Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 26-й де́нь.
Слу́жба и́же во святы́хъ отца́ на́шего Стефа́на, епи́скопа Пе́рмскаго.

[НА ВЕЛИЦѢЙ ВЕЧЕРНИ,]
На Го́споди воззва́хъ: стихи́ры, гла́съ 4. Подо́бенъ: Зва́нный свы́ше.

Егда́ боже́ственное жела́ніе* на́йде на тя́, святи́телю,* тогда́ вся́ преле́стная,* я́же въ мíрѣ, мудрова́нія оста́вль,* и, къ вы́шнимъ жела́я,* вы́шнихъ взыска́лъ еси́;* отону́дуже и прему́дрость* не отъ человѣ́къ, ни человѣ́комъ,* но отъ вы́шняго про́мысла пріе́мь* писа́нія но́вая ко Христо́ву позна́нію изложи́лъ еси́,* и невѣ́дущимъ лю́демъ Бо́гъ тобо́ю позна́нъ бы́сть.* Его́же моли́, Стефа́не прему́дре,* спасти́ и просвѣти́ти ду́ши на́ша.

Егда́ боже́ственное зва́ніе* пріи́де на тя́, святи́телю Стефа́не,* тогда́, Святы́мъ Ду́хомъ дви́жимь* прише́лъ еси́ просвѣти́ти* дре́вле во тмѣ́ лю́ди невѣ́рія лежа́щія* къ свѣ́ту богоразу́мія,* просвѣти́въ, воздви́глъ еси́* и всѣ́хъ научи́лъ еси́* вѣ́ровати въ Тро́ицу Единосу́щную* во Еди́номъ Божествѣ́.* Юже о на́съ моли́, святи́телю пречу́дне,* спасти́ и просвѣти́ти ду́ши на́ша.

Ины стихи́ры, гла́съ 1. Подо́бенъ: Небе́сныхъ чино́въ.

Иже дре́вле оляденѣ́вшая невѣ́рныхъ люде́й сердца́,* уче́ніемъ твои́мъ, блаже́нне Стефа́не, воздѣ́лалъ еси́,* сѣ́мя вѣ́ры въ ни́хъ насади́въ.* Тѣ́мже тя́ я́ко учи́теля* и наста́вника благоче́стія* попремно́гу, вси́ вѣ́рніи, ублажа́емъ.

Бы́сть язы́къ тво́й, святи́телю, тро́сть живопи́сца,* Бо́жія вели́чія всѣ́мъ изъясни́въ,* въ позна́ніе Бо́жіе приве́лъ еси́* и зло́бы мудреца́, пансо́тника, смѣхо́мъ наруга́ема, яви́лъ еси́.* Тѣ́мже твое́ успе́ніе,* духо́внѣ соше́дшеся, почита́емъ.

Хра́мы и́дольскія, святи́телю прему́дре, низложи́въ,* всеконе́чнѣй поги́бели пре́далъ еси́* и це́ркви во Христо́во позна́ніе освяти́лъ еси́.* Тѣ́мже, духо́вная твоя́ ча́да,* я́ко наста́вника тя́ благоче́стія* любо́вію воспѣва́емъ и мо́лимся:* моли́ спасти́ся душа́мъ на́шимъ.

Сла́ва, гла́съ 6:

Прему́дрости твое́й и сло́ву разу́мному, вси́ и́дольстіи служи́тели удиви́шася, и свою́ су́етную вѣ́ру я́ко безбо́жну оплева́ша, и тобо́ю проповѣ́даемому Христу́ отъ души́ вѣ́роваша: Его́же моли́, прему́дре Стефа́не, спасти́ся всѣ́мъ, свяще́нное твое́ торжество́ соверша́ющимъ, и вѣ́рою чту́щимъ всечестну́ю па́мять твою́.

И ны́нѣ, пра́здника.
Входъ. Прокименъ дне, чтенія три.

При́тчей чте́ніе. [Главы́ 10, 3 и 8.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устнѣ́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе. [Главы́ 10, 6, 8 и 9.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе. [Главы́ 4, 6, 7 и 2.]

