Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 23-й де́нь.
Свята́го сла́внаго великому́ченика, и побѣдоно́сца, и чудотво́рца Гео́ргія.

Аще хра́мъ, или́ восхо́щетъ настоя́тель, твори́мъ бдѣ́ніе.

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.

Царю́ вѣко́въ ты́ во́инствовавъ, прему́дре,* ополче́нія вся́ беззако́нныхъ низложи́лъ еси́,* Гео́ргіе треблаже́нне,* тве́рдый страда́лецъ показа́лся еси́* благода́тію, отъ Бо́га тебѣ́ да́нною, чудотво́рче,* тѣ́мже моли́ спасти́ся на́мъ.

Струи́ исцѣле́ній подае́ши* къ тебѣ́ притека́ющимъ, Гео́ргіе треблаже́нне,* и ду́шъ и тѣле́съ помо́щникъ ты́ еси́,* вѣ́рою те́плою приходя́щихъ къ покро́ву твоему́,* досточу́дне му́чениче Іису́совъ,* страда́льцевъ украше́ніе.

Сла́ва, гла́съ то́йже. Самогла́сенъ:

Вели́каго Царя́ во́ине Гео́ргіе, ра́дуйся и весели́ся, Бо́гу бо благоугоди́лъ еси́, о всѣ́хъ неради́въ, живо́тъ вѣ́чный прія́лъ еси́ на небесѣ́хъ, тѣ́ло бо твое́ вся́къ неду́гъ отъ человѣ́къ отго́нитъ. Христо́съ бо, Его́же возлюби́лъ еси́, То́й тя́ прославля́етъ, блаже́нне.

И ны́нѣ, пра́здника.

На стихо́внѣ стихи́ры, гла́съ 4. Самогла́сны:

Вси́ язы́цы, восплещи́те рука́ми,* воскли́кните Бо́гу, мучениколю́бцы,* я́ко на дре́во вознесе́ся и, во гро́бъ соше́дъ,* а́да испрове́рже, и ме́ртвыя совоскреси́, вопію́щія Ему́:* аллилу́ія, аллилу́ія, аллилу́ія Христу́ воскре́сшему.

Сти́хъ: Пра́ведникъ, я́ко фи́никсъ, процвѣте́тъ,* [я́ко ке́дръ, и́же въ Лива́нѣ, умно́жится].

Пѣ́ніе пѣ́сней, ликовству́юще ку́пно,* принесе́мъ Христу́ Спа́су на́шему,* я́ко томи́теля врага́ до́блій страда́лецъ, побѣди́въ, низложи́.* Тѣ́мъ вси́ пое́мъ непреста́нными гла́сы:* аллилу́ія, аллилу́ія, аллилу́ія Христу́ воскре́сшему.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Красота́ му́ченикъ и сла́ва пра́ведныхъ* яви́лся еси́, вѣнцено́сче Гео́ргіе,* му́жествомъ бо смы́сла и му́дростію души́* вра́жіе безу́міе попра́въ на земли́, съ на́ми вопіе́ши:* аллилу́ія, аллилу́ія, аллилу́ія Христу́ Жизнода́вцу.

Сла́ва, гла́съ то́йже:

Пріиди́те, мучениколю́бцы, пѣ́сненное пѣ́ніе воста́вшему изъ гро́ба Христу́ принесе́мъ: дне́сь бо весна́ разу́мная возсія́ на́мъ, подаю́щи цвѣ́ты слове́сныя, всемíрная па́мять Гео́ргія, му́драго великому́ченика. Его́же досто́йно почита́юще, пріе́млемъ исцѣле́ній исто́чники, съ ни́миже и ны́нѣ того́ умо́лимъ моли́тися непреста́нно Спа́су Христу́ ми́ръ вселе́ннѣй дарова́ти и душа́мъ на́шимъ ве́лію ми́лость.

И ны́нѣ, пра́здника.

Тропа́рь, гла́съ 4:

По́двигомъ до́брымъ подвиза́лся еси́, страстоте́рпче Христо́въ, вѣ́рою и мучи́телей обличи́лъ еси́ нече́стіе, же́ртва же благопрія́тна Бо́гу прине́слся еси́. Тѣ́мже и вѣне́цъ прія́лъ еси́ побѣ́ды и моли́твами, свя́те, твои́ми всѣ́мъ подае́ши прегрѣше́ній проще́ніе.


НА ВЕЛИЦѢЙ ВЕЧЕРНИ,
Блаже́нъ му́жъ... На Го́споди воззва́хъ: поста́вимъ стихо́въ 8. Стихи́ры пра́здника 3 и свята́го 5. Гла́съ 4. Самоподо́бенъ:

Яко до́бля въ му́ченицѣхъ,* страстоте́рпче Гео́ргіе,* соше́дшеся дне́сь, восхва́лимъ тя́,* я́ко тече́ніе соверши́въ,* вѣ́ру соблю́лъ еси́* и прія́тъ отъ Бо́га побѣ́ды твоея́ вѣне́цъ.* Его́же моли́ отъ тли́ и бѣ́дъ изба́витися* вѣ́рою соверша́ющимъ* всечестну́ю па́мять твою́.

Подо́бны:

Тве́рдымъ мудрова́ніемъ упова́въ,* самохо́тнѣ дерзну́лъ еси́,* я́коже ле́въ, сла́вне, къ страда́нію,* презира́я у́бо тѣ́ло,* я́ко растлѣ́тися хотя́щее,* о нетлѣ́ннѣй же души́ му́дрѣ прилѣжа́лъ еси́* и му́къ многообра́зными ви́ды разже́глся еси́,* я́ко зла́то очище́но* седмери́цею, Гео́ргіе.

За Спа́са пострада́лъ еси́* и, сме́ртію сме́рти во́льнѣ, сла́вне, подо́бяся,* ца́рствуеши съ Ни́мъ свѣ́тло,* порфи́рою отъ кро́ве одѣ́янъ свѣ́тлою,* и ски́птромъ страда́ній твои́хъ укра́шенъ,* и вѣнце́мъ побѣ́ды лѣ́потствуя* въ непроходи́мыя вѣ́ки,* великому́чениче Гео́ргіе.

