Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 20-й де́нь.
Слу́жба свято́му му́ченику Гавріи́лу младе́нцу, въ лѣ́то Госпо́дне 1690-е отъ іуде́й уму́ченному въ Бѣлосто́цѣ гра́дѣ.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: поста́вимъ стихо́въ 8: пра́зднику 3 и свято́му 5, во гла́съ 1:

Гла́съ 2: Стека́ется собо́рище іуде́йское,* отъ Бре́ста же и Бѣлосто́ка,* да непоро́чнаго младе́нца му́камъ преда́стъ.* О, беззако́нныхъ, о, невѣ́рныхъ!* Сего́ непротивле́ніемъ не вразуми́вшихся,* и младе́нческую кро́вь до конца́ истощи́вшихъ,* и роди́тели того́ обезча́дствовавшихъ,* но мы́, свята́го му́ченика благоговѣ́йно почита́юще,* того́ дне́сь призове́мъ въ моли́тву,* о е́же такова́го жестосе́рдія на́мъ изба́витися* и спасти́ся душа́мъ на́шимъ.

Не пла́чите, роди́тели убіе́ннаго отъ іуде́й отроча́те,* его́же хла́дное тѣ́ло,* отъ плотоя́дныхъ пти́цъ чуде́снѣ охраня́емое, обрѣто́сте;* не пла́чите и не рыда́йте,* сіе́ исте́рзано отъ мучи́телей зря́ще,* зане́ ду́хъ Гавріи́ловъ уже́ со а́нгелы ра́дуется,* пору́ганное же тѣ́ло его́ тлѣ́нію не присту́пно яви́тся* и я́ко исто́чникъ исцѣле́ній всѣ́мъ вѣ́рнымъ во вѣ́ки пребу́детъ,* во увѣре́ніе и́стинныя вѣ́ры* и во спасе́ніе ду́шъ на́шихъ.

Оле безу́мія іуде́йскаго!* и́бо и пси́ разу́мнѣе ва́съ яви́шася,* ника́коже тѣлесе́ свята́го косну́тися дерзну́вше,* но сіе́ отъ вра́нъ охрани́вше тща́тельно,* невѣ́рствіе ва́ше облича́юще* и христіа́нскую вѣ́ру утвержда́юще,* вѣ́сть бо Госпо́дь и безслове́сными тва́рьми Своя́ уго́дники прославля́ти.* О, блаже́нный жре́бій святы́хъ Твои́хъ, Го́споди,* и́хже моли́твами просвѣти́ и спаси́ ду́ши на́ша.

Сла́ва, гла́съ 8:

О, ужа́снаго твоего́ по́двига, младе́нче святы́й Гавріи́ле! О, тя́жкихъ му́къ твои́хъ, надо́лзѣ претерпѣ́нныхъ! Вои́стинну укрѣпля́ющей благода́ти Бо́жіей досто́инъ яви́лся еси́ и дре́внимъ седми́ Маккаве́омъ тве́рдостію души́ уподо́бился еси́, отъ недосто́йныхъ единоплеме́нникъ тѣ́хъ умерщвля́емь, но всѣ́ми стра́шными терза́ньми Христа́ не отлучи́выйся и ду́хомъ чи́стымъ къ Нему́ пресели́выйся, на́съ же моли́твою твое́ю въ вѣ́рѣ утвержда́яй и твое́й ре́вности подража́ти науча́яй.

И ны́нѣ, пра́здника.
Вхо́дъ. Проки́менъ дне́ и пареміи́.

Проро́чества Иса́іина чте́ніе.

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры пра́здника или́ хра́ма.
Сла́ва, свято́му, гла́съ 4:

Младе́нецъ и му́ченикъ и вѣ́ры и́стинныя утвержде́ніе, свя́те Гавріи́ле, яви́лся еси́ и безу́міе іуде́йское нетлѣ́ніемъ твоего́ тѣлесе́ обличи́лъ еси́, тѣ́мже и на́съ проти́ву невѣ́рія и е́реси моли́твами твои́ми укрѣпи́ и Ца́рствія небе́снаго уче́ніе вложи́ въ сердца́ на́ша, да тя́ просла́вимъ, засту́пника на́шего, подаю́щаго душа́мъ [на́шимъ] ми́ръ и всѣ́мъ, призыва́ющимъ тя́, ве́лію ми́лость.

И ны́нѣ, пра́здника.

