Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 20-й де́нь.
Па́мять преподо́бнаго отца́ на́шего Іоаса́фа Се́рбскаго, Метеори́та.

НА ВЕЛИЦѢЙ ВЕЧЕРНИ,
На Го́споди воззва́хъ.., стихи́ры на 8: пра́здника 3 и преподо́бнаго 5, гла́съ 4:

Распя́лся еси́ мíру* и взя́лъ еси́ на ра́мена кре́стъ,* Сло́ва Бо́жія стопа́мъ послѣ́довалъ еси́,* жите́йскую же любо́вь и вся́кое пристра́стіе отря́съ.* Отону́дуже и добродѣ́тельми просія́въ,* боже́ственными дѣ́тельми наслѣ́діе вѣ́чное,* Іоаса́фе, воспрія́лъ еси́.

Боже́ственнымъ промышле́ніемъ наста́вленъ бы́въ* и просвѣще́нъ Трисія́нною богонача́льною Свѣ́тлостію,* мíръ оста́вилъ еси́ и мглу́ страсте́й,* къ небеси́ же веду́щую стезю́ ше́ствовалъ еси́,* имѣ́я Помо́щника еди́на Благодѣ́теля* и Всеще́драго Го́спода.

Украси́вся свѣ́тлостію ра́зума,* ду́шу твою́ просвѣти́лъ еси́ Боже́ственными за́повѣдьми* и, вся́ земна́я оста́вивъ,* мона́шески жи́ти изво́лилъ еси́,* соблюда́я за́повѣди Христо́вы,* Его́же моли́, преподо́бне о́тче Іоаса́фе,* да спасе́тъ ду́ши на́ша.

Отъ дѣ́тска жи́знь свою́ Христу́ Бо́гу возложи́лъ еси́,* преподо́бне о́тче Іоаса́фе,* и, ху́ждщее покори́въ лу́чшему,* плотскíя стра́сти по́мыслу повину́лъ еси́,* къ му́дрому же ста́рцу Аѳана́сію прише́лъ еси́* и съ ни́мъ раноа́нгельно на земли́ пожи́лъ еси́,* равноа́нгельную же че́сть досто́йно получи́лъ еси́.* Тѣ́мже моли́ся съ ни́мъ ко Го́споду,* да спасе́тъ ду́ши на́ша.

Возлюби́въ красоту́ Боже́ственную въ дому́ Госпо́дни,* идѣ́же шу́мъ пра́зднующихъ, ра́достно пою́щихъ,* вся́ кра́сная мíра сего́,* Іоаса́фе всече́стне, оста́вилъ еси́,* обветша́вшаго же человѣ́ка совле́кся,* незави́стнымъ воздержа́ніемъ* обле́клся еси́ въ но́ваго по Христу́,* Его́же моли́, да спасе́тъ ду́ши на́ша.

Сла́ва, гла́съ 6:

Смире́ніемъ благосты́ннымъ украша́яся, преподо́бне о́тче Іоаса́фе, возне́слся еси́ къ высотѣ́ добродѣ́телей и безсме́ртную жи́знь и блаже́нство получи́лъ еси́, укрѣпля́емь вѣ́рою, наде́ждою и любо́вію. Тѣ́мъ мо́лимъ тя́, преблаже́нне, Христа́ Бо́га моли́ о на́съ, вѣ́рою твою́ па́мять соверша́ющихъ, спасти́ся на́мъ напа́стей, и треволне́нія, и бу́ри, и бѣ́дъ, и страсте́й, и всему́ мíру ми́ръ дарова́ти.

И ны́нѣ, пра́здника.
Вхо́дъ. Проки́менъ дне́ и париміи.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ра хра́ма и преподо́бнаго самогла́сны, гла́съ 1:

Христо́вою си́лою ду́шу свою́, о́тче, укрѣпи́въ, Христо́во жили́ще свѣ́тло бы́лъ еси́, святы́ни испо́лненъ, кро́тостію и смире́ніемъ сія́я, къ присносу́щнѣй сла́вѣ и къ Свѣ́ту невече́рнему преста́вился еси́, идѣ́же непреста́нно мо́лиши, о е́же спасти́ся всѣ́мъ на́мъ.

