Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 21-й де́нь.
Свята́го священному́ченика Іаннуа́рія и дружи́ны его́ и свята́го священному́ченика Ѳео́дора, и́же въ Пергíи.

[ВЕЧЕРЪ,]
На Го́споди воззва́хъ: стихи́ры Іаннуа́рія, гла́съ 4. Подо́бенъ: Яко до́бля.

Свяще́нникъ свяще́ннѣйшій,* страда́лецъ зако́ненъ,* о Іаннуа́ріе, ты́ бы́лъ еси́,* не чужди́ми кровьми́,* но твои́ми па́че* въ са́мое то́ не́бо вше́дъ,* идѣ́же Предте́ча всѣ́хъ е́сть Іису́съ,* при́сно Сего́, о́тче, зря́ и ви́дя,* Его́же а́нгели ви́дятъ.

И мече́мъ усѣка́емь,* и на о́гнь помета́емь,* и звѣре́мъ дае́мь, досточу́дне,* и въ темни́цѣ затворя́емь на дни́ мно́ги,* непрекло́ненъ умо́мъ* си́лою Боже́ственною пребы́лъ еси́* и сконча́лъ еси́ по́двигъ, зако́нно пострада́въ,* свяще́нне чудоно́сне,* безпло́тныхъ собесѣ́дниче.

Дисиде́рія, и Проку́ла,* Со́са, Фа́вста, Евтихíя,* Іаннуа́рія сла́внаго* и му́драго Акутíона* согла́сно почти́мъ,* я́ко му́дрыя священнодѣ́йственники,* я́ко вѣнцено́сцы му́ченики,* я́ко гра́да свята́го гра́жданы,* моли́твенники же тѣ́хъ, блажа́щихъ и́стинны су́ща.

Ины стихи́ры свята́го Ѳео́дора, гла́съ 4. Подо́бенъ: Да́лъ еси́ зна́меніе.

Предъ непра́веднымъ суди́щемъ,* великому́чениче Ѳео́доре, предстоя́,* обличи́лъ еси́ и́дольское безбо́жіе,* и біе́нъ бы́въ непра́ведно,* простре́нъ, преблаже́нне, на сковрадѣ́ разжже́ннѣ,* лю́тѣ пеко́мь,* и полива́емь росо́ю Ду́ха,* Иже тя́ тве́рдо укрѣ́пльшаго* разори́ти сверѣ́пство лю́таго борца́.

Колесни́ца Бо́га на́шего я́вственна бы́лъ еси́,* чи́стымъ се́рдцемъ твои́мъ Сего́ носи́ма имѣ́я, блаже́нне,* колесни́цѣ же привя́занъ,* рѣши́ши отъ у́зъ* и Христо́вѣ привяза́я любви́* и́же тя́ связа́вшія;* съ ни́миже вве́рженъ бы́въ въ пе́щь,* не опали́лся еси́, Ѳео́доре,* возвелича́я Го́спода съ тѣ́ми, досточу́дне.

На Крестѣ́ Просте́ршему ру́цѣ подо́бяся, блаже́нне,* распя́тся, Ѳео́доре,* пребы́лъ же еси́, ви́ся на три́ дни́,* до́ндеже въ ру́цѣ Бо́гу пре́далъ еси́ ду́шу,* тече́ніе сконча́лъ еси́ страда́нія,* му́чениковъ ве́рхъ,* Це́ркве пре́дній сто́лпе,* вѣ́рныхъ удобре́ніе,* а́нгеловъ собесѣ́дниче.

Сла́ва, и ны́нѣ, богоро́диченъ:

Одожди́ ми, Влады́чице,* Твоея́ ми́лости бе́здну* и опа́льшееся зно́емъ страсте́й се́рдце мое́,* я́ко Ми́лостива, напо́й, Отрокови́це,* и умиле́нія ка́пли точи́ти* непреста́нно сотвори́, молю́ся,* и́миже утѣше́нія сподо́блюся, Чи́стая,* е́же получи́ти и́мутъ* и́же и́скренно пла́кавшіися.

Крестобогоро́диченъ:

Распина́ема Христа́ Человѣколю́бца* ви́дящи, Пречи́стая,* и ре́бра ископава́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне,* Твоему́ во́льному распя́тію.