На стихо́внѣ стихи́ры, гла́съ 3:

Кто́ не умили́тся се́рдцемъ,* му́ки твоя́ помина́я, блаже́нне,* я́же чрезъ де́вять днíй отъ нечести́выхъ претерпѣва́ти изво́лилъ еси́?* Пе́рвѣе бо, кро́вь твою́ пома́лу изли́вше,* е́ле жи́ва су́ща тя́ оста́виша іуде́и,* да мно́жайшимъ му́камъ предаду́тъ твое́ непоро́чное тѣ́ло,* е́же и сме́рти преда́вше коне́чнымъ кро́ве истоща́ніемъ,* на ни́ву въ де́нь Свято́й Па́схи то́е безсту́днѣ изверго́ша;* мы́ же, твоя́ безчи́сленныя ра́ны цѣлу́юще,* по́двиги твоя́ те́плѣ прославля́емъ.

Сти́хъ: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится.

Собра́вшимся на коне́чное убіе́ніе Гавріи́ла младе́нца іуде́омъ,* того́ уже́ изму́ченное тѣ́ло на стѣнѣ́ ра́спято бы́сть,* и ре́бра ему́ ору́жіемъ мно́гажды прободо́ша,* ниже́ стена́ніями его́ умили́шася нечести́віи,* ниже́ объ отмще́ніи Госпо́дни помы́слити хотя́ху,* но сего́, я́ко му́ченика, просла́ви Христо́съ Бо́гъ на́шъ* и я́ко подо́бника Своея́ спаси́тельныя стра́сти* христіа́номъ чти́ти повелѣва́етъ.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Зри́, о душе́ моя́ окая́нная,* каково́е му́жество во младе́нчестѣмъ тѣлеси́ явля́етъ Гавріи́лъ му́ченикъ,* ка́ко то́й отъ Христа́ не отрече́ся,* а́ще и па́че седми́цы муче́ніямъ предава́шеся;* не облѣни́ся у́бо, душе́ моя́,* проти́ву страсте́й подвиза́тися,* устыди́ся младе́нца блаже́ннаго,* мно́жество мучи́телей побѣди́вшаго,* и тому́ со усе́рдіемъ помоли́ся,* да на неви́димыя враги́ побѣди́тель яви́шися.

Сла́ва, гла́съ 7:

Ужасъ бѣ́ ви́дѣти роди́телемъ младе́нческое тѣ́ло, лю́тѣ исте́рзано, на ни́вѣ посредѣ́ псо́въ, а́ки стра́жей вѣ́рныхъ, лежа́щее, изъ него́же всю́ кро́вь мучи́тели извлеко́ша и ко́жу его́ повсю́ду прободо́ша, оба́че Боже́ственная сла́ва, чрезъ звѣре́й явле́нная, отцу́ и ма́тери сле́зы на упова́ніе преложи́, и вѣ́ру Христо́ву въ россíйстѣхъ лю́дехъ утверди́, и на́съ къ пѣ́нію сла́вы твоея́, му́чениче, воздвиза́етъ.

И ны́нѣ, пра́здника.

На благослове́ніи хлѣ́бовъ тропа́рь, гла́съ 5:

Свя́те младе́нче Гавріи́ле, ты́ за Прободе́ннаго на́съ ра́ди отъ іуде́й, лю́тѣ отъ тѣ́хже въ ре́бра прободе́нъ бы́лъ еси́, и за Истощи́вшаго кро́вь Свою́ за на́съ, все́ тѣ́ло твое́ на истоще́ніе кро́ве въ лю́тыя я́звы пре́далъ еси́, ны́нѣ же во сла́вѣ вѣ́чной съ Ни́мъ весели́шися. Тѣ́мъ помина́й та́мо и на́съ, мо́лимъ, здѣ́ чту́щихъ тя́, прося́ на́мъ и здра́вія тѣлесе́мъ и спасе́нія душа́мъ на́шимъ. [Два́жды.]

И Богородице Дѣво.., единожды. И прочая.



НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

По 1-й стихоло́гіи сѣда́ленъ пра́здника, или́ се́й, гла́съ 1:

Возсія́ на́мъ па́мять муче́ній твои́хъ, Гавріи́ле, о младе́нцѣхъ къ Бо́гу хода́таю теплѣ́йшій, муже́мъ же и жена́мъ терпѣ́нія учи́телю; пріиди́те, того́ подража́имъ по́двиги и на бѣсо́вскія прило́ги му́жественно ополчи́мся, младе́нца му́ченика въ по́мощь призыва́юще. [Два́жды.]

Сла́ва, и ны́нѣ, пра́здника.

