Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 20-й де́нь.
Преподо́бнаго отца́ на́шего Ѳео́дора Трихи́ны.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Преподо́бне о́тче Ѳео́доре,* да́ръ, Бо́гу избра́нъ, са́мъ себе́ прине́слъ еси́,* бдѣ́ніе всено́щное и умиле́ніе стяжа́въ,* поуче́ніе боже́ственно,* коне́чное смире́ніе,* наде́жду, вѣ́ру, любо́вь нерастворе́ну,* трезвѣ́ніе и милосе́рдіе,* и́стинное безстра́стіе и моли́тву,* сто́лпъ тя́ показа́ша свѣтови́днѣйшій.

Преподо́бне о́тче Ѳео́доре,* во одѣя́ніе и́стинное* и спасе́нія оде́жду* благочести́вымъ ра́зумомъ ища́й одѣ́ятися,* власяны́ми ру́бы всегда́* твое́ тѣ́ло покрыва́ти не преста́лъ еси́* и обнажи́лъ еси́ на́съ обнажи́вшаго ко́зни,* си́лою укрѣпля́емь* Боже́ственнаго Ду́ха.

Вопло́щшемуся Бо́гу на́шему* отъ Дѣ́вы Ма́тере на́съ ра́ди* и обнища́вшему, я́ко ни́щъ ду́хомъ,* тебе́ сама́го прине́слъ еси́,* же́ртву жи́ву и всесожже́ніе прія́тно, всеблаже́нне,* и да́ръ че́стенъ.* Тѣ́мже прія́лъ еси́ небе́сное наслажде́ніе.* Къ Нему́же при́сно моли́ся,* поми́ловати на́съ.

Сла́ва, и ны́нѣ, богоро́диченъ:

Пло́ть отъ крове́й Твои́хъ пріе́мь,* Первовѣ́чный Бо́гъ* Тя́ Предста́тельницу показа́ человѣ́комъ, Чи́стая.* Тѣ́мже изба́ви рабы́ Твоя́* отъ вся́кія бѣды́ и обстоя́нія* и сѣ́тей лука́ваго врага́* и сія́нія причасти́тися сподо́би избра́нныхъ* Тя́ сла́вящія и покланя́ющіяся Тебѣ́.

Крестобогоро́диченъ:

Тя́ ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, — Ча́до сла́дкое!* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый* милосе́рдіемъ Твои́мъ?


[НА УТРЕНИ,]
Кано́нъ, гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Дарова́ніи боже́ственными обога́щся, да́ръ я́ко многоцѣ́ненъ, Творцу́, о́тче, себе́ приве́лъ еси́. Тѣ́мже мо́й облагодати́ по́мыслъ, восхваля́ющу твою́ дне́сь па́мять свѣтоно́сную и житіе́ равноа́нгельное.

Яко напита́вся боже́ственными добро́тами, взя́лъ еси́ на ра́мо твое́ по́стнически кре́стъ, Ѳео́доре, и послѣ́довалъ еси́ во́льное тебе́ ра́ди Претерпѣ́вшему распя́тіе, блаже́нне, стра́сти умертви́въ тѣле́сныя.

Крѣ́пко, о́тче, проти́ву врага́ ополчи́вся, и, кре́стнымъ ору́жіемъ огражде́нъ, сего́ смири́лъ еси́, смири́вся и му́дрѣ возноша́емь. Тѣ́мже побѣдоно́сецъ яви́лся еси́ и преподо́бныхъ равностоя́тель.

Богоро́диченъ: Спа́сшіися, Дѣ́во, Тебе́ ра́ди, Пренепоро́чную въ жена́хъ и Бо́жію Роди́тельницу пѣ́сньми ублажа́емъ, и почита́емъ, и согла́сно зове́мъ: ра́дуйся, вино́вная пра́дѣдняго назда́нія.

Пѣ́снь 3.

Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Процвѣ́лъ еси́ въ поро́дѣ воздержа́нія, преподо́бне, я́ко ши́покъ благово́ненъ, сердца́ благоуха́я на́мъ боже́ственнымъ твои́мъ житіе́мъ, пресла́вне.

Крѣ́постію возмога́емь Спа́совою, ше́ствовалъ еси́ тѣ́снымъ, сла́вне, жесто́кимъ и ско́рбнымъ путе́мъ и къ широтѣ́ Вы́шняго Сіо́на дости́глъ еси́.

