Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 17-й де́нь.
Слу́жба преподо́бного отца́ на́шего Зоси́мы Солове́цкаго, но́ваго чудотво́рца.

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 4. Подо́бенъ: Яко до́бля.

До́лу влеку́щаго мудрова́нія* совле́клся еси́, му́дре,* на высоту́ простира́яся,* та́мо приобща́тися су́щимъ жела́я, о́тче Зоси́мо,* е́же и получи́лъ еси́ ны́нѣ,* плотскíя тя́жести изрѣши́вся;* и о на́съ моли́ся,* вѣ́рою чту́щихъ честну́ю па́мять твою́. [Два́жды.]

Пра́востію смы́сла помышля́я* и разсмотря́я многомяте́жную, о́тче, житія́ бу́рю,* ти́хое же и невла́емое* приста́нище безмо́лвія,* е́же и предпоче́тъ па́че,* о́но же досто́йно отве́рглъ еси́* и, изрѣши́вся сѣ́тей многоплете́ннаго сладостра́стія,* моли́ спасти́ся на́мъ.

Цѣлому́дръ и кро́токъ* отъ ю́ности бы́лъ еси́,* о́тче Зоси́мо блаже́нне,* пра́востію се́рдца и ума́ чистото́ю* добродѣ́тели удержа́въ,* и́миже Бо́гу прибли́жился еси́.* Его́же ны́нѣ моли́* отъ тли́ и бѣ́дъ изба́вити* вѣ́рою творя́щихъ честну́ю па́мять твою́.

Сла́ва, гла́съ 4:

Стеце́мся, мона́шеское мно́жество, соше́дшеся, пра́здникъ соста́вимъ: честна́я бо па́мять отца́ на́шего Зоси́мы, сердца́ на́ша озаря́етъ неви́димо, до́брыми возсія́ющи дѣ́лы. Сего́ ра́ди, согла́сно воспѣва́юще, рце́мъ: ра́дуйся, вѣ́рный ра́бе Христа́ Бо́га; ра́дуйся, по́стниковъ свѣ́тлая похвало́; ра́дуйся, мона́шествующихъ наста́вниче; ра́дуйся, исцѣле́ній исто́чниче. О на́съ, преподо́бне, моли́ всѣ́хъ Царя́, Христа́ Бо́га на́шего, изба́витися отъ собла́знъ льсти́ваго и спасти́ся душа́мъ на́шимъ.

И ны́нѣ, пра́здника.

На стихо́внѣ, въ тріо́ди. Сла́ва, гла́съ 4:

Пріиди́те, празднолю́бцы, псало́мскую пѣ́снь воскре́сшему изъ ме́ртвыхъ Христу́ принесе́мъ: дне́сь бо разу́мная весна́ возсія́ на́мъ, подаю́щи цвѣ́ты слове́сныя, вселюбе́зная па́мять отца́ на́шего Зоси́мы. Юже досто́йно почита́юще, пріе́млемъ исто́чники исцѣле́нія, излива́ющіяся на́мъ отъ всечестны́я ра́ки незави́стно, подвиза́ бо ся терпѣли́вно на земли́ и небе́сныя да́ры прія́тъ. Тѣ́мже того́ ны́нѣ мо́лимъ моли́тися непреста́нно Христу́ Бо́гу ми́ръ вселе́ннѣй дарова́ти и душа́мъ на́шимъ ве́лію ми́лость.

И ны́нѣ, пра́здника.



НА ВЕЛИЦѢЙ ВЕЧЕРНИ,
На Го́споди воззва́хъ: поста́вимъ стихи́ры на 8: въ тріо́ди 3 и преподо́бнаго 5, гласъ 8. Подо́бенъ: О, пресла́внаго чудесе́!

Отче преподо́бне Зоси́мо,* впери́въ у́мъ тво́й къ Бо́гу вѣ́рою,* мірска́го смѣше́нія* возгнуша́лся еси́ непостоя́ннаго* и, кре́стъ тво́й взе́мъ,* Всеви́дцу послѣ́довалъ еси́,* тѣ́ло непокори́вое по́двиги воздержа́нія* по́мыслу порабо́тивъ* си́лою Боже́ственнаго Ду́ха.

Отче богому́дре Зоси́мо,* ты́ отъ утро́бы ма́терни* Христу́ прибли́жился еси́,* и всѣ́мъ смы́сломъ Тому́ прилѣжа́лъ еси́,* и, отъ твои́хъ по́двигъ Бо́гу Вседержи́телю* плоды́ досто́йныя принося́, преподо́бне,* добродѣ́тельными цвѣты́ украша́емь,* тѣ́мъ благи́хъ наслажде́ніе обрѣ́лъ* и воспрія́лъ еси́, досточу́дне.

Преподо́бне о́тче прему́дре Зоси́мо,* боля́щимъ ты́ яви́лся еси́ исцѣле́ніе,* и хромы́мъ хожде́ніе* ми́лостивно сотворя́еши,* и всѣ́мъ, притека́ющимъ съ вѣ́рою* къ цѣльбоно́сному гро́бу твоему́* и прося́щимъ по́мощи и заступле́нія,* ты́ же моли́твами твои́ми* исцѣле́ніе неду́гующимъ неску́дно подава́еши.

Ины стихи́ры, гла́съ 2. Подо́бенъ: Кíими похва́льными.