[НА УТРЕНИ,]
Кано́нъ свята́го Іаннуа́рія, гласъ 4.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Сы́й съ во́инствы невеще́ственныхъ а́нгелъ, и прича́стіемъ свѣ́та незаходи́маго ду́шу свяще́нно просвѣща́я, просвѣти́ ми́ се́рдце, свѣтоно́сный тво́й дне́сь пра́здникъ восхваля́ющу, блаже́нне.

Во́инство свѣтови́дно, свяще́нный собо́ръ пострада́ съ тобо́ю терпѣли́вно, му́дре священнодѣ́йственне, съ ни́миже вся́ко разори́лъ еси́ змíево кова́рство, претерпѣ́въ многоплете́нныя смы́сломъ му́ки.

Стопа́мъ Христа́, вели́каго и пе́рваго Па́стыря, му́дре, послѣ́дуя, обагре́ніи муче́нія уясни́лъ еси́ твоего́ святи́тельства оде́жду, сего́ ра́ди тя́ почита́емъ ума́ пра́востію.

Богоро́диченъ: Блаже́ни су́ть лю́діе, Богоро́дице, сла́вящіи Тя́, Ма́терь Бо́жію нело́жную, и при́сно блажа́щіи Тя́, Чи́стая, я́коже прорекла́ еси́, свяще́нно прорица́ющи, егда́ Христа́ вну́трь носи́ла еси́.

Инъ кано́нъ свята́го Ѳео́дора, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Да́ръ благопрія́тенъ и Влады́цѣ возлю́бленъ, му́ченикомъ украше́ніе яви́лся еси́, Ѳео́доре, сего́ ра́ди тебѣ́, я́ко да́ръ, приношу́ пѣ́ніе, пода́ждь ми́ твою́ по́мощь.

Красе́нъ тѣ́ломъ, удобре́нъ же Ду́хомъ сы́й, отлучи́лся еси́ къ боре́ніемъ льсти́ваго и, сего́ разрази́въ, побѣ́ды вѣне́цъ прія́лъ еси́.

Глаго́лы преоби́дѣлъ еси́ злочести́ваго, Ѳео́доре, себе́ же уго́дника Госпо́дня и́скрення, и во́ина Христа́ Царя́, и соверше́нна му́ченика я́вѣ показа́лъ еси́.

Богоро́диченъ: Всели́ся во чре́во Твое́ естество́мъ Непристу́пный, жи́тели показа́ на́съ, Пренепоро́чная, рая́ неизрече́ннымъ милосе́рдіемъ, отъ Него́же изгна́ни бы́хомъ за́вистію зміи́ною.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Заре́ю Свята́го Ду́ха огражде́нъ, посредѣ́ пе́щи ликова́лъ еси́, ю́ношамъ и́же пе́рвѣе преподо́бнымъ, преблаже́нне, подо́бяся.

Чи́ни свяще́нныхъ си́лъ посредѣ́ пе́щи съ тобо́ю, богому́дре, ликова́ху, съ ни́миже пое́ши Благодѣ́теля, пребыва́я неопали́мь.

Рѣка́, ме́двена уче́ній медото́чныхъ твои́хъ, Іаннуа́ріе прему́дре, вои́стинну язы́къ тво́й бы́сть, мы́сли зря́щихъ тя́ наслажда́ющи.

Богоро́диченъ: Расто́ргни плѣни́цы, Богоневѣ́сто, грѣхо́въ мои́хъ, я́же у́зы расто́ргши а́довы рождество́мъ Твои́мъ и ра́дости вся́ испо́лньши.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Хра́мъ бы́въ Ду́ха Боже́ственнаго, хра́мы же истука́нныя, му́дре, па́губныя потреби́лъ еси́ и словесы́ обличи́лъ еси́ ме́рзкая приноше́нія беззако́ннующихъ, Ѳео́доре.

Яростію и гнѣ́внымъ произволе́ніемъ бія́ше тя́ беззако́нный судія́, зако́ны Бо́га на́шего утвержда́юща, Ѳео́доре, Его́же зря́ предъ собо́ю, непоколеби́мь пребы́лъ еси́.

Положи́лся еси́ усе́рдно на сковрадѣ́ разжже́ннѣ, страда́льче, ре́вностію разгара́емь Бо́га Вседержи́теля и Того́ распаля́емь Боже́ственною любо́вію, Ѳео́доре.

