Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 21-й де́нь.
Слу́жба свято́му священному́ченику Іаннуа́рію и дружи́нѣ его́,
отправля́емая по Церко́вному чиноположе́нію со всено́щнымъ бдѣ́ніемъ
[1].

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченцы.

Святи́тельскую оде́жду* свѣ́тло вои́стинну украси́сте* муче́нія кро́вію,* и обою́ду свѣ́тло украси́вшеся,* со а́нгелы Зижди́телю предста́сте,* уго́дницы сла́вніи.* Его́же моли́те,* дарова́ти душа́мъ на́шимъ* ми́ръ и ве́лію ми́лость. [Два́жды.]

Богодухнове́нныя орга́ны,* вои́стинну на́мъ яви́стеся,* возвѣща́юще неизрече́нная Бо́жія та́инства* писа́нія Боже́ственнаго.* Идольское безу́міе облича́юще,* всѣ́хъ ко Христу́ приведо́сте.* Его́же моли́те,* дарова́ти душа́мъ на́шимъ* ми́ръ и ве́лію ми́лость.

Сло́вомъ богоразу́мія* лю́ди отъ невѣ́дѣнія прему́дріи,* до конца́ изба́висте,* и приведо́сте спасе́ны сія́* Сло́ву возсія́вшему,* изъ Отца́ рожде́нному, Христу́ Бо́гу на́шему.* Тому́ помоли́теся,* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 8:

Отъ вре́менныхъ кру́гъ преше́дше богозва́нніи, седмери́цею біе́ми, и стру́жеми преходя́ще, и вси́ распина́еми за Христа́. Ни о́гнь, ни ра́ны, ни ору́жіе, ду́шъ ва́шихъ разсла́биша крѣ́пости, и попра́ли есте́ бѣсо́вскую крѣ́пость, священному́ченицы сла́вніи, тѣ́мъ моли́те Христа́ Бо́га, спасти́ ду́ши на́ша.

И ны́нѣ, пра́здника.

На стихо́внѣ стихи́ры пра́здника. Сла́ва святы́хъ, гла́съ 4:

Му́ченицы непобѣди́міи, іера́рси прехва́льніи, и свѣти́льницы всемíрніи, столпи́ непобори́міи Боже́ственныя Це́ркве, и степе́нь уче́ній, и наста́вницы благочести́выхъ, и потреби́теліе бы́сте ересе́й, отцы́ богому́дренніи, свѣ́тліи наста́вницы ду́шъ на́шихъ, а́нгеломъ собесѣ́дницы, и Тро́ицѣ побо́рницы.

И ны́нѣ, пра́здника.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.

Сла́ва, и ны́нѣ, пра́здника. Ектенія́ и отпу́стъ.



НА ВЕЛИЦѢЙ ВЕЧЕРНИ,
Пое́мъ Блаже́нъ му́жъ, 1-й антифо́нъ. На Го́споди воззва́хъ.., стихи́ры пра́здника 3 и свята́го Іаннуа́рія 5, гла́съ 4. Подо́бенъ: Яко до́бля.

Свяще́нникъ свяще́ннѣйшій,* страда́лецъ зако́ненъ,* о Іаннуа́ріе, ты́ бы́лъ еси́,* не чужди́ми кровьми́,* но твои́ми па́че* въ са́мое то́ не́бо вше́дъ,* идѣ́же Предте́ча всѣ́хъ е́сть Іису́съ,* при́сно Сего́, о́тче, зря́ и ви́дя,* Его́же а́нгели ви́дятъ. [Два́жды.]

И мече́мъ усѣка́емь,* и на о́гнь помета́емь,* и звѣре́мъ дае́мь, досточу́дне,* и въ темни́цѣ затворя́емь на дни́ мно́ги,* непрекло́ненъ умо́мъ* си́лою Боже́ственною пребы́лъ еси́* и сконча́лъ еси́ по́двигъ, зако́нно пострада́въ,* свяще́нне чудоно́сне,* безпло́тныхъ собесѣ́дниче. [Два́жды.]

