Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 22-й де́нь.
Преподо́бнаго отца́ на́шего Ѳео́дора Сикео́та.

[ВЕЧЕРЪ,]
На Го́споди воззва́хъ: стихи́ры, гла́съ 5. Подо́бенъ: Преподо́бне о́тче.

Преподо́бне о́тче, свяще́нный Ѳео́доре, изъ ложе́снъ освяти́лся еси́ и позна́нъ бы́лъ еси́ Бо́гови, я́коже дре́вле Іеремíя: твое́ провозвѣсти́ рождество́ звѣзда́, твоего́ сія́ніемъ житія́ просвѣти́ся вселе́нная я́ко вои́стинну, и де́монская тма́ исчезе́, я́зи отгна́шася отъ вся́каго во́зраста, благода́ть истече́ вся́кихъ исцѣле́ній. Тѣ́мже вопіе́мъ ти́: Христа́ моли́ всегда́ дарова́ти мíрови ми́ръ и ве́лію ми́лость.

Преподо́бне о́тче, досточу́дне Ѳео́доре, крѣ́пкимъ воздержа́ніемъ и моли́твы огне́мъ ве́щь попали́въ грѣхо́вную всю́, воспрія́тъ Боже́ственную зарю́. Въ тя́ Тро́ическую благода́ть всели́лъ еси́ и ве́сь яви́лся еси́ свѣтови́денъ, лучи́ исцѣле́ній облиста́я, ви́дя пре́дняя, я́коже дре́вле Елиссе́й, рѣша́ непло́дствія у́зы, и прогоня́ де́монскія полки́ си́лою Боже́ственнаго Ду́ха, и моля́ся вселе́ннѣй дарова́ти ми́ръ и ве́лію ми́лость.

Преподо́бне о́тче, всечестны́й Ѳео́доре, со́лнце, всю́ уясни́вый зе́млю въ дѣ́лѣхъ и зна́меніяхъ неисче́тныхъ, да́ръ че́стенъ Христу́ Бо́гу, свяще́нства извѣ́стный степе́нь, мона́шествующихъ о́бразъ, утвержде́ніе вѣ́рою къ тебѣ́ притека́ющихъ, ка́мень честны́й и до́мъ Тро́ицы, окри́нъ, источа́ющій исцѣле́ній пуч́ину, Христу́ моли́ся всегда́ дарова́ти вселе́ннѣй ми́ръ и ве́лію ми́лость.

Сла́ва, и ны́нѣ, богоро́диченъ:

Кому́ уподо́билася еси́, душе́, успѣва́ющи въ го́ршихъ всегда́ и прилага́ющи безу́мно твои́мъ я́звамъ стру́пы мно́жайшія, я́ко всетѣле́снѣй бы́ти я́звѣ, не помышля́ющи, я́ко Судія́ приближа́ется, Ему́же предста́неши воспрія́ти по дѣя́ніемъ вины́ и томле́нія? Но, обра́щшися, припади́ къ Дѣ́вѣ, зову́щи: Влады́чице, Влады́чице, не пре́зри мя́, прогнѣ́вавшаго Бо́га Благоми́лостиваго, изъ Тебе́ на спасе́ніе человѣ́комъ ро́ждшагося и распе́ншагося пло́тію.

Крестобогоро́диченъ:

Егда́ Гро́здъ, ненасажде́нъ су́щь, я́ко лоза́, отрасти́ла еси́, узрѣ́вши на дре́вѣ повѣ́шена, прободе́на же копіе́мъ въ Боже́ственная ре́бра: что́ сіе́, — глаго́лаше, — Сы́не и Бо́же Мо́й? Ка́ко, Иже неду́ги вся́ и стра́сти исцѣля́яй, стра́сти терпи́ши, безстра́стенъ сы́й по естеству́ Боже́ственному? Что́ Ти́ безблагода́тніи лю́діе, Благода́телю, сія́ возда́ша вмѣ́сто благодѣя́ній? — вопія́ше Пречи́стая. Но Того́ страстьми́ страсте́й мя́ свободи́ти моли́ непреста́нно, я́ко да сла́влю Тя́.

Тропа́рь, гла́съ 2:

Позна́нъ бы́въ отъ пеле́нъ освяще́нъ и я́влься благода́тей испо́лненъ, чудесы́ мíръ озари́лъ еси́ и де́моновъ мно́жество отгна́лъ еси́, священнодѣ́телю Ѳео́доре, тѣ́мже о на́съ моли́ся Го́сподеви.


