Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 25-й де́нь.
Свята́го апо́стола и евангели́ста Ма́рка.

[ВЕЧЕРЪ,]
На Го́споди воззва́хъ: стихи́ры пра́здника 3 и свят́го 3, гла́съ 1. Подо́бенъ: Небе́сныхъ чино́въ.

Спутеше́ственникъ бы́лъ еси́ сосу́да избра́ннаго* и съ ни́мъ проше́лъ еси́ всю́ Македо́нію;* въ Ри́мѣ же учени́къ бы́въ Петру́,* сла́докъ сказа́тель показа́лся еси́* и почи́лъ еси́, пострада́въ боголѣ́пно, во Еги́птѣ,* Ма́рко, дру́же Христо́въ.

Изсо́хшія и оляденѣ́вшія ду́ши оживи́лъ еси́* свѣ́тлыми кропле́ніи Ева́нгелія.* Тѣ́мже твою́, боже́ственный Ма́рко,* свѣ́тло съ на́ми Александрíя дне́сь* торжеству́етъ па́мять и восхваля́етъ,* покланя́ющися твои́мъ моще́мъ.

Сла́ва, гла́съ 6:

Излія́ся благода́ть во устна́хъ твои́хъ, Ма́рко апо́столе, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу Единосу́щную, во Еди́номъ Божествѣ́.

И ны́нѣ, пра́здника.

На стихо́внѣ стихи́ры, гла́съ 1. Подо́бенъ: Всехва́льніи му́ченицы.

О, Ма́рко богому́дре,* прему́драго кни́жника тро́сть* и скоропи́сца бы́лъ еси́,* Христо́во воплоще́ніе богодохнове́ннѣ напису́яй* и я́сно вѣща́яй жи́зни безконе́чныя глаго́лы,* въ не́йже моли́ся* написа́тися пою́щимъ тя́* и чту́щимъ сла́вную па́мять твою́.

Сти́хъ: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ.

О, Ма́рко всехва́льне,* Христа́ благовѣству́яй,* вселе́нную проте́клъ еси́,* я́коже со́лнце,* погубля́яй всю́ заря́ми вѣ́ры* многобо́жія тму́.* И ны́нѣ моли́ся* дарова́ти душа́мъ на́шимъ ми́ръ* и ве́лію ми́лость.

Сти́хъ: Небеса́ повѣ́даютъ сла́ву Бо́жію,* творе́ніе же руку́ Его́ возвѣща́етъ тве́рдь.

О, Ма́рко апо́столе,* въ ни́хже пре́жде умно́жися злоче́стія безу́міе,* ты́ проповѣ́далъ еси́,* еги́петскую тму́* просвѣще́ніемъ слове́съ твои́хъ отгоня́я,* богопроповѣ́дниче пребога́те.* И ны́нѣ моли́ся* дарова́ти душа́мъ на́шимъ ми́ръ* и ве́лію ми́лость.

Сла́ва, гла́съ 8:

Пріиди́те, небе́снаго та́инства проповѣ́дника и служи́теля Ева́нгелія, псалмы́ и пѣ́сньми Ма́рка вси́ восхва́лимъ: се́й бо рѣка́ показа́ся мы́сленнаго рая́, душе́вныя бразды́ небе́сными ту́чами напая́я и плодоно́сны показу́я Христу́ Бо́гу, подаю́щему всѣ́мъ моли́твами его́ очище́ніе, и просвѣще́ніе, и ве́лію ми́лость.

И ны́нѣ, пра́здника.

Тропа́рь, гла́съ 3:

Апо́столе святы́й и Евангели́сте Ма́рко, моли́ Ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Инъ тропа́рь, гла́съ то́йже:

У верхо́внаго Петра́ научи́вся, апо́столъ Христо́въ бы́лъ еси́ и, я́ко со́лнце, страна́мъ возсія́лъ еси́, Александрíомъ удобре́ніе бы́въ, блаже́нне: тобо́ю Еги́петъ отъ пре́лести свободи́ся, ева́нгельскимъ твои́мъ уче́ніемъ просвѣ́щь вся́, я́ко свѣ́тъ, сто́лпъ церко́вный. Сего́ ра́ди твою́ па́мять чту́ще, свѣ́тло пра́зднуемъ, Ма́рко богогла́се, моли́ тобо́ю благовѣсти́маго Бо́га да согрѣше́ній оставле́ніе пода́стъ душа́мъ на́шимъ.