Ви́дится тво́й гро́бъ, благово́нно мѵ́ро благода́тію источа́я, преподо́бне, и проповѣ́дуетъ Бо́гу бы́вша тя́ благово́ніе, о́тче свяще́нне.

Богоро́диченъ: Черто́гъ безсме́ртія Твое́ чре́во бы́сть, изъ него́же Жени́хъ Госпо́дь возсія́въ, Дѣ́во Пречи́стая, преподо́бныхъ ли́къ Себѣ́ собра́.

Сѣда́ленъ, гла́съ 4. Подо́бенъ: Вознесы́йся.

Яко чи́стъ, къ чи́стому присту́пль ча́стыми моли́твами и чистото́ю, освяти́лся еси́ Ду́хомъ, Ѳео́доре, отону́дуже со а́нгелы ны́нѣ водворя́яся, пое́ши пѣ́снь трисвяту́ю всѣ́хъ Влады́цѣ. Тѣ́мже моли́, преподо́бне, Христа́ поми́ловати любо́вію чту́щихъ тя́.

Сла́ва, и ны́нѣ, богоро́диченъ:

По Бо́зѣ во Тво́й, Богоро́дице, прибѣга́ю, смире́нный, покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу; моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

Крестобогоро́диченъ:

Иже отъ Безнача́льнаго Отца́ рожде́ннаго напослѣ́докъ Тя́ пло́тію ро́ждшая, на Крестѣ́ ви́сяща, зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́, распина́ешися? Пою́ Тя́, Долготерпѣли́ве.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Воздержа́нія ча́стыми я́звами ура́нилъ еси́ стра́сти Еги́пта и наста́вилъ еси́, Ѳео́доре, къ земли́ небе́снѣй благоче́стно и преподо́бно послѣ́дующія тебѣ́.

Истка́ніи добродѣ́тельными содѣ́лалъ еси́, Ѳео́доре, себѣ́ уго́дну и чистѣ́йшую оде́жду, въ ню́же одѣ́явся, въ черто́гъ вы́шній вше́лъ еси́.

Изсуше́ніемъ, сѣ́туя, соверша́лъ еси́, Ѳео́доре, власяны́ми истка́ньми твою́ пло́ть покрыва́я, отону́дуже ти́ возсія́ мы́сленное весе́ліе Боже́ственнымъ Ду́хомъ.

Богоро́диченъ: Въ ча́съ мя́ стра́шный, Пречи́стая, суди́ма спаси́ и изба́ви, гее́нны исхити́, я́ко да ублажа́ю Тя́ и по до́лгу честву́ю, Непоро́чная.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Житіе́ равноа́нгельное воспріе́мъ на земли́, преподо́бне, по́стнически вся́кимъ озлобле́ніемъ умертви́лъ еси́ страсте́й воста́нія, богому́дре Ѳео́доре.

Ча́съ Суда́ помышля́я всегда́, отри́нулъ еси́ отъ души́ со́нъ уны́нія, у́тренюя къ Бо́гу и боже́ственною любо́вію удобря́емь.

Любя́ Вы́шнія оби́тели, я́ко мона́хъ и́стиненъ, воздви́глъ еси́ на земли́ оби́тели мона́шествующимъ, въ ни́хже тобо́ю насажде́ни бы́вше почита́ютъ тя́, преподо́бне.

Богоро́диченъ: Еди́на родила́ еси́ ѵпо́стасную Жи́знь, Пречи́стая, Творца́ всѣ́хъ и Влады́ку, Его́же лю́бяще, мно́жество оте́цъ преподо́бныхъ преподо́бно пожи́ша.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Просвѣ́щся видѣ́ніи лу́чшими, отъ всѣ́хъ земны́хъ ду́шу обнажи́лъ еси́ и о Бо́зѣ упраздни́лся еси́ непреста́нными поуче́ніи, Ѳео́доре.

Свѣ́тлаго твоего́ житія́ свѣ́тлостію поднебе́сная освѣти́шася, блаже́нне, восто́чнаго со́лнца свѣтосія́нную тя́ звѣзду́ проповѣ́дающе.

Мра́зомъ и сту́денію утѣсня́емь, и́же къ Бо́гу огрѣва́лся еси́ манове́ніи и зи́му отгна́лъ еси́ страсте́й боже́ственною теплото́ю, Ѳео́доре.

Богоро́диченъ: Яко добру́, я́ко красну́ я́вльшуюся, Сло́во кра́сное возлюби́, Чи́стая, и въ Твою́ утро́бу всели́ся въ на́ше, вѣ́рныхъ, избавле́ніе.

