Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 25-й де́нь.
Слу́жба преподо́бному отцу́ на́шему Силве́стру, игу́мену Обно́рскому, чудотво́рцу.

ВЕЧЕРЪ.
Блаже́нъ му́жъ, 1-й антифо́нъ. На Го́споди воззва́хъ, стихи́ры на 6, гла́съ 5:

Ди́внаго во отцѣ́хъ Се́ргія благослове́ніе воспріи́мъ,* я́ко опло́томъ огражде́нъ,* въ кра́й полу́нощный прите́клъ еси́,* и ту́ бдѣ́ніемъ, поще́ніемъ и моли́твою тѣ́ло свое́ изнури́вый,* я́ко звѣзда́ пресвѣ́тлая яви́лся еси́, преподо́бне,* тѣ́мже свѣ́томъ благода́ти, я́же въ тебѣ́,* озари́ на́съ, моля́щихтися.

Якоже во дни́ до́бляго житія́ твоего́* вѣ́рніи въ оби́тель честну́ю твою́,* благоговѣ́юще, притека́ху,* си́це и ны́нѣ мно́зи отъ кра́й да́льнихъ* притека́ютъ поклони́тися моще́мъ твои́мъ,* о́тче преподо́бне,* мы́, та́кожде о́чи серде́цъ на́шихъ* къ ра́цѣ твое́й обраща́юще, те́плѣ мо́лимся:* исцѣли́ неду́ги на́ша душе́вныя,* вку́пѣ же и тѣле́сныя.

Сла́ва, гла́съ 6:

Пріиди́те, вѣ́рніи, восхва́лимъ просія́вшаго въ пусты́ни Обно́рстѣй свѣти́льника и, припа́дше къ многоцѣле́бнымъ моще́мъ его́, возопіи́мъ: ра́дуйся, по́стниковъ похвало́; ра́дуйся, неду́гующихъ врачу́; ра́дуйся, де́монскія си́лы прогони́телю; ра́дуйся, всѣ́мъ вѣ́рующимъ вѣ́рное въ бѣда́хъ приста́нище и заступле́ніе.

И ны́нѣ, богоро́диченъ: Кто́ Тебе́ не ублажи́тъ, Пресвята́я Дѣ́во...
Вхо́дъ, проки́менъ дне́ и чте́нія 3 преподо́бническія.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры, гла́съ 3:

По́двигомъ до́брымъ подвиза́лся еси́, блаже́нне, и житіе́мъ благоче́стнымъ о́бразъ бы́лъ еси́ ста́ду твоему́, е́же му́дрѣ упа́слъ еси́, и, отъ пусты́ни исходя́ къ лю́демъ, и́щущимъ зрѣ́ти тя́, духо́внѣ бесѣ́довалъ еси́, да́руя коему́ждо ми́ръ и утѣше́ніе, Силве́стре преподо́бне.

Сосу́дъ избра́нъ Ду́ху Свято́му отъ ю́ности яви́лся еси́, преподо́бне, егда́ бо житіе́ по́стное провожда́лъ еси́, открове́ніе свы́ше прія́лъ еси́, я́ко процвѣте́тъ пусты́ня твоя́ и ста́до и́ноковъ пріи́детъ въ ню́; и свѣ́тъ неизрече́нный осіява́ше сокрове́нное селе́ніе твое́, сла́ву добродѣ́телей твои́хъ возвѣща́я, Силве́стре блаже́нне.

Поще́ніемъ и житіе́мъ многотру́днымъ пло́ть твою́ умерщвля́яй, преподо́бне, кла́дязь въ пусты́ни ископа́лъ еси́, и́же, до дне́сь оби́льно источа́я струи́ водны́я, вку́пѣ источа́етъ моли́твами твои́ми цѣльбу́ притека́ющимъ съ вѣ́рою и упова́ніемъ на по́мощь и заступле́ніе твое́, Силве́стре богоно́сне.

Сла́ва, гла́съ 2:

Кíими похва́льными вѣнцы́ увязе́мъ Силве́стра вседо́бляго, и́же я́ко а́нгелъ земны́й и человѣ́къ небе́сный въ пусты́ни поживе́? Кíими пѣ́сньми восхва́лимъ блаже́ннаго, и́же и въ житіи́ свое́мъ милосе́рднѣ лю́демъ по́мощь благода́тную подая́ше, и по успе́ніи свое́мъ, со а́нгелы ликовству́я, исцѣле́нія къ ра́цѣ его́ притека́ющимъ неоску́дно да́руетъ? Припаде́мъ у́бо къ нему́, бра́тіе, моля́щеся, да испро́ситъ на́мъ у Бо́га ми́ръ и ве́лію ми́лость.