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ра хра́ма. Сла́ва, гла́съ 2:

Апо́стольски вся́ научи́лъ еси́ вѣ́ровати въ Тро́ицу Единосу́щную во Еди́номъ Божествѣ́. Тѣ́мже тя́ вси́, я́ко духо́внаго отца́, и ревни́теля апо́столомъ, и святи́телемъ единокро́вна, по до́лгу почита́юще, ублажа́емъ и мо́лимся: моли́ спасти́ся всѣ́мъ, свяще́нную па́мять твою́ почита́ющимъ.

И ны́нѣ, пра́здника.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ и жили́ще* Ду́ха Пресвята́го,* прему́дре Стефа́не, бы́лъ еси́:* тѣ́мже и на́съ до́мъ Тому́ содѣ́лай,* свяще́нную твою́ па́мять почита́ющихъ.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Житіе́ твое́, я́ко со́лнце,* въ сердца́ невѣ́рныхъ возсія́,* зарю́ уче́нія испуща́я;* тѣ́мже и на́съ свѣ́томъ невече́рнимъ озари́,* свяще́нную твою́ па́мять почита́ющихъ.

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

Не преста́й, Стефа́не, моля́ся* о духо́вныхъ твои́хъ ча́дѣхъ,* и́хже креще́ніемъ породи́лъ еси́,* да вси́ честно́е твое́* успе́ніе почита́емъ.

Сла́ва, гла́съ 4:

Прему́дрости сокро́вище бы́въ, святи́телю Стефа́не, сердца́ невѣ́рныхъ люде́й уче́ніемъ твои́мъ просвѣти́лъ еси́, благоче́стія сѣ́мена насади́въ. Тѣ́мже тя́ вси́, я́ко учи́теля прему́дра, достодо́лжно по досто́инству ублажа́емъ и мо́лимся: моли́ся Христу́, Ему́же отъ ю́ности порабо́талъ еси́, изба́вити на́съ навѣ́тъ вра́жіихъ и спасти́ся душа́мъ на́шимъ.

И ны́нѣ, пра́здника.

Тропа́рь, гла́съ 4:

Боже́ственнымъ жела́ніемъ, отъ ю́наго во́зраста, Стефа́не прему́дре, разже́гся, яре́мъ Христо́въ взя́лъ еси́ и люде́й оляденѣ́вшая дре́вле невѣ́ріемъ сердца́, боже́ственное сѣ́мя въ ни́хъ сѣ́явъ, ева́нгельски духо́внѣ породи́лъ еси́. Тѣ́мже пресла́вную твою́ па́мять почита́юще, мо́лимъ тя́: моли́, Его́же проповѣ́далъ еси́, да спасе́тъ ду́ши на́ша.

Сла́ва, и ны́нѣ, пра́здника.



НА УТРЕНИ,
На Бо́гъ Госпо́дь: тропа́рь то́йже.

По 1-й стихоло́гіи сѣда́ленъ, гла́съ 1. Подо́бенъ: Ка́мени запеча́тану.

Яко врача́ тя́ преизря́дна душе́вныхъ страсте́й, святи́телю Стефа́не, вѣ́дуще, мо́лимъ: моли́ся утоли́ти отъ на́съ томи́тельныя стра́сти, да тебе́ вси́, я́ко вину́ всѣ́хъ благи́хъ обрѣ́тше, возопіе́мъ: сла́ва Да́вшему ти́ прему́дрость, сла́ва Вѣнча́вшему тя́, сла́ва Даю́щему тобо́ю всѣ́мъ просвѣще́ніе. [Два́жды.]

Сла́ва, и ны́нѣ, пра́здника.

По 2-й стихоло́гіи сѣда́ленъ, гла́съ 4. Подо́бенъ: Вознесы́йся.

Отъ младе́нства добродѣ́тели прилѣжа́въ, сосу́дъ Ду́ха Свята́го, святи́телю Стефа́не, бы́лъ еси́, отъ Него́же и прему́дрости навы́къ, научи́лъ еси́ человѣ́ки и́долы преоби́дѣти и Христу́ вѣ́ровати: Его́же моли́ спасти́ всѣ́хъ, любо́вію тя́ почита́ющихъ. [Два́жды.]

Сла́ва и ны́нѣ, пра́здника, или́ богоро́диченъ:

Грѣхолюби́въ сы́й, молю́ Тя, безгрѣ́шнаго Бо́га ро́ждшую, взе́млющаго грѣхи́ мíра, Пречи́стая, многогрѣ́шную ду́шу мою́ уще́дрити и грѣхи́ моя́ мно́гія очи́стити: грѣ́шныхъ бо Ты́ еси очище́ніе, и спасе́ніе вѣ́рныхъ, и заступле́ніе.