Украси́въ житіе́, свое́ мно́гимъ воздержа́ніемъ отве́рглся еси́ мíра и вся́, я́же въ мíрѣ кра́сная, преоби́дѣлъ еси́, ева́нгельскимъ уче́ніемъ послѣ́дуя, жесто́кимъ житіе́мъ тѣ́ло свое́ изнуря́лъ еси́. Тѣ́мже на небесѣ́хъ водворя́ешися и ны́нѣ моли́ Христа́ Бо́га согрѣше́ній оставле́ніе дарова́ти ро́ду се́рбскому и всѣ́мъ, чту́щимъ святу́ю па́мять твою́.

Сла́ва, гла́съ 2:

Преподо́бне о́тче Іоаса́фе приснопа́мятне, многосвѣ́тлый свѣти́льниче ро́да се́рбскаго, ты́ бо, мона́шеское житіе́ возлюби́въ, по́стниковъ бы́лъ еси́ похвала́, тѣ́сный пу́ть ше́ствовалъ еси́ и яви́лся еси́ а́нгеломъ собесѣ́дникъ, преподо́бнымъ и пра́веднымъ сожи́тель. Тѣ́мже мо́лимъ тя́: моли́ся непреста́нно о спасе́ніи всего́ ро́да се́рбскаго.

И ны́нѣ, пра́здника.

На стихо́внѣ стихи́ры, гла́съ 1:

Предъ лице́мъ Влады́ки твоего́ предстоя́, преподо́бне,* моли́ся о избавле́ніи ро́да се́рбскаго* отъ рабо́ты тмы́ и страсте́й мучи́тельства.

Сти́хъ: Честна́ предъ Го́сподемъ* сме́рть преподо́бныхъ Его́.

Да прича́стникъ яви́шися нетлѣ́нныя жи́зни,* вся́ привре́менная, богому́дре, пренебре́глъ еси́* и, къ Бо́гу преше́дъ,* непреста́нно мо́лиши спасти́ся всѣ́мъ на́мъ.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

Любо́вію Влады́чнею подстрека́емь,* вся́ до́льная оста́вилъ еси́,* и́го ле́гкое му́жески на ра́мо взе́мъ.* Тѣ́мъ ны́нѣ, ра́дуяся,* Влады́цѣ всѣ́хъ Христу́ предстои́ши.

Сла́ва, гла́съ 6:

Умертви́въ двиза́нія пло́ти своея́, крѣ́пкимъ поще́ніемъ, преподо́бне о́тче, яви́лся еси́ Влады́чне оби́телище, Его́же моли́ изба́витися скорбе́й и страсте́й смуще́нія всѣ́мъ, къ тебѣ́ прибѣга́ющимъ.

И ны́нѣ, пра́здника.

Тропа́рь, гла́съ 3:

Се́рдцемъ и душе́ю возлюби́въ Христа́ Го́спода, вся́ кра́сная мíра сего́ оста́вилъ еси́, изво́лилъ же еси́ па́че въ смире́ніи и послуша́ніи Бо́гу служи́ти, не́жели на престо́лѣ ца́рстѣмъ владѣ́ти. Сего́ ра́ди благоче́стно восхваля́емъ тя́ и, святу́ю па́мять твою́ соверша́юще, вопіе́мъ ти́: о́тче Іоаса́фе богоблаже́нне, моли́ Христа́ Бо́га о спасе́ніи ро́да на́шего христіа́нскаго.

Сла́ва, и ны́нѣ, пра́здника.



НА УТРЕНИ,
На Бо́гъ Госпо́дь: тропа́рь пра́здника, два́жды. Сла́ва, преподо́бнаго. И ны́нѣ, пра́здника.

