Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 28-й де́нь.
Слу́жба и́же во святы́хъ отцу́ на́шему Кири́ллу, епи́скопу Ту́ровскому.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 8:

Отче на́шъ Кири́лле богому́дре,* отъ ю́ности боже́ственному уче́нію прилѣжа́лъ еси́,* и плоды́ досто́йны Христу́ Царю́ прине́слъ еси́,* тѣ́мже преукра́шенъ сла́вы вѣнце́мъ* возше́лъ еси́ въ небе́сныя оби́тели.

Отче на́шъ Кири́лле преподо́бне,* добродѣ́тельнымъ мона́шескимъ житіе́мъ Бо́гу угоди́лъ еси́,* и я́коже дре́внія подви́жницы, на сто́лпъ возше́дъ, затвори́лся еси́,* моля́ся Отцу́ Небе́сному о спасе́ніи мíра.

Отче на́шъ святи́телю Кири́лле,* послуша́нія ра́ди благода́ть епи́скопства воспрія́лъ еси́,* па́ству Ту́ровскую отъ бѣ́дъ и напа́стей до́брѣ сохрани́лъ еси́* и отъ раздо́ровъ Це́рковь Ру́сскую изба́вилъ еси́* свои́ми наставле́ньми и поуче́ньми.

Отче на́шъ Кири́лле богосвѣ́тле,* благоче́стіемъ свои́мъ просія́лъ еси́,* и я́ко со́лнце пра́вды нече́стія и язы́чества тму́ отгна́лъ еси́,* и всю́ страну́ на́шу просвѣти́лъ еси́,* науча́я златы́ми словесы́ свои́ми* сла́вити Тро́ицу Единосу́щную.

Сла́ва, гла́съ то́йже:

Освяще́нный Боже́ственнымъ Ду́хомъ, я́ко чи́стый сосу́дъ духо́внаго мѵ́ра, благоуха́ніе источа́еши всѣ́мъ вѣ́рнымъ, прехва́льне святи́телю на́шъ Кири́лле, земли́ Бѣлору́сскія сла́во и украше́ніе, моли́ о всѣ́хъ, любо́вію чту́щихъ па́мять твою́.

И ны́нѣ, пра́здника.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яви́лся еси́* земли́ Ту́ровскія о́трасль блага́я,* и сосу́дъ освяще́нъ, Кири́лле,* и жили́ще* Пресвята́го Ду́ха.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Ра́дуйся, святи́телей похвало́,* о́тче Кири́лле,* свяще́нниковъ сла́ва,* пра́вило мона́ховъ,* Це́ркве Ру́сскія утвержде́ніе.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Пріими́ пѣ́ніе ны́нѣ* ча́дъ твои́хъ, о́тче,* и лю́бящимъ тя́* подава́й* серде́чная проше́нія.

Сла́ва, гла́съ то́йже:

Небе́снаго Царя́ престо́лу* со а́нгельскими чи́нми предстоя́,* о́тче Кири́лле,* моли́ о чту́щихъ* и прославля́ющихъ тя́.

И ны́нѣ, богоро́диченъ:

Небе́снаго Царя́ Ма́ти,* Небе́снаго Іерусали́ма жи́телей бы́ти сподо́би на́съ* и сла́дости таковы́я получи́ти,* ея́же жела́етъ ви́дѣти о́ко а́нгельское.

Тропа́рь зри́ на вели́цѣй вече́рни.



НА ВЕЛИЦѢЙ ВЕЧЕРНИ,
На Го́споди воззва́хъ: стихи́ры, гла́съ 2:

Кíими похва́льными вѣнцы́* вѣнча́имъ златослове́снаго Кири́лла?* Земли́ на́шея чу́дное прозябе́ніе* и добродѣ́телей мно́гъ пло́дъ благосла́венъ,* чистоту́ житія́ возлю́бльшаго и равноа́нгельно пожи́вшаго,* и́ноковъ наста́вника и благоче́стія ревни́теля,* земна́го а́нгела, небе́снаго человѣ́ка,* его́же ра́ди святы́хъ моли́твъ* враго́въ Це́ркве Христо́съ Бо́гъ низложи́,* имѣ́яй ве́лію ми́лость.

Кíими пѣ́сненными похвала́ми* просла́вимъ богому́драго отца́ на́шего Кири́лла?* Преподо́бнымъ лико́мъ соприча́стника и сто́лпникомъ сожи́теля,* подъ святы́мъ покро́вомъ страстоте́рпцевъ благовѣ́рныхъ князе́й Бори́са и Глѣ́ба* въ мона́шескихъ по́двизѣхъ просія́вшаго* и наставле́ньми свои́ми бра́тію умудри́вшаго,* смире́нію и покая́нію всѣ́хъ учи́вшаго,* его́же стезя́ми ходи́ти и на́съ, Христе́ Бо́же, напра́ви,* по вели́цѣй Твое́й ми́лости.

Кíими проро́ческими пѣ́сньми* похва́лимъ святи́теля пресла́внаго на́шего Кири́лла?* Архіере́емъ бы́ти Про́мысломъ Бо́жіимъ предъизбра́ннаго,* и на ка́ѳедру Ту́ровскую кня́земъ и людьми́ возведе́ннаго,* хра́мъ чу́дный въ сла́ву Святы́я Тро́ицы воздви́гшаго,* хода́тая непреста́ннаго за па́ству свою́ предъ Пречи́стою и небе́сными чи́нми,* и́хже ра́ди моле́ній гра́ду на́шему и все́й странѣ́* Госпо́дь дае́тъ ве́лію ми́лость.