[НА УТРЕНИ,]
Кано́нъ, творе́ніе Іо́сифово, гла́съ 4.

Пѣ́снь 1.

Ирмо́съ: Наста́вльшему дре́вле Изра́иля, бѣжа́щаго отъ рабо́ты фарао́новы, и въ пусты́ни пита́вшему, пои́мъ Изба́вителю, Бо́гу на́шему, я́ко просла́вися.

Богосія́нную тя́ звѣзду́ мы́сленное Со́лнце тве́рди, прему́дре, церко́внѣй показа́, лучи́ чуде́съ испуща́юща всегда́ и страсте́й мглу́ потребля́юща.

Отъ ма́тернихъ тя́ ложе́снъ Творе́цъ, преподо́бне, я́коже Іеремíю пе́рвѣе, освя́щъ, содѣ́ла сосу́дъ Ду́ха благопотре́бенъ, ду́хи отгоня́ща лука́выя, о́тче Ѳео́доре.

По́томъ воздержа́нія пла́мень страсте́й погаси́лъ еси́ и одожде́ніемъ моли́твъ струи́ чуде́съ источи́лъ еси́, болѣ́зней разжже́ніе, преподо́бне, погаша́юща я́вѣ, Ѳео́доре.

Богоро́диченъ: Невоздѣ́ланный Гро́здъ отъ Твоея́ утро́бы процвѣте́, Дѣ́во Ма́ти, сла́дость источа́я оставле́нія и весе́ліе безсме́ртно, Чи́стая, отъ пія́нства лю́тыхъ объюродѣ́вшимъ.

Пѣ́снь 3.

Ирмо́съ: Утвержда́яй гро́мъ и созида́яй ду́хъ, утверди́ мене́, Го́споди, да Тя́ пою́ и́стинно и творю́ во́лю Твою́, я́ко нѣ́сть свя́тъ, я́ко Ты́, Бо́же на́шъ.

Яко чу́дно житіе́ твое́, богому́дре, я́ко стра́шна чудеса́, я́ко высо́ко твое́, е́же къ Бо́гу, и присвое́ніе, и манове́ніе, и неукло́нно восхожде́ніе, всесла́вне Ѳео́доре.

Стремле́ніе страсте́й возрази́лъ еси́, преблаже́нне, болѣ́зненными отда́ніи и де́моновъ лука́вая потреби́лъ еси́ ловле́нія Пресвята́го Ду́ха крѣ́постію, Ѳео́доре.

Иже къ честнѣ́й притека́юще ра́цѣ твое́й, отъ сея́ почерпа́емъ исцѣле́ній сокро́вища, и чуде́съ пучи́ны, и да́ръ незави́стный, пою́ще тя́, Ѳео́доре.

Богоро́диченъ: Зако́ны естества́ въ Тебѣ́, Дѣ́во, обновля́ются, ражда́еши бо па́че естества́ Содѣ́теля, па́че сло́ва Влады́ку. Его́же прилѣ́жно моли́ спасти́ ду́ши на́ша.

Сѣда́ленъ, гла́съ 8. Подо́бенъ: Прему́дрости.

Отъ Бо́га тезоимени́тъ да́ръ да́нъ бы́въ человѣ́комъ, на избавле́ніе болѣ́зней мно́гихъ, вели́ка и ужа́сна сотвори́лъ еси́ чудеса́, я́зю вся́ку и неду́гъ исцѣля́я и де́моновъ полки́ отгоня́я сло́вомъ. Тѣ́мже и досто́йно Христо́ву Це́рковь упа́слъ, единожи́тель апо́столовъ бы́лъ еси́, святи́телю Ѳео́доре, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ воплоще́нному безъ сѣ́мене, моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Агнца и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Услы́шахъ, Бо́же, слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди, я́ко Твоего́ хвале́нія испо́лнь земля́.

Пото́къ сы́й я́вѣ, испо́лненъ во́дъ боже́ственныхъ, дарова́ній Ду́ха напоя́еши всю́ Це́рковь, о́тче Ѳео́доре.

Удави́лъ еси́ врага́ жи́лами болѣ́зней твои́хъ, преблаже́нне, и того́ потреби́лъ еси́ лука́вая во́инства моли́твъ твои́хъ мече́мъ, Ѳео́доре.