Дисиде́рія, и Проку́ла,* Со́са, Фа́вста, Евтихíя,* Іаннуа́рія сла́внаго* и му́драго Акутíона* согла́сно почти́мъ,* я́ко му́дрыя священнодѣ́йственники,* я́ко вѣнцено́сцы му́ченики,* я́ко гра́да свята́го гра́жданы,* моли́твенники же тѣ́хъ, блажа́щихъ и́стинны су́ща.

Сла́ва, гла́съ то́йже:

Свяще́нникъ свяще́ннѣйшій,* страда́лецъ зако́ненъ,* о Іаннуа́ріе, ты́ бы́лъ еси́,* не чужди́ми кровьми́,* но твои́ми па́че* въ са́мое то́ не́бо вше́дъ,* идѣ́же Предте́ча всѣ́хъ е́сть Іису́съ,* при́сно Сего́, о́тче, зря́ и ви́дя,* Его́же а́нгели ви́дятъ.

И ны́нѣ, пра́здника.
Вхо́дъ. Проки́менъ дне́ и чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 5.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ра хра́ма или́ пра́здника.
И святы́хъ, гла́съ 4. Подо́бенъ: Яко до́бля.

Свяще́ннымъ пома́заніемъ,* и му́ченическою кро́вію,* Бо́гу прибли́жишася священному́ченцы всесла́вніи,* цвѣ́тъ есте́ственный,* добро́та слове́сная,* прему́дрости верхо́вники,* пра́вости богосло́вія,* пра́вило вѣ́ры,* всесоста́вное исправле́ніе,* и Це́рквамъ благолѣ́піе.

Стра́ждущимъ прославле́ніе,* му́ченикомъ велича́ніе подпису́юще,* увѣ́ристеся богому́дріи,* дерза́ти до́блественно* на разли́чныя му́ки,* и ю́зы и темни́цы,* и тѣле́съ обнаже́нія,* и вяза́нія,* и сту́дени лю́тыя,* по́слѣжде и на ра́ны и сме́рть священному́ченцы.

Многообра́зныхъ ра́ди муче́ній* совле́кшеся умерщвле́нія,* му́ченицы сла́вніи,* въ нетлѣ́нія ри́зу облеко́стеся.* И ны́нѣ на небесѣ́хъ живете́,* Боже́ственному Престо́лу всегда́ предстоя́ще.* Тѣ́мже вѣ́рою* всесвѣ́тлую па́мять ва́шу пра́зднуемъ,* ра́ку моще́й ва́шихъ облобыза́юще.

Сла́ва, гла́съ 8:

Во святи́телехъ и му́ченицехъ преидо́сте преподо́бніи, вѣ́рніи яви́стеся па́стыріе, и Христо́ву испи́вше ча́шу. Тѣ́мъ во обои́хъ благоугоди́вше Христу́, тому́ моли́теся о всѣ́хъ на́съ съ го́рними слуга́ми, во свѣ́тѣ ны́нѣ водворя́ющеся.

И ны́нѣ, пра́здника.

На стихо́внѣ стихи́ры, гла́съ 4. Подо́бенъ: Яко до́бля.

Яко звѣ́зды многосвѣ́тлыя* мы́сленно возсія́вше на Церко́внѣй тве́рди,* всю́ тва́рь просвѣща́ете,* тму́ прогоня́юще по́двигомъ свѣ́та,* и чуде́съ сія́ньми,* тѣ́мъ дне́сь веселя́щеся,* соверша́емъ свѣтоно́сную* и святу́ю ва́шу па́мять,* священному́ченцы сла́вніи.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Апо́столомъ равноче́стніи,* священнонача́льницы бы́вше,* по́мыслъ купноревни́тельный воспріе́мше,* не убоя́вшеся безбо́жія* мучи́тельскаго суровства́,* но му́жески и крѣ́пко Спа́са проповѣ́давше,* претерпѣ́сте многоразли́чныя зло́бы,* того́ ра́ди бу́дущая возда́нія* ны́нѣ воспріе́млете, всему́дріи.

Сти́хъ: Блаже́нъ му́жъ боя́йся Го́спода,* въ за́повѣдехъ Его́ восхо́щетъ зѣло́.