Кíя похвалы́ и да́ры духо́вныя* принесе́мъ златоу́стому учи́телю всея́ Руси́ Кири́ллу?* Онъ же ны́нѣ со а́нгелы и со всѣ́ми святы́ми* за ро́дъ христіа́нскій предъ престо́ломъ Бо́жіимъ мо́лится,* дарова́ти странѣ́ на́шей ми́ръ,* Це́ркви Правосла́внѣй утвержде́ніе и единомы́сліе,* архіере́емъ и́стинное согла́сіе,* власте́мъ благо́е вразумле́ніе,* во́инству благоче́стіе и на враги́ побѣ́ду,* лю́демъ покая́ніе и страсте́й свобожде́ніе,* земли́ благопло́діе* и душа́мъ на́шимъ ве́лія ми́лости.

Сла́ва, гла́съ 8:

Яви́ся дне́сь пресвѣ́тлая па́мять святи́теля на́шего Кири́лла, я́ко со́лнце надъ земле́ю Полѣ́сскою я́рко сія́ющее и благода́ти луча́ми на́съ согрѣва́ющее, къ ре́вности по Бо́зѣ зову́щее всѣ́хъ, съ вѣ́рою и любо́вію прише́дшихъ на сіе́ свѣ́тлое торжество́.

И ны́нѣ, пра́здника.
Вхо́дъ. Проки́менъ дне́. И чте́нія три́ святи́тельская.

[При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.]

На литíи стихи́ры, гла́съ 1:

Неувяда́емымъ вѣнце́мъ вѣнча́лся еси́ отъ руки́ Вседержи́теля Бо́га, святи́телю на́шъ о́тче Кири́лле, сего́ ра́ди и мы́ и́мамы тебе́, вели́каго хода́тая предъ Го́сподемъ, Его́же усе́рдно ны́нѣ моли́ по́двигомъ до́брымъ на́мъ подвиза́тися и вѣ́ру Правосла́вную въ чистотѣ́ соблюсти́.

Святи́телю Кири́лле, уста́ златосія́нная, ты́ пречи́стое Всесвята́го Ду́ха сокро́вище въ земли́ Ру́сстѣй бы́лъ еси́, отню́дуже возвесели́лъ еси́ спаси́тельнымъ твои́мъ сло́вомъ, дерзнове́ніе у́бо обрѣ́тъ къ Бо́гу, въ наслажде́ніи го́рняго наслѣ́дія моли́ся о на́съ, о́тче свяще́ннѣйшій.

Излія́ся благода́ть во устна́хъ твои́хъ, преподо́бне о́тче, и сего́ ра́ди пома́за тя́ Госпо́дь архіере́емъ бы́ти лю́демъ гра́да вели́каго на При́пяти и учи́ти па́ству Ту́ровскую благоче́стію и пра́вдѣ. Тѣ́мже, препоя́санъ ору́жіемъ Си́льнаго, пресѣ́клъ еси́ язы́ческое нече́стіе, и ны́нѣ не преста́й моля́ся умири́ти мíръ и спасти́ ду́ши на́ша.

Сла́ва, гла́съ 6:

Пріиди́те вѣ́рніи въ хра́мы Бо́жіи, та́мъ бо ны́нѣ возно́сится сла́ва въ вы́шнихъ живу́щему па́стырю до́брому и святи́телю Кири́ллу, соверша́ющимъ же па́мять его́ то́й проше́нія во все́мъ исполня́етъ, и отъ напа́стей и бѣ́дъ избавля́етъ, и спаса́етъ свои́ми моли́твами.

И ны́нѣ, пра́здника.

На стихо́внѣ стихи́ры, гла́съ 6. Подо́бенъ: Тридне́венъ.

Святи́телю богому́дре Кири́лле,* разу́мнаго свѣ́та заре́,* церко́вное свѣти́ло, святи́телей похвало́,* красото́ и́ноческаго житія́ и и́стинное по́стниковъ пра́вило,* засту́пниче на́шъ предъ Го́сподемъ,* отъ ко́зней вра́жіихъ на́съ свобожда́й.

Сти́хъ: Уста́ пра́веднаго поуча́тся прему́дрости,* и язы́къ eго́ возглаго́летъ су́дъ.

Святи́телю сла́вне Кири́лле,* наста́вниче добродѣ́телей,* гра́да Ту́рова о́трасле пресла́вная,* прилѣжа́нія въ уче́ніи ю́нымъ о́бразе,* гро́зный ересе́й обличи́телю,* моли́твою твое́ю и на́съ укрѣпля́й.

Сти́хъ: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ.

Святи́телю на́шъ Кири́лле,* со́лнца сія́ніе пра́ведное,* земли́ Бѣлору́сскія храни́телю,* власте́мъ и кни́жникамъ путю́ къ Истинѣ,* мíра златоу́стый учи́телю,* сло́вомъ свои́мъ ко спасе́нію на́съ направля́й.

Сла́ва, гла́съ 2:

Тя́, вели́каго архіере́я и па́стыря, незло́бива и преподо́бна, покая́нія проповѣ́дника, сло́ва Бо́жія ри́тора златоу́стаго, восхваля́юще съ любо́вію мо́лимся: пода́ждь на́мъ немощны́мъ благода́тное укрѣпле́ніе и въ житіи́ духо́вное наставле́ніе.

И ны́нѣ, пра́здника.

По Ны́нѣ отпуща́еши.., тропа́рь свято́му два́жды, и пра́здника еди́ножды.
Тропа́рь, гла́съ 4:

Благоче́стія ревни́телю и рачи́телю, и́ноковъ и сто́лпниковъ похвало́, святи́телю Ту́ровскія па́ствы пресла́вне, златослове́сный учи́телю, свѣ́тлымъ уче́ніемъ богоразу́мія своего́ просвѣти́вый концы́ Ру́сскія, въ моли́твѣ къ Бо́гу благода́тный грѣ́шниковъ споспѣ́шниче, Кири́лле богому́дре, моли́ Христа́ Бо́га утверди́тися на́мъ, сооте́чественникомъ твои́мъ, во Правосла́віи, благоче́стіи и единомы́сліи.


