Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 18-й де́нь.
Преподо́бнаго отца́ на́шего Іоа́нна, ученика́ свята́го Григо́рія Декаполи́та.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Отче Іоа́нне преподо́бне,* окрили́въ у́мъ къ Бо́гу вѣ́рою,* мірска́го смѣше́нія* возгнуша́лся еси́ неуста́внаго* и, кре́стъ тво́й взе́мъ,* Всеви́дцу послѣ́довалъ еси́,* тѣ́ло непокори́вое* по́двиги воздержа́нія* по́мыслу порабо́тивъ* си́лою Боже́ственнаго Ду́ха.

Якоже со́лнце многосвѣ́тло,* добродѣ́телей свѣ́томъ* и чуде́съ сія́ньми* обрѣ́лъ еси́ Григо́рія, Іоа́нне пресла́вне.* Просвѣти́лъ еси́ душе́вныя о́чи,* и те́мныя стра́сти отгна́лъ еси́,* и свѣ́тъ бы́лъ еси́,* и къ сія́нію незаходи́мому,* ра́дуяся, о́тче, премину́лъ еси́, преблаже́нне.

Все́ житіе́ препроводи́лъ еси́* въ безмо́лвіи мно́зѣ* и въ пла́чи и слеза́хъ,* мона́хъ бы́въ и́стиненъ вѣ́рою,* нестяжа́ніемъ укра́шенъ,* и воздержа́ніемъ удобря́емь,* и стра́ненъ и пришле́цъ на земли́ явля́я себе́.* Тѣ́мже обрѣ́лъ еси́* до́брыхъ наслажде́ніе, досточу́дне.

Сла́ва, и ны́нѣ, богоро́диченъ:

Пло́ть отъ крове́й Твои́хъ пріе́мь,* Первовѣ́чный Бо́гъ* Тя́ Предста́тельницу показа́* человѣ́комъ, Чи́стая.* Тѣ́мже изба́ви рабы́ Твоя́* отъ вся́кія бѣды́ и обстоя́нія* и сѣ́тей лука́ваго врага́* и сія́нія причасти́тися сподо́би избра́нныхъ,* вся́ сла́вящія и покланя́ющіяся Тебѣ́.

Крестобогоро́диченъ:

Что́ зри́мое видѣ́ніе,* е́же Мои́ма очи́ма ви́дится, о Влады́ко?* Содержа́й всю́ тва́рь на дре́во воздви́женъ бы́въ,* и умира́еши, всѣ́мъ дая́й жи́знь, —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.


[НА УТРЕНИ,]
Канонъ, гласъ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Страсте́й мя́ треволне́ніемъ всегда́ смуща́ема и молво́ю помышле́ній ны́нѣ потопля́ема, твое́ю моли́твою, преподо́бне, къ безстра́стія устремле́нію и къ спаси́тельному приста́нищу, блаже́нне Іоа́нне, упра́ви.

Прело́жся произволе́ніемъ, преподо́бне, къ небеси́ вои́стинну, а́нгельски, о́тче, на земли́ пожи́лъ еси́, умертви́въ твое́ мудрова́ніе плотско́е воздержа́ніемъ, тѣ́мже Бо́жіе жили́ще яви́лся еси́, Іоа́нне чу́дне.

Яже па́че ума́ получи́ти, блаже́нне, возжелѣ́въ кра́сныхъ, наста́вника обрѣ́лъ еси́, къ подвиго́мъ тя́ боже́ственнымъ воздвиза́юща, Іоа́нне богому́дре, Григо́рія сла́внаго, его́же стопа́мъ послѣ́довалъ еси́.

Богоро́диченъ: Сы́й со Отце́мъ и Ду́хомъ, Соприсносу́щное и Единоро́дное Сло́во изъ Тебе́ яви́ся на земли́ я́ко Человѣ́къ, Богоро́дице Марíе, и мíръ ве́сь спасе́, пѣ́снь Го́сподеви воспѣва́ющій.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Трезве́ніемъ ума́ небе́сныя добро́ты зря́, и ника́коже печа́льми взя́лся еси́ ве́щными, крилы́ же облегчава́емь нестяжа́нія, о́тче, ве́сь преложе́нъ бы́лъ еси́.

Безмо́лвія рачи́тель бы́въ, любомолча́ннаго па́стыря Григо́рія, Іоа́нне треблаже́нне, я́же въ житіи́ смуще́нія усе́рдно оста́вилъ еси́ и моли́твами непреста́нными боже́ственную тишину́ улучи́лъ еси́.

Зако́ну Ду́ха себе́, богому́дре, повину́лъ еси́, проти́ву Сему́ борю́щійся зако́нъ умертви́въ тве́рдыми воздержа́ніи, и поще́ніемъ, и моли́твами прилѣ́жными, и бдѣ́ніи, блаже́нне.

