту́.

Научи́вся боже́ственнымъ, научи́лъ еси́ благода́тію, сла́вне, Тро́ическому сія́нію дре́вле слѣпоту́ обнося́щія неразу́мія безу́міе.

Неду́ги отгоня́ разли́чныя и прогоня́ зло́бныя ду́хи, лю́ди къ позна́нію Госпо́дню обрати́лъ еси́, изба́вль отъ пре́лести лука́ваго.

Богоро́диченъ: Яко до́ждь на руно́, спаси́тельное Сло́во въ ложесна́ Твоя́ сни́де, и Человѣ́къ изъ Тебе́ бы́сть, спаса́я мя́, Отрокови́це, хода́тайствомъ Твои́мъ.

Инъ.

Ирмо́съ: Яко Іо́ну проро́ка, возведи́, Христе́ Бо́же, живо́тъ мо́й отъ тли́, вопію́ Ти, Человѣколю́бче, я́ко жи́знь у Тебе́ е́сть, и нетлѣ́ніе, и си́ла.

Новоявле́нно, я́коже звѣ́зды, зри́ми, просвѣща́ете земны́й мíръ, всехва́льніи му́ченицы, помраче́ніе отгоня́ще безбо́жія благода́тію.

Законоположе́нія безбо́жныхъ до конца́ отри́нувше, и зако́номъ Госпо́днимъ я́вѣ утвержда́еми, зако́нно, святíи му́ченицы, за Христа́ пострада́сте.

Высоча́йшими ра́зумы и дѣ́лы пока́зани до́брѣ, съ высоты́ спа́дшаго подъ но́ги покори́сте, укра́шеныя въ добро́тахъ муче́нія, прехва́льніи.

Богоро́диченъ: Зако́нъ есте́ственныхъ кромѣ́, Творца́ естеству́ воплоти́ла еси́, Отрокови́це, па́че ума́, Всенепоро́чная, Его́же добропобѣ́дніи му́ченицы исповѣ́дающе, постра́даша.

Конда́къ апо́столовъ, гла́съ 4. Подо́бенъ: Яви́лся еси́ дне́сь.

Яви́стеся, я́ко звѣ́зды пресвѣ́тлыя, просвѣща́юще всю́ вселе́нную свѣ́томъ проповѣ́данія, апо́столи боже́ственніи Іа́соне и Сосипа́тре, спаса́йте вѣ́рою чту́щихъ ва́съ.

Пѣ́снь 7.

Ирмо́съ: Отроцы богочести́віи въ Вавило́нѣ, о́бразу злато́му не поклони́шася, но посредѣ́ пе́щи о́гненныя, ороша́еми, пѣ́снь воспѣва́ху, глаго́люще: превозноси́мый отце́въ и на́шъ Бо́же, благослове́нъ еси́.

Болѣ́знемъ приближа́яся непреста́ннымъ, болѣ́зни, Іа́соне, облегчи́лъ еси́ вѣ́рнымъ и къ неболѣ́зненному прія́тію наста́вилъ еси́ благоче́стно воспѣва́ющія: благослове́нъ Бо́гъ оте́цъ на́шихъ.

Тлѣ́ніе уста́вилъ еси́ зло́бы, блаже́нне, и ра́зумъ насади́лъ еси́ спаси́тельный въ мы́сли человѣ́ческія, и́мже просвѣща́емь, Влады́цѣ всѣ́хъ взыва́лъ еси́: благослове́нъ Бо́гъ оте́цъ на́шихъ.

Богоро́диченъ: Нося́щи Христа́ на руку́, я́ко престо́лъ огнезра́ченъ, Всенепоро́чная, моли́ Его́, я́ко Сы́на Твоего́ и Го́спода, умири́ти мíръ, зову́щи: благослове́нъ Бо́гъ оте́цъ на́шихъ.

Инъ.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́, я́ко еди́нѣми усты́, поя́ху и благословля́ху, глаго́люще: благослове́нъ Бо́гъ оте́цъ на́шихъ.

Огне́мъ Боже́ственнаго стра́ха ду́шу распала́юще, вся́ку попали́сте, му́дріи, ве́щь го́рькую многобо́жія и къ сія́нію взя́стеся невече́рнему, согрѣше́ніемъ на́шимъ разрѣше́ніе подаю́ще.

Струя́ми крове́й угаси́вше запале́ніе, блаже́нніи, многобо́жія вои́стинну, ту́чу на́мъ источа́ете чуде́съ, вѣ́рою притека́ющимъ къ ра́цѣ моще́й ва́шихъ всегда́.

До́мъ я́вльшеся Ду́ха, му́дріи добропобѣ́дніи му́ченицы, хра́мъ, въ не́мже ны́нѣ лежите́, исто́чникъ содѣва́етъ чуде́съ: въ о́ньже прибѣга́юще, отъ вся́кія скве́рны страсте́й избавля́емся.

Богоро́диченъ: Воплоще́нно родила́ еси́ на́мъ, Пренепоро́чная, Сло́во, Единосу́щно Отцу́ и Ду́ху, Богороди́тельнице, Его́же моли́ спасти́ пою́щія Тя́ отъ всѣ́хъ страсте́й и обстоя́нія.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Искорени́лъ еси́ те́рніе злохуле́нія сѣ́менемъ Сло́ва, Іа́соне: стори́чествующій кла́съ, спа́сшихся мно́жество, воздѣ́лалъ еси́.