НА УТРЕНИ,
По 1-мъ стихосло́віи сѣда́ленъ, гла́съ 4:

Пріиди́те торжеству́имъ свѣ́тло, пра́зднующе па́мять преподо́бнаго Кири́лла, святи́теля земли́ Ту́ровскія, се́й па́стырь до́брый ны́нѣ зри́тъ добро́ту неизрече́нную оби́телей го́рнихъ, та́мо со апо́столы и му́ченики лику́я и съ пра́ведными собесѣ́дуя, мо́лится прилѣ́жно о чту́щихъ вѣ́рою па́мять его́. [Два́жды.]

Сла́ва, и ны́нѣ, богоро́диченъ, гла́съ 5:

Стѣна́ непобѣди́мая на́мъ христіа́номъ еси́, Богоро́дице Дѣ́во: къ Тебѣ́ бо прибѣга́юще, невреди́мы пребыва́емъ и па́ки согрѣша́юще, и́мамы Тя́ моли́твенницу, тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

По 2-мъ стихосло́віи сѣда́ленъ, гла́съ 5:

Воспои́мъ вси́ златоу́стаго Кири́лла, почти́мъ засту́пника, и утвержде́ніе гра́ду Ту́рову и всея́ Бѣлору́сскія земли́ храни́теля: спаса́й на́съ, блаже́нне о́тче, моли́твами твои́ми. [Два́жды.]

Сла́ва, и ны́нѣ, богоро́диченъ, гла́съ 5:

Богоро́дицу Тя́ и́стинную прославля́емъ, со святы́мъ уго́дникомъ Твои́мъ Кири́лломъ, я́ко предвозвѣсти́ на́мъ отше́ствіе того́ на поко́й, чрезъ явле́ніе Купя́тицкаго о́браза Твоего́, да чу́до сотвори́ши, и мѣ́сто сла́вное его́ упокое́нія откры́еши, моля́ще Сы́на Твоего́ спасти́ся душа́мъ на́шимъ.

Поліеле́й и велича́ніе:

Велича́емъ тя́, Ту́ровскій подви́жниче и святи́телю Кири́лле, златослове́сный Россíйскій учи́телю, и чте́мъ святу́ю па́мять твою́, ты́ бо еси́ усе́рдный предъ Бо́гомъ предста́телю за ро́дъ на́шъ и те́плый моли́твенниче о спасе́ніи ду́шъ на́шихъ.

Псало́мъ избра́нный: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́...

По поліеле́и сѣда́ленъ свята́го, гла́съ 4:

Отъ ю́ности послѣ́довалъ еси́ Христу́, о́тче на́шъ Кири́лле, сто́лпниковъ на земли́ Ру́сстѣй нача́льниче, архіере́евъ удобре́ніе, благоче́стія ре́вностный проповѣ́дниче, ста́до свое́ до́брѣ науча́лъ еси́ моли́тися Го́споду. Его́же и ны́нѣ моли́ спасти́ всѣ́хъ, любо́вію тя́ почита́ющихъ. [Два́жды.]

Сла́ва, и ны́нѣ, богоро́диченъ, гла́съ 4:

Дѣ́во Всенепоро́чная, пресу́щественнаго Бо́га ро́ждшая, Того́ со святи́телемъ на́шимъ Кири́лломъ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

[Степе́нна, 1-й антифо́нъ 4-го гла́са.] Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Ева́нгеліе отъ Іоа́нна, зача́ло 35 отъ полу́.

По 50-мъ псалмѣ́ стихи́ра, гла́съ 6:

Наста́ дне́сь вели́кое торжество́ въ кра́и на́шемъ: прославля́емъ бо златоу́стаго Кири́лла, мно́гими вои́стинну дѣ́лы и словесы́ Бо́гу послужи́, ны́нѣ же во оби́телехъ го́рнихъ Христу́ предстои́тъ и прилѣ́жно мо́лится о всѣ́хъ съ любо́вію чту́щихъ па́мять его́.

Кано́нъ пе́рвый, его́же краегране́сіе: Святи́телей и преподо́бныхъ украше́ніе. Творе́ніе Гео́ргіево. Гла́съ 6.
Пѣ́снь 1.

Ирмо́съ: Сѣче́ное сѣче́тся мо́ре Чермно́е, волнопита́емая же изсуша́ется глубина́, та́яжде ку́пно безору́жнымъ бы́вши проходи́ма, и всеору́жнымъ гро́бъ. Пѣ́снь же богокра́сная воспѣва́шеся: сла́вно просла́вися Христо́съ, Бо́гъ на́шъ.

Тро́иченъ: Смы́сла Пода́телю Тріѵпоста́сный Бо́же, Ты́ да́ждь на́мъ ра́зумъ и сло́во, да, отве́рзше недосто́йная уста́, воспои́мъ святи́теля Кири́лла, Ту́ровскія земли́ па́стыря и учи́теля и всея́ Руси́ свѣти́льника.

Весели́ся ны́нѣ и ра́дуйся, гра́де Ту́рове, ни чи́мже ме́ньшій ты́ еси́ въ зе́мляхъ Бѣлору́сскихъ, но па́че сла́вою и че́стію возвели́ченный изря́дныхъ уго́дниковъ Бо́жіихъ, отъ ни́хже мы́ святи́теля Кири́лла дне́сь благоговѣ́йно прославля́емъ.

Якоже уме́ты вмѣни́лъ еси́ бога́тство тлѣ́нное и сла́ву скороги́бнущую, избра́нниче Бо́жій Кири́лле, отъ ю́ности яви́вый ума́ твоего́ боже́ственная устремле́нія, я́же ко спасе́нію, во объя́тія Отча пу́ть указу́ющая.