По 1-мъ стихосло́віи сѣда́ленъ, гла́съ 8:

Мимотеку́щую сла́ву на земли́ въ ничто́же вмѣни́въ, отложи́лъ еси́ ски́птръ влады́чествія и избра́лъ еси́ ри́зу мона́шескую. Но, оста́вивъ на земли́ ца́рство вре́менное, воспрія́лъ еси́ бога́тство небе́сное и сла́ву вѣ́чную. Тѣ́мже ублажа́емъ тя́, преподо́бне о́тче Іоаса́фе, и вѣ́рно вопіе́мъ ти́: моли́ Христа́ Бо́га дарова́ти мíру ми́ръ и всѣ́мъ на́мъ ве́лію ми́лость. [Два́жды.]

Сла́ва, и ны́нѣ, пра́здника.

По 2-мъ стихосло́віи сѣда́ленъ, гла́съ 4:

Ду́шу твою́ благода́ти сло́во облиста́, я́коже заря́ свѣ́та, тобо́ю бо вся́ Метео́рская гора́ испо́лнися Христо́ва сія́нія, Ему́же причаща́ющіися, сокро́вищу му́дрости твоея́ удивля́емся. [Два́жды.]

Сла́ва, и ны́нѣ, пра́здника.

Поліеле́й.

Велича́ніе: Ублажа́емъ тя́, преподо́бне о́тче Іоаса́фе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́...

По поліеле́и сѣда́ленъ, гла́съ 8:

Возше́дъ на го́ру ра́зума добродѣ́телей, къ чу́вственнѣй же горѣ́ Метео́рстѣй сама́го себе́ возве́лъ еси́, подо́бно я́ко ина́го Исаа́ка, идѣ́же вмѣ́сто всесожже́нія овча́ се́рдце твое́ мы́сленно поже́рлъ еси́. [Два́жды.]

Сла́ва, и ны́нѣ, пра́здника.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Та́же: Вся́кое дыха́ніе да хва́литъ Го́спода. Сти́хъ: Хвали́те Бо́га во святы́хъ Его́... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Престо́лъ на земли́ оста́вилъ еси́ и Метео́рскую го́ру пости́глъ еси́, идѣ́же высоту́ благоро́дія въ раба́ смире́нія измѣни́въ, моли́твами ду́шу просвѣти́лъ еси́, до́брѣ мона́шески пребы́въ, а́нгельски пожи́лъ еси́. И я́ко ны́нѣ предстоя́ Христу́ Бо́гу, моли́ спасти́ся душа́мъ на́шимъ.

Кано́нъ пра́здника со ирмосо́мъ на 6 и преподо́бнаго на 8, его́же краегране́сіе: Пою́ и сла́влю Іоаса́фа му́драго. Въ богоро́дичнахъ же и въ сѣда́льнѣ: Про́та Ми́рко. Гласъ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Преподо́бне о́тче Іоаса́фе, да́ждь ми́ сло́во, недосто́йному рабу́ твоему́, да возмогу́ досто́йно воспѣ́ти святу́ю па́мять твою́.

Отче Іоаса́фе, ты́ на земли́ равноа́нгельно пожи́лъ еси́, равноа́нгельную же че́сть досто́йно получи́лъ еси́ и ны́нѣ со всѣ́ми а́нгелы Бо́гу предстои́ши.

Юность твоя́ чи́ста, житіе́ же твое́ свѣ́тло, я́ко пра́вило извѣ́стно въ тебѣ́, о́тче, Боже́ственныя добродѣ́тели показа́ся.

Богоро́диченъ: Покро́въ Боже́ственный, ти́хое приста́нище, Пречи́стую Дѣ́ву Марíю, вѣ́рніи, пѣ́сньми похва́лимъ, Богома́терь обра́дованную, всѣ́хъ же вѣ́рныхъ Предста́тельницу.

Пѣ́снь 3.

