Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 21 августа 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Апри́ллія въ 14-й де́нь.
Иже во святы́хъ отца́ на́шего и исповѣ́дника Марти́на, па́пы Ри́мскаго.

[ВЕЧЕРЪ,]
Стихи́ры, гла́съ 8. Подо́бенъ: Что́ ва́съ нарече́мъ.

Что́ тя́ ны́нѣ, Марти́не, провѣща́емъ?* Правосла́вныхъ уче́ній наста́вника всесла́вна,* верхо́вника свяще́нныхъ повелѣ́ній боже́ственныхъ нело́жна,* лжи́ и́стиннѣйшаго обличи́теля,* словесе́ до́блественнѣйша споспѣ́шника,* священнодѣ́йственна свяще́ннѣйша,* чудодѣ́лателя честнѣ́йшаго.* Моли́ спасти́ся душа́мъ на́шимъ.

Что́ тя́ ны́нѣ, Марти́не, нарече́мъ?* Рѣку́, духо́вныхъ во́дъ испо́лнену,* при́сно напая́ющу ду́ши ко благопло́дію разу́мному,* свѣ́щникъ, благоче́стія свѣ́тъ сія́ющъ,* го́ру, точа́щу боже́ственное ра́дованіе,* боже́ственныхъ слове́съ изъяви́теля,* вся́кія е́реси обличи́теля.* Моли́ спасти́ся душа́мъ на́шимъ.

Что́ тя́ ны́нѣ, Марти́не, прорече́мъ?* Ски́ніи и́стинныя священнодѣ́теля всехва́льна,* хода́тая къ Бо́гу и тва́ри боголѣ́пна,* ча́шу, пи́во боже́ственное точа́щу,* свѣти́льника, я́ко жи́зни сло́во иму́ща,* отъ за́пада у́бо исходя́ща,* на восто́цѣ же явля́ющася.* Моли́ спасти́ся душа́мъ на́шимъ.

Сла́ва, и ны́нѣ, богоро́диченъ:

Кому́ уподо́билася еси́, окая́нная душе́,* къ покая́нію ника́коже возни́чущи* и огня́ не ужаса́ющися, злы́хъ ожида́ющаго?* Воста́ни, и Еди́ну къ заступле́нію ско́рую призови́, и возопíй:* Дѣ́во Ма́ти, моли́ Твоего́ Сы́на и Бо́га на́шего* изба́вити мя́ отъ сѣ́ти льсти́ваго.

Крестобогоро́диченъ:

Агница Агнца я́ко ви́дѣ,* на дре́вѣ просте́рта во́лею Кре́стнѣмъ,* вопія́ше, ма́терски болѣ́знующи съ пла́чемъ:* Сы́не Мо́й, что́ стра́нное сіе́ видѣ́ніе?* Всѣ́мъ жи́знь дая́й я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* Сла́влю Твое́ мно́гое, Бо́же Мо́й, снизхожде́ніе.


[НА УТРЕНИ,]
Кано́нъ, творе́ніе Іо́сифово. Гла́съ 8.

Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ; лю́таго врага́ вода́ потопи́, и непроходи́мое про́йде Изра́иль; пѣ́снь же воспѣва́шеся: Го́сподеви пои́мъ, сла́вно бо просла́вися.

Болѣ́зни мно́ги, Марти́не, претерпѣ́лъ еси́ за Христа́ Бо́га и ны́нѣ изше́лъ еси́ къ неболѣ́зненнѣй жи́зни, до́брѣ подвиза́вся. Тѣ́мъ моея́ души́ лю́тыя болѣ́зни облегчи́, я́ко да воспою́ тя́, моли́твами твои́ми просвѣща́емь.

Существа́ два́, и двѣ́ во́ли, и дѣ́йства сугу́ба нося́ща, блаже́нне, Еди́наго отъ Честны́я Тро́ицы научи́лъ еси́, Христа́, Пресу́щнаго Бо́га, и и́же не та́ко честву́ющія, вся́ отве́рглъ еси́, Марти́не свяще́ннѣйше.

Неду́говавшія безслове́сно безу́мнѣ, въ Еди́номъ Христѣ́, еди́ну му́дрствующе во́лю, ра́зумомъ и́стиннымъ и вѣ́рою украша́емь, обличи́лъ еси́, Марти́не, я́вственно и, ра́дуяся, взыва́лъ еси́: пои́мъ Го́сподеви, сла́вно бо просла́вися.

Богоро́диченъ: Иже по естеству́ Боже́ственному Неви́димый, ви́дѣнъ бы́сть изъ Тебе́ Младе́нецъ, Человѣ́къ бы́въ, сугу́ба я́ко вои́стинну хотѣ́нія и дѣ́йства нося́ во Еди́ной Ѵпоста́си, Его́же моли́, Пренепоро́чная, вся́ ны́ спасти́, любо́вію пою́щія Тя́.

Пѣ́снь 3.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ, и бу́ди на́мъ утвержде́ніе, Тя́ во и́стинѣ призыва́ющимъ.