Богоро́диченъ: Яже къ на́мъ свѣ́тлая Царю́ющаго всѣ́ми вѣ́ки непроходи́мая две́рь Ты́ показа́лася еси́ вои́стинну, е́юже Са́мъ про́йде, запеча́тану па́ки оста́вль Тя́, Пренепоро́чная.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Погре́бъ лука́вая де́моновъ ловле́нія воздержа́ніи мно́гими и мольба́ми, о́тче, ме́ртвъ во гро́бѣ лежа́, нетлѣ́ненъ пребы́лъ еси́. Тѣ́мже, ра́дующеся, всесвяту́ю твою́ па́мять пра́зднуемъ, съ весе́ліемъ се́рдца Христа́ велича́юще.

Сла́ва, и ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ Предста́тельнице и покро́ве, бѣ́дъ, и скорбе́й, и лю́тыхъ обстоя́ній вся́ изба́ви, на Тя́ упова́ніе, Отрокови́це, иму́щія, и ду́ши на́ша спаси́ боже́ственными моли́твами Твои́ми.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Терпѣ́нія ка́мень показа́лся еси́, блаже́нне, сопроти́вными волна́ми всегда́ біе́мь, ника́коже благоче́стія коле́бля мы́сли. Тѣ́мже тя́ Влады́ка, я́коже прече́стенъ ка́мень, въ сокро́вищахъ вѣ́чныхъ положи́.

Тя Оте́цъ щедро́тъ прія́тъ, я́ко и́скренно Сего́ возлюби́вша и въ за́повѣдехъ Его́, о́тче, пребыва́юща и, сы́на прича́стника благода́тію сотвори́въ, присносу́щныя тя́ сла́вы, Іоа́нне богому́дре, сподо́би.

Яко ми́лостивъ и смиреному́дръ, я́ко кро́токъ, я́ко любве́ испо́лненъ и вѣ́ры, и наде́ждею твою́ ду́шу имѣ́я, Іоа́нне, утвержде́нну, просія́лъ еси́ и сло́вомъ, и дѣ́лы посреди́ мона́ховъ, ходя́ въ жи́зни, приснопа́мятне.

Богоро́диченъ: Ты́ вѣ́рнымъ похвала́ еси́, Безневѣ́стная, Ты́ заступле́ніе, Ты́ прибѣ́жище христіа́нъ, стѣна́ и приста́нище, къ Сы́ну бо Твоему́ мольбы́ но́сиши, Всенепоро́чная, и спаса́еши отъ бѣ́дъ вѣ́рою и любо́вію Богоро́дицу чи́сту Тя́ зна́ющихъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Якоже незло́бива а́гнца, на зла́цѣ воздержа́нія воспита́ема, тя́ Па́стырь Вели́кій во дворы́ вѣ́чныя всели́, Іоа́нне блаже́нне, и десны́мъ свои́мъ овца́мъ соприча́стника, преподо́бне, показа́.

Дневну́ю тяготу́, о́тче, и ва́ръ крѣ́пко поне́слъ еси́, добродѣ́телей боже́ственныхъ виногра́дъ до́брѣ дѣ́лавъ. Тѣ́мже въ ве́черъ жите́йскаго отше́ствія мзду́ прія́лъ еси́ досто́йну.

Съ по́стническимъ со́нмомъ, о́тче, всели́тися вои́стинну сподо́бился еси́ и съ пра́ведныхъ ли́комъ ра́доватися тебѣ́ прибы́сть, видѣ́ніемъ и дѣ́льнымъ любому́дріемъ, отбѣ́гшу ве́щи, прехва́льне.

Богоро́диченъ: Умерщвле́ннаго, Дѣ́во, жа́ломъ сме́рти и преступле́нія, воскреси́ мя́, жи́знь заче́ншая несозда́нную и ро́ждшая мíру Изба́вителя и Царя́, и къ свѣ́ту наста́ви, Чи́стая.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Сле́зъ твои́хъ ка́плями страсте́й изсуши́лъ еси́ пучи́ну и всю́ мы́сленнаго врага́ попра́лъ еси́ некрѣ́пкую си́лу, Іоа́нне блаже́нне, отъ Христа́ укрѣпля́емь.

Яко свѣтлосія́нно тя́ зла́то искуше́но, пресла́вне, воздержа́нія огне́мъ Христо́съ положи́, Ца́рь нетлѣ́нный, въ нетлѣ́нныхъ, о́тче, сокро́вищахъ вѣ́чныя жи́зни.

Яко со́лнце, на земли́ добродѣ́тельми сія́юща, Григо́рія обрѣ́тъ, души́ твоея́ о́чи того́ сія́ньми просвѣ́щь слове́сными, свѣтлѣ́йша показа́лся еси́ звѣзда́.

Богоро́диченъ: Селе́ніе Бо́жіе боже́ственно вои́стинну и прече́стно, воспое́мъ благоче́стно Марíю Пречи́стую: Бо́га бо вмѣсти́, пріе́мши Невмѣсти́маго и Непостижи́маго.

Конда́къ, гла́съ 4. Подо́бенъ: Вознесы́йся.