НА УТРЕНИ,
По 1-й каѳи́смѣ сѣда́ленъ пра́здника, два́жды.

По 2-й каѳи́смѣ сѣда́ленъ, гла́съ 1. Подо́бенъ: Гро́бъ Тво́й.

Яко у́тро, благолѣ́пно возсія́лъ еси́ мíру, тму́ глубо́кую пре́лести вѣ́рою отгна́лъ еси́, апо́столе, и ду́ши просвѣти́лъ еси́; тѣ́мже вся́ свѣтоза́рнѣ Це́рковь пое́тъ дне́сь свѣтоно́сную твою́ па́мять, Христа́ велича́ющи.

Сла́ва, гла́съ 4. Подо́бенъ: Вознесы́йся.

Научи́вся отъ Исто́чника жи́зни прему́дрости, умудри́лъ еси́ пре́жде неразу́міемъ служа́щія умовре́днѣ истука́ннымъ, прему́дре. Тѣ́мже ублажа́ешися во вѣ́къ вѣ́ка, престо́лу предстоя́ Святы́я Тро́ицы и прилѣ́жно моля́ся обрѣсти́ прегрѣше́ній разрѣше́ніе, Ма́рко апо́столе.

И ны́нѣ, пра́здника.

Кано́нъ пра́здника со ирмосо́мъ на 6 и свята́го на 6, гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Ма́рка богови́дца восхваля́я, призыва́ю благода́ть Ду́ха: я́ко да вдохну́въ ми́ свѣ́тло, отжене́тъ невѣ́дѣніе и боже́ственное бога́тство прему́дрости да́руетъ.

Твоего́ богогла́снаго свѣ́томъ просвѣти́въ, Спа́се, благода́тнымъ, въ мíръ посла́лъ еси́, Сло́ве Бо́жій, благи́хъ я́ко вино́вный, Твое́ прише́ствіе на́мъ благовѣству́юща.

Петру́ прему́дрому учени́къ бы́въ и того́ обогати́вся сыновство́мъ, Ма́рко всесла́вне, таи́нникъ показа́лся еси́ та́инъ Бо́жіихъ и снаслѣ́дникъ сла́вы его́ бы́лъ еси́.

Богоро́диченъ: Иже еги́птяны во глубинѣ́ потопи́въ о́блакомъ Ду́ха, Се́й пріи́де отъ Тебе́, Чи́стыя, еги́птяномъ по́слѣжде и Ма́ркомъ тѣ́хъ отъ пре́лести измѣни́.

Катава́сія: Воскресе́нія де́нь...

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Тя, ѵпоста́сную, Христе́, Прему́дрость проповѣ́да, луча́ми Твои́ми озаря́емь, всему́ мíру я́вльшуюся, Влады́ко, и жи́знь даю́щую, и человѣ́ки просвѣща́ющу, уго́дникъ Тво́й сла́вный Ма́рко, Человѣколю́бче.

Струю́ пріе́мъ, Христе́, прему́дрости приснотеку́щую, я́ко рѣка́, шумя́щи, земны́я напои́ богоразу́мія свѣ́томъ концы́, явля́я Твое́ су́ще и́стинно прорече́ніе, самови́децъ Тво́й Ма́рко, Человѣколю́бче.

Петру́ послѣ́дуя, му́дре, я́вѣ, Ева́нгеліе я́ко учени́къ его́ вообрази́лъ еси́, богосло́вія свѣ́тъ пріе́мъ отъ него́, апо́столе, и Бо́жіе плотско́е прише́ствіе возвѣсти́въ я́сно.

Богоро́диченъ: Еги́пта пе́рвѣе, дѣви́ческими рука́ми носи́мый, де́монская тре́бища Ты́ потря́слъ еси́ и сему́ па́ки Ма́рка посла́лъ еси́ вразуми́ти всѣ́мъ Твое́ вочеловѣ́ченіе и боже́ственную, Христе́, Твою́ та́йну.

Конда́къ и и́косъ пра́здника.
Сѣда́ленъ, апо́стола, гла́съ 1. Подо́бенъ: Гро́бъ Тво́й.