Богоро́диченъ: Безлѣ́тный естество́мъ подъ лѣ́томъ изъ Тебе́ ви́дѣнъ бы́сть, роди́ся подо́біемъ пло́ти, лѣ́тняя моя́ прегрѣше́нія за милосе́рдіе неизрече́нное презря́, Всенепоро́чная.

Сѣда́ленъ, гла́съ 4. Подо́бенъ: Вознесы́йся.

Свяще́нія оде́жду обагри́въ крове́й твои́хъ омоче́ніи, свѣтлѣ́йшу я́вѣ показа́лъ еси́, уго́дниче Христо́въ. Тѣ́мже вше́лъ еси́ во оби́тели вѣ́чныя, источа́я чту́щимъ тя́ исцѣле́ній пучи́ну и моля́ всегда́ Бо́га всѣ́мъ да́ти прегрѣше́ній проще́ніе.

Сла́ва, гла́съ то́йже. Му́чениченъ:

Спаси́тельныхъ даро́въ тезоимени́таго и наслѣ́дника того́ блаже́нства, я́ко подо́бника и му́ченика Христа́ Бо́га, пріиди́те, восхва́лимъ, честну́ю его́ па́мять ны́нѣ торжеству́юще и къ нему́ вопію́ще: великому́чениче, моли́ся, согрѣше́ній дарова́ти на́мъ оставле́ніе.

И ны́нѣ, богоро́диченъ:

По Бо́зѣ во Тво́й, Богоро́дице, прибѣга́ю смире́нный покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу. Моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

Крестобогоро́диченъ:

Иже отъ Безнача́льнаго Отца́ рожде́ннаго напослѣ́докъ Тя́ пло́тію ро́ждшая, на Крестѣ́ ви́сяща, зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́, распина́ешися? Пою́ Тя́, Долготерпѣли́ве.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Вси́ Со́са діа́кона и страда́льца и свяще́ннаго Фа́вста, Проку́ла же вели́каго и Дисиде́рія же согла́сно почти́мъ.

Дрема́ніемъ нече́стія, Проку́ле му́чениче, ты́ ника́коже воздрема́лся еси́, бо́дростьми боже́ственными все́ успи́лъ еси́ безбо́жныхъ зломы́сліе.

Но́ва я́ко Даніи́ла тя́, звѣре́й посредѣ́ со страда́льцы спаса́етъ, невре́дна изводи́ма, о Іаннуа́ріе, Христо́съ Бо́гъ на́шъ.

Богоро́диченъ: Возвели́чимъ еди́ну Благослове́нную, Ея́же ра́ди вельми́ всѣ́хъ благослови́ вои́стинну Всепреблагíй, отъ Сея́ воплоща́емь.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Возлѣ́зша на сковраду́, небе́сный а́нгелъ, предста́въ, ороша́етъ, неопа́льно соблюда́я тя́, Ѳео́доре, рѣ́чныхъ во́дъ потече́ніи, и тру́сомъ, и шу́момъ, стра́шными показа́ніи.

Тебѣ́, вѣ́рно чудодѣ́йствующу, пре́лести прилѣжа́й, къ вѣ́рѣ внеза́пу, му́чениче, я́коже ка́мень, валя́ется, и къ ли́ку му́ченикъ устроя́ется Діоско́ръ, огне́мъ скончава́емь.

Во блюсти́тельницѣ поло́жся я́ко храни́тель Зижди́теля повелѣ́ніемъ, ю́же отъ младе́нства имѣ́лъ еси́ вѣ́ру, Бо́гу сохрани́лъ еси́ и сію́ неблюду́щихъ я́ко безу́мныхъ гнуша́лся еси́ соверше́ннымъ ра́зумомъ, пресла́вне.

Многоболѣ́зненныхъ му́къ искуше́нія претерпѣ́лъ еси́ и мно́гихъ болѣ́зней, му́чениче, цѣли́ти сподо́бился еси́, неболѣ́зненныхъ жили́щъ наслѣ́дникъ бы́въ и безпеча́льныя вои́стинну жи́зни и наслажде́нія.

Богоро́диченъ: Безъ болѣ́зни родила́ еси́ Бо́га Безпло́тнаго, болѣ́зни, Отрокови́це, Евы прама́тере рѣша́ща и болѣ́зни а́довы избавля́юща болѣ́знену иму́щихъ жи́знь согрѣша́ющихъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Кро́вію свяще́нною оде́жду твою́, пребога́те, соверши́лъ еси́ свѣтлѣ́йшу и къ Це́ркви Вы́шнѣй я́ко свяще́нникъ прише́лъ еси́.