По поліеле́и сѣда́ленъ, гла́съ 8. Подо́бенъ: Прему́дрости.

Прему́дрости свы́ше науче́нъ бы́лъ еси́, Бо́гу соедини́вся, ева́нгельски мíръ оста́вилъ еси́ и въ да́льнихъ мѣ́стѣхъ, прише́дъ, креще́ніемъ ко Христо́ву позна́нію всѣ́хъ приве́лъ еси́. Тѣ́мже и всѣ́мъ вопія́лъ еси́: позна́йте Бо́га и обря́щите благода́ть. Святи́телю прему́дре Стефа́не, моли́ Христа́ Бо́га, грѣхо́въ оставле́ніе дарова́ти почита́ющимъ любо́вію всечестну́ю па́мять твою́. [Два́жды.]

Сла́ва, и ны́нѣ, пра́здника, или́ богоро́диченъ:

Яко Дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, Огнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Та́же, степе́нна, 1-й антифо́нъ 4-го гла́са. Проки́менъ, [гла́съ 4]: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Вся́кое дыха́ніе... Ева́нгеліе Іоа́нна, зача́ло 35 отъ полу́.

По 50-мъ псалмѣ́ стихи́ра, гла́съ 6:

Прему́дрости твое́й [и сло́ву разу́мному, вси́ и́дольстіи служи́тели удиви́шася, и свою́ су́етную вѣ́ру я́ко безбо́жну оплева́ша, и тобо́ю проповѣ́даемому Христу́ отъ души́ вѣ́роваша: Его́же моли́, прему́дре Стефа́не, спасти́ся всѣ́мъ, свяще́нное твое́ торжество́ соверша́ющимъ, и вѣ́рою чту́щимъ всечестну́ю па́мять твою́].

Кано́нъ пра́здника со ирмосо́мъ на 6, и свята́го два́, на 8.

Кано́нъ свята́го, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Свяще́ннаго ты́ Писа́нія отъ мла́денства научи́вся, богоно́се Стефа́не, въ да́льняя мѣста́ прише́лъ еси́, и невѣ́дущимъ Бо́гъ тобо́ю позна́ся.

Идѣ́же пре́лесть почита́ема бя́ше, та́мо же ны́нѣ тобо́ю Бо́гъ невѣ́дущимъ, святи́телю Стефа́не, позна́ся. Тѣ́мже свяще́нную Твою́ па́мять достодо́лжно ублажа́емъ.

Богодохнове́ннымъ твои́мъ уче́ніемъ научи́лъ еси́ лю́ди вѣ́ровати во Христа́ и отъ и́дольскія пре́лести уклоня́тися. Сего́ ра́ди тя́ вси́, я́ко единоревни́теля апо́столомъ, пѣ́сньми почита́емъ.

Богоро́диченъ: Ты́ Еди́наго, Богоневѣ́сто, въ вы́шнихъ Сѣдя́щаго, на руку́ носи́ла еси́, пло́ть бы́вша: Ты́ бо была́ еси́ избра́нна отъ всѣ́хъ вѣ́къ, прія́телище досто́йно Вседержи́теля.

Другíй кано́нъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Пе́рмь я́ко дости́глъ еси́, святи́телю, и та́мо возвы́шенную пре́лесть, прему́дре Стефа́не, смири́лъ еси́, и лю́таго чародѣ́я прему́дрыми твои́ми уче́ніи посрами́лъ еси́.

Бѣсо́вская ору́жія крѣ́пко, святи́телю, притупи́лъ еси́, и, тѣ́хъ побѣди́въ Бо́жіею си́лою, всѣ́мъ Христа́, и́стиннаго Бо́га, Того́ исповѣ́далъ еси́, тѣ́мже и вѣне́цъ отъ Него́ прія́лъ еси́, Стефа́не.

Боже́ственною любо́вію, о́тче, распала́емь, не убоя́лся еси́ долготы́ пу́тныя, ниже́ та́мо нечести́выхъ человѣ́къ сопротивле́нія, но вся́ претерпѣ́лъ еси́ и всѣ́хъ Бо́гу приве́лъ еси́.