На высоту́ возше́дъ добродѣ́телей боже́ственный Ма́рко, возгремѣ́лъ еси́ на́мъ спаси́тельныхъ догма́тъ вели́кія та́йны, боже́ственный проповѣ́дникъ бы́въ. Тѣ́мже вѣ́рою тя́ мо́лимъ, преблаже́нне, вся́кія ско́рби, согрѣше́ній и бѣ́дъ на́съ свободи́.

Сла́ва, гла́съ 8. Подо́бенъ: Прему́дрости.

Идольскую горды́ню низложи́въ, Спа́совы стра́сти жела́я, Ма́рко апо́столе, яви́лся еси́ мíру съ небесе́, всѣ́мъ источа́я чудеса́, и язы́комъ бы́лъ еси́, преблаже́нне, учи́тель. Тѣ́мже твою́ па́мять по досто́инству почита́емъ, въ пѣ́снехъ сла́вяще и вѣ́рно велича́юще: богогла́се пребога́те, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

И ны́нѣ, пра́здника, или́ богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́я Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихтися, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти, воспѣва́ющимъ досто́йно сла́ву Твою́.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Во всю́ зе́млю вѣща́ніе твое́ изы́де, и въ концы́, прему́дре, вселе́нныя твои́хъ я́сно глаго́лъ си́ла, дави́дски свѣ́тло проповѣ́дающи спасе́ніе на́ше и обновле́ніе.

Яви́ся, Спа́се, я́ко мо́лнія, апо́столъ вселе́ннѣй прему́дрый, и́стины ра́дость благовѣству́я, богосія́ніемъ свѣтоли́тія просвѣща́емь во спасе́ніе на́ше и обновле́ніе.

Но́зѣ твои́ проро́чески украси́шася, и́бо па́че сло́ва на́мъ благовѣсти́лъ еси́ проявле́нно ми́ръ, богопрія́тне, пло́тію Явльшагося конце́мъ во спасе́ніе на́ше и обновле́ніе.

Богоро́диченъ: На о́блацѣ Сло́во дѣви́честѣмъ сѣ́де, еги́петскія совѣ́ты и богобо́рныя мы́сли, обуи́въ, разори́, уче́ніи боже́ственнаго Ма́рка, я́ко Милосе́рдъ, во спасе́ніе на́ше и обновле́ніе.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Иска́палъ еси́ сла́дость благоче́стія слове́съ твои́хъ боже́ственныхъ ту́чу, всю́ду луча́ми осіява́емь, я́влься благода́тію я́вѣ мы́сленнаго Со́лнца, Ма́рко всеблаже́нне богопрія́тне.

Изъ до́му Госпо́дня исто́чникъ изше́лъ еси́ и напоя́еши оляденѣ́вшая сердца́ струя́ми бога́тно духо́вными, пло́дъ вмѣ́сто непло́дствія приноси́ти уча́, апо́столе.

Ты́ Петра́ вели́каго сы́нъ бы́лъ еси́ и, сего́ уче́ньми просвѣща́емь всегда́, ду́ши просвѣти́лъ еси́ къ тебѣ́ те́плѣ присту́пльшихъ, блаже́нне, богови́дче апо́столе.

Богоро́диченъ: Яко Человѣ́къ отъ Дѣ́вы ро́ждься, еги́птяномъ, Христе́, посла́лся еси́, отъ Отца́ возсія́въ пре́жде всея́ тва́ри, и́мже Ма́рка пома́залъ еси́, Му́дре, тѣ́хъ науча́юща богоразу́мія та́инствомъ.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Низложи́лъ еси́ бро́вь беззако́нныхъ, Го́споди, и досажде́ніе го́рдое смири́лъ еси́, апо́стола Твоего́ показа́въ побѣдоно́сца си́лою Твое́ю, Ты́ бо крѣ́пость немощству́ющихъ и исправле́ніе.

Вѣне́цъ наде́жды, сла́вне, и́мже ны́нѣ вѣнча́емся, словесы́ твои́ми проповѣ́далъ еси́, му́дре Ма́рко, Зижди́теля тва́ри, Иже въ на́шу сла́ву исплете́нъ естество́мъ пло́ти.

Пе́тръ тя́ верхо́вный, сла́вне, я́вѣ та́йно научи́ Ева́нгеліе списа́ти честно́е, показа́въ служи́теля тя́ Боже́ственныя благода́ти, ты́ бо на́мъ богоразу́мія свѣ́тъ просте́рлъ еси́.

