Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 17-й де́нь.
Преподо́бнаго отца́ на́шего Симео́на Перси́дскаго и преподо́бнаго Ака́кія, епи́скопа Мелити́нскаго.

[ВЕЧЕРЪ,]
На Го́споди воззва́хъ: стихи́ры Симео́на, гла́съ 4. Подо́бенъ: Да́лъ еси́ зна́меніе.

Со́лнца свѣтлѣ́е* просвѣще́на па́мять твоя́ вѣ́рнымъ возсія́,* тва́рь просвѣща́ющи боже́ственными блиста́ніи,* Симео́не всеблаже́нне,* и страсте́й мглу́, и бѣсо́въ тму́ отгоня́щи.* Тѣ́мже тя́ ублажа́емъ* и моле́бно воспѣва́емъ,* я́ко свѣти́льника всемíрна* и я́ко моли́твенника те́пла.

Му́дре му́чениче,* стяжа́въ земны́ми небе́сная,* и теку́щими немимоиду́щая,* и тлѣ́нными сла́ву нетлѣ́нную воспрія́лъ еси́, ра́дуяся,* му́ками же и ра́нами* терпѣли́вно за словеса́ Бо́жія вѣнцы́ и Ца́рство.* Въ не́мже, ра́дуяся, со страда́вшими съ тобо́ю, сла́вне,* о всѣ́хъ моли́ся, вѣ́рою восхваля́ющихъ тя́.

Стрѣ́лы слове́съ твои́хъ* беззако́ннующихъ собра́нія,* Симео́не му́чениче, уязви́ша.* Тѣ́мже гла́съ да́ша небе́сніи о́блацы,* ли́цы безпло́тныхъ совокупи́шася ра́достно,* твои́хъ подвиго́въ дивя́щеся терпѣ́нію.* Тѣ́мже, ра́дующеся, и мы́ почита́емъ вѣ́рою* свято́е твое́ успе́ніе,* Спа́са прославля́юще.

Ины стихи́ры преподо́бнаго Ака́кія, гла́съ 8. Подо́бенъ: О, пресла́внаго чудесе́!

Яко святи́тель богопрія́тенъ,* разу́мныя сѣ́ни* зри́ши незаходи́мая* и премíрная ви́дѣти сподо́бился еси́,* одѣ́янъ въ преподо́біе,* пра́вдою обложе́нъ и благолѣ́піемъ,* и красоту́ мы́сленныхъ* лице́мъ къ лицу́* зри́ши, блаже́нне.

Преподо́бне о́тче Ака́кіе,* впери́въ у́мъ къ Бо́гу вѣ́рою,* мірска́го смѣше́нія* возгнуша́лся еси́ неуста́внаго* и, кре́стъ тво́й взе́мъ,* Всеви́дцу послѣ́довалъ еси́,* тѣ́ла невоздержа́нное* дѣ́тельми поще́нія* по́мыслу си́лою порабо́тивъ Боже́ственнаго Ду́ха.

Боже́ственнаго собо́ра согла́сникъ* и верхо́венъ я́влься,* съ Кири́лломъ, Ака́кіе,* лю́таго Несто́рія поги́бели пре́далъ еси́,* обличи́въ сего́, блаже́нне, безу́міе* и посрами́въ су́етство словесы́ духо́вными.* Тѣ́мже ублажа́етъ тя́ вся́ка душа́,* вѣ́рою пра́зднующи* боже́ственную па́мять твою́.

Сла́ва, и ны́нѣ, богоро́диченъ, гла́съ и подо́бенъ то́йже:

Спаси́ мя, Влады́чице Пречи́стая,* Яже Спа́са Христа́ неизрече́нно ро́ждшая;* Тя́ бо еди́ну стяжа́хъ предста́тельницу,* и необори́мую стѣ́ну, и покро́въ, и ра́дованіе,* и души́ моея́ боже́ственное утѣше́ніе.* Ты́ у́бо мя́ изба́ви неусыпа́ющаго че́рвія* и огня́ вѣ́чнующаго,* Ма́ти Христа́ Бо́га.