Поуча́яся въ зако́нѣ Бо́жіи, при исхо́дищихъ воздержа́нія боже́ственное дре́во возрасти́лъ еси́, благопло́діе дѣя́ній добродѣ́тельныхъ принося́, Ѳео́доре.

Богоро́диченъ: Блаже́нна отъ родо́въ всѣ́хъ показа́лася еси́, Христа́ ро́ждши, блаже́нны содѣва́ющаго тому́ рабо́тающія, Дѣ́во Ма́ти Чи́стая Влады́чице.

Пѣ́снь 5.

Ирмо́съ: Возсія́й ми́, Го́споди, свѣ́тъ повелѣ́ній Твои́хъ, я́ко къ Тебѣ́ ду́хъ мо́й у́тренюетъ и пое́тъ Тя́: Ты́ бо еси́ Бо́гъ на́шъ, и къ Тебѣ́ прибѣга́ю, Царю́ ми́ра.

Неусыпа́ющую свѣщу́ тя́ и свѣ́щникъ неугаса́ющь Свѣ́тъ Безлѣ́тный показа́ мра́комъ держи́мымъ страсте́й, Ѳео́доре, очерне́ніемъ мно́гихъ грѣхо́въ.

До́брѣ на стезю́ тя́ наставля́юща му́ченика Гео́ргія отъ млады́хъ ногте́й имѣ́лъ еси́ и сему́ уподо́бился еси́ вся́кимъ усе́рдіемъ и ко Го́споду, о́тче преподо́бне, любо́вію.

Непоро́чно воздержа́ніе, терпѣ́ніе несосу́дно, вѣ́ру, и наде́жду, и смире́ніе, любо́вь же и стоя́ніе имѣ́лъ еси́ па́че человѣ́ка. Тѣ́мже премно́гую благода́ть обрѣ́лъ еси́ отъ Бо́га.

Богоро́диченъ: Кропле́ніемъ ми́лости Твоея́ напо́й, Пречи́стая, иста́явшую мою́ мы́сль пла́менемъ грѣха́ и уга́сшій се́рдца моего́ возжзи́ свѣти́льникъ, две́ре Свѣ́та.

Пѣ́снь 6.

Ирмо́съ: Бу́ря мя́ помышле́ній пости́гши, во глубину́ низвлачи́тъ мя́ безмѣ́рныхъ грѣхо́въ, но Ты́, Упра́вителю Благíй, предвари́въ, упра́ви, я́ко проро́ка, и спаси́ мя.

Печа́ль земны́хъ оттря́слъ еси́ и все́ истощи́лъ еси́ жела́ніе ко Влады́цѣ, наслажда́яся Сего́ добро́тами и истека́ющими отту́ду, о́тче, свѣтлостьми́.

Растопи́лъ еси́ мра́зъ грѣхо́вный, сту́денію напоя́емь, стоя́ посредѣ́ вѣ́тренника, я́ко безпло́тенъ, о́тче, прило́ги претерпѣ́лъ еси́ возду́шныя, Боже́ственною согрѣва́емь благода́тію.

Ра́цѣ твое́й свяще́ннѣй приступа́юще, благово́нія боже́ственнаго ра́зума исполня́емся, святи́телю, смра́да избавля́ющеся страсте́й, любо́вію тя́ чту́щіи, чудотво́рче о́тче преподо́бне.

Богоро́диченъ: Страсте́й мя́ треволне́ніе смуща́етъ, глубина́ отча́янія, обурева́етъ мое́ се́рдце. Ко́рмчію ро́ждши Христа́, Дѣ́во, и Спа́са, изба́ви мя́ и спаси́ моли́твами Твои́ми.

Конда́къ, гла́съ 3. Подо́бенъ: Дѣ́ва дне́сь.

Яко на о́гненную колесни́цу добродѣ́тельми, богоно́се, возше́дъ, восте́клъ еси́ на небе́сная жили́ща, я́ко а́нгелъ, съ человѣ́ки пожи́лъ еси́ и, я́ко человѣ́къ, со а́нгелы о́крестъ ликовству́еши. Сего́ ра́ди показа́лся еси́ чуде́съ боже́ственное прія́телище, Ѳео́доре преподо́бне.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Яко нело́женъ святи́тель, же́ртву безкро́вную прине́слъ еси́ ду́хомъ и страсте́й умерщвле́ніемъ, же́ртву благово́нну, преблаже́нне, тебе́ Влады́цѣ прине́слъ еси́ вѣ́рою.