Ирмо́съ: Процвѣла́ е́сть пусты́ня, я́ко кри́нъ, Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Ихже о́ко не ви́дѣ, ни у́хо слы́ша, ни на се́рдце человѣ́ка взыдо́ша, я́же угото́вана Бо́гомъ Того́ возлю́бльшимъ, си́хъ ты́ возжелѣ́лъ еси́, Іоаса́фе богодохнове́нне.

Соше́дшеся дне́сь, чту́ще любо́вію па́мять твою́, Іоаса́фе прему́дре, мо́лимъ тя́ прилѣ́жно: моли́ о на́съ, вѣ́рно пра́зднующихъ честну́ю па́мять твою́.

Лику́я со а́нгелы на небесѣ́хъ, не забу́ди на́съ, преподо́бне о́тче, но при́сно моли́ся ко Го́споду дарова́ти мíру ми́ръ и всѣ́мъ скорбя́щимъ утѣше́ніе.

Богоро́диченъ: Ря́сны златы́ми укра́шена, Влады́чице, я́ко Цари́ца предстои́ши ны́нѣ одесну́ю Царя́ и Бо́га, моля́щи о рабѣ́хъ Твои́хъ.

Конда́къ пра́здника и и́косъ.
Сѣда́ленъ, гла́съ 8:

Отче богоно́сне Іоаса́фе, житіе́ свое́ украси́лъ еси́ воздержа́ніемъ и, попра́въ вся́ прило́ги вра́жія, присво́ился еси́ Бо́гу еди́ному. Тѣ́мъ ны́нѣ въ вѣ́чнѣй сла́вѣ со а́нгелы лику́я, съ ни́миже моли́ непреста́нно поми́ловатися всѣ́мъ на́мъ.

Сла́ва, гла́съ то́йже:

Тя́ ны́нѣ ублажа́емъ, преподо́бне, ты́ бо, влады́чество на земли́ оста́вивъ, небе́сное наслѣ́довалъ еси́. Тѣ́мже моли́твами прося́щимъ тя́ подае́ши Боже́ственная дарова́нія, моли́ся у́бо и о на́съ, чту́щихъ съ любо́вію святу́ю па́мять твою́.

И ны́нѣ, пра́здника.

Пѣ́снь 4.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Аще и владѣ́тель на земли́ бы́лъ еси́, но, послѣ́дуя уче́нію преподо́бнаго ста́рца Аѳана́сія, сочта́лся еси́ преподо́бнымъ. Тѣ́мъ съ ни́ми тя́ почита́емъ.

Возсія́въ, я́ко со́лнце, и сы́нъ свѣ́та бы́въ, свя́то твое́ проводи́лъ еси́ житіе́. Тѣ́мъ ны́нѣ весели́шися со всѣ́ми святы́ми.

Лѣ́потственно возсія́ на́мъ дне́сь па́мять твоя́ свята́я, преподо́бне о́тче Іоаса́фе. Тѣ́мъ мо́лимъ тя́: проси́ на́мъ отъ Христа́ благода́ти, и ми́лости, и согрѣше́ній избавле́ніе.

Богоро́диченъ: Адова сокро́вища упраздни́шася и сме́ртное мучи́тельство преста́ воста́ніемъ Ро́ждшагося изъ Тебе́, и жи́зни сокро́вища напо́лнишася.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Юніи и ста́рцы, мона́си и свяще́нницы, славосло́вятъ ку́пно блаже́нную па́мять твою́, богодохнове́нне о́тче Іоаса́фе.

Іоаса́фе богоблаже́нне, ты́ яви́лся еси́ безсме́ртія прича́стникъ и о́бщникъ Боже́ственнаго Ца́рствія и съ высоты́ бдѣ́еши надъ пѣвцы́ твои́ми. Проси́ у Бо́га проще́ніе грѣхо́въ и́хъ и прича́стіе въ сла́вѣ Его́.

О, Іоаса́фе, равноа́нгельне! Имѣ́ющу ти́ жили́ще на высотѣ́ Метео́рстѣй, возсія́ тебѣ́ съ высоты́ Госпо́дь отъ Дѣ́вы, Его́же ты́ возжелѣ́лъ еси́.