Крестобогоро́диченъ, подо́бенъ то́йже:

Тя́ ви́дящи, пригвожда́ема на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, —* Ча́до сла́дкое!* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый милосе́рдіемъ Твои́мъ?


[НА УТРЕНИ,]
Кано́нъ преподо́бнаго Симео́на, его́же краегране́сіе: Вѣнча́ю блаже́ннаго тя́ Симео́на пѣснопѣ́ніи. Творе́ніе Іо́сифово. Гла́съ 5.
Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Вѣнце́мъ нетлѣ́нія одѣ́явся и престо́лу Госпо́дню, всеблаже́нне, предстоя́, вѣ́рою чту́щія твое́ свято́е страда́ніе моли́твами твои́ми при́сно спаса́й.

Че́стенъ сосу́дъ яви́лся еси́ Боже́ственнаго Ду́ха, Симео́не богоно́се, Имже пома́зався, упа́слъ еси́ лю́ди бога́тны па́лицею боже́ственныхъ уче́ній, му́чениче, на водѣ́ разу́мнѣй.

Уста́вилъ еси́ пре́лести, му́дре, тече́нія сла́дкихъ твои́хъ слове́съ боже́ственными тече́ніи и кро́вными ка́плями, святи́телю сла́вне, сего́ ра́ди вѣ́рно пое́мъ тя́.

Богоро́диченъ: Но́сиши рука́ми, Дѣ́во, вся́ Нося́щаго и пита́еши я́ко Младе́нца Пода́теля млека́. Того́ у́бо моли́ лю́ди Твоя́ вся́ уще́дрити, вѣ́рно пою́щія Тя́.

Инъ кано́нъ свята́го Ака́кія, творе́ніе Іо́сифово. Гла́съ 8.
Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.

Вся́ку зло́бу побѣ́ждь зміи́ну, въ незло́біи души́ я́ко пожи́въ, Ака́кіе му́дре, зло́бы мя́ исхити́ и страсте́й смертоно́сныхъ и до́брыми о́бразы удобри́, я́ко да восхвалю́ тя, до́брѣ подви́гшася.

Пресвѣ́тлая прозябе́ тя́ лѣ́торасль красну́ Мелити́на, вели́кій Ака́кіе, износя́ща плоды́ сла́дки и наслажда́юща сердца́ па́че ме́да вѣ́рныхъ, страсте́й отгоня́ща душетлѣ́нную, преподо́бне, го́ресть Боже́ственною благода́тію.

Рожде́ніе сы́й роди́телей, Ака́кіе, я́коже Самуи́лъ свяще́нный, Бо́гу прине́слся еси́, пре́данъ отъ млады́хъ ногте́й, воспита́тися въ дому́ свяще́ннѣмъ и служи́ти Бо́гу Вседержи́телю, твою́ просвѣ́щшему ду́шу боже́ственными дѣя́ніи.

Богоро́диченъ: Яже недоумѣ́нно Бо́га вопло́щшая и отсту́пльшія на́съ къ Нему́ примири́вшая, Препѣ́тая Чи́стая, стра́сти се́рдца моего́ стра́стію Сы́на Твоего́, молю́, исцѣли́ и спаси́ мя, всегда́ пою́ща: сла́вно бо просла́вися.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Красно́ души́ движе́нія творя́ и ходя́ стезе́ю, къ Бо́гу веду́щею, вся́каго безпу́тія лука́ваго уклони́лся еси́ и взя́лся еси́ къ жи́зненнѣй две́ри, сла́вне, вѣ́чнаго поко́я.

Удали́въ по́мыслъ отъ страсте́й плотски́хъ, безкро́вны, о́тче, прине́слъ еси́ же́ртвы Сло́ву, поже́ршемуся на́съ ра́ди, и, Сего́ возвѣща́я па́че сло́ва Боже́ственное воплоще́ніе, пожре́нъ бы́лъ еси́, я́ко а́гнецъ незло́бивъ.

Свя́то твое́ проводи́въ житіе́, пребога́те, со святы́ми ны́нѣ всели́лся еси́, страда́ньми просвѣти́въ твою́ ду́шу, и возсія́въ со́лнца, блаже́нне, свѣтлѣ́е, и сы́нъ свѣ́та бы́въ.

