Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 27-й де́нь.
Свята́го священному́ченика Симео́на, сро́дника Госпо́дня.

[ВЕЧЕРЪ,]
На Го́споди воззва́хъ: стихи́ры пра́здника 3, и апо́стола 3, гла́съ 4. Подо́бенъ: Яко до́бля.

По болѣ́знехъ тѣле́сныхъ,* святи́телю пресла́вне,* по вся́цѣй му́цѣ многоболѣ́зненнѣй,* по премно́гихъ боре́ніихъ* Кресту́ прибли́жился еси́,* подо́бяся Христу́, распе́ншемуся во́лею.* Тѣ́мже, ра́дующеся, святу́ю твою́ па́мять соверша́юще, Симео́не,* моли́твами твои́ми* разрѣше́ніе согрѣше́ній пріе́млемъ.

Въ Це́рковь небе́сную* свяще́нно вше́лъ еси́,* свяще́нно облива́емь, блаже́нне, кро́вію,* и Тро́ицѣ предстои́ши,* бога́тно сія́я отту́ду* блиста́ніи истека́ющими, пребога́те.* Тѣ́мже дне́сь, Симео́не,* твою́ па́мять свѣтоно́сную соверша́юще,* чу́вствія души́ просвѣща́емъ.

Сла́ва, и ны́нѣ, пра́здника, или́ богоро́диченъ:

Ту́чами Ду́ха Пресвята́го,* мою́ мы́сль ороси́,* Яже ка́плю ро́ждшая, Христа́, неизче́тно* безмѣ́рная беззако́нія человѣ́ковъ* щедро́тами измы́вшую;* изсуши́ исто́чникъ страсте́й мои́хъ* и пото́ка мя́ сподо́би* пи́щи живы́я при́сно* моли́твами Твои́ми.

Крестобогоро́диченъ:

На Крестѣ́ Тя́ я́ко узрѣ́* пригвожде́на, Го́споди,* Агница и Ма́ти Твоя́ дивля́шеся,* и, что́ видѣ́ніе сіе́, — взыва́ше, —* Сы́не вожделѣ́нне?* Сія́ Ти́ невѣ́рный собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся.* Но сла́ва неизглаго́ланному* соше́ствію Твоему́, Влады́ко.

Тропа́рь, гла́съ 1:

Христо́ва тя́ сро́дника, Симео́не священнонача́льниче, и му́ченика тве́рда свяще́нно восхваля́емъ, пре́лесть потреби́вшаго и вѣ́ру соблю́дшаго. Тѣ́мже, дне́сь всесвяту́ю твою́ па́мять пра́зднующе, грѣхо́въ разрѣше́ніе моли́твами твои́ми пріе́млемъ.


[НА УТРЕНИ,]
Кано́нъ пра́здника со ирмосо́мъ на 6 и свята́го на 6. Творе́ніе Іо́сифово. Гла́съ 4.

Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Симео́не свяще́нне, Влады́цѣ, вѣнцено́сецъ, предстоя́, любо́вію па́мять твою́ творя́щимъ всесвяще́нную согрѣше́ній разрѣше́ніе проси́.

Вѣ́триломъ окриля́емь, святи́телю, кре́стнымъ, я́ко вои́стинну хла́домъ ду́ха, бу́ри ми́мо те́клъ еси́ пре́лести, всесла́вне.

Мѵ́ромъ боже́ственнымъ пома́за свяще́нника тя́ лю́демъ Иже отъ колѣ́на Іу́дова прозябы́й Христо́съ, Симео́не свяще́нне и а́нгеломъ собесѣ́дниче.

Богоро́диченъ: Яко су́щи тва́рей вы́шша, всѣ́хъ Творца́ и Бо́га во чре́вѣ зачала́ еси́, Дѣ́во, и родила́ еси́ человѣ́комъ на избавле́ніе.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Манове́ніемъ къ Бо́гу обожа́емь, ве́сь, Симео́не, свѣтови́денъ бы́лъ еси́, муче́нія облиста́я сія́ніемъ, свяще́нне.

Утро су́щимъ во тмѣ́ возсія́лъ еси́, Пра́вды показу́я Со́лнце, изъ о́блака, Дѣ́вы Отрокови́цы, человѣ́комъ возсія́вшее.