По 2-й стихоло́гіи сѣда́ленъ пра́здника, или́ се́й, гла́съ 2:

Написова́шеся въ лѣ́тописи Заблу́довстѣй, я́ко убіе́нный отъ іуде́й, Гавріи́лъ младе́нецъ, то́йже въ кни́зѣ живо́тнѣй написова́шеся, я́ко му́ченикъ и чудотво́рецъ, его́же моли́твами и на́съ да не изгла́дитъ изъ кни́ги живота́ Христо́съ и Спа́съ ду́шъ на́шихъ. [Два́жды.]

Сла́ва, и ны́нѣ, пра́здника.

Псало́мъ избра́нный му́ченикомъ и велича́ніе:

Велича́емъ тя́, страстоте́рпче святы́й младе́нче Гавріи́ле, и чте́мъ честна́я страда́нія твоя́, я́же за Христа́ претерпѣ́лъ еси́.

По поліеле́и сѣда́ленъ, гла́съ 3:

Излія́нными твои́ми кровьми́, Гавріи́ле, му́чениче Христо́въ, іуде́йское нече́стіе посрамля́ется, и ерети́ческая блужда́нія облича́ются, и неду́зи разли́чніи исцѣля́ются, и ду́ши на́ша вѣ́рою спаса́ются. [Два́жды.]

Сла́ва, и ны́нѣ, пра́здника.

Степе́нна, 1-й антифо́нъ, 4-го гла́са. Проки́менъ, гла́съ 4: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Вся́кое дыха́ніе... Сти́хъ: Хвали́те Бо́га во святы́хъ Его́... Ева́нгеліе Луки́, зача́ло 63. Та́же: Воскресе́ніе Христо́во ви́дѣвше...

По 50-мъ псалмѣ́ стихи́ра, гла́съ 2:

Дне́сь льсти́вными словесы́ младе́нецъ изъ до́му о́тча изво́дится, дне́сь непови́нная того́ кро́вь пролива́ется, и въ подземе́ліе святы́й Гавріи́лъ отъ іуде́й заключа́ется, и мучи́телей со́нмище собира́ется, дне́сь совѣ́тъ зло́бы исполня́ется и лю́той сме́рти отроча́ предае́тся, ду́хъ же его́ небе́снымъ чина́мъ сочетава́ется, и мы́ тому́ вопіе́мъ, умиле́нно: спаса́й на́съ предста́тельствомъ твои́мъ, уго́дниче Бо́жій и му́чениче Христо́въ, Гавріи́ле блаже́нне.

Кано́нъ пра́здника на 6 и свята́го на 8, его́же краегране́сіе: Младе́нца моли́твами спаси́ мя. Гла́съ 4.

Пѣ́снь 1.

Ирмо́съ: Ли́цы изра́ильтестіи, невла́жными стопа́ми по́нтъ Чермны́й и вла́жную глубину́ прогна́вше, вса́дники триста́ты враги́ ви́дяще въ не́й погруже́ны, съ весе́ліемъ поя́ху: пои́мъ Бо́гу на́шему, я́ко просла́вися.

Младе́нче и му́чениче, чудотво́рче и болѣ́зней цѣли́телю, Гавріи́ле, уго́дниче Христо́въ, досто́йными словесы́ твоя́ по́двиги восхвали́ти недоумѣ́ю, оба́че твоего́ терпѣ́нія и незло́бія красото́ю умиля́юся, си́хъ дарова́ній прича́стника и мене́ покажи́, твоего́ моли́твенника.

Лю́діе россíйстіи отъ іуде́й уму́ченнаго младе́нца ви́дѣвше, отъ псо́въ же несмы́сленныхъ, я́ко сокро́вище, охраня́ема, взыва́ху: Го́споди, того́ моли́твами поми́луй на́съ.

Анна смиренному́дренная, Гавріи́ла му́ченика ма́ти, со отце́мъ его́ Петро́мъ трудолюби́вымъ сле́зы на ра́дость преложи́ша, своего́ отроча́те увѣ́дѣвше неувяда́емую сла́ву.

Богоро́диченъ: Же́злъ Ааро́новъ прозя́бшій, и́же отъ Іессе́я прообража́ше изра́стшій ко́рень, Тя́, Пречи́стую, цвѣ́тъ мíру возсія́вшую, Бо́га воплоще́нна, Его́же о на́съ моля́щи не преста́й, Приснодѣ́во, прибѣга́ющихъ къ Тебѣ́.

Пѣ́снь 3.