И ны́нѣ, богоро́диченъ.

На стихо́внѣ стихи́ры, гла́съ 8:

Вѣ́ру те́плую имы́й* въ си́лу живоно́сну изъ ме́ртвыхъ воста́вша Христа́,* хра́мъ Воскресе́нія въ пусты́ни Обно́рстѣй воздви́глъ еси́,* тѣ́мъ и си́лою Христа́, воскре́сшаго и а́дъ попра́вшаго,* бѣ́сы мно́гажды изгоня́лъ еси́,* и отъ на́съ у́бо, мо́лимъ тя́, преблаже́нне,* отжени́ стра́сти душевре́дныя,* отъ лука́ваго въ ны́ вселя́емыя.

Сти́хъ: Честна́ предъ Го́сподемъ* сме́рть преподо́бныхъ Его́.

Посто́мъ презѣ́льнымъ* вся́кое пло́ти мудрова́ніе умерщвля́я* и то́чію бы́ліе травно́е въ снѣ́дь имѣ́я,* егда́, я́ко человѣ́къ, изнемо́глъ еси́, о́тче свяще́нне,* по́мощь отъ Го́спода пріи́де къ тебѣ́:* му́жъ бо чу́денъ, явле́йся,* укрѣпи́ тя и показа́,* ка́ко си́ла Бо́жія въ не́мощи соверша́ется.* Мы́ же, вы́ну не́мощны су́ще, мо́лимъ тя́, преподо́бне:* моли́ся ко Го́споду,* да пода́стъ ми́ръ и утвержде́ніе душа́мъ на́шимъ.

Сти́хъ: Блаже́нъ му́жъ боя́йся Го́спода,* въ за́повѣдехъ Его́ восхо́щетъ зѣло́.

Ко Го́споду отходя́,* глаго́лалъ еси́ бра́тіи твое́й, преподо́бне:* внемли́те, о бра́тія моя́ возлю́бленная,* Бо́га бо́йтеся и стра́хъ Его́ въ се́рдцы свое́мъ имѣ́йте,* и за́повѣди Госпо́дни сохраня́йте,* святы́я же Це́ркве не отлуча́йтеся,* и въ ны́нѣшнемъ вѣ́цѣ потерпи́те ма́ло,* да прича́стницы бу́дете Ца́рствію Бо́жію.* Мо́лимъ у́бо тя́, преподо́бне:* испроси́ на́мъ отъ Го́спода по́мощь,* завѣ́тъ тво́й святы́й соблюда́ти.

Сла́ва, гла́съ то́йже:

Мона́ховъ мно́жества, наста́вника тя́ почита́емъ, о́тче на́шъ Силве́стре, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче и преподо́бныхъ соприча́стниче и пра́ведныхъ. Съ ни́ми же моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ: Безневѣ́стная Дѣ́во...

Тропа́рь, гла́съ 6:

Иже измла́да Христа́ возлюби́въ и вѣ́рою къ Нему́ прибли́жся, изнури́лъ еси́, въ пусты́ни живы́й, многострада́льное тѣ́ло твое́. Тѣ́мъ, блаже́нне Силве́стре, со а́нгелы ликовству́я, моли́ Христа́ Бо́га ми́ръ мíрови дарова́ти, и бу́ди помо́щникъ вѣ́рою призыва́ющимъ тя́ на по́мощь, и чту́щимъ святу́ю па́мять твою́.

Инъ тропа́рь, гла́съ 4:

Яко до́бръ блаже́ннаго Се́ргія учени́къ, вѣ́рѣ и благоче́стію его́ подража́я, стяжа́лъ еси́ даро́въ Ду́ха Свята́го сокро́вище, и си́лы мно́ги содѣ́лалъ еси́ о Го́сподѣ во спасе́ніе и утѣше́ніе вѣ́рныхъ. Не оста́ви у́бо и на́съ, съ вѣ́рою притека́ющихъ къ ра́цѣ твое́й, Силве́стре преподо́бне.


