Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 16-й де́нь.
Святы́хъ му́ченицъ Ага́піи, Ири́ны и Хіонíи.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Дѣ́вство нетлѣ́нно,* муче́ніе всечу́дно* Христу́ принесо́сте, честны́я дѣ́вы,* низложи́вше шата́ніе пре́лести безбо́жное* си́лою кре́стною,* му́жественнымъ ра́зумомъ.* Тѣ́мже вся́ Христо́ва Це́рковь пра́зднуетъ* святу́ю ва́шу па́мять,* свѣтоно́сную и наро́читую.

Хіонíи страда́нію* и Ага́піи сопротивле́нію,* Ири́ны му́ченицы неодолѣ́нію* ли́цы а́нгельстіи блаже́нніи* я́вѣ удиви́шася,* ка́ко, му́жественными сплете́ніи* врага́ неви́димаго разрази́вше,* побѣ́ды вѣне́цъ отъ руки́ Живоно́сца* бога́тно прія́ша.

Огне́мъ скончава́еми,* разжже́ннымъ смы́сломъ* пла́мень погаси́сте су́етства* и, свѣщу́ неуга́сшу душе́вную соблю́дше,* внидо́сте со Христо́мъ въ черто́гъ небе́сный,* чуде́сными же и́скрами* стра́сти пожго́сте, страстоно́сицы,* де́моновъ же полки́* страда́льчески побѣди́сте.

Сла́ва, и ны́нѣ, богоро́диченъ:

Ту́чами Ду́ха Пресвята́го, Пречи́стая,* мою́ мы́сль ороси́,* Яже ка́плю ро́ждшая, Христа́,* неизче́тно безмѣ́рная беззако́нія человѣ́ковъ* щедро́тами измы́вшую;* изсуши́ исто́чникъ страсте́й мои́хъ* и пото́ка мя́ сподо́би* пи́щи живы́я при́сно* моли́твами Твои́ми.

Крестобогоро́диченъ:

Агнца и Па́стыря, Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не возжелѣ́нне,* ка́ко на дре́вѣ Кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?


[НА УТРЕНИ,]
Кано́нъ, творе́ніе Іо́сифово, гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Благода́ть мнѣ́ съ небесе́, му́ченицы Госпо́дни, исхода́таите, ва́ше восхваля́ющему на земли́ свѣтоно́сное торжество́.

Расто́ргше пристра́стіе плотски́хъ соу́зъ Боже́ственнымъ Ду́хомъ, Христу́ дѣ́вы связа́шася любо́вію богоразу́мною.

Напра́вилъ еси́ ко приста́нищемъ, Спа́се, небе́снымъ дѣ́вы Твоя́, проше́дшія немо́кренно му́къ непостоя́нную пучи́ну.

Дѣлесы́ чи́стыми отъ Дѣ́вы Отрокови́цы возсія́вшему Сло́ву угоди́вше дѣ́вы, Си́мъ веселя́тся.

Богоро́диченъ: Ражда́еши несказа́нно, Его́же Оте́цъ неизрече́нно роди́, и сосцы́ пита́еши вся́ческая пита́ющаго, Влады́чице.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Ту́чами Боже́ственнаго Ду́ха напая́еми кла́сы му́ченическія, боже́ственнымъ дѣ́ланіемъ дѣ́вы процвѣто́ша.

Па́че ви́димыхъ неви́димая возлю́бльше, ви́димыя и неви́димыя враги́ побори́сте.

Огня́ не ужасо́стеся, разгара́емы Ду́ха боже́ственнымъ огне́мъ, тѣ́мже исцѣле́ній боже́ственную ро́су источа́ете.

Богоро́диченъ: Расто́ргни прегрѣше́ній мои́хъ лю́тое рукописа́ніе, Влады́чице, Яже у́зы разрѣ́шшая а́довы безсѣ́меннымъ рождество́мъ Твои́мъ.

Сѣда́ленъ, гла́съ 8. Подо́бенъ: Прему́дрости.