Богоро́диченъ: Ти́хое Приста́нище къ Тебѣ́ прибѣга́ющихъ, Преблагослове́нная Влады́чице, моли́ изъ Тебе́ воплоще́ннаго Христа́ Бо́га на́шего, во е́же бѣжа́ти на́мъ суеты́ мíра сего́, и во вся́комъ мѣ́стѣ и зва́ніи небе́снаго Ца́рствія удосто́итися.

Инъ кано́нъ, его́же краегране́сіе, кромѣ́ богоро́дичновъ: Ту́ровскаго Златоу́стаго пою́. Гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Ту́ровскаго святи́теля Кири́лла, земли́ на́шея вели́каго свѣти́льника, сподо́би, Го́споди, воспѣ́ти ми́ недосто́йному.

Устнѣ́ имы́й нечи́стая, дерза́ю восхвали́ти архипа́стыря, яви́вшаго ча́домъ церко́внымъ пра́вило вѣ́ры и о́бразъ смире́нія.

Рѣка́ уче́ній боже́ственныхъ яви́лся еси́, святи́телю Кири́лле, и напая́еши при́сно мое́ изсо́хшее се́рдце.

Богоро́диченъ: Голуби́це Пренепоро́чная, Ма́ти Христа́ Бо́га, приведи́ мя́ жа́ждущаго ко исто́чнику жи́зни вѣ́чныя.

Пѣ́снь 3.

Ирмо́съ: Госпо́дь, Сы́й, всѣ́хъ и Зижди́тель Бо́гъ, созда́нное, Безстра́стный, обнища́въ, Себѣ́ соедини́, и Па́сха, за я́же хотя́ше умре́ти, Са́мъ Сы́й, Себе́ предпожре́: яди́те, — вопія́, — Тѣ́ло Мое́ и вѣ́рою утверди́теся.

Измла́да прилѣжа́лъ еси́, о́тче, уче́нію кни́жному, и Боже́ственнымъ Писа́ніемъ свы́ше укрѣпля́емь и просвѣще́нъ, прише́лъ еси́ во оби́тель и́ноческую порабо́тати Го́сподеви.

Тѣ́ло твое́ посто́мъ и бдѣ́ніемъ сотвори́лъ еси́ прія́телище Ду́ха Свята́го, о́тче свяще́ннѣйшій, Кири́лле богому́дре, и́нокомъ яви́лся еси́ о́бразъ и пра́вило, па́че всѣ́хъ тружда́яся.

Еже не и́мать послуша́нія ко игу́мену и все́й во Христѣ́ бра́тіи, я́коже обѣща́ся при постриже́ніи, таковы́й мона́хъ спасе́нъ бы́ти не мо́жетъ, — взыва́лъ еси́ непреста́нно, преподо́бнѣйшій, да не уло́вишися въ бѣсо́вскія сѣ́ти.

Богоро́диченъ: Лю́діе непокори́віи и суему́дренніи, почто́ въ похоте́ніихъ свои́хъ коснѣ́ете? Поревну́йте послуша́нію Богоотрокови́цы, Яже Гавріи́лу рече́: Се́ раба́ Госпо́дня. И та́ко мы́сляще и дѣ́юще смире́нію нелицемѣ́рному навыко́сте.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Оста́вивъ мíра сего́ тлѣ́нная, и́го Христо́во на ра́мо возложи́въ, поне́слъ еси́ труды́ сугу́быя, на столпѣ́ въ затво́рѣ тѣ́снѣмъ.

Воздержа́ніемъ и́стиннымъ и моли́твою непреста́нною возше́лъ еси́ на ве́рхъ добродѣ́телей, подо́бно дре́внимъ вели́кимъ подви́жникомъ.

Сто́лпника но́ваго тя́ вѣ́мы, о́тче на́шъ Кири́лле, и лѣ́ствичника преди́внаго, наста́вника благоче́стія.

Богоро́диченъ: Еди́ну Благослове́нную, Пречи́стую Влады́чицу, воспѣва́емъ вси́ вѣ́рніи, я́ко одушевле́нное не́бо и престо́лъ херуви́мскій.

Конда́къ, гла́съ 3. Подо́бенъ: Въ Мѵ́рехъ, свя́те.

Въ Ту́ровѣ, свя́те, священнодѣ́йствитель показа́лся еси́, Христо́во бо, о́тче Кири́лле, Ева́нгеліе испо́лнивъ, положи́лъ еси́ ду́шу твою́ о лю́дехъ твои́хъ и соблю́лъ еси́ еди́нство Це́ркве Ру́сскія. Сего́ ра́ди освяти́лся еси́, я́ко вели́кій таи́нникъ Бо́жія благода́ти.

Икосъ:

Воспои́мъ ны́нѣ святи́теля Кири́лла пѣ́сньми, Ту́ровскимъ лю́демъ па́стыря и учи́теля, и всея́ Ру́сскія земли́ Златоу́ста, да предста́тельствомъ его́ просвѣти́мся, и боже́ственныхъ слове́съ его́ поуче́ніемъ отста́немъ вся́кія ле́сти и суеты́, порабо́таимъ нелѣ́ностно Го́сподеви и яви́мся чи́сти душа́ми и тѣлесы́, я́коже и се́й уго́дникъ Христо́въ и вели́кій таи́нникъ Бо́жія благода́ти.

Сѣда́ленъ, гла́съ 4:

Отъ ю́ности взе́мъ кре́стъ тво́й, благочести́во Христу́ послѣ́довалъ еси́, увяди́въ плотско́е мудрова́ніе воздержа́ніемъ. Тѣ́мже на святи́тельскомъ сѣда́лищи сѣ́дъ, возвели́чилъ еси́ Влады́ку и Того́ Пречи́стую Ма́терь, о́тче Кири́лле богоблаже́нне.