Богоро́диченъ: Кля́твы прароди́тельныя на́съ свободи́ла еси́, благослове́ньми всѣ́хъ вѣнча́вшаго Сло́ва вопло́щши, Чи́стая, при́сно благослове́нная, страстоте́рпцевъ удобре́ніе и согрѣша́ющихъ очище́ніе.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Зако́ну преклони́лся еси́ живонача́льному, преподо́бне, и отъ души́ вся́кое беззако́ніе умерщвля́ющее возненави́дѣлъ еси́.

Тебе́ Ду́хъ Святы́й, духо́вными, му́дре, дѣя́ніи свѣтови́дна всего́ бы́вша, свяще́нника поставля́етъ.

Источи́ язы́къ тво́й, я́коже рѣку́, му́дре, уче́нія, му́тный пото́къ пре́лести Боже́ственною си́лою изсуша́юща.

Богоро́диченъ: Две́ре непроходи́мая, покая́нія ми́ отве́рзи две́ри, Чи́стая, и къ путе́мъ мя́ пра́вымъ напра́ви.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Яко со́лнце, на́мъ свята́я твоя́ возсія́ па́мять, му́дре Симео́не святи́телю, страда́вшихъ съ тобо́ю вѣ́рныхъ озаря́ющи, ю́же дне́сь сотворя́юще, вопіе́мъ: моли́те о на́съ, страстоте́рпцы, еди́наго Человѣколю́бца.

Сла́ва, и́нъ, гла́съ 3. Подо́бенъ: Боже́ственныя вѣ́ры.

Побѣ́ды вѣне́цъ отъ Го́спода за воздержа́ніе, ра́дуяся, прія́лъ еси́, исповѣ́даніемъ, богоно́се, украша́емь, и ересе́й всю́ обличи́лъ еси́ суету́ боже́ственными твои́ми повелѣ́ніи, о́тче преподо́бне, Христа́ Бо́га моли́ дарова́ти на́мъ ве́лію ми́лость.

И ны́нѣ, богоро́диченъ:

Боже́ственнаго естества́ не отлу́чься, пло́ть бы́въ во чре́вѣ Твое́мъ, но Бо́гъ вочеловѣ́чься и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чную, еди́нъ Госпо́дь. Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Ведо́мь свя́занъ, разрѣши́лъ еси́ хи́трости лука́ваго, священнотаи́нниче пребога́те, пострада́въ до́блественнѣ, вѣнцы́ нетлѣ́нія воспрія́лъ еси́.

Глаго́лъ твои́хъ стрѣла́ми уязви́лъ еси́, священному́чениче Симео́не, беззако́ннующихъ собо́ры и огне́мъ крове́й многобо́жную ле́сть попали́лъ еси́.

Соста́вимъ ли́ки, блажа́ще богоно́снаго Симео́на, и Ана́нію сла́внаго, и съ ни́ми подо́бныя, му́жески пострада́вшія му́ченики.

Богоро́диченъ: Изъ Тебе́ пра́вды Со́лнце возсія́въ па́че ума́, вселе́нную просвѣти́, Богора́дованная Отрокови́це, и пре́лести зи́му разруши́.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Подо́бникъ бы́лъ еси́ боже́ственнымъ апо́столомъ, о́тче Ака́кіе, о́нѣхъ бо вла́стію, е́же вяза́ти и рѣши́ти, обогати́лся еси́.

Цѣвни́ца яви́лся еси́ Ду́ха, уче́нія возглаша́ющи, о́тче, спаси́тельная, Несто́рія безу́мнаго неи́стовную пре́лесть потребля́ющи.

Пресвѣ́тлою моли́твою твое́ю, о́тче, до́ждь земли́ пода́лъ еси́ и сея́ упои́лъ еси́ изсо́хшія лѣ́томъ, блаже́нне, бразды́.

Украси́стѣся, преподо́бне, твои́ лани́тѣ, я́же боже́ственная повелѣ́нія, вѣ́рнымъ благоуха́юща и смра́дную пре́лесть отгоня́ща.