Кíими похва́льными вѣнцы́* увязе́мъ отца́ на́шего Зоси́му?* Добродѣ́телей сокро́вище,* сосу́дъ чистоты́, прія́телище благода́ти,* исто́чникъ исцѣле́ній,* его́же ра́ди враго́въ шата́ніе Христо́съ низложи́,* имѣ́яй ве́лію ми́лость.

Кíими пѣ́сненными добро́тами* похва́лимъ на́шего наста́вника?* Пусты́ннаго граждани́на,* цѣлому́дрія храни́теля,* боля́щихъ врача́ безме́здна,* его́же ра́ди враго́въ шата́ніе Христо́съ низложи́,* имѣ́яй ве́лію ми́лость.

Кíими смире́нными устна́ми* ублажи́мъ до́брыхъ рачи́теля?* По́стника и́стинна,* бѣ́днымъ помо́щника,* въ мо́ри обурева́емыхъ предста́теля,* прибѣга́ющимъ приста́нище,* его́же ра́ди враго́въ шата́ніе Христо́съ низложи́,* имѣ́яй ве́лію ми́лость.

Сла́ва, гла́съ 6. Самогла́сенъ:

Пріиди́те, по́стническое сосло́віе, духо́вный ли́къ соста́вимъ, пѣ́нія трубо́ю возглаша́юще, благода́рственными гла́сы отцу́ на́шему возопіе́мъ, глаго́люще: ра́дуйся, Христо́въ подви́жниче Зоси́мо, любо́вію бо Сего́ оста́вилъ еси́ мíръ, преподо́бне; ра́дуйся, и́же тѣ́ло твое́ посто́мъ и труды́ изнуря́я вѣ́чныя ра́ди и блаже́нныя вои́стинну жи́зни; ра́дуйся, чи́стый тѣ́ломъ и душе́ю, озаря́яся непреста́нно сія́ніемъ Христа́ Бо́га. На́мъ же, творя́щимъ честну́ю па́мять твою́, моли́ изба́витися вся́каго гнѣ́ва, и тли́, и муче́нія, блаже́нне.

И ны́нѣ, пра́здника.
Вхо́дъ. Проки́менъ дне́, и паремíи.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры самогла́сны, гла́съ 4:

Свѣ́тлая па́мять успе́нія твоего́, преподо́бне о́тче Зоси́мо, на́мъ сердца́ просвѣща́етъ: чту́ще бо честну́ю твою́ ра́ку, врачевство́ страсте́й, неудо́бь цѣли́мыхъ, прославля́емъ просла́вльшаго тя́ Го́спода и твоя́ труды́ и по́двиги вѣнча́вша благода́тію; усе́рдно и мы́, подвиго́въ и трудо́въ е́мшеся, твое́ю стезе́ю ходи́ти ко Христу́ Бо́гу, Его́же моли́ спасти́ и просвѣти́ти ду́ши на́ша.

Гла́съ 2: Во успе́ніи твое́мъ, блаже́нне, учи́тельница на́мъ быва́етъ твоя́ ра́ка, при́сно бо излива́ющимися чудесы́ вопіе́тъ, возводя́ къ трудо́мъ и подвиго́мъ, глаго́ля: возлюби́те Го́спода, да обря́щете благода́ть вѣ́чную, и ничто́же па́че Его́ почти́те, да егда́ пріи́детъ, обря́щете поко́й со избра́нными Его́, его́же да и мы́ улучи́мъ твои́ми моли́твами.

Въ незаходи́мыя заше́лъ еси́ мо́ря ото́ки, пристра́стія мíра бѣ́гая, до́блимъ Ге́рманомъ наставля́емь, въ чу́днаго Савва́тія селе́ніе, идѣ́же и мона́шеское мно́жество собра́лъ еси́, наставля́я си́хъ посто́мъ и труды́ на стези́ добродѣ́телей, возвыша́я си́хъ къ боже́ственному раче́нію. Идѣ́же ны́нѣ въ незаходи́мая вше́лъ еси́ пресвѣ́тлаго свѣ́та Пресвяты́я Тро́ицы, о́тче, руководя́ на́съ моли́твами твои́ми.

Гла́съ 8: Преподо́бне о́тче, всече́стне Зоси́мо, до́брыми дѣ́тельми возше́дъ, я́ко на колесни́цу, восте́клъ еси́, побѣ́дныя по́чести отъ Него́ пріе́мля: тѣ́ло твое́ трудолю́бное, я́ко ма́сти, на́мъ во гро́бѣ оста́вилъ еси́, о́тче, источа́ти исцѣле́нія и прогони́ти ду́хи лука́выя. Тѣ́мже тя́ ублажа́емъ, всече́стне.

Сла́ва, гла́съ 5:

Возсія́ весна́, пріиди́те, наслади́мся, просія́ Воскресе́ніе Христо́во, пріиди́те, возвесели́мся, отца́ на́шего па́мять, чернори́зцы озаря́ющи, показа́ся. Тѣ́мже, празднолю́бцы, пріиди́те, духо́внѣ торжеству́емъ: се́й бо до́брѣ ра́това діа́вола и сего́ посрами́, Кре́стъ Христо́въ на ра́му нося́, со страстьми́ и похотьми́ тѣ́ло свое́ пропина́я, бо́дростію свяще́нство свое́ украша́я. И ны́нѣ, свяще́нно въ незаходи́мая заше́дъ, во свѣ́тѣ богонача́льнаго свяще́нства предстоя́, сѣ́немъ ему́ разрѣ́шшимся. Тѣ́мже тому́ возопіе́мъ: преподо́бне, моли́ спасти́ся душа́мъ на́шимъ.