Ирмо́съ: Яко непло́ды, роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Добро́ бы́ло бы́сть ва́мъ не роди́тися, нечести́віи мучи́теліе, зане́ отра́днѣе бу́детъ Содо́му и Гомо́рру въ де́нь Су́дный, не́же Христо́ва исповѣ́дника убíйцемъ. Того́ моли́твами, Го́споди, утверди́ правосла́вныхъ вѣ́ру.

Егда́ подписа́ніе, е́же о твое́мъ муче́ніи, отъ іуде́евъ бы́вшемъ, му́чениче, сотвори́ша судіи́ заблу́довстіи, тогда́ исте́рзанное тѣ́ло твое́ землѣ́ благоче́стно преда́ша лю́діе. Но проше́дшимъ три́десятимъ лѣ́томъ то́ежде тлѣ́нію неприча́стно обрѣто́ша и Госпо́дне о тебѣ́ промышле́ніе просла́виша.

Ни́щимъ и оби́димымъ бли́зъ е́сть Госпо́дь: То́й бо, отъ ни́щихъ роди́телей отъя́ти ча́до попусти́въ нечести́вымъ, па́че царе́й земны́хъ безча́дныя прославля́етъ, зане́ и ца́ріе и святи́теліе тѣ́хъ отроча́те моли́твенно преклоня́ютъ колѣ́на.

Богоро́диченъ: Яко но́сиши на руку́, Марíе, и отъ сосцу́ пита́еши Пита́ющаго вся́кое дыха́ніе, Его́же, Богоро́дице, чту́ще, проповѣ́даемъ: моли́ся Ему́, Чи́стая, о всѣ́хъ на́съ.

Конда́къ, и и́косъ пра́здника.
Сѣда́ленъ свята́го, гла́съ 8:

О, какова́я муче́нія твоя́, отроча́, Бо́гу возлю́бленное! О, какова́я терпѣ́нія твоего́ крѣ́пость, избоде́ніе бо, и ме́дленное кро́ве испуща́ніе, и пло́ти твоея́ раздира́ніе за Христа́ прія́лъ еси́, но Того́ ра́ди засту́пникъ о стра́ждущихъ младе́нцѣхъ у Христа́ Бо́га явля́ешися, ма́тери твоей́, обезча́дствованнѣй бы́вшей, всѣ́мъ ма́теремъ, о ча́дѣхъ моля́щимся, утѣ́шитель быва́еши и мо́лишися при́сно о спасе́ніи ду́шъ на́шихъ. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Услы́шахъ Твое́, Христе́, вои́стинну пресла́вное, я́ко безсме́ртенъ сы́й Бо́гъ, уподо́бися сме́ртнымъ человѣ́комъ и пребы́сть, е́же бѣ́, и того́ ра́ди Твою́ сла́влю си́лу.

Царе́мъ и мучи́телемъ преклони́ша вы́и своя́ на убіе́ніе дре́вніи му́ченицы, тѣ́хъ подо́бникъ бы́сть Гавріи́лъ младе́нецъ, кро́вь свою́ непови́нную на истерза́ніе отда́въ іуде́омъ жестокосе́рдымъ. Го́споди, того́ моли́твами вложи́ ре́вность о сла́вѣ Твое́й въ ду́ши на́ша.

Аще и въ те́мнѣй погребни́цѣ заключи́ша тебе́ іуде́е, о му́чениче, а́ще и стра́шными му́ками тебе́ умертви́ша, но а́біе во свѣ́тлый черто́гъ Госпо́день ду́хъ тво́й, ра́дуяся, всели́ся, идѣ́же со а́нгелы о сла́вѣ Госпо́днѣй дне́сь лику́етъ.

Ми́лостивъ бу́ди къ мои́мъ не́мощемъ, му́чениче святы́й Гавріи́ле, моего́ малоду́шія не возгнуша́вся, проще́ніе ми́ отъ Го́спода испроси́, и́же себе́ за вѣ́ру Его́ не пощади́вый и въ младе́нчестѣмъ тѣлеси́ Того́ просла́вивый.

Богоро́диченъ: Тебе́, Приснодѣ́вую и вои́стинну еди́ну Богоро́дицу, сла́вимъ, Юже прообразова́ше Богови́дцу Моисе́ю неопа́льно, Пречи́стая, купина́, огню́ примѣси́вшаяся.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Образъ злострада́нія Гавріи́лова пріи́мемъ, бра́тіе, и своего́ о вѣ́рѣ нерадѣ́нія устыди́мся, отъ убива́ющихъ тѣ́ло не убои́мся, но Иму́щему вла́сть по убіе́ніи въ гее́нну о́гненную вве́ргнути, Тому́ со стра́хомъ повини́мся, страстоте́рпца свята́го въ по́мощь призыва́юще.

