Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 16 декабря 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 15-й де́нь.
Святы́хъ апо́столъ Ариста́рха, Пу́да и Трофи́ма.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Сло́вомъ боже́ственнаго ра́зума* лю́ди неразу́мія, прему́дріи,* всеконе́чнѣ изба́висте* и приведо́сте спаса́емы сія́* Сло́ву, возсія́вшему* изъ Нерожде́нна Отца́, апо́столи.* Того́ моли́те* дарова́ти душа́мъ на́шимъ* ми́ръ и ве́лію ми́лость.

Пу́да, и Ариста́рха я́вѣ,* и боже́ственнаго Трофи́ма,* и́стинныя христопроповѣ́дники, восхва́лимъ:* пре́лести бо зи́му* теплото́ю Боже́ственныя благода́ти разори́ша* и ны́нѣ къ Незаходи́мому Сія́нію всели́шася,* воздая́нія трудо́въ пріе́мше* и прича́стіемъ неизрече́ннымъ обожа́еми.

Па́влу послѣ́дующе,* сла́вному учи́телю, сла́вніи,* мно́ги бѣды́ подъя́сте,* въ юзи́лищахъ заключа́еми,* приобща́ющеся болѣ́знемъ,* мече́мъ же наконе́цъ, во главы́ усѣка́еми, пострада́сте.* Христу́ моли́теся* дарова́ти душа́мъ на́шимъ* ми́ръ и ве́лію ми́лость.

Сла́ва, и ны́нѣ, богоро́диченъ:

Увы́ мнѣ́! что́ бу́ду?* у́мъ и ду́шу и тѣ́ло* оскверни́хъ прегрѣше́ньми.* Что́ сотворю́?* ка́ко же избѣжу́ пла́мене нестерпи́маго,* нерѣши́мыхъ у́зъ и вѣ́чныхъ?* Но, о Всенепоро́чная!* Пре́жде конца́ моли́ Сы́на Твоего́* пода́ти ми́ оставле́ніе.

Крестобогоро́диченъ:

Дѣ́ва Нескве́рная,* иногда́ на дре́вѣ ви́дѣвши,* Его́же роди́ изъ безсѣ́менныя утро́бы,* не терпя́щи утро́бнаго уязвле́нія,* власы́ терза́ющи, глаго́лаше:* ма́ніемъ Содержа́й тва́рь всю́,* ка́ко, я́ко осужде́нный,* на Кре́стъ вознесе́нъ еси́,* вся́ко хотя́й спасти́ человѣ́чество?


[НА УТРЕНИ,]
Кано́нъ, его́же краегране́сіе: Бо́жіимъ ученико́мъ боже́ственную воспѣва́ю пѣ́снь. Творе́ніе Іо́сифово. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Престо́лу Бо́жію предстоя́ще, я́ко слуги́, я́ко Христо́вы служи́тели, я́ко свѣти́льницы мы́сленніи, просвѣще́ніе проси́те на́мъ, чту́щимъ ва́шу па́мять, апо́столи.

На земли́ за милосе́рдіе я́влься, ученики́ избра́ и служи́тели ва́съ, со ины́ми мно́жайшими, Его́ возвѣща́ющія всю́ду боже́ственное хотѣ́ніе.

Свяще́ннѣйшій ли́къ, свяще́нныхъ Христо́выхъ се́дмьдесятъ сочта́вшеся учени́къ, съ Па́вломъ всю́ зе́млю уче́ньми Боже́ственнаго свѣ́та просвѣти́сте.

Свяще́ннѣйшій Пу́дъ и сла́вный му́дрый Ариста́рхъ съ Трофи́момъ, я́ко звѣ́зды свѣтоза́рныя, возсія́ша на земли́, пре́лести омраче́ніе отгоня́ще.

Богоро́диченъ: Да ни́жнія съ вы́шними премно́жествомъ милосе́рдія, Пречи́стая, совокупи́тъ, Бо́гъ пло́ть прія́тъ отъ Тебе́ и пребы́сть, е́же бѣ́, и по воплоще́ніи.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Су́ще съ Па́вломъ сла́внымъ, съ ни́мъ ве́сь мíръ, я́ко звѣ́зды съ со́лнцемъ, проидо́сте, свѣ́томъ проповѣ́данія свяще́ннаго невѣ́дѣнія тму́ отгоня́ще.