Инъ сѣда́ленъ, гла́съ 8. Подо́бенъ: Прему́дрости.

Юже съ высоты́ му́дрость увѣ́дѣвъ и благода́ть слове́съ отъ Бо́га, просія́лъ еси́ на Руси́ я́ко вторы́й Златоу́стъ, сло́во Бо́жіе нелѣ́ностно проповѣ́далъ еси́, вся́кое беззако́ніе и ле́сть попра́въ словесы́ твои́ми. Тѣ́мже по Бо́зѣ ре́вностію кня́зя обличи́въ, и Ѳедо́рца [1] посрами́лъ еси́ ерети́ческое мудрова́ніе. Святи́телю Кири́лле, моли́ Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва, и ны́нѣ, богоро́диченъ:

Отъ Тро́ицы Еди́наго неизрече́нно заче́нши, Дѣ́во, и чу́дно Сего́ родила́ еси́ па́че сло́ва и мы́сли, и о́бщно Боже́ственнаго естества́ устро́ила еси́ человѣ́ческое естество́, дре́влѣ изгна́нное. Тѣ́мже, соше́дшеся, Рождество́мъ Твои́мъ вси́ спа́сшіися, Всенепоро́чная, Твои́мъ словесе́мъ послѣ́дующе, достодо́лжно Тя́ ублажа́емъ, моля́ще Христа́ Бо́га прегрѣше́ній оставле́ніе дарова́ти вѣ́рою Тя́ сла́вящимъ, Ма́терь Его́.

Пѣ́снь 4.

Ирмо́съ: Прови́дѣвъ проро́къ та́йну Твою́ неизрече́нную, Христе́, провозгласи́: положи́лъ еси́ тве́рдую любо́вь крѣ́пости, Отче Ще́дрый, Единоро́днаго бо Сы́на, Благíй, очище́ніе въ мíръ посла́лъ еси́.

Ева́нгельскихъ слове́съ уче́ніемъ послѣ́дуя, о́тче Кири́лле, избра́лъ еси́ тѣ́сный пу́ть и та́ко возше́лъ еси́ на ве́рхъ добродѣ́телей, на столпѣ́ еди́нъ затвори́вся, подвиза́яся въ постѣ́ и богомы́сліи.

Избѣ́гъ суесло́вія и пра́здности, Боже́ственными Писа́ніи у́мъ сво́й просвѣти́лъ еси́, и во свяще́ннѣмъ безмо́лвіи очи́стилъ еси́ отъ страсте́й ду́шу, я́же всего́ мíра вя́щше.

Изволе́ніемъ Ду́ха Свята́го избра́ша вси́ лю́діе тя́, о́тче Кири́лле, во архипа́стыря Ту́ровскаго, ты́ же, неотсту́пному моле́нію и́хъ повину́яся, за послуша́ніе са́нъ воспрія́лъ еси́, не ра́ди себе́, но ра́ди сла́вы Бо́жія.

Богоро́диченъ: Престо́ле о́гненный, ра́дуйся, Невѣ́сто неневѣ́стная, Ма́ти Пречи́стая, Пала́то преукраше́нная, Киво́те святы́й, Бо́га Невмѣсти́маго Вмѣсти́лище.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Кири́лла богому́драго, Боже́ственныхъ Писа́ній рачи́теля, ко святи́тельскому служе́нію Вели́кій Архіере́й Христо́съ призва́лъ е́сть.

Аще и жела́лъ еси́ уклони́тися отъ сла́вы земны́я, но оба́че не возмо́глъ еси́ презрѣ́ти избра́нія Бо́жія.

Гла́съ тво́й, о́тче Кири́лле, и до ны́нѣ слы́шенъ е́сть: не пренебрега́йте, христіа́не, соверше́ніемъ Боже́ственныя Евхари́стіи.

Богоро́диченъ: Освяще́нная Трапе́зо, на Не́йже Хлѣ́бъ сла́дкій испече́ся, Богоро́дице Марíе, помога́й пою́щимъ Тя́.

Пѣ́снь 5.

Ирмо́съ: Сою́зомъ любве́ связу́еми, апо́столи, влады́чествующему всѣ́ми себе́ Христу́ возло́жше, кра́сны но́ги очища́ху, благовѣству́юще всѣ́мъ ми́ръ.

Раче́ніе о па́ствѣ своея́ имѣ́я, ко спасе́нію вы́ну всѣ́хъ наставля́лъ еси́, сло́вомъ и житіе́мъ бы́ти христіа́нскаго зва́нія досто́йны.

Едине́ніе ду́ха въ сою́зѣ ми́ра соблюда́лъ еси́, по апо́столу, богому́дре, и ра́спри тлѣтво́рныя и лука́вая раздѣле́нія пресѣка́лъ еси́.

Про́клятъ вся́къ, и́же мы́слитъ зла́я, раздѣли́ти ма́терь на́шу Це́рковь Ру́сскую, таковы́й е́сть богоотсту́пникъ, — дерзнове́нно провозгласи́лъ еси́, святи́телю Кири́лле.

Богоро́диченъ: Отсѣка́ютъ са́ми себе́ отъ Це́ркве Бо́жія, не чту́щія правосла́вно Пречи́стую Богоро́дицу, мы́ же вѣ́рніи немо́лчно Ю велича́емъ, Засту́пницу на́шу усе́рдную.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Оглаша́юся твои́ми словесы́ благода́тными, Ту́ровскій святи́телю, я́же Це́рковь Ру́сская, а́ки би́серъ многоцѣ́нный сохраня́етъ.