Слу́жбы принося́ще честны́я всеси́льніи,* и же́ртву непоро́чную Влады́цѣ Христу́* всесожже́нія соверше́нна* Тому́ принесо́сте себе́ страда́льчески,* священнонача́льницы блаже́нніи,* Его́же моли́те,* отъ тли́ и бѣ́дъ изба́вити* вѣ́рою соверша́ющихъ* честну́ю па́мять ва́шу.

Сла́ва, гла́съ то́йже:

Му́ченицы непобѣди́міи, іера́рси прехва́льніи, и свѣти́льницы всемíрніи, столпи́ непобори́міи Боже́ственныя Це́ркве, и степе́нь уче́ній, и наста́вницы благочести́выхъ, и потреби́теліе бы́сте ересе́й, отцы́ богому́дренніи, свѣ́тліи наста́вницы ду́шъ на́шихъ, а́нгеломъ собесѣ́дницы, и Тро́ицѣ побо́рницы.

И ны́нѣ, пра́здника.

Тропа́рь, гла́съ 4, два́жды [пи́санъ на ма́лѣй вече́рни] и Богоро́дице Дѣ́во, еди́ножды.
И благослове́ніе хлѣ́бовъ по обы́чаю и чте́ніе.



НА УТРЕНИ,
На Бо́гъ Госпо́дь: тропа́рь пра́здника, два́жды. Сла́ва, святы́хъ. И ны́нѣ, пра́здника.

По 1-й стихоло́гіи сѣда́ленъ праздника. Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 8. Подо́бенъ: Прему́дрости.

Пучи́ны прему́дрости уча́ще, духо́вныя глубины́, Тро́ическое еди́но Божество́ проповѣ́дали есте́ преподо́бніи, исписа́вше а́нгельскія чи́ны, и та́йны тѣ́хъ сія́ній богому́дріи, тѣ́мъ и ни́жнее святи́тельство устроя́юще, ко еди́ному возведо́стеся соедине́нію священному́ченцы, моли́те Христа́ Бо́га, согрѣше́ній оставле́ніе дарова́ти, чту́щимъ любо́вію святу́ю па́мять ва́шу.

Сла́ва, гла́съ 5. Подо́бенъ: Собезнача́льное Сло́во.

Апо́стольскимъ вѣща́ніемъ огласи́вше сво́й у́мъ, и упа́сше преподо́бніи вѣ́рныхъ соста́въ, же́ртву чи́сту принесли́ есте́ Царю́ и Творцу́, вопло́щшемуся за ны́ отъ Дѣ́вы Богоро́дицы, и воскре́сшему со сла́вою, Его́же предъ мучи́тели исповѣ́давше священному́ченцы.

И ны́нѣ, пра́здника или́ богоро́диченъ:

Те́плая предста́тельнице и непобѣди́мая, упова́ніе извѣ́стное и непосты́дное, стѣно́ и покро́ве и приста́нище прибѣга́ющимъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы, ми́ръ да́ти мíру, и спасе́ніе и ве́лію ми́лость.

По Хвали́те и́мя Госпо́дне...

Припѣ́въ: Велича́емъ ва́съ священному́ченцы Христо́вы, и чте́мъ святу́ю па́мять ва́шу, вы́ бо мо́лите за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы...

По поліеле́и сѣда́ленъ, гла́съ 1. Подо́бенъ: Ка́мени запеча́тану.

Пло́дъ богоразу́мія воздѣ́лавше труды́ свои́ми, изъ ко́рене безбо́жія исто́ргли есте́ остны́ уче́нія, и ма́стію пома́завшеся благода́тію, упасли́ есте́ лю́ди священному́ченцы, и зако́нно пострада́вше, сугу́бы по́чести отъ Христа́ сподо́бистеся. Сла́ва Да́вшему ва́мъ крѣ́пость, сла́ва Вѣнча́вшему ва́съ, сла́ва Даю́щему ва́ми всѣ́мъ исцѣле́ніе. [Два́жды.]