Исте́кши на земли́ многочестнѣ́й кро́ви твое́й, бы́лъ еси́ исцѣле́ній рѣка́, страсте́й изсуша́я пото́ки.

Непра́веднаго судію́ ослѣпле́на моли́твою твое́ю просвѣти́лъ еси́, милосе́рдію Влады́ки всѣ́хъ подо́бяся, пребога́те.

Богоро́диченъ: Пое́мъ Тя́, Ея́же ра́ди су́щимъ во тмѣ́ Свѣ́тъ незаходи́мый возсія́, Богоро́дице, всѣ́хъ Влады́ка, и любо́вію ублажа́емъ.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Вельми́ безбо́жную пре́лесть обличи́лъ еси́, тѣ́мже къ колесни́цѣ привяза́лся еси́, пребыва́еши же цѣ́лъ, ко́немъ о́гненнымъ, тя́ подъе́мшимъ, пла́менныя колесни́цы, Ѳео́доре, я́коже Илію́ сла́внаго.

Разгнѣ́вався беззако́нный, въ пе́щь горя́щую тя́ вку́пѣ съ Сокра́томъ и боже́ственнымъ Діони́сіемъ вве́рже; съ ни́миже проро́ческую свяще́нную пѣ́лъ еси́ пѣ́снь, доблему́дренне Ѳео́доре.

Да похва́лится въ пѣ́снехъ боже́ственный Діони́сій вку́пѣ съ Сокра́томъ до́блимъ, посредѣ́ пе́щи копіе́мъ уя́звени бы́вше; му́ченицы бы́ша крѣ́пцы, боже́ственнымъ наказа́ніемъ Ѳео́дора повину́вшеся.

Богоро́диченъ: Вои́стинну су́щи и врѣсноту́, Пренепоро́чная еди́на Богоро́дице, облада́ти мнѣ́ порабо́щшими мя́ страстьми́ укрѣпи́, я́ко да свобо́днымъ по́мысломъ, ра́дуяся, ублажа́ю Тя́, вѣ́рныхъ спасе́ніе.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Глаго́лы зна́менія ви́дя тя́, собо́ръ беззако́нныхъ, дѣ́юща, священнотаи́нниче, ко Творцу́ отъ души́ прихо́дитъ, пресла́вно просвѣща́емь.

Яви́лся еси́ пре́жде конца́, святи́телю, и по боже́ственнѣй кончи́нѣ, творя́ мно́жество чуде́съ, да́ръ Свята́го Ду́ха отъ младе́нства пріе́мъ.

Ны́нѣ свяще́ннымъ согла́сіемъ Фа́вста и Со́са вси́, Дисиде́рія съ Евти́хіемъ и му́драго Акутíона воспое́мъ, и съ Проку́ломъ богоно́снымъ.

Богоро́диченъ: Во благодѣя́ніе человѣ́комъ отъ Твои́хъ Чи́стыхъ крове́й воплоща́ется Бо́гъ Сло́во. Его́же прилѣ́жно, Богома́ти, моли́ спасти́ся душа́мъ на́шимъ.

Инъ.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Ангела боже́ственнымъ прише́ствіемъ о́гнь у́бо пе́щи угаса́ше; се́рдце же твое́, преблаже́нне, дерзнове́нія исполня́шеся, е́же къ Зижди́телю, манове́ніемъ прохлажда́ющееся.

Глаго́лы святы́я я́ко услы́ша тебе́ ро́ждшія мучи́тель, му́чениче Ѳео́доре, сію́ мечу́ предаде́, му́ченически боже́ственнѣ тече́ніе сконча́вшу.

Вожделѣ́вши, я́ко ю́ница, Фили́ппа съ сы́номъ умре́ти, съ спѣ́хомъ пріи́де, посредѣ́ суди́лища самозва́нна, му́ченикъ сла́ву пріе́млющи.

Богоро́диченъ: Се́ гора́ свята́я, се́ мѵрополо́жница Ду́ха, мо́стъ, къ Бо́гу всѣ́хъ преводя́й, Богоро́дица Дѣ́ва, Юже ублажа́емъ.