Люта́ е́сть му́ка, но сла́докъ ра́й, болѣ́зненно на земли́ безча́діе, но неисчерпа́емо утѣше́ніе на́ше, — роди́теля Гавріи́лова взыва́ху, — отъ земны́хъ бо печа́лей ча́до на́ше къ вѣ́чнѣй ра́дости пресели́ся.

Иже о болѣ́знехъ и му́кахъ ча́дъ свои́хъ скорбя́ще, роди́теліе, съ вѣ́рою ко гро́бу Гавріи́лову припади́те, е́сть бо засту́пникъ о ни́хъ предъ Христо́мъ, я́ко кро́вь свою́ за исповѣ́даніе и́стинныя вѣ́ры излія́вый.

Богоро́диченъ: Мучи́телей ра́зумъ дѣ́вственное посрами́ чре́во: Младе́нецъ бо я́зву а́спидную душегу́бную испыта́ руко́ю и, отсту́пника го́рдаго низложи́въ, вѣ́рнымъ подъ но́зѣ покори́.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Твои́хъ ра́бъ моле́нія не отве́ржи, младе́нче прему́дре, твое́ю сла́вою умиля́ющихся и твоя́ по́двиги со умиле́ннымъ се́рдцемъ воспѣва́ющихъ, а́ще терпѣ́нія твоего́ не стяжа́вшихъ, но испра́вити житіе́ свое́ жела́ющихъ.

Вся́ческихъ сокро́вищь, и́миже земля́ украша́ется: зла́та, и би́сера, и ка́меній многоцѣ́нныхъ, честнѣ́йша су́ть святы́хъ уго́дниковъ нетлѣ́нныя мо́щи, и́ми бо благода́тная си́ла Бо́жія дѣ́йствуетъ, сію́ у́бо на́мъ испроси́, уго́дниче Христо́въ, во исцѣле́ніе ду́шъ и тѣле́съ на́шихъ.

Аще и мно́гая гоне́нія правосла́вніи христіа́не отъ іуде́й и отъ ерети́къ прія́ша, о́крестъ сла́вныя оби́тели твоея́ живу́щіи, оба́че стоя́ніе твое́ о и́стиннѣй вѣ́рѣ воспомина́юще, отъ прославле́нія и́стиннаго Бо́га и твоего́ предста́тельства ника́коже отпадо́ша.

Богоро́диченъ: Дре́вле у́бо прельсти́ мя змíй и умори́ мя прама́терію мое́ю Евою, ны́нѣ же, Чи́стая, Тобо́ю Созда́вый мя́ изъ истлѣ́нія воззва́лъ е́сть.

Конда́къ, гла́съ 6:

Оте́чество твое́ Звѣрки́ бы́сть, му́чениче Христо́въ Гавріи́ле, идѣ́же отъ и́стыхъ звѣре́й — іуде́евъ восхище́нъ: а́біе роди́телей лише́нъ еси́, та́же вся́ поря́ду лю́тѣ претерпѣ́въ, въ оте́чество небе́сное преселе́нъ еси́. Восхища́й и на́съ здѣ́ отъ вся́кихъ напа́стей и скорбе́й и умоли́, мо́лимъ тя́, улучи́ти вѣ́чное наслѣ́діе твое́.

Икосъ:

Просла́вимъ, бра́тіе, Гавріи́ла младе́нца, о Христѣ́ злострада́нія прія́вшаго, то́й бо, я́ко ягня́ незло́бивое, льсти́вому іуде́ю послѣ́довавъ, изъ до́ма о́тча восхище́нъ бы́сть и въ те́мную погре́бницу вве́рженъ, ужа́сная же терза́нія и избоде́нія пло́ти своея́ претерпѣ́въ надо́лзѣ, я́ко же́ртва чи́стая Тро́ицѣ принесе́ся и мно́гая заступле́нія о моля́щихся ему́ чрезъ мно́гая лѣ́та показу́етъ, вся́ приходя́щія въ це́рковь его́ зра́комъ нетлѣ́ннаго тѣлесе́ своего́ умиля́я. Тому́ у́бо возопіи́мъ: умоли́, мо́лимъ тя́, улучи́ти и на́мъ вѣ́чное наслѣ́діе твое́.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Ма́терей скорбя́щихъ утѣ́шителю, младе́нцевъ боля́щихъ цѣли́телю, Гавріи́ле, уго́дниче Христо́въ, ду́шу мою́, скорбя́щую о грѣсѣ́хъ свои́хъ, утѣ́ши и исцѣли́ и сію́ надъ пло́тію госпожу́ моли́твою твое́ю содѣ́лай, своея́ пло́ти Христа́ ра́ди не пощади́вый.