НА УТРЕНИ,
По 1-й стихоло́гіи сѣда́ленъ, гла́съ 4:

Вмѣня́я вся́ тщету́ бы́ти за превосходя́щее разумѣ́ніе Христа́ Іису́са, Го́спода на́шего, Его́ еди́наго вожделѣ́лъ еси́, Его́ еди́наго, я́ко би́сера многоцѣ́ннаго, взыска́лъ еси́, съ Ни́мъ же водворя́яся дне́сь въ небе́сныхъ черто́зѣхъ, моли́ся, уго́дниче Бо́жій, да сподо́бимся бы́ти вѣ́чныхъ бла́гъ прича́стницы. [Два́жды.]

Сла́ва и ны́нѣ, богоро́диченъ:

Пречи́стая Дѣ́во Богоро́дице, пріими́ моли́тву ра́бъ Твои́хъ и отъ бѣ́дъ привре́менныхъ и отъ му́къ вѣ́чныхъ изба́ви на́съ, воспѣва́ющихъ Тебѣ́: Благода́тная, ра́дуйся.

По 2-й стихоло́гіи сѣда́ленъ, гла́съ 2:

Пречи́стому Твоему́ о́бразу покланя́емся, Всеми́лостиве, къ нему́ же Силве́стръ блаже́нный воздѣва́ше ру́цѣ, моля́йся. Пощади́ на́съ, Спа́се, моли́твами отца́ богоно́снаго. [Два́жды.]

Сла́ва и ны́нѣ, богоро́диченъ:

Въ бе́здну зо́лъ впа́дшіи, гла́съ моле́бный возно́симъ къ Тебѣ́, Влады́чице: изведи́ ны́ милосе́рдою десни́цею Твое́ю изъ глубины́ грѣхо́вныя и возведи́ на го́ру добродѣ́телей, Пречи́стая.

По поліеле́и сѣда́ленъ, гла́съ 8:

Обогати́лъ еси́ вѣ́рныя сокро́вищемъ чуде́съ твои́хъ, преподо́бне Силве́стре, мо́лимъ у́бо тя́: да не оскудѣ́ютъ ми́лости твоя́ къ грѣ́шнымъ рабо́мъ твои́мъ, лобыза́ющимъ честны́я мо́щи твоя́ и чту́щимъ святу́ю па́мять твою́. [Два́жды.]

Сла́ва и ны́нѣ, богоро́диченъ:

Заступле́ніе еси́, Дѣ́во Чи́стая, и прибѣ́жище всѣ́мъ, обурева́емымъ волна́ми жите́йскими, нѣ́сть бо ины́я, ра́звѣ Тебе́, наде́жды на́мъ, грѣ́шнымъ, въ бе́здну грѣхо́вную впа́дшимъ.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.

По 50-мъ псалмѣ́, стихи́ра, гла́съ 2:

Сла́вны и прехва́льны труды́ твоя́, преподо́бне Силве́стре: ко Го́споду бо еди́ному горя́ любо́вію и въ Не́мъ еди́номъ вѣ́рою и наде́ждою утвержда́яся, вся́ подъя́лъ еси́ Его́ ра́ди; ны́нѣ же, отъ руку́ Его́ вѣне́цъ сла́вы воспрія́въ, моли́ся, преподо́бне, да сподо́бимся небе́снаго наслѣ́дія соприча́стницы бы́ти.

Кано́нъ, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Пода́ждь ми́ си́лу, Многоми́лостиве Го́споди, пѣ́сньми восхвали́ти просла́вленнаго Тобо́ю богоно́снаго отца́ Силве́стра, да бу́детъ ми́ предста́тель предъ непристу́пнымъ вели́чествомъ Сла́вы Твоея́.

Мона́шествующихъ богодухнове́нное удобре́ніе яви́лся еси́, преподо́бне, бра́тію сло́вомъ, со́лію растворе́ннымъ, и дѣ́лы благи́ми во благоче́стіи утвержда́я.

Глаго́лалъ еси́, о́тче Силве́стре, бра́тіи твое́й, я́ко а́ще стя́жеши по сме́рти дерзнове́ніе ко Го́споду, хода́тай бу́деши о оби́тели твое́й. Тѣ́мже, вѣне́цъ сла́вы пріи́мъ, моли́ся о недосто́йныхъ рабѣ́хъ твои́хъ.

Богоро́диченъ: Его́ же родила́ еси́ неизрече́нно, Сы́на и Бо́га, моли́ Дѣ́во Всесвята́я, сохрани́тися достоя́нію Твоему́ отъ бѣ́дъ маловѣ́рія и злы́хъ помысло́въ шата́нія.