И ны́нѣ, пра́здника.

На стихо́внѣ стихи́ры, гла́съ 6:

На го́ру добродѣ́телей восходя́,* до́лу влеку́щая помышле́нія оттряса́я,* Кре́стъ Спаси́телевъ на ра́мо взе́мъ,* усе́рдно Тому́ послѣ́довалъ еси́.* И ны́нѣ, добро́ты Его́ наслажда́яся,* помина́й на́съ, чту́щихъ тя́.

Сти́хъ: Честна́ предъ Го́сподемъ* сме́рть преподо́бныхъ Его́.

Небе́сныхъ бла́гъ жела́я,* мірска́я сла́дкая отве́рглъ еси́,* ненасы́тимыя сла́дости рачи́тель,* а́лчбою и жа́ждею томя́ себе,* е́же ны́нѣ вои́стинну обрѣ́лъ еси́,* о́тче Зоси́мо.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Воздержа́ніемъ сла́сти восхлаща́я* и сле́зными исто́чники пла́мень погаша́я страсте́й,* тѣ́мже ны́нѣ зе́млю кро́ткихъ наслѣ́довалъ еси́,* свеселя́ся преподо́бнымъ и пра́веднымъ,* о́тче на́шъ Зоси́мо.

Сла́ва, гла́съ 8:

Преподо́бне о́тче, мíра красоты́ и сла́вы вре́менныя отню́дъ возненави́дѣлъ еси́, мона́шеское же житіе́ па́че возлюби́лъ еси́ и а́нгеломъ собесѣ́дникъ бы́ти сподо́бился еси́ и свѣти́льникъ многосвѣ́тлый Россíйскія земли́, чудесы́, я́коже второ́е со́лнце, сія́я. Всѣ́хъ на́съ помина́й, соверша́ющихъ свяще́нную па́мять твою́: мы́ бо, ча́да твоя́ и о́вцы слове́сныхъ твои́хъ уче́ній, тя́ на по́мощь призыва́емъ, прося́ще тобо́ю прія́ти ми́ръ и ве́лію ми́лость.

И ны́нѣ, пра́здника.

Тропа́рь, гла́съ 4:

Изволе́ніемъ боже́ственнаго ра́зума всели́лся еси́ въ пусты́ню и та́мо, впери́въ у́мъ тво́й въ небе́сныя оби́тели, ра́вно а́нгеломъ житіе́ на земли́ пожи́въ, въ моли́твахъ, и трудѣ́хъ, и поще́ніихъ о́бразъ бы́лъ еси́ твои́мъ ученико́мъ. Отону́дуже Бо́гъ, ви́дя твое́ благо́е изволе́ніе, умно́жи тебѣ́ ча́да въ пусты́ни, сле́зъ твои́хъ тече́ньми напая́емѣй. Но, я́ко имѣ́я дерзнове́ніе къ Бо́гу, помина́й ста́до, е́же собра́лъ еси́, му́дре, и не забу́ди, я́коже обѣща́лся еси́, посѣща́я ча́дъ твои́хъ, Зоси́мо преподо́бне, о́тче на́шъ.


НА УТРЕНИ,
По 1-й стихоло́гіи сѣда́ленъ, гла́съ 4:

Во ото́цѣ пу́стѣ, я́коже во вселе́ннѣй пожи́лъ еси́, отню́дуже и въ мо́ри пусты́ню гра́дъ показа́лъ еси́. Зоси́мо о́тче, моли́ спасти́ся на́мъ. [Два́жды.]

Сла́ва, и ны́нѣ, пра́здника.

По 2-й стихоло́гіи сѣда́ленъ, гла́съ 4:

Превозше́лъ еси́ вра́жія прило́ги, благода́тію вжиля́емь, посто́мъ и бдѣ́ніемъ у́мъ чи́стя и моли́твою Бо́гу приближа́яся, отню́дуже и бѣсо́мъ прогони́тель яви́лся еси́, Зоси́мо, моли́ спасти́ся на́мъ. [Два́жды.]

Сла́ва, и ны́нѣ, пра́здника.

По поліеле́и сѣда́ленъ, гла́съ 8:

Посту́ прилѣжа́ и бдѣ́нію, о́тче, безгнѣ́віемъ и кро́тостію украша́яся, мона́ховъ чи́ны собра́лъ еси́, добродѣ́телей о́бразы тѣ́мъ предлага́я и зако́ны вообража́я; и́миже къ ра́зуму боже́ственному возводя́, преподо́бне Зоси́мо, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, Огнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, слу́хи твоя́ прилѣ́жно Ева́нгелію вда́въ, услы́шалъ еси́ Боже́ственнаго гла́са, зову́ща въ небе́сное Ца́рство, и до́брѣ послѣ́довалъ еси́ ему́, мíра кра́сная уме́ты вмѣни́лъ еси́, Еди́наго добро́ты жела́я Христа́, Ему́же прилѣ́жно моли́ся мíру посла́ти ми́ръ, Це́рквамъ единомы́сліе Импера́тору на́шему [и́мярекъ] побѣ́дное одолѣ́ніе и душа́мъ на́шимъ ве́лію ми́лость.

Кано́нъ пра́здника въ тріо́ди на 6 и преподо́бнаго на 8.