Сы́й испо́лненъ, всеблаже́нне, боже́ственныя ре́вности, собра́лъ еси́ свяще́ненъ, Марти́не, Собо́ръ и церко́вное утверди́лъ еси́ уче́ніе.

Посреди́ Собо́ра отве́рглъ еси́ Пи́рра, Се́ргія и Ѳео́дора, Ки́ра же и подо́бныя тѣ́мъ буесло́вящія злосла́вныя, о́тче.

Изъ Ри́ма ну́ждею изгна́нъ, обше́лъ еси́, я́ко со́лнце, лучи́ испуща́я, преподо́бне, правосла́вныя просвѣща́я вся́.

Богоро́диченъ: Отцу́ Равноче́стна и Сопресто́льна па́че сло́ва родила́ еси́, дѣ́йства два́ нося́ща и двѣ́ во́ли, Всесвята́я Отрокови́це.

Сѣда́ленъ, гла́съ 4. Подо́бенъ: Вознесы́йся.

Исповѣ́даніи свяще́нными укра́шься, му́ченически же жи́знь соверши́въ, къ небесе́мъ восте́клъ еси́, Марти́не му́дре, вѣнце́мъ неувяда́емымъ отъ Бо́га вѣнча́лся еси́. Тѣ́мже святу́ю твою́ пра́зднуемъ па́мять, вопію́ще: помяни́ на́съ, священноблаже́нне, Христу́ предстоя́.

Сла́ва, и ны́нѣ, богоро́диченъ:

По Бо́зѣ во Тво́й, Богоро́дице, прибѣга́ю, смире́нный, покро́въ боже́ственный и, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́ки, и трепе́щу, моле́ніе сотвори́, Чи́стая, къ Сы́ну Твоему́ отъ си́хъ изба́вити мя́.

Крестобогоро́диченъ:

Иже отъ Безнача́льнаго Отца́ рожде́ннаго напослѣ́докъ Тя́ пло́тію ро́ждшая, на Крестѣ́ ви́сяща, зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́, распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Всѣ́лъ еси́ на ко́ни, апо́столы Твоя́, Го́споди, и прія́лъ еси́ рука́ма Твои́ма узды́ и́хъ, и спасе́ніе бы́сть ѣжде́ніе Твое́ вѣ́рно пою́щимъ: сла́ва си́лѣ Твое́й, Го́споди .

Непра́ведно отъ престо́ла твоего́, му́дре, изгоня́емь, отъ человѣ́къ непра́ведныхъ пра́ведный пострада́ти благоволи́лъ еси́, я́ко да пра́ведное уче́ніе церко́вное, о́тче, спасе́ши невреди́мо.

Стоя́ среди́ пребеззако́ннующихъ я́ко зако́ненъ страда́лецъ, святи́телю богопрія́тне, и отъ ни́хъ оскорбля́емь, и наруга́емь, и влачи́мь всу́е, пребы́лъ еси́ умо́мъ непревра́щенъ.

Младе́нцевъ вмѣни́лъ еси́, о́тче, стрѣля́нія, Марти́не, всу́е оскорбля́ющихъ тя́ и, терпѣли́вно пострада́въ, гони́мь, и вя́жемь всу́е, и въ темни́цахъ заключа́емь.

Богоро́диченъ: Во двою́ существу́ богому́жно познава́емаго, отъ Тро́ицы Еди́наго родила́ еси́, я́ко Бо́га и Человѣ́ка, во́ли нося́ща прили́чно обѣ́ма естество́ма, Дѣ́во Пренепоро́чная.

Пѣ́снь 5.

Ирмо́съ: Отъ но́щи невѣ́дѣнія по душелови́тельному пути́ при́сно блудя́щаго, свѣ́томъ ра́зума Твоего́, Го́споди, преднаставля́я мя́, на стезю́ за́повѣдей Твои́хъ напра́ви.

Свяще́ннѣйшимъ твои́мъ сло́вомъ, о́тче, всесвяще́нное уче́ніе я́вѣ утверди́лъ еси́ и ерети́ческія полки́ низве́рглъ еси́, претерпѣва́я изгна́нія, и темни́цы, и ско́рби мно́ги.

Дрема́нія твои́мъ вѣ́ждомъ, преподо́бне, не да́лъ еси́, до́ндеже вселе́ніе Бо́гу бы́лъ еси́, и всю́ развѣ́ялъ еси́ е́реси пре́лесть, му́ченически подвиза́вся.

Вражде́бно тя́, я́коже звѣ́ріе, влеко́ша вери́гами, му́дре, врази́, связа́вше посредѣ́ гра́да, руга́тельно, укоря́юще, и ху́ляще, и безъ студа́ на тя́ напа́дающе.

Богоро́диченъ: Неискусобра́чно, Дѣ́во, неопи́санное Сло́во пло́тію ро́ждши, пло́ти моея́ стра́сти умертви́, оживи́ же ду́шу мою́, умерщвле́нную прегрѣше́ньми.

Пѣ́снь 6.

Ирмо́съ: Бѣ́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю, и спаси́.