Златослове́сный учи́телю, па́че всѣ́хъ возсія́вый на Руси́, о́тче на́шъ Кири́лле, предста́тельствуй за па́ству твою́ предъ Го́сподемъ.

Люде́й правосла́вныхъ хода́тай, апо́столомъ подо́бникъ во благовѣ́стіихъ и бдѣ́ніихъ, вои́стинну, о́тче, яви́лся еси́.

Богоро́диченъ: Роди́вся отъ Дѣ́вы, мíръ просвѣти́лъ еси́, Христе́ Бо́же, и мене́ отъ прегрѣше́ній мои́хъ изба́ви, я́ко Человѣколю́бецъ, и упра́ви живо́тъ мо́й, молю́ Тя.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и, волне́нія не ктому́ терпя́, я́ко Іо́на Влады́цѣ, вопію́ Ти: отъ тли́ мя возведи́.

До́браго Па́стыря Христа́ стопа́мъ послѣ́дуя, взыска́ти овча́ поги́бшее прише́дшаго, святи́телю Кири́лле, потща́лся еси́, да никто́же въ па́ствѣ твое́й отъ зловѣ́рія поги́бнетъ.

Орга́нъ Утѣ́шителя Ду́ха и́стины бы́въ, наста́вилъ еси́, о́тче, твои́ми писа́ніи сыно́въ земли́ Ру́сскія пресѣка́ти ко́зни лука́внующихъ.

Боголю́бскому кня́зю Андре́ю мно́гая посла́нія душеполе́зная написа́въ, яви́лся еси́, богодухнове́нный Кири́лле, среди́ бу́рь жите́йскихъ путево́ждь ко спасе́нію.

Богоро́диченъ: На небеса́ возвела́ еси́ естество́ человѣ́ческое, въ ти́нѣ страсте́й иногда́ лежа́вшее, Преблагослове́нная Ма́ти и Дѣ́во, Христа́ Бо́га ро́ждшая.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Аще и не и́мамы, грѣ́шніи, еле́я до́брыхъ дѣ́лъ, но моли́твами святи́теля Кири́лла, Свѣтода́вче, на́съ просвѣти́.

Тмѣ суевѣ́рія, отше́дшей иногда́ отъ па́ствы твоея́, не да́ждь ны́нѣ поглоти́ти на́съ, о́тче Кири́лле.

Ору́жіемъ вооружи́вся сло́ва Бо́жія, отгна́лъ еси́ мглу́ бѣсо́вскую и посѣ́клъ еси́ нечести́вое ерети́ческое те́рніе.

Богоро́диченъ: Госпоже́ Пречи́стая, не оста́ви мя́ во мра́цѣ ги́блема, но умоли́ Сы́на Своего́ поми́ловати мя́ окая́ннаго.

Конда́къ, гла́съ 5:

Бо́дрствуя въ моли́твахъ, послуша́нія и благоче́стія до́брый рачи́тель бы́въ, терпѣ́нію и смире́нію науча́лъ еси́ па́ству свою́, добродѣ́тельми преподо́бія и пра́вды ста́до Христо́во озаря́я, и медото́чными словесы́ всю́ зе́млю Ру́сскую пита́я, на пра́вый пу́ть за́повѣдей Госпо́днихъ си́лою ду́ха твоего́ наставля́лъ еси́ всѣ́хъ, и ны́нѣ просвѣти́, я́ко со́лнце, лю́ди омраче́нныя грѣхми́ и къ покая́нію на́съ приведи́.

Икосъ:

Пріиди́те дне́сь, лю́діе, похва́лимъ своего́ святи́теля, глаго́люще ему́: ра́дуйся, Кири́лле, святи́телю честны́й и учи́телю на́шъ, другíй Златоу́сте, на Руси́ па́че всѣ́хъ возсія́, святы́мъ и пресвѣ́тлымъ уче́ніемъ твои́мъ концы́ Ру́сскія просвѣти́въ; ра́дуйся, я́ко со́лнце, омраче́нныя и те́мныя богоразу́міемъ просвѣща́еши и умудря́еши! Мо́лимъ ти ся, святи́телю, ма́лое сіе́ моле́ніе принося́ще: моли́ о на́съ Вседержи́теля, Ему́же ны́нѣ предстои́ши со дерзнове́ніемъ, отъ належа́щихъ бѣ́дъ, скорбе́й, болѣ́зней и томле́нія вра́жія изба́витися, и отъ наше́ствія безбо́жнаго ага́рянскаго и междоусо́бныя бра́ни сохрани́тися на́мъ и во Правосла́віи всѣ́мъ утверди́тися. Да улучи́мъ по ми́лости Бо́жіей моли́твами твои́ми грѣхо́въ отпуще́ніе и присносу́щныхъ бла́гъ наслажде́ніе, съ вѣ́рою и любо́вію, со умиле́ніемъ при́сно тебѣ́ пою́щія: ра́дуйся, златослове́сный и кро́ткій Россíйскій учи́телю богому́дре Кири́лле, покая́нія, чистоты́ и благоче́стія усе́рдный ревни́телю и моли́твенниче о спасе́ніи ду́шъ на́шихъ.

Пѣ́снь 7.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Испо́лнивъ служе́ніе свое́, преше́лъ еси́ въ жи́знь безконе́чную, подвиза́я всѣ́хъ съ тобо́ю взыва́ти: благослове́нъ еси́, Го́споди, Бо́же оте́цъ на́шихъ.

Христолю́бцы, лику́йте, соверша́юще па́мять святи́теля Кири́лла, и въ весе́ліи подвиза́йте всѣ́хъ пѣ́ти: благослове́нъ еси́, Го́споди, Бо́же оте́цъ на́шихъ.

Оте́ческаго благоче́стія ревни́теліе, держа́щіи свята́го Кири́лла моли́твы и кано́ны, воспо́йте съ на́ми вку́пѣ: благослове́нъ еси́, Го́споди, Бо́же оте́цъ на́шихъ.

