Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 21 августа 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 26-й де́нь.
Свята́го священному́ченика Васи́лія, епи́скопа Амасíйскаго.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Яко овна́ отъ ста́да, тя́,* Васи́ліе преблаже́нне,* ца́рь беззако́нный отлучи́* и, Царя́ проповѣ́дающа, Христа́ Бо́га на́шего,* пожре́наго я́ко Агня,* закала́етъ тя́ непра́ведно* и повелѣва́етъ тя́ въ мо́ре воврещи́,* хода́тайствуя тебѣ́ небе́сное Ца́рство* и вѣ́чнующую сла́ву.

Въ вода́хъ стези́ твоя́ пресла́вно сотвори́лъ еси́,* Васи́ліе сла́вне,* по кончи́нѣ бо вве́рженъ бы́въ,* я́коже предре́клъ еси́,* крѣ́пко преплы́въ* и гра́ду твоему́ себе́ Амасíйскому* отда́въ бре́мя че́стно* непосты́дна моли́твенника,* исцѣле́ній рѣку́* и неду́говъ разли́чныхъ очисти́лище.

Сла́ва, и ны́нѣ, пра́здника, или́ богоро́диченъ:

Яже Бо́га Невмѣсти́маго* во чре́вѣ Твое́мъ вмѣсти́вшая,* человѣколю́бно Человѣ́ка бы́вша,* и на́ше смѣше́ніе изъ Тебе́ пріи́мша,* и обожи́вша я́вѣ,* не пре́зри мене́, Всечи́стая, ны́нѣ скорбя́ща,* но уще́дри ско́ро* и разли́чныя вражды́ же* и вре́да лука́ваго свободи́.

Крестобогоро́диченъ:

Агнца и Па́стыря, Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?


[НА УТРЕНИ,]
Кано́нъ, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Пѣ́ти тя́, сла́вне, усе́рдствующу, прему́дрость ми́ пода́ждь и ра́зума сло́во, моли́твами твои́ми, боже́ственныя по́двиги твоя́ восхвали́ти, Христо́вы ра́ди любве́, ю́же показа́лъ еси́ крѣ́пко.

Мѵ́ромъ благода́ти святи́тель яви́лся еси́, пома́зався, свяще́нне, Христу́ досто́йно са́мъ ся́, я́ко же́ртва, муче́ніемъ чиста́, и безкро́вныя же́ртвы принося́.

Побѣ́дною укра́шенъ багряни́цею страда́ній твои́хъ и кро́ви вѣнце́мъ удобре́нъ, ца́рь страсте́й показа́лся еси́, святи́телю, разгна́въ же пре́лесть, ца́рствуеши со Христо́мъ.

Богоро́диченъ: Созда́вый человѣ́ка пе́рвѣе отъ земли́, во чре́вѣ Твое́мъ воплоща́ется и Человѣ́къ соверше́нъ быва́етъ. Тѣ́мже во двою́ существу́, Богоро́дице, соверше́нна зна́емъ Его́, Пренепоро́чная.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́біе.

Же́ртва ты́ Христу́ са́мъ приве́лся еси́ я́коже непоро́чна, огне́мъ твоея́, му́дре, со́вѣсти страда́ніемъ всесожже́нъ. [Два́жды.]

Прему́дрости сло́вомъ, основа́ніемъ Христо́съ утверди́ на ка́мени, непрекло́нно возведе́ тя, Васи́ліе сла́вне, я́коже па́стыря му́дра.

Богоро́диченъ: Ро́дъ земны́й рождество́мъ Твои́мъ, Пречи́стая, разрѣши́ся дре́внія вои́стинну кля́твы, тѣ́мже Боже́ственнаго Твоего́ зра́ка подо́біе почита́емъ, Влады́чице.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственнымъ Ду́хомъ просвѣще́нъ, горды́ню мучи́теля со дерзнове́ніемъ па́стырскимъ велему́дренно посрами́лъ еси́ и, преше́дъ пре́лести пучи́ну, ко приста́нищу Боже́ственному дости́глъ еси́. Отче преподо́бне, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

На жи́зненнѣй водѣ́ боже́ственныхъ исто́чникъ, о́тче, на травѣ́ же вѣ́ры па́лицею уче́ній твои́хъ, му́дре, Христо́во наста́вилъ еси́ ста́до, Васи́ліе преблаже́нне.

Глаго́лы богому́дрыми, му́чениче Христо́въ, беззако́ннаго обличи́лъ еси́ и злоимени́таго Ликинíя благодерзнове́ннѣ богоме́рзское безу́міе, побѣ́дою же по́чести вѣнча́лся еси́.

Неразсѣда́емое основа́ніе водрузи́лъ еси́, му́дре, ты́ на ка́мени вѣ́ры, треволне́нія, священному́чениче, крѣ́пко ле́сти и́дольскія претерпѣ́лъ еси́, сію́ разоря́я си́лою Христо́вою.

Богоро́диченъ: Исцѣли́ сокруше́ніе, Ма́ти Бо́жія, естества́ человѣ́ческаго, Безнача́льное Сло́во во двою́ ро́ждши существу́ нераздѣ́льно, Всенепоро́чная, пло́ти почита́емъ подо́біе.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Укрѣпля́емь, сла́вне, отъ Христа́ обличи́лъ еси́ ле́сть и́дольскую, святи́телю, нача́льнику же сея́, я́коже худѣ́й пти́цѣ, наруга́лся еси́, крѣ́пко, му́чениче, вѣ́ры тече́ніе преше́дъ, му́дре. [Два́жды.]

Якоже другíй Моисе́й, мо́ре нече́стія я́вѣ вѣ́ры жезло́мъ раздѣли́лъ еси́, но́ваго, преблаже́нне Васи́ліе, Изра́иля, я́ко во обѣтова́нную зе́млю, прове́лъ еси́ къ свѣ́ту богоразу́мія.