Вѣ́ры броня́ми,* и щито́мъ благода́ти,* и Креста́ копіе́мъ вооружи́вся,* сопроти́внымъ непобѣди́мь бы́лъ еси́, Гео́ргіе,* и, я́ко боже́ственный храбо́рникъ,* де́монская ополче́нія побѣди́въ,* со а́нгелы лику́еши,* вѣ́рныя же заступа́еши, и освяща́еши,* и спаса́еши, призыва́емый.

Яко звѣзду́ многосвѣ́тлую,* я́коже со́лнце, сія́ющее* на тве́рди небе́снѣй, тя́ вѣ́мы,* и я́ко би́серъ многоцѣ́нный,* я́ко ка́мень блиста́ющій,* я́ко сы́на тя́ дне́,* я́ко до́блественнаго въ му́ченицѣхъ,* я́ко побо́рника вѣ́рныхъ въ бѣда́хъ прославля́емъ,* соверша́юще твою́ па́мять, побѣдоно́сче Гео́ргіе.

Сла́ва, гла́съ 6:

Досто́йно и́мени пожи́лъ еси́, во́ине Гео́ргіе: Кре́стъ бо Христо́въ на ра́мо взе́мъ, отъ діа́вольскія ле́сти оляденѣ́вшую зе́млю до́брѣ дѣ́лалъ еси́ и, терно́вное служе́ніе искорени́въ и́дольское, правосла́вныя вѣ́ры ло́зу насади́лъ еси́. Тѣ́мже то́чиши исцѣле́нія во все́й вселе́ннѣй вѣ́рнымъ, и Тро́ицы дѣ́латель пра́веденъ показа́лся еси́. Моли́, мо́лимся, о умире́ніи мíра и спасе́ніи ду́шъ на́шихъ.

И ны́нѣ, пра́здника.
Вхо́дъ. Проки́менъ дне́, и пареміи́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и свята́го самогла́сны. Гла́съ 1. Анато́ліево:

Свѣ́тлый храбо́рникъ Гео́ргій въ сла́внѣмъ страда́ніи свое́мъ го́рнія си́лы весели́тъ, и съ ни́ми ра́дуяся ны́нѣ, и на земли́ вѣ́рныя торжествова́ти воздви́же и спра́здновати на́мъ, того́ ра́ди со́браннымъ, я́ко Христо́въ ра́бъ пріи́де. Тѣ́мже у́бо его́ досто́йно почти́мъ, непреста́нно моля́щася всѣ́хъ Бо́гу дарова́ти на́мъ ве́лію ми́лость.

До́блественными страда́ніи воздѣ́лавъ лу́чшая, труды́ плодо́въ твои́хъ Христу́ прине́слъ еси́, преблаже́нне му́чениче Гео́ргіе, вѣ́рою жела́ніе утверди́въ, наде́ждею стра́хъ отри́нувъ, любо́вь стяжа́лъ еси́ небе́сную, прехва́льне. Дерзнове́ніе имѣ́я у́бо, благопрія́тными мольба́ми проси́ душа́мъ на́шимъ ми́ра, очище́нія же грѣхо́въ и ве́лія ми́лости.

Гла́съ 4:

Пріиди́те, вѣ́рныхъ собо́ри, пріиди́те, пра́здникъ соста́вимъ, и́бо пресвѣ́тлая па́мять дне́сь яви́ся страстоте́рпца Гео́ргія, на́ша просвѣща́етъ неви́димо сердца́, добродѣ́тельми блиста́ющи. Тѣ́мже, единому́дренно воспѣва́юще, рце́мъ: ра́дуйся, во́ине вели́каго Царя́ Христа́; ра́дуйся, пресвѣ́тлая похвало́ вѣ́ры; ра́дуйся, всесвѣ́тле и пребога́те. О на́съ, преблаже́нне, всѣ́хъ Влады́ку Христа́ Бо́га моли́ сохране́нымъ бы́ти отъ искуше́ній лука́ваго и спасти́ ду́ши на́ша.

Сла́ва, гла́съ 5. Ѳеофа́ново:

Возсія́ весна́, пріиди́те, наслади́мся, просія́ Воскресе́ніе Христо́во, пріиди́те, возвесели́мся, страстоте́рпца па́мять, вѣ́рныя просвѣща́ющи, показа́ся. Тѣ́мже, празднолю́бцы, пріиди́те, та́йно ту́ торжеству́емъ: се́й бо, я́ко до́бръ во́инъ, му́жествовавъ на мучи́телей, и си́хъ посрами́, подо́бникъ бы́въ стра́сти Спа́са Христа́, не поми́лова сосу́да своего́ бре́ннаго, но на́га обостри́, му́ками того́ измѣня́я. Тому́ возопіе́мъ: страстоно́сче, моли́ спасти́ся душа́мъ на́шимъ.

И ны́нѣ, пра́здника.

На стихо́внѣ стихи́ры, гла́съ 4. Подо́бенъ: Зва́нный свы́ше.

Восхваля́ютъ лю́діе псалмы́,* вку́пѣ и пѣ́сньми* твою́ сла́вную па́мять, Гео́ргіе,* я́ко благолѣ́пна бо возсія́ и свѣтоно́сна,* укра́шена сла́вою и благода́тію.* Тѣ́мже игра́ютъ ны́нѣ а́нгельстіи чи́ни,* хва́лятъ же му́ченицы со апо́столы* твои́хъ по́двигъ, му́чениче, страда́нія* и воспѣва́ютъ просла́вльшаго тя́* Спа́са, Христа́ Бо́га на́шего.* Его́же моли́ спасти́ и просвѣти́ти ду́ши на́ша.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Облече́нъ во Христо́во всеору́жіе,* обрѣ́лся еси́, Гео́ргіе, не и́щущимъ тебе́,* ты́ бо, за Христа́ огне́мъ распала́емь* и руга́яся бого́въ су́етныхъ* безбо́жному сверѣ́пству,* тогда́: во́инствую Царю́ моему́ Христу́, —* беззако́ннымъ взыва́лъ еси́, —* ни звѣ́ріе, ни коле́са же, ни и́на му́ка* мене́ разлучи́ти возмо́гутъ когда́* любве́ Христа́ моего́.* Его́же моли́* спасти́ и просвѣти́ти ду́ши на́ша.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Небре́гъ о сосу́дѣхъ многообра́зныхъ,* и о разли́чныхъ му́кахъ,* и о ору́жіяхъ стра́шныхъ,* вѣнцено́сче Гео́ргіе,* благоче́стія му́ченически тече́ніе сконча́лъ еси́.* Тѣ́мже пресвѣ́тлую па́мять твою́* цвѣ́ты пѣ́сненными вѣнча́емъ* и честны́я твоя́ облобыза́емъ вѣ́рою мо́щи.* Но, я́ко престо́лу предстоя́ Влады́ки,* Христа́ Бо́га на́шего,* моли́ти не преста́й* спасти́ и просвѣти́ти ду́ши на́ша.

