Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 24-й де́нь.
Свята́го му́ченика Са́ввы Стратила́та.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Воево́да непобѣди́мый,* страда́лецъ хра́брый* и свѣти́льникъ всемíрный бы́лъ еси́,* восто́ки по́двигъ твои́хъ просвѣща́я концы́* и отгоня́ мра́къ де́монскій тя́жкій,* Са́вво вели́кій,* удобре́ніе му́чениковъ,* сограждани́не святы́хъ безпло́тныхъ* и моли́твенниче о душа́хъ на́шихъ.

И въ темни́цахъ затворя́емь,* и огне́мъ сожига́емь,* и мно́гими му́ками томи́мь,* и на дре́вѣ растяга́емь,* и зимо́ю оскорбля́емь,* и ра́нами ча́стыми непреста́нно біе́мь,* и въ вода́хъ блаже́нный коне́цъ,* страстоте́рпче, пріе́мля усе́рдно,* непоколеби́мь пребы́лъ еси́.

Красе́нъ ты́ бы́лъ еси́* ю́ноша, пребога́те,* отъ всѣ́хъ всегда́ удивля́емь,* и отлучи́лся еси́ ко трудо́мъ* страда́ній небоя́зненно,* на вся́ враги́ воздви́глъ еси́ побѣ́ды* вели́кими святы́ми твои́ми по́двиги.* Сего́ ра́ди во хвале́ніи тя́ чти́мъ* ра́достно, досточу́дне.

Сла́ва, и ны́нѣ, богоро́диченъ:

Ту́чами Ду́ха Пресвята́го, Пречи́стая,* мою́ мы́сль ороси́,* Яже ка́плю ро́ждшая, Христа́,* неисче́тно безмѣ́рная беззако́нія человѣ́ковъ* щедро́тами измы́вшую;* изсуши́ исто́чникъ страсте́й мои́хъ* и пото́ка мя́ сподо́би пи́щи живы́я при́сно* моли́твами Твои́ми.

Крестобогоро́диченъ:

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь, гла́съ 4:

Му́ченикъ Тво́й, Го́споди, [Са́вва во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша].

Или се́й, гла́съ 5:

Земна́го са́на по́ясъ оста́вивъ и по́чести, страда́льче, предъ мучи́телемъ, льсти́вымъ царе́мъ, Христа́, Бо́га су́ща, исповѣ́далъ еси́ и Того́ ра́ди мно́га страда́нія подъя́лъ еси́, сла́вне. Тѣ́мъ прекра́снымъ побѣ́ды вѣнце́мъ увя́злся еси́ отъ Царя́ всѣ́хъ ца́рствующаго, съ небе́сными во́и свѣ́тло преукра́шенъ. Предстоя́ Тому́, Са́вво, моли́, да спасе́тъ ду́ши на́ша.


[НА УТРЕНИ,]
Кано́нъ, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Ты́ на́ше, Го́споди, отъ а́довыхъ вра́тъ естество́ изба́вль, того́ затвори́лъ еси́ въ темни́цахъ вѣ́чныхъ и, сме́рть умертви́въ, жи́знь источи́лъ еси́.

Иже на земли́, сла́вне, во́инство оста́вль, небе́снымъ чино́мъ и во́инствомъ труды́ боже́ственными сла́вно приче́лся еси́, Са́вво, сла́вя Христа́.

Си́лою, му́дре, свы́ше одѣ́янъ на враги́, неподви́жимь и непобѣди́мь яви́лся еси́, си́хъ побѣжда́я до́блественно бра́нь, пресла́вне.

Присносія́ненъ озари́лся еси́ въ преле́стнѣй но́щи свѣти́льникъ, Христа́ Со́лнца проповѣ́дуя всѣ́мъ пра́ведно и отгоня́ тму́ безбо́жія.

Богоро́диченъ: Отъ земли́ преиспо́днія на́съ исхи́ти изъ Тебе́ роди́выйся Сы́нъ Бо́жій, я́ко милосе́рдъ, Свои́мъ воскресе́ніемъ къ жи́зни вѣ́чнѣй, при́сно пою́щія Тя́.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Си́лу Христо́съ борца́ и держа́ву низло́жъ сме́рти, оживи́ естество́ на́ше Свои́мъ Воскресе́ніемъ и укрѣпи́.

Те́плая, прему́дре, Христо́ва любы́, тя́ боже́ственно разже́гши, земны́хъ и тлѣ́нныхъ всѣ́хъ отлучи́ и пре́лести супоста́та показа́.

Позна́въ Творца́, еди́наго Го́спода, да́вшаго Себе́ избавле́ніе человѣ́комъ, твою́ кро́вь да́лъ еси́ за Него́, Са́вво, бу́дущаго ра́ди воздая́нія.