Или́ не разумѣ́ете, нечести́віи іуде́и, я́ко Бо́га оте́цъ ва́шихъ врага́ себѣ́ содѣ́ловаете, Того́ созда́ніе непови́нное лю́тѣ терза́юще и сицевы́мъ дѣя́ніемъ приноси́ти Ему́ слу́жбу мня́ще, безу́мніи. Го́споди, Гавріи́ла моли́твами ча́дъ и́хъ сердца́ умягчи́ и сердца́ на́ша отъ сицевы́я лю́тости изба́ви.

Слу́цкъ гра́дъ вои́стинну блаже́нъ е́сть, та́мо бо проше́дшимъ пяти́десятимъ шести́мъ лѣ́томъ положи́ся му́ченика Гавріи́ла нетлѣ́нное тѣ́ло, та́мо до дне́сь сле́зы, моли́твы и благодаре́нія предъ гро́бомъ его́ отъ ма́терей о ча́дѣхъ свои́хъ излива́ются и всѣ́хъ вѣ́рующихъ пріе́млются моле́нія.

Богоро́диченъ: Превы́шши тва́рей всѣ́хъ еси́, я́ко Творца́ ро́ждши и Го́спода. Тѣ́мже Ти́ вопію́, Богоро́дице: Благослове́нная, Госпо́дь си́лъ съ Тобо́ю.

Пѣ́снь 8.

Ирмо́съ: Ра́дующеся по осужде́ніи мучи́тельскомъ о́троцы, я́ко да не бого́мъ скве́рнымъ послу́жатъ всѣ́мъ, но Живо́му Бо́гу, на о́гнь дерзну́ша, отъ Ангела же ороша́еми, пѣ́снь поя́ху: дѣла́ Госпо́дня, Го́спода по́йте и превозноси́те во вся́ вѣ́ки.

Пти́цы сыроя́дцы, надъ исте́рзаннымъ тѣ́ломъ му́ченика рѣ́юще, и пси́ гла́дніи, сія́ отража́юще и тѣ́ло му́ченика храня́ще, обличи́теліе злодѣя́нія іуде́йскаго яви́шася, сла́вы же свята́го нѣ́міи проповѣ́дницы.

Аще и звѣ́ріе гла́да своего́ о свято́мъ тѣлесе́ утоли́ти не дерзну́ша, ка́ко у́бо зло́ба іуде́евъ тѣ́мъ насыща́шеся? Ка́ко тíи, чу́до зря́ще, не пока́яшася? Зри́, о душе́ моя́, си́хъ ожесточе́ніе, и ужасни́ся, и свято́му сему́ помоли́ся, да отъ вся́кія зло́бы тебе́ вы́ну огражда́етъ.

Сле́зы умиле́нія о по́двизѣ и о сла́вѣ младе́нца и му́ченика пролива́юще, бра́тіе, своего́ окая́нства воспла́чимъ и своего́ нерадѣ́нія устыди́мся: а́ще бо та́ко Бо́гу угоди́ младе́нецъ ма́лый, почто́ мы, му́жіе, су́ще о се́мъ небрего́хомъ?

Богоро́диченъ: Отъ ребра́ Ада́мова созда́вый Тя́, отъ Твоего́ дѣ́вства воплоти́ся, Иже всѣ́хъ Госпо́дь, Его́же пою́ще, вопіе́мъ: вся́ дѣла́, благослови́те, по́йте Го́спода и превозноси́те во вся́ вѣ́ки.

Пѣ́снь 9.

Ирмо́съ: Отъ земноро́дныхъ ро́ждшися и Творца́ ро́ждшая, на́ша похвало́, Богоро́дице Чи́стая, Тя́, я́ко влады́чествующую тва́рьми, велича́емъ.

И ны́нѣ, уго́дниче Бо́жій Гавріи́ле, о наро́дѣ россíйстѣмъ бу́ди предъ Го́сподемъ предста́тель, я́коже дре́вле: тогда́ бо отъ іуде́й и ерети́къ муче́нія христіа́не пріима́ху, ны́нѣ же отъ обою́ собла́зномъ вдаю́тся лю́тѣ, тѣ́мже твоего́ стоя́нія да́руй на́мъ па́мять и о подража́ніи тебѣ́ ре́вность благу́ю.