Богоро́диченъ: Упова́ющіи на Тя́, Богоро́дице, николи́же посра́млены су́ть, но подъ кро́вомъ Твои́мъ сохраня́еми, благословля́ютъ Твое́ предъ Бо́гомъ предста́тельство.

Инъ.

Ирмо́съ: Въ нача́лѣ зе́млю основа́вый, и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Увѣ́дѣвъ непотре́бное умышле́ніе раздѣли́ти Це́рковь Ру́сскую, со дерзнове́ніемъ, о́тче, обличи́лъ еси́ слѣпца́ и хромца́.

Сла́внымъ и кра́снымъ мíра сего́ не угожда́лъ еси́, святи́телю Кири́лле, но Еди́ному Го́споду со благоговѣ́ніемъ порабо́талъ еси́.

Тро́ицы Пресвяты́я служи́теліе, Единосу́щныя и Нераздѣ́льныя, николи́же посра́мятся, ни въ се́мъ вѣ́цѣ, ни въ бу́дущемъ.

Богоро́диченъ: Іера́рховъ похвало́, іере́евъ украше́ніе, люде́й Бо́жіихъ покро́ве ши́ршій о́блака — Ты́ еси́, Ма́ти Дѣ́во.

Пѣ́снь 8.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное и, совоку́плени, и́мже не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Кири́лле святи́телю, рѣши́ти же и вяза́ти отъ Бо́га имѣ́я вла́сть, вся́ разрѣши́ грѣхопаде́нія твою́ па́мять соверша́ющихъ, покая́ніе те́плое принося́щихъ, къ Ча́шѣ Безсме́ртія приступа́ющихъ, вопію́ще во умиле́ніи: Го́спода по́йте, дѣла́, и превозноси́те во вся́ вѣ́ки.

Ра́дуйся, святѣ́йшая Митропо́ліе, Це́рковь Бѣлору́сская, я́ко труба́ возглаша́й въ де́нь па́мяти святи́теля Кири́лла, и́бо Госпо́дь благослови́ и умно́жи тя́, архіере́и, свяще́нницы, и́ноцы и вся́ ча́да твоя́ ны́нѣ велегла́сно взыва́ютъ: Го́спода по́йте, дѣла́, и превозноси́те во вся́ вѣ́ки.

Ангелы и человѣ́цы вку́пѣ дне́сь лику́ютъ, прославля́юще святи́теля Кири́лла, па́ства Ту́ровская пра́зднуетъ благоговѣ́йно, я́ко христіа́номъ подоба́етъ, и хвалу́ Бо́гови воздае́тъ: Го́спода по́йте, дѣла́, и превозноси́те во вся́ вѣ́ки.

Богоро́диченъ: Шата́ніемъ язы́ческимъ и суему́дріемъ плотски́мъ ослѣпле́нъ, у́мъ гордели́вый не мо́жетъ пости́гнути та́инство рождества́ Твоего́, Приснодѣ́во, но чи́стъ и смире́нъ се́рдцемъ, Тя́ вѣ́дая и́стинную Богоро́дицу, взыва́етъ: Го́спода по́йте, дѣла́, и превозноси́те во вся́ вѣ́ки.

Инъ.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы, Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Апо́столомъ подо́бяся, благовѣ́стниче преди́вный, изъясни́лъ еси́ вѣ́рнымъ во вся́комъ дѣ́лѣ и сло́вѣ Боже́ственная Писа́нія.

Глаго́лы богодухнове́нныя, путеводя́щія въ небе́сное Ца́рствіе, проповѣ́далъ еси́ пра́отцемъ на́шимъ, первоучи́телю Кири́ллу подража́я.

Освяще́нный богоно́сче, мѵ́ромъ пома́занный святи́телю Бо́жій, Тро́ицу во Еди́номъ Существѣ́ пое́ши и превозно́сиши во вся́ вѣ́ки.

Богоро́диченъ: Обра́дованная, ра́дуйся, съ Тобо́ю Госпо́дь, со арха́нгеломъ Гавріи́ломъ и мы́ воспѣва́емъ дерзнове́нно.

Пѣ́снь 9.

Ирмо́съ: Вѣ́чное обрѣ́тше избавле́ніе, отъ пра́отца Ада́ма свы́ше рожде́нное, ро́ду стра́шнаго изрече́нія, рождество́ со безпло́тными непостижи́мое славосло́вимъ, Богоро́дицу Тя́ пѣ́сньми велича́юще.

Ежелѣ́тняя па́мять твоя́, сла́вне, духо́вная весна́ всѣ́мъ вѣ́рнымъ яви́ся, зима́ грѣхо́вная упраздни́ся, и лику́етъ дне́сь па́ства Ту́ровская, я́коже цвѣта́ми, пѣ́сньми Це́рковь Христо́ву украша́ющи.

Ны́нѣ съ на́ми веселя́тся святíи му́ченицы Бори́съ и Глѣ́бъ, и Лавре́нтій и Марти́нъ затво́рницы, и кня́зи Андре́й и Бори́съ, и свяще́ннѣйшіи страда́льцы Мака́рій, Іоа́ннъ и инíи мно́зіи, вку́пѣ со святи́телемъ Кири́лломъ, Ту́ровскія земли́ свѣти́льницы.

Іорда́нскимъ струя́мъ подо́бящися, взыгра́й, рѣко́ При́пяте, ко свяще́нному Днѣпру́ и гора́мъ Кíевскимъ во́ды своя́ несу́щи и возвраща́ющи вспя́ть кресты́ ка́менныя, я́же и до ны́нѣ зе́млю Ту́ровскую освяща́ютъ.