Катава́сія по уста́ву.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

За́повѣдь твою́ блюсти́ повелѣва́я, преподо́бне, наказа́лъ еси́ за́повѣдь преступи́вшаго, но́, пріи́мъ сего́ покая́ніе, благосе́рдѣ исцѣли́лъ еси́ слѣпо́тствовавшаго.

Богоно́снаго Се́ргія благослове́ніе пріи́мъ, блаже́нне, взыска́лъ еси́ пусты́ни, и о́бразъ бы́лъ еси́ дво́ицѣ учени́къ его́, и́же, стопа́мъ твои́мъ послѣ́довавше, бли́зъ тебе́ водвори́шася и святолѣ́пныя оби́тели устро́иша.

Ско́рбію испо́лнилъ еси́ сердца́ бра́тіи, жи́знь вре́менную оставля́я, Силве́стре, ны́нѣ же ра́достію исполня́еши взира́ющихъ на нетлѣ́нныя мо́щи твоя́.

Богоро́диченъ: Милосе́рдія исто́чниче, Влады́чице Пресвята́я, бу́ди покро́въ всѣ́мъ, прибѣга́ющимъ къ Тебѣ́ съ вѣ́рою тве́рдою, наде́ждою несумнѣ́нною и любо́вію чи́стою.

Сѣда́ленъ, гла́съ 4:

Блаже́нства го́рняго взыску́я, вся́ кра́сная мíра сего́ оста́вилъ еси́, преподо́бне, ча́дъ твои́хъ духо́вныхъ наказу́я, я́ко вся́ мірска́я прехо́дятъ, еди́но же пребыва́етъ вы́ну сокро́вище благоче́стія. [Два́жды.]

Сла́ва, и ны́нѣ, богоро́диченъ:

На престо́лѣ со Отце́мъ и Святы́мъ Ду́хомъ вѣ́чно ца́рствующаго неискусому́жно родила́ еси́, Приснодѣ́во, Сы́на Бо́жія, тѣ́мъ Тя́, я́ко Богома́терь, пѣ́сньми немо́лчными ублажа́емъ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Си́ла Христо́ва въ тебѣ́ откры́ся, преподо́бне, бѣсо́въ бо изгоня́еши, слѣпы́мъ зрѣ́ніе, глухи́мъ слы́шаніе, немощству́ющимъ исцѣле́ніе подае́ши.

Ду́хомъ горя́, Го́сподеви рабо́тая и то́ки сле́зъ источа́я, мно́зи благоче́стія плоды́ въ пусты́ни Обно́рстѣй возрасти́лъ еси́, и́миже до дне́сь пита́ются къ ра́цѣ твое́й съ вѣ́рою притека́ющіи.

Труды́, бдѣ́ніе и сухояде́ніе изнури́ша тѣ́ло твое́, Силве́стре, оба́че свы́ше укрѣпле́нъ, Спа́са просла́вилъ еси́ взыва́я: сла́ва си́лѣ Твое́й, Го́споди.

Богоро́диченъ: Помози́, Пресвята́я Богоотрокови́це, Благовѣ́рному Импера́тору на́шему, да сотре́тъ си́лы сопроти́вныхъ, и ца́рство Его́ ненавѣ́тно отъ злы́хъ и ми́ра испо́лнь соблюди́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Очесы́ у́мными во вся́ дни́ живота́ твоего́ на Го́спода воскре́сшаго взира́яй, въ пусты́ни хра́мъ Воскресе́нія воздви́глъ еси́, въ не́мъ же святы́я мо́щи твоя́ почива́ющи, я́вственнѣ преднапису́ютъ ме́ртвеннаго тѣлесе́ на́шего во о́бразъ безсме́ртныя сла́вы облече́ніе.

Кня́зи и боля́ре я простцы́ прихожда́ху къ мѣ́сту селе́нія твоего́, Силве́стре, и отъ у́стъ твои́хъ глаго́лы наказа́нія духо́внаго въ сла́дость слу́шаху.

Прише́льцы иногда́, въ пусты́ню прише́дша, зра́къ тво́й, смире́нія и поще́нія испо́лнь, удиви́, и сего́ стяжа́лъ еси́, я́ко пе́рваго отъ учени́къ твои́хъ.