Вели́кими болѣ́зньми плотски́ми болѣ́зненный отъя́та грѣ́хъ отъ среды́ Сло́ва ученицы́, безболѣ́зненный вѣ́рнымъ въ вы́шнихъ поко́й обручи́вше.

По́двиги боже́ственными вои́стинну вра́жію зло́бу разори́сте всю́ и, хра́мы и́дольскія низлага́юще, Бо́гу человѣ́ки хра́мы сотвори́сте.

Богоро́диченъ: Пита́еши млеко́мъ всѣ́хъ Пита́теля, Дѣ́во, рожде́ннаго безъ тли́ изъ Пречи́стаго Твоего́ чре́ва и сокруше́нныя тле́ю человѣ́ки па́ки назида́юща.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Яко у́тро, боголѣ́пно возсія́вше мíру, тму́ глубо́кую отгна́сте вѣ́рою пре́лести, апо́столи, и ду́ши просвѣти́сте. Тѣ́мже вся́ свѣтоза́рная Це́рковь пое́тъ дне́сь свѣтоно́сную ва́шу па́мять, Христа́ велича́ющи.

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

Крестобогоро́диченъ:

Нескве́рная Агница, Агнца и Па́стыря, повѣ́шена на дре́вѣ, ме́ртва зря́щи, пла́чущи, вѣща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Пресу́щная Тро́ица я́ко трисвѣ́тлую возжже́ свѣщу́, свяще́нныя Пу́да же, и Трофи́ма, и Ариста́рха, зе́млю боже́ственнымъ сло́вомъ озаря́ющія.

Па́влу яви́стеся му́дріи спу́тницы, гоне́нія съ ни́мъ многови́дна и бѣды́, сла́вніи, бу́дущія ра́ди жи́зни, веселя́щеся, претерпѣ́сте.

Кро́вными тече́ніи освяти́сте всю́ тва́рь, стра́ждуще, скве́рныя кро́ви, де́мономъ приноси́мыя, Христо́вою си́лою упраздни́сте, апо́столи.

Богоро́диченъ: Крѣ́пость моя́, Пречи́стая, и прибѣ́жище, и необори́мая стѣна́, и къ Бо́гу Моли́твенница су́щи, вѣ́чнаго мя́ пла́мене и гее́нны свободи́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Истука́нныя низложи́ша и хра́мы и́дольскія, сла́вніи, созида́юще благода́тію, я́коже ски́нію, па́дшую преступле́ньми, сердца́ человѣ́ковъ, я́ко богопроповѣ́дницы.

Мо́ре, кони́ пресла́вніи вои́стинну су́ще Бо́жіи, безбо́жія возмути́вше, потопля́емыя въ не́мъ пе́рвѣе проповѣ́даніемъ боже́ственнымъ оживи́сте.

Посѣща́еми отъ Бо́га, боже́ственными посѣще́ніи ва́шими въ болѣ́зни су́щія идолонеи́стовства и потопля́ющіяся спасо́сте, спаси́тели на́мъ бы́вше.

Богоро́диченъ: Свяще́нно свяще́нный дре́вле Иса́ія, просвѣ́щся Ду́хомъ Боже́ственнымъ, возопи́: се́ Дѣ́ва пріи́метъ воплоща́ема Бо́га, за милосе́рдіе необъя́тнаго.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Прему́дрый Трофи́мъ, и Ариста́рхъ вку́пѣ, и Пу́дъ чу́дный, я́ко ученицы́ Сло́ва и свяще́нніи Па́влу спу́тницы, свяще́нными пѣ́сньми да восхва́лятся.

Во́дъ испо́лнены Ду́ха, прему́дріи, я́ко вои́стинну су́ще, вся́ку ду́шу напои́сте уче́нія, отъ среды́ изъе́мше пла́мене преле́стнаго Боже́ственною благода́тію.

Соедине́ни ду́хомъ, разлуче́нія никоего́же имѣ́сте тѣлесе́мъ: вку́пѣ бо во главы́ съ Па́вломъ проповѣ́дникомъ усѣ́чени бы́сте, съ ни́мъ и прославля́еми.

Богородиченъ: Стра́нно Твое́ зача́тіе, стра́нно, Отрокови́це, и стра́шно е́же па́че ума́ Твое́ рождество́, устра́ншіяся дре́вле отъ Бо́га, Тому́ примиря́ющи и добро́ту пе́рвую воздаю́щи.