Богоро́диченъ: Умерщвле́на мя́ оживи́ и заблужде́ннаго ско́ро обрати́, незаблу́дный пу́ть су́щи и наста́вница всѣ́хъ, Влады́чице.

Пѣ́снь 5.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Сто́лпъ и утвержде́ніе Це́ркви Бо́жіи я́влься, преблаже́нне, твои́мъ страда́ніемъ непрекло́нну и непоколеби́му сію́ во вѣ́ки соблюди́ хода́тайствы твои́ми.

Пѣ́сньми ублажа́емъ житіе́ твое́, гоне́нія же и сопротивле́нія, Симео́не пребога́те, и́хже ра́ди сподо́бился еси́ блаже́нныя кончи́ны.

Мѵ́ромъ боже́ственнаго пома́занія па́стырь бы́въ, за ста́до пожре́нъ бы́лъ еси́, блаже́нне, я́коже ове́нъ наро́читъ, и перворо́дныхъ Це́ркви возвесели́лъ еси́.

Богоро́диченъ: Да обря́щу Тя́, Влады́чице, изыма́ющую мя́ въ ча́съ Суда́ осужде́нія, вѣ́рно сла́вяй Тя́, и му́къ изба́влюся, жду́щихъ мя́.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Чу́дно твое́ житіе́ яви́ся, дарова́ніи бо Боже́ственнаго Ду́ха обложи́вся, рѣки́ безчи́нная стремле́нія моли́твою уста́вилъ еси́, клю́чь е́й и предѣ́лъ ка́мень положи́въ, святи́телю Ака́кіе.

Посредѣ́ собо́ра боже́ственъ бы́лъ еси́, отце́въ побо́рникъ свяще́нныхъ велѣ́ній, съ Кири́лломъ боже́ственнымъ, блаже́нне, Чи́стую Дѣ́ву исповѣ́дая, Бо́жію Ма́терь, и льсти́ваго побѣжда́я Несто́рія.

Па́че ме́да услажда́ющее мелити́няномъ позна́ся сло́во твое́, наслажда́ющи си́хъ ду́ши свяще́нными исповѣ́даніи и грѣхо́вную показу́юще го́ресть, досточу́дне о́тче Ака́кіе.

Богоро́диченъ: Не истощи́въ нѣ́дра весьма́ Роди́теля Пресу́щный, въ Твои́хъ нѣ́дрѣхъ Младе́нецъ ви́дѣнъ бы́сть, Дѣ́во, держи́мь, въ мою́ нищету́ премно́гую обле́кся бога́тствомъ милосе́рдія еди́нъ Человѣколю́бецъ.

Пѣ́снь 6.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Яви́лся еси́ Боже́ственнаго испо́лненъ утѣше́нія, блаже́нне Симео́не, мече́мъ кончи́ну блаже́нную пріе́мъ со святы́ми, свѣ́тло пострада́вшими му́ченики.

Юніи и ста́рцы, мона́си и свяще́нницы, до́брымъ по́двигомъ подви́гшеся за Христа́, я́коже а́гницы, пожре́ни бы́ша.

Блаже́нно житіе́ пожи́вше, страда́льцы, кончи́ну отъ Христа́ прія́сте блаже́нную, мече́мъ сконча́стеся, ра́дующеся.

Богоро́диченъ: Изъ Тебе́ возсія́, Пресвята́я, Содѣ́тель, и заре́ю боже́ственнаго ра́зума су́щія въ нощи́ неразу́мія просвѣти́.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Чи́стыя Ма́тере Бо́жія че́стенъ воздви́глъ еси́ хра́мъ, хра́мъ пре́жде сего́ са́мъ сотвори́лся еси́ Ду́ха, свяще́нне Ака́кіе, Его́же освяти́въ, рѣку́ чуде́съ показа́лъ еси́.

Твоя́ святы́я гла́сы, я́же къ ста́ду твори́лъ еси́, пресѣца́ше ла́стовица, глася́щи, Ака́кіе, но, пріи́мши твоего́ язы́ка зако́нъ, непрело́жно сохрани́.