Богоро́диченъ: Изъ ко́рене ца́рскаго прозябла́ еси́, Царя́ Христа́, Бо́жіе Сло́во, па́че ума́ и смы́сла родила́ еси́ изъ чи́стыхъ крове́й Твои́хъ, сугу́ба естество́мъ явля́ема и еди́нствующа ѵпоста́сію.

Катава́сія пра́здника.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Не убоя́лся еси́, святи́телю, люде́й тогда́ нече́ствующихъ, но тѣ́хъ дерзнове́нно куми́рницу со и́долы огню́ пре́далъ еси́ и всѣ́хъ научи́лъ еси́ вопи́ти: нѣ́сть свя́тъ, па́че Тебе́, Го́споди. [Два́жды.]

Тезоимени́тымъ му́жествомъ и смире́нія нра́вомъ на о́вчу кро́тость убíйцъ преложи́лъ еси́, сего́ ра́ди и вѣнцы́ вѣнча́лся еси́, святи́телю Стефа́не.

Богоро́диченъ: Тя́, заступле́ніе небла́зненно, Богома́ти, стяжа́вше и упова́ніе на Тя́ возлага́юще, спаса́емся и, къ Тебѣ́ прибѣга́юше, сохраня́емся вси́.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Яко му́дръ и смы́сленъ споспѣ́шникъ, душе́вное благоро́діе па́че плотски́хъ сласте́й предпоче́тъ, я́ко прему́драя уче́нія всѣ́мъ явля́еши и въ Бо́жіе позна́ніе но́выя лю́ди, о́тче, приве́лъ еси́.

Очи́стивъ тво́й у́мъ отъ страстна́го треволне́нія, Христу́ подо́бяся, взыска́ти заблу́ждшихъ прише́лъ еси́, и́хже обрѣ́тъ, съ ни́ми Тому́ пое́ши: нѣ́сть свя́тъ, па́че Тебе́, Го́споди.

Богоглаго́ливый язы́къ я́ко стяжа́въ, святи́телю, та́инствомъ богосло́вія научи́лъ еси́ лю́ди вѣ́ровати въ Тро́ицу, Еди́но Божество́, Ейже о на́съ, Стефа́не, моли́ся.

Богоро́диченъ: Же́злъ, прозя́бшій Христа́, цвѣ́тъ нетлѣ́нный, злату́ю кади́льницу, вси́ Тя́ вѣ́мы, Чи́стая, Боже́ственнаго существа́ нося́щи на руку́ у́гль, Богоблаже́нная.

Сѣда́ленъ, гла́съ 4. Подо́бенъ: Ско́ро предвари́.

Ума́ пречу́днаго и бо́дреннаго учи́теля, священнодѣ́йствы Це́рковь украси́вша, и му́тнымъ уче́ніемъ волхва́, я́ко возбѣснѣ́вша во́лка, отъ Христо́выхъ ове́цъ словесы́ свои́ми отгна́вша, и невре́дно духо́вная своя́ ча́да сохра́нша, восхва́лимъ, вѣ́рніи, Стефа́на прехва́льнаго, глаго́люще: моли́ Христа́ Бо́га спасти́ся душа́мъ на́шимъ. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Яко со́лнце, чи́стое житіе́ твое́ возсія́, святи́телю, тму́ идолобѣ́сія отъ люде́й твои́хъ отгна́въ, всѣ́хъ научи́лъ еси́ взыва́ти: сла́ва си́лѣ Твое́й, Го́споди.

Волше́бная буесло́вія, я́ко прему́дръ, посрами́лъ еси́, и си́хъ отъ Христо́ва ста́да словесы́ твои́ми, я́ко пра́щею, отгна́лъ еси́, и зва́ти всѣ́хъ научи́лъ еси́: сла́ва си́лѣ Твое́й, Го́споди.

Яко и́стинный святи́тель ти́хъ и кро́токъ, о́тче, бы́лъ еси́ и сто́лпъ благоче́стія Це́ркве яви́лся еси́, лю́ди твоя́ благоче́стію научи́въ вопи́ти Христу́: сла́ва си́лѣ Твое́й, Го́споди.

Богоро́диченъ: Тя́ ору́жіе на враги́ предлага́емъ, ско́рби вся́кія лю́тыхъ обстоя́ній отрѣва́емъ, и возмуще́нія ерети́ческаго, Ма́ти Бо́жія, избѣга́емъ.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Спасти́ся моли́ лю́демъ, и́хже уче́ніемъ твои́мъ просвѣти́лъ еси́ и научи́лъ еси́ вопи́ти: сла́ва си́лѣ Твое́й, Человѣколю́бче. [Два́жды.]