Мы́сленнаго убíйцу души́ моея́, сію́ поглоти́ти и́щуща, побѣжда́ти помози́ мнѣ́, Бо́жій уго́дниче, тѣ́ло свое́ на истерза́ніе преда́вый, но ду́шу свою́ непоро́чну отъ тѣ́хъ устраше́нія сохрани́вый и Христо́ви, а́ки да́ръ че́стенъ, страда́нія своя́ принесы́й и сего́ ра́ди отъ Него́ благода́ть прія́вый, во е́же моли́твы на́ша престо́лу сла́вы Его́ при́сно возноси́ти.

Язвы, на твое́ младе́нческое тѣ́ло отъ іуде́й возложе́нныя, я́звы врагу́ спасе́нія на́шего яви́шася, де́моновъ побѣди́телю, Гавріи́ле блаже́нне, отъ и́хже мучи́тельства изба́ви ду́ши на́ша и надъ тѣ́хъ искуше́ній побѣди́тели предста́тельствомъ твои́мъ яви́ на́съ.

Богоро́диченъ: Отъ земноро́дныхъ возра́стши и Зижди́теля ро́ждши, ра́дуйся, на́ша похвало́, Богоро́дице Чи́стая, Тя́, я́ко облада́ющую тва́рьми, велича́емъ.

Свѣти́ленъ. Подо́бенъ: Пло́тію усну́въ.

Пло́ть на растерза́ніе іуде́омъ вда́вшаго, ду́хъ же сво́й Бо́гу преда́вшаго, дне́сь воспои́мъ во младе́нцѣхъ му́ченика, того́ приводя́ще въ моли́тву о умире́ніи Це́ркви и о спасе́ніи ду́шъ на́шихъ. [Два́жды.]

Сла́ва, и ны́нѣ, пра́здника.

На хвали́техъ стихи́ры пра́здника 3 и свята́го 3, гла́съ 5:

Ра́дуйся, младе́нцевъ похвало́ пресла́вная;* ра́дуйся, му́чениковъ соприча́стниче* и россíйскаго наро́да сла́во пречестна́я,* отъ те́мныя погребни́цы просія́вшая* и правосла́вныхъ сердца́ просвѣти́вшая.* Ра́дуйся, моли́твъ ма́терей скорбя́щихъ ско́рый слы́шателю;* ра́дуйся, двоеду́шныхъ человѣ́къ молчали́вый обличи́телю.* Помози́ у́бо на́мъ, пра́ведниче Бо́жій,* за святу́ю вѣ́ру крѣ́пко подвиза́тися* и моли́тву сотвори́ о спасе́ніи ду́шъ на́шихъ.

Ра́дуйся, чуде́съ исто́чниче,* са́мъ же чу́до долготерпѣ́нія яви́выйся;* ра́дуйся, младе́нческую чистоту́ съ му́жествомъ му́ченика сочета́вый* и іуде́йское злоче́стіе посрами́вый.* Ра́дуйся, Россíйстѣй странѣ́ сокро́вище неоцѣне́нное* въ твои́хъ святы́хъ моще́хъ дарова́вый* и моле́ніе те́плое ко Христу́ вознося́й* о умире́ніи мíра, и Церкве́й стоя́ніи,* и о спасе́ніи ду́шъ на́шихъ.

Ра́дуйся, сердца́ всѣ́хъ человѣ́ковъ умиля́яй;* ра́дуйся, твои́мъ мучи́тельскому наси́льству противле́ніемъ* и хла́дныя ду́ши покая́ніемъ сокруша́яй.* Ра́дуйся, смире́нныхъ се́рдцемъ и ни́щихъ утѣше́ніе,* и младе́нцевъ непосты́дное упова́ніе,* и и́ноковъ ева́нгельскому младе́нчеству учи́телю,* и моли́твенниче о душа́хъ на́шихъ.

Сла́ва, гла́съ 2:

Страсте́й Христо́выхъ седми́цу соверша́ющимъ христіа́номъ и ду́ши своя́ ко срѣ́тенію Святы́я Па́схи приуготовля́ющимъ, Гавріи́лъ младе́нецъ отъ іуде́й стра́сть пріима́ше и, на стѣнѣ́ погре́бницы те́мныя распина́емый за распя́таго Спа́са, кро́вь свою́ излива́ше, прише́дшу же дне́ви Госпо́дня Воскресе́нія ду́хъ его́ ко Христу́ въ небе́сная селе́нія оты́де, пло́ть же его́ іуде́и внѣ́ гра́да изверго́ша, но сія́, нетлѣ́нна пребыва́ющи, да́же до дне́сь о́бщее воскресе́ніе проповѣ́дуетъ и уго́дника умоля́ти на́съ науча́етъ, да мо́лится непреста́нно о душа́хъ на́шихъ.

