Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 19-й де́нь.
Преподо́бнаго отца́ на́шего Іоа́нна Ветхопеще́рника.

[ВЕЧЕРЪ,]
На Го́споди воззва́хъ: стихи́ры, гла́съ 5. Подо́бенъ: Преподо́бне о́тче.

Преподо́бне о́тче Іоа́нне досточу́дне,* уязви́вся боже́ственнымъ жела́ніемъ* тебе́ ра́ди на земли́ во́лею стра́нствовавшаго* и отъ Дѣ́вы въ пло́ть обле́кшася Христа́ Бо́га,* въ чу́жду страну́, о́тче, дости́глъ еси́,* всѣ́хъ сла́дкихъ мíра, му́дре, отчужди́лъ еси́,* до конца́ себе́, преблаже́нне,* стра́ненъ пожи́лъ еси́, добродѣ́тели стяжа́въ:* стоя́ніе всено́щное, поуче́ніе сме́ртное,* и обузда́лъ еси́ стра́сти воздержа́ніемъ твои́мъ,* ревни́тель я́влься пре́жде тебе́ пости́вшимся,* съ ни́миже и просла́вился еси́.

Преподо́бне о́тче Іоа́нне пресла́вне,* учи́вся въ ста́дѣ боже́ственнаго Харито́на,* поче́рплъ еси́, я́ко гу́ба, и налія́,* сего́ боже́ственному поревнова́въ пути́,* и, въ безмо́лвіи житіе́ изжи́въ,* сподо́бился еси́ честна́го священнодѣ́йства,* бы́въ досто́инъ жре́цъ,* закала́я, я́ко непороченъ агнецъ, всегда* и, очищаемь божественными заря́ми* и просвѣща́яся умо́мъ и мы́слію,* возне́слся еси́ въ видѣ́нія та́йная,* ко изря́дному блаже́нству.

Преподо́бне о́тче Іоа́нне преблаже́нне,* си́лою Тро́ическою укрѣпля́емь,* ерети́ческаго вре́да отбѣ́глъ еси́ всего́,* прилѣпи́лся еси́ Су́щему, му́дре,* видѣ́ніемъ и дѣя́ніемъ боже́ственнымъ,* и дости́глъ еси́ всѣ́хъ жела́емыхъ,* къ кра́йнѣй, блаже́нне, боже́ственнѣй сла́вѣ,* ю́же вои́стинну получи́лъ еси́ досто́йно по кончи́нѣ,* и ра́дуешися, со а́нгельскими ли́ки* сооблиста́яся и Бо́гу предстоя́.* Тѣ́мже помяни́ творя́щихъ твою́ па́мять досто́йно, досточу́дне.

Сла́ва, и ны́нѣ, богоро́диченъ:

Кому́ уподо́билася еси́, душе́,* успѣва́ющи въ го́ршихъ всегда́* и прилага́ющи безу́мно твои́мъ я́звамъ стру́пы мно́жайшія,* я́ко всетѣле́снѣй бы́ти я́звѣ?* Не помышля́ющи, я́ко Судія́ приближа́ется,* Ему́же предста́неши воспрія́ти по дѣя́ніемъ вины́ и томле́нія.* Но, обра́щшися, припади́ къ Дѣ́вѣ, зову́щи:* Влады́чице, Влады́чице, не пре́зри мя́,* прогнѣ́вавшаго Бо́га Благоми́лостиваго,* изъ Тебе́ на спасе́ніе человѣ́комъ ро́ждшагося* и распе́ншагося пло́тію.

Крестобогоро́диченъ:

Егда́ гро́здъ, ненасажде́нъ су́щъ,* я́ко лоза́, отрасти́ла еси́,* узрѣ́вши на дре́вѣ повѣ́шена,* прободе́на же копіе́мъ въ Боже́ственная ре́бра,* что́ сіе́, — глаго́лаше, — Сы́не и Бо́же Мо́й?* Ка́ко, Иже неду́ги вся́ и стра́сти исцѣля́яй,* стра́сти терпи́ши,* безстра́стенъ сы́й по естеству́ Боже́ственному?* Что́ Ти безблагода́тніи лю́діе, Благодѣ́телю,* сія́ возда́ша вмѣ́сто благодѣ́яній? —* вопія́ше Пречи́стая.* Но́ Того́ страстьми́ страсте́й мя́ свободи́ти моли́ непреста́нно,* я́ко да сла́влю Тя́.