Отъ Бо́га пріе́мъ свяще́нства избра́ніе, Боже́ственною си́лою свы́ше одѣ́янъ, апо́стольски лю́ди отъ тмы́ и́дольскія просвѣти́лъ еси́ и научи́лъ еси́ вопи́ти: си́лѣ Твое́й сла́ва, Человѣколю́бче.

Богоро́диченъ: Ковче́гъ Тя́ издале́ча прообразова́ пріе́мшій зако́нъ Богонапи́санный, во чре́вѣ Сло́во Бо́жіе заче́ншую несказа́нно, Всенепоро́чная, пита́ющее бога́тно ду́ши вопію́щихъ: сла́ва си́лѣ Твое́й, Го́споди.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Воздви́глъ еси́ уче́ніемъ твои́мъ дре́вле во тмѣ́ невѣ́дѣнія лю́ди лежа́щія, ча́да Бо́жія и свѣ́та показа́лъ еси́ наслѣ́дники, отону́дуже тя́, святи́телю, вси́ любому́дренно почита́емъ.

Прему́дрость Ду́ха Свята́го благода́тію во устна́хъ твои́хъ излія́вшися самотвори́тельно и ко Христо́ву позна́нію приведе́ лю́ди, святи́телю.

Свѣ́ту вели́кому я́ко вѣне́чникъ ны́нѣ, святи́телю, предстои́ши, помина́й изря́дное твое́ достоя́ніе, е́же мно́гими труды́, о́тче, стяжа́лъ еси́, да вси́ тя́ ублажа́емъ.

Богоро́диченъ: Возсія́ изъ Тебе́ мы́сленное Со́лнце и свѣ́тлыя лучи́ Своего́ Божества́ всѣ́мъ простре́, Богоро́дице Влады́чице, тѣ́мъ Тя́ вси́ сла́вимъ.

Инъ.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Боже́ственною ре́вностію, святи́телю, разжиза́емь, су́етныя и́долы па́губы коне́чныя огню́ пре́далъ еси́ и, невѣ́рныя въ вѣ́ру приве́дъ, всѣ́хъ научи́лъ еси́ въ Тре́хъ Ли́цѣхъ Еди́но Божество́ вѣ́ровати. [Два́жды.]

Постыде́ся окая́нный во́лхвъ, хотя́ Христо́вы лю́ди отврати́ти отъ вѣ́ры, Бо́гу, тя́ прославля́ющу, свяще́ннѣйшій Стефа́не прему́дре.

Богоро́диченъ: Украси́лася еси́ дѣ́вства добро́тами, Евинъ покры́ла еси́ сту́дъ злообра́зный, Христа́ ро́ждшая, одѣя́ніе безсме́ртія да́рующаго Тебе́ чту́щимъ.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Ра́ломъ слове́съ твои́хъ оляденѣ́вшая люде́й сердца́ воздѣ́лалъ еси́, боже́ственное сѣ́мя въ ни́хъ всѣ́явъ, пло́дъ кра́сный Христу́, святи́телю, приве́лъ еси́.

Быстрина́ми твои́хъ уче́ній и́дольская разжже́нія, прему́дре Стефа́не, угаси́въ, боже́ственными твои́ми словесы́ вѣ́рныхъ сердца́ утверди́лъ еси́.

Во Единосу́щную Тро́ицу вѣ́ровати лю́ди научи́въ, прему́дре Стефа́не, отъ скве́рны и́дольскія къ Живо́му Бо́гу приве́лъ еси́.

Богоро́диченъ: Расто́ргни мои́хъ согрѣше́ній рукописа́ніе, одержа́щихъ мы́ печа́лей и страсте́й разрѣше́ніе да́руя, и соблюди́ мя́ неврежде́нна, Влады́чице.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Па́стырскій же́злъ пріе́мъ, святи́телю, но́вымъ лю́демъ учи́тель бы́лъ еси́, пресла́вне Стефа́не, по апо́столу, всѣ́мъ вся́къ бы́въ, да всѣ́хъ ко Христу́ приведе́ши, пресла́вне. [Два́жды.]