И ны́нѣ, пра́здника.
Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на пра́здника пѣ́снь рядова́я и свята́го пѣ́снь 3-я. Проки́менъ, гла́съ 4: Изъ у́стъ младе́нецъ и ссу́щихъ* соверши́лъ еси́ хвалу́. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ, зача́ло 58 отъ полу́: Бра́тіе, отложи́вше вся́ку зло́бу и ле́сть... Коне́цъ: Ны́нѣ поми́ловани бы́сте. Ева́нгеліе Матѳе́я, зача́ло 74. Прича́стенъ: Изъ у́стъ младе́нецъ и ссу́щихъ соверши́лъ еси́ хвалу́.


[Мрк.] Аще случи́тся па́мять свята́го Гавріи́ла младе́нца во святы́й и вели́кій вто́рникъ, или́ въ вели́кую сре́ду, или́ въ четверто́къ, и пое́мъ слу́жбу его́ въ недѣ́лю Ва́ій, я́коже въ ти́пицѣ, во главѣ́ о хра́мѣхъ показа́ся. Аще ли бу́детъ па́мять его́ въ вели́кій пято́къ, или́ въ суббо́ту, или́ въ са́мый святы́й де́нь Па́схи, и пое́мъ слу́жбу его́ въ понедѣ́льникъ Па́схи; а́ще ли въ то́й понедѣ́льникъ бу́детъ па́мять свята́го Гео́ргія Побѣдоно́сца, и пое́мъ слу́жбу свята́го Гавріи́ла во вто́рникъ Па́схи. Про́чее же пое́мъ его́ слу́жбу по уста́ву дне́ свята́го Гео́ргія Побѣдо́носца, и́же е́сть въ 23-й де́нь мѣ́сяца Апри́ллія. [Зри:] Сіе́ же разумѣ́й, я́ко идѣ́же указа́ся кано́нъ, или стихи́ра, или́ тропа́рь ре́кше пра́здника, нѣ́сть у́бо се́ пра́здникъ са́мыя святы́я Па́схи, но по тріо́ди дне́ того́, сіе́ е́сть седми́чнаго дне́ Антипа́схи или́ мѵроно́сицъ, или́ разсла́бленнаго, или́ Преполове́нія, въ о́ньже де́нь обря́щеши въ тріо́ди подоба́ющія стихи́ры, и кано́ны, и сѣда́льны.

Аще ли бу́деши пѣ́ти слу́жбу свята́го Гавріи́ла, кромѣ́ Пятдеся́тницы или́ недѣ́ли Цвѣтоно́сія, во и́нъ де́нь го́да, и тогда́ вмѣ́сто кано́на пра́здника глаго́ли кано́нъ Богоро́дицы отъ окто́иха настоя́щаго гла́са и богоро́дичны воскре́сны стихи́ръ, и сѣда́льновъ, и тропаре́й и свѣти́льна въ то́йже гла́съ, то́чію на Го́споди воззва́хъ.., богоро́диченъ пе́рвый настоя́щаго гла́са. Аще ли бу́детъ ко́е-ли́бо попра́зднство, то па́ки и́нъ уста́въ обря́щеши, ка́ко подоба́етъ тогда́ пра́вити па́мять свята́го, иму́щаго поліеле́й или́ бдѣ́ніе: е́сть бо сему́ о́бразъ Іаннуа́рія въ 11-й де́нь на па́мять преподо́бнаго Ѳеодо́сія Вели́каго и попра́зднства Богоявле́нія. То́жде и въ гла́вахъ типико́на о хра́мѣхъ обря́щеши.

Конецъ и Богу слава.

Источникъ: Слу́жба свято́му му́ченику Гавріи́лу младе́нцу, въ лѣ́то Госпо́дне 1690-е отъ іуде́й уму́ченному въ Бѣлосто́цѣ гра́дѣ, его́же нетлѣ́нныя мо́щи во гра́дѣ Слу́цтѣ додне́сь почива́ютъ. — Поча́евъ: Тѵпогра́фія Поча́ево-Успе́нскія Ла́ѵры, 1908. — 13 л.

/ Къ оглавленію раздѣла /


Наверхъ / Къ титульной страницѣ

0