Богоро́диченъ: Преста́ мучи́тельство сме́ртное, Пречи́стая, и а́дова сокро́вища упраздни́шася воста́ніемъ Ро́ждшагося изъ Тебе́, и жи́зни сокро́вища напо́лнишася.

Сѣда́ленъ, гла́съ 4. Подо́бенъ: Вознесы́йся.

Неподви́жимь я́влься воево́да, ва́рварскія ко́зни побѣди́лъ еси́ и, пострада́въ, сла́вне, крѣ́пко, полки́ пребори́лъ еси́ вра́гъ неви́димыхъ. Отону́дуже вѣнце́мъ увя́злся еси́ побѣ́днымъ, о на́съ моли́ прилѣ́жно, Са́вво преблаже́нне, вѣ́рою пою́щихъ тя́.

[Сла́ва, и ны́нѣ,] богоро́диченъ:

По Бо́зѣ во Тво́й, Богоро́дице, прибѣга́ю, смире́нный, покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу. Моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

Крестобогоро́диченъ:

Иже отъ Безнача́льнаго Отца́ рожде́ннаго напослѣ́докъ Тя́ пло́тію ро́ждшая, на Крестѣ́ ви́сяща, зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́, распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Ноже́мъ отсѣ́клъ еси́ и́стинныхъ глаго́лъ твои́хъ лжи́ сплете́нія до́блественнѣ, Са́вво пресла́вне.

Цвѣту́щая тѣлесе́ красота́ въ тебѣ́ и́стинно яви́, страстоте́рпче, души́ твоея́ боже́ственное благолѣ́піе.

Расту́щимъ, сла́вне, душе́внымъ му́жествомъ дре́вняго страда́ньми побѣди́лъ еси́ борца́.

Богоро́диченъ: Яко отъ звѣ́ря, человѣ́ка Тво́й Сы́нъ исхи́тивъ сме́ртна, къ животу́, Дѣ́во, сего́ преста́ви.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Ты́ погребе́ніемъ пло́ти борца́ на́шего погре́блъ еси́ и, я́ко Бо́гъ, истощи́въ а́да, воскреси́ ме́ртвыя Свои́мъ Воскресе́ніемъ, Христе́, Тя́ просла́вльшія.

Укра́шенѣ му́дрѣ тва́рей добро́тѣ, позна́лъ еси́ всѣ́хъ Влады́ку, тѣ́мже Его́ ра́ди, Са́вво, пострада́въ, вѣнце́въ сподо́бился еси́.

Та́йныхъ получи́въ дарова́ній Христо́выхъ, сла́вне, и Того́ незави́стнымъ сія́ніемъ боже́ственно уясни́вся, свѣти́льникъ показа́лся еси́ въ мíрѣ, сла́вне.

Богоро́диченъ: Исто́чникъ жи́зни, изъ Тебе́ вопло́щся, воскре́съ, источи́ земноро́дныхъ естество́, Богоро́дице, и сіе́ я́ко Бо́гъ безсме́ртія напои́ вода́ми.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Погуби́въ сме́ртію сме́рть, Иже на́съ ра́ди во́лею ме́ртвъ вмѣни́лся еси́, Христе́, ме́ртвыя оживи́лъ еси́ и сея́ у́зъ изба́вилъ еси́.

Окропи́вся Христа́ Боже́ственною кро́вію, и́дольскихъ тре́бъ оскверне́нія отступи́лъ еси́, Са́вво сла́вне, и свѣ́томъ одѣ́явся благода́ти.

Зимы́ пре́лести отбѣ́глъ еси́ и къ ти́хой веснѣ́ дости́глъ еси́ Христо́вымъ позна́ніемъ, и́мже и озари́лся еси́, пресла́вне.

Богоро́диченъ: Истлѣ́вшія ны́ прегрѣше́ньми, Сы́нъ Тво́й, Пречи́стая, Воскресе́ніемъ Свои́мъ обнови́, и онебеси́, и бо́ги содѣ́ла благода́тію.

Конда́къ, гла́съ 4. Подо́бенъ: Вознесы́йся.

Непобѣди́мый я́влься стратила́тъ, ва́рварскія ко́зни побѣди́лъ еси́ и, страда́льчествовавъ, сла́вне, твердѣ́йши, мно́жество враго́въ неви́димыхъ побори́лъ еси́, тѣ́мже вѣне́цъ испле́лъ еси́ побѣ́ды. О на́съ моли́ Христа́, Са́вво всеблаже́нне, вѣ́рою почита́ющихъ тя́.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Усну́въ Христо́съ во́лею я́ко ме́ртвъ, пло́тію во гро́бѣ, ме́ртвыя, и́же во а́дѣ спя́щія, отъ вѣ́ка возбуди́ и живоно́снымъ воста́ніемъ си́хъ воскреси́, пою́щія: благослове́нъ Бо́гъ оте́цъ на́шихъ.