Сла́ва, гла́съ то́йже. Самогла́сенъ. Студи́тово:

Разу́мнаго адама́нта терпѣ́ніе, бра́тіе, духо́вно восхва́лимъ, Гео́ргія, сла́внаго му́ченика, его́же, за Христа́ разжига́ема, кова́ху бѣды́, и изостри́ша му́ки, и разли́чная муче́нія изнури́ша тѣ́ло, естество́мъ тлѣ́нно, побѣжда́ше бо жела́ніе естество́, сме́ртію понужда́я рачи́теля прейти́ къ жела́емому Христу́ Бо́гу и Спа́су ду́шъ на́шихъ.

И ны́нѣ, пра́здника.

На благослове́ніи хлѣ́бовъ тропа́рь, гла́съ 4:

Яко плѣ́нныхъ свободи́тель и ни́щихъ защи́титель, немощству́ющихъ вра́чь, царе́й побо́рниче, побѣдоно́сче, великому́чениче Гео́ргіе, моли́ Христа́ Бо́га спасти́ся душа́мъ на́шимъ. [Два́жды.]

И Богоро́дице Дѣ́во... [Еди́ножды.] И про́чая.



НА УТРЕНИ,
На Бо́гъ Госпо́дь: тропа́рь пра́здника, два́жды. Сла́ва, свята́го. И ны́нѣ, пра́здника.

По 1-мъ стихосло́віи сѣда́ленъ пра́здника. Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й.

Се́ возсія́ благода́ти весна́, облиста́ Христо́во Воскресе́ніе всѣ́мъ, и съ ни́мъ совозсіява́етъ ны́нѣ Гео́ргія му́ченика всепра́зднственный и свѣтоно́сный де́нь, пріиди́те вси́, свѣщи́ нося́ще боже́ственнѣ, свѣ́тло пра́зднуемъ.

Сла́ва, гла́съ то́йже. Подо́бенъ: Ли́къ а́нгельскій.

Во́инство, е́же на земли́, возненави́дѣвъ, му́чениче, на небесѣ́хъ возжела́лъ еси́ сла́вы, и болѣ́зни претерпѣ́лъ еси́, и ну́жную сме́рть. Тѣ́мже дне́сь всесвяту́ю твою́ па́мять пра́зднуемъ, Христу́ принося́ще хвалу́, преблаже́нне Гео́ргіе.

И ны́нѣ, пра́здника, или́ богоро́диченъ:

Ма́терь Тя́ Бо́жію мо́лимъ вси́, Дѣ́ву вои́стинну и по рождествѣ́ я́вльшуся, любо́вію прибѣга́ющіи къ Твое́й бла́гости: Тебе́ бо и́мамы, грѣ́шніи, Предста́тельницу, Тебе́ стяжа́хомъ въ напа́стехъ спасе́ніе, еди́ну Всенепоро́чную.

По поліеле́и сѣда́ленъ, гла́съ 3. Подо́бенъ: Боже́ственныя вѣ́ры.

Любо́вію горя́щею Влады́чнею разжиза́емь, мужему́дреннѣ пре́лести сокро́вища низложи́лъ еси́ и, на суди́щи Христа́ исповѣ́давъ, побѣдоно́сче всеблаже́нне Гео́ргіе, му́чениче пресла́вне, Христа́ Бо́га моли́ дарова́ти на́мъ ве́лію ми́лость.

Сла́ва, гла́съ 4. Подо́бенъ: Удиви́ся.

Воздѣ́лавъ прилѣ́жно сѣ́мя Боже́ственныхъ за́повѣдей, расточи́лъ еси́ ни́щимъ все́ бога́тство благоче́стно, вмѣ́сто си́хъ стяжа́въ, пресла́вне, Христо́ву сла́ву. Тѣ́мже надѣ́явся, къ подвиго́мъ и́деши и болѣ́знемъ до́лгимъ, му́чениче Гео́ргіе, и о́бщникъ бы́въ стра́сти Безстра́стнаго и Воскресе́нія, Ца́рствія Того́ причаща́яся, о на́съ ны́нѣ моли́ся.

И ны́нѣ, пра́здника, или́ богоро́диченъ:

Сло́во Отчее, Христа́ Бо́га на́шего, отъ Тебе́ воплоти́вшагося, позна́хомъ, Богоро́дице Дѣ́во, еди́на Чи́стая, еди́на Благослове́нная, тѣ́мъ непреста́нно Тя́ воспѣва́юще, велича́емъ.

Степе́нна, 1-й антифо́нъ, 4-го гла́са. Проки́менъ, гла́съ 4: Пра́ведникъ, я́ко фи́никсъ процвѣте́тъ,* [я́ко ке́дръ, и́же въ Лива́нѣ, умно́жится]. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Вся́кое дыха́ніе... Сти́хъ: Хвали́те Бо́га во святы́хъ Его́... Ева́нгеліе Луки́, зача́ло 63.

По 50-мъ псалмѣ́ стихи́ра самогла́сна, гла́съ 6:

Дне́сь вселе́нная вся́ страстоте́рпца просвѣща́ется заря́ми, и Христо́ва Це́рковь, цвѣ́ты украша́ема, Гео́ргіе, вопіе́тъ ти́: уго́дниче Христо́въ и засту́пниче те́плый, не преста́й моля́ся о рабѣ́хъ твои́хъ.

Кано́нъ пра́здника на 6 и свята́го два́ на 8.

Свята́го кано́нъ, творе́ніе ки́ръ Ѳеофа́на. Гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Те́плою вѣ́рою и любо́вію призыва́ющія тя́, му́чениче Христо́въ, вѣнцено́сче Гео́ргіе, предстоя́ всесвѣ́телъ честно́му престо́лу всѣ́ми Владу́щаго, твои́ми моли́твами и предста́тельствы сохрани́.