Конда́къ, гла́съ 4. Подо́бенъ: Яви́лся еси́ дне́сь.

Яви́лся еси́ преди́венъ житіе́мъ, Ѳео́доре му́дре о́тче, власяны́ми ру́бы измѣни́въ па́че ца́рскихъ сокро́вищъ, я́же на земли́, сего́ ра́ди небе́сную оде́жду воспрія́лъ еси́, при́сно моли́ о на́съ, преподо́бне.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Мѵродохнове́нъ бы́лъ еси́ добродѣ́тельными твои́ми обѣ́ты, Ѳео́доре, и мѵ́ро благово́нно отъ честны́хъ твои́хъ моще́й источа́еши на́мъ, вѣ́рно чту́щимъ тя́, ду́ши и сердца́ благоуха́я, преподо́бне.

Яко а́гнецъ незло́бивъ, воспита́нъ на зла́цѣ воздержа́нія, преподо́бне, всели́лся еси́ во огра́ду небе́сную весели́тися съ нача́льнымъ Па́стыремъ, тѣ́мже твоя́ о́вцы при́сно помина́й.

Ка́плями сле́зъ твои́хъ погаси́лъ еси́ вря́щую тѣлесе́ пе́щь, свяще́нне, огне́мъ Боже́ственнаго Ду́ха распала́емь, свѣти́льникъ до́блести и свѣ́тъ су́щимъ во тмѣ́, о́тче, бы́лъ еси́.

Богоро́диченъ: Показа́ купина́ Тя́, повива́ема огне́мъ, Пренепоро́чная, ника́коже опаля́ема у́бо, Огнь бо носи́ла еси́ Божества́, Иже неопа́льну Тя́ соблюде́, Чи́стая, и по рождествѣ́ Дѣ́ву нетлѣ́нну.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Скве́рну отмы́лъ еси́ души́ сле́зными тече́ніи и пото́къ пи́щный наслѣ́довалъ еси́ и кро́ткихъ зе́млю, я́ко кро́токъ, преподо́бне, и незло́бивъ, и пра́вдою я́вѣ украше́нъ.

Сво́йственными къ Бо́гу взира́ніи при́сно просвѣща́емь, непреткнове́нно премину́лъ еси́ страстны́я по́мыслы и все́ омраче́ніе тѣле́сное и къ свѣ́ту преше́лъ еси́ безстра́стія, о́тче.

Да и́стинному жела́нію присту́пиши, возде́ржникъ, и смиренному́дръ, и долготерпѣли́въ яви́лся еси́, и ми́лостивъ вои́стинну, власяны́ми ру́бы покрыва́яся и де́монскую обнажа́я пре́лесть.

Богоро́диченъ: Украси́вшися добро́тами добродѣ́телей и ря́сны преиспещре́нна златы́ми, Дѣ́во, я́же па́че всѣ́хъ человѣ́къ краснѣ́йшаго Сло́ва породила́ еси́. Его́же пое́тъ преподо́бныхъ мно́жество во вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Распе́нъ пло́ть твою́ стра́хомъ Влады́ки твоего́, умертви́лся еси́ мíру, о́тче Ѳео́доре, и ны́нѣ преше́лъ еси́, ра́дуяся, къ жи́зни живы́хъ, треблаже́нне, прича́стіемъ обоже́нъ и свѣ́та при́сно исполня́емь.

Де́нь пра́зднственный и испо́лненъ свяще́нія, твою́ боже́ственную па́мять соверша́емъ дне́сь: ты́ бо свѣ́та и дне́ я́ко вои́стинну сы́нъ показа́лся еси́ и во свѣ́тѣ невече́рнѣмъ живе́ши, ра́дуяся.

Свѣти́льниче свѣтоза́рне, Бо́жія да́ра тезоимени́те, богосія́нное свѣти́ло, невече́рняя заря́, добродѣ́телей мѵрополо́жниче и непрекло́ненъ сто́лпе мона́шествующихъ, ста́до твое́ изба́ви моли́твами твои́ми отъ вся́кія ско́рби.

Богоро́диченъ: Свѣ́та жили́ще чре́во Твое́ бы́сть, Дѣ́во, просвѣ́щшаго мíръ заря́ми Божества́, две́ре Со́лнца сла́вы, въ жена́хъ прера́дованная, преподо́бныхъ похвало́, Всесвята́я и Преблагослове́нная.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 83 – 86.

/ Къ оглавленію раздѣла /


Наверхъ / Къ титульной страницѣ

0