Богоро́диченъ: Моего́ ума́ стра́сти лю́тыя утоли́, Ма́ти Бо́жія, и испра́ви мя́, заблу́ждшаго, я́ко да сла́влю Тя́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Ангела на земли́ и на небеси́ человѣ́ка вѣ́мъ тя́, преподо́бне, насажде́нъ бо въ дому́ Госпо́дни, процвѣ́лъ еси́ пра́ведно, я́ко ке́дръ въ пусты́ни, умно́живъ Христо́во ста́до слове́сныхъ ове́цъ въ преподо́біи и пра́вдѣ.

Содѣ́лавъ ду́шу твою́ хра́мъ Ду́ха Свята́го, премину́лъ еси́ зе́мную, небе́сную же жи́знь стяжа́лъ еси́ и со безпло́тными ли́ки смеси́лся еси́. Тѣ́мъ и кро́ткихъ зе́млю наслѣ́довалъ еси́.

Ангельски на земли́, я́ко безпло́тенъ, пожи́въ, мíръ преоби́дѣлъ еси́, сла́вне, обветша́вшаго человѣ́ка я́вѣ, о́тче, совле́клся еси́ и, я́ко скве́рну ри́зу отве́ргъ съ грѣхо́вными страстьми́, въ но́ваго обле́клся еси́, е́же по подо́бію о Христѣ́, преподо́бне.

Богоро́диченъ: Изъ Тебе́ прозябе́ Цвѣ́тъ неувяда́емый, облагово́нствуя все́ человѣ́чество Боже́ственнымъ мѵ́ромъ естества́ Своего́, и Иже Отцу́ Собезнача́льный изъ Тебе́ бы́сть лѣ́томъ, Дѣ́во Всенепоро́чная.

Конда́къ, гла́съ 4:

Вѣ́дый прехва́льное житіе́ твое́ и чистоту́ и безмѣ́рное смиренному́дріе, преподо́бный Аѳана́сій наименова́ тя прее́мника своего́, ты́ же показа́лся еси́ досто́инъ сего́ нарече́нія и, служа́ Тріѵпоста́сному Бо́гу, соблю́лъ еси́ ввѣ́ренную ти́ оби́тель Метео́рскую. Тѣ́мже мо́лимъ тя́, о́тче Іоаса́фе, не забу́ди оте́чество твое́ и ве́сь се́рбскій ро́дъ, но моли́ся всегда́ о всѣ́хъ на́съ.

Икосъ:

Утверди́вся стра́хомъ Христо́вымъ, ве́сь распя́лся еси́ мíрови, богоно́се о́тче Іоаса́фе, и, возвы́сивъ къ Бо́гу серде́чное жела́ніе, нищету́ возлюби́лъ еси́, въ нищетѣ́ же пожи́въ, добродѣ́тельми обогати́лся еси́, испо́лненъ же бы́въ свѣ́тлостію житія́, хра́мы благолѣ́пныя на Метео́рахъ Бо́гу воздви́глъ еси́ и вся́ оби́тели Метеори́тскія ку́пно со сестро́ю свое́ю Марíею бога́тно снабдѣ́лъ еси́. Сего́ ра́ди и мы́, вѣ́дуще тя́ хра́мъ Свята́го Ду́ха, прилѣ́жно мо́лимъ тя́: не забу́ди оте́чество [твое́] и ве́сь се́рбскій ро́дъ, но моли́ся всегда́ о всѣ́хъ на́съ.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Фи́никсъ, насажде́нный въ дому́ Госпо́дни, яви́лся еси́, мно́жествомъ бо мона́ховъ процвѣ́лъ еси́ и, я́ко ке́дръ, и́же въ Лива́нѣ, добродѣ́тель умно́жилъ еси́.

Аще и владѣ́тель бы́лъ еси́, но, презрѣ́въ сла́дости привре́менныя, благослове́нное цѣлому́дріе соблю́лъ еси́.