Яко ви́дѣ тя́ ца́рь, ра́бски прише́дша, твоя́ проше́нія испо́лни, Небе́снаго бо Царя́ позна́, богоно́се о́тче, досточу́дна уго́дника.

Богоро́диченъ: Ума́ моего́ побѣжде́нія и се́рдца возноше́нія, Твое́ю ми́лостію, Чи́стая, исцѣли́, молю́ся, и одержа́щаго мя́ грѣха́ изба́ви, вѣ́рою Тя́ ублажа́ющаго.

Пѣ́снь 7.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Свѣ́щникъ явля́я ра́зумъ, свѣ́тъ позна́лся еси́, преподо́бне, во тмѣ́ спя́щимъ невѣ́дѣнія и разори́лъ еси́ огнеслужи́телей тму́, пострада́въ пресла́вно.

Яви́лся еси́ посреди́ му́ченикъ, водя́ со́нмъ, съ ни́миже, сконча́вся мече́мъ, взыва́лъ еси́, Симео́не богоно́сне: Бо́же, благослове́нъ еси́.

Собо́ръ многочи́сленныхъ му́ченикъ почти́мъ, че́стно совокупля́емь отъ разли́чныхъ градо́въ, священнодѣ́йственникъ боже́ственныхъ и мона́ховъ богоно́сныхъ.

Богоро́диченъ: Исцѣли́, Пренепоро́чная, стра́сти се́рдца моего́, уста́ви смуще́ніе ума́ моего́ обурева́емое, и спаси́ мя, пою́ща: Бо́же, благослове́нъ еси́.

Инъ.

Ирмо́съ: Отъ Іуде́и доше́дше, о́троцы въ Вавило́нѣ иногда́, вѣ́рою тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Ми́лованіемъ соверше́ннымъ украша́емь, о́тче, ни́щимъ дово́ленъ бы́лъ еси́ и всѣ́мъ боля́щимъ здра́віе позна́лся еси́, воспѣва́ющимъ хода́тай: оте́цъ на́шихъ Бо́же, благослове́нъ еси́.

Стужа́ющія боля́щихъ зря́ му́хи, о́тче, отгна́лъ еси́, ника́коже приступи́ти къ ни́мъ повелѣ́лъ еси́, поя́, Ака́кіе: оте́цъ на́шихъ Бо́же, благослове́нъ еси́.

Гро́здъ, я́коже изгне́тъ, смы́сла на́мъ вино́ раствори́лъ еси́, веселя́щее сердца́ ра́зумы вели́кими, и вопи́ти повелѣва́я: оте́цъ на́шихъ Бо́же, благослове́нъ еси́.

Богоро́диченъ: Яко вину́ Тя́ вси́ на́шего спасе́нія, Богоблагода́тная, пое́мъ всегда́, раби́ Твои́, и вѣ́рою ублажа́емъ, глаго́люще: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Угль мы́сленный, Симео́не, показу́емь огню́ не послужи́лъ еси́, преблаже́нне, ве́щь же го́рьку многобо́жія попали́въ, къ незаходи́мому сія́нію, преподо́бне, преста́вился еси́.

Исцѣли́ на́ша не́мощи, му́чениче, мра́къ отжени́ серде́цъ на́шихъ и вѣ́чныя жи́зни покажи́ прича́стники твои́ми ко Влады́цѣ всѣ́хъ хода́тайствы.

Во́инство че́стно, собо́ръ Бо́жій му́ченикъ воспое́мъ, сточи́сленное, и́мже нача́льникъ бя́ше Симео́нъ до́блій, я́ко па́стырь и вели́къ Це́ркве сто́лпъ.

Богоро́диченъ: Да честно́е Твое́ прояви́тъ рождество́ купина́, неопали́ма ви́дѣна бы́сть, Пречи́стая: Огнь бо Боже́ственный во утро́бѣ пріе́мши, ника́коже опали́лася еси́. Тѣ́мже Тя́ пое́мъ.

Инъ.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Съ вы́шними ликостоя́ніи, со святы́ми всѣ́ми Пресвята́го Го́спода освяти́ти и спасти́ на́съ, о́тче, моли́.