Богоро́диченъ: Пренепоро́чная Дѣ́во, моли́твами Твои́ми пода́ждь на́мъ изъ пусты́ни Силве́стра досточу́днаго цвѣ́ты добродѣ́телей благоуха́нныя вы́ну износи́ти.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Мо́ря жите́йскаго треволне́ній отбѣ́гъ, въ пусты́ню прите́клъ еси́, и ти́хое приста́нище обрѣты́й, въ Бо́зѣ еди́номъ живо́тъ тво́й полага́лъ еси́, преподо́бне.

Дѣви́цу иногда́, бѣ́сомъ лю́тѣ му́чиму, чу́днымъ явле́ніемъ твои́мъ исцѣли́лъ еси́, егда́ спя́щей бы́ліе травно́е по́далъ еси́. Тѣ́мъ чу́до узрѣ́вшіи восхвали́ша тя́, преподо́бне.

Обѣ́тъ изрече́ еди́нъ отъ вѣ́рныхъ ти́ хра́мъ созда́ти, идѣ́же мо́щи твоя́ святы́я почива́ху, его́же и созда́лъ е́сть. Тѣ́мже отъ бѣ́дъ и скорбе́й изба́вилъ еси́ его́, блаже́нне.

Богоро́диченъ: Въ хра́мъ тво́й, Влады́чице, сходя́щеся вопіе́мъ Ти́: Ты́ еси́ покро́въ мѣ́сту сему́ свято́му, идѣ́же Силве́стръ богоно́сный жи́тельствоваше. Спаси́ у́бо ны́, здѣ́ покланя́ющіяся Тебѣ́, и всѣ́мъ христіа́номъ бу́ди Помо́щница.

Конда́къ, гла́съ 6:

По́двигомъ до́брымъ подвиза́лся еси́, преподо́бне, и ду́шу твою́, я́ко же́ртву чи́сту и непоро́чну, Ду́ху Свято́му прине́слъ еси́, и по сме́рти твое́й ста́до твое́ духо́вное соблюда́еши, и въ болѣ́знехъ ско́ро посѣща́еши. Тѣ́мже мо́лимъ тя́, преблаже́нне, съ ли́ки преподо́бныхъ моли́ Христа́ Бо́га, да спасе́тъ Благовѣ́рнаго Импера́тора на́шего [и́мярекъ], и пода́стъ лю́демъ въ ми́рѣ глубо́цѣ устро́итися, да зове́мъ ти́: ра́дуйся, Силве́стре, и́нокомъ духо́вный па́стырю и наста́вниче.

Икосъ:

Иноковъ вои́стину началово́ждь яви́лся еси́, богому́дре Силве́стре, смире́нію бо Христо́ву послѣ́дуя, кре́стъ Его́ на ра́мена подъя́лъ еси́, и терпѣ́ніемъ, поще́ніемъ и моли́твою ста́ду твоему́ о́бразъ бы́лъ еси́. Тѣ́мже и бра́тія, я́ко отца́ и наста́вника тя́ почита́юще, зря́ще тя́ ко Го́споду отходя́ща, ско́рбію исполня́хуся; и́мже вѣща́лъ еси́ глаго́лы утѣше́нія: потерпи́те, — глаго́ля, — ма́ло въ ны́нѣшнемъ вѣ́цѣ, бра́тія возлю́бленная, и вѣнцы́ пріи́мете отъ Христа́ Бо́га и Спа́са ду́шъ на́шихъ. Его́же моли́, преподо́бне, ми́ръ мíрови дарова́ти и душа́мъ на́шимъ ве́лію ми́лость.

Пѣ́снь 7.

Ирмо́съ: Росода́тельну у́бо пе́щь содѣ́ла Ангелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Изря́денъ подвигополо́жникъ бы́лъ еси́, преподо́бне, во́ду на ра́менахъ твои́хъ нося́, и бы́ліе еди́ное вкуша́я. Тѣ́мъ просла́ви тя́ благослове́нный Бо́гъ оте́цъ на́шихъ.

Не отхожда́ху лю́діе отъ ке́лліи твоея́, преподо́бне, словесе́мъ твои́мъ духоно́снымъ внима́юще, и восхваля́юще Го́спода, взыва́ху: благослове́нъ Бо́гъ тво́й и Бо́гъ оте́цъ на́шихъ.

Чудесы́ мно́гими просла́ви тя́ Христо́съ Бо́гъ на́шъ, и́миже удивля́еми лю́діе всего́ ца́рствія Россíйскаго, восклица́ютъ: благослове́нъ Бо́гъ оте́цъ на́шихъ.