Метеори́тская похвала́ яви́лся еси́, поревнова́въ блаже́нному Аѳана́сію Метеори́ту, нра́вомъ и житіе́мъ послѣ́дуя ему́, стра́хъ бо Бо́жій воспріи́мъ въ се́рдцы свое́мъ, дѣ́лы свои́ми ве́сь ро́дъ се́рбскій возвесели́лъ еси́.

Богоро́диченъ: Родила́ еси́ па́че смы́сла и естества́, Богоро́дице Дѣ́во, Свята́го святы́хъ, подаю́щи хода́тайствомъ Твои́мъ освяще́ніе и избавле́ніе и оставле́ніе грѣхо́въ всѣ́мъ вѣ́рнымъ, сла́вящимъ Его́ воскресе́ніе.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Удаля́яся пути́ простра́ннаго, тѣ́сный же предпочита́я, и́нокъ и́стиненъ бы́лъ еси́ и, дости́гъ широты́ ра́йскія, ра́достно о Христѣ́ взыва́еши: по́йте и превозноси́те во вся́ вѣ́ки.

Да́ры мно́гими вся́ оби́тели Метео́рскія ще́дро снабдѣва́лъ еси́, си́мъ же ду́шу свою́ обогати́лъ еси́. Тѣ́мже ны́нѣ со всѣ́ми пра́ведными, ра́дуяся, о Христѣ́ пое́ши: по́йте и превозноси́те во вся́ вѣ́ки.

Ре́вность боже́ственнаго житія́ твоего́ яви́ тя и́стиннаго наста́вника мно́жества мона́ховъ, и́бо стяжа́лъ еси́ Христа́ содѣ́тельствующа. Ему́же ны́нѣ со всѣ́ми святы́ми восклица́еши: по́йте и превозноси́те во вся́ вѣ́ки.

Богоро́диченъ: Краснѣ́йшаго добро́тою родила́ еси́, Всенепоро́чная, Сего́ умоли́ изба́вити мя́ огня́, и́бо житіе́ мое́ все́ порабо́тися грѣхо́мъ, а́зъ же воспою́ къ Нему́: по́йте и превозноси́те во вся́ вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Ангеломъ сожи́тель бы́въ, я́ко въ раи́ воздержа́нія процвѣ́лъ еси́ и, я́ко ма́слина, псало́мски яви́лся еси́, помазу́я сердца́ на́ша еле́емъ трудо́въ твои́хъ, благоче́стно чту́щихъ свяще́нную па́мять твою́.

Гла́съ Христа́ твоего́ послу́шавъ, зако́нъ Бо́жій сохраня́я невреди́мо, чистоту́ и смиренному́дріе отъ младе́нства имѣ́лъ еси́, и житіе́ нескве́рно, и нра́въ ми́лостивенъ, Іоаса́фе, о́тче досточу́дне.

Отче Іоаса́фе блаже́нне, добродѣ́тельми бога́тъ бы́въ, испо́лнился еси́ свѣ́тлостію житія́ и преста́вился еси́ къ вы́шнему гра́ду, сего́ ра́ди мо́лимъ тя́: моли́ся ко Го́споду изба́витися отъ бѣ́дъ ро́ду на́шему.

Богоро́диченъ: Отрокови́це Богоневѣ́сто, изъ ко́рене Іессе́ева Ты́ прозябла́ еси́ и родила́ еси́ Ко́рень, всѣ́хъ Царя́, Христа́ Бо́га на́шего, отъ Него́же вси́ вѣ́рніи прозяба́ютъ и получа́ютъ спасе́ніе. Тѣ́мъ непреста́нно моли́ Его́, да спасе́тъ правосла́вный ро́дъ на́шъ.

Свѣти́ленъ:

Свѣ́томъ Единосу́щныя Тро́ицы озаря́емь, возсія́лъ еси́ свѣ́тлыми заря́ми добродѣ́тельныхъ подвиго́въ твои́хъ, озари́ свѣ́тлостію и ве́сь правосла́вный ро́дъ се́рбскій, да вси́ взыва́емъ ти́: ра́дуйся, о́тче Іоаса́фе, метеори́товъ похвало́. [Два́жды.]