Мірскíя сла́сти возненави́дѣлъ еси́, святи́телей красота́ лѣ́потна бы́лъ еси́ и страда́ніемъ небе́сныя сла́вы, о́тче, сподо́бился еси́.

Богоро́диченъ: Ве́сь похвале́ній побѣжда́ется зако́нъ о Тебѣ́, Богороди́тельнице Всенепоро́чная: Бо́гъ бо изъ Тебе́, я́коже вѣ́сть, на́съ ра́ди Человѣ́къ бы́сть.

Сѣда́ленъ, гла́съ 4. Подо́бенъ: Яви́лся еси́ дне́сь.

Яко звѣзду́ вели́ку, Це́рковь, стяжа́вши дне́сь богогла́снаго Симео́на, просвѣща́ется, зову́щи: ра́дуйся, му́чениковъ честны́й нача́льниче. [Два́жды.]

Сла́ва, и ны́нѣ, пра́здника, или́ богоро́диченъ:

Пречи́стѣи ру́цѣ Твои́, Дѣ́во Ма́ти, просте́рши, покры́й упова́ющія на Тя́ и Сы́ну Твоему́ зову́щія: всѣ́мъ пода́ждь, Христе́, ми́лости Твоя́.

Крестобогоро́диченъ:

На дре́вѣ ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мнѣ́, ка́ко заше́лъ еси́, Свѣ́те Мо́й Безлѣ́тный?

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Священнодѣ́йствовавъ же́ртвы безкро́вныя за тя́ Пожре́нному, и са́мъ поже́рлся еси́, я́ко а́гнецъ, и Тому́ прине́слся еси́, богому́дре пребога́те.

Сотро́шася предъ лице́мъ твои́мъ, святи́телю, нече́стія го́ры, и хо́лми де́моновъ вси́ раста́яшася, Христу́ укрѣпля́ющу тя́.

Высоча́йшее житіе́ имы́й, преблаже́нне, хотя́й, возне́слся еси́ на дре́во, Боже́ственнѣй стра́сти подо́бяся мíръ возне́сшаго.

Богоро́диченъ: Прови́дя рождество́ Твое́, Пречи́стая, Тя́ Авваку́мъ пропису́етъ, я́ко присѣ́нную го́ру, изъ нея́же еди́нъ Бо́гъ на́шъ проше́лъ е́сть.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Во́лею, блаже́нне, пре́далъ еси́ себе́ ве́сь сожещи́ся огне́мъ муче́нія, блаже́нне Симео́не, во благово́ніе та́йно соблюда́емь.

Яко овча́ непоро́чное, пре́далъ еси́ себе́ пострада́ти усе́рдно, подо́бяся Христу́, на́съ ра́ди пло́тію пострада́вшему и стра́сти отгна́вшему.

Хра́мъ Боже́ственнаго Ду́ха бы́въ, прему́дре, хра́мы и́дольскія низложи́лъ еси́ си́лою твои́хъ моли́твъ и заблужде́нныя къ свѣ́ту наста́вилъ еси́.

Богоро́диченъ: О на́съ моли́ Христа́, отъ Твои́хъ чи́стыхъ крове́й, Пречи́стая Отрокови́це, въ пло́ть веще́ственную обле́кшася и человѣ́ки обно́вльша.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Научи́лся еси́ пресла́вно отъ боже́ственнаго сія́нія, я́же къ боже́ственному тя́ наставля́юща животу́, пребога́те, и неизрече́ннаго яви́лся еси́, святи́телю, испо́лненъ ра́зума.

Во́дъ тя́ живото́чныхъ испо́лнена духо́вныхъ, я́коже и́ну рѣку́, изъ Еде́ма исходя́щую, Симео́не, боже́ственная Це́рковь ра́дуется, иму́щи.

Сѣ́лъ еси́ на высо́цѣ престо́лѣ, намѣ́стникъ бы́въ Іа́кова и нра́вомъ прича́стникъ, святи́тельство же муче́ніемъ просвѣти́въ, блаже́нне.

Богоро́диченъ: Исцѣли́ неисцѣ́льныя стра́сти, Богоневѣ́сто, души́ моея́, врача́ Христа́ ро́ждши человѣ́комъ, страстьми́ Свои́ми исцѣли́вша стра́сти.