Благоро́дно воздѣ́ланіе Христу́ бы́лъ еси́, Гео́ргіе, му́ченическими воздѣ́ланъ дѣя́ніи, и, я́ко бога́тство пресла́вно, въ небе́сныхъ тя́ сокро́вищахъ положи́ Подвигополо́жникъ, я́ко преизя́щнѣ хра́брствовавшаго.

Тве́рдо и терпѣли́вно устреми́лся еси́, самозва́нъ, къ подвиго́мъ, преблаже́нне Гео́ргіе, и, низложи́въ свирѣ́пое мучи́телей ополче́ніе, моли́твенникъ о всѣ́хъ, призыва́ющихъ тя́, бы́лъ еси́.

Блаже́нную, сла́вне, жи́знь ны́нѣ воспріе́мь, во Христѣ́ сокрове́нную, Гео́ргіе, о не́йже подвиза́лся еси́ до кро́ве, вѣ́рою пою́щимъ тя́ моли́ спасти́ся отъ вся́каго, страстоте́рпче, обстоя́нія.

Богоро́диченъ: Не́бо была́ еси́ слове́сное, Сло́во небе́сное въ Твое́й утро́бѣ, Богома́ти, вмѣ́щшая, Имже вся́ бы́ша: не́бо же, и земля́, и я́же вы́шше си́хъ. Тѣ́мже со дерзнове́ніемъ моли́ спасти́ пою́щія Тя́.

Другíй кано́нъ, творе́ніе ки́ръ Космы́. Гла́съ 4.
Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Страда́ній свяще́нныхъ сконча́лъ еси́ тече́ніе, и, къ небеси́ иды́й, нетлѣ́ненъ вѣнцено́сецъ показа́лся еси́, благоцвѣту́щъ, Гео́ргіе, я́влься пу́тникъ, и со а́нгелы лику́еши: пои́мъ Бо́гу на́шему, я́ко просла́вися. [Два́жды.]

По́томъ благи́хъ еще́ боля́, премíрнымъ яви́лся еси́ лико́мъ, иска́пая, безпло́тныхъ чи́ны плотски́ми, Гео́ргіе, удиви́лъ еси́ боже́ственными страда́ніи. Съ си́ми лику́я, зове́ши: пои́мъ Бо́гу на́шему, я́ко просла́вися.

Богоро́диченъ: Же́злъ Ааро́новъ прозя́бшій, и́же отъ Іессе́я прообража́ше изра́стшій ко́рень, Тя́, Пречи́стую, цвѣ́тъ мíру возсія́вшую, Бо́га воплоще́нна, Его́же о на́съ моля́щи не преста́й, Приснодѣ́во, прибѣга́ющихъ къ Тебѣ́.

Катава́сія: Воскресе́нія де́нь, просвѣти́мся лю́діе...

Пѣ́снь 3.

Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Вѣнце́мъ страда́нія сія́я, сла́вне, благоче́стно призыва́ющія тя́ моли́ Изба́вителя и Бо́га отъ вся́кія ну́жды, блаже́нне, изба́вити.

Бога́тыми просвѣща́емь сія́ніи, прему́дре, мра́чную отжени́ печа́ль и мглу́ страсте́й отъ на́съ, вѣ́рою восхваля́ющихъ тя́.

Наде́ждею утвержда́емь и любо́вію, вѣ́рою же огра́ждься, Гео́ргіе, и си́лою укрѣ́плься Христо́вою, и́дольскую пре́лесть низве́рглъ еси́.

Богоро́диченъ: Просвѣ́щшаго концы́, Пречи́стая, родила́ еси́ съ пло́тію Безпло́тнаго и пре́жде всѣ́хъ Отцу́ Собезнача́льна, тѣ́мже Тя́, Богоро́дицу, вѣ́рніи, чти́мъ.

Инъ.

Ирмо́съ: Яко непло́ды, роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Ти́хо разда́лъ еси́ ни́щимъ бога́тство и, умасти́вся еле́емъ любве́, тѣ́ломъ и душе́ю страда́льчески, Гео́ргіе, мучи́теля вку́пѣ побѣди́лъ еси́. [Два́жды.]

Утверди́вся благода́тію и огне́мъ распала́емь ре́вности, не вопроша́ющимъ яви́лся еси́, обрѣ́лся еси́ не и́щущимъ, по Христѣ́, Гео́ргіе, гнѣ́ваяся на ле́сть и́дольскую.

Богоро́диченъ: Яко но́сиши на руку́, Марíе, и отъ сосцу́ пита́еши пита́ющаго вся́кое дыха́ніе, Его́же, Богоро́дице, чту́ще, проповѣ́даемъ. Моли́ся Ему́, Чи́стая, о всѣ́хъ на́съ.

Катава́сія: Пріиди́те, пи́во піе́мъ но́вое...

Конда́къ пра́здника и и́косъ.
Сѣда́ленъ, гла́съ 8. Подо́бенъ: Прему́дрости.

Благоче́стія о́бразы му́жески хра́брствуя, нече́стія пре́лесть низложи́въ, му́чениче, попра́лъ еси́ врага́ шата́нія и, боже́ственнымъ жела́ніемъ при́сно разгара́емь, мучи́телей угаси́лъ еси́ безбо́жное сверѣ́пство. Тѣ́мже досто́йно возме́здіе му́къ прія́лъ еси́ вѣне́цъ и подае́ши исцѣле́нія вѣ́рою притека́ющимъ. Страстоте́рпче Гео́ргіе, моли́ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва:

Земно́е бога́тство на земли́ раздава́яй всѣ́мъ, му́чениче му́дре, бога́тство небе́сное наслѣ́довалъ еси́ труды́ твои́ми, Кресто́мъ бо честны́мъ, я́ко въ броню́, обо́лкся и тѣ́мъ посрами́лъ еси́ мучи́телей шата́ніе. Тѣ́мже моли́твами прося́щимъ тя́ подае́ши боже́ственная дарова́нія, исцѣле́ній благодѣя́нія. Страстоно́сче Гео́ргіе, моли́ся Христу́ Бо́гу, прегрѣше́ній оставле́ніе дарова́ти пра́зднующимъ любо́вію святу́ю па́мять твою́.