Ме́чь обою́ду о́стръ язы́къ тво́й на лука́ваго волхва́ бы́сть, святи́телю, пресѣка́я того́ му́тное уче́ніе; тѣ́мже тя́ свяще́нными пѣ́сньми прославля́емъ.

Богоро́диченъ: На́йде Вседѣ́тельный Ду́хъ на Тя́, Всенепоро́чная, и Сло́во Бо́жіе въ Тя́ всели́ся, и пло́ть бы́сть неизрече́нно, и пребы́сть неизмѣ́ненъ.

Конда́къ, гла́съ 8. Подо́бенъ: Взбра́нной.

Самозва́ненъ не и́щущимъ тебе́, святи́телю, обрѣ́лся еси́, лю́ди, отъ и́дольскія ле́сти свободи́въ, ко Христо́вѣ вѣ́рѣ приве́лъ еси́ и волхва́ пансо́тника посрами́лъ еси́, тѣ́мже и пе́рвый епи́скопъ и учи́тель Пе́рми бы́лъ еси́. Сего́ ра́ди духо́вная твоя́ ча́да, я́ко тобо́ю изба́вльшеся отъ и́долъ, благода́рная тебѣ́ возопіе́мъ: ра́дуйся, Стефа́не, учи́телю прему́дрый.

Икосъ:

Вся́каго мірска́го пристра́стія кромѣ́, о́тче, бы́въ, отъ ю́ности прилѣжа́лъ еси́ прему́дрости и дѣ́тельное худо́жество дости́глъ еси́ богосло́вія. И въ да́льнія страны́ прише́дъ, идѣ́же весьма́ Бо́гъ не познава́шеся, но пре́лесть бѣсо́вская почита́шеся, та́мо апо́стольски лю́ди научи́лъ еси́ вѣ́ровати во Христа́, и́долы сокруши́въ и волхва́ посрами́въ, святи́тель тѣ́мъ бы́лъ еси́. Тѣ́мже духо́вная твоя́ ча́да, я́ко тобо́ю изба́вльшеся отъ и́долъ, благода́рная тебѣ́ зове́мъ: ра́дуйся, Стефа́не, учи́телю прему́дрый.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Злочести́вый о́нъ чародѣ́й, и́же на благоче́стіе хулу́ глаго́лавый, тобо́ю, прему́дре, я́ко беззако́ненъ, отъ Христо́ва ста́да но́выхъ люде́й отгони́мь быва́етъ. Мы́ же Христу́ зове́мъ: благослове́нъ Бо́гъ оте́цъ на́шихъ. [Два́жды.]

Пресла́вно я́ко преше́дъ отъ мíра къ премíрнымъ, святи́телю, жили́щемъ и прича́стіемъ Бо́гу прибли́жився, воспѣва́еши: благослове́нъ Бо́гъ оте́цъ на́шихъ.

Богоро́диченъ: Изба́вльшеся Тобо́ю пе́рвыя кля́твы, къ присносу́щнѣй Жи́зни преше́дше, ра́дуйся, зове́мъ Ти́, пресла́вная Влады́чице, Яже Бо́га на́мъ ро́ждшая.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Бѣ́гаетъ у́бо, побѣжде́нъ бы́въ тобо́ю, преблаже́нне Стефа́не, злочести́вый во́лхвъ, его́же мудрова́нія и зло́бы вси́ избавля́емся, Христу́ вопію́ще: благослове́нъ Бо́гъ оте́цъ на́шихъ.

Иже тобо́ю дре́вле просвѣще́нніи лю́діе, пречу́дне святи́телю Стефа́не, я́ко къ жи́ву, глаго́лемъ: не оста́ви на́съ, твои́хъ ча́дъ, я́коже обѣща́лся еси́, да вси́ съ тобо́ю Христу́ зове́мъ: благослове́нъ Бо́гъ оте́цъ на́шихъ.

Елее́мъ боже́ственнаго ра́дованія я́ко святи́тель пома́занъ бы́въ, но́выя лю́ди ко Христо́ву позна́нію приве́лъ еси́ и всѣ́хъ научи́лъ еси́ Христу́ взыва́ти: благослове́нъ Бо́гъ оте́цъ на́шихъ.