Огнь сласте́й воздержа́нія по́томъ погаси́лъ еси́ и бездо́ждіе земли́ уста́вилъ еси́ ту́чь пролія́ніемъ, чудотво́рче, я́коже Илія́, небеса́ затворе́на моли́твами твои́ми отверза́я.

Освя́щся отъ младе́нства, моли́твенною до́блестію непло́дныя сотвори́лъ еси́ утро́бы многоча́дны, слѣпы́мъ по́далъ еси́ прозрѣ́ніе и хромы́мъ благотече́ніе, Ѳео́доре треблаже́нне.

Богоро́диченъ: Добро́ту Іа́ковлю Тя́ Бо́гъ избра́, и въ Тя́ всели́ся, и Тя́ соблюде́ по рождествѣ́ Дѣ́ву, я́коже бѣ́ пре́жде рождества́, Дѣ́во Богороди́тельнице.

Пѣ́снь 8.

Ирмо́съ: Земля́ и вся́, я́же на не́й, мо́ре и вси́ исто́чницы, небеса́ небе́съ, свѣ́тъ и тма́, мра́зъ и зно́й, сы́нове человѣ́честіи, свяще́нницы, благослови́те Го́спода и превозноси́те Его́ во вѣ́ки.

На ка́мени терпѣ́нія утверди́въ твоя́ восхожде́нія душе́вная, не побѣди́лся еси́ прило́ги сопроти́вными, не поколеба́лся еси́ навѣ́ты вра́жіими, но къ высотѣ́ Боже́ственнѣй восте́клъ еси́, о и́же въ вѣ́рѣ чту́щихъ тя́ моля́.

Струя́ происхо́дитъ отъ ра́ки твоея́ исцѣле́ній вся́кихъ, и омыва́етъ скве́рны страсте́й, и гное́ніе лю́тыхъ очища́етъ, и вѣ́рныхъ напая́етъ, Ѳео́доре, всѣ́хъ сердца́, любо́вію чту́щихъ тя́.

Даро́въ Боже́ственныхъ тезоимени́тъ и таи́нникъ Христо́въ, по́стниковъ добро́та, свяще́нниковъ красота́, чуде́съ исто́чникъ, честна́я мѵрополо́жница Ду́ха, ны́нѣ да восхва́лится Ѳео́доръ вели́кій.

Богоро́диченъ: Свяще́нніи Тя́ проро́ковъ проповѣ́дуютъ гла́си обра́зно: две́рь, и го́ру, и сѣ́нь, зе́млю святу́ю, свѣ́та о́блакъ, изъ него́же су́щимъ во тмѣ́ и сѣ́ни сѣдя́щимъ возсія́ Со́лнце, Дѣ́во, Христо́съ свѣтода́вецъ.

Пѣ́снь 9.

Ирмо́съ: Яко сотвори́ Мнѣ́ вели́чіе Си́льный, и свя́то и́мя Его́, и ми́лость Его́ въ ро́дъ и ро́дъ боя́щимся Его́.

Яко у́тро, я́ко де́нь свѣ́телъ, тво́й пра́здникъ яви́ся, просвѣща́ющъ на́ша сердца́, вѣ́рно восхваля́ющихъ честны́я болѣ́зни твоя́, о́тче Ѳео́доре.

Собесѣ́дникъ а́нгеловъ, апо́столовъ, страда́льцевъ, преподо́бныхъ и пра́ведниковъ бы́въ, о́тче, и святи́телей, на небесѣ́хъ о на́съ Христа́ мо́лиши при́сно.

Де́нь спасе́нія, пра́здникъ весе́лія яви́ся, стеце́мся, вѣ́рніи, очи́стивше ду́ши, святи́тель созыва́етъ на́съ Ѳео́доръ.

Богоро́диченъ: Стра́шно Твое́ рождество́, Богоро́дице, Ма́ти Христо́ва, тѣ́мже Тя́ ублажа́емъ, Чи́стая, и прославля́емъ че́стно, ро́дове родо́въ во вѣ́ки, ами́нь.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 92 об. – 96.

/ Къ оглавленію раздѣла /


Наверхъ / Къ титульной страницѣ

0