Кано́нъ, гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Боже́ственною, о́тче, любо́вію прилѣпи́лся еси́ отъ ю́ности Христу́, плотскíя стра́сти увяди́лъ еси́ воздержа́ніемъ, Зоси́мо прему́дре, Бо́гомъ помога́емь. И ны́нѣ на́мъ свѣ́та мы́сленнаго испо́лнитися помоли́ся Го́сподеви, пою́щимъ: сла́вно бо просла́вися.

Претруди́лъ еси́ тѣ́ло, пребога́те, и стра́сти плотскíя, о́тче, порабо́тилъ еси́, Зоси́мо, я́сно прія́лъ еси́ свѣ́тлость благода́ти и, се́ю просвѣ́щся, боже́ственнѣ взыва́лъ еси́: Го́сподеви пои́мъ, сла́вно бо просла́вися.

Крѣ́постію Ду́ха возмо́гъ, держа́ву низложи́лъ еси́ и си́лу вра́жію и, похвалу́ побѣ́дную и по́чести пріе́мь, преподо́бне, чуде́сными сія́ніи просвѣти́лся еси́, Го́сподеви поя́: сла́вно бо просла́вися.

Богоро́диченъ: Зако́нъ кромѣ́ есте́ственныхъ родила́ еси́ законода́вца Бо́га, Человѣ́ка бы́вша. Того́ я́ко Бла́га моли́, Всенепоро́чная, на́ша беззако́нія презрѣ́ти, вопію́щихъ всегда́: Го́сподеви пои́мъ, сла́вно бо просла́вися.

Другíй кано́нъ преподо́бнаго, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Пребоже́ственный Свѣ́те трисо́лнечне, страсте́й те́мностію омраче́на всего́ мя, просвѣти́въ, очи́сти моли́твами Твоего́ раба́, Человѣколю́бче, и сего́ чту́щу сло́во ми́ вдохни́.

Пою́щу свѣтоно́сную па́мять твою́ свѣ́тъ ми́ низпосли́, я́ко Богонача́льному Свѣ́ту предстоя́, преподо́бне Зоси́мо, страсте́й мои́хъ тму́ моли́твами твои́ми отгоня́я.

Кро́токъ, и ми́лостивъ, и чи́стъ бы́въ, кро́ткихъ зе́млю дости́глъ еси́, о́тче, укроти́ настоя́щую бу́рю се́рдца моего́, да, въ тишинѣ́ боже́ственнѣй бы́въ, пѣсносло́влю твоя́ по́двиги.

Богоро́диченъ: Твоего́ пріи́мши Содѣ́теля, я́ко Са́мъ восхотѣ́, изъ безсѣ́менна чре́ва Твоего́ па́че ума́ воплоще́нна, Чи́стая, тва́рей вои́стинну яви́лася еси́ Влады́чица.

Катава́сія пра́здника.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Пло́ть твою́ умертви́лъ еси́ воздержа́ніемъ, преподо́бне, ду́шу же Боже́ственными дарова́ніи просвѣти́лъ еси́.

Все́ у́бо жела́ніе ко Влады́цѣ Твоему́ обрати́лъ еси́, я́рость же на бѣ́сы, богоно́се, вооружи́лъ еси́.

Имѣ́я споспѣшеству́ющую ти́ Бо́жію си́лу, прему́дре, я́ко чу́денъ, чудеса́ источа́еши и отго́ниши неду́ги.

Богоро́диченъ: Въ ложесна́ Твоя́ съ потща́ніемъ, Всенепоро́чная, всели́ся Зижди́тель на благодѣя́ніе вѣ́рно воспѣва́ющимъ Тя́.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Цѣлому́дріе, о́тче, притяжа́въ, и́мже на Боже́ственную любо́вь возше́лъ еси́, пріе́мь да́ры исцѣля́ти неду́ги ду́шъ и тѣле́съ на́шихъ.

Умъ тво́й небе́сныя добро́ты созерца́ти, отъ земны́хъ отлучи́въ, прилѣжа́ти наказа́лъ еси́, Зоси́мо, идѣ́же ны́нѣ водворя́ешися.

Образъ бы́въ твои́мъ ученико́мъ къ добродѣ́тели, о́тче, и́хже возводя́ къ высотѣ́ боже́ственнаго раче́нія, добродѣ́тели прилѣжа́ти наказу́я.

Богоро́диченъ: Боже́ственнаго рождества́ Твоего́, Чи́стая, вся́каго естества́ чи́нъ прехо́дитъ чу́до: Бо́га бо Присносу́щна пріи́мши во чре́вѣ, и, ро́ждши, пребыва́еши при́сно Дѣ́ва.

Конда́къ [и икосъ] пра́здника. Сѣда́ленъ, гла́съ 4:

Страстно́е порабо́тилъ еси́ плотско́е мудрова́ніе, ду́ху го́ршее покори́въ, о́тче пресла́вне, сокруши́лъ еси́ вы́и бѣсо́мъ и посто́мъ возсія́лъ еси́ въ мíрѣ, я́ко лучи́ со́лнечныхъ сія́ній, твоя́ добродѣ́тели показу́я. Сего́ ра́ди тя́ воспѣва́емъ.