Богоро́диченъ: Ны́нѣ вся́ испо́лнишася свѣ́та боже́ственнаго Тобо́ю, Пречи́стая, Ты́ бо две́рь яви́лася еси́, е́юже мíру Бо́гъ бесѣ́дова, просвѣща́я вѣ́рою зову́щія: благослове́нъ, Пречи́стая, Пло́дъ чре́ва Твоего́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Словесы́ твои́ми наставля́ема ча́да твоя́, святи́телю, отъ тмы́ и́дольскія къ свѣ́ту богоразу́мія преше́дше, единогла́сно Христу́ вопіе́мъ: благослови́те, вся́ дѣла́ Госпо́дня, Го́спода и превозноси́те Его́ во вѣ́ки. [Два́жды.]

Свѣ́тъ трисо́лнечныя Тро́ицы, всели́вся въ боже́ственное твое́ се́рдце, лю́ди вся́ просвѣти́ святы́мъ креще́ніемъ и научи́ Творцу́ Изба́вителю вопи́ти: благослови́те, вся́ дѣла́ Госпо́дня, Го́спода и превозноси́те Его́ во вѣ́ки.

Богоро́диченъ: Усты́ и ра́зумомъ Богоро́дицу Тя́ му́дрствующе, пѣсносло́вимъ Тя́, Пренепоро́чная: родила́ бо еси́, Пречи́стая, пло́тію обложе́на Бо́га и Го́спода. Тѣ́мъ Тя́, Дѣ́во, пое́мъ и превозно́симъ во вѣ́ки.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Якоже нѣ́кій хра́брый воево́да яви́лся еси́, преблаже́нне, и́дольскія хра́мы искореня́я, и, лю́ди отъ тѣ́хъ пре́лести изба́вивъ, научи́лъ еси́ отъ души́ Христу́ вопи́ти: благослови́те, вся́ дѣла́, Го́спода и превозноси́те Его́ во вѣ́ки.

Во глубину́ Ду́ха Свята́го прини́кнувъ, ра́зумъ боже́ственный отту́ду поче́рплъ еси́. Тѣ́мже и Це́рковь правосла́віемъ обогати́лъ еси́ Творцу́ Изба́вителю вопи́ти: благослови́те, вся́ дѣла́, Го́спода и превозноси́те Его́ во вѣ́ки.

Во Христо́во посо́біе обо́лкся, лука́выя бѣ́сы отъ человѣ́къ отгна́лъ еси́. Тѣ́мъ и небе́сное наслѣ́діе, о́тче, со святи́тели прія́лъ еси́ и съ ни́ми Христу́ вопіе́ши: благослови́те, вся́ дѣла́, Го́спода и превозноси́те Его́ во вѣ́ки.

Богоро́диченъ: Ева у́бо дре́ва живо́тнаго изгна́на бы́сть, возбраня́ема причаще́нія; Ты́ же, Дѣ́во Богоро́дице, Живо́тъ вѣ́чный источи́ла еси́ мíру, живоно́сное дѣ́йство да́рующій вѣ́рнымъ.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Твои́ми труды́, святи́телю, я́же на земли́, небе́сный поко́й прія́тъ, идѣ́же святы́хъ ли́кове и пра́ведныхъ всесвѣ́тлое торжество́. Отону́дуже и на́съ помина́й, па́мять твою́ при́сно сла́вящихъ.

Вѣ́чныхъ и нетлѣ́нныхъ улучи́ти жела́я, святи́телю, и я́же въ мíрѣ мня́щихся сла́дкихъ оста́вивъ, Христу́ послѣ́довалъ еси́. Тѣ́мже и ли́ку архіере́йскому сочета́лся еси́, пресла́вне.

Догма́томъ благоче́стія научи́вся, прему́дре святи́телю, апо́столомъ ревни́тель бы́лъ еси́ и и́дольскую пре́лесть низложи́лъ еси́, тѣ́мже твою́ па́мять досто́йно ублажа́емъ.

Богоро́диченъ: Пло́ть прія́ти восхотѣ́въ, въ Тя́ всели́ся, еди́ну святѣ́йшу всѣ́хъ обрѣ́тъ Богоро́дицу, вои́стинну яви́ Ма́терь Дѣ́ву.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Боже́ственнымъ жела́ніемъ всегда́ подвиза́емь, му́дрости и ра́зума извы́къ, по апо́столу, люде́й отъ пре́лести отврати́лъ еси́, и Бо́гу Жи́ву вѣ́ровати научи́лъ еси́, святи́телю прехва́льне.