Богоро́диченъ: Та́йну хра́мовъ, здѣ́ красу́ющихся, уразумѣ́имъ, вѣ́рніи, и возглаго́лемъ: покры́й на́съ, Богома́ти, честны́мъ Твои́мъ покро́вомъ, и помози́ моли́твами твои́ми, блаже́нне Силве́стре, да дости́гнемъ сла́внаго изъ ме́ртвыхъ воскресе́нія и срѣ́тенія Госпо́дня на возду́сѣ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Святы́я Це́ркве не отлуча́йтеся, — глаго́лалъ еси́ бра́тіи твое́й, преподо́бне, наказу́я, я́ко да во хра́мѣ воспѣва́ютъ вѣ́рніи Го́спода и превозно́сятъ Его́ во вѣ́ки.

Отроцы блаже́нніи во огни́, я́ко зла́то въ горни́лѣ, искуша́еми, Го́спода воспѣва́ху; си́це Силве́стръ богому́дрый, огне́мъ терпѣ́нія искуша́емь и очища́емь, взыва́ше: Го́спода по́йте и превозноси́те во вся́ вѣ́ки.

Богоро́диченъ: Проле́й мольбы́ къ Сы́ну Твоему́, неизрече́нно милосе́рдому, да спасе́тъ ны́ отъ вся́каго зла́го обстоя́нія, Приснодѣ́во Богоблагода́тная.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Незри́мый лю́демъ въ пусты́ни пребыва́лъ еси́, съ Бо́гомъ неви́димымъ духо́внѣ бесѣ́дуя, Силве́стре блаже́нне, тѣ́мъ и ангелоподо́бенъ бы́лъ еси́; сего́ ра́ди тя́ ублажа́емъ.

Сла́вы оть человѣ́къ не ища́, отъ человѣ́къ сокрове́нъ бы́лъ еси́, сокрове́ннѣ въ Бо́зѣ пребыва́я, но, я́ко сла́вою Бо́жіею просла́вленна, тя́ ублажа́емъ.

Благосе́рдно пріими́, богому́дре Силве́стре, пѣ́сни сія́, во сла́ву и́мене твоего́ сложе́нныя, и помоли́ся о мнѣ́, грѣ́шнемъ рабѣ́ твое́мъ.

Богоро́диченъ: Богоро́дице Дѣ́во, упова́ніе христіа́номъ, бу́ди стѣна́ крѣ́пкая и огражде́ніе всѣ́мъ вѣ́рующимъ, да Тя́, я́ко Ма́терь Бо́га Сло́ва Премилосе́рдую, велича́емъ.

Свѣти́ленъ:

Въ черто́гъ Го́спода сла́вы возше́дъ и оде́жду имы́й убѣле́нну свѣ́томъ добродѣ́телей, моли́ Христа́ Бо́га, преподо́бне, да да́руетъ всѣ́мъ правосла́внымъ въ вѣ́рѣ сконча́ти живо́тъ сво́й и облещи́ся въ оде́жду нетлѣ́нія. [Два́жды.]

Богоро́диченъ: Ри́зу пода́ждь на́мъ свѣ́тлу, Богома́ти, зла́томъ благи́хъ дѣ́лъ преиспещре́нну, да прославля́емъ вы́ну Твое́ благоутро́біе.

На хвали́техъ стихи́ры на 4, гла́съ 8:

Пріиди́те, лю́діе,* ублажи́мъ Силве́стра досточу́днаго,* въ де́брехъ пусты́нныхъ а́нгельски жи́тельствовавша* и лѣ́ствицею добродѣ́телей небесе́ дости́гша,* и со слеза́ми возопіи́мъ ему́, глаго́люще:* моли́ Бо́га о на́съ, преподо́бне о́тче на́шъ.

Ру́бищемъ иногда́ облече́нъ бы́лъ еси́, преподо́бне,* ны́нѣ же оде́ждою сла́вы боготка́нною укра́шенъ еси́:* гла́домъ иногда́ пло́ть твою́ изможда́лъ еси́,* ны́нѣ же хлѣ́ба живо́тнаго насыща́ешися.* Тѣ́мъ, престо́лу Сла́вы предстоя́,* помяни́ на́съ, грѣ́шныхъ, преподо́бне,* и моли́ спасти́ся всѣ́мъ на́мъ.