Просвѣще́ніе су́щихъ во тмѣ́ тя́ свѣти́льника Та́рсу поставля́етъ, блаже́нне, и́же сего́ престо́лъ стро́яща свяще́нно и преподо́бно, Іа́соне апо́столе.

Зако́ненъ бы́лъ еси́ учи́тель су́етнѣй повину́вшимся ле́сти Еди́наго Бо́га чести́ несозда́ннаго, и́же тва́ремъ че́сти принося́щія спа́слъ еси́.

Богоро́диченъ: Воплоще́нна ро́ждши Бо́га Сло́ва, пло́ти на́шея стра́сти и душе́вныя, Отрокови́це, исцѣли́, да вѣ́рою Тя́ вси́ и любо́вію сла́вимъ.

Инъ.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Лю́бяще Го́спода отъ всея́ души́, я́ко а́гнцы, закла́ни бы́сте, па́стырю слове́сному и боже́ственнѣй трапе́зѣ принесо́стеся и въ кро́вѣхъ пе́рвенецъ живете́.

Вѣ́рою почти́мъ Кинтиліа́на, и Да́ду, и Макси́ма, му́ченики Христо́вы, боже́ственныя звѣ́зды, просвѣща́ющія всѣ́хъ сердца́ чуде́сными луча́ми.

Глаго́лы преоби́дѣша безбо́жныхъ и злочести́выхъ и, ра́дующеся, пострада́вше, му́ченицы Христо́вы, и су́щимъ отъ вѣ́ка причто́шася боже́ственнымъ страстоте́рпцемъ, съ ни́миже при́сно почита́ются.

Богоро́диченъ: Яко престо́лъ огнезра́ченъ носи́ла еси́ Христа́, на́мъ примѣ́шшася дебельство́мъ пло́ти. Того́ моли́, Богоро́дице Чи́стая, уще́дрити и спасти́ любо́вію чту́щія Тя́.

Пѣ́снь 9.

Ирмо́съ: Уста́вы прешла́ еси́ естества́, Содѣ́теля заче́нши и Го́спода, и две́рь спасе́нія мíрови была́ еси́: тѣ́мъ Тя́, Богоро́дице, непреста́нно велича́емъ.

Свяще́нныя соста́вимъ вси́ ли́ки, свяще́нно блажа́ще Іа́сона, вели́каго Христо́ва апо́стола, съ ли́ки безпло́тными всегда́ веселя́щася.

Игра́етъ тва́рь, лику́ющи ны́нѣ въ честнѣ́мъ торжествѣ́ твое́мъ, сла́вне, апо́столи, проро́цы и вси́ му́ченицы ра́дуются, Іа́соне: съ ни́миже тя́ вѣ́рою велича́емъ.

Ра́ка, идѣ́же лежи́тъ терпѣли́вое и многострада́льное тѣ́ло твое́, сла́вне Іа́соне, зари́ испуща́етъ всегда́ и тму́ болѣ́зней разоря́етъ, преблаже́нне.

Богоро́диченъ: Явльшися Ма́ти Всенепоро́чная Емману́ила, воплоще́ннаго изъ ложе́снъ Твои́хъ, обожи́вшаго естество́ человѣ́ческое, тѣ́мже Тя́, Пресвята́я Богороди́тельнице, ублажа́емъ.

Инъ.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.

Послѣ́дующе стра́сти Безстра́стнаго, страстоте́рпцы, искуше́ніе подъя́сте вку́пѣ многоплете́нныхъ му́къ и сме́ртію жи́знь наслѣ́довасте, пребыва́юще въ вѣ́къ вѣ́ка; сего́ ра́ди блажи́ми есте́ при́сно.

Красно́ стезю́ муче́нія увѣ́дѣвше и ше́ствовавше до́брѣ въ пути́, веду́щія къ поко́ищемъ у́мнымъ, сла́вніи му́ченицы, прія́сте кончи́ну мече́мъ и со а́нгелы лику́ете при́сно.

Ста́немъ во хра́мѣ Госпо́дни и ублажи́мъ Да́ду, Макси́ма и Кинтиліа́на, до́блія ору́жники и погуби́вшія враги́, и вѣ́рою вопіе́мъ: Человѣколю́бче, тѣ́хъ моли́твами изба́ви всѣ́хъ многоплете́нныя напа́сти.

Свяще́нная ва́ша па́мять, пресла́вніи побѣдоно́сцы, я́коже со́лнце, свѣ́тло озаря́етъ тва́рь, ю́же творя́щія, омраче́нія страсте́й ны́ изба́вите, мо́лимся, свяще́нными хода́тайствы, страстоте́рпцы Спа́са и Бо́га.

Богоро́диченъ: Грѣхолюби́въ сы́й, покая́ніемъ припа́даю щедро́тамъ Твои́мъ, Бо́же, и вѣ́рно взыва́ю: мольба́ми чи́сто ро́ждшія Тя́ на земли́, уще́дри мя́ и му́къ изба́ви вѣ́чныхъ, Преблагíй Христе́.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 133 – 138.

/ Къ оглавленію раздѣла /


Наверхъ / Къ титульной страницѣ

0