Сла́ва, и ны́нѣ, пра́здника или́ богоро́диченъ:

Ру́цѣ твои́ боже́ственніи, и́миже Созда́теля понесла́ еси́ Дѣ́во Пресвята́я, вопло́щшагося бла́гостію, просте́рши умоли́ Его́, изба́вити на́съ отъ искуше́ній, и страсте́й, и бѣ́дъ, хва́лящихъ Тя́ любо́вію, и вопію́щихъ: сла́ва Все́льшемуся въ Тя́, сла́ва Проше́дшему изъ Тебе́, сла́ва Изба́вльшему на́съ рождество́мъ Твои́мъ.

Та́же, степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Та́же: Вся́кое дыха́ніе... Ева́нгеліе Луки́, зача́ло 24.

По 50-мъ псалмѣ́ стихи́ра, гла́съ 4. Самогла́сна:

Яко столпи́ су́ще Це́ркве Христо́вы, стѣ́ны разори́ли есте́ невѣ́рствія крѣ́пко, самобра́тія му́ченцы, тѣ́мъ пре́жде сме́рти ерети́ческую бу́рю разруши́сте, моля́щеся о душа́хъ на́шихъ.

Кано́нъ пра́здника со ирмосо́мъ на 6 и свята́го Іаннуа́рія на 8, гласъ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Сы́й съ во́инствы невеще́ственныхъ а́нгелъ, и прича́стіемъ свѣ́та незаходи́маго ду́шу свяще́нно просвѣща́я, просвѣти́ ми́ се́рдце, свѣтоно́сный тво́й дне́сь пра́здникъ восхваля́ющу, блаже́нне.

Во́инство свѣтови́дно, свяще́нный собо́ръ пострада́ съ тобо́ю терпѣли́вно, му́дре священнодѣ́йственне, съ ни́миже вся́ко разори́лъ еси́ змíево кова́рство, претерпѣ́въ многоплете́нныя смы́сломъ му́ки.

Стопа́мъ Христа́, вели́каго и пе́рваго Па́стыря, му́дре, послѣ́дуя, обагре́ніи муче́нія уясни́лъ еси́ твоего́ святи́тельства оде́жду, сего́ ра́ди тя́ почита́емъ ума́ пра́востію.

Богоро́диченъ: Блаже́ни су́ть лю́діе, Богоро́дице, сла́вящіи Тя́, Ма́терь Бо́жію нело́жную, и при́сно блажа́щіи Тя́, Чи́стая, я́коже прорекла́ еси́, свяще́нно прорица́ющи, егда́ Христа́ вну́трь носи́ла еси́.

Катава́сія пра́здника.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Заре́ю Свята́го Ду́ха огражде́нъ, посредѣ́ пе́щи ликова́лъ еси́, ю́ношамъ и́же пе́рвѣе преподо́бнымъ, преблаже́нне, подо́бяся.

Чи́ни свяще́нныхъ си́лъ посредѣ́ пе́щи съ тобо́ю, богому́дре, ликова́ху, съ ни́миже пое́ши Благодѣ́теля, пребыва́я неопали́мь.

Рѣка́, ме́двена уче́ній медото́чныхъ твои́хъ, Іаннуа́ріе прему́дре, вои́стинну язы́къ тво́й бы́сть, мы́сли зря́щихъ тя́ наслажда́ющи.

Богоро́диченъ: Расто́ргни плѣни́цы, Богоневѣ́сто, грѣхо́въ мои́хъ, я́же у́зы расто́ргши а́довы рождество́мъ Твои́мъ и ра́дости вся́ испо́лньши.

Конда́къ пра́здника и и́косъ.
Сѣда́ленъ, гла́съ 4. Подо́бенъ: Вознесы́йся.

Свяще́нія оде́жду обагри́въ крове́й твои́хъ омоче́ніи, свѣтлѣ́йшу я́вѣ показа́лъ еси́, уго́дниче Христо́въ. Тѣ́мже вше́лъ еси́ во оби́тели вѣ́чныя, источа́я чту́щимъ тя́ исцѣле́ній пучи́ну и моля́ всегда́ Бо́га всѣ́мъ да́ти прегрѣше́ній проще́ніе. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Вси́ Со́са діа́кона и страда́льца и свяще́ннаго Фа́вста, Проку́ла же вели́каго и Дисиде́рія же согла́сно почти́мъ.