Богоро́диченъ: Еги́пта, и́же пе́рвѣе во тмѣ́ су́ща, Го́споди, Дѣ́вою Богома́терію просвѣти́лъ еси́, я́ко Младе́нецъ проше́дъ, того́ обличи́лъ еси́ су́етство уче́ніи богогла́снаго Ма́рка, Человѣколю́бче.

Конда́къ, гла́съ 2. Подо́бенъ: Вы́шнихъ ища́.

Съ высоты́ пріи́мъ благода́ть Ду́ха, ри́торская плете́нія разруши́лъ еси́, апо́столе, и, язы́ки вся́ улови́въ, Ма́рко всесла́вне, твоему́ Влады́цѣ приве́лъ еси́, Боже́ственное проповѣ́давъ Ева́нгеліе.

Икосъ:

Верхо́внаго апо́стола учени́къ бы́въ, съ ни́мъ Христа́, Сы́на Бо́жія, проповѣ́далъ еси́, на ка́мени и́стины утверди́въ ле́стію коле́блющіяся. На не́мже и мене́ утверди́въ, души́ моея́ испра́ви стопы́, я́ко да вра́жіихъ сѣ́тей изба́влься, непреткнове́нно сла́влю тя́: ты́ бо всѣ́хъ просвѣти́лъ еси́, Ма́рко му́дре, Боже́ственное проповѣ́давъ Ева́нгеліе.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Боже́ственными блиста́ніи освѣща́емь, возломле́ніемъ та́йно возпосыла́еши зареви́дныя лучи́, Ма́рко преблаже́нне: Сло́во бо проповѣ́далъ еси́ воплоща́емое, безлѣ́тное, хва́льнаго отце́въ Бо́га и препросла́вленнаго.

Богодѣ́льными, Вседѣ́телю, си́лами богогла́снаго ученика́ вооружи́въ, чудодѣ́йственника сего́ соверши́лъ еси́: неду́ги бо отгна́ и я́зи исцѣли́лъ е́сть, прехва́льнаго Тя́ проповѣ́дуя Бо́га и препросла́вленнаго.

Учени́ческаго ли́ка старѣ́йшаго учи́теля имѣ́я, боже́ственнаго Петра́, подо́бенъ сему́ яви́лся, все́ бо испра́вилъ еси́ церко́вное исполне́ніе прехва́льнаго отце́въ Бо́га и препросла́вленнаго.

Богоро́диченъ: Сто́лпъ са́мъ во Еги́птѣ поста́вилъ еси́, Ева́нгелія твоего́ писа́ніе Ро́ждшемуся безъ сѣ́мене отъ Богома́тере, рече́ніемъ послѣ́дуя Иса́іи, пресла́вне, прехва́льнаго возвѣща́я Бо́га и препросла́вленнаго.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Ро́ждшееся Сло́во отъ Отца́ пре́жде всѣ́хъ вѣ́къ, въ естество́ человѣ́ческое обле́кшася Христа́, проповѣ́далъ еси́, сла́вне, и вопія́лъ: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Да́вшаго избавле́ніе себе́ за на́ше согрѣше́ніе и стра́сть па́дшихъ, воздви́гшаго Христа́ просла́вилъ еси́, сла́вне, вопія́: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Петро́ву Ма́рко повину́яся прему́дрому учи́тельству, прему́дрѣ писа́ніи вообрази́лъ еси́ вѣ́рнымъ честно́е Ева́нгеліе, вопію́щимъ: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Богоро́диченъ: Дѣ́ва, Емману́ила нося́щи я́ко Младе́нца, предста́ еги́птяномъ, и́мже, я́ко свѣ́тлая звѣзда́, Ма́рко посыла́ется, взыва́я: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Дости́гъ исто́чника неизрече́нна, трисо́лнечнаго, богоявле́нне, сія́нія, чистѣ́йша наслажда́ешися и яснѣ́йша обоже́нія, е́же па́че ума́, со а́нгелы лику́я непреста́нно, преблаже́нне.

Петро́ва о́бщникъ бы́въ уче́нія и боже́ственнаго проповѣ́данія, въ небе́сныхъ живе́ши селе́ніихъ, съ ни́мже, богоглаго́ливе преблаже́нне, и мо́лишися о на́съ, Ма́рко апо́столе.