Сла́ва, гла́съ 8:

Кро́тость и любо́вь, преподо́бне, имѣ́я, добродѣ́тельми возше́лъ еси́ на высоту́, я́же и твои́мъ ученико́мъ вообрази́лъ еси́, предста́тель мона́хомъ, прія́тъ отъ Бо́га дѣ́йство благода́ти помога́ти бѣ́дствующимъ. И ны́нѣ притека́ющимъ, исцѣле́нія точа́, здра́віе подае́ши, вопію́щимъ ти́: Зоси́мо преподо́бне о́тче на́шъ, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

И ны́нѣ, пра́здника.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Прему́дрости пе́рвѣе ты́ рачи́тель яви́лся еси́, прему́дре, житіе́ бо непоро́чно пожи́лъ еси́, очище́нъ изря́дно душе́ю и мы́слію, согла́сно взыва́я: сла́ва си́лѣ Твое́й, Го́споди.

Очи́стивъ у́мъ тво́й отъ страстны́я молвы́, сла́вне, и чу́вства, му́дре, упра́вивъ, къ нему́тнѣй тишинѣ́, о́тче, устреми́лся еси́ въ морскíй о́стровъ и усе́рдно воспѣва́лъ еси́: сла́ва си́лѣ Твое́й, Го́споди.

Земны́я печа́ли воздержа́тельно оттря́съ, небе́сныя наде́жды стяжа́ Тво́й уго́дникъ, Влады́ко, преподо́бный Зоси́ма, со усе́рдіемъ поя́: сла́ва си́лѣ Твое́й, Го́споди.

Богоро́диченъ: Яви́ся въ мíръ отъ Дѣ́вы я́ко Человѣ́къ, дарова́ побѣ́ду преподо́бнымъ Свои́мъ, Кресто́мъ бо Его́ бѣ́сы прогна́ша, вѣ́рою зову́ще: сла́ва си́лѣ Твое́й, Го́споди.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Кро́тостію, о́тче, навѣ́ты нося́, терпя́ же и отъ твои́хъ, на тя́ востаю́щихъ, оте́ческимъ нра́вомъ послѣ́дуя, тѣ́хъ житіе́ въ себѣ́ имѣ́лъ еси́.

Терпѣ́ніе и безгнѣ́віе имѣ́я, отхо́диши, изъ киновíи гони́мь, возвраща́яся же, призыва́емь, смиря́лся еси́, я́ко отроча́, по Христо́ву словеси́.

Укоре́ніе и доса́ды пріе́мля, подо́бился еси́ молча́нію Іису́са, моего́ Бо́га, младе́нецъ беззло́біемъ Ца́рство наслѣ́дуя, уязвля́я же гордя́щася врага́.

Богоро́диченъ: Яко вои́стинну неизрече́нна и непости́жима Твоего́, Богоро́дице; боголѣ́пнаго су́ть рождества́, су́щимъ на земли́ и небе́снымъ, Приснодѣ́во, та́инства.

Пѣ́снь 5.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Умо́мъ очище́ннымъ, пресла́вне, зри́ши добро́ту неизрече́нную Христа́, вся́ческихъ Бо́га на́шего.

Умертви́ на́ша мудрова́нія, Человѣколю́бче, плотска́я, и взыгра́нія богопрія́тными преподо́бнаго Твоего́ моли́твами.

Свы́ше на́съ назира́еши, преблаже́нне, и управля́еши живо́тъ на́шъ, творя́щихъ любо́вію, преподо́бне, па́мять твою́.

Богоро́диченъ: Исцѣли́ неду́гующаго ума́ моего́ омраче́ніе, врача́ ро́ждшая, Христа́, Всенепоро́чная Влады́чице.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Но́сиши со о́наго по́лу мо́ря чуде́снаго Савва́тія мо́щи и твое́й оби́тели сіе́ ца́рственное сокро́вище сниска́лъ еси́, его́же добродѣ́тели въ себѣ́ нося́, Зоси́мо преподо́бне.

Ненаселе́ная населя́ется, о́тче, тобо́ю, я́ко бо заря́ просія́ша твоя́ добродѣ́тели; е́юже осія́вшеся, въ пусты́ню, я́коже и во гра́дъ, мона́шеское мно́жество сти́чется.

Обѣща́нное дре́вле, при Савва́тіи чу́днѣмъ, ны́нѣ тобо́ю испо́лнися, о́тче: по́стникъ бо мно́жество къ тебѣ́ прише́дше, и добродѣ́телемъ прилѣжа́тъ, тобо́ю просвѣща́емы, Зоси́мо.

Богоро́диченъ: Богоро́дицу Тя́ отъ души́, Влады́чице мíра Блага́я, исповѣ́дающія спаса́й, Тебе́ бо заступле́ніе непобѣди́мо и́мамы, и́стинную Богороди́тельницу.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Яко сна́ о́бразъ тлѣ́нный, всего́ мíра сла́ву зря́, еди́наго жива́го Бо́га сла́вы возлюби́лъ еси́ прича́стникъ бы́ти: ю́же, преподо́бне, пра́ведно сподо́бился еси́ зрѣ́ти.

Лука́вый умертви́ся змíй свяще́нными твои́ми моли́твами, богоблаже́нне, и того́ рѣша́ются зло́бы, и́же зна́меніе отъ тебе́ испроси́вше, и уго́дникъ свѣ́телъ Бо́жій позна́нъ бы́лъ еси́ вѣ́ренъ.