Якоже исходи́лъ еси́ иногда́ изъ пусты́ни къ лю́демъ,* приходя́щимъ къ тебѣ́, преподо́бне,* и любо́внѣ къ ни́мъ бесѣ́довалъ еси́,* сло́во спасе́нія возвѣща́я,* си́це и на́съ не отжени́,* усе́рдно притека́ющихъ къ ра́цѣ моще́й твои́хъ,* и уще́дри на́съ, моля́щихся тебѣ́.

До́мъ Ду́ха Свята́го вои́стину показа́лся еси́,* о́тче Силве́стре,* мо́щи бо твоя́ источа́ютъ чуде́съ мно́жество,* и вси́, те́плѣ вѣ́рующіи, исцѣле́ніе безме́здное улуча́ютъ.* Мо́лимъ у́бо тя́, блаже́нне,* дарова́ти здра́віе тѣлесе́мъ и душа́мъ на́шимъ.

Сла́ва, гла́съ 6:

Что́ возда́мы, преподо́бне, за ми́лости твоя́ неизрече́нныя? Яко на прося́щихъ по́мощи твоея́ призира́еши, и прибѣга́ющимъ къ тебѣ́ съ вѣ́рою засту́пникъ те́плый явля́ешися. Пріими́ же́ртву моле́ній на́шихъ и вознеси́ ю́ къ престо́лу Всевы́шняго, идѣ́же водворя́ешися, моля́ о душа́хъ на́шихъ.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы, поми́ловати ду́ши на́ша.

Славосло́віе вели́кое и отпу́стъ.



НА ЛИТУРГІИ,

Блаже́нна отъ кано́на, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.


МОЛИТВА
преподо́бному отцу́ на́шему Силве́стру, игу́мену Обно́рскому, чудотво́рцу.

О, честна́я главо́! Ду́ха Свята́го обита́лище и а́нгеловъ собесѣ́дниче, преблаже́нне о́тче Силве́стре! Житіе́мъ богоуго́днымъ вѣне́цъ сла́вы небе́сныя стяжа́вый и у Го́спода дерзнове́ніе ве́ліе имы́й, моли́ся о рабѣ́хъ твои́хъ, съ вѣ́рою твоея́ по́мощи тре́бующихъ и съ упова́ніемъ на милосе́рдіе твое́ къ тебѣ́ прибѣга́ющихъ. Испроси́ у Го́спода Человѣколю́бца всѣ́мъ лю́демъ, коему́ждо для́ блага́го жи́тельствованія и спасе́нія потре́бная: Це́ркви — ми́ръ и тишину́, Благочести́вому Импера́тору на́шему — на враги́ побѣ́ду и одолѣ́ніе, неду́жнымъ — исцѣле́ніе, си́рымъ — вспоможе́ніе, немощству́ющимъ вѣ́рою — въ вѣ́рѣ утвержде́ніе, ю́нымъ — въ благоче́стіи воспита́ніе, всѣ́мъ лю́демъ — безмяте́жіе и отъ всѣ́хъ бѣ́дъ и скорбе́й избавле́ніе, воззыва́емымъ отъ жи́зни сея́ вре́менныя — свято́е напу́тствіе, преста́вльшимся — блаже́нное въ Го́сподѣ упокое́ніе. Услы́ши, богоно́сне, усе́рдное моле́ніе грѣ́шныхъ и недосто́йныхъ ра́бъ твои́хъ, и ми́лости твоя́ бога́тыя изле́й на ны́, да щедро́тами твои́ми обогаща́еми, сла́вимъ всечестно́е и великолѣ́пное и́мя Отца́ и Сы́на и Свята́го Ду́ха, ны́нѣ и при́сно и во вѣ́ки вѣко́въ. Ами́нь.

Источникъ: Служба Преподобному Отцу нашему Силвестру, Игумену Обнорскому, Чудотворцу, егоже память мѣсяца Априллія въ 25-й день. // «Богословскій Вѣстникъ», издаваемый Императорскою Московскою Духовною Академіею. — Сергіевъ Посадъ: Типографія Св.-Тр. Сергіевой Лавры, 1916. — Томъ IV. Октябрь-Ноябрь-Декабрь. Къ сто первой годовщинѣ Императорской Московской Духовной Академіи 1814–1915. — С. 554-562.

/ Къ оглавленію раздѣла /


Наверхъ / Къ титульной страницѣ

0