Дрема́ніемъ нече́стія, Проку́ле му́чениче, ты́ ника́коже воздрема́лся еси́, бо́дростьми боже́ственными все́ успи́лъ еси́ безбо́жныхъ зломы́сліе.

Но́ва я́ко Даніи́ла тя́, звѣре́й посредѣ́ со страда́льцы спаса́етъ, невре́дна изводи́ма, о Іаннуа́ріе, Христо́съ Бо́гъ на́шъ.

Богоро́диченъ: Возвели́чимъ еди́ну Благослове́нную, Ея́же ра́ди вельми́ всѣ́хъ благослови́ вои́стинну Всепреблагíй, отъ Сея́ воплоща́емь.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Кро́вію свяще́нною оде́жду твою́, пребога́те, соверши́лъ еси́ свѣтлѣ́йшу и къ Це́ркви Вы́шнѣй я́ко свяще́нникъ прише́лъ еси́.

Исте́кши на земли́ многочестнѣ́й кро́ви твое́й, бы́лъ еси́ исцѣле́ній рѣка́, страсте́й изсуша́я пото́ки.

Непра́веднаго судію́ ослѣпле́на моли́твою твое́ю просвѣти́лъ еси́, милосе́рдію Влады́ки всѣ́хъ подо́бяся, пребога́те.

Богоро́диченъ: Пое́мъ Тя́, Ея́же ра́ди су́щимъ во тмѣ́ Свѣ́тъ незаходи́мый возсія́, Богоро́дице, всѣ́хъ Влады́ка, и любо́вію ублажа́емъ.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Глаго́лы зна́менія ви́дя тя́, собо́ръ беззако́нныхъ, дѣ́юща, священнотаи́нниче, ко Творцу́ отъ души́ прихо́дитъ, пресла́вно просвѣща́емь.

Яви́лся еси́ пре́жде конца́, святи́телю, и по боже́ственнѣй кончи́нѣ, творя́ мно́жество чуде́съ, да́ръ Свята́го Ду́ха отъ младе́нства пріе́мъ.

Ны́нѣ свяще́ннымъ согла́сіемъ Фа́вста и Со́са вси́, Дисиде́рія съ Евти́хіемъ и му́драго Акутíона воспое́мъ, и съ Проку́ломъ богоно́снымъ.

Богоро́диченъ: Во благодѣя́ніе человѣ́комъ отъ Твои́хъ Чи́стыхъ крове́й воплоща́ется Бо́гъ Сло́во. Его́же прилѣ́жно, Богома́ти, моли́ спасти́ся душа́мъ на́шимъ.

Конда́къ, гла́съ 3:

Свяще́нія пома́заніемъ и муче́нія кро́вію украси́стеся, сла́вне Іаннуа́ріе и Ѳео́доре, и сія́ете всю́ду, въ вы́шнихъ лику́юще, и на́съ назира́йте, въ хра́мъ ва́шъ прише́дшія и въ не́мъ непреста́нно зову́щія: всѣ́хъ на́съ соблюди́те, моля́ще Человѣколю́бца Бо́га.

Икосъ:

Иже испе́рва боже́ственную добро́ту, Іису́се Животода́вче, озари́ мнѣ́, я́ко да воспою́ Твоя́ святи́тели, и́же по Тебѣ́ подви́гшіяся да́же до сме́рти, и вра́жію си́лу низложи́вше крѣ́пцѣ, и богоме́рзское нече́стіе обличи́вше, кре́стною си́лою утве́рждшеся Христе́, отъ Тебе́ сла́ву прія́ша досто́йно, тѣ́мже зове́мъ и́мъ: ра́дуйтеся по́стниковъ всѣ́хъ основа́ніе.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Отроко́мъ боже́ственнымъ уподо́бился еси́ посредѣ́ пла́мене, о Іаннуа́ріе! Соше́ствіемъ а́нгела, лику́я о́крестъ и пѣ́сньми та́йными Спа́са поя́: благослове́нъ еси́, Го́споди, Бо́же оте́цъ на́шихъ.