Конда́къ, гла́съ 3:

Свяще́нія пома́заніемъ и муче́нія кро́вію украси́стеся, сла́вне Іаннуа́ріе и Ѳео́доре, и сія́ете всю́ду, въ вы́шнихъ лику́юще, и на́съ назира́йте, въ хра́мъ ва́шъ прише́дшія и въ не́мъ непреста́нно зову́щія: всѣ́хъ на́съ соблюди́те, моля́ще Человѣколю́бца Бо́га.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Отроко́мъ боже́ственнымъ уподо́бился еси́ посредѣ́ пла́мене, о Іаннуа́ріе! Соше́ствіемъ а́нгела, лику́я о́крестъ и пѣ́сньми та́йными Спа́са поя́: благослове́нъ еси́, Го́споди, Бо́же оте́цъ на́шихъ.

Безболѣ́зненъ по́мыслъ тво́й благода́тію Боже́ственною соблюда́я, и пре́жде страда́нія неду́ги исцѣли́лъ еси́ вся́кія, па́стырь, и му́ченикъ, и вели́къ чудотво́рецъ познава́емь.

Стоя́лъ еси́ предъ суди́щемъ, му́чениче, мучи́телей, стражда́ терпѣли́вно, и злочести́выя посрамля́я, и прельще́ннымъ всѣ́мъ показу́я и́стину.

Богоро́диченъ: Умертви́ моя́ движе́нія, Пречи́стая, плотска́я, я́же Живо́тъ ро́ждшая, оживи́, Чи́стая, ду́шу мою́, умерщвле́нную страстьми́ и мно́гими грѣхи́.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Соблюда́емь росо́ю Ду́ха, я́коже о́троцы тріе́, неопали́мь посреди́ огня́, богому́дре Ѳео́доре, съ си́ми пѣ́лъ еси́: препѣ́тый оте́цъ на́шихъ Бо́же, благослове́нъ еси́.

Еллинскую пре́лесть обличи́лъ еси́, му́чениче Ѳео́доре, сло́вомъ благода́ти, бога́тно истека́ющимъ отъ усте́нъ твои́хъ, и взыва́лъ еси́: оте́цъ на́шихъ Бо́же, благослове́нъ еси́.

Увѣ́да твое́ прозва́ніе и страда́ніе тебе́ ро́ждшая, и пре́жде зача́тія, Ѳео́доре вели́кій, му́чениче многострада́льне, вопію́щи: оте́цъ на́шихъ Бо́же, благослове́нъ еси́.

Богоро́диченъ: Очище́ніе ми́ бу́ди, Всенепоро́чная, къ ро́ждшемуся изъ Тебе́ отсѣче́нія лю́тыхъ долго́въ хода́тайствующи ми́, и Ца́рствія Бо́жія боже́ственный вхо́дъ, и пи́щи наслажде́ніе, и свѣ́та прича́стіе.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Да восхва́лится вели́кій Проку́лъ со Аку́тіемъ, и Евти́хій, и боже́ственный Дисиде́рій, Фа́встъ же и Со́съ доблему́дренніи, Спа́са сла́вніи му́ченицы.

Тя́ ли́къ страда́лецъ блаже́нный верхо́вника притяжа́, попра́, священнотаи́нниче сла́вне, ве́рхъ де́моновъ, и безбо́жія вознесе́нную горды́ню потреби́.

Якоже о́троцы, о́гнь попра́лъ еси́ и звѣре́й стремле́нія обузда́лъ еси́, я́коже Даніи́лъ, всеизря́дне, и я́ко Па́велъ, во главу́ усѣ́клся еси́, благоче́стно сконча́въ тече́ніе твое́.

Богоро́диченъ: Всели́выйся несказа́нно во чре́во Твое́, Себѣ́ жили́ще показа́ Тя́, Пречи́стая Богоневѣ́сто, Ему́же непреста́нно вопіе́мъ: вся́ дѣла́, благослови́те Госпо́дня Го́спода.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

На кре́стъ вознесе́нъ бы́въ, три́ дни́ сотвори́лъ еси́, на се́мъ повѣ́шенъ бы́въ, Ѳео́доре, стра́сть Влады́ки твоего́, при́сно по́мнимую, треми́ часы́ бы́вшую, изобража́я я́вѣ: Го́спода по́йте, дѣла́, и превозноси́те Его́ во вѣ́ки.