И ны́нѣ, пра́здника.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Пое́мъ твоя́ по́двиги, преблаже́нне Гео́ргіе, и́миже разсы́палъ еси́ и́дольскія слу́жбы, всю́ же упраздни́лъ еси́ де́монскую пре́лесть, пресла́вне.

Ути́ши напа́стей и бѣ́дъ смуще́ніе и вся́кое навѣ́тіе зло́е де́моновъ отжени́ отъ пою́щихъ тя́, Христо́ва во́ина, досточу́дне.

Возсія́лъ еси́, я́ко звѣзда́ свѣтоно́сная, Гео́ргіе, душе́вною до́блестію и тве́рдостію вѣ́ры пре́лесть мра́чную отгоня́ и спаса́я пою́щія тя́.

Богоро́диченъ: Спасе́ніе су́щественное, Дѣ́во, родила́ еси́, бога́тствомъ бла́гости и есте́ственною благосты́нею спаса́ющее человѣ́ка и истлѣ́вшій о́бразъ назида́ющее.

Инъ.

Ирмо́съ: Услы́шахъ Твое́, Христе́, вои́стинну пресла́вное, я́ко безсме́ртенъ сы́й Бо́гъ, уподо́бися сме́ртнымъ человѣ́комъ и пребы́сть, е́же бѣ́, и того́ ра́ди Твою́ сла́влю си́лу.

Ужасъ предъ суди́ща мучи́телей извѣ́ствоваше неразсу́дна сказа́нія слове́съ твоея́ му́дрости, Гео́ргіе, Христо́съ же невѣ́дущимъ Бо́гъ познава́шеся.

Сло́вомъ вѣ́ры Христо́вы, Гео́ргіе прему́дре, мудреце́мъ сплете́нія разрѣши́лъ еси́ ба́сней скве́рныхъ, страсте́й же бо́ги дѣ́латели поруга́лъ еси́, Тро́ицѣ побо́рниче.

Услы́шавше, слу́хомъ слове́съ твои́хъ мучи́теліе посрами́шася, ты́ бо, бого́мъ и́хъ руга́яся, смѣ́хъ пока́зовалъ еси́, Христа́ Бо́га проповѣ́дуя, пло́тію ра́спята, и упраздни́вша пре́лесть душегу́бную.

Богоро́диченъ: Тебе́, Приснодѣ́вую и вои́стинну еди́ну Богоро́дицу, сла́вимъ, Юже прообразова́ше богови́дцу Моисе́ю неопа́льно, Пречи́стая, купина́, огню́ примѣси́вшаяся.

Катава́сія: На боже́ственнѣй стра́жи...

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Му́ченическое дерзнове́ніе я́ко имѣ́я ко Влады́цѣ, проси́ усе́рдно спасе́нія тя́ пою́щимъ, душе́вныхъ неду́гъ измѣня́я твои́ми мольба́ми, му́чениче страстоно́сче, преблаже́нне Гео́ргіе.

Со а́нгельскими лику́я, я́ко му́ченикъ, ликостоя́ніи и безсме́ртныя и блаже́нныя, вѣнцено́сче, насыща́яся сла́вы, покро́ву твоему́ прибѣга́ющія вся́каго треволне́нія и бу́ри исхити́.

Изба́ви на́съ отъ вся́кія ну́жды, я́ко Ми́лостивъ, грѣхо́вное и бѣ́дное отгоня́ многоразли́чное смуще́ніе, Гео́ргія Твоего́ уго́дника моли́твы, Христе́, пріе́мля.

Богоро́диченъ: До́лгъ прама́тере Евы, Богома́ти, отдала́ еси́, пло́тію бо обложи́ла еси́ изъ Тебе́ рожде́нна Спа́са мíра. Тѣ́мже Тя́ вси́ блажи́мъ, обра́дованная Дѣ́во Всенепоро́чная.

Инъ.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Страда́льчески, Гео́ргіе, сплета́яся, вина́мъ разли́чныя пре́лести му́жески проти́вяся, мíра же на́гъ, держа́ву отъя́лъ еси́ лю́таго міроде́ржца. [Два́жды.]

Огради́вся, Гео́ргіе, ору́жіемъ Креста́, наде́ждею вѣ́ры, любо́вію держа́вною притупи́лъ еси́ остроту́ и все́ ору́жіе лю́таго борца́.

Богоро́диченъ: Мучи́телей ра́зумъ дѣ́вственное посрами́ чре́во: Младе́нецъ бо я́зву а́спидную душегу́бную испыта́ руко́ю и, отсту́пника го́рдаго низложи́въ, вѣ́рнымъ подъ но́зѣ покори́.

Катава́сія: Утренюемъ у́тренюю глубоку́...

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Па́че естества́, и сло́ва, и по́мысла до́блести твоея́ хра́брствованія, непреста́нно пѣва́ема, преблаже́нне му́чениче Гео́ргіе.

Во́инству небе́сному собесѣ́дникъ, блаже́нне, бы́въ и Боже́ственное явле́ніе ели́ко дости́жно зря́, тя́ вѣ́рою чту́щія спаса́й.

Всѣ́ми о́бразы Бо́гу возложе́нъ и блиста́нія чуде́съ пріе́мля, дарова́нія тре́бующимъ раздава́еши, преблаже́нне Гео́ргіе.

Богоро́диченъ: Ны́нѣ къ Тебѣ́ прибѣга́ю, Пречи́стая, спаси́ мя моли́твами Твои́ми и соблюди́: ели́ко бо хо́щеши, мо́жеши, я́ко Ма́ти Всемогу́щаго.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Возопи́лъ еси́ со дерзнове́ніемъ къ Зижди́телю, Гео́ргіе: не преда́ждь беззако́ннымъ раба́ Твоего́, но крѣ́пость ми́ пода́ждь разори́ти и́хъ шата́ніе.

Небре́гъ о мучи́тельныхъ сосу́дѣхъ, Гео́ргіе, на по́двиги во́лею му́жески прите́клъ еси́ и по́честными побѣ́дами отъ Христа́ Бо́га вѣнча́лся еси́.