Уневѣ́стившеся Го́сподеви боголѣ́пно, я́коже да́ръ кро́вь и заколе́ніе Тому́ принесо́сте, страстоно́сицы отрокови́цы, и черто́гъ Боже́ственный досто́йно улучи́сте, просвѣще́нія неизрече́ннаго непреста́нно исполня́емы. Тѣ́мже, святу́ю и честну́ю ва́шу па́мять творя́ще духо́вно, Спа́са прославля́емъ и вѣ́рно взыва́емъ: моли́те Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять ва́шу.

Сла́ва, и ны́нѣ, богоро́диченъ:

Прему́дрость и Сло́во въ Твое́мъ чре́вѣ заче́нши неопа́льно, Ма́ти Бо́жія, мíрови родила́ еси́ мíръ Содержа́щаго и во объя́тіихъ понесла́ еси́ вся́ Нося́щаго, Пита́теля всѣ́хъ и Творца́ тва́ри. Тѣ́мже молю́ Тя, Всесвята́я Дѣви́це, и вѣ́рно сла́влю Тя́, изба́витися ми́ отъ прегрѣше́ній, и въ де́нь Суда́, егда́ предста́ти и́мамъ предъ лице́мъ Созда́теля моего́, Влады́чице Дѣ́во Чи́стая, Твою́ по́мощь тогда́ пода́ждь ми́: вся́ бо мо́жеши, ели́ка хо́щеши, Всепѣ́тая.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ боже́ственныя стра́сти Твоя́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Тѣле́сныхъ жела́ній жела́ніемъ боже́ственнымъ отлучи́вшеся, оби́телища Ду́ха Христо́вы дѣ́вы содѣ́лашася.

Согла́сіемъ богому́дрымъ на проти́внаго ополчи́вшеся, побѣ́ду боже́ственную прія́сте и вѣнце́въ боже́ственныхъ сподо́бистеся.

Свяще́нно, я́коже незло́бивы води́стеся а́гницы, пожре́тися, всечестны́я, не вопію́ще, ни зову́ще, но произволе́ніемъ умерщвля́еми.

Богоро́диченъ: Воплоща́ема Го́спода родила́ еси́, Госпоже́, всея́ тва́ри, Его́же моли́ изба́вити мя́, Всесвята́я, отъ о́бласти вра́жія кова́рства.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Утреневаша вку́пѣ ко Христу́, Свѣ́ту незаходи́мому, дѣ́вы богому́дрыя и па́че сія́нія со́лнечнаго озари́шася.

Уды му́жески отда́сте къ му́камъ, му́чивше томи́теля терпѣ́ніемъ, страстоте́рпицы досточу́дныя.

Цвѣ́тъ свяще́ненъ му́ченикомъ показа́стеся, благово́ніе боже́ственнаго ра́зума Це́ркви подаю́ще, всехва́льніи.

Глаго́лы ва́шими велехва́льный онѣмѣ́, терпѣ́ніемъ же побѣди́ся и потребле́нію отпуще́нъ бы́сть, прехва́льніи.

Богоро́диченъ: Коне́цъ ми́ бла́гъ прибы́ти, Отрокови́це, моли́, я́ко да избѣ́гну жду́щихъ мя́ безконе́чныхъ му́къ и спасу́ся.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Претерпѣ́вше плотскíя болѣ́зни и о́гненное томле́ніе му́жески, Христо́вы страстоте́рпицы и невѣ́сты Ага́пія, и Хіонíя, и Ири́на прія́ша вѣне́цъ благолѣ́пенъ и неиждива́емую сла́ву съ му́ченики.

Влачи́мы по земли́, я́коже ка́меніе, испроверго́сте, дѣ́вы, пре́лести зда́ніе все́ си́лою Сло́ва, къ Це́ркви возведо́стеся Святѣ́й предстоя́ти ра́достно Владу́щему все́ю тва́рію.

Исцѣле́нія ра́ка Хіонíи, и Ири́ны, и Ага́піи то́читъ, отъ исто́чника напая́ема бога́тно Утѣ́шителя, и уставля́етъ болѣ́зни, напоя́етъ же благоче́стно приступа́ющихъ сердца́ благода́тію.

Богоро́диченъ: Ме́ртвость ко́жныхъ ри́зъ Ада́мъ отло́жь воплоще́ніемъ Твоего́ Сы́на, Богоро́дице Дѣ́во, во оде́жду Боже́ственныя сла́вы облече́ся, сла́вя Тя́ ра́достно, я́ко Ма́терь Бо́жію Всенепоро́чную.