Конда́къ, гла́съ 4. Подо́бенъ: Яви́лся еси́ дне́сь.

Яви́ся апо́стольскій честны́й се́й пра́здникъ, просвѣща́я на́съ и грѣхо́вную мглу́ прогоня́я, зову́щимъ: яви́ся Свѣ́тъ, и пріи́де избавле́ніе.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Нече́стія угаси́сте пе́щь ту́чами честна́го проповѣ́данія, я́ко апо́столи и я́ко боже́ственніи су́щи страда́льцы, крове́й то́ками и́дольскую ве́щь попали́сте, му́дріи, тѣ́мже сла́вими есте́.

Двуна́десяти ученико́въ яви́стеся вторíи ученицы́ Христо́вы, сла́вніи, съ Па́вломъ бо проше́дше всю́ зе́млю, бѣды́ подъя́сте мно́ги и съ ни́мъ свяще́нную кончи́ну прія́сте.

Украси́стеся кра́сными ва́шими ра́нами, Ариста́рхе и Трофи́ме, просвѣти́стеся па́че вся́каго, сла́вніи, зла́та съ Пу́домъ свяще́ннымъ вои́стинну, о на́съ всегда́ моля́ще Христа́.

Богоро́диченъ: Блаже́нна отъ Свята́го яви́лася еси́ Ду́ха, Совѣ́та Вели́каго Ангела вопло́щши, Сего́ боже́ственныя ученики́, въ мíръ я́ко боже́ственныя мо́лнія посла́вша, Чи́стая, просвѣти́ти вѣ́рныя.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Посѣка́юще коре́нія безбо́жія серпо́мъ боже́ственнымъ, насади́сте вѣ́ру и́стинную и соверше́нъ ра́зумъ во благочести́выхъ сердца́хъ, богогла́сніи.

Сло́вомъ боже́ственнымъ сердца́ обнови́сте и, ра́зума сѣ́мя сѣя́вше, кла́съ, му́дріи, многопло́денъ пожа́сте, спасе́нныхъ, апо́столи, мно́жество.

Непрекло́нніи столпи́ Це́ркве Христо́вы, виногра́да боже́ственнаго боже́ственное гро́здіе, сла́дость жи́зни иска́пающе, Ариста́рхъ, и Пу́дъ, и Трофи́мъ да почту́тся.

Богоро́диченъ: Сокру́шшееся, Дѣ́во, человѣ́чество обнови́ла еси́ все́ но́вымъ рождество́мъ Твои́мъ, естества́ соу́зы па́че естества́ обно́вльши, Обра́дованная, Бо́га Жива́го Ма́ти.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Крѣ́пость отъя́та бы́сть го́рдаго, паде́ же возноси́мое его́ шата́ніе, не́мощію бо плотско́ю святíи сему́ спле́тшеся, побѣди́ша, и погуби́ша, и мучи́тельства его́ вѣ́рныя изба́виша.

Якоже пе́рсть, пре́лести истни́вше, неле́стни человѣ́комъ наста́вницы яви́стеся и а́нгеломъ согра́ждане бы́сте, воспѣва́юще съ ни́ми: свя́тъ, свя́тъ, свя́тъ, Оте́цъ и Сы́нъ и Ду́хъ Святы́й.

Плотскíя исцѣля́юще неду́ги и душе́вныя, апо́столи Госпо́дни, болѣ́зни и творя́ще ди́вная чудеса́, вся́, и́же въ неразу́міи, привлеко́сте къ ра́зуму свѣ́та и́стиннаго, тѣ́мже блажи́ми есте́.

Ума́ невеще́ственнаго ны́нѣ наслажда́етеся, на небесѣ́хъ пра́зднующаго, апо́столи, блаже́нное упова́ніе пріе́мше, Трофи́ме богопроповѣ́дниче, Пу́де всеизря́дне, сла́вный Ариста́рхе, о на́съ воспомина́ніе твори́те.

Богоро́диченъ: Пла́мене гее́нскаго мя́ свободи́, Яже па́че ума́ Огнь ро́ждши нестерпи́мый, и ду́шу мою́ къ любви́ возжзи́, Пречи́стая, Прише́дшаго о́гнь ра́зума, Отрокови́це, на зе́млю воврещи́, Богора́дованная.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 54 об. – 57 об.

/ Къ оглавленію раздѣла /


Наверхъ / Къ титульной страницѣ

0