По искуше́ніи добродѣ́тели твоея́, къ чудеси́, Гео́ргіе, прело́жше преще́ніе, льсти́вніи мучи́тели, Его́же проповѣ́далъ еси́, Животода́вца Христа́, удиви́шася.

Богоро́диченъ: Дре́вле у́бо прельсти́ мя змíй и умори́ мя прама́терію мое́ю Евою; ны́нѣ же, Чи́стая, Тобо́ю Созда́вый мя́ изъ истлѣ́нія воззва́.

Катава́сія: Снизше́лъ еси́ въ преиспо́дняя земли́...

Конда́къ, гла́съ 4. Подо́бенъ: Вознесы́йся.

Воздѣ́ланъ отъ Бо́га, показа́лся еси́ благоче́стія дѣ́латель честнѣ́йшій, добродѣ́телей рукоя́ти собра́въ себѣ́: сѣ́явъ бо въ слеза́хъ, весе́ліемъ жне́ши, страда́льчествовавъ же кро́вію, Христа́ прія́лъ еси́ и моли́твами, свя́те, твои́ми всѣ́мъ подае́ши прегрѣше́ній проще́ніе.

Икосъ:

За мірскíй живо́тъ ду́шу свою́ положи́вшаго, Христа́ Царя́ жела́я, во́инъ тщи́тся умре́ти за Него́, ре́вность же ве́лію боже́ственную въ се́рдцы имѣ́я, себе́ самаго́ приведе́. Того́ у́бо и мы́ вси́, боже́ственного Гео́ргія, я́ко те́пла предста́теля воспои́мъ вѣ́рою, я́ко сла́внаго су́ща Христо́ва раба́, подо́бящася я́вѣ своему́ Влады́цѣ и вся́кому моля́щуся приходя́ща: спѣши́тъ бо при́сно и мо́литъ Спа́са всѣ́мъ пода́ти согрѣше́ній проще́ніе.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Твоему́ подо́бяся, му́чениче, Влады́цѣ, во́лею поте́клъ еси́ къ подвиго́мъ, сла́вне, и, побѣ́ду взе́мъ, Це́ркве Христо́вы храни́тель бы́лъ еси́: Сію́ при́сно сохраня́й предста́тельствомъ твои́мъ.

Яко му́ченикъ непобѣди́мь я́ко страда́лецъ, я́ко неодолѣ́нный вѣ́ры побо́рникъ, ны́нѣ сто́лпъ непоколеби́мь восхваля́ющимъ тя́, прему́дре Гео́ргіе, бу́ди, огражда́я моли́твами твои́ми.

Му́дрѣ земледѣ́лавъ боже́ственное сѣ́мя, и сіе́ умно́жилъ еси́, крове́й твои́хъ тече́ньми напои́въ, блаже́нне, и болѣ́зней тща́ніемъ, и разли́чными ра́нами, и́миже сверѣ́пство мучи́телей угаси́лъ еси́.

Богоро́диченъ: Дѣ́ва пребыла́ еси́ и по рождествѣ́, Бо́га бо родила́ еси́, пита́ющаго вся́ческая, за неизрече́нную ми́лость и милосе́рдіе мно́гое Человѣ́ка бы́вшаго, Чи́стая, Его́же ны́нѣ моли́ спасти́ся всѣ́мъ на́мъ.

Инъ.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Одержа́щую ви́дя и́дольскую ле́сть, благоче́стія распала́емь ре́вностію, Гео́ргіе, къ подвиго́мъ тебе́ отда́лъ еси́, преблаже́нне, вопія́: оте́цъ на́шихъ Бо́же, благослове́нъ еси́.

Проповѣ́дуя яви́лся еси́ гони́мую вѣ́ру, мглу́ же пре́лести облича́я, Гео́ргіе, глаго́лалъ еси́: оте́цъ на́шихъ Бо́же, благослове́нъ еси́.

Изъ ко́рене посѣ́клъ еси́ пре́лесть и воздѣ́лалъ еси́ вѣ́ру, благоче́стіемъ бо́льшую, Гео́ргіе, ра́довался еси́, глаго́ля: оте́цъ на́шихъ Бо́же, благослове́нъ еси́.

Богоро́диченъ: Превы́шши тва́рей всѣ́хъ еси́, я́ко Творца́ ро́ждши и Го́спода. Тѣ́мже Ти́ вопію́, Богоро́дице: Благослове́нная, Госпо́дь си́лъ съ Тобо́ю.

Катава́сія: Отроки отъ пе́щи изба́вивый...

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Пото́къ лю́тыхъ страсте́й же и бѣ́дъ, и мяте́жнаго обстоя́нія, и болѣ́зней паде́нія, и де́моновъ ко́зни, и злочести́выхъ стремле́нія укроти́ твои́ми моли́твами, вѣнцено́сче Гео́ргіе.

Ве́сь свѣ́томъ, блаже́нне, Тро́ическимъ чи́сто облиста́емь, я́ко му́ченикъ непобѣди́мь, я́ко благоче́стія побо́рникъ, я́ко побѣди́тель боговѣнча́ненъ, спаси́, небе́сный жи́телю, тя́ чту́щія моли́твами твои́ми.

Вѣнце́мъ разу́мнымъ разли́чно укра́шенъ, и Ца́рствія діади́мою, и ски́птромъ удобре́нъ, и багряни́цею обложе́нъ, твое́ю обагре́нъ кро́вію, блаже́нне, сца́рствуеши Царю́ си́лъ.

Богоро́диченъ: Отъ Отца́, безлѣ́тно Рожде́ннаго и пре́жде вѣ́къ возсія́вша, вся́ческая сотво́ршаго, ви́димая же и неви́димая, Дѣ́во Ма́ти, родила́ еси́. Тѣ́мже Тя́, Богоро́дицу, вси́ язы́цы, сла́вимъ.

Инъ.

Ирмо́съ: Ра́дующеся по осужде́ніи мучи́тельскомъ о́троцы, я́ко да не бого́мъ скве́рнымъ послу́жатъ всѣ́мъ, но живо́му Бо́гу, на о́гнь дерзну́ша, отъ а́нгела же ороша́еми, пѣ́снь поя́ху: дѣла́ Госпо́дня, Го́спода по́йте и превозноси́те во вся́ вѣ́ки.