Всѣ́мъ благи́мъ о́бразъ дово́ленъ бы́лъ еси́, къ вы́шнему житію́ веду́щъ, смире́ніемъ и кро́тостію. Тѣ́мже отсю́ду Христо́съ па́стыря тя́ люде́й Свои́хъ устроя́етъ, Его́же моли́ спасти́ всѣ́хъ, пою́щихъ тя́.

Иже къ Бо́гу жела́ніемъ страсте́й успи́лъ еси́ воста́ніе, всено́щнымъ стоя́ніемъ дарова́нія воспрія́лъ еси́ ви́дѣти су́щія та́мо неизрече́нныя добро́ты, Стефа́не.

Богоро́диченъ: Яви́лася еси́, Дѣ́во, Ма́ти Бо́жія, па́че естества́ ро́ждшая Бо́жіе Сло́во, Его́же Оте́цъ отры́гну пре́жде всѣ́хъ вѣ́къ, я́ко Бла́гъ; Его́же ны́нѣ и тѣле́съ вы́шше разумѣва́емъ, а́ще и въ тѣ́ло одѣ́яся.

Свѣти́ленъ свята́го:

Ни человѣ́комъ, ни отъ человѣ́къ, но отъ Бо́га избра́ніе святи́тельства пріи́мъ, и́же пре́жде тмы́ сы́ны, ны́нѣ же ча́да и наслѣ́дники Свѣ́та, твои́мъ уче́ніемъ сотвори́лъ еси́, прему́дре Стефа́не. [Два́жды.]

Сла́ва, и ны́нѣ, пра́здника.

На хвали́техъ стихи́ры, гла́съ 1. Подо́бенъ: Небе́сныхъ чино́въ.

Лю́таго и зла́го пансо́тника су́етное буесло́віе,* я́ко прему́дръ, отрази́лъ еси́,* и того́, я́ко во́лка, отъ Христо́ва ста́да отгна́лъ еси́,* и лю́ди Бо́жія апо́стольски научи́лъ еси́.* Тѣ́мже дне́сь, любому́дренно соше́дшеся,* честну́ю па́мять твою́ пресла́вно почита́емъ, святи́телю.

Иже свы́ше дарова́ннымъ твои́мъ ра́зумомъ* до́брѣ разсуди́въ настоя́щихъ,* и къ Бо́гу веду́щихъ жела́ніе пріе́мъ,* и, я́ко еле́нь, на исто́чники водны́я поте́клъ еси́:* и́же дре́вле невѣ́ріемъ во тмѣ́ лежа́щія лю́ди* креще́ніемъ сы́ны Свѣ́та и наслѣ́дники сотвори́лъ еси́,* о ни́хже ны́нѣ, Стефа́не, непреста́нно моли́ся.

Ни сла́вы, ни бога́тства, святи́телю, возжела́въ,* но духо́вное худо́жество взыска́лъ еси́* жела́ніемъ, е́же мно́гихъ собо́ю испра́вити и ко Христу́ привести́,* е́же и получи́лъ еси́.* Тѣ́мже до конца́, не оскудѣва́я, моли́ся Христу́ Бо́гу,* спасти́ всѣ́хъ, честну́ю па́мять твою́ почита́ющихъ.

Сла́ва, гла́съ 2:

Пріиди́те, ны́нѣ благоче́стно соше́дшеся, новопросвѣще́нніи свяще́нныхъ собо́ри, псалмы́ и хвала́ми досто́йную че́сть я́ко отцу́ и благодѣ́телю воздаю́ще, духо́внѣ на́съ креще́ніемъ въ пакибытіе́ породи́вшему и отъ тмы́ на свѣ́тъ произве́дшему, возопіе́мъ, глаго́люще: Го́споди, моли́твами Твоего́ уго́дника Стефа́на спаси́ и уще́дри всѣ́хъ, благоче́стно отъ души́ пою́щихъ Тя́.

И ны́нѣ, пра́здника.
Славосло́віе вели́кое. И ча́съ 1-й. И отпу́стъ.



НА ЛИТУРГІИ,

Блаже́нна 1-го кано́на пѣ́снь 3-я, на 4, и 2-го кано́на пѣ́снь 6-я, на 4. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. [Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́]. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 120 об. – 129 об.

/ Къ оглавленію раздѣла /


Наверхъ / Къ титульной страницѣ

0