Богому́дрымъ по́мысломъ украси́вся, я́же на земли́ преоби́дѣлъ еси́ вся́, и небе́сное, преблаже́нне о́тче, наслѣ́діе, прему́дре, разсуди́лъ еси́, Зоси́мо, и ны́нѣ я́вѣ на небесѣ́хъ живе́ши, ра́дуяся.

Богоро́диченъ: Госпо́дь съ Тобо́ю, Пречи́стая, я́коже изво́лилъ е́сть и всѣ́хъ на́съ отъ о́бласти льсти́ваго хода́тайствомъ Твои́мъ изба́вилъ е́сть. Тѣ́мже Тя́ ны́нѣ по до́лгу ро́дове родо́въ ублажа́ютъ.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Слеза́ми твои́ми, о́тче, потопи́лъ еси́ у́мныя еги́птяны, и́миже очи́стився, чи́стому прибли́жился еси́ и благода́ть привлече́ исцѣле́нія, благоутро́бне. Бѣ́дствующія ны́ злѣ́, тре́бующія твоея́ по́мощи, спаси́.

Сла́ное о́тче, невѣ́рія мо́ре истека́ющими отъ тебе́ си́лами и зна́меньми возмуща́ется, и злоче́стіе благоче́стіемъ ло́пи измѣня́ется, и тма́ невѣ́дѣнія богоразу́міемъ просвѣща́ется, Зоси́мо.

Предста́тельствовати стра́ждущимъ благода́ть, о́тче, имѣ́я, ника́коже ме́дли, но предвари́ и ру́ку по́мощи пода́ждь на́мъ, злѣ́ страстьми́ одержи́мымъ: вси́ бо, призыва́ющіи тя́ вѣ́рно, отъ бѣ́дъ спаса́ются.

Богоро́диченъ: Пречи́стая Влады́чице, ро́ждшая земны́мъ Окорми́теля и Го́спода, страсте́й мои́хъ непостоя́нное и лю́тое разжени́ смуще́ніе и тишину́ пода́ждь се́рдцу моему́.

Конда́къ, гла́съ 8:

Христо́вою любо́вію уязви́ся, преподо́бне, и Того́ Кре́стъ сла́вный, на ра́мо взе́мъ, поне́слъ еси́, боже́ственнѣ вооружи́вся, и непреста́нныя моли́твы, я́ко копіе́ въ руцѣ́, имы́й, крѣ́пко ссѣ́клъ еси́ бѣсо́вская ополче́нія. Тѣ́мъ зове́мъ ти́: ра́дуйся, преподо́бне о́тче Зоси́мо, мона́ховъ удобре́ніе.

Икосъ:

Услы́шавъ Христо́въ гла́съ, оста́вилъ еси́ плотска́я мудрова́нія, бога́тство же и сла́ву, я́ко пра́хъ, вмѣни́въ, на стра́сти, я́ко безпло́тенъ, подвиза́лся еси́, и безпло́тныхъ ликостоя́нію чистото́ю уподо́бился еси́, и ра́зума дарова́ніе прія́лъ еси́, е́же пода́ждь въ пѣ́снехъ пою́щимъ ти́ си́це: ра́дуйся, Зоси́мо преподо́бне и богоно́се, небе́сный человѣ́че и земны́й а́нгеле; ра́дуйся, я́ко кромѣ́ мíра су́етнаго пусты́ню содѣ́лавъ въ морско́мъ о́стровѣ, въ не́мъ оби́тель соста́вилъ еси́. Ра́дуйся, я́ко въ не́й мно́жество мона́ховъ собра́ся, и отъ ни́хъ слы́шиши си́це глаго́лемое: ра́дуйся, мона́шествующимъ спасе́нія хода́тай; ра́дуйся, уныва́ющихъ о́бразъ утѣше́нія; ра́дуйся, мона́хомъ отъ навѣ́тъ вра́жіихъ изба́вителю; ра́дуйся, скорбе́й губи́телю на́шего естества́, я́ко отго́ниши по́мыслы зло́бныя; ра́дуйся, скорбя́щихъ душе́ю сла́дкое утѣше́ніе и ра́дости боже́ственныя пода́телю; ра́дуйся, на́шъ предста́телю и изба́вителю; ра́дуйся, преподо́бне о́тче Зоси́мо, мона́ховъ удобре́ніе.

Пѣ́снь 7.

Ирмо́съ: Отъ Іуде́и доше́дше, о́троцы въ Вавило́нѣ иногда́, вѣ́рою тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Всѣ́мъ жела́ніемъ прилѣпи́лся еси́, воздержа́ніемъ тве́рдымъ твоему́ Влады́цѣ, Того́ ны́нѣ пита́ешися сія́ніи, зовы́й: оте́цъ на́шихъ Бо́же, благослове́нъ еси́.

Просвѣти́въ твое́ се́рдце, священнонача́льникъ бы́сть о́тча соста́ва, наказу́я и уча́ вся́, изводя́ вся́къ у́мъ къ Бо́жіимъ во́лямъ, поя́: оте́цъ на́шихъ Бо́же, благослове́нъ еси́.

Пло́дъ боже́ственъ Влады́цѣ прине́слъ еси́ — житіе́, треблаже́нне, и же́ртву прія́тну и непоро́чну, зовы́й: оте́цъ на́шихъ Бо́же, благослове́нъ еси́.