Богоро́диченъ: Ея́же ра́ди просла́вися земля́ на́ша да́же и до Кíева, Пречу́дная Ма́ти Бо́жія, на крестѣ́ Купя́тицкій о́бразъ Сво́й яви́вшая и на́съ грѣ́шныхъ ми́лостивно утѣша́ющая, при́сно хвале́бными гла́сы Тя́ велича́емъ.

Инъ.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Покая́нія наста́вниче, моли́твенниче преизя́щный, помоли́ся Христу́ Бо́гу о почита́ющихъ па́мять твою́.

Отче Кири́лле, Ту́ровскій Златоу́сте, восхваля́емъ тя́ немо́лчно, пѣ́сньми свяще́нными велича́юще.

Юноши и ста́рцы, вся́къ во́зрастъ и сосло́віе, поуча́ются твои́ми, святи́телю, наказа́ньми и исправле́ньми.

Богоро́диченъ: Сло́ва па́че сло́ва ро́ждшая, Пречи́стая, моли́ся прилѣ́жно ко Влады́цѣ, въ небе́снѣмъ Отече́ствѣ со святи́телемъ Кири́лломъ и на́мъ водвори́тися.

Свѣти́ленъ:

Свѣ́тлымъ уче́ніемъ богоразу́мія своего́ просвѣти́, блаже́нне о́тче, всѣ́хъ соверша́ющихъ па́мять твою́.

Сла́ва. Подо́бенъ: Жены́, услы́шите.

Ра́дуйся, гра́де Ту́рове на́шъ древнѣ́йшій, сла́внаго твоего́ іера́рха Кири́лла святы́я мо́щи храня́щій, я́ко то́й тя́ по всѣ́мъ конце́мъ ру́сскимъ просла́ви, и я́ко втора́го Златоу́ста его́ дне́сь воспѣва́й пѣ́сньми.

И ны́нѣ, пра́здника.

На хвали́техъ стихи́ры, гла́съ 5:

Ра́дуйся, о́трасле благоче́стія роди́телей всечестна́я,* ты́ измла́да прему́дрость Бо́жію возлюби́лъ еси́,* заба́въ мірски́хъ и бога́тства тлѣ́ннаго отве́ргся,* оби́телію Ду́ха Свята́го содѣ́лался еси́* и хра́мъ благода́ти труды́ свои́ми освяти́лъ еси́,* смире́ніемъ и чистото́ю житія́ люде́й гра́да своего́ удивля́я,* всѣ́мъ се́рдцемъ люби́ти Бо́га и на́съ научи́.

Ра́дуйся, дре́вняго Ту́рова свяще́нная главо́,* святи́телю о́тче на́шъ Кири́лле,* по сло́ву Писа́нія тѣ́снымъ путе́мъ Христу́ послѣ́довавъ,* побо́рникъ страсте́й яви́лся еси́* и кра́сными добродѣ́телей свои́хъ исправле́ньми* и́ноковъ и па́ству свою́ въ послуша́ніи наставля́я,* моли́ дарова́ти ми́ръ и единомы́сліе ста́ду твоему́.

Ра́дуйся, богому́дре учи́телю Це́ркве Ру́сскія,* ты́ сія́ніемъ Со́лнца пра́вды просвѣти́вся,* ору́жіемъ сло́ва твоего́ моли́твеннаго тму́ язы́ческую и ко́зни вра́жія разгна́лъ еси́,* богопроповѣ́дуя отъ волко́въ хи́щныхъ ста́до твое́ упа́слъ еси́* и вертогра́дъ плодоно́сный изъ ча́дъ духо́вныхъ воздѣ́лалъ еси́* князе́й отъ междоусо́бія къ любви́ и едине́нію призыва́я,* въ вѣ́рѣ Правосла́внѣй па́ству твою́ утверди́.

Ра́дуйся, богоблаже́нне о́тче Кири́лле,* покая́нія и благоче́стія ревни́телю,* адама́нте чу́дный и би́сере честны́й,* тѣ́ло твое́ свято́е до вре́мене сокры́то за грѣхи́ на́ша.* Навѣ́товъ злы́хъ и напа́стей отгоня́я* и проше́нія вѣ́рныхъ исполня́я,* яви́ ми́лость соверша́ющимъ па́мять твою́.

Сла́ва, гла́съ 8:

Освяще́нный Боже́ственнымъ Ду́хомъ, я́ко чи́стый сосу́дъ духо́внаго мѵ́ра, благоуха́ніе источа́еши всѣ́мъ вѣ́рнымъ, прехва́льне святи́телю на́шъ Кири́лле, земли́ Бѣлору́сскія сла́во и украше́ніе, моли́ о всѣ́хъ, любо́вію чту́щихъ па́мять твою́.

И ны́нѣ, пра́здника.



НА ЛИТУРГІИ,

Блаже́нна отъ кано́на пе́рваго на 8, пѣ́снь 3-я и 6-я. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Хвали́те Го́спода, я́ко бла́гъ Госпо́дь, [по́йте и́мени Его́, я́ко добро́]. Апо́столъ ко Евре́емъ, зача́ло 310. Аллилу́ія, гла́съ 4: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Ева́нгеліе отъ Матѳе́я, зача́ло 11. [Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Примѣчаніе:
[1] «Ѳедо́рца же, за укори́зну та́ко нарица́ема, сего́ блаже́нный Кири́ллъ отъ Боже́ственныхъ Писа́ній е́ресь обличи́, и прокля́ его...» («Прологъ: Мартъ-Май. М., 1696, л. 265.»)

Источникъ: Служба съ приложеніемъ акаѳиста святителю Кириллу, епископу Туровскому. — Минскъ: Бѣлорусскій Экзархатъ, 2005. — 39 с.

/ Къ оглавленію раздѣла /


Наверхъ / Къ титульной страницѣ

0