Богоро́диченъ: Боже́ственное подо́біе зра́ка Твоего́, Богоро́дице Чи́стая, вси́ обра́зно въ поклоне́ніе иму́ще, собо́ръ ерети́чествующихъ при́сно слове́сно отгоня́емъ, и́же Твои́ми богатя́щіися мольба́ми и по́мощію, Пренепоро́чная.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Не терпя́ше лю́тый и беззако́нный мучи́тель е́же въ словесѣ́хъ дерзнове́нія твоего́, му́чениче, и діа́волъ лю́то вооружа́етъ на тя́ Ликинíя, сла́вне. [Два́жды.]

Мнѣ́въ твою́ тве́рдость и де́рзость, свя́те, умягчи́ти ласка́ньми, злодѣ́й томи́тель наде́жды, му́чениче, погрѣши́, нога́ми твои́ми сокруши́вся держа́вно.

Богоро́диченъ: Твои́мъ рождество́мъ болѣ́зней Ева изба́вися, Богоро́дице, Изба́вителя бо ро́ду родила́ еси́ человѣ́ческому, еди́на удобре́ніе, Пречи́стая Влады́чице.

Конда́къ, гла́съ 4. Подо́бенъ: Яви́лся еси́ дне́сь.

Царе́во повелѣ́ніе преоби́дѣвъ, Ца́рство небе́сное получи́лъ еси́, Васи́ліе, въ не́мже лику́я, помина́й на́съ, чту́щихъ па́мять твою́, священному́чениче.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Го́рдый вра́гъ и вельми́ хваля́йся, я́ко птенца́, разори́ти зе́млю, сопротивле́ніемъ твои́мъ побѣди́ся держа́вно и я́вѣ ни́зу паде́ся подъ но́зѣ твои́ свяще́ннѣи, священному́чениче.

Свѣ́томъ вѣ́ры я́вѣ и́дольское омраче́ніе ты́ отгна́лъ еси́, му́дре, Христу́ хвала́ми, блаже́нне, поя́, я́коже о́троцы пе́рвѣе: Бо́же оте́цъ на́шихъ, благослове́нъ еси́.

Ни ласка́ніи тве́рдость, ни преще́ніи, святи́телю, мучи́телей, Васи́ліе, не осла́билъ еси́ отню́дъ, сла́вне, душе́вную крѣ́пость, но не уя́звенъ, я́коже цвѣ́ты, искуше́нія ты́ претерпѣ́лъ еси́.

Богоро́диченъ: Зако́ны, Чи́стая, рождества́ превозшла́ еси́, Зижди́теля ро́ждши я́вѣ всея́ тва́ри. Тѣ́мже и́стинную Тя́ Богоро́дицу, Всепѣ́тая, вѣ́рніи, преблагоче́стно ны́нѣ исповѣ́дуемъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Стрѣла́ми прему́дрости, святи́телю, низло́жь подъ но́зѣ ле́сть, преблаже́нне, вѣнцы́ вѣнча́лся еси́ побѣ́дными я́ко побо́рникъ пресла́венъ вѣ́ры Боже́ственнымъ Ду́хомъ, — Го́спода, — зовы́й, — воспѣва́йте, дѣла́, и превозноси́те Его́ во вся́ вѣ́ки.

Вы́ю пре́лести, святи́телю, мече́мъ вѣ́ры посѣ́клъ еси́, усѣ́ченъ бы́въ во главу́ твою́, сла́вне, и отъ Христа́ вѣне́цъ побѣ́ды прія́лъ еси́, вопія́: благослови́те, вся́ дѣла́, Го́спода и превозноси́те Его́ во вся́ вѣ́ки.

Совокупи́ся тѣлеси́ твоему́, блаже́нне, глава́ по отсѣче́ніи, е́же пресла́вно и безмѣ́рная пучи́на принесе́ окормле́ніемъ, свя́те, Боже́ственнаго Ду́ха. И ны́нѣ, со а́нгелы лику́я, со Отце́мъ сла́виши Сы́на и Боже́ственнаго Ду́ха.

Богоро́диченъ: Ядъ зміи́нъ, Дѣ́во, Евинъ отсѣ́кла еси́ рождество́мъ Твои́мъ, Сло́во я́ко ро́ждши пло́тію Ѵпоста́сное, во утро́бѣ, Пречи́стая, Твое́й совоку́плена стра́шно, Отцу́ Ѵпоста́сное Сло́во, Его́же плотско́е подо́біе почита́емъ.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Въ приста́нище я́вѣ устреми́вся, пресла́вне, треволне́нія бу́ри и́дольскія преше́лъ еси́ Боже́ственнымъ окормле́ніемъ Ду́ха, съ вы́шними лику́я си́лами. Помяни́, блаже́нне, чту́щія тя́. [Два́жды.]

Боже́ственнѣ лику́я, Васи́ліе сла́вне, со а́нгелы побѣ́дная у престо́ла всѣ́хъ Бо́га же и Влады́ки, ра́дуяся, ми́лостивно назира́еши на́съ я́ко па́стырь и святи́тель, пою́щія тя́.

Богоро́диченъ: Безсѣ́менно Безнача́льнаго Сы́на ро́ждши, Бо́га Сло́ва, Ма́ти Дѣ́во, все́ обнови́ла еси́ естество́ на́ше, обетшавшее прегрѣше́ніемъ преступле́нія. Тѣ́мже Тя́, Влады́чице, непреста́нно велича́емъ.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 117 об. – 120 об.

/ Къ оглавленію раздѣла /


Наверхъ / Къ титульной страницѣ

0