Положе́нъ бы́лъ еси́ на дре́во, болѣ́знены пріе́мля я́звы, уязви́лъ еси́ змíя борца́, вкуше́ніемъ дре́ва сме́рть болѣ́зненну, Ѳео́доре, содѣ́лавша Ада́му и того́ вну́комъ. Тѣ́мже тя́ чти́мъ во вся́ вѣ́ки.

Вопіе́тъ Пергíя твоя́ по́двиги, болѣ́зни, страда́ніе, ра́ны, стра́сть блаже́нную, сме́рть честну́ю, ея́же ра́ди къ безсме́ртнѣй жи́зни, Ѳео́доре, преше́лъ еси́: благослови́те, — зовы́й, — вся́ дѣла́, Го́спода и превозноси́те Его́ во вѣ́ки.

Богоро́диченъ: О, глубина́ неизрече́ннаго та́инства! Созда́вый руко́ю дре́вле человѣ́ка зи́ждется, воплоща́емь, во утро́бу Приснодѣ́вы вше́дъ, и спаса́етъ мя́, со стра́хомъ зову́ща: Го́спода по́йте, дѣла́, и превозноси́те Его́ во вѣ́ки.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Іаннуа́рія честна́я боре́нія, по́двиги и біе́нія, е́же до кро́ве, му́жество, болѣ́зни и ну́ждную сме́рть, чуде́съ же неизмѣ́рную пучи́ну съ весе́ліемъ возвели́чимъ.

Ви́дѣнъ бы́лъ еси́ на высотѣ́ честна́го, сла́вне, муче́нія, я́коже незаходи́мое со́лнце; я́ко боже́ственныя звѣ́зды, му́ченикъ мно́жество веды́й и ны́нѣ просвѣща́етъ концы́ страда́ній вели́кихъ свѣ́тлостію.

Па́мять твоя́ свѣтоно́сная возсія́, лучи́ Боже́ственнаго Ду́ха ве́сь мíръ озаря́ющи, омраче́ніе зо́лъ отгоня́щи, въ не́йже тя́ мо́лимъ, богодухнове́нне, просвѣти́ вся́, пою́щія тя́.

Богоро́диченъ: Свѣ́та, и́же въ тебѣ́, сія́ніи, ослѣпле́нную ду́шу мою́ просвѣти́, и руко́ю наста́ви, Отрокови́це, въ пути́ спасе́нныхъ ходи́ти, и преле́стна отбѣ́гнути преткнове́нія, я́ко да вѣ́рою ублажа́ю тя́.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Стопа́мъ Христо́вымъ послѣ́дуя, прему́дре, пе́рваго му́ченика распя́тіе претерпѣ́лъ еси́, у́зы и я́звы гвозди́нныя пріе́мъ, и отъ земли́ восте́клъ еси́ къ небе́снымъ, вѣнцено́сецъ по́честь пріе́мъ, Ца́рство Бо́жіе непрее́мное.

Яви́лся еси́, я́ко зла́то, Ѳео́доре, свѣтосія́нно, посредѣ́ стоя́ огня́, соше́ствіемъ честна́го а́нгела, распала́емь Влады́ки жела́ніемъ, неопали́мь, пребы́лъ еси́, съ ни́мже пѣ́снь спасе́нную поя́, свяще́нно ра́дуяся.

Ста́немъ благоче́стно въ дому́ Бо́га на́шего, страда́льца Его́ вѣ́рою блажа́ще, му́жескимъ умо́мъ подви́гшагося, и вра́жіе шата́ніе побѣди́вша, и побѣ́ды свы́ше вѣне́цъ изъ руки́ Христо́вы пріе́мшаго.

Взя́тся ко оби́телемъ вы́шнимъ, ра́дуяся, му́чениче Ѳео́доре, дости́глъ еси́ безпло́тныхъ чи́ны, съ тѣ́ломъ безпло́тныя де́моны крѣ́пко побѣ́ждь, и мо́лишися вѣ́рою о чту́щихъ тя́ долго́въ прія́ти избавле́ніе.

Богоро́диченъ: Просвѣти́, Чи́стая, души́ моея́ о́чи, Богороди́тельнице, да не пости́гнетъ мене́ грѣхо́вная тма́ тя́жкая, ниже́ глубина́ покры́етъ мя́ отча́янія, но Сама́ мя́ спаси́ и упра́ви, Предста́тельнице вѣ́рныхъ непосты́дная.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 86 об. – 92.

/ Къ оглавленію раздѣла /


Наверхъ / Къ титульной страницѣ

0