Разсѣ́деся лука́вый при ногу́ твое́ю свяще́нною, богоно́се, и лука́выхъ человѣ́къ бездве́рная уста́ загражда́ются твои́мъ сло́вомъ, и явля́ется, сія́ющи, уче́ніе боже́ственное, па́че со́лнца.

Простира́ютъ тя́ неща́дно и у́жи связу́ютъ преле́стницы, вя́жуща вся́ку ле́сть и ерети́ческій сою́зъ растерза́юща сою́зомъ боже́ственныхъ уче́ній твои́хъ, святи́телю о́тче Марти́не свяще́ннѣйше.

Стоя́лъ еси́ предъ суди́щемъ судя́щихъ, осужда́я пре́лесть проповѣ́дающихъ еди́ну во Христѣ́, о́тче, во́лю и му́ченическими я́вѣ украша́яся вѣнцы́, богоблаже́нне Марти́не му́дре.

Богоро́диченъ: Зако́ни естества́ въ Тебѣ́ разоря́ются, неизрече́нно бо ражда́еши Содѣ́теля всѣ́хъ, Богоро́дице Всепѣ́тая, я́ко Бо́га же и Человѣ́ка, двѣ́ во́ли же иму́ща и дѣ́йства, Ма́ти Дѣ́во.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Сугу́быхъ дѣ́йствъ и хотѣ́ній, о́тче, Христа́ лиши́вшіися лиши́ша тя́ престо́ла, отда́вше изгна́ніемъ да́льнимъ, зову́щаго: оте́цъ на́шихъ Бо́же, благослове́нъ еси́.

Проше́дъ многовре́менныя темни́цы я́ко храни́тель непоро́чныя вѣ́ры, ерети́ческую тму́ ума́лилъ еси́ и пѣ́ти вѣ́рныя просвѣти́лъ еси́: оте́цъ на́шихъ Бо́же, благослове́нъ еси́.

Якоже ле́въ, о́тче, упова́въ, на беззако́нныя де́рзостно наскочи́лъ еси́ Ѳео́дора, и Ки́ра, и Се́ргія, и Пи́рра, и си́хъ единомы́сленныя отлуча́я Христо́вы Святы́я Це́ркве.

Богоро́диченъ: Во дву́ во́ляхъ и дѣ́йствахъ дву́хъ изъ Тебе́, Пренепоро́чная, рожде́йся несказа́нно, Иже си́це му́дрствующія спаса́етъ, зову́щія: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Стѣсня́емь, о́тче, немощми́, и лю́тыми изгна́ніи, и многообра́зными му́ками, муче́нія вѣнцы́ я́ко му́ченикъ прія́лъ еси́.

Блаже́нства богоизбра́ннаго сподо́бился еси́, изгоня́емь, Марти́не, и пра́вды бли́зъ бы́лъ еси́, изгна́въ отъ среды́ непра́ведную е́ресь.

Украси́въ Петро́въ боже́ственный престо́лъ и на того́ ка́мени Це́рковь неколе́блему соблю́дъ, Марти́не, съ си́мъ просла́вился еси́.

Богоро́диченъ: Святѣ́йши вы́шнихъ во́инствъ и херуви́мъ превы́шши, Ма́ти Бо́жія су́щи, страсте́й плотски́хъ мя́ превы́шша сотвори́.

Пѣ́снь 9.

Ирмо́съ: Уста́вы прешла́ еси́ естества́, Содѣ́теля заче́нши и Го́спода, и две́рь спасе́нія мíрови была́ еси́, тѣ́мъ Тя́, Богоро́дице, непреста́нно велича́емъ.

Священнодѣ́тель свяще́ннѣйшій, исповѣ́дникъ же и му́ченикъ бы́въ, съ патріа́ршескими ли́ки, Марти́не, всегда́ досто́йно ра́дуешися, тѣ́мже тя́ вѣ́рою ублажа́емъ.

Яко свѣтоза́рное, блаже́нне, со́лнце, возсія́лъ еси́ къ восто́комъ отъ за́пада, всю́ заря́ми благоче́стія зе́млю просвѣти́лъ еси́ и отгна́лъ еси́ тму́ ерети́чествующихъ глубоча́йшую.

Ста́немъ въ дому́ Бо́га на́шего, проповѣ́дающе стра́сти, и боре́нія, и исповѣ́данія небому́дреннаго отца́ на́шего Марти́на и сего́ любо́вію ублажи́мъ.

Твое́ свято́е преставле́ніе дне́сь свѣ́тло соверша́емъ, испо́лни ра́дости помышле́нія восхваля́ющихъ тя́, богому́дре святи́телю, въ не́йже вся́ ны́ помяни́.

Богоро́диченъ: Гласово́мъ отце́въ повину́ющеся, во дву́ естества́хъ и во́ляхъ, Чи́стая, Еди́наго отъ Тро́ицы, изъ Тебе́ ражда́емаго, вѣ́рно исповѣ́дуемъ и Тя́ непреста́нно велича́емъ.

Источникъ: Минíа, мѣ́сяцъ Апрíллій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 51 об. – 54 об.

/ Къ оглавленію раздѣла /


Наверхъ / Къ титульной страницѣ

0