Сла́ва, и ны́нѣ, пра́здника.

На хвали́техъ стихи́ры на 4, гла́съ 8:

Оста́вивъ престо́лъ на земли́, я́ко ве́щь тлѣ́нную,* и сла́ву теку́щую,* воспрія́лъ еси́ вои́стинну* бога́тство нетлѣ́емое и сла́ву вѣ́чную.* Тѣ́мже блажи́мъ свято́е твое́ успе́ніе,* и, воспѣва́юще, вопіе́мъ ти́:* имѣ́я къ Бо́гу дерзнове́ніе,* помина́й на́съ всегда́,* Іоаса́фе всеблаже́нне.

Въ Метео́рскую го́ру всели́вся,* пречестны́й хра́мъ Преображе́нія Госпо́дня* въ не́й обнови́лъ еси́,* украша́я его́ бога́тно.* Сего́ ра́ди и счи́сленъ бы́лъ еси́ къ самому́ кти́тору,* преподо́бному Аѳана́сію.* Съ ни́мъ же моли́ся Христу́ Бо́гу* грѣхо́въ оставле́ніе дарова́ти* чту́щимъ любо́вію святу́ю па́мять ва́шу.

Ще́дръ и даролюбе́зный* показа́лся еси́ къ метео́рскимъ святы́нямъ,* обогаща́я и́хъ мно́гими дарова́ньми* и защища́я и́хъ.* Къ тому́ и боголюби́ва сестра́ твоя́ Марíя* ще́дро помога́ше ти́.* Тѣ́мъ ны́нѣ мо́лимъ тя́:* помози́ и на́мъ, рабо́мъ твои́мъ,* святу́ю па́мять твою́ почита́ющимъ,* и испроси́ всѣ́мъ ве́лію и бога́тую ми́лость.

Имѣ́я всегда́ во умѣ́ свое́мъ ра́йскую жи́знь* и та́мо святы́хъ весе́ліе,* всю́ жи́знь на земли́, преподо́бне о́тче,* во смире́ніи и послуша́ніи проше́лъ еси́,* повину́яся зако́ну Бо́жію.* Тѣ́мже и безстра́стія благода́тію обогати́лся еси́,* ю́же испроси́ и всѣ́мъ на́мъ,* ублажа́ющимъ сла́вное твое́ успе́ніе.

Сла́ва, гла́съ 1:

Отъ ю́ности твоея́ у́мъ къ Бо́гу впери́въ, слуга́ Бо́жій бы́лъ еси́, сохраня́я я́ко свяще́нникъ спаси́тельная повелѣ́нія, мірско́е смуще́ніе оста́вилъ еси́ и, я́ко до́брый купе́цъ, тлѣ́нными нетлѣ́нная искупи́лъ еси́. Тѣ́мже ны́нѣ, па́мять твою́ почита́юще, вопіе́мъ: сла́ва Бо́гу, просвѣти́вшему тя́, сла́ва Вѣнча́вшему тя́, сла́ва святу́ю твою́ па́мять Просла́вльшему.

И ны́нѣ, пра́здника.
Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна отъ кано́на пра́здника, пѣ́снь рядова́я, и отъ кано́на преподо́бнаго, пѣ́снь 3-я. Проки́менъ пра́здника и преподо́бнаго, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ дне́ и преподо́бнаго ко Гала́томъ, зача́ло 213. Аллилу́ія [пра́здника и преподо́бнаго], гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя Его́. Ева́нгеліе отъ Луки́, зача́ло 77. Прича́стенъ пра́здника и преподо́бнаго: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Србљак. — Београд: Изданjе Свети Архиjереjски Синод Српске Православне Цркве, 1986. — С. 328-336.

/ Къ оглавленію раздѣла /


Наверхъ / Къ титульной страницѣ

0