Воздержа́ніемъ, о́тче, житіе́ украси́въ, и пло́ть умертви́лъ еси́, тѣ́мже и побѣди́лъ еси́ вра́жія прило́ги, преблаже́нне, и преше́лъ еси́ къ Бо́гу въ безско́рбный и вѣ́чный живо́тъ, я́ко досто́инъ наслѣ́дникъ, Іоа́нне, Ему́же моли́ся спасти́ся на́мъ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Судіи́ второ́е помышля́я прише́ствіе, отъ о́чію души́ со́нъ отлага́лъ еси́, му́дре, уны́нія и, спаса́емь, пѣ́лъ еси́: оте́цъ на́шихъ Бо́же, благослове́нъ еси́.

Отъ млады́хъ ногте́й благу́ю ча́сть избра́лъ еси́, о́тче му́дре, рабо́тати Го́сподеви со стра́хомъ и Сего́ соверша́ти оправда́нія: оте́цъ на́шихъ Бо́же, благослове́нъ еси́.

Духо́вныхъ испо́лнена дне́й бы́вша, я́ко пшени́цу зрѣ́лу, въ вы́шнихъ жи́тницахъ Бо́гъ Тя́, богоно́сне, положи́, пою́ща: оте́цъ на́шихъ Бо́же, благослове́нъ еси́.

Богоро́диченъ: Яже еси́ мíру Госпожа́, Яже Бо́га воплоще́нна поро́ждши, безу́мно порабо́тившуюся безмѣ́стными грѣхи́ ду́шу мою́ спаси́, благослове́нная Чи́стая, да славосло́влю Тя́.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Яко ми́лоть Иліину́ благода́ть благора́сленно наслѣ́довавъ, о́тче Іоа́нне, сла́внаго па́стыря твоего́, се́ю расто́ргнулъ еси́ сла́достей пучи́ну и, спасе́нъ бы́въ, непотопле́нъ, яви́лся еси́ а́нгеломъ сограждани́нъ, съ ни́ми взыва́я: лю́діе, превозноси́те Го́спода во вѣ́ки.

На́съ ра́ди обнища́вшему Преблаго́му Го́споду, о́тче Іоа́нне, благоче́стно уподо́бился еси́, пти́цамъ равно́ нестяжа́ніе содержа́лъ еси́ и бла́гъ вѣ́чныхъ бога́тство стяжа́лъ еси́, воспѣва́я: свяще́нницы, благослови́те, лю́діе, превозноси́те Его́ во вѣ́ки.

Къ животу́ непреста́нному, къ ра́дости нетлѣ́ннѣй, къ весе́лію па́че ума́, пребога́те, преста́вился еси́, ра́дуяся, и къ кра́сному благолѣ́пію, ко а́нгельскому пребыва́нію, вопія́: о́троцы, благослови́те, свяще́нницы, воспо́йте, лю́діе, превозноси́те Го́спода во вѣ́ки.

Богоро́диченъ: Освя́щшися Ду́хомъ, Богоро́дице Пренепоро́чная, вои́стинну прія́ла еси́ во чре́вѣ Безнача́льнаго Сы́на и Присносу́щнаго, въ Тебѣ́, Чи́стая, воплоща́ема на благодѣ́яніе вѣ́рно пою́щимъ: о́троцы, благослови́те, свяще́нницы, воспо́йте, лю́діе, превозноси́те Его́ во вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Обнови́въ ра́ломъ моли́твы, Іоа́нне, души́ твоея́ бразду́, добродѣ́телей сію́ насѣ́ялъ еси́ благоче́стія и живоно́сная сѣ́мена. Тѣ́мже исцѣле́ній богоподо́бныхъ и боже́ственныхъ дарова́ній пожа́лъ еси́ кла́съ, и́мже пита́еши пою́щія тя́.

Тече́ніе сконча́въ по́стное и вѣ́ру соблю́дъ, блаже́нне, я́ко вои́стинну испо́лненъ во́зраста духо́внаго, пра́ведный вѣне́цъ прія́тъ, богому́дре, отъ Христа́, и ны́нѣ почи́лъ еси́ въ жили́щахъ свѣ́тлыхъ съ пра́ведными, пресла́вне.

Пожа́лъ еси́ твои́хъ болѣ́зней воздая́нія, преста́влься къ соверше́нію неболѣ́зненному и чи́стому, вся́каго измѣне́нія и претворе́нія, несмѣ́сну го́ршаго и сопроти́внаго преложе́нія: въ не́мже всели́лся еси́, вѣ́рно тя́ пою́щихъ ко Влады́цѣ, о́тче, помяни́.

Богоро́диченъ: Отве́рженныя небе́снаго житія́ и па́дшія окая́нно въ сме́рть, па́ки на́съ, Ма́ти бы́вши Изба́вителя, призвала́ еси́, Пречи́стая, и къ пе́рвому тещи́ сподо́била еси́ оте́честву. Тѣ́мже Тя́, Богома́ти, непреста́нно велича́емъ.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 76 об. – 80.

/ Къ оглавленію раздѣла /


Наверхъ / Къ титульной страницѣ

0