Безболѣ́зненъ по́мыслъ тво́й благода́тію Боже́ственною соблюда́я, и пре́жде страда́нія неду́ги исцѣли́лъ еси́ вся́кія, па́стырь, и му́ченикъ, и вели́къ чудотво́рецъ познава́емь.

Стоя́лъ еси́ предъ суди́щемъ, му́чениче, мучи́телей, стражда́ терпѣли́вно, и злочести́выя посрамля́я, и прельще́ннымъ всѣ́мъ показу́я и́стину.

Богоро́диченъ: Умертви́ моя́ движе́нія, Пречи́стая, плотска́я, я́же Живо́тъ ро́ждшая, оживи́, Чи́стая, ду́шу мою́, умерщвле́нную страстьми́ и мно́гими грѣхи́.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Да восхва́лится вели́кій Проку́лъ со Аку́тіемъ, и Евти́хій, и боже́ственный Дисиде́рій, Фа́встъ же и Со́съ доблему́дренніи, Спа́са сла́вніи му́ченицы.

Тя́ ли́къ страда́лецъ блаже́нный верхо́вника притяжа́, попра́, священнотаи́нниче сла́вне, ве́рхъ де́моновъ, и безбо́жія вознесе́нную горды́ню потреби́.

Якоже о́троцы, о́гнь попра́лъ еси́ и звѣре́й стремле́нія обузда́лъ еси́, я́коже Даніи́лъ, всеизря́дне, и я́ко Па́велъ, во главу́ усѣ́клся еси́, благоче́стно сконча́въ тече́ніе твое́.

Богоро́диченъ: Всели́выйся несказа́нно во чре́во Твое́, Себѣ́ жили́ще показа́ Тя́, Пречи́стая Богоневѣ́сто, Ему́же непреста́нно вопіе́мъ: вся́ дѣла́, благослови́те Госпо́дня Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Іаннуа́рія честна́я боре́нія, по́двиги и біе́нія, е́же до кро́ве, му́жество, болѣ́зни и ну́ждную сме́рть, чуде́съ же неизмѣ́рную пучи́ну съ весе́ліемъ возвели́чимъ.

Ви́дѣнъ бы́лъ еси́ на высотѣ́ честна́го, сла́вне, муче́нія, я́коже незаходи́мое со́лнце; я́ко боже́ственныя звѣ́зды, му́ченикъ мно́жество веды́й и ны́нѣ просвѣща́етъ концы́ страда́ній вели́кихъ свѣ́тлостію.

Па́мять твоя́ свѣтоно́сная возсія́, лучи́ Боже́ственнаго Ду́ха ве́сь мíръ озаря́ющи, омраче́ніе зо́лъ отгоня́щи, въ не́йже тя́ мо́лимъ, богодухнове́нне, просвѣти́ вся́, пою́щія тя́.

Богоро́диченъ: Свѣ́та, и́же въ тебѣ́, сія́ніи, ослѣпле́нную ду́шу мою́ просвѣти́, и руко́ю наста́ви, Отрокови́це, въ пути́ спасе́нныхъ ходи́ти, и преле́стна отбѣ́гнути преткнове́нія, я́ко да вѣ́рою ублажа́ю тя́.

Свѣти́ленъ. Подо́бенъ: Жены́ услы́шите.

Ны́нѣ благонаро́читъ яви́ся на́мъ де́нь, иму́щій свяще́нныхъ прее́мникъ свяще́нныхъ апо́столъ, и богоно́сныя ку́пно проповѣ́дники вѣ́ры, и непобѣди́мыя му́ченки, и́хже моле́бную па́мять вѣ́рно вси́ соверша́емъ. [Два́жды.]

Сла́ва, и ны́нѣ, пра́здника.

На хвали́техъ стихи́ры пра́здника 3 и святы́хъ 3, гла́съ 4. Подо́бенъ: Яко до́бля.