Богоро́диченъ: Се́ Дѣ́ва Боже́ственное Отроча́ породи́, Его́же ны́нѣ богоно́сніи отцы́ позна́вше Бо́га и Го́спода, вопія́ху: оте́цъ на́шихъ Бо́же, благослове́нъ еси́.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Въ мо́ри явля́яся, отъ бѣ́дъ спаса́еши, Зоси́мо преподо́бне, призыва́юще бо тя́ на по́мощь, и те́пла помо́щника всѣ́мъ вѣ́дяще быва́юща, и бы́стра засту́пника стяжа́вше, зову́тъ: благослове́нъ Бо́гъ оте́цъ на́шихъ.

Яже отъ лю́таго бѣ́са наси́луемая жена́ пра́веднѣ тобо́ю запреща́ется, безу́мнѣ Изба́вителя не призва́вшая и тя́, къ Нему́ моли́твенника, Зоси́мо. Та́я исцѣле́ніе отъ напа́сти получи́, пою́щи: благослове́нъ Бо́гъ оте́цъ на́шихъ.

Иже злы́ми при́сно обурева́еміи и страстьми́ содержи́міи, къ тебѣ́ прибѣга́емъ, Бо́гови моли́твенника тя́ предлага́юще, Зоси́мо преподо́бне. Тѣ́мже ми́лостивно посѣща́й на́съ, о́тче, да, тобо́ю спасе́ни, пое́мъ: благослове́нъ Бо́гъ оте́цъ на́шихъ.

Богоро́диченъ: Очисти́лище естеству́ Ты́ еси́, еди́на Богоблаже́нная, на ра́мѣхъ бо херуви́мскихъ сѣдя́щаго Бо́га дла́ньма носи́ла еси́, вопію́щи: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Съ похвала́ми быва́етъ, богоно́се, па́мять твоя́: пра́вды бо яви́лся еси́ показа́тель, му́жества, и му́дрости, и цѣлому́дрія, о́тче преподо́бне Зоси́мо, Содѣ́телю и Изба́вителю взыва́я: благослови́те, вся́ дѣла́ Госпо́дня, Го́спода.

Невозвра́тно ше́ствовалъ еси́ веду́щими къ небеси́ боже́ственными стезя́ми, о́тче преподо́бне Зоси́мо досточу́дне, отъ злы́хъ, веду́щихъ до конца́, укрѣпи́лся еси́, поя́: благослови́те, вся́ дѣла́ Госпо́дня, Го́спода.

Богоно́снаго вси́ хвала́ми почти́мъ, я́ко испо́лнена я́вѣ благода́ти и Боже́ственными сія́ньми просвѣще́на, изря́днѣ Содѣ́телю и Изба́вителю вопія́ше: благослови́те, вся́ дѣла́ Госпо́дня, Го́спода.

Богоро́диченъ: Вода́ еси́ неисчерпа́емая, Дѣ́во, отъ нея́же вси́, пію́ще, благода́ти исполня́емся и, душе́ю и тѣ́ломъ освяща́еми, пое́мъ: благослови́те, вся́ дѣла́ Госпо́дня, Го́спода.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Лоза́ плодови́та, о́тче, душа́ твоя́ бы́сть, вино́ умиле́нія иска́пающи на́мъ, стра́сти очища́ющее и ду́ши боже́ственнѣ веселя́щее, отъ малоду́шія возставля́ющее. Тѣ́мже и, благоду́шны бы́вше, усе́рдно пое́мъ: благослови́те, вся́ дѣла́ Госпо́дня, Го́спода.

Подобонра́вное добродѣ́телей, о́тче Зоси́мо, отцу́ Савва́тію и равноподви́жное исправле́ніе совокупи́ тя́ въ премíрныхъ ему́. Отону́дуже, явля́ющеся вку́пѣ, спаса́ете пою́щія: благослови́те, вся́ дѣла́ Госпо́дня, Го́спода.

Дво́ице богоуго́дная, равноче́стніи отцы́, еди́но достоя́ніе вѣ́чныя сла́вы стяжа́вше, отъ лю́тыхъ на́съ изыма́ти не преста́йте, вопію́щихъ, я́ко равномо́щно дерзнове́ніе иму́ще ко всѣ́хъ Влады́цѣ: по́йте, благослови́те, вся́ дѣла́ Госпо́дня, Го́спода.

Богоро́диченъ: Златоза́рный Тя́, Дѣ́во, свѣ́щникъ предвообрази́, прія́ла бо еси́ несказа́нно Свѣ́тъ Непристу́пный и сія́ніемъ Твои́мъ озаря́еши концы́. Тѣ́мже Тя́ пое́мъ, Чи́стая, и превозно́симъ во вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Струя́ми твои́хъ сле́зъ очи́щся, ны́нѣ Свѣ́та наслажда́ешися, о́тче преподо́бне, трисія́ннаго. Тому́ предстоя́ я́вѣ, свѣтоза́рными просвѣща́емь луча́ми, свы́ше назира́еши на́съ, твою́ па́мять творя́щихъ, всеблаже́нне.

Яко вели́кое со́лнце, на́мъ вели́чіемъ по́двигъ твои́хъ осія́лъ еси́, богому́дре, вся́ земны́я концы́, къ Свѣ́ту, отъ Свѣ́та возсія́вшему, у́меръ, преше́лъ еси́. Тѣ́мъ вопіе́мъ ти́: просвѣти́ на́ша помышле́нія, о́тче преподо́бне.