Конда́къ, гла́съ 4. Подо́бенъ: Яви́лся еси́ дне́сь.

Яко звѣзду́ преве́лію, Це́рковь, иму́щи дне́сь богоглаго́ливаго Симео́на, свѣтово́дится, зову́щи: ра́дуйся, му́чениковъ честны́й вѣ́нче.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Тѣ́ло му́камъ преда́въ по Христѣ́ усе́рдно, не измѣни́лся еси́, ни ослабѣ́лъ, взыва́я, чу́дне: благослове́нъ Бо́гъ оте́цъ на́шихъ.

Боже́ственною, преблаже́нне, любо́вію разже́гся, мы́слію огня́ веще́ственна си́льнѣйши, вопія́, бы́лъ еси́: благослове́нъ Бо́гъ оте́цъ на́шихъ.

Яко Влады́ка, о́тче, на Кре́стъ воздви́глся еси́, изравне́ніемъ стра́сти украша́яся, и пое́ши, веселя́ся: оте́цъ на́шихъ Бо́же, благослове́нъ еси́.

Богоро́диченъ: Дѣ́во Богома́ти Отрокови́це, де́моновъ стру́пе и а́нгеловъ благоукраше́ніе, человѣ́ковъ спасе́ніе, смире́нную ду́шу мою́ вра́жія ле́сти изба́ви.

Пѣ́снь 8.

Ирмо́съ: На Крестѣ́ пло́тію пригвожде́ннаго и показа́вшаго на́мъ ору́жіе во спасе́ніе, о́троцы, превозноси́те Христа́ Бо́га на́шего во вѣ́ки.

Всю́ зарю́ Утѣ́шителеву чи́стымъ твои́мъ, Симео́не, пріе́мъ се́рдцемъ, тму́ де́моновъ несвѣ́тлую потреби́лъ еси́, вѣ́рныя просвѣти́въ.

Мо́ре лю́таго зловѣ́рія изсуши́въ, струя́ми боже́ственныхъ уче́ній твои́хъ вся́ку напои́лъ еси́ ду́шу, кла́съ вѣ́ры плодонося́щую.

Яви́лся еси́ свяще́нникъ, твое́ю кро́вію, му́чениче, вше́дъ въ Це́рковь Боже́ственну, идѣ́же всегда́ зри́ши тебе́ ра́ди, я́ко непоро́чно а́гня, Поже́ршагося.

Богоро́диченъ: Да Тя́ гла́сы благода́рственными, возвесели́вшую на́шъ ро́дъ, воспое́мъ: покры́й и сохрани́ на́съ, Богоневѣ́сто, отъ вся́каго вре́да.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Якоже сто́лпъ о́гненъ, преблаже́нне, яви́лся еси́, лю́ди предводя́ но́выя изъ еги́петскія ле́сти, и къ земли́ обѣтова́нія Боже́ственнаго, му́чениче, священнотаи́нниче всече́стне, преве́лъ еси́.

Си́монъ Симео́нъ сугу́бо зва́ніе имѣ́лъ еси́, сугу́бо естество́мъ су́щее Сло́во предъ безбо́жными богосло́вивъ и Кресту́ прибли́жився: тѣ́мже тя́ вси́, соше́дшеся, ублажа́емъ.

Де́нь пра́здника па́мять твою́ соверша́етъ Це́рковь, съ боже́ственнымъ тя́ почита́ющи Іа́ковомъ, Симео́не, моле́бно: его́же сѣда́лище прія́лъ еси́, свяще́нне.

Богоро́диченъ: Свѣ́томъ мя́ озари́ боже́ственнымъ, Свѣ́та жили́ще, Дѣ́во, страсте́й мои́хъ тму́ и сласте́й глубо́кую но́щь, Богороди́тельнице Пречи́стая, отгоня́щи.


НА ЛИТУРГІИ,

Проки́менъ, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ къ Кори́нѳяномъ, зача́ло 131. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Матѳе́я, зача́ло 56. Прича́стенъ: Во всю́ зе́млю [изы́де вѣща́ніе и́хъ, и въ концы́ вселе́нныя глаго́лы и́хъ].

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 130 – 132 об.

/ Къ оглавленію раздѣла /


Наверхъ / Къ титульной страницѣ

0