Восклица́ніе жа́бамъ, молву́ творя́щимъ, ти́химъ твои́мъ сло́вомъ запрети́лъ еси́ не вѣща́ти, но пребы́ти нѣмы́мъ, Ака́кіе, показа́лъ еси́.

На буесло́внаго написа́въ Несто́рія словеса́, я́коже ка́меніе честно́е, Це́рковь утверди́лъ еси́ на ка́мени, блаже́нне, непоро́чныя вѣ́ры.

Тро́иченъ: Возопіе́мъ вѣ́рою Тро́ицѣ съ вы́шними чи́нми: свя́тъ, свя́тъ, свя́тъ Оте́цъ, и Сы́нъ, и Ду́хъ Святы́й.

Богоро́диченъ: Исто́чникъ су́щи, Отрокови́це, нетлѣ́нія, истлѣ́вша мя́ мно́гими грѣха́ потопле́ньми Твоего́ исцѣле́нія сподо́би.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Яко прія́тно кади́ло, прине́слся еси́ всѣ́хъ Царю́, я́ко заколе́ніе свяще́нно, я́ко предобра́ же́ртва прія́тная, я́ко мѵ́ро, я́ко приноше́нія, я́ко ши́покъ благово́ненъ, святи́телю досточу́дне.

Утверже́ніе бы́въ, святи́телю, всѣ́мъ вѣ́рнымъ, поже́рлся еси́, я́коже ове́нъ, и къ мы́сленнымъ преста́вился еси́ ца́рствомъ и Царю́ всѣ́хъ и Бо́гу, блаже́нне, предстои́ши, боже́ственною сла́вою облиста́емь.

Свята́я па́мять твоя́, я́коже вели́кое со́лнце, на́мъ возсія́, Симео́не, дне́сь, му́дре, и и́же съ тобо́ю му́ченикъ, съ ни́миже на́мъ проси́ отъ Христа́ благода́ти, и ми́лости, и согрѣше́ній избавле́нія.

Богоро́диченъ: Свѣ́тлыми сія́ньми, Пречи́стая Ма́ти Бо́жія, озари́ мо́й у́мъ, тмо́ю лю́таго неразу́мія одержи́мый, я́ко да, улучи́въ боже́ственное просвѣще́ніе, вели́чія Твоя́ возвѣщу́, Приснодѣ́во.

Инъ.

Ирмо́съ: Уста́вы прешла́ еси́ естества́, Содѣ́теля заче́нши и Го́спода, и две́рь спасе́нія мíрови была́ еси́: тѣ́мъ Тя́, Богоро́дице, непреста́нно велича́емъ.

Крѣ́пкою твое́ю моли́твою, о́тче, небеса́ затворе́на отве́рзлъ еси́ и ка́мень пресла́вно истека́ти прину́дилъ еси́ въ сла́ву Спа́са, тя́ просла́вльшаго, Ака́кіе.

Яко вели́ко облиста́лъ еси́ со́лнце отъ Мелити́ны заре́ю слове́съ твои́хъ, и чуде́съ сія́ніе пуща́я, Ака́кіе, и вся́ озаря́я, благоче́стно тя́ ублажа́ющія.

Прему́дростію слове́съ украша́емь, и сія́ніи мно́гихъ исцѣле́ній, Ака́кіе, и святи́тельства сія́я добро́тами, преше́лъ еси́ отъ мірски́хъ къ премíрному наслажде́нію.

Боже́ственная па́мять твоя́ дне́сь поднебе́сныя созыва́етъ воспѣ́ти твоя́ болѣ́зни, и по́двиги, и исправле́нія, Ака́кіе преблаже́нне, просвѣти́телю серде́цъ на́шихъ.

Богоро́диченъ: Свѣ́та кра́снаго жили́ще яви́лася еси́ вои́стинну, вся́ческая просвѣ́щшаго, Всепѣ́тая Дѣ́во, тѣ́мже мя́ просвѣти́, зло́бою помрачи́вшагося, я́ко да вѣ́рою велича́ю Тя́.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 61 – 66 об.

/ Къ оглавленію раздѣла /


Наверхъ / Къ титульной страницѣ

0