Процвѣ́лъ еси́ въ по́стническихъ по́двизѣхъ, прехва́льне о́тче на́шъ, я́ко ши́покъ благоуха́ненъ и, я́ко ке́дръ, облагоуха́лъ еси́ со́вѣсти вѣ́рныхъ сердца́ добродѣ́тельми и чудесы́; тѣ́мъ отжени́ стра́сти смердя́щія, преподо́бне.

Богоро́диченъ: Просвѣти́, Пречи́стая Дѣ́во, сѣ́тующее се́рдце мое́ при́сно преступле́ніи и жите́йскими мно́гими молва́ми и не оста́ви мя́ враго́мъ бы́ти въ ра́дость, я́ко да сла́влю Тя́ и я́ко да Тя́ любо́вію пою́, Препѣ́тая.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Предста́вилъ еси́ себе́ же́ртву чи́сту Бо́гу, преподо́бне о́тче, все́ жела́ніе добродѣ́тельми возложи́въ, и́миже сія́я, просвѣща́еши приближа́ющихся къ прославля́ющему тя́ по успе́ніи Го́сподеви, предста́теля показа́вшему су́щимъ въ ну́ждахъ.

Высото́ю дѣ́ланія къ небеси́ взя́тся, о́тче вселюбе́зне, ко о́ному блаже́нству преложи́лся еси́, Его́же въ житіи́ болѣ́зненнѣ не преста́лъ еси́, взыску́я, и, труда́ми поко́й обрѣ́тъ, та́мо пѣвцы́ твоя́ хода́тайствомъ твои́мъ возведи́.

Пріими́ съ любо́вію ти́ пѣ́снь приноси́мую, преподо́бне о́тче, и пода́ждь оставле́ніе прегрѣше́ній и страсте́й премѣне́ніе, и Боже́ственнаго свѣ́та осія́нія сподо́би, та́мо управля́я, идѣ́же ты́ во свѣ́тлыхъ се́лѣхъ Тро́ичныя зари́, Зоси́мо, пребыва́еши.

Богоро́диченъ: Ме́ртвымъ воскресе́ніе ны́нѣ дарова́ся Твои́мъ несказа́ннымъ и неизрече́ннымъ рождество́мъ, Богоро́дице Всечи́стая: Жи́знь бо отъ Тебе́, пло́тію обло́жшися, всѣ́мъ возсія́ и сме́ртное смѣше́ніе я́вѣ разруши́.

Свѣти́ленъ:

Насажде́ну ти́ въ дому́ Бо́жіи, вои́стинну, я́ко фи́никсъ, псало́мски процвѣта́етъ твоя́ оби́тель, умножа́я тебѣ́ ча́да, и́же твою́, о́тче Зоси́мо, па́мять пра́зднуютъ свѣ́тло.

Сла́ва, и ны́нѣ, пра́здника.

На хвали́техъ стихи́ры пра́здника 3, и преподо́бнаго 3, гла́съ 8. Подо́бенъ: О, пресла́внаго чудесе́!

Имѣ́я Боже́ственную благода́ть учи́теля,* цѣлоу́міемъ тя́ наставля́ющую* къ жела́нію боже́ственному,* отону́дуже мірска́го мяте́жа отре́кся,* къ ра́зуму и́стинному возве́лся еси́,* болѣ́зненными себе́ труды́ удруча́я,* повину́я же лу́чшему го́ршее,* Зоси́мо преподо́бне,* моли́ спасти́ся на́мъ.

Добродѣ́тели удержа́ти тща́ся,* и́миже Бо́гу присво́итися разумѣва́я,* къ Нему́же восте́клъ еси́,* Его́же и свѣтоли́тіе пріе́мля,* хода́тайствуй о на́съ* ми́рно житіе́ преити́,* спасти́ся отъ собла́знъ льсти́ваго* и святы́хъ ра́дости о́бщникомъ бы́ти* твои́ми моли́твами.

Цѣльбоно́сному твоему́ гро́бу предстоя́ще,* о́тче на́шъ Зоси́мо,* пріе́млемъ оби́льно благода́ть:* вся́къ бо, приходя́й съ вѣ́рою, не посрами́тся,* пріе́млетъ бо, и́хже тре́буетъ,* прославля́ющу тя́ Го́споду,* я́ко благоуго́дна раба́ бы́ша твоему́ Влады́цѣ,* и Того́ за́повѣди сохра́нша.* Тѣ́мже тя́ чти́мъ и ублажа́емъ.

Сла́ва, гла́съ 8:

Мона́ховъ мно́жества наста́вника тя́ чте́мъ, о́тче Зоси́мо; твое́ю бо стезе́ю пра́во ходи́ти позна́хомъ. Блаже́нъ еси́, Христу́ рабо́тавъ и вра́жію низложи́въ си́лу, а́нгеломъ собесѣ́дниче, и преподо́бнымъ единокро́вне, и Савва́тію соприча́стниче. Съ ни́миже моли́ся Го́сподеви поми́ловатися душа́мъ на́шимъ.

И ны́нѣ, пра́здника.
Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на свята́го, пѣ́снь 3-я на 4, и 2-го кано́на, пѣ́снь 6-я на 4. Проки́менъ, [гла́съ 7:] Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви [о всѣ́хъ, я́же воздаде́ ми?] Апо́столъ [къ Гала́томъ,] зача́ло 213. [Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 66 об. – 76.

/ Къ оглавленію раздѣла /


Наверхъ / Къ титульной страницѣ

0