Ору́жіе, му́дре, боже́ственныхъ слове́съ, я́ко но́жъ держа́въ, въ сердца́ си́хъ вонзи́лъ еси́ нече́ствующихъ, и уязви́лъ еси́ сопроти́вныхъ ло́жная беззако́нія, и взыва́лъ еси́: благослове́нъ Бо́гъ оте́цъ на́шихъ.

Запе́нъ бы́въ отъ вра́гъ, не поколеба́лъ еси́ души́, ни низложе́нъ бы́лъ еси́, Христа́ бо имѣ́я, назира́юща и укрѣпля́юща тя́ непоколеби́ма. Ему́же и взыва́лъ, Са́вво, и благода́рно воспѣва́лъ еси́: благослове́нъ Бо́гъ оте́цъ на́шихъ.

Ме́ртва врага́ подложи́ подъ но́ги твои́, страда́льче, я́коже коры́сть сего́ взя́лъ еси́ прельще́нныя и да́лъ еси́ си́хъ Влады́цѣ всѣ́хъ, позна́ніемъ зову́щія: благослове́нъ Бо́гъ оте́цъ на́шихъ.

Богоро́диченъ: Въ крѣ́пость держа́вную одѣ́явся, человѣ́ческое немощно́е естество́, Дѣ́во Пресла́вная, въ воста́ніи Рождества́ Твоего́, и, вооруже́но му́жески на сме́рть, сла́витъ Тя́, безсме́ртія и жи́зни Ма́терь Чи́стую.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Сме́рти обрѣта́теля, сме́ртію твое́ю плотско́ю уби́въ, Ще́дре, сего́ всѣ́мъ показа́лъ еси́ человѣ́комъ вѣ́чную сме́рть: Тя́ превозно́симъ, Животе́ и Нетлѣ́ніе.

Тимѣ́нія всего́ очи́щся безбо́жнаго и служе́нія и́дольскаго ба́нею, страстоте́рпче, креще́нія, Зижди́телю чи́стѣ приступи́лъ еси́, Са́вво, въ по́двизѣхъ терпя́ до́блественнѣ.

Медото́чнымъ сло́вомъ, му́дре, и взо́ромъ сла́дкимъ удивля́я мучи́теля, дѣ́лы побѣди́тельныя на ни́хъ поста́вилъ еси́ и взыва́лъ: Тя́ превозно́симъ, Го́спода, во вѣ́ки.

Богоро́диченъ: Живота́ моего́ Нача́льникъ, къ сме́рти пло́тію приступи́въ, умертви́ сію́. Оживи́, Дѣ́во, любо́вію пою́щія Тя́ и превознося́щія Того́ во вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Ты́, утро́бу а́дову расто́ргъ, Ще́дре, истощи́лъ еси́ того́, я́ко си́ленъ, и небе́сный оскудѣ́вшій напо́лнилъ еси́ мíръ, воздви́гъ и оживи́въ ме́ртвыя, и человѣ́ки вся́ возне́слъ еси́ разумѣ́ніемъ Твои́мъ.

Восте́къ на высоту́ у́мно, страстоте́рпче, боже́ственнаго позна́нія Христо́ва, пре́лесть, до́лу влеку́щую, оста́вилъ еси́ и крилы́ страда́нія къ Сему́ возне́слся еси́, прилѣ́жно велича́я и сла́вя Его́ я́ко Пребла́га.

Стрѣ́лы младе́нецъ вмѣня́я стрѣля́нія мучи́телей, си́лою отража́я тѣ́хъ Христо́вою, Са́вво пресла́вне, спобо́рника имѣ́лъ еси́ Того́ и помога́юща ти́ при́сно, Его́же вѣ́рою и любо́вію непреста́нно велича́лъ еси́.

Богоро́диченъ: Облиста́, Дѣ́во, Сы́нъ и Бо́гъ Тво́й, отъ гро́ба воста́въ, Боже́ственныя зари́ и сла́вы испо́лни вселе́нную и сія́ніемъ нетлѣ́нія и́же вѣ́рою свѣ́телъ Тя́ о́блакъ сла́вящія просвѣти́лъ е́сть.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 109 – 112 об.

/ Къ оглавленію раздѣла /


Наверхъ / Къ титульной страницѣ

0