Ду́хомъ укрѣпля́емь, о ору́жныхъ болѣ́знехъ небре́глъ еси́, я́ко не глухи́мъ и́доломъ хвалу́ посыла́еши, но Христу́ Бо́гу, къ Нему́же любе́зну стяжа́въ, Гео́ргіе, вѣ́ру, глаго́лалъ еси́: дѣла́ Госпо́дня, Го́спода по́йте и превозноси́те во вся́ вѣ́ки.

Яко не су́щу вре́менную непщу́я красоту́, разли́чная озлобле́нія подъя́лъ еси́, Гео́ргіе, ра́дуяся наде́ждею боже́ственныя жи́зни, о стра́шнѣмъ же раздробле́ніи небре́гъ, тве́рдостію души́ глаго́лалъ еси́: дѣла́ Госпо́дня, Го́спода по́йте и превозноси́те во вся́ вѣ́ки.

Разсѣка́емо мѣ́дными сосу́ды твое́ тѣ́ло, о́стрыми ножи́ по еди́ному у́ду раздробля́емо ви́дя, вжиля́емь душе́ю: бу́дущей сла́вѣ недосто́йны ны́нѣшнія му́ки, — глаго́лалъ еси́, — дѣла́ Госпо́дня, Го́спода по́йте и превозноси́те во вся́ вѣ́ки.

Богоро́диченъ: Отъ ребра́ Ада́мова Созда́вый Тя́ отъ Твоего́ дѣ́вства воплоти́ся, Иже всѣ́хъ Госпо́дь, Его́же пою́ще, вопіе́мъ: вся́ дѣла́, благослови́те, по́йте Го́спода и превозноси́те во вся́ вѣ́ки.

Катава́сія: Се́й нарече́нный и святы́й де́нь...

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Непреста́нно Го́спода моли́ о на́съ, пою́щихъ тя́, блаже́нне, я́ко Христо́ва му́ченика, я́ко побѣди́вша мучи́теля, я́ко лука́выхъ духо́въ отгони́теля, я́ко храни́теля неусы́пна, я́ко засту́пника непосты́дна.

Страда́ній воздая́нія бога́тно тебѣ́ дарова́ всѣ́хъ Влады́ка, Ему́же предстоя́ со дерзнове́ніемъ, преблаже́нне, му́ченическимъ и съ весе́ліемъ, призыва́ющія тя́, объе́мь, сохрани́.

Земля́ тя́ сокры́, и не́бо прія́тъ, и отве́рзеся тебѣ́ две́рь ра́йская я́вѣ, въ не́мже ра́достно, страстоте́рпче, лику́я и игра́я, вѣ́рно пою́щія тя́ твои́ми моли́твами соблюди́.

Богоро́диченъ: Тя́ свидѣ́нія сѣ́нь прообрази́, Пречи́стая, въ не́йже скрижа́ли, и ста́мна, и златы́й киво́тъ: я́коже бо о́ная, та́ко и Ты́ Безнача́льное Сло́во во утро́бѣ вмѣсти́ла еси́, Богоро́дице, воплоща́емо.

Инъ.

Ирмо́съ: Отъ земноро́дныхъ ро́ждшися и Творца́ ро́ждшая, на́ша похвало́, Богоро́дице Чи́стая, Тя́, я́ко влады́чествующую тва́рьми, велича́емъ.

Свяще́нніи воспѣва́ютъ, ца́ріе восхваля́ютъ, и лю́діе твои́хъ страда́ній хвалу́ возвѣща́ютъ, му́чениче Гео́ргіе. Тѣ́мже тя́ вси́ ублажа́емъ. [Два́жды.]

Воспѣ́ша вся́ небе́сныя си́лы по́двиги твоя́, ты́ бо, поже́рся, Бо́гу благоугоди́лъ еси́, му́чениче Гео́ргіе. Тѣ́мже тя́ вси́ ублажа́емъ.

Богоро́диченъ: Отъ земноро́дныхъ возра́стши и Зижди́теля ро́ждши, ра́дуйся, на́ша похвало́, Богоро́дице Чи́стая, Тя́, я́ко облада́ющую тва́рьми, велича́емъ.

Катава́сія: Свѣти́ся, свѣти́ся но́вый Іерусали́ме...

Свѣти́ленъ. Подо́бенъ: Ученико́мъ зря́щимъ.

Весна́ на́мъ возсія́, свѣ́тлое Влады́чнее и Боже́ственное Воскресе́ніе, къ небе́снѣй па́сцѣ отъ земли́ на́съ пресыла́я, съ не́юже просіява́етъ всесла́внаго му́ченика Гео́ргія па́мять свѣтоза́рная, ю́же свѣ́тло соверши́мъ, да Боже́ственныя сподо́бимся благода́ти отъ Христа́ Спа́са.

Сла́ва. Подо́бенъ: Свѣ́те неизмѣ́нный.

Яко со́лнце свѣтоно́сное, чуде́сными заря́ми просвѣща́еши всю́ тва́рь, Гео́ргіе страстоте́рпче. Тѣ́мже, твою́ соверша́юще па́мять, пое́мъ Воскре́сшаго изъ гро́ба.

И ны́нѣ, пра́здника.

На хвали́техъ стихи́ры на 4, гла́съ 2. Подо́бенъ: Егда́ отъ дре́ва.

Пріиди́те, всепра́зднственное, свѣ́тлое,* сла́вное Воскресе́ніе, вси́ торжествова́вшіи,* па́ки пра́зднуемъ свѣ́тло торжество́ Гео́ргія му́ченика* и вѣнча́емъ сего́ ве́сненными цвѣ́ты,* су́ща непобѣди́ма;* я́ко да того́ мольба́ми пріи́мемъ* скорбе́й ку́пно и прегрѣше́ній избавле́ніе.

Всего́ прине́слъ еси́ себе́,* тебѣ́ Да́вшему, всеблаже́нне, жи́знь всецѣ́лую,* я́ко всепло́діе жи́во и одушевле́нно* и же́ртву благопрія́тну и пречи́сту.* Тѣ́мже бы́лъ еси́ моли́твенникъ теплѣ́йшій,* бу́ри изыма́я вся́,* вѣ́рою пою́щія тя́, му́чениче,* и призыва́ющія тя́, Гео́ргіе.