[НА УТРЕНИ,]
Кано́нъ, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Наде́ждею, я́же къ Бо́гу, укрѣпля́емь отъ ю́ности, благо́му прите́клъ еси́ Бо́гу, Іоа́нне блаже́нне, мона́шескими поще́ніи лу́чшими составля́яся.

Бога́тыя и свѣтоно́сныя благода́ти испо́лненъ и въ честны́хъ мѣ́стѣхъ живы́й, че́стно положи́лъ еси́ къ добродѣ́телемъ веды́й восхожде́нія, преблаже́нне.

Крѣ́постію наста́вленъ бы́въ Ду́ха, въ Харито́нову богоно́снаго огра́ду прите́къ, въ то́й пре́былъ еси́, священнодѣ́йственникъ бы́въ просвѣще́нъ, чисти́телю.

Отчужди́въ отъ земны́хъ, преподо́бне, твою́ мы́сль, небе́снымъ сію́ благи́мъ, Іоа́нне, пригвозди́лъ еси́ и е́же отту́ду улучи́лъ еси́ свѣтлѣ́йшее сія́ніе.

Богоро́диченъ: Изъ Тебе́, обра́дованная Всечи́стая, на́мъ яви́ся Пра́вды Со́лнце — Христо́съ и свѣ́томъ просвѣти́ сѣдя́щія пе́рвѣе въ те́мныхъ тве́рдехъ.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Умертви́въ плотско́е воздержа́ніемъ извѣ́стнымъ мудрова́ніе, Животворя́щему Ду́ху, о́тче Іоа́нне, прибли́жился еси́. [Два́жды.]

Боже́ственное и свѣтоза́рное въ се́рдцѣ твое́мъ я́вѣ сія́ніе свѣ́тло всели́ся, о́тче Іоа́нне блаже́нне.

Богоро́диченъ: Ты́ еди́на су́щимъ на земли́ па́че естества́ благи́мъ Хода́таица, Ма́ти Бо́жія, была́ еси́: тѣ́мже Тебѣ́ — ра́дуйся! — зове́мъ.

Сѣда́ленъ, гла́съ 8. Подо́бенъ: Прему́дрости.

Боже́ственнымъ жела́ніемъ, блаже́нне, ду́шу уязви́въ, устрани́лся еси́, бога́тство оста́вль, пи́щу, и свѣ́тлость, и житія́ нестоя́тельное, и во страна́хъ чужди́хъ всече́стно пожи́лъ еси́; воздержа́нія болѣ́зньми увяди́лъ еси́ тѣ́ло твое́ и, безмо́лвіемъ пожи́въ му́жески, дости́глъ еси́, преподо́бне, добродѣ́телей соверше́ніе. Тѣ́мже вѣ́рою вопіе́мъ ти́: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, о́гнь бо всели́ся въ Тя́ Божества́, и я́ко младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы, Ты́ бо еси́, Человѣколю́бче, крѣ́пость моя́ и хвале́ніе.

Въ богоза́рныхъ страна́хъ воспита́нъ и свѣтоза́рнымъ проли́тіемъ, о́тче, просвѣща́емь, добродѣ́тельми и воздержа́ньми, богому́дре, пожи́лъ еси́.

Отчужди́вся оте́чества и твои́хъ, ко Христу́ приступи́лъ еси́ во́льнымъ хотѣ́ніемъ, кре́стъ взе́мъ, богому́дре блаже́нне.

Ме́ртвъ всѣ́мъ ви́димымъ жи́зненною Вино́ю, воздержа́ніемъ пожи́лъ еси́, Іоа́нне прему́дре, къ Нему́же и отше́лъ еси́.

Богоро́диченъ: Иже во Твою́ утро́бу, Дѣ́во, богопрія́тную, па́че естества́ всели́ся, Се́й и по рождествѣ́ Боже́ственною си́лою Тя́ Дѣ́ву соблюде́.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Умъ, о́тче, чи́стъ безмо́лвіемъ стяжа́въ, Ду́ха Свята́го си́лою вра́жіихъ сѣ́тей отбѣ́глъ еси́. [Два́жды.]