Свяще́нникъ свяще́ннѣйшій,* страда́лецъ зако́ненъ,* о Іаннуа́ріе, ты́ бы́лъ еси́,* не чужди́ми кровьми́,* но твои́ми па́че* въ са́мое то́ не́бо вше́дъ,* идѣ́же Предте́ча всѣ́хъ е́сть Іису́съ,* при́сно Сего́, о́тче, зря́ и ви́дя,* Его́же а́нгели ви́дятъ.

И мече́мъ усѣка́емь,* и на о́гнь помета́емь,* и звѣре́мъ дае́мь, досточу́дне,* и въ темни́цѣ затворя́емь на дни́ мно́ги,* непрекло́ненъ умо́мъ* си́лою Боже́ственною пребы́лъ еси́* и сконча́лъ еси́ по́двигъ, зако́нно пострада́въ,* свяще́нне чудоно́сне,* безпло́тныхъ собесѣ́дниче.

Дисиде́рія, и Проку́ла,* Со́са, Фа́вста, Евтихíя,* Іаннуа́рія сла́внаго* и му́драго Акутíона* согла́сно почти́мъ,* я́ко му́дрыя священнодѣ́йственники,* я́ко вѣнцено́сцы му́ченики,* я́ко гра́да свята́го гра́жданы,* моли́твенники же тѣ́хъ, блажа́щихъ и́стинны су́ща.

Сла́ва, гла́съ 8:

Во святи́телехъ и му́ченицехъ преидо́сте преподо́бніи, вѣ́рніи яви́стеся па́стыріе, и Христо́ву испи́вше ча́шу. Тѣ́мъ во обои́хъ благоугоди́вше Христу́, тому́ моли́теся о всѣ́хъ на́съ съ го́рними слуга́ми, во свѣ́тѣ ны́нѣ водворя́ющеся.

И ны́нѣ, пра́здника.
Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна пра́здника, пѣ́снь рядова́я, и отъ кано́на святы́хъ, пѣ́снь 6-я. Проки́менъ пра́здника и святы́хъ, гла́съ 7: Честна́ предъ Го́сподемъ* сме́рть преподо́бныхъ Его́. [Сти́хъ: Что́ возда́мъ Го́сподеви о всѣ́хъ, я́же воздаде́ ми?] Апо́столъ дне́ и святы́хъ ко Филипписíемъ, зача́ло 247. Аллилу́ія пра́здника и святы́хъ, гла́съ 2: Свяще́нницы Твои́ облеку́тся въ пра́вду, [и преподо́бніи Твои́ возра́дуются. Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.] Ева́нгеліе отъ Луки́, зача́ло 77. Прича́стенъ пра́здника и святы́хъ: Ра́дуйтеся, пра́ведніи, о Го́сподѣ, пра́вымъ подоба́етъ похвала́.

Примѣчаніе:
[1] Служба святому священномученику Іаннуарію приводится въ соединеніи съ общей службой «священномученикомъ двѣма и многимъ»; напечатана въ 1765 году для отправленія всенощнаго бдѣнія во всѣхъ храмахъ Россійской Имперіи «въ Высокоторжественный день Рожденія Ея Императорскаго Величества Благочестивѣйшія Государыни Императрицы Екатерины Алексіевны, Самодержицы Всероссійскія».

Источникъ: Слу́жба свято́му священному́ченику Іаннуа́рію и дружи́нѣ его́, отправля́емая по Церко́вному чиноположе́нію со всено́щнымъ бдѣ́ніемъ, въ Высокоторже́ственный де́нь Рожде́нія ЕЯ ИМПЕРАТОРСКАГО ВЕЛИЧЕСТВА Благочести́вѣйшія Госуда́рыни ИМПЕРАТРИЦЫ ЕКАТЕРИНЫ АЛЕКСІЕВНЫ, Самоде́ржицы Всероссíйскія, Апри́ллія въ 21-й де́нь. — М.: Въ Сѵнодальной Тѵпогра́фіи, 1765. — 20 л.

/ Къ оглавленію раздѣла /


Наверхъ / Къ титульной страницѣ

0