Сѣ́мя воздѣ́лавъ приле́жно,* всѣ́янное Сло́ва въ чи́стѣй твое́й души́,* сіе́ умно́жилъ еси́ болѣ́зньми страда́нія* и, прему́дрѣ положе́нъ въ небе́сныхъ жи́тницахъ,* нетлѣ́нное обрѣ́лъ еси́ наслажде́ніе.* Его́же ны́нѣ насыща́яся, блаже́нне,* твои́ми къ Бо́гу моли́твами,* вѣ́рою пою́щія тя́ спаса́й.

Му́чениче страстоно́сче Христо́въ,* су́щія въ напа́стехъ ну́ждныхъ спаси́,* мольба́ми твои́ми отъ вся́каго обстоя́нія избавля́я* и отгоня́ душегу́бную лю́тую печа́ль,* благода́ти же и ми́лости на́мъ проси́,* я́ко да моли́твами твои́ми спа́сшеся,* ра́дующеся, почита́емъ вси́* честны́я по́двиги твоя́, Гео́ргіе.

Сла́ва, гла́съ 2:

Да помава́ютъ пра́ведная, рече́ Соломо́нъ, человѣ́комъ вѣ́жди: поми́луется бо отъ Христа́ Бо́га ви́дяй пра́вая, предглаго́лаше. Удо́бь же сія́ внуши́въ, о многотерпѣли́ве Гео́ргіе, Влады́чнимъ уче́ніемъ послѣ́довалъ еси́ и, беззако́ннымъ отда́въ себе́, претерпѣ́лъ еси́, пре́лести тре́бы оплева́лъ еси́, я́ко ме́рзски: тѣ́ло бо твое́ да́въ за любо́вь Созда́теля, все́ на у́ды ссѣщи́. И веліа́ръ па́че ве́сь, постыдѣ́вся, уязвля́шеся, вѣнцено́сца тя́ зря́ соверше́нна. Тѣ́мже во дво́рѣхъ живы́й Го́спода твоего́ съ вы́шними си́лами, моли́, страстоте́рпче Христо́въ, спасти́ся душа́мъ на́шимъ.

И ны́нѣ, пра́здника.

Славосло́віе вели́кое. По трисвято́мъ тропа́рь свята́го. Сла́ва, и ны́нѣ, пра́здника. Ектеніи́ и отпу́стъ. И дае́тся святы́й еле́й бра́тіи отъ канди́ла свята́го, и ча́съ 1-й. На 1-мъ часѣ́ тропа́рь пра́здника. Сла́ва, свята́го. И ны́нѣ, богоро́диченъ часо́въ. По трисвято́мъ кондаки́ пра́здника и свята́го, глаго́лемъ, премѣня́юще.

Стихи́ры на пома́заніи, гла́съ 2. Подо́бенъ: Егда́ отъ дре́ва.

Вся́, я́же въ житіи́, презрѣ́въ,* то́чію еди́наго Влады́ки любви́ ду́шу приве́лъ еси́,* вели́кій Гео́ргіе, свѣти́льниче всемíрный,* и къ безмѣ́рнымъ му́камъ отлучи́лся еси́ му́жески,* побѣ́ды красе́нъ вѣне́цъ прія́лъ еси́.* Тѣ́мже мо́лимъ тя́, блаже́нне,* моли́ отъ бѣ́дъ всѣ́мъ изба́витися, пою́щимъ тя́.

Ско́рби и лю́тыя печа́ли,* житія́ треволне́нія и бу́ри ны́нѣ мя́ обурева́ютъ,* возмуще́ніемъ злы́хъ страсте́й одержи́мь е́смь.* Засту́пниче мо́й вели́кій, блаже́нне Гео́ргіе,* предста́въ, помози́ ми при́сно покро́вомъ твои́мъ,* вѣ́рою прибѣга́ющему ти́,* я́ко да ра́достію се́рдца, му́чениче,* ублажа́ю тя́, спаса́емь.

Сла́ва, гла́съ 4:

Пріиди́те, вѣ́рныхъ собо́ри, пріиди́те, пра́здникъ соста́вимъ, и́бо пресвѣ́тлая па́мять дне́сь яви́ся страстоте́рпца Гео́ргія, на́ша просвѣща́етъ неви́димо сердца́, добродѣ́тельми блиста́ющи. Тѣ́мже, единому́дренно воспѣва́юще, рце́мъ: ра́дуйся, во́ине вели́каго Царя́ Христа́; ра́дуйся, пресвѣ́тлая похвало́ вѣ́ры; ра́дуйся, всесвѣ́тле и пребога́те. О на́съ, преблаже́нне, всѣ́хъ Влады́ку, Христа́ Бо́га моли́, сохране́ннымъ бы́ти отъ искуше́ній лука́ваго и спасти́ ду́ши на́ша.

И ны́нѣ, пра́здника.



НА ЛИТУРГІИ,

Блаже́нна пра́здника, пѣ́снь рядова́я и отъ кано́на свята́го, пѣ́снь 3-я. Проки́менъ пра́здника и свята́го, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ дне́ и свята́го, Дѣя́нія, зача́ло 29. Аллилу́ія дне́ и свята́го, гла́съ 4: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится]. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Ева́нгеліе дне́ и свята́го, Іоа́нна, зача́ло 52. Прича́стенъ пра́здника и свята́го: Въ па́мять вѣ́чную бу́детъ пра́ведникъ, отъ слу́ха зла́ не убои́тся. На трапе́зѣ утѣше́ніе бра́тіи.


Ука́зъ о вели́комъ му́ченицѣ Гео́ргіи:

Начина́ется отъ дне́ Вели́каго пятка́ и восхо́дитъ до четвертка́ 5-я недѣ́ли по Па́сцѣ... [Уста́въ ма́рковыхъ гла́въ, ка́ко соверша́ти слу́жбу великому́ченика Гео́ргія зри́ въ типико́нѣ.]

Источникъ: Мине́я пра́здничная, имену́емая Анѳоло́гіонъ, содержа́щая слу́жбы Госпо́дскимъ и Богоро́дичнымъ пра́здникомъ и святы́мъ избра́ннымъ. — М.: Сѵнода́льная Тѵпогра́фія, 1901. — Л. 289 об. – 299 об.

/ Къ оглавленію раздѣла /


Наверхъ / Къ титульной страницѣ

0