Свѣ́тъ, трисія́нно совокупля́емь, еди́нственно же па́ки стра́нно устроя́емь, проповѣ́далъ еси́ благоче́стно, досточу́дне, просвѣща́емь заре́ю благода́ти. Тѣ́мже тя́ мо́лимъ: о на́съ при́сно моли́ся.

Богоро́диченъ: Ма́ркъ, честны́й апо́столъ, еги́птяномъ святи́тель дарова́ся; къ ни́мже, я́ко Младе́нецъ вопло́щся, пріи́де, отъ Дѣ́вы Чи́стыя Богома́тере, Госпо́дь сла́вы, Его́же досто́йно велича́емъ.

Свѣти́ленъ. Подо́бенъ: Жены́, услы́шите.

Прему́дрости небе́сныя научи́вся, апо́столе, плете́нія витíйская и чи́сла звѣздосло́вцевъ разори́лъ еси́ язы́комъ твои́мъ, о Ма́рко пресла́вне! и, учени́къ бы́въ Петро́въ, мíру проповѣ́далъ еси́ Ева́нгельская словеса́. [Два́жды.]

Сла́ва, и ны́нѣ, пра́здника.

На хвали́техъ стихи́ры, пра́здника 3 и апо́стола 3, гла́съ 1. Подо́бенъ: Всехва́льніи му́ченицы.

Ма́рко всеблаже́нне,* отъ сла́достнаго пото́ка пи́лъ еси́,* я́ко изъ Еде́ма устреми́вшаяся* пресвѣ́тло чи́стая рѣка́ ми́ра,* облива́яй вода́ми* ева́нгельскія твоея́ про́повѣди* земли́ лице́,* церко́вныя тве́рди напая́я* богодохнове́нными уче́ніи.

Ма́рко пресла́вне,* Моисе́й у́бо пре́жде* еги́птяны въ мо́ри потопи́,* но ты́, прему́дре,* отъ пре́лести тѣ́хъ* морскíя извле́клъ еси́* си́лою и́же къ тѣ́мъ съ пло́тію Прише́дшаго* и тѣ́хъ рукотворе́нная низложи́вша* мы́шцею высо́кою.

О, Ма́рко всесвяще́нне,* во свѣ́тѣ Ду́ха живы́й,* духо́венъ ве́сь бы́лъ еси́,* и ны́нѣ, всебога́те,* и́же ко Влады́цѣ неоску́дными зрѣ́ніи* и блаже́ннѣйшими осія́ніи,* положе́ньми обожа́емь* та́инства глави́зну,* и кончи́ну обрѣ́лъ еси́ многовожделѣ́нну.

Сла́ва, гла́съ 6. Самогла́сенъ:

Прему́дрый ло́вче, святы́й учениче́, дѣ́лателю Спа́совъ и сказа́телю Того́ страсте́й, и́же тва́рь вѣ́рою обте́къ, и прельще́нныя язы́ки собра́въ, и Бо́гу приве́дъ, я́ко кади́ло до́брое, на небеса́ возведе́ся. Тѣ́мже, предстоя́ Судіи́, моли́ изба́витися на́мъ отъ беззако́ній на́шихъ и въ де́нь Су́дный изба́витися муче́нія.

И ны́нѣ, пра́здника.
Славосло́віе вели́кое и отпу́стъ.



НА ЛИТУРГІИ,

Блаже́нна отъ кано́на пра́здника, пѣ́снь рядова́я и свята́го пѣ́снь 3-я. Проки́менъ, гла́съ 8: Во всю́ зе́млю [изы́де вѣща́ніе и́хъ* и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ, зача́ло 63. Аллилу́ія, гласъ 1: Исповѣ́дятъ небеса́ чудеса́ Твоя́, [Го́споди, и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе Ма́рка, зача́ло 23. Прича́стенъ: Во всю́ зе́млю [изы́де вѣща́ніе и́хъ и въ концы́ вселе́нныя глаго́лы и́хъ].

Источникъ: Минíа, мѣ́сяцъ Окто́врій. — М.: Въ до́мѣ Патрíаршемъ, 1689. — Л. 144 – 150.

/ Къ оглавленію раздѣла /


Наверхъ / Къ титульной страницѣ

0