Конда́къ, гла́съ 4:

Крѣ́пко ду́шу, Ири́но, ополчи́ла еси́ вѣ́рою, я́вѣ лука́ваго посрами́вши, и ко Христу́ привела́ еси́ тмы́ люде́й мно́жества, блаже́нная, и, порфи́ру отъ крове́й нося́щи, со а́нгелы ны́нѣ весели́шися.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Ни звѣре́й ди́віихъ наи́тія, ни клоко́чущаго стремле́нія огня́ непостоя́ннаго, ни удо́въ отсѣче́нія, ни болѣ́зней многообра́зныхъ Христо́вы отрокови́цы устраши́шася доблему́дрыя.

Иму́ще о́ко серде́чное ко спаса́ющему Бо́гу и Царю́, а́гницы Христо́вы отлучи́шася ко всему́ вра́жію ополче́нію и побѣди́ша му́жески.

Ми́лостивъ бу́ди Твои́мъ рабо́мъ, Преблагíй, мольба́ми Хіонíи, и Ири́ны чи́стыя, и честны́я Ага́піи, грѣхо́въ проще́ніе и́хъ ра́ди на́мъ подава́я.

Все́ жела́ніе, дѣ́вы, стяжа́вше ко еди́ному Влады́цѣ, жите́йскую красоту́ вмѣни́сте, я́ко со́нъ, вопію́ще: благослове́нъ еси́, Го́споди Бо́же, во вѣ́ки.

Богоро́диченъ: Умертви́, Чи́стая, живу́щій, молю́ Тя, во мнѣ́ грѣ́хъ и жи́знь мя́ улучи́ти сподо́би нестарѣ́емую, Яже Живо́тъ ро́ждшая и умори́вшаго змíя.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Нау́чшеся боже́ственнымъ пресла́вно, во вре́мя подвиго́въ нра́въ му́жески воспрія́ша Христо́вы а́гницы, тве́рдо пострада́вше.

Помраче́нъ пія́нствомъ гони́тель мра́чнаго грѣха́, смѣ́ху до́лженъ явля́шеся, Христо́вы же дѣ́вы, я́ко свѣ́тъ, показа́шася.

Цѣвни́ца, глася́щи я́вѣ Бо́жію пѣ́снь исповѣ́данія боже́ственнаго, и свѣ́дѣнія, и вѣ́ры показа́стеся вои́стинну, дѣ́вы отрокови́цы.

Утве́рждшеся любо́вію Влады́ки, утвержде́нія вся́ діа́воля низложи́сте, страстоно́сицы Христо́вы, и ны́нѣ ублажа́етеся.

Богоро́диченъ: Образы нося́щи дре́вле Твоего́ рождества́, ю́ноши не опаля́етъ, Дѣ́во Ма́ти, пе́щь, я́коже ни утро́бу Твою́ Огнь Боже́ственный.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Напра́вистеся, дѣ́вы, къ боже́ственнымъ приста́нищемъ, окормле́ніемъ Христа́ Бо́га на́шего, напа́сти преше́дше свирѣ́пыхъ во́лнъ.

Яко звѣ́зды, я́ко свѣщи́, сія́юще, Ири́на, и Ага́пія, и Хіонíя просвѣща́ютъ вселе́нныя бога́тно вся́ концы́.

Совокупи́стеся съ ли́ки безпло́тныхъ, безпло́тныя враги́, съ пло́тію до́блественнѣ, страстоно́сицы, побѣди́вше.

Па́мять ва́ша боже́ственными просвѣще́на свѣтови́дными, страстоно́сицы, дарова́ніи, мы́сли просвѣща́етъ восхваля́ющихъ ва́съ.

Богоро́диченъ: Благолюби́вая Дѣ́во, озло́бленную грѣхо́мъ ду́шу мою́ уврачу́й, Яже Преблага́го Сло́ва поро́ждшая.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 57 об. – 60 об.

/ Къ оглавленію раздѣла /


Наверхъ / Къ титульной страницѣ

0