Благода́тію Бо́жіею, и прему́дростію, и уче́ніи пожи́лъ еси́, богоявле́нне, свяще́нникъ бы́въ, преблаже́нне святи́телю.

Богоро́диченъ: Вси́ ро́ди благоче́стно блажа́тъ Тя́, Пречи́стая, ро́ждшую па́че естества́ и сло́ва вои́стинну Блаже́ннаго.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Прему́дрости рачи́тель бы́въ боже́ственныя, богодухнове́нне, благода́тей вѣнце́мъ отъ нея́ вѣнча́лся еси́, всѣ́ми о́бразы свѣтоно́сному учени́къ бы́въ Харито́ну. [Два́жды.]

Поста́вилъ еси́ на Христо́вѣ ка́мени но́зѣ твои́, дѣ́тельми восходя́ добродѣ́телей, богому́дре, богоразу́мно восхожде́нія въ се́рдцы твое́мъ, о́тче, полага́я.

Богоро́диченъ: Кля́твы пе́рвыя ма́тере, Евы, рождество́мъ Твои́мъ свободи́хомся: Ты́ бо, Христа́ ро́ждши, Дѣ́во Ма́ти, вмѣ́сто сея́ благослове́ніе всѣ́мъ источи́ла еси́.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Си́лою Боже́ственною, я́ко оде́ждею, обложе́нъ, вся́кія напа́сти ерети́ческія отбѣ́гнути возмо́глъ еси́, преблаже́нне, благослове́нъ еси́, — вопія́, — въ хра́мѣ сла́вы Твоея́, Го́споди. [Два́жды.]

Стра́нствовавый на́съ ра́ди на земли́ Госпо́дь, Се́й во стра́нничествѣ, блаже́нне, тя́ я́вѣ сохрани́, зову́ща: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Вы́шняго освяще́нное Боже́ственное селе́ніе, ра́дуйся! Тобо́ю бо даде́ся ра́дость, Богоро́дице, зову́щимъ: благослове́на Ты́ въ жена́хъ еси́, Всенепоро́чная, Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Красе́нъ тѣ́ломъ и душе́ю и благоче́стіемъ твои́мъ, преподо́бне, и боже́ственнаго ра́зума орга́нъ, и за́повѣдемъ бли́жнѣйшій, и пѣ́нія чи́стаго цѣвни́ца бы́лъ еси́, воспѣва́я: благослови́те, вся́ дѣла́ Госпо́дня, Го́спода. [Два́жды.]

Къ безсме́ртнѣй у́бо жи́зни, и неконча́емому блаже́нству преше́лъ еси́, преподо́бне, и нетлѣ́нное сподо́бился еси́ ра́дованіе улучи́ти, поя́, блаже́нне: благослови́те, вся́ дѣла́ Госпо́дня, Го́спода.

Богоро́диченъ: Оттряса́емъ пра́хъ ме́ртвенный, нетлѣ́нни бы́вше Боже́ственнымъ рождество́мъ Твои́мъ, Пречи́стая: есте́ственную бо и́стинную Жи́знь и присносу́щную, Чи́стая Влады́чице, родила́ еси́. Тѣ́мже вси́ Тя́ благослови́мъ, Марíе Богоневѣ́стная.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Кончи́ну всеблаже́нную обрѣ́лъ еси́ воздержа́нія по́двигомъ, о́тче Іоа́нне, ко Христу́ отше́дъ, и по сме́рти къ безстра́стнѣй и неболѣ́зненнѣй жи́зни всели́лся еси́, свяще́нне. [Два́жды.]

Въ земли́, о́тче, кро́ткихъ всели́тися сподо́бился еси́, я́коже подо́бникъ бы́въ молча́льнымъ и богоно́снымъ муже́мъ, съ ни́миже я́вѣ воспрія́лъ еси́, преподо́бне блаже́нне, наслажде́ніе.

Богоро́диченъ: Исто́чникъ безсме́ртія на́мъ источи́ла еси́, Дѣ́во, и оставле́нія во́ду, Христа́ ро́ждши, Имже очища́емся отъ вся́кія скве́рны грѣхо́вныя, Богоневѣ́сто.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 80 – 83.

/ Къ оглавленію раздѣла /


Наверхъ / Къ титульной страницѣ

0